იმერეთი. „სამართლიანი არჩევნებისა და დემოკრატიის საერთაშორისო საზოგადოება"  აგრძელებს რეგიონებში შეხვედრების ციკლს. ამჯერად, შეხვედრები შედგა ზესტაფონისა და წყალტუბოს მუნიციპალიტეტებში. „დამსწრე საზოგადოებას მიეწოდა ინფორმაცია „სამართლიანი არჩევნებისა”  იურიდიული დახმარების მომსახურების შესახებ, რაც ითვალისწინებს საჯარო სამსახურში კონკურსებისა და ატესტაციის შედეგად, ასევე უკანონო გათავისუფლებისას დაზარალებულ პირთათვის უფასო იურიდიულ კონსულტაციას, დოკუმენტაციის მომზადებას და სასამართლოში წარმომადგენლობას", ნათქვამია ორგანიზაციის ვებ-გვერდზე. სრულად... წყარო: isfed.ge

თბილისი. ახალგაზრდა ადვოკატები უკრაინული მედია-საშუალებით გავრცელებულ სამალავებში აღმოჩენილ წამების და არაადამიანური მოპყრობის კადრების გავრცელებას ეხმაურება. ორგანიზაცია, თვლის რომ „2003-2012 წლებში დანაშაულის ჩამდენ პირთა პოლიტიკური და სამართლებრივი პასუხისმგებლობის საკითხი უნდა დადგეს... ახალგაზრდა ადვოკატები საქართველოს პარლამენტს სთავაზობს, კანონმდებლობაში გაჩნდეს „სისტემური დანაშაულის" რეგულაციასთან დაკავშირებით ჩანაწერი. ორგანიზაცია საკანონმდებლო დონეზე საკითხის დარეგულირებას აუცილებლად მიიჩნევს", ნათქვამია ორგანიზაციის ვებ-გვერდზე. სრულად... წყარო: www.barristers.ge

თბილისი. საერთაშორისო გამჭვირვალობა საქართველო უკრაინაში გავრცელებულ ვიდეო კადრებს ეხმაურება. „აუცილებელია, რომ ადამიანების წამებაში მონაწილე ყველა პირმა სათანადოდ აგოს პასუხი მართლმსაჯულების წინაშე. ამასთან, პასუხისმგებლობა იმ პირებსაც უნდა დაეკისროთ, ვინც აღნიშნული სისტემის (პატიმრების წამება და უკანონო ფარული მიყურადება) შექმნაში მიიღო მონაწილეობა. მნიშვნელოვანია ასევე სახელმწიფომ შექმნას ამგვარი ქმედებების ეფექტური პრევენციის სისტემა", ნათქვამია ორგანიზაციის განცხადებაში. სრულად... წყარო: www.transparency.ge

თბილისი. ჰააგის სისხლის სამართლის საერთაშორისო სასამართლოს პროკურორი 2008 წელს, შეიარაღებული კონფლიქტის დროს ადამიანურობის წინააღმდეგ ჩადენილი დანაშაულების ფაქტებზე გამოძიებას ითხოვს. გამოძიება ეყრდნობა რამდენიმე წყაროს, მათ შორისაა 2010 წელს, არასამთავრობო ორგანიზაციების მიერ მომზადებული ანგარიში. „ანგარიშში თავმოყრილი და გაანალიზებულია კონფლიქტის დროს საქართველოს ტერიტორიაზე მასობრივად ჩადენილი სასტიკი და არაჰუმანური ქმედების ამსახველი დოკუმენტური მასალა. მოცემულია 1055 დევნილის ჩვენება", ნათქვამია ორგანიზაციის ვებ-გვერდზე. სრულად... წყარო: www.osgf.ge

თბილისი. საერთაშორისო გამჭვირვალობა საქართველო სამეგრელოში იძულებით გადაადგილებულ პირთა კომპაქტური განსახლების ობიექტების შესახებ ბლოგპოსტს აქვეყნებს. „საერთაშორისო გამჭვირვალობა - საქართველო" დაინტერესდა, თუ რა პირობებში უწევთ იძულებით გადაადგილებულ პირებს კომპაქტური განსახლების ობიექტებში ცხოვრება სამეგრელო-ზემო სვანეთის რეგიონში. კვლევის ფარგლებში შევისწავლეთ ზუგდიდის, წალენჯიხის, სენაკის და ხობის მუნიციპალიტეტებში მდებარე კომპაქტური განსახლების ობიექტების იმ ნაწილში არსებული მდგომარეობა, რომელთა რეაბილიტაცია დღემდე არ ჩატარებულა", ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. „ახალგაზრდა ადვოკატები" ლისის ტბის გასხვისების საქმესთან დაკავშირებით სკანდალურ დოკუმენტს აქვეყნებს. დოკუმენტის საფუძველზე „სახელმწიფომ მაშინდელი ფინანსური პოლიციის მეშვეობით, ბიზნესმენ რამაზ ახვლედიანის მიმართ ტოტალური ზეწოლა განახორციელა და ქონება მას ღამის საათებში დაათმობინეს", ნათქვამია ორგანიზაციის განცხადებაში. სრულად... წყარო: www.barristers.ge

თბილისი. 14 ოქტომბერს, საქართველოს ნაციონალური და რეგიონალური ტელემაუწყებლები შეუერთდნენ მაუწყებლებს შორის სპეციალურ შეთანხმებას. მემორანდუმის მიზანია ბავშვთა საკითხებთან დაკავშირებით არსებული თვითრეგულირების მექანიზმების გააქტიურება. „შეთანხმება გულისხმობს, პროფესიული და ეთიკური სტანდარტების, ასევე, ბავშვის უზენაესი ინტერესის მიმართ მაღალი პასუხისმგებლობის დადასტურებას და მაუწყებლების შიგნით არსებული თვითრეგულირების მექანიზმების გააქტიურებას", ნათქვამია სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. „საქართველოს დემოკრატიული ინიციატივა" (GDI) აგვისტოს თვის საინფორმაციო ბიულეტენს აქვეყნებს. ბიულეტენში მიმოხილულია ადამიანის უფლებათა სფეროში მიმდინარე მოვლენები. სრულად... წყარო: gdi.ge

თბილისი. საერთაშორისო გამჭვირვალობა – საქართველო აქვეყნებს ახალ ბლოგს: „რეგიონულ მედიაზე ზეწოლის გახშირებული ფაქტები". ორგანიზაციის ინფორმაციით, „ბოლო ორი წლის მანძილზე ცენტრალური და ადგილობრივი ხელისუფლების წარმომადგენლების მხრიდან რეგიონულ მედიაზე ზეწოლის 15–ზე მეტი შემთხვევა დაფიქსირდა...". სრულად... წყარო: transparency.ge

თბილისი. World Jewish Relief-ის მიერ მხარდაჭერილი პროექტის „თანასწორობა ხელმისაწვდომობისთვის" პროექტის ფარგლებში, კოალიციამ დამოუკიდებელი ცხოვრებისათვის წამოიწყო პარკინგის კამპანია „შენი ადგილი აქ არ არის!". „კამპანიის ფარგლებში, შშმ პირები მეგობრებთან და სხვა მოხალისეებთან ერთად, შეზღუდული შესაძლებლობის მქონე პირთა საპარკინგე ადგილას მდგომ მანქანებს, რომლებსაც არ აქვთ აღნიშნულ ადგილზე გაჩერების ნებართვის ნიშანი, აკრავენ სტიკერებს წარწერით, „გადააყენე", ნათქვამია სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. საერთაშორისო გამჭვირვალობა საქართველო მამხილებელთა დაცვის აუცილებლობასთან დაკავშირებით ბლოგპოსტს აქვეყნებს. გიორგი ბაბუნაშვილისა და რუსლან ბაზიაშვილის შემთხვევების გათვალისწინებით ორგანიზაცია აღნიშნავს, რომ „არასრულყოფილი საკანონმდებლო რეგულაციების გამო საჯარო ინტერესის სასარგებლოდ მოქმედი საჯარო მოხელეები ვერ სარგებლობენ მამხილებლისთვის გათვალისწინებული დაცულობის სამართლებრივი გარანტიებით. საქართველოს ხელისუფლებამ დაუყოვნებლივ უნდა უზრუნველყოს შემოთავაზებული ცვლილებების მიღება, რათა გაძლიერდეს მამხილებელთა დაცვის გარანტიები და წაახალისოს მხილების შემთხვევები", ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. 7 ოქტომბერს, სახალხო დამცველმა სპეციალური პრევენციული ჯგუფის მიერ N2 პენიტენციურ დაწესებულებაში განხორციელებული ვიზიტის ანგარიში გამოაქვეყნა. „ვიზიტის შედეგად გაირკვა, რომ N2 დაწესებულებაში პრობლემას წარმოადგენს უსაფრთხოების თვალსაზრისით გამოყენებული ვიზუალური მეთვალყურეობის პრაქტიკა. არადამაკმაყოფილებელია სამარტოო საკნების სანიტარიულ-ჰიგიენური მდგომარეობა, მონიტორინგის პერიოდში არ ხდებოდა დაწესებულების მაღაზიის პროდუქციით სათანადო მომარაგება", ნათქვამია ომბუდსმენის ანგარიშში. სრულად... წყარო: www.ombudsman.ge

სამეგრელო. პროექტის „სამეგრელო-ზემო სვანეთის რეგიონში სახალხო დამცველის ოფისის გაძლიერება" მხარდაჭერით, ჟურნალისტებისა და ადგილობრივი თვითმართველობების წარმომადგენლებისთვის ტრენინგი გაიმართა. „გენდერული საკითხებისა და ჟურნალისტური ეთიკის გაშუქების თემაზე გამართულ ტრენინგზე განიხილეს გენდერული თანასწორობის, სექსიზმის, სტერეოტიპული დამოკიდებულების და სქესის ნიშნით დისკრიმინაციის საკითხები", ნათქვამია სახალხო დამცველის ოფიციალურ ვებ-გვერდზე. სრულად... წყარო: www.ombudsman.ge

თბილისი. 5 ოქტომბერს, თბილისის სახელმწიფო უნივერსიტეტში გაიმართა პუბლიკაციის პრეზენტაცია: „ბავშვის უფლებები საერთაშორისო სამართალში". პუბლიკაცია იუნისეფის, ევროკავშირის და ნიდერლანდების მთავრობის დახმარებით მომზადდა. სრულად... წყარო: ორგანიზაციის ვებ-გვერდი სოციალურ ქსელში

თბილისი. 2 ოქტომბერს, პარლამენტი მესამე მოსმენით განიხილავს ახალი კანონის პროექტს „საჯარო სამსახურის შესახებ", რომელიც საჯარო სექტორის გარდაქმნას გულისხმობს. კანონპროექტი ცვლილებების პარალელურად, ახლებურად არეგულირებს საჯარო სამსახურში დასაქმებულთა უფლებრივ მდგომარეობას. ადამიანის უფლებების სწავლებისა და მონიტორინგის ცენტრი (EMC) თვლის, რომ „მიუხედავად ცალკეული შენიშვნების გათვალისწინებისა, წარმოდგენილი პროექტი, კვლავ მნიშვნელოვან ხარვეზებს შეიცავს და ვერ უზრუნველყოფს საჯარო მოხელეთა შრომითი უფლების სათანადოდ გარანტირებას. ამასთან, ზოგიერთ შემთხვევაში, აუარესებს დასაქმებულთა უფლებრივ მდგომარეობას", ნათქვამია ორგანიზაციის განცხადებაში. სრულად... წყარო: emc.org.ge

თბილისი. გაეროს ბავშვთა ფონდი (UNICEF) ეროვნული კანონმდებლობის ანალიზს აქვეყნებს ბავშვთა უფლებების კონვენციის და შეზღუდული შესაძლებლობის მქონე პირთა კონვენციის მიხედვით. „ანგარიშში წარმოდგენილია საქართველოს ეროვნული საკანონმდებლო ბაზის ანალიზი და განხილულია ძირითადი საკანონმდებლო ხარვეზები გაეროს ბავშვთა უფლებების კონვენციასა (შმდეგ - CRC) და შეზღუდული შესაძლებლობის მქონე პირთა უფლებების კონვენციასთან მიმართებაში. აგრეთვე, შემოთავაზებულია რეკომენდაციები საკანონმდებლო ცვლილებებისთვის”, ნათქვამია ორგანიზაციის ვებ-გვერდზე. სრულად... წყარო: unicef.ge

თბილისი. 1 ოქტომბერს, სახალხო დამცველმა სადღეღამისო სპეციალიზებულ დაწესებულებებში ხანდაზმულ პირთა უფლებრივი მდგომარეობის შესახებ მონიტორინგის ანგარიში წარმოადგინა. „სახალხო დამცველმა შესაბამისი რეკომენდაციებით მიმართა პასუხისმგებელ უწყებებს, რათა სათანადოდ განახორციელონ სახელმწიფო ზრუნვის ქვეშ მყოფი ხანდაზმული პირების უფლებების რეალიზაცია, უზრუნველყონ არსებული ხარვეზების აღმოფხვრა", ნათქვამია სახალხო დამცველის განცხადებაში. სრულად... წყარო: www.ombudsman.ge

თბილისი. 1 ოქტომბერი ხანდაზმულთა საერთაშორისო დღეა. სახალხო დამცველი მოუწოდებს სახელმწიფო ხელისფლების ორგანოებს უზრუნველყონ ხანდაზმულთა უფლებების დაცვა და რეალიზება. „სახელმწიფოს არ გააჩნია ხანდაზმულთა მიმართ ეფექტური პოლიტიკა და მათი უფლებებისა და სოციალური კეთილდღეობის უზრუნველყოფის სტრატეგია. შეფერხებულია დაბერების შესახებ მადრიდის საერთაშორისო სამოქმედო გეგმის და მისი რეგიონული იმპლემენტაციის სტრატეგიის განხორციელების პროცესი", ნათქვამია სახალხო დამცველის განცხადებაში. სრულად... წყარო: www.ombudsman.ge

თბილისი. 30 სექტემბერს, საქართველოს სახალხო დამცველი და მისი მოადგილეები საქართველოში ევროპის საბჭოს ოფისის ახალ ხელმძღვანელს კრისტიან ურსეს შეხვდნენ. „მხარეებმა განიხილეს ის პროექტები, რომელთაც სახალხო დამცველის აპარატი წლების მანძილზე ევროსაბჭოს დაფინანსებითა და მხარდაჭერით ახორციელებდა. ასევე, სამომავლო თანამშრომლობის გაღრმავების აუცილებლობასა და პერსპექტივებზეც ისაუბრეს", ნათქვამია სახალხო დამცველის ვებ-გვერდზე. სრულად... წყარო: www.ombudsman.ge

თბილისი. საერთაშორისო გამჭვირვალობა საქართველო საზოგადოებრივი აზრის გამოკითხვის შედეგებს აქვეყნებს. გამოკითხვა შეეხო სამუშაო პირობებს, სამსახურის ტიპს და ზეგანაკვეთურ სამუშაოსდა ანაზღაურებას. „დაქირავებულ მუშაკთა 78% აღნიშნავს, რომ უკანასკნელი ექვსი თვის განმავლობაში ზეგანაკვეთური სამუშაო არ გაუწევია, 7% კი ზეგანაკვეთურად თითქმის ყოველდღე მუშაობს. ასეთ შემთხვევებში, ზეგანაკვეთური შრომა 62%-ს არ უნაზღაურდება, 22%-ს ყოველთვის უნაზღაურდება, დანარჩენს კი პერიოდულად", ნათქვამია ორგანიზაციის კვლევაში. გამოკითხვა ჩატარდა 2015 წლის აპრილ-მაისის პერიოდში „კავკასიის კვლევითი რესურსების ცენტრის" მიერ. სრულად... წყარო: www.transparency.ge

თბილისი. ადამიანის უფლებების სწავლებისა და მონიტორინგის ცენტრმა (EMC) შეისწავლა მომსახურების ქსელის სხვადასხვა სფეროში არსებული შრომითი პრაქტიკა. „ნათელია, რომ დასაქმებულთა შრომით ექსპლუატაციას დამსაქმებლები ახორციელებენ ერთგვაროვანი მეთოდებით. მათ შორის, არაგონივრულად ხანგრძლივი დღიური და სამუშაო კვირის დაწესებით, ზეგანაკვეთური სამუშაო საათების არაადეკვატური ანაზღაურებით, ორგანიზაციისათვის მიყენებული ზიანის ანაზღაურების დასაქმებულთათვის დაკისრების უსამართლო პრაქტიკის გამოყენებით, ხელფასიდან ჯარიმების სახით თანხების ჩამოჭრის გაუმჭვირვალე პროცედურით, არასათანადო სახელფასო პოლიტიკით და სხვა", ნათქვამია ორგანიზაციის კვლევაში. EMC მხარს უჭერს აქტივისტთა ჯგუფის „თბილისის სოლიდარობის ქსელის" კამპანიას სასურსათო მაღაზიათა სხვადასხვა ქსელში დასაქმებულთა უფლებების დასაცავად. სრულად... წყარო: emc.org.ge

თბილისი. საქართველოს პარლამენტმა 2014 წელს მიიღო კანონი „დისკრიმინაციის ყველა ფორმის აღმოფხვრის შესახებ". კანონით დისკრიმინაციის აღმოფხვრა და ზედამხედველობა სახალხო დამცველს დაევალა. ომბუდსმენი დისკრიმინაციასთან ბრძოლისა და ზედამხედველობის შესახებ 2015 წლის აგვისტოს ჩათვლით განხორციელებულ საქმიანობას ანგარიშში მიმოიხილავს. „ანგარიშში მიმოხილულია სახალხო დამცველის მიერ ცალკეული განცხადებების/საჩივრების მიღების, დასაშვებობის ეტაპის გავლისა და საბოლოო გადაწყვეტილების მიღების პროცედურები. ანგარიში აგრეთვე მოიცავს მტკიცებულებათა მოპოვება/შეგროვებისა და მტკიცების ტვირთის განაწილების თავისებურებებს, სასამართლო მეგობრის მოსაზრების წარდგენისა და მხარეთა მორიგების მიზნით ჩატარებული ზეპირი მოსმენის გამართვის სპეციფიკას", ნათქვამია სახალხო დამცველის ვებ-გვერდზე. სრულად... წყარო: www.ombudsman.ge