თბილისი. კოალიცია დამოუკიდებელი და გამჭვირვალე მართლმსაჯულებისთვის აქვეყნებს განცხადებას იუსტიციის უმაღლესი საბჭოს მხრიდან გენდერული უთანასწორობის და არაპირდაპირი დისკრიმინაციის პრაქტიკის თაობაზე. „კოალიციის შეფასებით, ქალებისათვის იმგვარი სამუშაო პირობების განსაზღვრა, რომელიც გამორიცხავს მათი მხრიდან ბავშვებზე ზრუნვას და დედის მოვალეობების განხორციელებას, თავისი არსით, ირიბ დისკრიმინაციას წარმოადგენს. ამასთან, სამუშაო საათების მიღმა კანდიდატებთან გასაუბრების პროცესის გაგრძელება აზიანებს მოსამართლეთა შერჩევის პროცესის ხარისხსაც. ყოველგვარი ნორმირებული დროის უგულებელყოფით გასაუბრების ჩატარება პრაქტიკულად გამორიცხავს კანდიდატების სრულფასოვან, ხარისხიან შეფასებას, აზიანებს როგორც კანდიდატის, ისე საბჭოს წევრების, საბჭოს აპარატის და პროცესზე დამკვირვებელი პირების ინტერესებს. საბჭოს მხრიდან მსგავსი პრაქტიკის გაგრძელება, ხარისხის ხარჯზე პროცესის დაჩქარების მცდელობად შეიძლება შეფასდეს“, ნათქვამია განცხადებაში. სრულად... წყარო: www.transparency.ge

თბილისი. პარტნიორობა ადამიანის უფლებებისთვის (PHR) აქვეყნებს ბლოგპოსტს: როგორ გავზარდოთ ძალადობის მსხვერპლთა მხრიდან პოლიციისადმი მიმართვიანობა გენდერული სტატისტიკის წარმოების გზით. „ჩემთვის, როგორც ადვოკატისთვის, ძალადობაგამოვლილი ქალის დასარწმუნებლად, ენდოს სახელმწიფოს, ყველაზე კარგი ბერკეტი სტატისტიკაა.  სტატისტიკა, რომელიც თითქმის არასდროს მაქვს, რადგან სახელმწიფოს არ მიაჩნია მნიშვნელოვნად იცოდეს,  ქალები რა ფორმით და რამდენჯერ ხდებიან ძალადობის მსხვერპლები, რა მოსდით ამ ქალებს მოძალადის საპატიმროდან გათავისუფლების შემდეგ, განიცდიან თუ არა ისინი განმეორებით ძალადობას და კიდევ სხვა უამრავი.   იმ პირობებში, როდესაც დაბალია სამართალდამცავი ორგანოებისადმი ნდობა, როდესაც პოლიციის განყოფილებაში მისული ქალი ხშირად განიცდის რევიქტიმიზაციას, როდესაც რეაგირება გაჭიანურებულია, ქალებს უჭირთ, დაიჯერონ, რომ სახელმწიფო მას დაიცავს და მოძალადის პირისპირ მარტო არ დატოვებს“, ნათქვამია ორგანიზაციის ვებგვერდზე. სრულად... წყარო: phrgeorgia.wordpress.com

LDA Georgia - ადგილობრივი დემოკრატიის სააგენტო საქართველო თავის პარტნიორ ორგანიზაციებთან ა(ა)იპ ასოციაცია ქალები რეგიონების განვითარებისათვის და ა(ა)იპ პედაგოგთა კავშირი - განათლება და სამყაროსთან ერთად ახორციელებს პროექტს - „ინკლუზიური დიალოგი-ეფექტური სოციალური პოლიტიკისთვის“. „აღნიშნული პროექტის ფარგლებში, ზესტაფონის მუნიციპალიტეტში უკვე ორი ტრენინგი ჩატარდა. ტრენინგების თემები გახლდათ- "სასიცოცხლო და სოციალური უნარ-ჩვევების განვითარება“, სოციალური კორპორაციული პასუხისმგებლობა“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

20-21 ივლისს, ზუგდიდში, გაეროს ქალთა ორგანიზაცია და ბიზნესლიდერთა ფედერაცია „ქალები მომავლისთვის“ ორდღიან ეკონომიკურ ფორუმს გამართავენ. “ორდღიანი ფორუმის მიზანია, ხელი შეუწყოს ქალთა ეკონომიკურ საქმიანობას სამეგრელო-ზემო სვანეთის რეგიონში. ფორუმის ფარგლებში განსაკუთრებული ყურადღება სტუმარ-მასპინძლობის ინდუსტრიაში ქალების ჩართულობისა და შესაძლებლობების განხილვას დაეთმობა“. სრულად... წყარო: ორგანიზაციის გვერდი სოციალურ ქსელში

ქვემო ქართლი. ქალთა საინფორმაციო ცენტრის წარმომადგენლებმა, ქვემო ქართლის რეგიონის, ბოლნისის მუნიციპალიტეტში ჩაატარეს ფოკუს - ჯგუფი.  „სამიზნე ჯგუფი იყო ადგილობრივი ლიდერი და მეწარმე ქალები, რომლებიც სარგებლობენ/არ სარგებლობენ ქალთა ოთახის სერვისით.  ფოკუს - ჯგუფის ჩადარების მიზანი იყო, მუნიციპალიტეტში არსებული ქალთა ოთახის სერვისებით სარგებლობის შეფასება, შემდგომი მუშაობის ეფექტიანად დაგეგმარებისთვის”, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. საქართველოს სახალხო დამცველი საგანგაშოდ მიიჩნევს ბოლო პერიოდში პოლიტიკურ და საზოგადოებრივ ცხოვრებაში მონაწილე ქალების მიმართ სექსისტური გამონათქვამების მომრავლებას პოლიტიკოსების და საჯარო პირების მხრიდან. მათ შორის, აღსანიშნავია პოლიტიკოს თინათინ ბოკუჩავას და ჟურნალისტ ინგა გრიგოლიას მიმართ გამოთქმული სექსისტური მოსაზრებები. „საგანგაშოა, რომ სექსისტური ფრაზების ავტორები, ხშირ შემთხვევაში, პოლიტიკოსები, მათ შორის, არჩევითი ორგანოების - პარლამენტის და საკრებულოების წევრი კაცები არიან. მათ მიერ გამოთქმული მოსაზრებები არ ეფუძნება ობიექტურ, პროფესიულ კრიტიკას, არამედ განპირობებულია გენდერული სტერეოტიპებით და აქცენტს მსხვერპლის სქესსა და სექსუალობაზე აკეთებს“, - აღნიშნულია სახალხო დამცველის განცხადებაში. სრულად  წყარო: ორგანიზაციის ვებგვერდი

თბილისი. „ქალთა მოძრაობა“ სოლიდარობას უცხადებს ჟურნალისტ ინგა გრიგოლიას და გმობს მის მიმართ რუსთავის საკრებულოს თავმჯდომარის, ლევან ონიანის მხრიდან სექსუალური ხასიათის შეურაცხმყოფელ განცხადებას. „11 ივლისს, TV პირველის საავტორო გადაცემაში „რეაქცია“ ინგა გრიგოლიას სტუმარი შინაგან საქმეთა მინისტრი გიორგი გახარია იყო. მის გადადგომას უკვე მრავალი დღეა ითხოვენ პარლამენტის წინ საპროტესტო აქციის მონაწილენი. ინტერვიუს შემდეგ, რუსთავის საკრებულოს თავმჯდომარემ, ლევან ონიანმა, შსს-ს მინისტრთან ინტერვიუს გამო, ტვ პირველის წამყვანი, ინგა გრიგოლია, შეურაცხმყოფელად მოიხსენია. „ინგა ჩივის უკონტაქტო გაუპატიურებისთვის“ - წერს ლევან ონიანი „ქართული ოცნების“ ერთერთი აქტივისტის პოსტის კომენტარებში. მოვუწოდებთ რუსთავის საკრებულოს, რომ სექსისტური განცხადებების გამო, გადააყენონ საკრებულოს თავმჯდომარე თანამდებობიდან, ხოლო მმართველმა პარტიამ - „ქართულმა ოცნებამ“ - საკუთარი რიგებიდან გარიცხოს ლევან ონიანი“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. „პარტნიორობა ადამიანის უფლებებისთვის“ (PHR) შეზღუდული შესაძლებლობის მქონე მოზარდების სექსუალური და რეპროდუქციული ჯანმრთელობის უფლების სამართლებრივ და პრაქტიკულ მიმოხილვას აქვეყნებს. კვლევა მომზადებულია MAC Georgia-ს მხარდაჭერით განხორციელებული პროექტის - „შეზღუდული შესაძლებლობის მქონე გოგონების სექსუალური ძალადობისგან დაცვა“ - ფარგლებში. პროექტი ითვალისწინებდა სექსუალური ძალადობის პრევენციის მნიშვნელოვანი მექანიზმის, კერძოდ, სექსუალური და რეპროდუქციული ჯანმრთელობის უფლებებთან დაკავშირებით შშმ მოზარდებთან მომუშავე პროფესიონალების ცნობიერების ამაღლებას.  სრულად...  წყარო: ორგანიზაციის ვებგვერდი

შიდა ქართლი. 3 ივლისს, ქალთა საინფორმაციო ცენტრმა ჩაატარა შეხვედრები ხაშურის მუნიციპალიტეტის წაღვლის თემის ორ სოფელში: ჩორჩანასა და წაღვლში. „შეხვედრების მიზანი იყო პროექტის: „ადმინისტრაციულ სასაზღვრო ზოლთან მცხოვრები ქალების მონაწილეობა კარგი მმართველობისთვის“ შესახებ ინფორმაციის მიწოდება, ადგილობრივი ლიდერი ქალების გამოვლენა და ადმინისტრაციულ სასაზღვრო ზოლთან მცხოვრები ქალების პრობლემების იდენტიფიცირება.  ასევე, პროექტის გუნდი შეხვდა ხაშურის მუნიციპალიტეტის გენდერული თანასწორობის საბჭოს წევრებს, მერიისა და საკრებულოს წარმომადგენელებს. სამუშაო შეხვედრისას განხილული იყო ადმინისტრაციულ სასაზღვრო ზოლთან მცხოვრები ქალების შეხვედრისას გამოვლენილი პრობლემები“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. გენდერული საინფორმაციო პორტალის თანახმად, პირველად ევროკომისიის თავჯდომარის პოსტს ქალი დაიკავებს. „ევროკომისიას გერმანიის წარმომადგენელი ურსულა ფონ დერ ლიაიენი ჩაუდგება სათავეში, რომელმაც 2013 წლიდან გერმანიის თავდაცვის მინისტრის თანამდებობა დაიკავა, ხოლო ევროპის ცენტრალური ბანკს, საერთაშორისო სავალუტო ფონდის ყოფილი ხელმძღვანელი კრისტინ ლაგარდი“, ნათქვამია პორტალზე. სრულად... წყარო: www.ginsc.net

თბილისი. ევროპის ფონდი ეხმაურება ეკონომიკისა და მდგრადი განვითარების სამინისტროს სააგენტოს „აწარმოე საქართველოში“ მიერ გამოქვეყნებულ, პროგრამის „აწარმოე საქართველოში“ ინდუსტრიული ნაწილის, ტექნიკური მხარდაჭერის და ფინანსებზე ხელმისაწვდომობის კომპონენტების 2014-2018 წლების შედეგების შეფასებას. „2018 წლის აგვისტოში, ევროპის ფონდმა გამოაქვეყნა და დაინტერესებულ მხარეებს გააცნო საქართველოს მცირე და საშუალო მეწარმეობის განვითარების 2016-2020 წლების სტრატეგიის გენდერული შეფასების ანგარიში, რომლის ერთ-ერთ მიგნებასაც სტრატეგიის შემუშავების პროცესში გენდერული ანალიზის ნაკლებობა წარმოადგენს. სათანადო გენდერული ანალიზის გარეშე, მცირე და საშუალო მეწარმეობის განვითარების სტრატეგია და მისი სამოქმედო გეგმები ვერ უზრუნველყოფს ისეთი ღონისძიებების გატარებას, რომლებიც გააუმჯობესებდა ეკონომიკურ მაჩვენებლებს მცირე და საშუალო მეწარმეობის სექტორში ჩართული ქალებისა და მამაკაცებისთვის, ვინაიდან მათი საჭიროებები, პრობლემები და შესაძლებლობები განსხვავებულია“, - აღნიშნულია ფონდის მიერ გავრცელებულ ინფორმაციაში. სრულად წყარო: ორგანიზაციის ვებგვერდი

კახეთი. თელავში ჩატარდა ტრენინგი „ქალთა როლი ადგილობრივი თვითმართველობის საქმიანობაში”. „შეხვედრის ამოცანა იყო, სათემო ლიდერები გაცნობოდნენ თუ როგორია გენდერული თანასწორობის ინსტიტუციური მექანიზმები საქართველოში, რას მოიცავს კახეთის მუნიციპალიტეტის გენდერული თანასწორობის სამოქმედო გეგმა და ადგილობრივი ქალი ლიდერების როლი მუნიციპალიტეტის გენდერული თანასწორობის გეგმის განხორციელების პროცესში”, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. ქალთა ფონდმა საქართველოში წარმოადგინა We Research-ის მიერ მომზადებული კვლევა “სიტუაციური ანალიზი და რეკომენდაციები გარემოსდაცვით სამართლიანობასა და ქალთა უფლებებზე საქართველოში”. “კვლევის შედეგების მიხედვით, გარემოსდაცვით და გენდერულ საკითხებს შორის სუსტი კავშირის მიუხედავად, ნელ-ნელა ხდება ამ ორი თემის ურთიერთმიმართების წინ წამოწევა. We Research-ის მიერ მიმოხილული, ბოლო წლებში ჩატარებული კვლევები ცხადად უსვამს ხაზს იმ ფაქტს, რომ ქალთა ჯანმრთელობაზე გარემოში მიმდინარე მოვლენები განსაკუთრებით დიდ როლს ასრულებს. მაგ. ქალებს უფრო ხშირად უწევთ წყლის რესურსის გამოყენება, შეშის ღუმელთან მეტ ხანს ყოფნა, მეტი მანძილის გავლა ბავშვებთან ერთად მაშინ, როდესაც გზები იხერგება და ტრანსპორტი აღარ მოძრაობს. კენიაში, წყლის მოატანა ოჯახში კენიელი ქალების დღიური ენერგიის 85% მოიხმარს; გვალვის პერიოდში, ქალთა მდგომარეობა კიდევ უფრო მძიმდება და ისინი დღეში დაახლოებით 8 საათს ხარჯავენ იმაზე, რომ როგორმე წყალი მოიპოვონ. ამასთან, ქალებს უფრო ნაკლებად აქვთ განვითარებული ბუნებრივი კატასტროფების დროს გადარჩენისთვის საჭირო უნარ-ჩვევები. მაგალითად, ცურვა, ხეზე ასვლა, სირბილი და ა.შ.”, - აღნიშნულია კვლევაში.  სრულად  წყარო: ორგანიზაციის ვებგვერდი

სამეგრელო. 28 ივნისს, ზუგდიდის აგროსახლში ჩატარდა ტრენინგი „ქალთა როლი ადგილობრივი თვითმართველობის საქმიანობაში“, რომელშიც მონაწილეობა მიიღეს სენაკის, მარტვილის, აბაშის, ხობის, ჩხოროწყუს, ზუგდიდის ქალთა სათემო ჯგუფებისა და ორგანიზაციების წარმომადგენლებმა.  „შეხვედრაში მონაწილეობა მიიღო ზუგდიდის მუნიციპალიტეტის მერიის სოციალური და ჯანდაცვის სამსახურის უფროსმა ნინო სხულუხიამ, რომელმაც გაუზიარა ტრენინგის მონაწილეებს ინფორმაცია ზუგდიდის მუნიციპალიტეტის გენდერული საბჭოს საქმიანობისა და მუნიციპალური პროგრამების შესახებ. შეხვედრას უძღვებოდნენ ქალთა საინფორმაციო ცენტრის დირექტორი, ელენე რუსეცკაია და გენდერის ექსპერტი, მამუკა გაჩეჩილაძე“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. ქალთა ინიციატივების მხარდამჭერი ჯგუფი (WISG) განცხადებას ავრცელებს საქართველოში მცხოვრები ლგბტქი ადამიანების მიმართ უკანასკნელი რამდენიმე დღის განმავლობაში საჯაროდ წახალისებული ძალადობის შესახებ. „მოვუწოდებთ მედია საშუალებებს არ შეუწყონ ხელი სიძულვილის ენის ტირაჟირებასა და ლგბტქი ადამიანების მეტ სტიგმატიზაციას; მოვუწოდებთ შინაგან საქმეთა სამინისტროს, რომ დაუყოვნებლივ აღკვეთოს სიძულვილით მოტივირებული დანაშაულები თუ ინციდენტები, მათ შორის ამგვარი დანაშაულის მუქარა”. სრულად...  წყარო: ორგანიზაციის გვერდი სოციალურ ქსელში

ქვემო ქართლი. 18 ივნისს, ქალაქ მარნეულში, დემოკრატიული ჩართულობის ცენტრში EMC-მ და სათემო რადიო „მარნეულმა“ გამართეს საჯარო დისკუსიას თემაზე: „იძულებითი და ადრეული ქორწინების პრობლემა და მისი დაძლევის გზების ძიება“. „დისკუსიის ფარგლებში მოხსენებები წაიკითხეს საქართველოს შინაგან საქმეთა სამინისტროს, სოციალური მომსახურების სააგენტოს, ასევე საქართველოს სახალხო დამცველის აპარატის წარმომადგენლებმა და ადგილობრივი თემის აქტივისტებმა“, ნათქვამია ორგანიზაციის ვებგვერდზე. სრულად... წყარო: emc.org.ge

აჭარა. 15-16 ივნისს, ბათუმში, გაეროს ქალთა ორგანიზაცია და ბიზნესლიდერთა ფედერაცია „ქალები მომავლისთვის" ორდღიან ეკონომიკურ ფორუმს გამართავენ. „ღონისძიების მიზანი ბიზნესკომპანიებში ქალთა გაძლიერება და წარმატებული ქალი მეწარმეების ისტორიების წარმოჩენაა. ფორუმის სტუმრები გაეცნობიან ინფორმაციას ქალებისთვის ხელმისაწვდომი ტრენინგების, გრანტებისა და განათლების მიღების შესაძლებლობების შესახებ. ამას გარდა, მათ საშუალება ექნებათ, დაესწრონ აქტივობებს, რომლებიც სასტუმრო „ჰილტონსა" და ბათუმის ცენტრალურ პარკში გაიმართება", ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. „კოალიცია თანასწორობისთვის" წევრი არასამთავრობო ორგანიზაციები ეხმიანებიან საგარეჯოს მუნიციპალიტეტში არასრულწლოვანი გოგონას გაუპატიურებისა და მასზე იძულებითი ქორწინების უმძიმეს საქმეს. „სახელმწიფოსგან მოვითხოვთ, გოგონათა იძულებითი ქორწინებისა და ძალადობის პრევენციის მიზნით სისტემური, ქმედითი და საგანგებო ნაბიჯების გადადგმას. აღსანიშნავია, რომ მიმდინარე პერიოდში ასევე გამოვლინდა ლაგოდეხში არასრულწლოვანი გოგონას გაუპატიურების კიდევ ერთი შემზარავი შემთხვევა", ნათქვამია ერთობლივ განცხადებაში. სრულად... წყარო: gdi.ge

თბილისი. „ქალთა ფონდი საქართველოში" გთავაზობთ ფონდის აღმასრულებელი დირექტორის, ბლოგს „აქტივიზმი ყოველთვის საფრთხეშია". „ აქტივიზმი საქართველოში საფრთხეშია - ალბათ, არა მარტო საქართველოში, მაგრამ ჩემთვის ესაა უპირველესად საგანგაშო და ამიტომ მოგმართავთ - საქართველოში აქტივიზმი საფრთხეშია!", - მიიჩნევს ნანა ფანცულაია, - „არა და ჩვენ იმ ეპოქაში ვცხოვრობთ, როცა ყველაზე ხელშესახები პოზიტიური ცვლილებები ქვეყნის ცხოვრებაში სწორედ აქტივიზმს შეუძლია მოიტანოს, სოციალურ მოძრაობებს შეუძლიათ გამოიწვიონ. ეს არაა თეორიული განაცხადი, ამის არა ერთი მაგალითი ჩვენც გვაქვს, და არა ერთ სფეროში. აქტივისტები და აქტივისტური კამპანიები არის ის ძალა, რომელიც მოქალაქეებს ზრდის, სამოქალაქო საზოგადოებას ავითარებს და სამართლიანობის შეგნებას უყალიბებს. კიდევ ბევრი რამის თქმა შეიძლება, რისთვის გვჭირდება აქტივიზმი, მაგრამ მგონი არაა საჭირო, რადგან ეს, ვფიქრობ, უკვე ვიცით. ახლა უნდა ვთქვათ, რა სჭირდება თვითონ აქტივიზმს". სრულად  წყარო: ორგანიზაციის ვებგვერდი

სამეგრელო. ასოციაცია „ათინათის" პროგრამის „გენდერული თანასწორობისთვის" ფარგლებში, ფოთისა და ზუგდიდის 10 პარტნიორ საჯარო სკოლაში, ახალგაზრდა თანატოლგანმანათლებლები ატარებენ ტრენინგებს გენდერული თანასწორობისა და რეპროდუქციული ჯანმრთელობის თემაზე. სრულად... წყარო: ორგანიზაციის გვერდი სოციალურ ქსელში

თბილისი. საქართველოს სახალხო დამცველმა საქართველოში ადამიანის უფლებათა და თავისუფლებათა დაცვის მდგომარეობის შესახებ 2018 წლის ანგარიშში ხაზი გაუსვა, რომ საქართველოში ადრეულ ასაკში ქორწინება კვლავ ერთ-ერთ გამოწვევად რჩება. მიუხედავად იმისა, რომ ადრეულ ასაკში ქორწინების რეგისტრაცია საქართველოს კანონმდებლობით აკრძალულია, როგორც ანგარიშშია ხაზგასმული, „როდესაც საქმე ეთნიკურ უმცირესობას ეხება, ამ კონკრეტულ დანაშაულთან მიმართებით მკაცრი პოლიტიკა არ ტარდება". შესაბამისად, დღემდე პრობლემურია არასრულწოვანი გოგოების მოტაცება მათი დაქორწინების მიზნით, ძირითადად კი ეთნიკურ უმცირესობებით დასახლებულ რეგიონებში. „თბილისის ადამიანის უფლებათა სახლი" წარმოადგენს ეთნიკურად აზერბაიჯანელ ნარგიზა ემანოვას, რომელიც ამ მანკიერ პრაქტიკას - აზერბაიჯანულ თემში ადრეულ და ბავშვობის ასაკში ქორწინებას ებრძვის. სრულად  წყარო: https://hrht.ge

თბილისი. ქალთა მოძრაობა ბათუმის სახელმწიფო უნივერსიტეტის სტუდენტებს მხარდაჭერას უცხადებს და განცხადებას ავრცელებს. „მხარდაჭერას ვუცხადებთ სტუდენტს, რომელმაც პირველმა ამხილა მოძალადე. თუმცა, შეშფოთებას გამოვთქვამთ იმ ფაქტის გამო, რომ მან უარი თქვა „საიას" კვალიფიციურ მომსახურებაზე და დაიქირავა ისეთი კერძო ადვოკატი, რომელმაც პირველივე განცხადებით მოძალადის მხარდამჭერი პოზიცია გააჟღერა. ვთხოვთ, შინაგან საქმეთა სამინისტროს, შეისწავლოს და გამორიცხოს მოწმეზე ზეწოლის შესაძლო ფაქტები, იმის გათვალისწინებით, რომ მოძალადე არის სახელისუფლებო პარტიის მხრიდან ბათუმის საკრებულოს წევრი და აქვს მოტივი და შესაძლებლობა ზეწოლა მოახდინოს მსხვერპლზე", ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში