თბილისი. საქართველოს სახალხო დამცველმა მონაწილეობა მიიღო საერთაშორისო ონლაინ ღონისძიებაში, სადაც იძულებით გადაადგილებულ პირთა (დევნილთა) დაცვის მიზნით, ადამიანის უფლებათა ეროვნული ინსტიტუტებისთვის (NHRI) შექმნილი სახელმძღვანელო წარადგინეს და განიხილეს. „სახელმძღვანელოში წარმოდგენილია დევნილთა უფლებების დაცვასთან დაკავშირებული ძირითადი სამართლებრივი და პოლიტიკის სტანდარტები, გაანალიზებულია ადამიანის უფლებათა დამცველი ინსტიტუტების როლი და საქმიანობა დევნილთა უფლებების დაცვის კუთხით და მიმოხილულია საუკეთესო პრაქტიკის მაგალითები“. სრულად... წყარო: ombudsman.ge

თბილისი. სოციალური სამართლიანობის ცენტრი წარმოგიდგენთ დისკუსიას, რომელიც დევნილებს, მათ საცხოვრებელ პირობებს, მათ მიმართ ხელისუფლების პოლიტიკას შეეხება. „2022 წლის, 16 იანვარს 52 წლის ზურაბ ქირია დევნილთა საცხოვრებლის სახურავიდან გადმოხტა და თავი მოიკლა. ეს ტრაგიკული შემთხვევა იმ დასახლებაში მოხდა, სადაც დევნილები 1993 წლიდან არიან შესახლებულები, ავარიულ შენობაში და უმძიმეს საყოფაცხოვრებო პირობებში. ზურაბ ქირიას თვითმკვლელობაც ხელისუფლების მხრიდან ყურადღების მიქცევის მცდელობის ტრაგიკული შემთხვევა იყო“. სრულად... წყარო: socialjustice.org.ge

თბილისი. გაეროს ქალთა ორგანიზაციის წარმომადგენელი საქართველოში, კაორი იშიკავა გაცნობითი ვიზიტით სოფელ ერგნეთსა და გორის დევნილთა დასახლებას ეწვია. ქალბატონი კაორი იშიკავა ადგილზე გაეცნო გამყოფ ხაზთან მცხოვრები და დევნილი ქალების მდგომარეობას, გამოწვევებსა და საჭიროებებს. სრულად... წყარო: ორგანიზაციის გვერდი სოციალურ ქსელში

თბილისი. საქართველოს სოციალურ მუშაკთა ასოციაცია თანადგომას უცხადებს კოლეგას, თამარ საუთიევას, რომელიც სანატორიუმ „ქართლის“ მაცხოვრებელია. „სოციალური მუშაკებისთვის კარგად ცნობილია, თუ რა პრობლემების და რთული მდგომარეობის წინაშე დგანან იძულებით გადაადგილებული პირები, შეიარაღებული კონფლიქტით დაზარალებული პირები. დღეს ადამიანები ელემენტარული საჭიროების, უსაფრთხო გარემოს, საცხოვრებლის უსაფრთხოებისთვის იბრძვიან. აქვე გვინდა მივუსამძიმროთ გარდაცვლილი პირის ოჯახის წევრებს. იმედს ვიტოვებთ, სანატირიუმ „ქართლში“ მაცხოვრებლების მოთხოვნები სულ მალე დაკმაყოფილდება და საშუალება ექნებათ, უსაფრთხო გარემოში განაგრძონ ცხოვრება“. სრულად... წყარო: ასოციაციის გვერდი სოციალურ ქსელში

თბილისი. სამოქალაქო საზოგადოების ორგანიზაციების ნაწილი ეხმიანება სანატორიუმ „ქართლის“ შენობაში მცხოვრები დევნილების პროტესტს და 16 იანვარს ადგილზე მომხდარ უმძიმეს ტრაგედიას.  „მოვუწოდებთ საქართველოს ხელისუფლებას სწრაფი რეაგირებისკენ, დევნილების უსაფრთხო და ღირსეულ პირობებში განსახლების უზრუნველსაყოფად. მიგვაჩნია, რომ სახელმწიფომ უგულებელყო საფრთხის შემცველ გარემოში დევნილთა სიცოცხლისა და ჯანმრთელობის დაცვის ვალდებულება და 16 იანვარს ადგილზე მომხდარი ტრაგედია სწორედ უმოქმედობის და უნდობლობის პოლიტიკის შედეგია“. სრულად... წყარო: socialjustice.org.ge

თბილისი. საქართველოს სახალხო დამცველი სანატორიუმ „ქართლში“ ჩასახლებულ დევნილებს შეხვდა და ადგილზე მოისმინა მათი პრობლემების შესახებ. „ომბუდსმენი მიიჩნევს, რომ ვინაიდან, ობიექტი სახიფათოა საცხოვრებლად, მათ შორის შენობაში ცხოვრობენ არასრულწლოვნებიც, მნიშვნელოვანია სახელმწიფომ აწარმოოს შედეგზე ორიენტირებული მოლაპარაკებები დევნილ ოჯახებთან, მოისმინოს საცხოვრებლის მოძიების პროცესში არსებული დაბრკოლებებისა და ქირის სარგებლობის შემთხვევაში შეწყვეტის თაობაზე გამოთქმული წუხილების შესახებ, პრევენციულად მოახდინოს რეაგირება შესაძლო რისკებზე, რათა უმოკლეს ვადებში შესაძლებელი გახდეს დევნილი ოჯახების უსაფრთხო ადგილას განსახლება“. სრულად... წყარო: ორგანიზაციის გვერდი სოციალურ ქსელში

თბილისი. სახალხო დამცველი მწუხარებას გამოთქვამს თბილისში, ზღვის უბნის დასახლებაში, ყოფილი სანატორიუმ „ქართლის“ შენობაში მცხოვრები დევნილი მამაკაცის თვითმკვლელობის გამო და სამძიმარს უცხადებს გარდაცვლილის ოჯახის წევრებსა და ახლობლებს. „სახალხო დამცველმა ჯერ კიდევ გასულ წლებში შეისწავლა ყოფილი სანატორიუმი „ქართლის“ შენობაში მცხოვრები დევნილების უფლებრივი მდგომარეობა და დაადგინა, რომ სსიპ დევნილთა, ეკომიგრანტთა და საარსებო წყაროებით უზრუნველყოფის სააგენტო დაუსაბუთებლად აცხადებდა უარს შენობის ტექნიკური მდგრადობის შემოწმებაზე (შესაბამისი ექსპერტიზის ჩატარებაზე). შედეგად, სახალხო დამცველმა 2020 წლის 21 დეკემბერს რეკომენდაციით მიმართა სააგენტოს და შენობის ტექნიკური მდგრადობის შემოწმება მოითხოვა. არსებული საექსპერტო დასკვნით დასტურდება შენობაში სიცოცხლისა და ჯანმრთელობისათვის მომეტებული საფრთხის შემცველი გარემოს არსებობა“. სრულად... წყარო: ombudsman.ge

თბილისი. 5 ნოემბერს ღია კარის დღე გაიმართა ქალების, მშვიდობისა და უსაფრთხოების შესახებ. 2021 წლის ღია კარის დღის ღონისძიებაში ქალთა საკითხებზე მომუშავე სამოქალაქო და სათემო ორგანიზაციების წარმომადგენლები, დევნილები და კონფლიქტის შედეგად დაზარალებული ქალები და ახალგაზრდები მონაწილეობდნენ. „შეხვედრაზე ქალთა სამოქალაქო საზოგადოების ორგანიზაციების წარმომადგენლებმა და დევნილმა და კონფლიქტის შედეგად დაზარალებულმა ქალებმა პანდემიის პირობებში მდგარ მწვავე პრობლემებზე გააკეთეს აქცენტი“. სრულად... წყარო: ორგანიზაციის გვერდი სოციალურ ქსელში

თბილისი. საქართველოს სახალხო დამცველი აგვისტოს ომის 13 წლისთავთან დაკავშირებით განცხადებას ავრცელებს. „უკვე 13 წელია 2008 წლის აგვისტოს ომის შედეგები დამანგრეველ გავლენას ახდენს, როგორც საოკუპაციო ხაზის გასწვრივ, ისე ოკუპირებულ ტერიტორიებზე მაცხოვრებელ ადამიანებზე. კვლავ გრძელდება რუსეთის ფედერაციის მესაზღვრეების მიერ ადამიანების უკანონოდ დაკავება და დაჯარიმება. წლიდან წლამდე უარესდება გადაადგილების თავისუფლება ორივე ოკუპირებულ რეგიონში. საოკუპაციო ხაზზე გადაადგილებისთვის, დე ფაქტო ხელისუფლების მიერ დადგენილი ფორმალური რეჟიმი და სხვადასხვა ბარიერის დაწესება, როგორიცაა ე.წ. გამშვები პუნქტების არაპროგნოზირებადი ჩაკეტვა, ზღუდავს ოკუპირებული რეგიონების მკვიდრთა გადაადგილების თავისუფლებას და გაუმართლებელ დაბრკოლებებს უქმნის მათ საარსებო წყაროებზე წვდომას“. სრულად... წყარო: ombudsman.ge

თბილისი. საქველმოქმედო ჰუმანიტარული ცენტრი „აფხაზეთი“ (CHCA) გაეროს განვითარების პროგრამის (UNDP) ფინანსური მხარდაჭერით სამეგრელოში, იმერეთსა და შიდა ქართლში, დევნილთა 100 კოლექტიურ ცენტრში დევნილი თემის მხარდამჭერ პროექტს იწყებს.                           წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრმა (ყოფილი EMC) გაეროს ადამიანის უფლებათა უმაღლეს კომისარს წარუდგინა რიგით მესამე, ყოველწლიური ანგარიში კონფლიქტის რეგიონებში არსებულ უფლებრივ და ჰუმანიტარულ მდგომარეობასთან დაკავშირებით. ორგანიზაციის მიწოდებული ინფორმაცია ყურადღებას ამახვილებს 2020-2021 წლებში ადამიანის უფლებათა დარღვევების განგრძობად პრაქტიკებზე, მათ შორის, უკანონო დაკავებების და გადაადგილების თავისუფლების შეზღუდვის შემთხვევებზე, რასაც არაერთი ტრაგიკული შემთხვევა მოჰყვა, ეთნიკური ნიშნით ქართველების შევიწროებასა და დევნაზე გალის და ახალგორის რეგიონებში, პანდემიის პირობებში მძიმე სოციალურ და ჯანდაცვის მდგომარეობაზე, ასევე წამების და არაადამიანური მოპყრობის სავარაუდო პრაქტიკებზე ცხინვალის რეგიონში არსებულ სასჯელაღსრულების დაწესებულებებში. სრულად... წყარო: socialjustice.org.ge

შიდა ქართლი. CSI-ს გორის ოფისმა, გორის მერიის ახალგაზრდული განყოფილების ხელმძღვანელთან ერთად, სოფელ ქორდში, ახალგაზრდული სივრცე მოინახულეს და კამპანია „ეს ქვეყანა შენიას“ ფარგლებში მომზადებული მასალები ჩაიტანეს. სამოქალაქო საზოგადოების ინსტიტუტი (CSI) აქტიურად მუშაობს რეგიონში ახალგაზრდების შესაძლებლობების განვითარების მიმართულებით და მზად არის, არსებული რესურსების გამოყენებით, წვლილი შეიტანოს ახალგაზრდული ეკოსისტემის შექმნის პროცესში. რეგიონებში ახალგაზრდული სივრცეების საჭიროება ახალგაზრდული სტარტეგიის დოკუმენტზე მუშაობისას გამოიკვეთა და გორის მუნიციპალიტეტმა, ახალგაზრდობის სააგენტოსთან ერთად, სოფელ ქორდში სამოდელო სივრცის შექმნას შეუწყო ხელი. ამ ეტაპზე, ახალგზრდები ცენტრის მოხატვასა და, სხვადასხვა ორგანიზაციის დახმარებით, მის აღჭურვაზე მუშაობენ. ქორდის ახალგაზრდული სივრცე მალე ოფიციალურად გაიხსნება და კონფლიქტის ზონაში მცხოვრებ ახალგაზრდებს შესაძლებლობა ექნებათ ისარგებლონ ადგილით, რომელსაც არაფორმალური განათლების მისაღებად და სხვადასხვა აქტივობისთვის გამოიყენებენ. სრულად...

სამეგრელო. გაეროს მუდმივი კოორდინატორი საქართველოში საბინე მახლი ანაკლიაში ადგილობრივი არასამთავრობო ორგანიზაციების წარმომადგენლებსა და დევნილ და კონფლიქტის შედეგად დაზარალებულ ქალებს შეხვდა. „შეხვედრის მონაწილეებმა ქალებზე, მშვიდობასა და უსაფრთხოებაზე გაეროს უშიშროების საბჭოს რეზოლუციების შესახებ 2018-2020 წლების ეროვნული სამოქმედო გეგმის ლოკალიზაციაზე, გადაწყვეტილების მიღების, სამშვიდობო და უსაფრთხოების პროცესებში დევნილი და კონფლიქტის შედეგად დაზარალებული ქალების ჩართულობაზე იმსჯელეს. ქალებმა გაეროს მუდმივ კოორდინატორს საკუთარი პრობლემები და მათ გადასაჭრელად საჭირო ხედვები გაუზიარეს“. სრულად... წყარო: ორგანიზაციის გვერდი სოციალურ ქსელში

თბილისი. გაეროს ქალთა ორგანიზაციის მხარდაჭერით, თემაზე „ჟენევის საერთაშორისო მოლაპარაკებები - ქალები, მშვიდობა და უსაფრთხოება“ საქართველოს საგარეო საქმეთა სამინისტრომ სამოქალაქო სექტორის წარმომადგენლებთან საინფორმაციო შეხვედრა გამართა. „შეხვედრაზე ქალთა სამოქალაქო სექტორის წარმომადგენლებმა დევნილი და კონფლიქტის შედეგად დაზარალებული ქალების გამოწვევებზე ისაუბრეს და ჟენევის საერთაშორისო მოლაპარაკებების ქართველ მონაწილეებს კონკრეტული წინადადებები შესთავაზეს ინკლუზიური სამშვიდობო პროცესის ხელშეწყობასთან დაკავშირებით“, ნათქვამია ორგანიზაციის გვერდზე სოციალურ ქსელში.  სრულად... წყარო: ორგანიზაციის გვერდი სოციალურ ქსელში

თბილისი. დევნილთა უფლებებზე მომუშავე ორგანიზაციები შამგონაში მომხდარ ტრაგედიას ეხმაურებიან.  „ხელმომწერი ორგანიზაციები ვუთანაგრძნობთ გარდაცვლილთა ოჯახებს და შეშფოთებას გამოვთქვამთ სახელმწიფო უწყებების მხრიდან ოკუპირებულ ტერიტორიებზე მცხოვრები საქართველოს მოქალაქეების უფლებების არასათანადო დაცვის გამო. არასამთავრობო ორგანიზაციები წლებია ეხმიანებიან ოკუპირებულ ტერიტორიებზე და მის მიმდებარედ მცხოვრები მოქალაქეების უფლებების შეზღუდვის ფაქტებს და იქ არსებულ კრიზისულ სიტუაციას და მოუწოდებენ ხელისუფლებას ქმედითი ნაბიჯების გადადგმისკენ“, - ვკითხულობთ განცხადებაში.  სრულად...   წყარო: gyla.ge

იმერეთი. EDEC, UNDP-თან თანამშრომლობით, იწვევს ახალგაზრდებს იმერეთის, სამეგრელო-ზემო სვანეთისა და შიდა ქართლის რეგიონებიდან, მონაწილეობა მიიღონ პროექტში „დევნილთა უფლებების დაცვა COVID - 19 კრიზისის დროს საქართველოში“. „პროექტის მიზანია ხელი შეუწყოს იძულებით გადაადგილებულ და კონფლიქტის შედეგად დაზარალებულ ახალგაზრდებს ჩაერთონ კოვიდ - 19 პანდემიის შედეგად თავიანთ თემში შექმნილი გამოწვევებისა და პრობლემების გადაჭრაში“. სრულად... წყარო: ორგანიზაციის გვერდი სოციალურ ქსელში

საქართველოს ახალგაზრდა იურისტთა ასოციაცია, ადამიანის უფლებათა ევროპული სასამართლოს დიდი პალატის მიერ, 2008 წლის აგვისტოს ომის დროს, რუსეთის ფედერაციის მხრიდან განხორციელებულ დარღვევებთან დაკავშირებით, 2021 წლის 21 იანვარს მიღებულ გადაწყვეტილებას განმარტავს.  განმარტება მოიცავს ყველა მყხლს, რომელზეც საქართველო რუსეთს ედავებოდა და შედეგებს, რომელიც სტრასბურგის გადაწყვეტილებით დადგა. წარდგენილ საჩივარში საქართველო ამტკიცებდა, რომ რუსეთმა ადმინისტრაციული პრაქტიკის სახით, რუსულ შეიარაღებულ ძალებს და მათ კონტროლქვეშ მოქმედ სეპარატისტულ ძალებს ხელი შეუწყო/ნება დართო, განეხორციელებინათ განურჩეველი და არაპროპორციული თავდასხმები მშვიდობიანი მოსახლეობის და მათი ქონების წინააღმდეგ. მთლიანობაში, საჩივარი ევროპული კონვენციის 8 მუხლის დარღვევას შეეხებოდა.  სრულად...  წყარო: ორგანიზაციის ვებგვერდი

თბილისი. ადამიანის უფლeბების სწავლებისა და მონიტორინგის ცენტრი (EMC) აქვეყნებს ოკუპირებული ტერიტორიების შესახებ კანონის შეფასების დოკუმენტს. „კანონის მიღებიდან ზუსტად 12 წელი გავიდა. ამ პერიოდში საქართველოს ხელისუფლებას, კანონის არსებობის პარალელურად, არაერთი მცდელობა ჰქონდა ოკუპირებული ტერიტორიების უკანონო რეჟიმებისთვის ახალ-ახალი სამშვიდობო წინადადებები შეეთავაზებინა. თუმცა, როგორც თომას დე ვაალი წერს, „დე-ფაქტო რეჟიმების უჩვეულო გამძლეობა“ ამ შეთავაზებებისთვის ადგილს თითქმის არ ტოვებდა. სამშვიდობო ინიციატივების პარალელურად ოკუპირებული ტერიტორიების შესახებ კანონიც უფრო მეტად ჰუმანური ხდებოდა ეტაპობრივი ცვლილებების შედეგად. თუმცა, სადაოა, რამდენად ქმნიდა ის კონფლიქტის პოზიტიური ტრანსფორმაციის და ამ პროცესში უფლებრივი და ჰუმანიტარული პერსპექტივების გაჩენის საშუალებას. სტატიის მიზანია გაანალიზოს კანონის განვითარების ეტაპები, უფლებრივი და ჰუმანიტარული განზომილებები და მისი ადგილი ერთიან სამშვიდობო პოლიტიკაში“, ნათქვამია მასალაში. სრულად... წყარო: emc.org.ge

თბილისი. უფლებები საქართველოს ინფორმაციით, ხანგრძლივი პაუზის შემდეგ, სახელმწიფომ განაახლა საიდენტიფიკაციო მოწმობების გაცემა თავშესაფრის მაძიებელი და საერთაშორისო დაცვის სტატუსის მქონე პირებისათვის. „იმედს გამოვთქვამთ, რომ ეს პროცესი შეუფერხებლად გაგრძელდება და ყველა ის ადამიანი მიიღებს საიდენტიფიკაციო მოწმობას, რომელსაც იგი კანონით ეკუთვნის“. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ბლოგპოსტს: 27 წელი ომიდან. "27 წლის შემდეგაც ჩვენ არ გვაქვს კრიტიკულად გააზრებული ეთნოპოლიტიკური კონფლიქტის რეალური მიზეზები. ამ ომში რუსული ინტერესის, მხარდაჭერისა და მონაწილეობის აღიარების მიღმა, მნიშვნელოვანია, ჩვენ დავსვათ კითხვები ჩვენი პოლიტიკური ელიტების შეცდომების და ეთნოცენტრული, შოვინისტური პოლიტიკის მიმართ, რომელმაც უბრალო ადამიანები ორივე მხარეს შეიწირა და დაგვაშორა. ისტორიის კრიტიკული გააზრება და მხარეების შეცდომების აღიარება კონფლიქტის ტრანსფორმაციის გზაზე პირველი და არსებითი ნაბიჯია და ის ორივე მხარეს უნდა წარიმართოს. გაუაზრებელი ისტორია და ტრავმა კი კვლავწარმოებისა და მოჯადოებულ წრეში ყოფნის მიზეზი შეიძლება გახდეს". სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აგვისტოს ომის მე-12 წლისთავს ეხმიანება. „ომმა არაერთი ადამიანის სიცოცხლე შეიწირა და დევნის, ჩამორთმევისა და დაუცველობის მძიმე ტრავმა და მეხსიერება დაგვიტოვა. ომმა ერთმანეთს დააშორა ოჯახები, მეზობლები და მოძმე ხალხი. მან ჩვენი ათასობით მოქალაქე დევნილად აქცია, წაართვა საცხოვრებელი სახლი და მშობლიური გარემო. ე.წ. საზღვრისპირა სოფლებში მცხოვრები ადამიანები კი უსაფრთხოების, სიღარიბისა და განუჭვრეტელი მომავლის უმძიმეს რეალობაში ცხოვრობენ. ომის შემდეგ კვლავ არ გაუმჯობესებულა აფხაზეთისა და სამხრეთ ოსეთის რეგიონებში მცხოვრები ადამიანების ყოფა. ეს რეგიონები და de facto პოლიტიკური სისტემები არსებითად არიან ეკონომიკურად და პოლიტიკურად დამოკიდებულნი რუსეთზე და მისი დაქვემდებარების, მოთვინიერებისა და კონტროლის პირობებში უწევთ არსებობა. მათი ეკონომიკები სრულად არის დამოკიდებული რუსეთის საბიუჯეტო სუბსიდიებზე და ადგილობრივი ელიტებისა და საზოგადოებრივი გაერთიანებების მხრიდან, ავტონომიის ნებისმიერი გამოვლინება რეგიონებს მძიმე სოციალურ და ეკონომიკურ ტვირთად და სასჯელად აწვებათ. უფრო მძიმე და უფლებააყრილია ამ რეგიონებში მცხოვრები ეთნიკურად ქართველი ოჯახების მდგომარეობა. კრიმინალი, კორუფცია, დევნა, სიღარიბე, ქართული ენისა და განათლების შევიწროება მათი ცხოვრების ყოველდღიური პრაქტიკაა“, - ნათქვამია EMC-ის მიერ გავრცელებულ განცხდებაში. სრულად...  წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაცია, აგვსიტოს ომის მე-12 წლისთავთან დაკავშირებით, განცხადებას ავრცელებს.  „2008 წლის აგვისტოს ომს ასეულობით ადამიანი ემსხვერპლა, არაერთი მშვიდობიანი მოქალაქე დაზარალდა და შეილახა მათი ფუნდამენტური უფლებები. ომის დროს ადგილი ჰქონდა ადამიანის უფლებათა და თავისუფლებათა სერიოზულ და მასობრივ დარღვევებს, მათ შორის, ეთნიკურ წმენდას, სამოქალაქო მშვიდობიანი მოსახლეობის განზრახ მკვლელობის, გაუჩინარების, ქონების მასობრივი განადგურების, იძულებითი გადაადგილების, სამოქალაქო მოსახლეობაზე თავდასხმის, თავისუფლების უკანონო აღკვეთის, წამებისა და არაადამიანური მოპყრობის ფაქტებს.  სამწუხაროდ, საქართველოს მოქალაქეთა უფლებების ხელყოფის ფაქტები 2008 წლის აგვისტოს ომის შემდეგაც მასობრივად გაგრძელდა. ომის შემდეგ რუსეთის ხელისუფლების წარმომადგენლებმა სამხრეთოსეთის/ცხინვალის რეგიონის და აფხაზეთის დე ფაქტო წარმომადგენლებთან ერთად აქტიურად დაიწყეს ე.წ. ბორდერიზაციის პროცესი, რასაც შედეგად საქართველოს კონტროლირებად ტერიტორიაზემცხოვრები მოსახლეობის უფლებების ხელყოფა ახლავს.  ბორდერიზაციის პარალელურად საოკუპაციო ზოლის მიმდებარედ ადამიანთა უკანონო და თვითნებური დაკავებების მანკიერი პრაქტიკა დაიწყო. ყოველწლიურად ასობით საქართველოს მოქალაქე ხდება გატაცების მსხვერპლი, მათ შორის ქალები და ბავშვები. შედეგად გამყოფი ხაზის მიმდებარე სოფლებში ადამიანებს ყოველდღიურად შიშში უწევთ ცხოვრება და მათი უსაფრთხოება და კეთილდღეობა საფრთხის ქვეშაა. არსებულ მდგომარეობას ამწვავებს მოსახლეობას შორის ინფორმაციის ნაკლებობა იმის შესახებ, თუ სად გადის ე.წ. ადმინისტრაციული საზღვარი. უმეტეს შემთხვევაში, გატაცებულებს ადმინისტრაციული წესით აკავებენ და გარკვეული თანხის სანაცვლოდ ათავისუფლებენ. თუმცა, ბოლო წლებში გახშირდა სისხლის სამართლებრივი წესით დაკავების შემთხვევებიც, რა დროსაც დაკავებულებიწლების განმავლობაში რჩებიან ტყვეობაში. ე.წ. ადმინისტრაციულ საზღვარზე უკანონო დაკავებების მანკიერი პრაქტიკის პარალელურად ვხვდებით ადამიანის უფლებათა მძიმე დარღვევების შემთხვევებსაც, როგორიცაა სიცოცხლის უფლების ხელყოფა ან/და სხეულის დაზიანებების შემთხვევები“, - ვკითხულობთ განცხადებაში.  სრულად...  წყარო: ორგანიზაციის ვებგვერდი