თბილისი. საერთაშორისო გამჭვირვალობა - საქართველო აქვეყნებს ბლოგპოსტს: გენდერული დისბალანსი აჭარის მუნიციპალიტეტების თვითმმართველობებში. „აჭარის მუნიციპალიტეტების საკრებულოებში ქალთა წარმომადგენლობა გაზრდილია, თუმცა ამის მიუხედავად, თვითმმართველობებში მნიშვნელოვანი გენდერული დისბალანსია, განსაკუთრებით მუნიციპალიტეტების აღმასრულებელ რგოლებში“, ნათქვამია ორგანიზაციის ვებგვერდზე. სრულად... წყარო: www.transparency.ge

თბილისი. „ქალთა ფონდი საქართველოში“-ს გადაწყვეტილებით, წელს კატო მიქელაძის პრემიის თემა მოძრაობებს შორის თანამშრომლობა და თანაკვეთა იყო. ჯილდოზე წარდგენილი იყო 16 ქალი, რომლებიც მომიჯნავე სფეროებში მოღვაწეობენ, თუმცა მათი საქმიანობა მიმართულია ქალების უფლებრივი მდგომარეობის გაუმჯობესებისკენ.  2019 წლის კატო მიქელაძის პრემიის მფლობელი ხატია ღოღობერიძე გახდა. გამარჯვებულს გადაეცა საერთაშორისო ფემინისტური ფონდი - მამა ქეშის მიერ დაწესებული ფულადი ჯილდო, ხოლო გაეროს განვითარების პროგრამა უზრუნველყოფს მის დასწრებას გაეროს ქალთა სტატუსის შესახებ კომისიის სხდომაზე, რომელიც ნიუ იორკში 2020 წლის მარტში გაიმართება.  სრულად...  წყარო: www.womenfundgeorgia.org

შიდა ქართლი. 27 ნოემბერს გორის სამოქალაქო აქტივიზმის ცენტრი, გაეროს 16-დღიან კამპანიას, გენდერული ძალადობის წინააღმდეგ შეუერთდა. „კამპანიის ფარგლებში, ცენტრის მოხალისეები, თეატრის ბაღში შეიკრიბნენ და ერთხმად დაგმეს ძალადობა შემოდგომის ცივ ამინდში, ახალგაზრდები ქალაქის ცენტრალურ ქუჩებში გადანაწილდნენ და „ქუჩის განმანათლებლების” სტატუსით მოსახლეობის ინფორმირებაზე იზრუნეს. გარდა ამისა, სიმბოლურად ყავა და ჩაით, ტკბილეულობით, სტიკერებითა და ბევრი პოზიტივით გაუმასპინძლდნენ“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. პარტნიორობა ადამიანის უფლებებისთვის (PHR) იურისტმა სოფიკო მენაბდიშვილმა კომიქსის პრეზენტაციაზე - „ერთხელ მინის მიღმა“ დასაქმების ადგილას სექსუალურ შევიწროებაზე ისაუბრა, ყურადღება გაამახვილა ქალების წინაშე არსებულ ბარიერებზე, გამოწვევებზე, მიმოიხილა ორგანიზაციის პრაქტიკა და სტატისტიკა. სრულად... წყარო: ორგანიზაციის გვერდი სოციალურ ქსელში

სამეგრელო. 25 ნოემბერს, 16-დღიანი კამპანია გენდერული ძალადობის აღმოფხვრის შესახებ დაიწყო და 10 დეკემბერს - ადამიანის უფლებათა დაცვის საერთაშორისო დღეს დასრულდება. „კამპანიის ფარგლებში, ასოციაცია „ათინათის“ ახალგაზრდული ცენტრი თემატურ ღონისძიებებს გამართავს. ამ დღის აღსანიშნავად ცენტრის წევრებმა, კესო ფირცხელავამ და თეონა ზარავანდაშვილმა მოაწყვეს შეხვედრა სოციალურ საწარმო „მეგო-ბარში“. შეხვედრის თემა ეხებოდა გენდერულ თანასწორობასა და მრავალფეროვნების მართვას“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. ქალთა მიმართ ძალადობის წინააღმდეგ ბრძოლის საერთაშორისო დღესთან დაკავშირებით, საქართველოს სახალხო დამცველი განცხადებას ავრცელებს. „გენდერული ძალადობის წინააღმდეგ 16 დღიანი კამპანია მსოფლიოში 1991 წლიდან აღინიშნება, რომელიც 25 ნოემბერს - ქალთა მიმართ ძალადობის აღმოფხვრის საერთაშორისო დღეს იწყება და 10 დეკემბერს - ადამიანის უფლებათა დაცვის საერთაშორისო დღეს მთავრდება. კამპანია მიზნად ისახავს საზოგადოების ცნობიერების ამაღლებას ქალთა მიმართ ძალადობის თვალსაზრისით ქვეყანაში არსებულ გამოწვევებსა და პრობლემებზე“, - ვკითხულობთ განცხადებაში, - „საქართველო ყოველწლიურად უერთდება გლობალურ კამპანიას და აქცენტს აკეთებს ქალებისა და გოგონების მიმართ ძალადობის შესახებ ნულოვანი ტოლერანტობის დამკვიდრებაზე. 2019 წლის გენდერული ძალადობის წინააღმდეგ 16 დღიანი კამპანიის ძირითადი თემა სექსუალურ შევიწროებას უკავშირდება. მიმდინარე წელი მნიშვნელოვანი იყო სექსუალური შევიწროების საკანონმდებლო რეგულირების და შესაბამისი პრაქტიკის განვითარების მხრივ“. სრულად... წყარო: http://ombudsman.ge

იმერეთი. გენდერული ძალადობის წინააღმდეგ 16 დღიანი კამპანიის ფარგლებში, ქუთაისის ახალგაზრდული ცენტრის წევრმა, სალი საკანდელიძემ, ქუთაისის მე-9, მე-19, 23-ე და 30-ე საჯარო სკოლებში ჩაატარა თანატოლთა განათლების ტრენინგი ქალთა უფლებებზე და გენდერული თანასწორობის თემაზე. ტრენინგის მიზანი იყო ქალთა უფლებების და გენდერული თანასწორობის შესახებ მოსწავლეების ცნობიერების ამაღლება. სრულად... წყარო: ორგანიზაციის გვერდი სოციალურ ქსელში

თბილისი. „საერთაშორისო გამჭვირვალობა - საქართველო“ აქვეყნებს ბლოგპოსტს: რას (არ) აკეთებს აჭარის უმაღლესი საბჭოს გენდერული თანასწორობის საბჭო? „აჭარის უმაღლესი საბჭოს გენდერული თანასწორობის საბჭო სათანადოდ არ ასრულებს საკუთარ უფლებამოსილებებს - საბჭოს შექმნიდან დღემდე არ გამოუჩენია მნიშვნელოვანი ძალისხმევა რეგიონში ქალთა მიმართ ძალადობის აღმოსაფხვრელად, ქალთა პოლიტიკური წარმომადგენლობის გასაძლიერებლად და ამ საკითხებზე მოქალაქეთა ცნობიერების ასამაღლებლად. „საერთაშორისო გამჭვირვალობა - საქართველოს” მიერ მოკვლეული და წარმოდგენილი გარემოებები განაპირობებენ არსებითი ცვლილებების განხორციელების აუცილებლობას, რათა საბჭოს მუშაობის ეფექტიანობა გაიზარდოს“, ნათქვამია ორგანიზაციის ვებგვერდზე. სრულად... წყარო: www.transparency.ge

გაეროს ქალთა ორგანიზაცია ძირითადი ანგარიშის „მსოფლიო ქალთა პროგრესი 2019: ოჯახები ცვალებად მსოფლიოში” პრეზენტაციას მართავს. „2019 წლის მსოფლიო ქალთა პროგრესის გამოცემა წარმოადგენს ოჯახების ამჟამინდელი რეალობის ყოვლისმომცველ შეფასებას, რომელშიც გათვალისწინებულია ფართო ეკონომიკური, დემოგრაფიული, პოლიტიკური და სოციალური ცვლილებები. ანგარიში აერთიანებს გლობალურ, რეგიონულ და ეროვნულ მონაცემებს, ასევე, მოიცავს ისეთი მნიშვნელოვანი საკითხების სიღრმისეულ ანალიზს, როგორებიცაა საოჯახო სამართალი, შემოსავალი და დასაქმება, აუნაზღაურებელი შრომა, ქალთა მიმართ ძალადობა, ოჯახები და მიგრაცია და სხვა”, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. გაეროს ქალთა ორგანიზაციის მხარდაჭერით, საქართველოს ადვოკატთა ასოციაციის სასწავლო ცენტრში ქალთა მიმართ და ოჯახში ძალადობის საკითხებზე ადვოკატ ტრენერთა ტრენინგი მიმდინარეობს. „ტრენინგი მიზნად მონაწილეებისთვის ახალი საკანონმდებლო რეგულაციების, ქალთა მიმართ და ოჯახში ძალადობის ფსიქოლოგიური ასპექტების სწავლებას ისახავს, რაც, უპირველეს ყოვლისა, ძალადობაგანცდილი პირების მეორეული ვიქტიმიზაციის პრევენციას ითვალისწინებს. ტრენერები ადვოკატებისთვის განკუთვნილ სასწავლო პროგრამას საქართველოს სხვადასხვა რეგიონში გაუძღვებიან“. სრულად... წყარო: ორგანიზაციის გვერდი სოციალურ ქსელში

კავშირი „საფარი“ აქვეყნებს theguardian.com-ზე გავრცელებული ბლოგ პოსტის ქართულენოვან თარგმანს. „იაპონურ საზოგადოებაში გავრცელებული სილამაზის სტანდარტების გამო, მხედველობის პრობლემების მქონე ქალებს აქ დამსაქმებელი აიძულებს, სათვალის ნაცვლად კონტაქტური ლინზები გამოიყენონ. ჰეშთეგი „სათვალის აკრძალვა“ (#メガネ着用禁止) იაპონიის სოციალურ ქსელებში ამ კვირაში ძალზე პოპულარული გახდა მას შემდეგ, რაც ტელეარხმა Nippon-მა სიუჟეტი გაუშვა იმ კომპანიების შესახებ, რომლებიც თავის ახლო- ან შორსმხედველი თანამშრომლებისგან სამუშაო ადგილას სათვალის ნაცვლად კონტაქტური ლინზების გამოყენებას მოითხოვდნენ. ფლეშმობის ფარგლებში, იაპონელმა ქალებმა Twitter-ზე თავისი სათვალის ან სათვალეში გადაღებული ფოტოების გამოქვეყნება დაიწყეს. ზოგიერთმა მსგავსმა ტვიტმა 25 000 რეტვიტიც კი დააგროვა“. სრულად... წყარო: sapari.ge

თბილისი. თბილისიში მესამე ლიდერობის აკადემია ჩატარდა. აკადემია განხორციელდა პროექტის „ახალგაზრდა ქალი ლიდერები და „უჩინარი ქალები“ – უფლებადამცველი აქტივისტების მხარდაჭერა“ ფარგლებში.  პროექტს „თბილისის ადამიანის უფლებათა სახლი“ საფრანგეთში დაფუძნებულ ორგანიზაცია IREX-ევროპა -სთან თანამშრომლობით ახორციელებს და მისი მიზანია ახალგაზრდა უფლებადამცველი ქალების აღმოჩენა და გაძლიერება. აღნიშნული პროექტი ევრაზიის 5 ქვეყანაში, 26 თვის მანძილზე მიმდინარეობს, ევროკომისიის ფინანსური მხარდაჭერით. ლიდერობის აკადემიას საქართველოში თანადაფინანსებულია “ადამიანის უფლებათა სახლის ფონდის” მიერ.  მესამე ლიდერობის აკადემიაში მონაწილეობდა არასამთავრობო სექტორში აქტიური 30-მდე ახალგაზრდა უფლებადამცველი ქალი საქართველოდან და აზერბაიჯანიდან. მესამე აკადემიის თემა იყო არაკომერციული და სოციალური მარკეტინგი უფლებადამცველებისთვის.  სრულად...  წყარო: https://hrht.ge

თბილისი. „საერთაშორისო გამჭვირვალობა - საქართველო“ აქვეყნებს ბლოგპოსტს: რას ნიშნავს როცა ხარ საზოგადოებრივად აქტიური ქალი საქართველოში. „ბოლო პერიოდის განმავლობაში განსაკუთრებით გააქტიურდა დისკუსია ქალების საზოგადოებრივ ცხოვრებასა და პოლიტიკაში მონაწილეობის თაობაზე. საქართველოს მოსახლეობის უმრავლესობა საზოგადოებრივ ცხოვრებაში ქალების აქტიურად მონაწილეობას დადებითად აფასებს. საზოგადოებრივი აზრის კვლევის თანახმად, საქართველოს მოსახლეობის 65% მხარს უჭერს პარლამენტში სავალდებულო გენდერული კვოტის შემოღებას. ქალთა უფლებების გაძლიერებისთვის უკანასკნელ წლებში მნიშვნელოვანი საკანონდებლო ცვლილებები განხორციელდა, მათ შორის პარლამენტის გენდერული თანასწორობის საბჭოს ძალისხმევით. თუმცა საკანონმდებლო თვალსაზრისით ყველა წინ გადადგმული ნაბიჯი აზრს კარგავს, თუ ქალების პოლიტიკური და საზოგადოებრივი აქტიურობისა და კრიტიკული პოზიციების გამო მათ წინააღმდეგ ფსიქოლოგიური ტერორის განხორციელების შემთხვევაში, სახელმწიფოს და მმართველი პოლიტიკური ჯგუფების მხრიდან ეფექტური რეაგირება არ იქნება“, ნათქვამია ორგანიზაციის ვებგვერდზე. სრულად... წყარო: transparency.ge

ახმეტის, თელავის, ლაგოდეხისა და თეთრიწყაროს მუნიციპალიტეტებში შექმნილი თვითდახმარების ჯგუფების წევრებისთვის კომპიუტერის შესწავლის ტრენინგები მიმდინარეობს. სრულად... წყარო: ორგანიზაციის გვერდი სოციალურ ქსელში

თბილისი. კავშირი „საფარი“ აქვეყნებს საინფორმაციო გვერდ „ფანჯარას“ ბლოგპოსტს: მშობიარობა თავშესაფარში – ძალადობის მსხვერპლი, რომელსაც წასასვლელი არსად აქვს. „ისევ დავბრუნდი ქმრის სახლში. მაგრამ, ამის შემდეგ, დედამთილი და მამამთილი თითქმის ყოველდღე მლანძღავდნენ, შეურაცხყოფას მაყენებდნენ. მიუხედავად იმისა, რომ რამდენჯერმე მოვითხოვე, ოფიციალურად ხელი დღემდე არ გვაქვს მოწერილი. ქორწილის შემდეგ, ძვირფასეულობა წამართვეს. ორსულობის მე-4-მე-5 თვეში ვიყავი, როდესაც მამამთილმა ხელჯოხი მუცელში ჩამარტყა... ხელით დავიცავი მუცელი, მადლობა ღმერთს, ბავშვს არაფერი დაემართა.“ სრულად... წყარო: sapari.ge

თბილისი. გაეროს ქალთა ორგანიზაციამ, პარტნიორი ბიზნესკომპანიების მხარდაჭერის ფარგლებში, სოკარ პეტროლიუმ ჯორჯიას 15 თანამშრომლისთვის სექსუალური გასაჩივრების მექანიზმების შესახებ სამუშაო შეხვედრას გამართა. „შეხვედრა მიზნად ისახავს კომპანიის მენეჯმენტის ინფორმირებას სექსუალური შევიწროების შესახებ საკანონმდებლო ცვლილებების, ასევე, იმ გასაჩივრების მექანიზმების შესახებ, რომლებიც უახლოეს მომავალში სოკარში დაინერგება. აღნიშნული მექანიზმები წარმოადგენს ქალთა გაძლიერების პრინციპების სამოქმედო გეგმის ნაწილს, რომელიც კომპანიამ 2018 წელს მიიღო“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

შიდა ქართლი. 30 ოქტომბერს, გორის რაიონის სოფელ ტყვიავის საჯარო სკოლის მოსწავლეებისათვის, რომლებიც სულ რაღაც რამდენიმე კვირის წინ ჩაერთვნენ პროგრამა PITA- ში გაიმართა ფილმის ჩვენება და დისკუსია. „ფილმი CineDoc-Tbilisi on Tour-ის ფარგლებში იყო ნაჩვენები. ესენი იყო „პუნამის ბედისწერა“, რომელიც ნაადრევ ქორწინებას ეხებოდა და „კაიაიო“ რომელიც ბავშვთა შრომით ექსპლუატაციას ეხებოდა - ახლგაზრდებს, რომლებიც ესწრებოდნენ ფილმების ჩვენებას საშუალება ეძლევათ მიიღონ მონაწილეობა ესსეების კონკურსში და ათი დღის მანძილზე წარადგენენ საკუთარ ნაშრომებს სამი სექციიდან ერთ-ერთში: 1. ადამიანის უფლებები 2. ნაადრევი ქორწინება 3. ტრადიციები და თანამედროვეობა გამარჯვებულებს გამოავლენს სპეციალური ჟიური თითოეულ სექციაში სადაც სამ-სამი საპრიზო ადგილია“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. გენდერული საინფორმაციო პორტალის ინფორმაციით, ქალთა მიმართ ძალადობის ან ოჯახში ძალადობის ჩამდენ პირთა მიმართ ელექტრონული ზედამხედველობა განხორცილდება. „ცვლილებათა პაკეტი პარლამენტს უკვე წარედგინა და მას დღევანდელ ბიუროს სხდომაზე განიხილავენ. ელექტრონულ ზედამხედველობაში იგულისხმება სპეციალური სამაჯური, რომელსაც მოძალადეს შემაკავებელი ორდერის გაცემისას დაუმაგრებენ“, ნათქვამია პორტალის ვებგვერდზე. სრულად... წყარო: www.ginsc.net

თბილისი. 2019 წლის კატო მიქელაძის სახელობის პრემიაზე კანდიდატების წარდგენა შესაძლებელია 31 ოქტომბრის ჩათვლით. კონკურსისთვის განიხილებიან ქალი უფლებადამცველები, რომლებიც საქმიანობენ ისეთ სფეროში, რომელიც პირდაპირ არაა კავშირში ქალთა უფლებების დაცვასთან, თუმცა ამ სფეროში მოღვაწეობით ზრუნავენ ქალთა უფლებრივი მდგომარეობის გაუმჯობესებაზე. გაეცანით სხვა კრიტერიუმებს და დაასახელეთ კატოს ახალი მფლობელი ბმულზე… წყარო: ქალთა ფონდის გვერდი სოციალურ ქსელში

თბილისი. პარტნიორობა ადამიანის უფლებებისთვის აღმასრულებელი დირექტორი, ანა არგანაშვილი ვებგვერდზე gadamikhade.ge გვიყვება გენდერული უთანასწორობის საკუთარი გამოცდილებაზე - ქალების ხმისა და შრომის იგნორირებაზე, დაუფასებლობაზე. კამპანიის მიზანია ხელი შეუწყოს გენდერული ნიშნით ანაზღაურებებს შორის სხვაობის აღმოფხვრას. „ბოლოს მქონდა შემთხვევა, როდესაც კაცების წრეში, როგორც იურისტმა გამოვთქვი აზრი და ამას ირონიული კომენტარი მოყვა, რომ ,,წარმოგიდგენიათ, ამდენი იურისტი ვართ აქ და ვერავინ მივხვდით ამას, მხოლოდ შენ’’-ო. თითქოს, მე სხვა ტიპის იურისტი ვარ. ასეთ შემთხვევებში მთავარი გამოწვევაა, რომ პირველადი შოკის ეტაპი ჩქარა გავიარო, გავიაზრო, თუ რა შეურაცხმყოფელი კომენტარი გაკეთდა ჩემ მიმართ და შემდეგ უკვე მოვახდინო ამის სახელდება. როდესაც ვეუბნები, რომ მისი კომენტარი იყო შეურაცხმყოფელი, შემდეგ უკვე იწყება საუბარი, რომ რა დროს ესაა, სხვა რამისთვის ვართ შეკრებილები და არ გვაქვს დრო იმის გასარკვევად, შენ თანასწორად იგრძენი იმ მომენტში თავი, თუ - არა“. სრულდ... წყარო: www.gadamikhade.ge

თბილისი. საიამ, პარტნიორ ორგანიზაცია ადამიანის უფლებათა დაცვის ევროპულ ცენტრთან (EHRAC) ერთად, ადამიანის უფლებათა ევროპულ სასამართლოში ახალი საჩივარი გააგზავნა. საჩივარი ნიკოლო ღვინიაშვილისთვის საიდენტიფიკაციო დოკუმენტებში სასურველი გენდერის ასახვაზე ეროვნული ორგანოების უარს შეეხება. მომჩივანი, ნიკოლო ღვინიაშვილი არის ტრანსგენდერი მამაკაცი, რომელიც ადრეული ასაკიდან თავს მამაკაცად აიდენტიფიცირებს. სამედიცინო დაწესებულების მიერ 2014 წელს გაცემული სამედიცინო ცნობით დასტურდება, რომ ნიკოლოს სამედიცინო დიაგნოზია „ტრანსსექსუალიზმი“. ამჟამად ნიკოლოს მეორადი ბიოლოგიური ნიშან-თვისებები, მათ შორის გარეგნობა, სრულ შესაბამისობაშია მამაკაცის მახასიათებლებთან. სრულად...  წყარო: https://gyla.ge

2019 წლის ივლისში ორგანიზაციის იურისტებს დასახმარებლად მიმართა ქალმა, რომელიც მასზე სისტემური ფსიქოლოგიური ძალადობის შესახებ ყვებოდა და აღნიშნავდა, რომ საფრთხე ემუქრება. ორგანიზაციამ 2019 წლის 2 აგვისტოს მიმართა პოლიციას, ითხოვა გამოძიების დაწყება და ქალის დაცვის მიზნით შემაკავებელი ორდერის გამოცემა.  „შეტყობინების შესვლიდან მეორე დღეს დაიწყო გამოძიება და გამოიცა შემაკავებელი ორდერი, რომელიც სავარაუდო მოძალადემ რამდენჯერმე დაარღვია. მამაკაცისგან ქალის დასაცავად, სამართალდამცავ ორგანოებს დღემდე არ გამოუყენებიათ სისხლის სამართლებრივი მექანიზმი, რაც მიმდინარე საფრთხის ქვეშ აყენებს მსხვერპლს. გამოძიების დაწყების პირობებშიც კი, სახელმწიფომ ვერ უზრუნველყო მსხვერპლის დაცვა შემდგომი ძალადობისგან. შესაბამისად, ორგანიზაციას მიაჩნია, რომ სახელმწიფო არაეფექტურად იძიებს ქალზე ძალადობის ფაქტს, რის გამოც 2019 წლის 13 ოქტომბერს, ქალთა წინააღმდეგ ძალადობის საკითხებზე გაეროს სპეციალურ მომხსენებელს მიმართა“, - ვკითხულობთ ორგანიზაციის მიერ გავრცელებულ ინფორმაციაში.  სრულად...  წყარო: https://phrgeorgia.wordpress.com