თბილისი. საქართველოს შრომის ჯანმრთელობისა და სოციალური დაცვის სამინისტროსა და გაეროს ბავშვთა ფონდს (UNICEF) შორის ურთიერთგაგების მემორანდუმი გაფორმდა. მისი მიზანია მიზნობრივი სოციალური დახმარების პროგრამის დახვეწა და სოციალური დაცვის სისტემის ბავშვზე უფრო მეტად ორიენტაცია. წყარო: ჯანდაცვის სამინისტროს გვერდი სოციალურ ქსელში სფერო: სოციალური

შიდა ქართლი. საზოგადოება ბილიკი ეროვნული ინტეგრაციის გაძლიერების პროგრამის ფარგლებში ახორციელებს პროექტს სახელწოდებით – "ქართველი, ოსი და დევნილი ახალგაზრდების ინტეგრაცია და მხარდაჭერა სამოქალაქო გააქტიურებისთვის”. მოცემული დოკუმენტური ვიდეორგოლები 40 წამში გადმოსცემს კონფლიქტური ზონების მიმდებარე სოფლებში წითელუბანში, შავშვებსა და ხურვალეთში არსებულ იმ გარემოს, სადაც ახალგაზრდებს უწევთ ყოფნა. ორი ვიდეორგოლი ეხება წყლის პრობლემას შავშვების სკოლასა და სოფელ ხურვალეთში, ერთი კი წითელუბანში ნაგავსაყრელის პრობლემას აღწერს. რგოლების სცენარებზე, კონცეფციასა და გადაღებაზე იმუშავეს საზოგადოება ბილიკის ჟურნალისტიკის სტუდიის ახალგაზრდებმა, რომლებიც ამავე სოფლებში ცხოვრობენ. დოკუმენტური ვიდეორგოლი:  სასმელი წყლის პრობლემა შავშვების სკოლაში დოკუმენტური ვიდეორგოლი: სასმელი წყლის პრობლემა სოფელ ხურვალეთში დოკუმენტური ვიდეორგოლი: ნაგავსაყრელის პრობლემა სოფელ წითელუბანში: წყარო: osgf.ge

ქვემო ქართლი. 16 სექტემბერს სიქას ოფისში რუსთავის სასკოლო სამოქალაქო კლუბების აქტიურ წევრებისთვის სიქას ამერიკელმა მშვიდობის კორპუსის მოხალისემ და რუმინელმა მოხალისეებმა დემოკრატიის საერთაშორისო დღესთან დაკავშირებით სემინარი გამართეს.  შეხვედრის დასაწყისში ნაჩვენები იქნა რამდენიმე დოკუმენტური ფილმი დემოკრატიის თემაზე. ფილმების ჩვენების შემდეგ გაიმართა დისკუსია. მოსწავლეებმა იმსჯელეს, თუ რა არის დემოკრატია, განიხილეს მისი დადებითი და უარყოფითი მხარეები. აზრთა სხვადასხვაობა გამოიწვია საქართველოში დემოკრატიულობის ხარისხმა. საკუთარი პოზიციის დასაცავად მოსწავლეებმა დემოკრატიის კონკრეტული მაგალითები განიხილეს. სემინარის მონაწილეებმა ყურადღება გაამახვილეს სკოლებში არსებულ მდგომარეობაზე: არის თუ არა დემოკრატიული მმართველობა სკოლებში. შეხვედრის დასასრულს ყველა მოსწავლემ ისაუბრა საკუთარ როლზე დემოკრატიის მშენებლობაში.  წყარო:ორგანიზაციის გვერდი სოციალურ ქსელში

თბილისი. CISV საქართველო 21 სექტემბერს მსოფლიო მშვიდობისადმი მიძღვნილ „მშვიდობის ერთ დღეს" აღნიშნავს. ღონისძიების ფარგლებში ორგანიზაციის ახალგაზრდა წარმომადგენლები სხვადასხვა აქტივობებს ჩაატარებენ. მონაწილობის მიღება ნებისმიერ მსურველს შეუძლია.  სრულად  წყარო:ორგანიზაციის გვერდი სოციალურ ქსელში

იმერეთი. იმერეთის რეგიონის, ხონის მუნიციპალიტეტში სამოქალაქო განათლებისა და პედაგოგოთა გადამზადების პროგრამის სამიზნე სკოლების მოსწავლეებმა ახალგაზრდულ ფორუმზე შემუშავებული პროექტი განახორციელეს. 10-12 სექტემბერს, ხონში სამოქალაქო განათლების საზაფხულო სკოლა მოეწყო, რომელშიც პროგრამის სამიზნე სკოლების მოსწავლეები მონაწილეობდნენ. სამი დღის მანძილზე მოსწავლეებს საზაფხულო სკოლაში უტარდებოდათ ტრენიგები სხვადასხვა თემატიკაზე აქტიური მოქალაქეობა; სამოქალაქო განათლების მნიშნვნელობა; სამოქალაქო კლუბების მართვა; პრექტების წერა და მართვა. მოსწავლეებმა ასევე შეიმუშავეს საპროექტო წინადადებები, რომელსაც სამოქალაქო განათლებისა და პედაგოგთა გადამზადების პროგრამის მცირე გრანტების კონკურსში წარადგენენ. წყარო: ქუთაისის განათლების განვითარების და დასაქმების ცენტრის გვერდი სოციალურ ქსელში

სამცხე–ჯავახეთი. დემოკრატ მესხთა კავშირის ახალგაზრდული ცენტრის წევრებმა, ქალაქ ახალციხის შემოგარენში არსებული „და ძმის" ეკლესიის მიმდებარე ტერიტორია დაასუფთავეს. აქცია ჩატარდა პროექტ – „ეროვნული ინტეგრაციის გაძლიერება საქართველოში" – ფარგლებში, რომელსაც ახორციელებს საქართველოს გაეროს ასოციაცია, ამერიკის შეერთებული შტატების საერთაშორისო განვითარების სააგენტოს (USAID) ფინანსური მხარდაჭერით. წყარო:ორგანიზაციის გვერდი სოციალურ ქსელში

თბილისი. 13 სექტემბერს, არასამთავრობო ორგანიზაციის „გადავარჩინოთ ბავშვების" ბენეფიციართა ჯგუფს თბილისის მოსწავლე-ახალგაზრდობის ეროვნული სასახლის ამერიკულმა კუთხემ უმასპინძლა. ამერიკული კუთხის მოსწავლეებმა გააცნეს მათ თავიანთი საქმიანობა და დაათვალიერებინეს მოსწავლე-ახალგაზრდობის სასახლის სხვადასხვა კაბინეტები. წყარო:ამერიკული კუთხის გვერდი სოციალურ ქსელში

თბილისი. 16–22 სექტემბერს თბილისში ჩატარდება ახალგაზრდული ფორუმი „გაიცანი მეზობელი, რათა შეიცნო საკუთარი თავი". ახალგაზრდული ფორუმი უმასპინძლებს ახალგაზრდული კლუბების წევრ 60 აქტივისტს სომხეთიდან, ბულგარეთიდან, თურქეთიდან და საქართველოდან. 7 დღის განმავლობაში მონაწილეებს საშუალება ექნებათ გაიცნონ ერთმანეთი და გაუზიარონ საკუთარი ქვეყნის კულტურული ფასეულობები, ტრადიციები და მემკვიდრეობა და იპოვონ გზები მდგრადი თანამშრომლობისთვის. ღონისძიების ორგანიზატორები არიან ქალთა ასოციაცია „თანხმობა" და ჰეიპერ სომხეთის წარმომადგენლობა, ფორუმი ორგანიზებულია „ახალგაზრდები რეგიონალური თანამშრომლობისა და განვითარებისთვის" პროექტის ფარგლებში, რომლის ფინანსური მხარდამჭერია ევროკავშირი. წყარო: ორგანიზაცია „თანხმობა"

იმერეთი. 11 სექტემებრს ქუთაისის ახალგაზრდული ცენტრის წევრებისათვის გაიმართა დისკუსიას თემაზე: „დემოკრატიული არჩევნები და არჩევის პრაქტიკა საქართველოში". დისკუსიას სამართლიანი არჩევნებისა და დემოკრატიის საერთაშორისო საზოგადოების (ISFED) ქუთაისის ოფისის წარმომადგენელი უძღვებოდა. დისკუსიის მიზანი იყო ახალგაზრდები გაცნობოდნენ თუ რა მნიშვენლობა აქვს არჩევნების დემოკრატიულად ჩატარებას ქვეყნის განვითარებისათვის და დემოკრატიული სახელმწიფოს მშენებლობისთვის. მსმენელებს გააცნეს ინფორმაცია თუ როგორ უნდა წარიმართოს საარჩევნო პროცესები დემოკრატიულად და კანონის ფარგლებში, როგორი უნდა იყოს ამომრჩევლის აქტიურობა და მონაწილეობა, თუ რა არის საქართველოში არჩევნების ჩატარების სამართლებრივი საფუძველი, რას ითვალისწინებს საქართველოს კონსტიტუცია, ადამიანის უფლებათა საერთაშორისო სამართლის საყოველთაოდ აღიარებული პრინციპები და ნორმები, საქართველოს საარჩევნო კოდექსი, სხვა საკანონმდებლო აქტები და საარჩევნო ადმინისტრაციის სამართლებრივი აქტები არჩევნების სამართლიანად ჩატარებისათვის. დისკუსია გაიმართა „საქართველოში ეროვნული ინტეგრაციის გაძლიერების პროექტის" (ANI) ფარგლებში, რომელსაც ახორციელებს საქართველოს გაეროს ასოციაცია (UNAG), აშშ-ს საერთაშორისო განვითარების სააგენტოს (USAID) მხარდაჭერით. წყარო:ორგანიზაციის გვერდი ოსიცალურ ქსელში

თბილისი. 11-13 სექტემბერს, საქართველოს გაეროს ასოციაცია, ორგანიზაცია „პარტნიორები საქართველოსთან" ერთად, პროექტის ახალგაზრდული ცენტრის 25 წევრისათვის „ეფექტური ფასილიტაციის" 3-დღიან ტრენინგს ატარებს. ღონისძიება 2013 წლის მაისში ჩატარებული ფასილიტაციის ტრენინგის მეორე ეტაპს წარმოადგენს.  ტრენინგს წინ უძღოდა ფასილიტატორების მიერ ჩატარებული შეხვედრები თანატოლებთან, მშობლებთან და ადგილობრივ თვითმმართველობების წარმომადგენლებთან. ჩატარებული შეხვედრების შესახებ წარმოადგენენ ტრენინგის მონაწილეები პრეზენტაციებს - თუ რა ტიპის ფასილიტაცია გამართეს თავინთ ქალაქებში, რა სირთულეებს მოიცავდა შეხვედრების დაგეგმვისა და ფასილიტაციის პროცესი, რა იდეები და შემოთავაზებები მიიღეს, რა შეიძლება გაკეთდეს შემდგომში ფასილიტაციის პროცესის ეფექტურად წარმართვისათვის. ასევე, ტრენინგის ფარგლებში მონაწილეები განიხილავენ მიღწეულ იქნა თუ არა დაინტერესებულ მხარეებთან შეხვედრის ძირითადი მიზნები.  წყარო:სამოქალაქო აქტივიზმის ახალგაზრდული ცენტრის გვერდი სოციალურ ქსელში

სამცხე–ჯავახეთი. 11 სექტემბერს, ბაკურიანში–  „ეთნიკურ უმცირესობებს მიკუთვნებულ ახალგაზრდებს შორის პატრიოტული სულისკვეთების ამაღლებისა და განმტკიცების ხელშეწყობის" – პროგრამის პრეზენტაცია გაიმართა. პროექტს „მრავალეროვანი საქართველოს" ახალგაზრდული კავშირი „ბავშვთა და ახალგაზრდობის განვითარების ფონდის" დაფინანსებით ახორციელებს.  პროექტის მიზანია საქართველოში უმცირესობებს მიკუთვნებულ წვევამდელთა და საშუალო სკოლის უფროსკლასელთა პატრიოტული სულისკვეთების ამაღლებისა და განმტკიცების ხელშეწყობა, ისევე როგორც ქართულ არმიაში მსახურობისადმი მათი ინტერესის გაჩენისა და ამაღლების ხელშეწყობა. პროექტის განხორციელების პირველ ეტაპზე, ბაკურიანში ჩატარდება ორი სამდღიანი საინფორმაციო-შემეცნებითი ხასიათის სემინარი პატრიოტული სულისკვეთების ამაღლების თემაზე, ქვემო ქართლისა და სამცხე-ჯავახეთის რეგიონებიდან მოწვეული ეთნიკურ უმცირესობებს მიკუთვნებული წვევამდელებისა და საშუალო სკოლის უმფროსკლასელებისათვის.  წყარო:ორგანიზაციის გვერდი სოციალურ ქსელში

კახეთი. თელავის ახალგაზრდული ცენტრის წარმომადგენლებმა 11 სექტემბერი – მშვიდობის დღე აქციით აღნიშნეს. სპეციალურად აქციისთვის მოამზადეს სამშვიდობო ხასიათისა და ტერორიზმის წინააღმდეგ მიმართული პოსტერები და ქალაქში ქალაქის ქუჩებში მსვლელობა მოაწყვეს. ღონისძიება გაიმართა „საქართველოში ეროვნული ინტეგრაციის გაძლიერების პროექტის" ფარგლებში, რომელსაც ახორციელებს საქართველოს გაეროს ასოციაცია, აშშ–ს საერთაშორის განვითარების სააგენტოს მხარდაჭერით. წყარო: თელავის ახალგაზრდული ცენტრის გვერდი სოციალურ ქსელში

თბილისი. ორგანიზაცია „დრონი" და „ბავშვთა და ახალგაზრდობის ფონდი" ახორციელებენ ახალ პროექტს – „ახალგაზრდები ბარიერების გარეშე". პროექტის ფარგლებში საქართველოს ოთხ დევნილთა ჩასახლებაში მცხოვრები ახალგაზრდების მონაწილეობით მოეწყობა სხვადასხვა აქტივობები. 3-დან 18 წლამდე ასაკის ბავშვები და მოზარდები სკრის, შაუმიანის, კარალეთისა და შავი ზღვის სკოლის ჩასახლებებიდან ჩაერთვებიან ისეთ ტრენინგებსა და ღონისძიებებში როგორიცაა: ცოცხალი ბიბლიოთეკა, ანიმაციისა და გრაფიკის ტრენინგები, სოციალური მედიის,პიროვნული განვითარებისა და ადამიანის უბლებათა ტრენინგები,სპორტული ღონისძიებები და კულტურული კოქტეილი . პროექტის ფარგლებში ახალგაზრდებთან იმუშავებენ გამოცდილი ტრენერები და კოორდინატორები, როგორც საქართველოდან, ასევე ევროპის სხვადასხვა ქვეყნებიდან. პროექტის გვერდი სოციალურ ქსელში  წყარო:ორგანიზაციის გვერდი სოციალურ ქსელში

იმერეთი. 6 სექტემბერს ქუთაისის ახალგაზრდული ცენტრის წევრებისათვის ჩატარდა ტრენინგ-სემინარი: „ტოლერანტობა და მრავალფეროვნება". ღონისძიება მიზნად ისახავდა ახალგაზრდებს მიეღოთ ინფორმაცია ტოლერანტობის, ადამიანის უფლებების და მასთან დაკავშირებული კანონმდებლობისა და საერთაშორისო ხელშეკრულებების შესახებ. ტრენინგ-კურსის მუშაობას უძღვებოდა სახალხო დამცველის რწმუნებული დასავლეთ საქართველოში. ტრენინგ-სემინარი გაიმართა პროექტის – „საქართველოში ეროვნული ინტეგრაციის გაძლიერების პროექტის" (ANI) ფარგლებში, რომელიც ხორციელდება საქართველოს გაეროს ასოციაციის (UNAG) მიერ, აშშ-ს საერთაშორისო განვითარების სააგენტოს (USAID) მხარდაჭერით. წყარო:ორგანიზაციის გვერდი სოციალურ ქსელში

სამცხე–ჯავახეთი. ახალციხის ახალგაზრდული ცენტრის წევრებმა, პროექტ – „ეროვნული ინტეგრაციის გაძლიერება საქართველოს" – ფარგლებში განხორციელებული ღონისძიებები ახალციხის მუნიციპალიტეტის საკრებულოს და გამგეობის წარმომადგენლებს გააცნეს. პრეზენტაციის შემდეგ ადგილობრივი თვითმმართველობის წარმომადგენლებს, საშუალება მიეცათ დაეფიქსირებინათ საკუთარი შეხედულებები პროქტთან დაკავშირებით და შეეთავაზებინათ მომავალში ერთობლივად განსახორციელებელი ღონისძიებები. შეხვედრა ჩატარდა პროექტ ეროვნული ინტეგრაციის გაძლიერება საქართველოში, ფარგლებში, რომელსაც ახორციელებს საქართველოს გაეროს ასოციაცია, ამერიკის შეერთებული შტატების საერთაშორისო განვითარების სააგენტოს (USAID) ფინანსური მხარდაჭერით. წყარო:ორგანიზაციის გვერდი სოციალურ ქსელში

თბილისი. 9 სექტემბერს, „საქართველოს ახალგაზრდული პარლამენტის" წარმომადგენლები საქართველოს რეგიონული განვითარებისა და ინფრასტრუქტურის მინისტრის მოადგილეს შეხვდნენ. შეხვედრა გაცნობით ხასიათს ატარებდა და იგი ახალგაზრდული პარლამენტის ინიციატივით გაიმართა. ახალგაზრდები სამინისტოს საქმიანობით დაინტერესდნენ და რეგიონული განვითარების კუთხით, თანამშრომლობის სურვილი გამოთქვეს. რეგიონული განვითარების მინისტრის მოადგილე და ახალგაზრდული პარლამენტის წამორმადგენლები მომავალ შეხვედრებსა და აზრთა გაზიარების თაობაზეც შეთანხმდნენ. წყარო:ორგანიზაციის გვერდი სოციალურ ქსელში

სამეგრელო. 8 სექტემბერს ასოციაცია „ათინათის" ახალგაზრდულმა ცენტრმა „ორტუსმა" წერა-კითხვისა და წიგნიერების დღე აღნიშნა. ამ დღესთან დაკავშირებით ორტუსის წევრებმა თავიანთი პროექტები განახორციელეს: „არტ თერაპია", რომელშიც მონაწილეობა მიიღო სხვადასხვა სკოლის 20-მდე მოსწავლემ, არტ თერაპიის თემა იყო „მოგზაურობა ლიტერატურულ პერსონაჟებთან ერთად"; ქუჩის ბიბლიოთეკა, სადაც ყოველ გამვლელს შეეძლო აერჩია მისი საყვარელი წიგნი და საჯაროდ წაეკითხა რამდენიმე ციტატა. ღონისძიების ფარგლებში მოწყო პოეზიის საღამოც. პროექტის მიზანი იყო საზოგადოებაში ცნობიერების ამაღლება წერა კითვისა და წიგნიერებისადმი. წყარო:ორგანიზაციის გვერდი სოციალურ ქსელში

ქვემო ქართლი.  ქვემო ქართლში სამოქალაქო განათლებისა და პედაგოგთა გადამზადების პროგრამის კოორდინატორებმა კაზრეთის საჯარო სკოლაში სამოქალაქო კლუბების წევრებს გააცნეს პროგრამის მეოთხე წლის სამოქმედო გეგმა, შეიმუშავეს მუშაობის კონკრეტული სქემა.  კლუბის წევრებმა მუშაობა დაიწყეს მცირე გრანტების კონკურსისათვის საპროექტო აპლიკაციებზე. შეხვედრას ესწრებოდა კლუბების 25 წევრი. წყარო: სიქას გვერდი სოციალურ ქსელში

აჭარა. 8 სექტემბერს, ახალგაზრდული ორგანიზაცია „არტ ვეის" ორგანიზებით, ბათუმის ბოტანიკურ ბაღში, ღია ცის ქვეშ, მორიგი სემინარი ჩატარდა. ამჯერად  სემინარი  ფოტოგრაფიით დაინტერესებული ახალგაზრდებისთვის ცნობილმა ფოტოგრაფმა იური მეჩიტოვმა  წაიკითხა. სემინარი, როგოც უკვე ითქვა, ბათუმის ბოტანიკურ ბაღში ჩატარდა და მას პროექტის „სემინარები ხელოვნების მიმართლებით" მონაწილე ახალგაზრდები ესწრებოდნენ. სემინარის დასრულების შემდეგ პროექტის მონაწილეები ბაღში დარჩნენ და კარვებში დაბინავდნენ. აღნიშნული პროექტის მიზანია ახალგაზრდებისთვის თავისუფალი დროის საინტერესოდ და ინტელექტუალურად გატარების ხელშეწყობა. პროექტის ფინანსური მხარდამჭერია აჭარის სპორტისა და ახალგაზრდობის საქმეთა დეპარტამენტი. 

თბილისი. 9 სექტემბერს, სპორტისა და ახალგაზრდობის საქმეთა სამინისტროს ბავშვთა და ახალგაზრდობის განვითარების ფონდის ორგანიზებით ნორვეგიელი სოციოლოგი იოჰან გალტუნგი ეწვია. მეცნიერს მინისტრმა, ფონდის დირექტორმა და დირექტორის მოადგილემ უმასპინძლეს. სამუშაო შეხვედრისას დაიგეგმა მშვიდობის ტრანსფორმაციის საკითხის წინა პლანზე წამოწევა ახალგაზრდულ კონტექსტში. იოჰან გალტუნგი ოსლოს მშვიდობის კვლევის ინსტიტუტის დამაარსებელია. საქართველოში იგი არასამთავრობო ორგანიზაცია ,,მრავალარხიანი დიპლომატიის ინსტიტუტის’’ მიერ ორგანიზებული პროექტის: ,,ახალგაზრდული ინიციატივა კონფლიქტების ანალიზისა და ტრანფორმაციისთვის’’ ფარგლებში იმყოფება. პროექტი ბავშვთა და ახალგაზრდობის განვითარების ფონდის მეორე საგრანტო კონკურსის გამარჯვებულია. წყარო:ორგანიზაციის გვერდი სოციალურ ქსელში

ბათუმი. 6 სექტემბერს, ახალგაზრდულმა ორგანოიზაციამ „არტ ვეი" და თვითმმართველ ქალაქ ბათუმის მერიის ახალგაზრდულ საქმეთა განყოფილებამ მაყურებელს ნიკო კილაძის პიესის მიხედვით დადგმული სპექტაკლი „დაუსრულებელი ისტორია" ბოლო ჩვენება გამართა.  პიესა 1900-იანი წლების ბათუმურ ისტორიებს მოგვითხრობს. ახალგაზრდა რეჟისორმა ოთარ ქათამაძემ ამჯერად კინოს ხერხებით დადგმული სპექტაკლით აახმაურა ბათუმის უბნები. აღნიშნული ღონისძიება პროექტის „ღია ახალგაზრდული თეატრის" ფარგლებში ჩატარდა, რომელიც სექტემბრის ბოლომდე გაგრძელდება და ბევრ საინტერესო სიახლეს შესთავაზებს ხელოვნების მოყვარულ ადამიანებს.

ქვემო ქართლი. 8 სექტემბერს, დმანისის ახალგაზრდული ცენტრის წევრებმა კალიგრაფიის კონკურსი ჩაატარეს, რომელიც წერა-კითხვის საერთაშორისო დღეს მიეძღვნა. კონკურსში მონაწილეობა არაქართულენოვანი სკოლების ოცმა მოსწავლემ მიიღო. კონკურსის დაწყებამდე კონკურსის იდეის ავტორმა წერა-კითხვის საერთაშორისო დღის შესახებ ისაუბრა და დამსწრეებს დმანისის ახალგაზრდული ცენტრის საქმიანობა გააცნო. კონკურსანტების ნამუშევრები შეაფასა ჟიურიმ. პირველი, მეორე და მესამე ადგილის მფლობელებს გადაეცათ სიმბოლური პრიზები.  კონკურსის მთავარი მიზანია-გავრცელდეს ინფორმაცია ქართული დამწერლობის განვითარების ისტორიისა და წერა-კითხვის საერთაშორისო დღის შესახებ ეთნიკური უმცირესობის წარმომადგენლების შორის, ახალგაზრდების ინტერესის გაზრდა მართლწერისა და კალიგრაფიის მიმართ. წყარო:ორგანიზაციის გვერდი სოციალურ ქსელში