თბილისი. საქართველოს სახალხო დამცველმა წინადადებით მიმართა კომუნიკაციების ეროვნულ კომისიას შეზღუდული შესაძლებლობის მქონე პირთათვის ინფორმაციის მისაწვდომობის თაობაზე. „საქართველოს კომუნიკაციების ეროვნული კომისიის მიერ ამ ეტაპზე გატარებული ღონისძიებები სათანადოდ ვერ უზრუნველყოფს მასობრივი ინფორმაციის საშუალებებში სურდოთარგმანის, სუბტიტრების, ბრაილის შრიფტის, ტიფლოკომენტარის, გამაძლიერებელი და სხვა სპეციალური საკომუნიკაციო საშუალებების გამოყენებას”, ნათქვამია სახალხო დამცველის განცხადებაში. ზემოთ აღნიშნულიდან გამომდინარე სახალხო დამცველი კომუნიკაციების ეროვნულ კომისიას წინადადებით მიმართავს... სრულად... წყარო: www.ombudsman.ge

თბილისი. ორგანიზაციამ „ახალგაზრდა ადვოკატებმა" სამართლიანობის აღდგენის პროცესის, მართლმსაჯულების ხარვეზებისა და ქონებაჩამორთმეულთა საქმეებზე არსებულ პრობლემებთან დაკავშირებით მრგვალი მაგიდა გამართეს. ახალგაზრდა ადვოკატებმა მედიის წარმომადგენლებს საკანონმდებლო წინადადება გააცნეს. „მომზადებული საკანონმდელო წინადადება რეალური გამოსავალია იმ ქონებაჩამორთმეულთა საქმეებზე, რომლებიც სამართლიანობის აღდგენას და ქონების დაბრუნებას, კანონმდებლობაში არსებული ხარვეზებისა და წინააღმდეგობების გამო ვერ ახერხებენ", ნათქვამია ორგანიზაციის ვებ-გვერდზე. სრულად... წყარო: barristers.ge

თბილისი. კოალიცია „დამოუკიდებელი და გამჭვირვალე მართლმსაჯულებისათვის" ეხმაურება მიმდინარე წლის ივლისში მოსამართლეთა შერჩევა-დანიშვნის პროცესს. რომელიც, როგორც კოალიციის მიერ გავრცელებულ განცხადებაშია ნათქვამი, „გამჭვირვალობისა და ღიაობის განსაკუთრებით დაბალი ხარისხით ხასიათდებოდა. ...მიგვაჩნია, რომ მოსამართლეთა შერჩევა-დანიშვნის პროცესის გამჭვირვალობა უმნიშვნელოვანესია მოსამართლეთა დამოუკიდებლობისა და სასამართლო სისტემისადმი საზოგადოების ნდობის უზრუნველსაყოფად. ამ პროცესის დახურვა კი ვერ შეუწყობს ხელს სასამართლო სისტემის გაჯანსაღებასა და მისი ავტორიტეტის ამაღლებას პროფესიულ წრეებსა თუ ფართო საზოგადოების თვალში". სრულად... წყარო: gyla.ge

თბილისი. სახალხო დამცველი მხარს უჭერს შეზღუდული შესაძლებლობების პირთა დამოუკიდებელი ცხოვრების შექმნის მიზნით განხორციელებულ ღონისძიებებს. თუმცა აღნიშნავს, რომ მსგავსი საქმიანობა სრულ შესაბამისობაში უნდა იყოს ეროვნულ კანონმდებლობასთან და საერთაშორისო რეგულაციებთან. მედის მიერ გავრცელებული ინფორმაციით, ნაძალადევის გამგეობის ტერიტორიაზე, 4 საცხოვრებელ კორპუსში დამონტაჟდა პანდუსები შეზღუდული შესაძლებლობის მქონე პირებისთვის. ანალოგიური სამუშაოები გრძელდება სხვა კორპუსებშიც. „გავრცელებული ფოტო და ვიდეო–მასალიდან ნათლად ჩანს, რომ დამონტაჟებული კონსტრუქცია არ შეესაბამება უსაფრთხოების მინიმალურ სტანდარტს და ვერ უზრუნველყოფს პირის დამოუკიდებლად გადაადგილებას. საქართველოს სახალხო დამცველი მოუწოდებს შესაბამის ორგანოებს, შეზღუდული შესაძლებლობის მქონე პირთა დამოუკიდებელი ცხოვრების ხელშეწყობის მიზნით გატარებული ნებისმიერი საქმიანობის ფარგლებში, მკაცრად დაიცვან საკანონმდებლო აქტებით დაწესებული მოთხოვნები", ნათქვამია სახალხო დამცველის განცხადებაში. სრულად... წყარო: www.ombudsman.ge

თბილისი. ადამიანის უფლებების სწავლებისა და მონიტორინგის ცენტრი (EMC) ყოფილ სამხედრო ჰოსპიტალში მაცხოვრებელი სოციალურად დაუცველი ოჯახების განსახლების პროცესს აფასებს. ცენტრი მიიჩნევს, რომ „...სახელმწიფოს მიერ უსახლკარო ოჯახების განსახლების მიზნით ამ დრომდე წარმართული პროცესი არ არის სათანადოდ მომზადებული, რაც სულ უფრო ამცირებს სამართლიანი გადაწყვეტილებების მიღების შესაძლებლობას და იწვევს განსასახლებელი პირების უნდობლობას სახელმწიფოს მიერ შეთავაზებული ალტერნატივების მიმართ"... ნათქვამია ინფორმაციაში. სრულად... წყარო: emc.org.ge

თბილისი. საქართველოს სახალხო დამცველმა რეკომენდაციით მიმართა ახმეტის მუნიციპალიტეტის გამგებელს მედია საშუალებისთვის ინფორმაციის არგაცემის კანონიერების თაობაზე. 2015 წლის 1 ივნისს, ახმეტის მუნიციპალიტეტის გამგეობამ უარი უთხრა კახეთის საინფორმაციო ცენტრს მუნიციპალიტეტის გამგებლის წარმომადგენლების ვინაობისა და საკონტაქტო ინფორმაციის გაცემაზე, სახალხო დამცველი თვლის, რომ ამ ფაქტით კახეთის საინფორმაციო ცენტრს კანონმდებლობით მინიჭებული ინფორმაციის მიღების თავისუფლება შეეზღუდა. სრულად წყარო: ombudsman.ge

თბილისი. 7 აგვისტოს, ფონდი „ღია საზოგადოება საქართველოს" ინიციატივით მრგვალი მაგიდა გაიმართა მოწმეთა დაკითხვის წესთან დაკავშირებით. შეხვედრაზე საერთაშორისო ექსპერტებმა, სასამართლოს, პროკურატურის, პარლამენტის და არასამთავრობო ორგანიზაციების წარმომადგენლებმა საკუთარი პოზიციები წარმოადგინეს. კვლევის ავტორმა, რიჩარდ ვოგლერმა, ქართველ კოლეგებს რეკომენდაციები გაუზიარა იმასთან დაკავშირებით, თუ რა ღონისძიებები უნდა გატარდეს საქართველოში მოწმეთა დაკითხვის წესის რეფორმირებისთვის. სრულად... წყარო: www.osgf.ge

თბილისი. სახალხო დამცველმა გამყოფი ხაზის მიმდებარე სოფლებში დაზარალებული მოსახლეობის საჭიროებებზე რეაგირების დროებითი სამთავრობო კომისიის თანათავმჯდომარეებს წინადადებით მიმართა. უჩა ნანუაშვილი აცხადებს, რომ აუცილებელია კონფლიქტით დაზარალებული მოსახლეობის სოციალური უფლებების რეალიზაცია. „შეძლებისდაგვარად შემჭიდროვებულ ვადებში გამოიყოს ფინანსური სახსრები ომის დროს დაზიანებული სახლების რეაბილიტაციისათვის, მათ შორის გორის მუნიციპალიტეტს სოფელ ზარდიაანთკარში, მიღებულ იქნას ოპტიმალური გადაწყვეტილება კონფლიქტით დაზარალებულ შესაბამის სოფლებში მობილური ან ფიქსირებული სატელეფონო კომუნიკაციის უზრუნველსაყოფად, მოხდეს ომით დაზარალებული ბავშვების ტრავმირების ხარისხის შეფასება და სპეციალური სასკოლო პროგრამების შემუშავება, რომლებიც მიმართული იქნება იძულებით გადაადგილებულ და კონფლიქტის ზონაში მცხოვრებ ბავშვთა სოციალური და ფსიქოლოგიური რეაბილიტაციისაკენ" ... , ნათქვამია სახალხო დამცველის რეკომენდაციებში. სრულად... წყარო: ombudsman.ge

თბილისი. საქართველოს დემოკრატიული ინიციატივა აქვეყნებს მორიგ საინფორმაციო ბიულეტენს ადამიანის უფლებათა შესახებ. სადაც მიმოხილულია ადამიანის უფლებების სფეროს მნიშვნელოვანი მოვლენები და საკანონმდებლო ინიციატივები, მათ შორის, აშშ სახელმწიფო დეპარტამენტის ანგარიში საქართველოში ადამიანის უფლებათა შესახებ, გაეროს რეზოლუცია საქართველოში იძულებით გადაადგილებულ პირთა და ლტოლვილთა სტატუსის შესახებ და სხვა. სრულად... წყარო: gdi.ge

თბილისი. საქართველოს სახალხო დამცველმა, თბილისის სახელმწიფო უნივერსიტეტთან თანამშრომლობითა და ევროკავშირის პროექტის მხარდაჭერით, საჯარო დებატები გამართა თემაზე: არის თუ არა სახელმწიფო მზად ეკომიგრანტების პრობლემების მოსაგვარებლად. სახალხო დამცველმა ისაუბრა ქვეყანაში ეკომიგრანტთა მდგომარეობაზე და იმედი გამოთქვა, რომ დებატები ხელს შეუწყობს არსებული პრობლემების გამოვლენას და მათი გადაჭრის გზების ძიებას. წყარო: ombudsman.ge

თბილისი. ჯამპსტარტ ჯორჯია გამოაქვეყნა ვიზუალიზაცია „რატომ არ აფასებენ ქალები თავიანთ შრომას სათანადოდ?". „ბოლო 6 წლის განმავლობაში საქართველოში ქალები ყოველთვიურად საშუალოდ 318 ლარით ნაკლებს გამოიმუშავებენ, ვიდრე კაცები. ამასთანავე, მიუხედავად იმისა, რომ ქალებსა და კაცებს თანაბრად არ მოსწონთ თავიანთი ანაზღაურება, ქალები ნაკლებად გამოხატავენ სამსახურით უკმაყოფილებას, ვიდრე კაცები. ...", ნათქვამია ფერად ინფოზე. ვიზუალიზაცია... წყარო: feradi.info

თბილისი. ფრონტლაინ კლუბისა და ჟურნალ „ლიბერალის" ერთობლივი პროექტის ფარგლებში გაიმართა დისკუსია „რას ნიშნავს შეზღუდული შესაძლებლობის სოციალური მოდელი?". მათ ვინც ვერ შეძლო დისკუსიაზე დასწრება, ჟურნალი საშუალებას აძლევს იხილოს ვიდეოჩანაწერი. წყარო: liberali.ge

აჭარა. 31 ივლისს საქართველოს საკონსტიტუციო სასამართლომ დააკმაყოფილა საქართველოს სახალხო დამცველის კონსტიტუციური სარჩელი. სასამართლომ დაადგინა, რომ „საჯარო სამსახურის შესახებ" საქართველოს კანონის მე–17 მუხლის „ბ" ქვეპუნქტი არ შეესაბამება თანაზომიერების პრინციპის მოთხოვნებს და არღვევს საქართველოს კონსტიტუციის 29_ე მუხლის პირველ და მეორე პუნქტს"... სრულად... წყარო: ombudsman.ge

აჭარა. 1 აგვისტოს, საქართველოში ქალთა, მათ შორის ლგბტ ქალთა მიმართ ძალადობის დაძლევის გზებზე იმსჯელეს. შეხვედრაზე ყურადღება ასევე მათ მიმართ ძალადობის ხილულ და უხილავ ფორმებზე, ძალადობის უარყოფით ზეგავლენასა და ქალთა ფსიქიკურ და ფიზიკურ მდგომარეობაზე. დისკუსიას არასამთვარობო ორგანიზაციის წარმომადგენლებთან ერთად თვიმმართველობის წარმომადგენლები ესწრებოდნენ. შეხვერდა საქართველოში ქალთა ფონდი ორგანიზებით გაიმართა.

თბილისი. „ქალთა მოძრაობა" და არასამთავრობო ორგანიზაციები 26 ივლისს, „იმედის კვირაში" გასულ სიუჟეტს ეხმაურებიან და მედია საშუალებებს მიმართავენ. „საიმისოდ, რომ მედიამ, როგორც გავლენიანმა ინსტიტუტმა, საზოგადოების წინაშე თავისი წილი პასუხისმგებლობა გაითავისოს, მნიშვნელოვანია ქალთა მიმართ ძალადობის შემთხვევების გაშუქებისას ასახოს ის მიდგომები, რომლებიც UNESCO-სა და სხვა საერთაშორისო ორგანიზაციებს რეკომენდაციებშია მოცემული. მივმართავთ მედია საშუალებებს: ქალთა მიმართ ძალადობის ფაქტების გაშუქებისას, არ მოხდინოს ადამიანის რევიქტიმიზაცია, კონცენტრაცია მოახდინოს გადარჩენილზე, პატივი სცეს მის განცდებს და მოახდინოს მათი მინიმალიზება, ეჭვქვეშ დააყენოს მცდელობა, ბუნებრივად და ღირსების საქმედ წარმოაჩინოს მომხდარი, დაეხმაროს აუდიტორიას, გაიგოს ფართო კონტექსტი, ადამიანის უფლებებისა და სამართლებრივი თვალსაზრისით, იყოს თანმიმდევრული გაშუქებისას, როგორც სამართლებრივ პროცესზე თვალყურის მიდევნების მხრივ, ასევე პოსტ-ტრავმულ პერიოდთან გამკლავების კუთხით", ნათქვამია ერთობლივ განცხადებაში. „ქალთა მოძრაობა" და არასამთავრობო ორგანიზაციები მედიის წარმომადგენლებთან ერთად ღია დისკუსიებისთვის მზადყოფნას გამოთქვამენ. სრულად... წყარო: www.ginsc.net

თბილისი. არასამთავრობო ორგანიზაციები მშვიდობიანი აქციის - ,,არა პანორამას" დროს დაკავებული და დაჯარიმებული პირების საქმეზე განცხადებას ავრცელებენ. „ჩვენს შეშფოთებას იწვევს ის ფაქტი, რომ სასამართლომ ვერ შეძლო დაკავებული პირების შეკრებისა და გამოხატვის თავისუფლებაში პოლიციელთა მხრიდან განხორციელებული გაუმართლებელი ჩარევის სათანადოდ შეფასება. ... მოვუწოდებთ ხელისუფლების სამივე შტოს და მის თითოეულ წარმომადგენელს, შეასრულონ კონსტიტუციით დაკისრებული ვალდებულებები და არამხოლოდ პატივი სცენ კონსტიტუციით გარანტირებულ უფლებებსა და თავისუფლებებს, არამედ გააკეთონ ყველაფერი მათი კომპეტენციის ფარგლებში, რათა ხელი შეუწყონ აღნიშნული უფლებების პრაქტიკაში რეალიზაციასა და მათ დაცვას არასათანადო ჩარევებისაგან," ნათქვამია ერთობლივ განცხადებაში. სრულად... წყარო: ორგანიზაციის ვებ-გვერდი სოციალურ ქსელში

თბილისი. კოალიცია „დამოუკიდებელი და გამჭვირვალე მართლმსაჯულებისთვის" მოსაზრებებს აქვეყნებს სტამბოლის კონვენციის იმპლემენტაციის მიზნით მომზადებულ საკანონმდებლო პაკეტზე. „კოალიციას მიაჩნია, რომ სამინისტროს მიერ წარმოდგენილი საკანონმდებლო პაკეტი ასახავს პოზიტიურ ცვლილებებს, რომლის მიზანია ქვეყანაში ქალთა მიმართ ძალადობისა და ოჯახში ძალადობისაგან დაცვისათვის არსებულ საკანონმდებლო ნორმათა ჰარმონიზაცია და მათი აღჭურვა ეფექტური სამართლებრივი მექანიზმებით. ამასთან, დადებითად შეიძლება შეფასდეს სახელმწიფოს მზაობა მოახდინოს კანონმდებლობის დე–გენდერული ჩარჩოს ტრანსფორმაცია, როდესაც სახელწიფო პრობლემას ეძებდა არა საზოგადოებრივ სტრუქტურაში და სოციალურად კონსტრუირებულ გენდერულ როლებში, არამედ ინდივიდებში. წარმოდგენილ საკანონმდებლო პაკეტში შეინიშნება, ზემოაღნიშნული დე–გენდერული ჩარჩოს გადააზრება, და მისი ცენტრირება ქალზე და მის უფლებებზე. თუმცა, აქვე უნდა აღინიშნოს, რომ ქვეყანაში ფესვგამდგარი ძალადობრივი კულტურის აღმოფხვრის პროცესში საკანონმდებლო ნორმათა ტრანსფორმაცია მხოლოდ საწყის ელემენტად შეიძლება იქნას მოაზრებული", ნათქვამია კოალიციის განცხადებაში. სრულად... წყარო: ორგანიზაციის ვებ-გვერდი სოციალურ ქსელში

თბილისი. „ახალგაზრდა ადვოკატები" კომპენსაციების მიმღებთა ახალი წრისთვის სახელმწიფო რეგულაციებს სამართლიანად მიიჩნევს. „წარმოდგენილი ცვლილებები საქართველოს მიმართ ევროკავშირის დირექტივებს პასუხობს და მნიშვნელოვნად ზრდის მთავრობის პასუხისმგებლობას სოციალური დაცვის პოლიტიკის განხორციელების მიმართულებით. ნებისმიერი დემოკრატიული ქვეყანა განსაკუთრებული პასუხისმგებლობით ქმნის შესაძლებლობებს, რომელიც სახელმწიფოს წინაშე განსაკუთრებული სამსახურის გავლის მქონე პირთა წრის სოციალური დაცვის გარანტიებს ეხება. საქართველოში სოციალური დაცვის გარანტიების შექმნა კონსტიტუციური დებულებებიდანაა გამომდინარე და ემყარება სამართლიანობის, კანონის წინაშე თანასწორობის, მუდმივობისა და კომპენსაციის/სახელმწიფო აკადემიური სტიპენდიის მიღების სახელმწიფო გარანტიის პრინციპებს. როგორც ცნობილია, მოქმედი კანონმდებლობით, სტიპენდიის მიღების უფლებით სარგებლობს საქართველოს პარლამენტის წევრები, საქართველოს საკონსტიტუციო სასამართლოს წევრები, საქართველოს უზენაესი სასამართლოს, ასევე საერთო სასამართლოების მოსამართლეები და სხვა", ნათქვამია ორგანიზაციის ვებ-გვერდზე. სრულად... წყარო: barristers.ge

თბილისი. 29 ივლისს, ფონდი „ღია საზოგადოება-საქართველოს" ოფისში პერსონალურ მონაცემთა დაცვის საჭიროებაზე და ხარვეზების აღმოფხვრაზე იმსჯელეს სახალხო დამცველის ოფისის, გაეროს ბავშვთა ფონდის, პერსონალურ მონაცემთა დაცვის ინსპექტორის აპარატის და სხვა სახელმწიფო უწყებების და არასამთავრობო ორგანიზაციების წარმომადგენლებმა. 6 თვის მანძილზე, არასამთავრობო ორგანიზაცია "ინიციატივა მოწყვლადი ჯგუფების რეაბილიტაციისთვის" ფონდის მხარდაჭერით, პენიტენციურ სისტემაში ბავშვთა პერსონალური მონაცემების დაცვასთან დაკავშირებულ სამართლებრივ ანალიზს ახორციელებდა. აღნიშნული არასამთავრობო ორგანიზაცია აგრძელებს პენიტენციურ სისტემაში ბავშვთა მონაცემების დაცვასთან დაკავშირებულ საკითხებზე მუშაობას. "ჩვენ დღეს განვიხილავთ როგორც კანონქვემდებარე აქტების მიღების და მათთან დაკავშირებით ორგანიზაციასა და სამინისტროსთან თანამშრომლობის პროცესს, ასევე, არასრულწლოვანთა სარეაბილიტაციო დაწესებულების დებულების პროექტს, ახლადდამტკიცებული ანალიტიკური დეპარტამენტის დებულებას და სხვა მნიშვნელოვან დოკუმენტებს. ვსაუბრობთ ადვოკატირების შედეგებზე, ასევე იმ გამოწვევებზე, რაც დგას ნორმატიული აქტების დახვეწის თვალსაზრისით", აცხადებს ტატო ქელბაქიანი, ორგანიზაციის ხელმძღვანელი. სრულად... წყარო: www.osgf.ge

თბილისი. სახალხო დამცველი ეხმაურება 26 ივლისს, ტელეიმედის ეთერში გასულ სიუჟეტს, სახალხო დამცველი მოუწოდეს მედია საშუალებებს განსაკუთრებული სიფრთხილით გააშუქონ ძალადობის მსხვერპლთა შემთხვევები, გასაკუთრებით ქალთა დისკრიმინაციული შემთხვევები და გაითვალისწინონ მსხვერპლის ინტერესები. „ჟურნალისტური ქარტიის მე–10 მუხლის თანახმად „ჟურნალისტმა პატივი უნდა სცეს ადამიანის პირად ცხოვრებას და არ შეიჭრას პირად ცხოვრებაში, თუ არ არსებობს განსაკუთრებული საზოგადოებრივი ინტერესი."ტელე იმედის ეთერით გასული სიუჟეტი ახალგაზრდა ქალის მიმართ განხორციელებული შესაძლო ძალადობრივი ქმედებების შესახებ, მომზადებული იყო იმგვარად, რომ არღვევდა პირის უფლებას პირადი ცხოვრების ხელშეუხებლობაზე. ამ ადამიანისთვის მიყენებული უმძიმესი ტრავმების ფონზე, სიუჟეტში იყო კადრები სადაც აშკარად ჩანდა, მისი სახე და ჯანმრთელობის მდგომარეობა", ნათქვამია სახალხო დამცველის ოფიციალურ ვებ-გვერდზე. სრულად... წყარო: www.ombudsman.ge

თბილისი. არასამთავრობო ორგანიზაციები ლევან ბობოხიძის შეწყალებასთან დაკავშირებით პრემიერ მინისტრის შეფასებებს ეხმაურებიან და ერთობლივ განცხადებას ავრცელებენ: „პრემიერ-მინისტრის მიერ გამოთქმული კრიტიკა სხვა არაფერია თუ არა მოწოდება პოლიტიკური ოპონენტების მიმართ მართლმსაჯულების შერჩევითად და შესაბამისად მკაცრად გამოყენების შესახებ, რომელიც საგამოძიებო ორგანოებისა და სასამართლო ხელისუფლებისთვისაც შესაძლოა იქცეს აღმასრულებელი ხელისუფლების მეთაურის გზავნილად. მიგვაჩნია, რომ ამ ტიპის განცხადებები უარყოფითად აისახება სამართალდამცავი ორგანოების საქმიანობაზე, განსაკუთრებით იმის გათვალისწინებით, რომ ბოლო წლებში საქართველოს ხელისუფლების მისამართით მნიშვნელოვანი კრიტიკა ისმის როგორც საერთაშორისო პარტნიორების, ასევე საერთაშორისო და ადგილობრივი არასამთავრობო ორგანიზაციების მიერ ქვეყანაში პოლიტიკური მოტივებით განხორციელებულ მართლმსაჯულებასთან დაკავშირებით", ნათქვამია განცხადებაში. სრულად... წყარო: gdi.ge

თბილისი. საერთაშორისო გამჭვირვალობა – საქართველომ გამოაქვეყნა პოლიტიკის დოკუმენტი: „მამხილებელთა დაცვა – საერთაშორისო პრაქტიკა და რეკომენდაციები საქართველოსთვის". მასში წარმოდგენილია რეკომენდაციების ნუსხა, „რომელთა შესრულებამაც უნდა აღმოფხვრას საქართველოში მამხილებელთა დაცვის სისტემის ძირითადი ნაკლოვანებები და ის საუკეთესო საერთაშორისო გამოცდილებასთან დააახლოვოს". სრულად... წყარო: www.transparency.ge