თბილისი. 13 წლის გიორგის (სახელი შეცვლილია) შეზღუდული შესაძლებლობის მქონე ბავშვია, მას ინფორმაციის ვერბალურად გადმოცემა უჭირს. საქმე ეხება 2023 წლის აპრილში მომხდარ ფაქტს, როდესაც ტრანსპორტის მძღოლმა ბავშვზე ფიზიკურად იძალადა. „სკოლიდან დაბრუნებულმა ბავშვმა დედას მაშინვე მიანიშნა ჯერ ფეხზე, შემდეგ კი მკერდზე. დედამ ბავშვის სხეული დაათვალიერა და აღმოაჩინა, რომ გიორგის მარცხენა ბარძაყზე, მკერდის მარჯვენა და მარცხენა მხარეს დაზიანებები ემჩნეოდა და აშკარად ეტყობოდა თითების კვალი. აღსანიშნავია, რომ ბავშვი სახლში მხოლოდ მძღოლმა მოიყვანა, ტრანსპორტირების ასისტენტი მასთან ერთად არ ყოფილა“. მძღოლმა ბავშვის დედას უთხრა, რომ ბავშვს მხოლოდ ეხუმრა. გიორგის დედამ საგამოძიებო უწყებას მიმართა, გამოძიება დაიწყო, გიორგის სამედიცინო ექსპერტიზა ჩაუტარდა. პარტნიორობა ადამიანის უფლებებისთვის (PHR) 2023 წლის აპრილში, ფაქტიდან რამდენიმე დღეში საქმეში ჩაერთო. ბავშვის ადვოკატმა ანა თავხელიძემ განცხადებით მიმართა პროკურორს და გიორგის დაზარალებულად ცნობა მოითხოვა. პროკურორმა ბავშვი მსხვერპლად არ აღიარა, რადგან ის ამ დრომდე გამოკითხული არ არის, მისი ფიზიკური საჭიროებებიდან გამომდინარე (პროკურორის არგუმენტი). 2023 წლის 30 ივნისს ბავშვის ადვოკატმა თბილისის საქალაქო სასამართლოს მიმართა პროკურატურის უარის გაუქმებისა და გიორგის დაზარალებულად აღიარების მოთხოვნით. სრულად... წყარო: phr.ge

ქვემო ქართლი. საქართველოს ახალგაზრდა იურისტთა ასოციაციის (საია) რუსთავის ოფისი იცავდა დაზარალებული ქალის ინტერესებს, რომელიც წლების მანძილზე მეუღლის მხრიდან სისტემატური ძალადობისა (ფსიქოლოგიური, ეკონომიკური, ფიზიკური) და მუქარის მსხვერპლი იყო. „რუსთავის საქალაქო სასამართლომ ქალთა წინააღმდეგ ძალადობისა და ოჯახში ძალადობის აღკვეთისა და პრევენციის შესახებ ევროპის საბჭოს კონვენციის („სტამბოლის კონვენცია“) რეკომენდაციაზე მითითებით, დაადგინა განაჩენი, შედეგად, ბრალდებულს განუსაზღვრა თავისუფლების აღკვეთა 2 (ორი) წლის ვადით“. სრულად... წყარო: gyla.ge

რეგიონები. 14 ივნისს სოციალური სამართლიანობის ცენტრმა და პლატფორმა სალამ-მა ჩაატარა შშმ პირთა უფლებების დაცვისადმი მიძღვნილი რეგიონალური შეხვედრა. შეხვედრის დროს, ადგილობრივმა შეზღუდული შესაძლებლობების მქონე ეთნიკური უმცირესობების წარმომადგენელმა აქტივისტებმა, შშმ პირების უფლებების დაცვაზე ეროვნულ დონეზე მომუშავე ორგანიზაციებისა და სახალხო დამცველის აპარატის წარმომადგენლებმა ისაუბრეს შშმ თემის გამოწვევებსა და მომავალი თანამშრომლობის პერსპექტივებზე.  სრულად... შეხვედრა ჩატარდა პროგრამის „ერთიანობა მრავალფეროვნებაშია“ დახმარებით, რომელსაც ახორციელებს საქართველოს გაეროს ასოციაცია, USAID/Georgia-ს ფინანსური მხარდაჭერით. წყარო: ორგანიზაციის გვერდი სოციალურ ქსელში

თბილისი. საქართველოს დემოკრატიული ინიციატივა (GDI) ეხმაურება პრაიდ კვირეულს და პასუხისმგებელ უწყებებს მოუწოდებს, გაატარონ ყველა ზომა პრაიდ კვირეულის უსაფრთხო გარემოში ჩატარებისთვის და ლგბტ+ თემისა და მათი მხარდამჭერების უფლებების დაცვისთვის. „აღსანიშნავია, რომ საჯარო სივრცეში ვრცელდება ძალადობისკენ მოწოდების და მუქარის შემცველი არაერთი განცხადება, რაც შსს-ს მხრიდან სათანადო და ეფექტიან რეაგირებას საჭიროებს. იმ პირობებში, როდესაც გასულ წლებში იმავე ჯგუფებისგან ძალადობის არაერთი ფაქტი დაფიქსირდა, საციცოცხლოდ მნიშვნელოვანია სამართალდამცავი უწყებების მიერ გატარდეს დროული და მკაცრი ღონისძიებები მოძალადე ჯგუფების წინააღმდეგ.  GDI გმობს ხელისუფლებისა და სხვადასხვა ჯგუფების მხრიდან წახალისებულ ჰომოფობიურ ტალღას და სრულ მხარდაჭერას უცხადებს კვირეულის ორგანიზატორებს, ისევე როგორც ყველა იმ ადამიანს, ვისაც სურს საკუთარი უფლებების რეალიზება და თანასწორუფლებიანი გარემოს შექმნა საქართველოში“, ნათქვამია განცხადებაში. სრულად... წყარო: ორგანიზაციის გვერდი სოციალურ ქსელში

ქვემო ქართლი. 5 ივლისს, სოციალური სამართლიანობის ცენტრი მარნეულის მუნიციპალიტეტის სოფელ ახალი დიოკნისის მოსახლეობისთვის სამართლებრივი დახმარების შეხვედრას გამართავს. ორგანიზაციის იურისტები ადგილობრივ მოსახლეობას შესთავაზებენ უფასო სამართლებრივ კონსულტაციას მათთვის პრობლემატურ სამართლებრივ საკითხებზე. მათ შორის, ეკომიგრაციის, ეთნიკური, რელიგიური ნიშნით დისკრიმინაციის, პოლიციის თანამშრომლების მხრიდან არასათანადო მოპყრობის, მოქალაქეობის, მიწაზე საკუთრების უფლების რეგისტრაციის საკითხებზე, ოჯახში ძალადობისა და იძულებით ქორწინების საკითხებზე. სრულად... წყარო: ორგანიზაციის გვერდი სოციალურ ქსელში

თბილისი. ქალთა ინიციატივების მხარდამჭერი ჯგუფი წარმოგიდგენთ კონფერენციის „ჰომოფობიით მანიპულირება: პოპულიზმი, საზოგადოება და ქვიარ წინააღმდეგობა საქართველოში“ მეორე პანელის ჩანაწერს. „ამ პანელზე მონაწილეები განიხილავენ ლგბტქ თემით და ზოგადად ჰომოფობიით პოლიტიკურ სპეკულაციებს და ამ მანიპულაციების მრავალფეროვან ფორმებს; ასევე იმას, თუ როგორ აისახება ჰომოფობიით სპეკულაცია მედიაში და რა გავლენას ახდენს ეს ყველაფერი როგორ საზოგადოებრივ განწყობებზე, ისე თემის წევრებსა და აქტივიზმის ფორმებზე“. სრულად... წყარო: ორგანიზაციის გვერდი სოციალურ ქსელში

თბილისი. ქალთა უფლებებზე და გენდერულ თანასწორობაზე მომუშავე არასამთავრობო ორგანიზაციები განცხადებას ავრცელებენ და ნინო წილოსანის თანმდებობიდან გადადგომას ითხოვენ. „ჩვენთვის, ქალთა უფლებებსა და გენდერულ თანასწორობაზე მომუშავე ორგანიზაციებისთვის, მიუღებელია გენდერული თანასწორობის მუდმივმოქმედი საპარლამენტო საბჭოს თავმჯდომარის, ნინო წილოსანის, ბოლოდროინდელი პოლიტიკური ქმედებები და განცხადებები, რომლებიც ფუნდამენტურად ეწინააღმდეგება თანასწორობის პრინციპს, დისკრიმინაციულია და აღვივებს ძალადობას. მიგვაჩნია, რომ გენდერული თანასწორობის საბჭოს მოქმედი თავმჯდომარე ვერ ასრულებს მასზე დაკისრებულ მოვალეობას, ვერ იაზრებს პროფესიულ პასუხისმგებლობას, ბოროტად და არამართებულად იყენებს გენდერული თანასწორობის იდეას; ხოლო როცა თანასწორობის ღირებულებები წინააღმდეგობაში მოდის პარტიულ დღის წესრიგთან, ნინო წილოსანი უპირატესობას პარტიულ ინტერესებს ანიჭებს“. სრულად... წყარო: socialjustice.org.ge

თბილისი. 22-23 ივნისს, კავკასიის კვლევითი რესურსების ცენტრის (CRRC) მე-9 წლიური კონფერენცია „ახალი საზღვრები: სამხრეთ კავკასია ახალი გამოწვევების ფონზე” გაიმართა. კონფერენციაზე მრგვალი მაგიდის დისკუსიის - „საარქივო ხელმისაწვდომობა და ღიაობა კავკასიასა და ევრაზიაში” ფარგლებში, ინფორმაციის თავისუფლების განვითარების ინსტიტუტის (IDFI) მეხსიერებისა და დეზინფორმაციის კვლევების მიმართულების ხელმძღვანელმა, ანტონ ვაჭარაძემ მოხსენება წარადგინა, სადაც ყურადღება გაამახვილა „პერსონალურ მონაცემთა დაცვის შესახებ” ახალი კანონისა და საჯაროობის სტანდარტების შესახებ. სრულად... წყარო: idfi.ge

ქვემო ქართლი. 3 ივლისს, სოციალური სამართლიანობის ცენტრი მარნეულის მუნიციპალიტეტის სოფელ თაზაკენდის მოსახლეობისთვის სამართლებრივი დახმარების შეხვედრას გამართავს.   იურისტები ადგილობრივ მოსახლეობას უფასო სამართლებრივ კონსულტაციას შესთავაზებენ მათთვის პრობლემატურ სამართლებრივ საკითხებზე. შეხვედრა ტარდება პროგრამის „ერთიანობა მრავალფეროვნებაშია“ დახმარებით, რომელსაც ახორციელებს საქართველოს გაეროს ასოციაცია, USAID/Georgia-ს ფინანსური მხარდაჭერით. სრულად... წყარო: ორგანიზაციის გვერდი სოციალურ ქსელში

თბილისი. სამოქალაქო საზოგადოების ორგანიზაციები, საჯაროდ მოუწოდებენ საქართველოს ხელისუფლებას, უზრუნველყოს ადამიანის უფლებათა სამოქმედო გეგმის შემუშავების პროცესში სამოქალაქო საზოგადოების ჯეროვანი ჩართულობის ფორმატი. „ჩვენ გვჯერა, რომ ჭეშმარიტად ინკლუზიური პროცესი შექმნის უკეთეს სამოქმედო გეგმას, რომელიც სარგებელს მოუტანს თითოეულ ადამიანს. ეს განსაკუთრებით მნიშვნელოვანია იმის გათვალისწინებით, რომ საზოგადოების ზოგიერთი განსაკუთრებით დაუცველი ჯგუფი, მათ შორის ლგბტქი ადამიანები, და მათი საჭიროებები საერთოდ არ არის სტრატეგიაში ნახსენები. ამასთან, სამეზობლო პოლიტიკისა და გაფართოებისა საკითხებში ევროკომისრის 2023 წლის 22 ივნისის ზეპირ მოხსენებაში ნათქვამია, რომ საქართველოს მთავრობამ უნდა განაახლოს კონსტრუქციული დიალოგი სამოქალაქო საზოგადოებასთან და განახორციელოს რეგულარული და გამჭვირვალე კონსულტაციები. კიდევ ერთხელ ვადასტურებთ, რომ ჩვენი, სამოქალაქო საზოგადოების ორგანიზაციების, საქმიანობის მთავარი მიზანი კანდიდატის სტატუსის მოპოვებისთვის მაქსიმალური ძალისხმევის გაწევაა. სწორედ აღნიშნულიდან გამომდინარე, 2023 წლის 31 ივლისს გამოვაქვეყნებთ მოსაზრებებს, რომელთა გათვალისწინებაც ადამიანის უფლებათა სამოქმედო გეგმის შემუშავების პროცესში დემოკრატიული, სამართლებრივი და სოციალური სახელმწიფოს დამკვიდრებისთვის მიზანშეწონილად მიგვაჩნია“, ნათქვამია განცხადებაში. სრულად... წყარო: gyla.ge

თბილისი. 2023 წლის 12 ივნისს, ორგანიზაციამ „პარტნიორობა ადამიანების უფლებებისთვის“ (PHR) საზოგადოებას აცნობა, რომ სამართლებრივად იცავს შეზღუდული შესაძლებლობის მქონე გოგოებს, რომლებიც გახდნენ სქესობრივი დანაშაულების და პირადი ცხოვრების ამსახველი ინფორმაციის უკანონოდ მოპოვების და გავრცელების მსხვერპლები. ორგანიზაციის ადვოკატების ჩართულობით, საქმეზე ამ წუთებშიც გრძელდება საგამოძიებო და საპროცესო მოქმედებები - იკითხებიან მოწმეები, გროვდება მტკიცებულებები, რომლის შემდეგაც, PHR-ი მოითხოვს მსხვერპლი გოგოების დაზარალებულად ცნობას. „მაღალი საზოგადოებრივი ინტერესებიდან გამომდინარე, საქმის პროგრესის შესახებ PHR პერიოდულად მოგაწვდით განახლებულ ინფორმაციას მსხვერპლი გოგოების კონფიდენციალობის და ინტერესების დაცვით“. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ჟურნალისტური ეთიკის ქარტია მიშა მშვილდაძეზე თავდასხმის ფაქტს ეხმაურება და საგამოძიებო უწყებებს მოუწოდებს, დროულად და ეფექტიანად გამოიძიონ ეს საქმე. „კიდევ ერთხელ ვაცხადებთ, რომ ბოლო პერიოდში მედიის წარმომადგენლებზე გახშირებული თავდასხმების გამომწვევი ფაქტორები ხელისუფლების მხრიდან მედიის წარმომადგენლების მიმართ აგრესიული რიტორიკა და დანაშაულების გაჭიანურებული და გამოუძიებელი საქმეებია“. სრულად... წყარო: www.qartia.ge

აჭარა. ბათუმში ახალი მეჩეთის მშენებლობის ფონდი, ტოლერანტობის და მრავალფეროვნების ინსტიტუტი და სოციალური სამართლიანობის ცენტრი ბათუმის ახალი მეჩეთის საქმეზე განცხადებას ავრცელებენ. „ქალაქ ბათუმში ახალი მეჩეთის მშენებლობის ნებართვის მიღებასთან დაკავშირებული 2017 წელს დაწყებული სასამართლო საქმე საქართველოს უზენაესმა სასამართლომ სააპელაციო სასამართლოს ხელახლა განსახილველად დაუბრუნა. მეჩეთის მშენებლობის კანონიერი მოთხოვნა კი მუსლიმი მოსახლეობის მრავალწლიანი საჭიროებიდან გამომდინარეობს და ამ დრომდე გადაუჭრელ საკითხად დგას. საყურადღებოა, რომ უზენაესი სასამართლოს გადაწყვეტილება არაერთ პრობლემურ მსჯელობას შეიცავს, რაც არა მხოლოდ მუსლიმთა ფუნდამენტური უფლებების რეალიზებას აფერხებს, არამედ რელიგიის თავისუფლებისა და თანასწორობის უფლების სტანდარტის გაუარესება შეიძლება გამოიწვიოს. გარდა ამისა, ამ გადაწყვეტილებით, 7 წლის განმავლობაში გაჭიანურებული სასამართლო განხილვა და, შესაბამისად, მუსლიმთა უფლებების უხეში დარღვევა, კვლავ განუსაზღვრელი ვადით ხანგრძლივდება, რითაც ირღვევა სწრაფი და ეფექტიანი მართლმსაჯულების პრინციპი. ხელისუფლების მხრიდან მუსლიმთა ფუნდამენტური უფლებების უხეშ დარღვევას განგრძობითი ხასიათი აქვს. წლების განმავლობაში, მუსლიმები ხელისუფლების მიერ შექმნილი უკანონო ბარიერების გამო ვერ ახერხებენ ბათუმში სამლოცველოს აშენებას და მათ ამ დრომდე უწევთ ღია ცის ქვეშ შეკრება და ლოცვა. ხელისუფლებამ ყველა ბერკეტი გამოიყენა, რომ საქმე არსებითად დროულად არ გადაწყვეტილიყო და სასამართლო ინსტანციებში გასაჩივრების გზით საქმე 7 წლის განმავლობაში გააჭიანურა. უზენაესი სასამართლოს გადაწყვეტილება კი ხელს უწყობს როგორც პროცესის გაჭიანურებას, ასევე მუსლიმის უფლებების სისტემური დარღვევის გაგრძელებას“. სრულად... წყარო: socialjustice.org.ge

თბილისი. მედიის ადვოკატირების კოალიცია გმობს ტელეკომპანია „ფორმულას“ თანადამფუძნებელსა და წამყვანზე, მიშა მშვილდაძეზე ფიზიკური თავდასხმის ფაქტს. „ქვეყანაში მედიის წარმომადგენლებზე თავდასხმა კვლავ სერიოზულ გამოწვევად რჩება. ხელისუფლების მხრიდან მედიის მიმართ დანაშაულებზე უმოქმედობა, კრიტიკული აზრის მიმართ ანტაგონისტური რიტორიკა თუ მიზანმიმართული დისკრედიტაცია მსგავსი სახის დანაშაულებს კიდევ უფრო ახალისებს. მშვილდაძის განცხადებით, „... მას სახეში მუშტი დაარტყეს, შემდეგ წაიქცა და სანამ წამოდგებოდა, თავდამსხმელი ფიზიკურ ანგარიშსწორებას აგრძელებდა.”“ კოალიცია მოუწოდებს ხელისუფლებას, დროულად გამოიძიოს მიშა მშვილდაძეზე თავდასხმის ფაქტი და დასაჯოს დამნაშავეები კანონის სრული სიმკაცრით. სრულად... წყარო: mediacoalition.ge

თბილისი. პარტნიორობა ადამიანის უფლებებისთვის (PHR) ბენეფიციარმა განათლების და მეცნიერების სამინისტროს წინააღმდეგ, სასამართლოს სარჩელით მიმართა. საჩივრის საფუძველზე, თბილისის საქალაქო სასამართლო ყოვლისმომცველი სექსუალური განათლების დანერგვის მოთხოვნით დავას განიხილავს. ანას (სახელი შეცვლილია) ინტერესებს სასამართლოში PHR-ი იცავს. ვრცლად... წყარო: phr.ge

თბილისი. გაეცანით დამსაქმებლის ვალდებულებებს დისკრიმინაციის ამკრძალავი ნორმების პრაქტიკაში დასანერგად. ინფორმაცის გიზიარებთ საქართველოს ახალგაზრდა იურისტთა ასოციაცია. სრულად... წყარო: ორგანიზაციის გვერდი სოციალურ ქსელში

აჭარა. სოციალური სამართლიანობის ცენტრი გიზიარებთ ფოტოპროექტს „ბოშები აჭარიდან“. ბოშები დღეს კომპაქტურად სახლობენ ქობულეთში, ფოთში, ბათუმსა და ოზურგეთში. ორგანიზაციის ცნობით, ბოშათა თემი ამ ქალაქებში არაერთი გამოწვევის წინაშე დგას. მათ შორის: მნიშვნელოვანია, რომ ბოლო წლებში მათ დიდ ნაწილს მოუგვარდა პირადობის დამადასტურებელ დოკუმენტაციასთან დაკავშირებული პრობლემები, თუმცა კვლავ რჩებიან ადამიანები, ვისაც დაბადების მოწმობების აღებასთან დაკავშირებული პრობლემები აქვთ და ამის გამო განათლების მიღების უფლება ეზღუდებათ; ბოშების დიდ ნაწილს არ გააჩნია საკუთრება და ქირით ცხოვრობს, რაც მათ ოჯახებს მძიმე სოციალურ ტვირთად აწვება. ადგილობრივი თემი სოციალური საცხოვრისის საჭიროებაზე საუბრობს; ბოშების დიდი ნაწილი სრულ საშუალო განათლებას არ იღებს და მეტწილად პროფესიული განათლების მიღებით შემოიფარგლებიან, რის გამოც მათთვის სოციალური განვითარებისა და მობილობის შესაძლებლობები შეზღუდულია. მაგალითად, ქობულეთის ბოშა მამაკაცები ძირითადად დასუფთავების სამსახურში არიან დასაქმებულნი, სადაც მათ მძიმე პირობებში უწევთ მუშაობა, ქალები კი ძირითადად ვაჭრობაში არიან ჩართულები. ადგილობრივი თემის ლიდერები საუბრობენ მათ თემის წევრების მიმართ გავრცელებულ სტერეოტიპებზე და დისკრიმინაციულ გამოცდილებაზე დასაქმების ადგილებში და სხვა სოციალურ ურთიერთობებში. სრულად... წყარო: socialjustice.org.ge

იმერეთი. საქართველოს ახალგაზრდა იურისტთა ასოციაცია იცავდა იმ ექვსი მოქალაქის ინტერესებს სასამართლოში, რომლებიც ნამახვან ჰესის კასკადის მშენებლობის წინააღმდეგ მშვიდობიან პროტესტში იღებდნენ მონაწილეობას. „ქუთაისის საქალაქო სასამართლოს მიერ თითოეული პირის მიმართ შედგენილი სამართალდარღვევის ოქმი და შესაბამისი დადგენილება ბათილად იქნა ცნობილი, რადგან არ დადასტურდა მათი მხრიდან სამართალდარღვევის ჩადენის ფაქტი. შედეგად ექვსივე პირის მიმართ შეწყდა ადმინისტრაციული სამართალდარღვევის საქმე და მათ მიმართ გამოყენებული ადმინისტრაციული სანქცია გაუქმდა“. სრულად... წყარო: gyla.ge

თბილისი. Grlz Wave აქვეყნებს ვიდეოს, თუ როგორ ვებრძოლოთ დისკრიმინაციულ კომენტარებს ტიკ-ტოკ პლატფორმაზე. გაფილტრეთ კომენტარები - პლატფორმას აქვს ფუნქცია, თქვენი დასტურის გარეშე კონკრეტული სიტყვის შემცველი კომენტარი არ დაიწეროს. ამისთვის აუცილებელია, გადახვიდეთ თქვენს მთავარ გვერდზე, აირჩიოთ მენიუს ღილაკი, შემდეგ პარამეტრები და კონფიდენციალობა, შემდეგ მოძებნოთ კომენტარების ფილტრის ფუნქცია და საკვანძო სიტყვის ფილტრი ჩართოთ. ამის შემდეგ, მიუთითეთ ის სიტყვები, რომელთა გამოყენებითაც არ გინდათ რომ კომენტარი დაგიწერონ. ნებისმიერ დროს შეგიძლიათ დაარეპორტოთ კომენტარი, რომელიც თქვენთვის დისკრიმინაციულ ინფორმაციას შეიცავს. უფრო მარტივი გამოსავალია მომხმარებლის დაბლოკვა. წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი მაღაროელებსა და „ჯორჯიან მანგანეზს“ შორის გაფორმებულ შეთანხმებას აფასებს. ორგანიზაციის ცნობით, სამედიაციო შეთანხმების მიხედვით, დაუყოვნებლივ და უპირობოდ დაკმაყოფილებას ექვემდებარება მაღაროელთა მოთხოვნების მხოლოდ მცირე ნაწილი, ხოლო მოთხოვნების უმრავლესობა უნდა გადაწყდეს კომისიური წესით მუშაობის საფუძველზე. „სამწუხაროდ, ისეთი საბაზისო საკითხებიც, როგორიცაა მაღაროელების ულუფის გაუმჯობესება, სანატორიუმის ფუნქციონირების აღდგენა, ბანკში დამატებით დარიცხული პროცენტების გასტუმრება და შრომის უსაფრთხოების დაცვის მიზნით ტექნიკის განახლება კომისიური წესით მუშაობას დაექვემდებარა. ეს მაშინ, როდესაც ეს საკითხები შრომითი უფლებების საბაზისო დონეზე დაცვას შეეხება და მათ სწორედ უფლებრივ ჭრილში დანახვა და დაუყოვნებელი აღსრულება და უზრუნველყოფა სჭირდებოდა. ამასთან, კომისიური წესით მუშაობას დაექვემდებარა გარემოს დაცვის მიმართულებით მაღაროელების მოთხოვნებიც - ღია კაერიერული წესით მოპოვებისას ადგილობრივი მოსახლეობის ინტერესების და გარემოსდაცვითი ნორმების დაცვის შესახებ. როგორც ცნობილია, მადნის ღია კარიერული წესით მოპოვება, რომელიც ტექნოლოგიურად დაუხვეწავი პროცესია და უზარმაზარი ტერიტორიების გადათხრას მოითხოვს, უმძიმეს ზიანს აყენებს ადგილობრივ მოსახლეობას და გარემოს. შესაბამისად, მოვუწოდებთ კომპანიას და სახელმწიფოს, ამ პუნქტებზე მუშაობისას, კომისიის საქმიანობაში ჩართოს ჭიათურის სოფლების მოსახლეობა, რომლებიც ამ პროცესით ყველაზე მეტად ზარალდება“. სოციალური სამართლიანობის ცენტრი მიიჩნევს, რომ მნიშვნელოვანია მომავალში კომისიის მუშაობის პროცესში საბაზისო უფლებრივი საკითხები არ გახდეს ვაჭრობის და მანიპულაციის საგანი კომპანიის მხრიდან და მაღაროელების სამართლიანი და კანონიერი მოთხოვნები სამუშაო პირობების გაუმჯობესებაზე, არსებითად შესრულდეს. სრულად... წყარო: socialjustice.org.ge

თბილისი. მედიის ადვოკატირების კოალიცია ეხმიანება საქართველოს პრეზიდენტის მიერ ტელეკომპანია „მთავარი არხის“ გენერალური დირექტორის ნიკა გვარამიას შეწყალებას. „კოალიცია მიესალმება საქართველოს პრეზიდენტის გადაწყვეტილებას პოლიტიკურად მოტივირებული ბრალდებით უსამართლოდ მსჯავრდადებული მედიის მენეჯერის ნიკა გვარამიას შეწყალების შესახებ. ეს გადაწყვეტილება მნიშვნელოვანი ნაბიჯია პრესის თავისუფლებისა და ადამიანის ფუნდამენტური უფლების - გამოხატვის თავისუფლების - დასაცავად, და პოზიტიურ როლს შეასრულებს ქვეყნის ევროინტეგრაციის გზაზე“, ნათქვამია ორგანიზაციის ვებგვერდზე. სრულად... წყარო: mediacoalition.ge

თბილისი. სოციალური სამართლიანობის ცენტრი მხარს უჭერს გაფიცული მაღაროელების მოთხოვნებს და თვლის, რომ სახელმწიფოს უმოქმედობა მაღაროელთა გაწირვის ფორმას იღებს. „მაღაროელთა სამართლიანი და კანონიერი მოთხოვნების იგნორირება, იძულებულს ხდის მშრომელებს, პროტესტის უკიდურეს ფორმებს მიმართონ: როგორც ჭიათურაში, ისე თბილისში მოშიმშილე მაღაროელებმა მრავლობითი თვითდაზიანება მიიყენეს; ზოგიერთი, ჯანმრთელობის ქრონიკული დაზიანების საფრთხის წინაშეა; ერთ-ერთმა მოშიმშილემ გონებაც დაკარგა; სიტუაცია ყოველდღიურად მძიმდება და ადამიანების სიცოცხლესა და ჯანმრთელობაზე შეუქცევადი ზიანის საფრთხეებს აჩენს, რის გამოც, კომპანიისა და სახელმწიფოს მხრიდან გამოჩენილი უმოქმედობა და საკითხის მიმართ ფორმალური დამოკიდებულებები, ამ ადამიანების, მათზე ფინანსურად დამოკიდებული ოჯახის წევრებისა და მაღაროელთა შრომაზე ეკონომიკურად დამოკიდებული მთელი ქალაქის გაწირვის ფორმას იღებს“, ნათქვამია ორგანიზაციის განცხადებაში. სრულად... წყარო: socialjustice.org.ge