აჭარა. 3 დეკემბერს, ბათუმის პრესკაფესა და „თავისუფალ ჟურნალისთა სახლის" ინიციატივით სტუდენტური დისკუსია გაიმართა, სადაც მომხსენბლები შშმ პირები იყვნენ. სტუდენტებმა აჭარაში მცხოვრები ახალგაზრდა შშმ პირების განათლებისა და დასაქმების პრობლემებზე ისაუბრეს. შეხვედრაზე ნაჩვენებ იქნა მედია სკოლის მოსწავლეების მიერ მომზადებული სიუჟეტი: „უსინათლო მეწისქვილეს ერთი დღე". ასევე, „ხელოვანთა ფონდისა" და „არტ ვეის" მიერ ჩატარებული საზოგადოების აზრის ვიდეო გამოკითხვის შედეგები. დისკუსია გადაიცემოდა ლაივტრიმის მეშვეობით. შეხვედრის ჩანაწერი იხილეთ

ეთნიკურ უმცირესობათა საზოგადოებრივი ორგანიზაციების შესაძლებლობების გაძლიერების პროგრამის ფარგლებში 26-27 ნოემბერი თემატური სემინარები გაიმართა.  ორდღიანი სამუშაო სემინარი, რომელშიც მონაწილეობა მიიღეს ეთნიკურ უმცირესობათა საკითხებზე მომუშავე საზოგადოებრივი ორგანიზაციების 40-მდე წარმომადგენელმა. სემინარის ფარგლებში, შესაბამისი სფეროების ექსპერტების მიერ განხილულ იქნა ისეთი თემები, როგორიცაა დეცენტრალიზაციის პრინციპები და თვითმმართველობის დაგეგმილი რეფორმა (დავით ლოსაბერიძე), ხელისუფლების დანაწილება კონსტიტუციის ახალი რედაქციის მიხედვით (ვახუშტი მენაბდე), ეროვნული/ეთნიკური უმცირესობების დეფინიცია და სამართლებრივი მექანიზმები (მამუკა კომახია), განათლების რეფორმა სამოქალაქო ინტეგრაციის კონტექსტში (შალვა ტაბატაძე) და მიგრაცია და თავშესაფარი (ალექსანდრე სვანიძე). ეთნიკურ უმცირესობათა საზოგადოებრივი ორგანიზაციების გაძლიერების პროგრამა დაფინანსებულია ფონდ "ღია საზოგადოება - საქართველოს" მიერ.  წყარო: ფონდ „ღია საზოგადოება – საქართველოს" ვებგვერდი სოციალურ ქსელში

თბილისი. 3 დეკემბერს, რედისონში შეზღუდული შესაძლებლობის მქონე პირთა უფლებების გაუმჯობესებისათვის შეზღუდული შესაძლებლობის მქონე პირთა საერთაშორისო დღისადმი მიძღვნილი ღონისძიება გაიმართა. ღონისძიებას ესწრებოდნენ: საქართველოს პრემიერ–მინისტრი ირაკლი ღარიბაშვილი, აშშ–ს სრულუფლებიანი ელჩი საქართველოში რიჩარდ ნორლანდი, ასევე, საქართველოს მთავრობის, საერთაშორისო ორგანიზაციების, დიმპლომატიური კორპუსის, ადგილობრივი არასამთავრობო ორგანიზაციებისა და მასობრივი მედია საშუალებების წარმომადგენლები. ღონისძიება გაიმართა ამერიკის შეერთებული შტატების საერთაშორისო განვითარების სააგენტოს (USAID) მიერ მხარდაჭერილი ”შეზღუდული შესაძლებლობის ადვოკატირების პროექტის” ფარგლებში, რომელსაც კოალიცია „დამოუკიდებელი ცხოვრებისათვის" ახორციელებს.  წყარო: კოალიცია დამოუკიდებელი ცხოვრებისათვის

თბილისი. ადამიანის უფლებების სწავლებისა და მონიტორინგის ცენტრმა შეზღუდული შესაძლებლობის მქონე პირთა საერთაშორისო დღესთან დაკავშირებით განცხადება გაავრცელა. „შეზღუდული შესაძებლობის მქონე პირებს კვლავაც ექმნებათ გადაადგილების, განათლების, დასაქმების, რესურსებზე ხელმისაწვდომობისა და სხვა ტიპის პრობლემები. ეს პრობლემა განსაკუთრებით მძაფრად ჩანს ისეთ ქვეყნებში, როგორიც საქართველოა. ...საქართველომ შეზღუდული შესაძლებლობების მქონე პირთა კონვენციას და მის ფაკულტატურ ოქმს 2009 წელს მოაწერა ხელი. თუმცა, ამ დრომდე არ მოუხდენია მისი რატიფიცირება. EMC მოუწოდებს საქართველოს პარლამენტს მაქსიმალურად დაჩქარებულ ვადებში მოახდინოს კონვეციის რატიფიცირება. ამ ფონზე განსაკუთრებულ მნიშვნელობას იძენს კონვეციის იმპლემენტაციის სამოქმედო გეგმა, რომელიც მზადდება საქართველოს მთავრობმის მიერ. აქვე, მივიჩნევთ, რომ სამოქმედო გეგმა უნდა იყოს არსებული პრობლემების მიმართ ადეკვატური, ობიექტური კრიტერიუმებით გაზომვადი და რეალური შედეგის მომტანი", ნათქვამია განცხადებაში. სრულად წყარო: emc.org.ge

კახეთი. თელავის დემოკრატიული ჩართულობის ცენტრში შეზღუდული შესაძლებლობების მქონე პირთა დაცვის საერთაშორისო დღისადმი მიძღვნილი შეხვედრა-დისკუსია გაიმართა. შეხვედრას ესწრებოდნენ არასამთავრობო სექტორის, მედიისა და მშვიდობის კორპუსის წარმომადგენლები, ასევე, სტუდენტები და დაინტერესებული მოქალაქეები. კახეთის შეზღუდული შესაძლებლობების მქონე პირთა ინტეგრაციის ცენტრის ხელმძღვანელი, ლადო ჭინჭარაული: ,,დღეს გაიმართა მრგვალი მაგიდის დისკუსია თემაზე - შეზღუდული შესაძლებლობების მქონე პირთა საჭიროებები კახეთის რეგიონში და ადვოკატირების კამპანიის წარმოება შშმ პირთა უფლებებისათვის. შეხვედრაზე გვესწრებიან შშმ ბავშთა მშობელთა კავშირის „ლამპარი" წარმომადგენლები, გრემის სათემო ცენტრი, ფონდი „ახალი სიცოცხლე" და ადგილობრივი თვითმმართველობის წარმომადგენლები. დისკუსია ძალზე საინტერესო გამოვიდა".

ქალთა ასოციაცია „თანხმობამ" წყალტუბოში, თბილისში, გორსა და ნიქოზში „ქალთა მიმართ ძალადობის წინააღმდეგ" კამპანიის ფარგლებში დოკუმენტური ფილმის ჩვენება-დისკუსიები გამართა. შეხვედრებზე მიწვეულნი იყვნენ ადგილობრივი აქტივისტები და ეროვნული უმცირესობების წარმომადგენლები. ღონისძიებები ხორციელდება პროექტის - „კონფლიქტით დაზარალებული თემებისთვის ინოვაციური გადაწყვეტილებების შემუშავება" - ფარგლებში.  ორგანიზაცია შეხვედრებს ზუგდიდში, გარდაბანში, ფოცხო-ეწერასა და ინგირშიც გამართავს.  

თბილისი. „ქალთა ფონდმა საქართველოში" ქალთა უფლებების დაცვის საერთაშორისო დღეს „კატო მიქელაძის სახელობის პრემიის" გამარჯვებული გამოავლინა.  ქალთა უფლებების დაცვისათვის პრემიის მფლობელი ეკა აღდგომელაშვილი გახდა, რომელიც „ქალთა ინიციატივების მხარდამჭერი ჯგუფის" დამფუძნებელია.  ორგანიზაცია „ქალთა ფონდი საქართველოშის" ინიციატივით, კატო მიქელაძის სახელობის პრემია ყოველი წლის 29 ნოემბერს საქართველოში ქალთა უფლებების დამცველ ერთ -ერთ აქტივისტს გადაეცემა.  წყარო:ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტმა გამოაქვეყნა სამართლის ექსპერტის, ნინო ცუხიშვილის კვლევა „მამხილებლის ინსტიტუტი” საჯარო სამსახურში: საერთაშორისო პრაქტიკა და საქართველო". კვლევის მიზანია საჯარო სამსახურში მამხილებლის ინსტიტუტის საკანონმდებლო რეგულირებისა და სასამართლო პრაქტიკის შეფასება. სტატიის პირველი ნაწილი განიხილავს მამხილებლის ინსტიტუტის სამართლებრივ რეგულირებას საქართველოსა და სხვადასხვა ქვეყნის საკანონმდებლო ნორმების შედარების საფუძველზე. სტატიის მეორე ნაწილი წარმოადგენს ადამიანის უფლებათა ევროპული სასამართლოს პრაქტიკის ანალიზს საჯარო მოსამსახურის გამოხატვის თავისუფლებასთან დაკავშირებით. დასკვნის სახით, სტატია წარმოადგენს ძირითად მიმართულებებსა და რეკომენდაციებს საქართველოში მამხილებლის ინტიტუტის გაუმჯობესების მიზნით. კვლევა წყარო: idfi.ge

შიდა ქართლი. 28 ნოემბერს, გენდერული ძალადობის წინააღმდეგ ბრძოლის 16 დღიანი კამპანიის ფარგლებში, გორის ახალგაზრდულმა ცენტრმა მორიგი აქტივობა ჩაატარა. ცენტრის ახალგაზრდებმა მოიძიეს რეალური ისტორიები, რომლებიც ქალებზე ძალადობას ეხებოდა და ისაუბრეს მათზე. ასევე ისაუბრეს შარიათის კანონზე და საქართველოში სხვადსხვა სტიგმაზე. აქტივობა დაიგეგმა „ეროვნული ინტეგრაციის გაძლიერება საქრთველოში" პროექტის ფარგლებში, რომელიც ხორციელდება საქართველოს გაეროს ასოციაციის მიერ, აშშ-ს საერთაშორისო განვითარების სააგენტოს (USAID) მხარდაჭერით. გორში პროექტის პარტნიორი ორგანიზაციაა „გორის ინვალიდთა კლუბი". წყარო:ორგანიზაციის გვერდი სოციალურ ქსელში

აჭარა.  26 ნოემბერს, ბათუმის დემოკარატიული ჩართულობის ცენტრში, დემოკრატიის ინსტიტუტის ორგანიზებით გაიმართა დისუსია, სადაც საქართველოს შრომის კოდექსში განხორციელებული ცვლილებების ეფექტურობისა და შრომითი გარემოს შესახებ ისაუბრეს.  შეხვედრის მიზანს განსხვავებული პოზიციების შეჯერება წარმოადგენდა. გენო გელაძის თქმით, მისი ინფორმაციით ახალმა კოდექსმა დამსაქმებლების გაღიზიანება გამოიწვია. მოსაზრებას არ ეთანხმებიან აჭარის სავაჭრო-სამრეწველო პალატის წარმომადგენლები. დამსაქმებელთა ასოციაციაში კი აცხადებენ, რომ ცვლილებების მიუხედავად კოდექსი რჩება დაუბალანსებელი და ცალმხრივი, მეტად მორგებული დასაქმებულის უფლებებზე.  დისკუსიაზე კითხვები შიდა განაწესისა და შვებულებების საკითხსაც შეეხებოდა. ახალგაზრდა იურისტთა ასოციაციის წარმომადგენლის - დავით მესხიძის თქმით, შიდა განაწესი სამსახურიდან დათხოვის მიზეზი მხოლოდ ხელშეკრულების დონეზე გატარების შემდეგ შეიძლება გახდეს. ცვლილებებს უმნიშვნელოს უწოდებს თავად დასაქმებულების უფლებადამცელი. საქართველოს შრომის კოდექსში ცვლილებები 6 თვის წინ შევიდა და დამატებით მუშაობა დღემდე მიმდინარეობს.

თბილისი. ადამიანის უფლებების სწავლებისა და მონიტორინგის ცენტრმა ნინო გურულის ბლოგპოსტი – „შრომის უფლება შეზღუდული შესაძლებლობის მქონე პირებისთვის" – გამოაქვეყნა. „შრომისა და დასაქმების უფლების სრულყოფილად რეალიზების მიზნით, სახელმწიფოებს ეკისრებათ პასუხისმგებლობა, გაატარონ შესაბამისი ღონისძიებები და გარდა, საკანონმდებლო დონეზე შრომითი უფლებების დაცვისა და ხელშეწყობის უზრუნველყოფისა, მათ უნდა შეიმუშავონ შესაბამისი ტექნიკური და პროფესიული ორიენტაციის პროგრამები", ნათქვამია ბლოგპოსტში. სრულად წყარო: emc.org.ge

ქვემო ქართლი. ორგანიზაცია სიდამ კვლევის – „ეროვნული უმცირესობების სასამართლო პრაქტიკის ანალიზი" – შედეგები გამოაქვეყნა. კვლევა საქართველოს მასშტაბით 3 რეგიონის 10 მუნიციპალიტეტში ჩატარდა და მის მიზანს წარმოადგენდა ეროვნული და რელიგიური უმცირესობებისთვის მართლმსაჯულებაზე თანაბარი ხელმისაწვდომობის უზრუნველყოფა ადმინისტრაციული სამართლის სფეროში. კვლევის ამოცანა იყო იმ პრობლემების გამოვლენა, რომლებიც ექმნებათ ეროვნული და რელიგიური უმცირესობების წარმომადგენლებს მართლმსაჯულების ხელმისაწვდომობის კუთხით. ასევე, ეროვნულ და რელიგიურ უმცირესობათა ინფორმირება თავიანთი უფლებების შესახებ. კვლევა წყარო:cida.ge

იმერეთი. საქველმოქმედო ორგანიზაცია „პირველი ნაბიჯი საქართველომ" ქუთაისში, პროექტის ფარგლებში „შეზღუდული შესაძლებლობის მქონე პირთა ადვოკატირების ქსელი" დააფუძნა. ორგანიზაციის მიზანს შშმ პირებისთვის ადვოკატირებისა და ლობირების გაწევა წარმოადგენს. ორგანიზაციის ქუთაისის ფილიალის მენეჯერმა, ნათია გუდავამ იმედი გამოთქვა რომ აღნიშნული ქსელი მდგრადი იქნება და საკანონმდებლო ორგანოსა და შესაბამის სამსახურებს რეგულარულად მიაწვდიან ინფორმაციებს შშმ პირების პრობლემების შესახებ.

თბილისი. 10 დეკემბერს, „იდენტობაში" ადამიანის უფლებათა დაცვის საერთაშორისო დღესთან დაკავშირებით, ღონისძიება გაიმართება. ღონისძიების ფარგლებში პრეზენტაციას გააკეთებს 5 მომხსენებელი, რომლებიც აუდიტორიას თავიანთ ნაშრომებს წარუდგენენ. პრეზენტაციის თემაა – „რას ნიშნავს ჩემთვის ადამიანის უფლებები". ნებისმიერ მსურველს შეუძლია პრეზენტაციაზე როგორც თავისუფალი დამსწრის, ასევე მომხსენებლის სტატუსით დასწრება. პრეზენტატორობის მსურველებმა უნდა გააგზავნონ 3-5 გვერდამდე მოცულობის ნაშრომი შემდეგ მისამართზე: info@identoba.com გამარჯვებული ნაშრომის ავტორი დაჯილდოვდება წამახალისებელი პრიზით. წყარო: identoba.com

კახეთი. ძალადობის წინააღმდეგ მიმართული ორკვირიანი კამპანიის ფარგლებში, თელავის დემოკრატიული ჩართულობის ცენტრში გაიმართა დისკუსია თემაზე: ,,ქალთა გაძლიერება საკუთარი უფლებების დასაცავად''. დისკუსიას უძღვებოდნენ თელავის ,,ქალთა კლუბის" წევრები და ისაუბრეს ქალთა პოლიტიკურ უფლებებზე, მათი ჩართულობის მნიშვნელობაზე სხვადასხვა საზოგადოებრივ საქმიანობაში. ასევე, ნაჩვენები იყო მადლენ ოლბრაიტის მოხსენების ჩანაწერი ქართული სუბტიტრებით.

შიდა ქართლი. გორის ინვალიდთა კლუბთან არსებული გორის ახალგაზრდული ცენტრი გენდერული ძალადობის წინააღმდეგ ბრძოლის კამპანიაში ჩაერთო. კამპანიის ფარგლებში ახალგაზრდულმა ცენტრმა ქალთა საკონსულტაციო ცენტრ „სახლთან" ერთად განახორციელა აქტივობა, მოეწყო ფილმ – „ძალადობა დანაშაულიას" – ჩვენება და განხილვა. გაიმართა დისკუსია, რომელიც ფსიქოლოგმა და გენდერზე მომუშავე სპეციალისტებმა წაიყვანეს. 16 დღიანი კამპანიის მიზანია ქალთა მიმართ ძალადობის საკითხებზე საზოგადოებრივი ცნობიერების ამაღლებასა და ქალთა უფლებების ირგვლივ სამოქალაქო კონსოლიდაციის გაძლიერებას. აქტივობა დაიგეგმა „ეროვნული ინტეგრაციის გაძლიერება საქრთველოში" პროექტის ფარგლებში, რომელსაც ახორციელებს საქართველოს გაეროს ასოციაციის მიერ, აშშ-ს საერთაშორისო განვითარების სააგენტოს (USAID) მხარდაჭერით. გორში პროექტის პარტნიორი ორგანიზაციაა „გორის ინვალიდთა კლუბი". წყარო:ორგანიზაციის გვერდი სოციალურ ქსელში

სამცხე–ჯავახეთი. ახალქალაქის ახალგაზრდული სამოქალაქო ცენტრის წევრებმა ქალების მიმართ ძალადობის აღმოფხვრის საერთაშორისო დღე აღნიშნეს. ღონისძიება ჩატარდა პროექტ – „ეროვნული ინტეგრაციის გაძლიერება საქართველოში" – ფარგლებში, რომელიც ხორციელდება საქართველოს გაეროს ასოციაციის მიერ, აშშ-ს საერთაშორისო განვითარების სააგენტოს ფინანსური მხარდაჭერით. წყარო:ორგანიზაციის გვერდი სოციალურ ქსელში

იმერეთი. 25 ნოემბერს, ქუთაისის ახალგაზრდული ცენტრი შეურთდა საერთაშორისო კამპანიას ქალთა მიმართ ძალადობის წინააღმდეგ. კამპანიის ფარგლებში ცენტრმა რამდენიმე აქტივობა განახორციელა. ახალგაზრდებმა მოამზადეს საინფორმაციო პოსტერები და მოაწყვეს ქალაქის ცენტრალურ უბანში მსვლელობა. გაიმართა ასევე სადისკუსიო კლუბის შეხვედრა თემაზე: „ქალთა მიმართ ძალადობა და გენდერული სტერეოტიპები". დისკუსიაზე მონაწილეებს საშუალება მიეღოთ პასუხები მათთვის საინტერესო საკითხების შესახებ. დისკუსიის მსვლელობისას ასევე ნაჩვენები იქნება დოკუმენტური ფილმი „ქალები საქართველოდან". ახალგაზრდული ცენტრის წევრებმა ორგანიზება გაუკეთეს თანატოლთა განათლების ტრენინგს: „ოჯახური ძალადობა და გენდერული სტერეოტიპები". ტრენინგის მიზანს წარმოადგენდა ოჯახური ძალადობის და გენდერის საკითხების შესახებ ცოდნისა და უნარ–ჩვევების განვითარება მოსწავლეებისათვის. წყარო:ორგანიზაციის გვერდი სოციალურ ქსელში

იმერეთი. ფონდ „სოხუმმა" ქუთაისში, ქალთა ძალადობის წინააღმდეგ აქცია გამართა. როგორც არასამთავრობო ორგანიზაციის წარმომადგენლებმა განაცხადეს, აქციის მიზანს აღნიშნულ კამპანიაში რაც შეიძლება მეტი მოქალაქის ჩართვა იყო. აქცია 16-დღიანი საერთაშორისო საინფორმაციო კამპანიის ფარგლებში იმართება. როგორც ფონდ „სოხუმის" საზოგადოებასთან ურთიერთობის სამსახურის უფროსი, ემა კამკია ამბობს, ბოლო თვეებში ჩატარებული კვლევების მიხედვით, ოჯახური ძალადობის მსხვერპლთა სტატისტიკა საგანგაშოა. მსგავსი აქცია დღეს დასავლეთ საქართველოს 6 ქალაქში გაიმართა.

გურია. 25 ნოემბერს „ახალგაზრდა პედაგოგთა კავშირის" ბაზაზე არსებული ახალგაზდული ცენტრის წევრებმა ქალების მიმართ ძალადობის აღმოფხვრის საერთაშორისო დღის აღსანიშნავად ჩაატრეს თანატოლ განმანათლებელთა ტრენინგი გენდერული თანასწორობის შესახებ და ქალთა მიმართ ძალადობის წინააღმდეგ მოაწყვეს ფლეშ-მობი. მისი მიზანი იყო გაემახვილებინათ საზოგადოების ყურადღება ქალთა მიმართ ძალადობის ფაქტებზე. მისი შინაარსი ასახავდა საზოგადოების დამოკიდებულებას ძალადობასთან დაკავშირებით.

თბილისი. ადამიანის უფლებების სწავლებისა და მონიტორინგის ცენტრმა განცხადება გაავრცელა. ორგანიზაცია „მოუწოდებს მუნიციპალური განვითარების ფონდს, პირველადი ჯანმრთელობის დაცვის დაწესებულებების მშენებლობისას სრულად გაითვალისწინოს შეზღუდული შესაძლებლობის მქონე პირთა უფლება ჯანდაცვის ობიექტების მისაწვდომობაზე".  EMC–ის მიერ გავრცელებულ განცხადებაში ნათქვამია: „საქართველოს მუნიციპალური განვითარების ფონდის მიერ დაწყებული მასშტაბური პროექტი, რომელიც ქვეყნის ტერიტორიაზე 81 პირველადი ჯანმრთელობის დაცვის დაწესებულების აგებას ითვალისწინებს, არ შეესაბამება მშენებლობის იმ ნორმალებსა და ინსტრუქციებს, რაც უზრუნველყოფს ობიექტების სრულ მისაწვდომობას შეზღუდული შესაძლებლობის მქონე პირებისათვის. კერძოდ, ობიექტების მოწყობის სატენდერო დოკუმენტაციით განსაზღვრული მაჩვენებლები, ვერ უზრუნველყოფს შენობების სრულ მისაწვდომობასა და დამოუკიდებლად სარგებლობას შეზღუდული შესაძლებლობის მქონე პირთათავის, რაც მათი უფლებების დარღვევის საფუძველს ქმნის". სრულად წყარო:emc.org.ge

თბილისი. ადამიანის უფლებების სწავლებისა და მონიტორინგის ცენტრი „ბოლო პერიოდში იეჰოვას მოწმეების მიმართ რელიგიური შეუწყნარებლობის ნიადაგზე ჩადენილი სამართალდარღვევების ზრდის ტენდენციას" ეხმაურება. ორგანიზაცია სახელმწიფოს მოუწოდებს, საზოგადოებაში ტოლერანტული გარემოს უზრუნველყოფის მიზნით გაატაროს „დროული და ეფექტური სამართლებრივი და ინფორმაციული პოლიტიკა". „რელიგიური სიძულვილის მოტივით ჩადენილი სამართალდარღვევები სახელმწიფოს მხრიდან ეფექტურ სამართლებრივ რეაგირებასა და დამნაშავე პირების დასჯას მოითხოვს, რაც დანაშაულის პრევენციის საფუძველია. ამგავრი ძალადობის მიმართ სახელმწიფოს „შემწყნარებლობა," რომელიც, როგორც წინა წლებში, ისე მიმდინარე წელსაც ვლინდება, სერიოზულად აფერხებს ქვეყანაში რელიგიის თავისუფლების სათანადო დაცვასა და ტოლერანტული, მშვიდობიანი საზოგადოების განვითარებას", ნათქვამია ორგანიზაციის მიერ გავრცელებულ განცხადებაში. სრულად წყარო: emc.org.ge