თბილისი. 23 დეკემბერს, საქართველოს სახალხო დამცველმა გამართა მრგვალი მაგიდა თემაზე: „გამოწვევები თავშესაფრის მაძიებელთა, ლტოლვილთა და ჰუმანიტარულის სტატუსის მქონე პირთა უფლებების დაცვის სფეროში და მათი გადაჭრის გზები". „სახალხო დამცველი მიიჩნევს, რომ ხელისუფლებამ უფრო აქტიურად უნდა ჩართოს საერთაშორისო ორგანიზაციები და არასამთავრობო სექტორი კანონმდებლობის შემუშავებაში და, რაც მთავარია, უფრო გამჭვირვალე გახადოს მისი იმპლემენტაცია. სახალხო დამცველის წარმომადგენელმა თავშესაფრის საკითხებზე აპარატის საქმიანობის შედეგად გამოკვეთილ ტენდენციებზე, მთავარ გამოწვევებსა და მათი გადაჭრის გზებზე ისაუბრა, მიმოიხილა თავშესაფრის კანონმდებლობა, სახელმწიფო უსაფრთხოების საფუძვლით ლტოლვილისა და ჰუმანიტარული სტატუსების მინიჭებაზე უარის დასაბუთების საკითხი და ამგვარი საქმეების გასაჩივრებისა და საქმის წარმოება”, ნათქვამია ომბუდსმენის ვებ-გვერდზე. სრულად... წყარო: www.ombudsman.ge

თბილისი. 7 დეკემბერს, საქართველოს სახალხო დამცველმა სპეციალური ანგარიშის პრეზენტაცია გაიმართება თავშესაფრის მაძიებელთა, ლტოლვილთა და ჰუმანიტარული სტატუსის მქონე პირთა უფლებრივი მდგომარეობის შესახებ. „ანგარიშში განხილულია სახალხო დამცველის წარმომადგენლების მიერ განხორციელებული მონიტორინგის შედეგები თავშესაფრის მაძიებელთა, ლტოლვილთა და ჰუმანიტარული სტატუსის მქონე პირთა უფლებრივი მდგომარეობის შესწავლის კუთხით. დოკუმენტი მიმოიხილავს თავშესაფრის მაძიებელთა, ლტოლვილთა და ჰუმანიტარული სტატუსების მქონე პირთა შესახებ დღეისათვის საქართველოში არსებულ ზოგად მდგომარეობას მათი სახელმწიფო საზღვარზე დაშვების, თავშესაფრის პროცედურის ხელმისაწვდომობის, სასამართლოში საქმეების გასაჩივრების თაობაზე. განსაკუთრებული ყურადღება გამახვილდა კანონმდებლობაში არსებულ ხარვეზებზე, რაზეც შესაბამისი რეკომენდაციებია შემუშავებული", ნათქვამია სახალხო დამცველის განცხადებაში. სრულად... წყარო: www.ombudsman.ge

თბილისი. საერთაშორისო გამჭვირვალობა საქართველო სამეგრელოში იძულებით გადაადგილებულ პირთა კომპაქტური განსახლების ობიექტების შესახებ ბლოგპოსტს აქვეყნებს. „საერთაშორისო გამჭვირვალობა - საქართველო" დაინტერესდა, თუ რა პირობებში უწევთ იძულებით გადაადგილებულ პირებს კომპაქტური განსახლების ობიექტებში ცხოვრება სამეგრელო-ზემო სვანეთის რეგიონში. კვლევის ფარგლებში შევისწავლეთ ზუგდიდის, წალენჯიხის, სენაკის და ხობის მუნიციპალიტეტებში მდებარე კომპაქტური განსახლების ობიექტების იმ ნაწილში არსებული მდგომარეობა, რომელთა რეაბილიტაცია დღემდე არ ჩატარებულა", ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. 25 ივლისს, თბილისში, ვაკის პარკში, „ ინფორმაციის თავისუფლების განვითარების ინსტიტუტის " (IDFI) და საინიციატივო ჯგუფ „ იმედის სხივის " ორგანიზებით ტარდება საქველმოქმედო აქცია გორის რაიონის სოფელ სკრის დასახმარებლად. სრულად... წყარო: ორგანიზაციის ვებგვერდი სოციალურ ქსელში

თბილისი. 30 ივნისს საიამ დაასრულა პროექტი, რომლსაც 2012 წლის 1 მაისიდან ახორციელებდა და მიზნად ისახავდა იძულებით გადაადგილებული პირებისათვის სამართლებრივი დახმარების გაწევას. პროექტი დაფინანსებული იყო შვედეთის საერთაშორისო განვითარების სააგენტოს (Sida) მიერ და ხორციელდებოდა ლტოლვილთა დანიის საბჭოს (DRC) მეშვეობით. პროექტის ფარგლებში 9200–ზე მეტ დევნილს გაეწია პირადი კონსულტაცია, 250–მდე გასვლითი შეხვედრა გაიმართა სხვადასხვა ადგილას და ა.შ. სრულად... წყარო: gyla.ge

თბილისი. 25 ივნისს, PHR-მა თბილისში მცხოვრები დევნილებისთვის სემინარი ჩაატარა. სემინარი სოციალური პროგრამებს შეეხო. დევნილებს გაეცვნენ სოციალური დახმარების სახეებს, საარსებო შემწეობის მიღებასთან, შეჩერებასთან, შეწყვეტასთან დაკავშირებულ საკითხებს, სოციალურად დაუცველი ოჯახების სოციალურ-ეკონომიკური მდგომარეობის შეფასების წესს... სრულად... წყარო: ორგანიზაციის ვებ-გვერდი სოციალურ ქსელში

კახეთი. 3 ივნისს, პანკისის ხეობის სოფელ დუისში, მშვიდობის და ომის გაშუქების ინსტიტუტის ინიციატივით ჟურნალისტების ტური მოეწყო. შეხვედრაზე ყურადღება გამახვილდა ჩეჩენი ლტოლვილების პრობლემებზე და პანკისიდან სირიაში საბრძოლველად წასულ ახალგაზრდებზე. „ყველაფერს უმუშევრობის პრობლემაც ემატება, მათი 90% დაუსაქმებელია. აქ არაფერია გასაკეთებელი. ახალგაზრდებს ბევრი თავისუფალი დრო რჩებათ, ინტერნეტით გავრცელებულ მასალას ეცნობიან, მთელი დღე სირიაში მიმდინარე მოვლენებზე საუბრობენ. ვერ ვხედავთ, ვინმე სირიაში საბრძოლველად წასვლის პროპაგანდას ეწეოდეს. არცერთ მეჩეთში არ ეწევიან მაგაზე პროპაგანდას. მიზეზი თვითონ ახალგაზრდებშია, ყოფით საკითხებშია. მათი დაინტერესება არაფრით არ ხდება. ძირითადად, იქ ჰყავთ მათ მისაბაძი ადამიანები, ბავშვები სირიაში მებრძოლებს ბაძავენ", - აცხადებენ ადგილობრივები... სრულად... წყარო: www.humanrights.ge

შიდა ქართლი. 10 ივნისს, გორის ადმინისტრაციული შენობის სააქტო დარბაზში გაიმართა მრგვალი მაგიდა პროგრამის - „სოციალური საწარმოები იძულებით გადაადგილებულ პირთათვის საქართველოში". პროგრამა ითვალისწინებს შიდა ქართლის რეგიონში არსებულ დევნილთა 20 ჩასახლებასა და საოკუპაციო ზოლის მიმდებარე 20 სოფელში სოციალური საწარმოების შექმნას. მუშაობაში მონაწილეობას იღებდნენ პროექტის განმახორციელებელი პარტნიორი ორგანიზაციები: საქველმოქმედო ჰუმანიტარული ცენტრი „აფხაზეთის" (CHCA) და „არბაითერ სამარიტერ ბუნდის" (ASB) წარმომადგენლები და შიდა ქართლში არსებული მუნიციპალიტეტების: ქ. გორის, გორის რაიონის, ხაშურის, ქარელის და კასპის გამგეობის მაღალი თანამდებობის პირები. დამსწრეებს წარედგინათ ASB-ის მიერ ჩატარებული კვლევის შედეგები და გაიმართა მსჯელობა სოციალური საწარმოების შექმნისა და ფუნქციონირების შესახებ, ადგილობრივი თვითმმართველობების როლზე პროექტების მდგრადობის საკითხში.

შიდა ქართლი. 15 მაისს საქველმოქმედო ჰუმანიტარული ცენტრი „აფხაზეთისა" და „არბაითერ სამარიტერ ბუნდის" წარმომადგენლები ქარელის მუნიციპალიტეტის გამგებელს ზაზა გულიაშვილს შეხვდნენ და შიდა ქართლის რეგიონში ახალი პროექტის განხორციელების შესახებ ინფორმაცია მიაწოდეს. პროექტი შიდა ქართლის რეგიონში დევნილებით დასახლებულ ადგილებსა და საზღვრისპირა სოფლებში სოციალური საწარმოებისა და სოციალური სერვისების მიმწოდებელი საწარმოების დაფუძნებას ითვალისწინებს. ქარელის მუნიციპალიტეტის გამგებელთან შეხვედრის მიზანი ინფორმირების გარდა იყო ის, თუ რამდენად არის მზად მუნიციპალიტეტი მიიღოს მონაწილეობა და დახმარება გაუწიოს სოციალური მომსახურების სწარმოებს, როგორც საწყის ეტაპზე ისე პროექტის დასრულების შემდეგ. ზაზა გულიაშვილმა მსგავსი საწარმოების დახმარებისა და სხვადასხვა რესურსებით უზრუნველყოფის შესახებ მზაობა გამოთქვა. შეხვედრები შიდა ქართლის სხვა მუნიციპალიტეტების გამგებლებთან (გორი, კასპი, ხაშური) გრძელდება. ივნისში კი ჩატარდება სხდომა, რომელშიც ყველა დაინტერესებული მხარე მიიღებს მონაწილეობას. 2015 წლის ბოლოსთვის შიდა ქართლის რეგიონში 7 სოციალური საწარმო დაფუძნდება. 1 წლის მანძილზე მათზე ზრუნვას დონორი ორგანიზაციები განახორციელებენ, ხოლო შემდეგ ისინი დამფუძნებლების ხელში გადავლენ. პროექტი „სოციალური საწარმოები იძულებით გადაადგილებულ პირთათვის საქართველოში" ხორციელდება საერთაშორისო ორგანიზაცია „არბაითერ სამარიტერ ბუნდისა" (Arbeiter-Samariter-Bund Georgia) საქველმოქმედო ჰუმანიტარული ცენტრი „აფხაზეთის" მიერ. პროექტი დაფინანსებულია ამერიკის მთავრობის მიერ.

თბილისი. ინფორმაციის თავისუფლების განვითარების ინსტიტუტმა გამოითხოვა ინფორმაცია დევნილი ოჯახების რაოდენობის, რომლებმაც საკუთრებაში მიიღეს საცხოვრებელი ფართი 2009–2015 წლებში და დევნილთა სოციალური უზრუნველყოფისათვის ბიუჯეტიდან გამოყოფილი თანხის ოდენობა. მიღებულ ინფორმაციაზე დაყრდნობით ინსტიტუტმა გამოაქვეყნა პუბლიკაცია. სრულად... წყარო: idfi.ge

სამეგრელო. არასამთავრობო ორგანიზაცია ,,საუნჯემ" ზუგდიდის მუნიციპალიტეტის გამგეობას და საკრებულოს მიმართა რეკომენდაციით. კერძოდ ორგანიზაცია ითხოვს, რომ შეიცვალოს ზუგდიდის მუნიციპალიტეტის ტერიტორიაზე რეგისტრირებული მოსახლეობის მიმართ არსებული არათანაბარი დამოკიდებულება, რაც სოციალური პროგრამების ბენეფიციართა განსაზღვრისას არსებობს. კერძოდ ზუგდიდის მუნიციპალიტეტის ბიუჯეტით გათვალისწინებული შემდეგი სამი პროგრამა არ ვრცელდება დევნილ მოსახლეობაზე: ოჯახების და ბავშვების სოციალური დაცვა; შეზღუდული შესაძლებლობის მქონე პირთა სოციალური დაცვა და რეაბილიტაცია; მარჩენალდაკარგულ პირთა სოციალური დაცვა. ორგანიზაციამ აღნიშნულ საკითხზე საინფორმაციო ფილმი გადაიღო.     წყარო: ორგანიზაცია „საუნჯე"

თბილისი. 13 მარტს საქართველოს ახალგაზრდა იურისტთა ასოციაციამ ერთ-ერთი დევნილის სახელით მიმართა სასამართლოს საქართველოს მთავრობის და ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრის იმ ნორმატიული აქტების ნაწილობრივ ბათილად ცნობის მოთხოვნით. კერძოდ, „... არსებული რეგულაციის პირობებში, სამინისტრო არ განიხილავს იმ დევნილი ოჯახების საცხოვრებლით დაკმაყოფილების მოთხოვნით წარდგენილ განაცხადებს, რომელთა ოჯახის წევრს (წევრებს) საქართველოს მოქალაქეობასთან ერთად აქვს უცხო ქვეყნის მოქალაქეობა (აქვს ორმაგი მოქალაქეობა). ამ დროისათვის უკვე 218 დევნილი ოჯახის განაცხადი დარჩა განუხილველი მხოლოდ იმიტომ, რომ მათი ოჯახის წევრები უცხო ქვეყნის მოქალაქეები არიან...", ნათქვამია ორგანიზაციის ვებგვერზე. სრულად... წყარო: gyla.ge

იმერეთი. საქველმოქმედო ჰუმანიტარული ცენტრის „აფხაზეთის" წარმომადგენლებმა ზესტაფონში, თერჯოლასა და ვანში ჩასახლებულ დევნილებს საჩუქრები ადგილზე ჩაუტანეს. საჩუქრების გადაცემას წინ უძღოდა ცენტრის მიერ ჩატარებული ტრენინგები თემაზე „ბიზნეს პროექტის შედგენა". ამხანაგობებმა შეიმუშავეს მომგებიანი ბიზნეს პროექტები და USAID/NEO-საგან ბიზნეს გრანტის ფარგლებში სამუშაო იარაღები საჩუქრად მიიღეს. ფონდი აღნიშნულ საქმიანობას პროექტის – „ამხანაგობების შექმნა და განვითარება" – ფარგლებში, USAID/NEO ფინანსური ხელშეწყობით, 2012 წლიდან საქართველოს სხვადასხვა რეგიონში ახორციელებს. წყარო: ფონდის ვებგვერდი სოციალურ ქსელში

თბილისი. 25 თებერვალს იძულებით გადაადგილებულ ქალთა ასოციაციის „თანხმობის" ორგანიზებით გაიმართა მრგვალი მაგიდა თემაზე: „იძულებით გადაადგილებულ პირთათვის განკუთვნილი პროგრამების განხორციელების ეფექტურობის გაზრდა". მასში მონაწილეობას იღებდნენ აფხაზეთის ავტონომიური რესპუბლიკის მთავრობის წარმომადგენლები, ერედვის, ქურთას, თიღვის მუნიციპალიტეტის, სამხრეთ ოსეთის დროებითი ადმინისტრაციის, არასამთავრობო ორგანიზაციების წარმომადგენლები და აქტივისტები დევნილთა თემებიდან. მონაწილეებმა გაიზიარეს ინფორმაცია: განიხილეს 2014 წ. განხორციელებული და 2015 წ. განსახორციელებელი სოციალური პროგრამები, როგორც აფხაზეთის ავტონომიური რესპუბლიკის მთავრობაში, ასევე სამხრეთ ოსეთის დროებით ადმინისტრაციაში. ყურადღება გამახვილდა ორ საკითხზე: სოციალურ პოლიტიკაში სხვადასხვა სტრუქტურების კოორდინირება, ასევე სხვადასხვა სტრუქტურების მიერ განსახორციელებელი სოციალური პროგრამების შესახებ მოსახლეობის დროული ინფორმირება. მრგვალი მაგიდა გაიმართა დევნილთა არასამთავრობო ორგანიზაციების ქსელის „სინერგიისა" და საქართველოში დიდი ბრიტანეთის საელჩოს მხარდაჭერით. წყარო: არასამთავრობო ორგანიზაცია „თანხმობა"

სამეგრელო. 17 თებერვალს საიას ზუგდიდის ოფისში გაიმართა მრგვალი მაგიდა, სადაც შედგა კვლევის „დევნილთა საცხოვრებლით უზრუნველყოფის სახელმწიფო პოლიტიკის" – პრეზენტაცია. შეხვედრაზე ასევე გაიმართა ვიდეორგოლის „დევნილთა ისტორიების" ჩვენება, რომელიც ორგანიზაციის ზუგდიდის ოფისმა მოამზადა. „დევნილთა ისტორიები"...    წყარო: ორგანიზაციის ვებგვერდი სოციალურ ქსელში

თბილისი. 8 დეკემბერს საქართველოს ახალგაზრდა იურისტთა ასოციაციამ გამართა კვლევის პრეზენტაცია „დევნილთა საცხოვრებლით უზრუნველყოფის სახელმწიფო პოლიტიკის" შესახებ. კვლევაში გაანალიზებულია რამდენად ეფექტური იყო და არის სახელმწიფოს მიერ გადადგმული ნაბიჯები დევნილთა საცხოვრებლით დაკმაყოფილების მიმართულებით. ასევე მოცემულია კონკრეტული რეკომენდაციები, რომელთა გატარება ხელს შეუწყობს ამ მიმართულებით არსებული ხარვეზების გამოსწორებას. სრულად... წყარო: gyla.ge

თბილისი. სახალხო დამცველმა თბილისში, ყოფილი ისნის სამხედრო ჰოსპიტლის შენობის გამოთავისუფლებასთან დაკავშირებით განცხადება გაავრცელა. საქართველოს სახალხო დამცველი მოუწოდებს „თბილისის მერიასა და თბილისის ისნის რაიონის გამგეობას, კოორდინირებულად შეისწავლონ ზემოაღნიშნულ შენობაში მცხოვრები სოციალურად დაუცველი ოჯახების უსახლკარობის ფაქტი და გაატარონ შესაბამისი ღონისძიებები მათთვის სათანადო დახმარების გაწევის მიზნით; საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრომ, გააგრძელოს მოლაპარაკებები იმ დევნილ ოჯახებთან, რომლებიც ამ ეტაპზე უარს აცხადებენ შენობის დატოვებაზე, რათა შენობის გათავისუფლების პროცესი მშვიდობიან და კანონისმიერ ფარგლებში იყოს მოქცეული. საქართველოს სახალხო დამცველის წარმომადგენლები მოცემული მომენტისათვის იმყოფებიან ყოფილი ისნის სამხედრო ჰოსპიტლის შენობის მიმდებარე ტერიტორიაზე და აკვირდებიან შენობის გამოთავისუფლების პროცესს". სრულად... წყარო: ombudsman.ge

ქვემო ქართლი. 9 სექტემბერს, საქველმოქმედო ჰუმანიტარული ცენტრი „აფხაზეთის" თანამშრომლები მარნეულში დევნილებით დასახლებულ კორპუსს ესტუმრნენ. პროექტის მონიტორებმა ბიზნესის დაწყებისა და გაფართოების მსურველებს ახალი პროექტი გააცნეს და ბიზნეს საკითხებზე კონსულტაცია გაუწიეს. პროექტი - „შემოსავლების გენერირების და ბიზნესის მხარდაჭერის ინიციატივა" - დაფინანსებულია USAID საქართველო / NEO-ს მიერ. წყარო: ორგანიზაციის გვერდი სოციალურ ქსელში

თბილისი. ახალგაზრდული ასოციაცია „დრონი" და ევროპოს მოხალისეთა სერვისის მონაწილეები, ელენა და ალისი, გთავაზობთ პროექტს იძულებით გადაადგილებული ბავშვებისთვის, რომელიც გაიმართება 10 ოქტომბრიდან 14 ნოემბრამდე. პროექტი მონაწილეებს საშუალებას აძლევს გაიგოს მეტი არაფორმალური განათლების შესახებ და ჩაერთოს ორგანიზაციის ადგილობრივ საქმიანობაში. მათ, ვისაც აინტერესებს პროექტი და სურს მონაწილეობა და თავიანი წვლილი შეიტანოს პროექტის ორგანიზებაში, ან უბრალოდ მხარი დაგვიჭიროს, უნდა დაუკავშირდეს ორგანიზაციას შემდეგ საკონტაქტო ელ–ფოსტაზე: livingcitytbilisi@gmail.com სრულად... წყარო: ორგანიზაციის ვებგვერდი სოციალურ ქსელში

შიდა ქართლი. ორგანიზაცია „აფხაზეთმა" ისტორია - „ბავშვები შავშვებიდან" - გამოაქვეყნა. ისტორია შექმნილია "ჯამპსტარტ ჯორჯიას” მიერ ცენტრ „აფხაზეთთან" თანამშრომლობით პროექტის - „მონაცემების ვიზუალიზაცია ადვოკატირებისთვის" - ფარგლებში. პროექტის მიზანია, საზოგადოების დახმარებით სოციალური კამპანიის ხელშეწყობა, რომლის შედეგად შავშვების დევნილთა დასახლებაში არსებული უფუნქციო აბანოს შენობის საბავშვო ბაღად გადაკეთებისათვის საჭირო თანხა შეგროვდება. თანხის გადარიცხვა ნებისმიერ მსურველს ონლაინ შეუძლია. ისტორია... წყარო: ორგანიზაციის გვერდი სოციალურ ქსელში

შიდა ქართლი. ცენტრმა „აფხაზეთმა" ახალი პროექტის - „შემოსავლების გენერირებისა და ბიზნესის მხარდაჭერის ინიციატივა" - განხორციელება დაიწყო. პროექტი ითვალისწინებს იძულებით გადაადგილებული პირებისა და სამხრეთ ოსეთის ადმინისტრაციული სასაზღვრე ზოლის მახლობლად მცხოვრები სოციალურად დაუცველი მოსახლეობისათვის უპროცენტო სესხების გაცემას ბიზნეს საქმიანობის დაწყებისა და განვითარებისათვის. პროექტი ქვემო ქართლის, მცხეთა-მთიანეთის, სამცხე-ჯავახეთის, იმერეთისა და შიდა ქართლის რეგიონებში USAID/NEO ინიციატივისა და ჰოლანდიის ლტოლვილთა ფონდის ფინანსური მხარდაჭერით განხორციელდება. წყარო: ორგანიზაციის გვერდი სოციალურ ქსელში

თბილისი. 8 ივლისს საქართველოს სახალხო დამცველმა და დევნილთა  არასამთავრობო ორგანიზაციათა ქსელმა „სინერგიამ" ურთიერთთანამშრომლობის მემორანდუმი გააფორმეს. თანამშრომლობის მიზანია იძულებით გადაადგილებულ პირთა უფლებებისა და თავისუფლების დაცვისათვის, საერთაშორისო ხელშეკრულებებით ნაკისრი ვალდებულებების გათვალისწინებით, მდგრადი სამართლებრივი და სოციალური პოლიტიკის შემუშავება და განხორციელება. მემორანდუმის ფარგლებში მხარეები გეგმავენ ერთობლივი სამუშაო ჯგუფის შექმნას, სადაც კონსულტაციებისა და დისკუსიების გზით მოახდენენ იძულებით გადაადგილებულ პირთა უფლებების დარღვევის ფაქტების გამოვლენას და პრობლემების გადაჭრის გზების ძიებას; ასევე, დევნილთა განსახლებასთან დაკავშირებით საინფორმაციო უზრუნველყოფას. წყარო: ombudsman.ge