თბილისი. თბილისის მეგობრობის სახლში გაიმართა კონფერენცია თემაზე: „ეროვნულ უმცირესობათა წარმომადგენელ ქალთა ჩართულობა თბილისის მუნიციპალიტეტის საქმიანობაში". „კონფერენციაზე გენდერული თანასწორობის სტრატეგიაზე იმსჯელეს და აღნიშნულ საკითხთან დაკავშირებით საკუთარი რეკომენდაციები შეიმუშავეს", ნათქვამია გენდერული საინფორმაციო პორტალის ვებ-გვერდზე. შეხვედრაზე თბილისის მუნიციპალიტეტის საქმიანობაში ეროვნულ უმცირესობათა წარმომადგენელ ქალთა ჩართულობის ინტენსივობაზე შეთანხმდნენ. სრულად... წყარო: ginsc.net

თბილისი. სახალხო დამცველი ეხმიანება გავრცელებულ ინფორმაციას, რომლის თანახმად, ზესტაფონის მუნიციპალიტეტი საახალწლო კონცერტის წამყვანად მამაკაცს ეძებს. „სახალხო დამცველი აღნიშნავს, რომ დასაქმების სფეროდან ქალთა სეგრეგაციის მიზნით სხვადასხვა შეზღუდვების დაწესება, სამწუხაროდ, დღეს ისევ აქტუალურ პრობლემას წარმოადგენს, თუმცა, ქალთა გამორიცხვის მსგავსი აშკარა მცდელობა საჯარო ხელისუფლების მხრიდან განსაკუთრებით საგანგაშოა. იმის მიუხედავად, რომ სახელმწიფოს ეკისრება პოზიტიური ვალდებულება, შესაბამისი პირობები შექმნას ქალების მიერ შრომის უფლების სრულყოფილი რეალიზაციის უზრუნველსაყოფად, თვითმმართველობის ორგანო თავად უწყობს ხელს დასაქმების სფეროში ქალთა მიმართ დისკრიმინაციული შეხედულებების დამკვიდრებას", ნათქვამია ომბუდსმენის განცხადებაში. სრულად... წყარო: www.ombudsman.ge

თბილისი. 12 დეკემბერს, ჰოსტელ ფაბრიკაში, გაიმართა გამოფენა-ინსტალაცია, „აჩრდილები". „გამოფენაზე წარმოდგენილი იყო ქალთა მიმართ ძალადობის გამომსახველი ფიგურები. აღნიშნული გამოფენა-ინსტალაცია ასახავს ყოველდღიურ პრობლემებს. „ქალთა საინფორმაციო ცენტრი” ჩართულია 16 დღიან კამპანიაში ქალთა მიმართ ძალადობის წინააღმდეგ, რომლის ფარგლებშიც ორგანიზაციამ მცირე გრანტები გასცა სხვადასხვა პროექტებზე. აღნიშნული ღონისძიება სწორედ ამ კამპანიის ფარგლებში ჩატარდა", ნათქვამია ორგანიზაციის ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში

თბილისი. ჰაინრიხ ბიოლის ფონდის სამხრეთ კავკასიის რეგიონული ბიურო ფემინისტურ ვებ-გვერდზე აქვეყნებს გენდერის სპეციალისტის, მწერლის თამთა მელაშვილის ბლოგპოსტს: „ვის ეშინია ელენე დარიანის"? „ლიტერატურას საუკუნეების განმავლობაში კაცები ქმნიდნენ და კაცებს ეკუთვნოდათ. ლიტერატურა იყო პრივილეგირებულის - მისი, ვისაც განათლებაზე ხელი მიუწვდებოდა, მისი, ვინც წერა-კითხვა იცოდა, მისი, ვისაც ჰქონდა ფული და "საკუთარი ოთახი”.  ქალებმა გვიან დაიწყეს წერა იმიტომ, რომ განთლების მიღების, საჯარო სივრცეში გამოჩენის და სხვა შესაძლებლობები, კაცებისგან განსხვავებით, გვიან მიეცათ. თუმცა, პატრიარქალურმა სისტემამ და ამ სისტემის წიაღში გაჩენილმა დომინანტურმა (კაცურმა)  ლიტერატურულმა ტრადიციამ, რომელსაც უნივერსალობაზე ჰქონდა (და აქვს) პრეტენზია, მიზანმიმართულად დაიწყო არაპრივილეგირებული ჯგუფების და, პირველ რიგში, ქალების განდევნა კანონიკიდან", ნათქვამია ბიოლის ფონდის ფემინისტურ ვებ-გვერდზე. სრულად... წყარო: www.feminism-boell.org

თბილისი. 1 დეკემბერს, რუსთაველის მეტროსთან საინიციატივო ჯგუფმა „ქალები საქართველოსთვის" გოგა ჩანადირის ფოტო გამოფენა ოჯახში ძალადობის წინააღმდეგ მოაწყო. „საინიციატივო ჯგუფმა დამთვალიერებლებს საჩუქრად 2017 წლის კალენდრები გადასცა. „ქალთა საინფორმაციო ცენტრი” ჩართულია 16 დღიან კამპანიაში ქალთა მიმართ ძალადობის წინააღმდეგ, რომლის ფარგლებშიც ორგანიზაციამ მცირე გრანტები გასცა სხვადასხვა პროექტებზე", ნათქვამია ქალთა საინფორმაციო ცენტრის ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში

თბილისი. 8 დეკემბერს, Impact Hub-ში გაიმართა საჯარო დისკუსია და სოციალური სამოყვარულო ვიდეო რგოლის პრეზენტაცია - „ანიმა ნოველები - STOP - BULLING!”. „საჯარო დისკუსიას გაუძღვა რადიო „თავისუფლების" თბილისის ბიუროს ხელმძღვანელი მარინა ვაშაყმაძე. ახალგაზრდებმა იმსჯელეს სკოლებში ბულინგზე. „ქალთა საინფორმაციო ცენტრი" ჩართულია 16 დღიან კამპანიაში ქალთა მიმართ ძალადობის წინააღმდეგ, რომლის ფარგლებშიც ორგანიზაციამ მცირე გრანტები გასცა სხვადასხვა პროექტებზე. აღნიშნული ღონისძიება სწორედ ამ კამპანიის ფარგლებში ჩატარდა", ნათქვამია ქალთა საინფორმაციო ცენტრის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. 8 დეკემბერს, საქართველოს ახალგაზრდა იურისტთა ასოციაციამ თბილისისა და ქუთაისის საქალაქო და სააპელაციო სასამართლოების სისხლის სამართლის საქმეების მონიტორინგის შედეგების პრეზენტაცია გამართა. „საიამ დღემდე მონიტორინგის რვა ანგარიში წარმოადგინა, რომლებიც, ერთიანობაში, მოიცავდა პერიოდს 2011 წლის ოქტომბრიდან 2015 წლის ოქტომბრის ჩათვლით. საიას მეცხრე ანგარიში კი მოიცავს პერიოდს 2016 წლის თებერვლიდან 2016 წლის ივლისის ჩათვლით. ამ საანგარიშო პერიოდის განმავლობაში მონიტორინგი განხორციელდა განახლებული მეთოდოლოგიით, რომელიც სხვა საკითხებთან ერთად, მოწყვლადი ჯგუფების (ქალები, შშმ პირები, რელიგიური და ეთნიკური უმცირესობები, ლგბტ თემის წარმომადგენლები და ა.შ) მიმართ მართლმსაჯულების ხელმისაწვდომობის შეფასებას გულისხმობს", ნათქვამია ორგანიზაციის ვებ-გვერდზე. სრულად... წყარო: gyla.ge

თბილისი. ჰაინრიჰ ბიოლის ფონდის სამხრეთ კავკასიის რეგიონული ბიურო აცხადეს კონკურსს ქალთა დაკარგული ისტორიების გამოსავლენად. „ფონდის ინიციატივით 2012 წელს განხორციელებული პროექტის „50 ქალი საქართველოდან" მსგავსად, გვსურს წავახალისოთ იმ ქალების ისტორიების გადააზრება, რომლებიც იბრძოდნენ ცვლილებებისთვის, მაგრამ მათი მოღვაწეობა სათანადოდ არ იქნა აღიარებული. პრიორიტეტი მიენიჭება ქალთა ისტორიებს რეგიონებიდან. კონკურსის პირველ ეტაპზე, 2016 წლის 30 დეკემბრის ჩათვლით, გთხოვთ გამოგვიგზავნოთ თქვენთვის ცნობილი ქალის სახელი და 200-დან 300 სიტყვამდე დასაბუთება, თუ რატომ იყო მისი მოღვაწეობა მნიშვნელოვანი. კონკურსის მეორე ეტაპზე ფონდი მხარს დაუჭერს გამარჯვებული ისტორიების კვლევას", ნათქვამია ორგანიზაციის ვებ-გვერდზე. სრულად... წყარო: www.feminism-boell.org

თბილისი. 7 დეკემბერს, საქართველოს ახალგაზრდა იურისტთა ასოციაციამ კვლევის - „2016 წლის საპარლამენტო არჩევნების გენდერული ანალიზი, ძირითადი მიგნებები და გამოწვევები" შუალედური შედეგების პრეზენტაცია გამართა. „მიზნის მისაღწევად, კვლევის ფარგლებში შესწავლილი და გაანალიზებული იქნება საქართველოს კანონმდებლობა (მათ შორის, პოლიტიკის დოკუმენტები), მიმოხილული იქნება საერთაშორისო სტანდარტები და საქართველოს მიერ ნაკისრი საერთაშორისო ვალდებულებები პოლიტიკურ-საარჩევნო პროცესებში ქალთა ჩართულობასთან დაკავშირებით. ასევე, მოხდება პრაქტიკის შესწავლა ქალთა პოლიტიკური და საარჩევნო უფლებების განხორციელების თაობაზე. კვლევა ეტაპობრივად, 2016-2018 საარჩევნო ციკლის ფარგლებში განხორციელდება", ნათქვამია ორგანიზაციის ვებ-გვერდზე. სრულად... წყარო: gyla.ge

თბილისი. საქართველოს სახალხო დამცველი მიიჩნევს, რომ გადაცემა „კაცების დროს" პრომო გენდერული სტერეოტიპების გამყარებას უწყობს ხელს. „გავრცელებულ პრომო რგოლში, ქალებს მხოლოდ ფონის შექმნა ევალებათ, მაშინ როდესაც ორი მამაკაცი ცენტრალურ ფიგურად გვევლინება. ქალების დაკნინებულ მდგომარეობაში წარმოჩენით ხდება საზოგადოებაში კაცის ცენტრალური როლის ხაზგასმა. სახალხო დამცველი მიიჩნევს, რომ რეკლამა გენდერულად მჩაგვრელ პრაქტიკას ამკვიდრებს და ხელს უწყობს უარყოფითი გენდერული სტერეოტიპების გამყარებას ქალების პროფესიული შესაძლებლობების და მათი განვითარების შესახებ", ნათქვამია ომბუდსმენის განცხადებაში. სრულად... წყარო: www.ombudsman.ge

თბილისი. ქალთა საინფორმაციო ცენტრის ორგანიზებით გაიმართება კონფერენცია „თბილისის მუნიციპალიტეტის გენდერული მეინსტრიმინგი". „კონფერენციაზე განხილული იყო თბილისის მუნიციპალიტეტის გენდერული თანასწორობის სტრატეგია. აღნიშნული დოკუმენტის საბოლოო ვერსიაში გათვალისწინებული იქნება საერთაშორისო და ადგილობრივი ორგანიზაციების წარმომადგენლების რეკომენდაციებისა და მოსაზრები, რომელიც დღევანდელ შეხვედრაზე გამოითქვა. თბილისის მუნიციპალიტეტის გენდერულ სტრატეგიას თბილისის მერია 2016 წლის დეკემბერში დასამტკიცებლად წარუდგენს თბილისის მუნიციპალიტეტის საკრებულოს. 2017 წლის იანვარში შემუშავდება სტრატეგიის შესაბამისად გენდერული თანასწორობის სამოქმედო გეგმის დოკუმენტიც", ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. ჰაინრიჰ ბიოლის ფონდის სამხრეთ კავკასიის რეგიონულმა ბიურომ უმასპინძლა საჯარო დისკუსიას: „ვის ეშინია ფემინიზმის"? ბოლო ოთხი წლის მანძილზე საქართველოს პარლამენტში არაერთი ფემინისტური საკანონმდებლო ინიციატივა ჩავარდა. ამის მაგალითია კანონპროექტები პარტიებისთვის სავალდებულო გენდერული კვოტების თუ სექსუალური შევიწროების შესახებ. როგორც აღმოჩნდა, ქართულ პოლიტიკაში გენდერული თანასწორობის იდეას საკმარისი თანამოაზრე არ ჰყავს. პოლიტიკური ნების გარეშე კი ვერც ბოლო დღეებში გახმაურებულ, ქალთა გენიტალიების დამახინჯების პრაქტიკასთან ბრძოლის ინსტრუმენტი შემუშავდება - იმისთვის, რომ აღნიშნული სისხლის სამართლის დანაშაული გახდეს, სტამბულის კონვენციას ახალი მუხლი უნდა დაემატოს და მის რატიფიკაციას პარლამენტმა დაუჭიროს მხარი", ნათქვამია ორგანიზაციის ვებ-გვერდზე.   წყარო: ge.boell.org

თბილისი. „პარტნიორობა ადამიანის უფლებებისთვის" წარმომადგენელმა ადგილობრივი თვითმმართველობისთვის ჩაატარა ტრენინგი თემაზე: „ოჯახში ძალადობისგან დაცვის კანონმდებლობა და პრაქტიკა და გენდერული თანასწორობის სკითხები”. „ტრენინგი შეეხო თემებს: ოჯახში ძალადობის ფენომენი გენდერული უთანასწორობისა და ადამიანის უფლებების ჭრილში, ადგილობრივი თვითმმართველობის ექსკლუზიურ და დელეგირებულ უფლებამოსილებებში გენდერული თანასწორობის მეინსტრიმინგის საკითხი, საქართველოს კანონმდებლობა ევროპის საბჭოს სტამბოლის კონვენციის ჭრილში", ნათქვამია ორგანიზაციის ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია კოალიცია „თანასწორობისთვის" ერთად, „ქალთა მიმართ ძალადობისა და ოჯახში ძალადობის პრევენციისა და აღკვეთის შესახებ" ევროპის საბჭოს კონვენციის (სტამბოლის კონვენცია) საქართველოს პარლამენტის მიერ რატიფიცირებას ითხოვს. „დღეს სასტუმრო „რუმს თბილისში" მრგვალი მაგიდა გაიმართა, სადაც არასამთავრობო ორგანიზაციებისა და მთავრობის წარმომადგენლებმა საქართველოს სტამბოლის კონვენციასთან მიერთების საკითხი განიხილეს, როგორც ქალთა მიმართ ძალადობის შემცირების ერთ-ერთ მექანიზმი. ქალთა მიმართ ძალადობის საკითხის გარდა, სტამბოლის კონვენცია ლგბტ, შეზღუდული შესაძლებლობების მქონე ქალთა, ეთნიკურ და რელიგიურ უმცირესობათა დაცვის საკითხებსაც არეგულირებს. ...დოკუმენტზე ხელმომწერი ქვეყნები იღებენ ვალდებულებას, საკანონმდებლო დონეზე უზრუნველყონ ქალთა დაცულობა ოჯახური დანაშაულისაგან, აწარმოონ ქალთა მიმართ განხორციელებული ძალადობის სტატისტიკა; იზრუნონ ოჯახში ძალადობის შესახებ საზოგადოების ინფორმირებულობაზე, ძალადობის მსხვერპლთა რეაბილიტაციასა და დაცვაზე", ნათქვამია საიას ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. 4 დეკემბერს, „ქალთა საინფორმაციო ცენტრმა" ღონისძიება გამართა სახელწოდებით „100 ქალი ძალადობის წინააღმდეგ". ასევე გაიმართა დისკუსია „გენდერი და გენდერული ძალადობა”. ორგანიზაცია ჩართულია 16 დღიან კამპანიაში ქალთა მიმართ ძალადობის წინააღმდეგ, რომლის ფარგლებშიც მცირე გრანტები გასცა სხვადასხვა პროექტებზე. სრულად... წყარო: ორგანიზაციის ვებ-გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს თარგმანს: „წითელი ცისარტყელაში: სექსუალობა, სოციალიზმი და ლგბტ გათავისუფლება". თარგმანი ჰანა დის წიგნის შეჯამებაა და ნაშრომის სრულს შინაარს არ ასახავს. „მიუხედავად მიღწევებისა, ლგბტ ჩაგვრა კაპიტალისტური საზოგადოების საფუძვლებშია ჩაბუდებული. შემთხვევითი არ არის, რომ სწორედ ექსპლუატაციასა და კონკურენციაზე აგებულ გარემოში გახდა შესაძლებელი ყველაზე ინტიმური – ჩვენი პირადი ურთიერთობების მოგების პრინციპისთვის დაქვემდებარება და ოჯახის ინსტიტუტის იმ თარგზე გამოჭრა, რომლის ფონზეც როგორც მმართველი კლასის, ისე იაფი სამუშაო ძალის კვლავწარმოებას არაფერი ემუქრება. ჩვენი – ლგბტ ადამიანების – სექსუალობისა და გენდერული იდენტობის თავისუფლება პირდაპირ უთხრის ძირს ოჯახის იმ მოდელს, რომლის ფარგლებშიც პოლიტიკოსებს, დიდ ბიზნესსა და მედიას შეუძლიათ ხოტბა ასხან ოჯახურ ფასეულობებს და, ამავდროულად, ოდნავაც არ იზრუნონ ბავშვის აღზრდასთან თუ მოხუცებულთა და სნეულთა მოვლასთან დაკავშირებულ მძიმე, უფასო საშინაო შრომაზე", ნათქვამია ორგანიზაციის ვებ-გვერდზე. სრულად... წყარო: emc.org.ge

თბილისი. კატო მიქელაძის პრემია, სახალხო დამცველის მოადგილემ, ეკა სხილაძემ მიიღო. „ქალთა ფონდმა საქართველოში, 2013 წელს დააწესა „კატო მიქელაძის სახელობის პრემია", რომელსაც ყოველწლიურად, ქალთა უფლებების დამცველთა საერთაშორისო დღეს, გადასცემს ქალთა უფლებების დამცველ ერთ აქტივისტს საქართველოში. კატო მიქელაძის პრემიის დაწესების უმთავრესი მიზანია ქალი უფლებადამცველების აღიარება და დაფასება, მათი მნიშვნელოვანი საქმიანობის შესახებ საზოგადოების ცნობიერების ამაღლება, ქალთა უფლებების დამცველთათვის უსაფრთხო სამუშაო გარემოს შექმნა და ახალგაზრდა თაობის წახალისება", ნათქვამია ორგანიზაციის ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში

თბილისი. 28-30 ნოემბერს, „ქალთა საინფორმაციო ცენტრი" შინაგან საქმეთა სამინისტროს აკადემიის კურსანტებისთვის მართავს ტრენინგს. „აკადემიელები სამი დღის განმავლობაში ეცნობიან ინფორმაციას ქალთა საკითხებზე და გენდერული თანასწორობის შესახებ იმსჯელებენ. ტრენინგი „უსაფრთხოების სექტორში გენდერული პრინციპების ინტეგრირება" ტარდება პროექტ „გაძლიერებული ქალები მშვიდობისა და განვითარებისთვის" ფარგლებში", ნათქვამია ორგანიზაციის ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში

თბილისი. გენდერული საინფორმაციო პორტალი აქვეყნებს ფოტოგრაფ ბარგავი ჯოშის ფოტოპროექტს, რომელიც ქალთა მიმართ ძალადობის სხვადასხვა ფორმას შავ-თეთრ ფერებში ასახავს. „ნაკლები წვდომა განათლებასა და კარიერულ პერსპექტივებზე, ფიზიკური ძალადობა ქალებზე, საკუთარ სხეულზე უფლებების არ ქონა, გოგონათა წინადაცვეთა და სხვა თემები, ის ძირითადი ასპექტებია რომელიც ფოტოგრაფის ობიექტივში მინიმალისტური ფერებითა და ფორმებით აისახა", ნათქვამია პორტალზე. სრულად... წყარო: ginsc.net

თბილისი. 25 ნოემბრიდან ქალთა მიმართ ძალადობის წინააღმდეგ 16 დღიანი კამპანიის ფარგლებში ქალთა საინფორმაციო ცენტრი იწყებს კამპანიას #ასეუფრომარტივია. „კამპანია მოიცავს 6 ოჯახისა და ერთი მოხუცთა პანსეონის დახმარებას ტექნიკით და მისი მხარდამჭერი ამ ეტაპზე არის საქართველოს ლატარიის კომპანია. იმედია სოციალურ პასუხისმგებლობას სხვა ბიზნეს სტრუქტურებიც გაიზიარებენ და შემოუერთდებიან აღნიშნულ კამპანიას", ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

შიდა ქართლი. 26 ნოემბერს, გორის სამოქალაქო აქტივიზმის ცენტრის მოხალისეები აქციას „არა გენდერულ სტერეოტიპებს" შეუერთდნენ. „ამ აქციით კიდევ ერთხელ შევახსენეთ საზოგადოებას რომ გენდერული სტერეოტიპები პირდაპირ კავშირშია უთანასწორობასთან და ხელს უწყობს გენდერულ ძალადობას და ქალების დისკრიმინაციას. აქციის მიზანი იყო საზოგადოების ცნობიერების ამაღლება და გენდერული ძალადობის მსხვერპლთა მიმართ სოლიდარობის დემონსტრირება", ნათქვამია ორგანიზაციი ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში

თბილისი. გენდერული საინფორმაციო პორტალი სახალხო დამცველის განცხადებას ავრცელებს. „ომბუდსმენმა განაცხადა, რომ, გასულ წლებთან შედარებით, ოჯახში ძალადობის შემთხვევათა გამოვლენისა და მათზე რეაგირების მაჩვენებელი გაზრდილია. 2016 წლის 10 თვის მონაცემებით, 13 ქალი იქნა მოკლული ოჯახში ძალადობის პირობებში. კვლავ მაღალია ჯანმრთელობის დაზიანებისა და სხვა სასტიკი ფორმებით ჩადენილი ძალადობის რიცხვი, პოლიციამ 2000-ზე მეტ შემთხვევაში გამოიყენა დაცვის ღონისძიება. მაგრამ სამწუხაროდ, იყო შემთხვევები, როდესაც ოჯახში შესაძლო ძალადობის შესახებ შეტყობინება სამართალდამცავ უწყებაში დანაშაულებრივ ქმედებამდე შევიდა თუმცა, დანაშაულის პრევენცია ვერ მოხერხდა", ნათქვამია განცხადებაში. სრულად... წყარო: ginsc.net