თბილისი. 25 ნოემბერი ქალთა მიმართ ძალადობის აღმოფხვრის საერთაშორისო დღეა. ხვალ, 17 საათზე, ნატოსა და ევროკავშირის შესახებ საინფორმაციო ცენტრის საგამოფენო დარბაზში დინა ოგანოვას ფოტოგამოფენა „გოგონა დაიბადა" გაიხსნება. „ფოტოგამოფენა გაეროს მოსახლეობის ფონდის (UNFPA) საქართველოს ოფისის ინიციატივით, გაეროს ერთობლივი პროგრამის „გენდერული თანასწორობისთვის" ფარგლებში, შვედეთის მთავრობის ფინანსური მხარდაჭერით მომზადდა და ეძღვნება 16 დღიან კამპანიას ქალთა მიმართ ძალადობის წინააღმდეგ. დინა ოგანოვას ფოტოპროექტი „გოგონა დაიბადა" თბილისსა და კახეთში მცხოვრები იმ ოჯახების შესახებ გვიამბობს, რომელთაც მხოლოდ გოგოები ჰყავთ. ფოტოპროექტის მიზანია, აამაღლოს ცნობიერება გენდერული ნიშნით სქესის შერჩევის საზიანო პრაქტიკის შესახებ და ხაზი გაუსვას გოგოებისა და ვაჟების, როგორც შვილების, უფლებრივ თანასწორობას, მათ მიმართ თანაბარი მოპყრობის აუცილებლობას, მათი შესაძლებლობების ერთნაირად რეალიზების საჭიროებას, რაც მთავარია როგორც ოჯახის, ისე საზოგადოების ჰარმონიული განვითარებისათვის", ნათქვამია გენდერული საინფორმაციო პორტალის ვებ-გვერდზე. სრულად... წყარო: ginsc.net

თბილისი. 25 ნოემბერს გენდერული ძალადობის წინააღმდეგ ბრძოლის კვირეული იწყება, რომელსაც საქართველოც უერთდება. მოდი ლიგამუსში და თქვი არა, არა ძალადობას. დასწრება: საინფორმაციო შეხვედრა ილიას სახელმწიფო უნივერსიტეტში ღია კარის პრინციპით გაიმართება და სტუდენტები, მედიის წარმომადგენლები და სხვა მოწვეული სტუმრები დაესწრებიან. სრულად... წყარო: ორგანიზაციის ვებ-გვერდი სოციალურ ქსელში

კახეთი. 20 ნოემბერს, სიღნაღის მუნიციპალიტეტის უხუცესი ქალებისგან გასულ საუკუნეში გოგონათა განათლების საკითხებზე ზეპირი ისტორიები მოგროვდა. „ისტორიები ვიდეო ფორმატით მოვაგროვეთ 4 უხუცესი ქალისგან, რომლებიც ყვებიან პირად ცხოვრებაზე - რა გასაჭირი და შესაძლებლობები ჰქონდათ თავიანთ ახალგაზრდობაში განათლების მიღების პროცესში. აღნიშნული ფორმით ჩვენ შევუერთდით გენდერული ნიშნით ძალადობის საწინააღმდეგო კამპანიას, რომელიც 25 ნოემბრიდან იწყება. წელს კამპანიის თემაა „უსაფრთხო სახლიდან უსაფრთხო მსოფლიომდე: გავხადოთ განათლება ყველასთვის უსაფრთხო"", ნათქვამია სამოქალაქო ინიციატივის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრმა (EMC) გამართა სამუშაო შეხვედრა „ემანსიპაციის იდეის ძიებაში". „შეხვედრის მიზანი იყო მუსლიმი ქალების უფლებრივ მდგომარეობაზე დისკუსიის დასაწყებად ჰორიზონტალური და თავისუფალი სააზროვნო სივრცის შექმნა, სადაც მუსლიმმა ქალებმა საკუთარ მდგომარეობასა და გამოწვევებზე თავად ისაუბრეს. შეხვედრის ფარგლებში მოხდა ფემინიზმის, ქალთა უფლებებისა და რელიგიის თავისუფლების საკითხებზე მოხსენებების წარდგენა და დისკუსია", ნათქვამია ორგანიზაციის ვებ-გვერდზე სოციალურ ქსელში სრულად... წყარო: ორგანიზაციის ვებ-გვერდი სოციალურ ქსელში

თბილისი. გენდერული საინფორმაციო პორტალი აქვეყნებს სალომე ბელქანიას ბლოგპოსტს: „ოცდახუთი". „25 ნოემბერი ქალთა მიმართ ძალადობის აღმოფხვრის საერთაშორისო დღეა და თექვსმეტდღიან კამპანიაში ვიღებთ მონაწილეობას ყველა! მე, შენ, ჩვენ და ისინი", ნათქვამია ბლოგპოსტში. სრულად... წყარო: ginsc.net

თბილისი. ჰაინრიხ ბიოლის ფემინისტური ვებ-გვერდი მორიგ ფემინისტურ საგანმანათლებლო მასალას ავრცელებს. „საჯარო სივრცეში სექსუალური შევიწროების უჩინარ დისკრიმინაციად განხილვა რამდენიმე მიზეზითაა განპირობებული. ერთი მხრივ, იგი სექსუალური ძალადობის ნაკლებად მნიშვნელოვან ფორმად აღიქმება, ხოლო მეორე მხრივ, მისი იდენტიფიცირება ხშირად რთულია, რადგანაც იგი საზოგადოებაში კაცების ნორმალურ ქმედებად და მასკულინობის ნორმად აღიქმება", ნათქვამია ორგანიზაციის ვებ-გვერდზე. სრულად... წყარო: www.feminism-boell.org

თბილისი. ქალთა ფონდისა და სხვა ორგანიზაციების მიერ დაგეგმილ კამპანიას უერთდებიან საქართველოს ახალგაზრდა მწვანეები და ფემინისტთა დამოუკიდებელი ჯგუფი. ისინი 20 ნოემბერს გამართავენ ფილმის „კაირო 678–ის" ჩვენებას „კივი" კაფეში. ფილმი 3 ქალის ისტორიაზეა აგებული. სრულად... აქვე გაგაცნობთ ქალთა ფონდის მიერ გამოქვეყნებულ ინფორმაციას თუ როგორ რეაგირებენ სექსუალურ შევიწროებაზე გოგონები\ქალები... სრულად... წყარო: ქალთა ფონდი. ახალგაზრდა მწვანეები

თბილისი. 15 ნოემბერს, „ქალთა საინფორმაციო ცენტრის" ორგანიზებით, გაიმართა ქსელური შეხვედრა და შედეგების გაცნობის სემინარი საერთაშორისო ტრენინგ პროგრამის 1325 კურსდამთავრებულებისთვის. ტრენინგი გენდერული თანასწორობის ეროვნულ სამოქმედო გეგმას შეეხო. სრულად... წყარო: ორგანიზაციის ვებ-გვერდი სოციალურ ქსელში

თბილისი. გენდერული საინფორმაციო პორტალი ამერიკული გამოცემის The New Yorker სტატიას და ფოტორეპორტაჟს აქვეყნებს საქართველოში არასრულწლოვანთა ქორწინების შესახებ. „სტატიაში საუბარია საქართველოს მთავრობის მიერ გატარებულ საკანონმდებლო ცვლილებებზე, რომელიც ადრეულ ასაკში ქორწინების ტენდენციის შემცირებას ისახავს მიზნად. კანონი 16 წლამდე ასაკის პირებზე ქორწინების დარეგისტრირებას კრძალავს და ასევე კანონით ისჯება გოგონების მოტაცების ტრადიციაც, თუმცა საქართველოში სრულწლოვანებას მიუღწეველი პირები არარეგისტრირებულ ქორწინებას მიმართავენ. ჟურნალისტი წერს რომ ეს ყველაფერი გოგონების პროფესიულ მომავალს უშლის ხელს, თუმცა ისეთებიც არიან. რომლებიც ადრეულ ასაკში ქორწინების მიუხედავად უარს არ ამბობენ თავის კარიერულ გეგმებზე და დედობის პარალელურად სწავლასაც განაგრძობენ", ნათქვამია გენდერულ საინფორმაციო პორტალზე. სრულად... წყარო: ginsc.net

თბილისი. საქართველოს სახალხო დამცველმა გაეროს ქალთა მიმართ დისკრიმინაციის ყველა ფორმის აღმოფხვრის შესახებ კომიტეტს შუალედური ანგარიში წარუდგინა. ''სახალხო დამცველის მიერ მომზადებულ შუალედურ ანგარიშში საუბარია ოჯახში და ქალთა მიმართ ძალადობის კუთხით არსებულ გამოწვევებზე; მათ შორის, საკანონმდებლო რეგულაციებსა და ეროვნული სამოქმედო გეგმების ეფექტურ იმპლემენტაციასთან დაკავშირებულ პრობლემაზე, ქალთა უფლებრივი მდგომარეობის გაუმჯობესებისკენ მიმართული საკანონმდებლო ინიციატივების განუხორციელებლობაზე'', ნათქვამია ორგანიზაციის ვებ-გვერდზე სოციალურ ქსელში. სრულად... წყარო: www.ombudsman.ge

თბილისი. შინაგან საქმეთა სამინისტროს აკადემიას გაერო-ს ქალთა ორგანიზაციისა და ძალადობისგან დაცვის ეროვნული ქსელის წარმომადგენლები ეწვივნენ. „შეხვედრის ფარგლებში, მხარეებმა შსს-ს აკადემიასა და აღნიშნულ ორგანიზაციებს შორის არსებულ თანამშრომლობაზე ისაუბრეს, ერთობლივად განხორციელებული პროექტები შეაფასეს და ახალ გამოწვევებზე იმსჯელეს. შეხვედრის ბოლოს, შსს-ს აკადემიის რექტორი და სტუმრები ძალადობის თემაზე მსმენელთა გადამზადების ახალი მოდულების შემუშავებაზე, რისკების შეფასების მეთოდების დანერგვაზე, საჯარო ლექციებში მონაწილეობასა და თანამშრომლობის გაღრმავებაზე შეთანხმდნენ", ნათქვამია საქართველოს შსს-ს აკადემიის ვებ-გვერდზე სოციალურ ქსელში. სრულად... წყარო: შსს-ს აკადემიის ვებ-გვერდი სოციალურ ქსელში

თბილისი. 11 ნოემბერს, საკოორდინაციო ჯგუფის ფარგლებში, საქართველოს მთავრობის ადმინისტრაციამ და გაეროს ქალთა ორგანიზაციამ შეხვედრა გამართა. „საუბარი იყო გაეროს უშიშროების საბჭოს რეზოლუციის განხორციელებაზე სახელწოდებით - „ქალები, მშვიდობა და უსაფრთხოება". შეხვედრაზე სხვადასხვა უწყების წარმომადგენლებმა 2016-2017 წლების 1325 ეროვნული სამოქმედო გეგმით გათვალისწინებული აქტივობების შესრულების შესახებ ანგარიში წარმოადგინეს," ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

სამცხე-ჯავახეთი. ახალციხის ახალგაზრდულ ცენტრში გამართულ პრეზენტაციაზე ფემინიზმსა და ფემინისტურ ორგანიზაციებზე ისაუბრეს. შეხვედრის მიზანი იყო მონაწილეებისთვის ქალთა უფლებების გაზიარება. „ღონისძიება ორგანიზებულ იქნა, ტოლერანტობის სამოქალაქო ცნობიერებისა და ინტეგრაციის მხარდამჭერი პროგრამა PITA-ს ფარგლებში, რომელსაც ახორციელებს საქართველოს გაეროს ასოციაცია (UNAG), აშშ-ს საერთაშორისო განვითარების სააგენტოს (USAID) ფინანსური მხარდაჭერით, პროგრამის პარტნიორი ახალციხესა და ახალქალაქში, საზოგადოებრივი ორგანიზაცია დემოკრატ მესხთა კავშირია," ნათქვამია ორგანიზაციის ვებ-გვერდზე სოციალურ ქსელში სრულად... წყარო: ორგანიზაციის ვებ-გვერდი სოციალურ ქსელში

თბილისი. ჰაინრიხ ბიოლის ფონდის სამხრეთ კავკასიის ბიუროს ფემინისტურ ვებ-გვერდზე გამოქვეყნდა უმა ნარაიანის სტატია: „კულტურის არსი და ისტორიის განცდა: კულტურული ესენციალიზმის ფემინისტური კრიტიკა". „არაერთ ფორუმზე, რომელიც ტრანსნაციონალური და გლობალური ფემინიზმის პერსპექტივების განვითარებას მიეძღვნა, ფემინისტებმა არაერთხელ გამოკვეთეს იმის საჭიროება, რომ აუცილებელია მეტი ყურადღება დაეთმოს ქალებს შორის ეროვნულ თუ კულტურულ განსხვავებებს, რაც მათ საშუალებას მისცემს თავიდან აიცილონ ესენციალისტური მიდგომები, რომლებიც არ ითვალისწინებენ მესამე სამყაროს კონტექსტების წარმომადგენელი ქალების საჭიროებებს და პრობლემებს", ნათქვამია სტატიაში. სრულად... წყარო: www.feminism-boell.org

თბილისი. 7-9 ნოემბერს, ქალთა მიმართ ძალადობისა და ოჯახში ძალადობის საკითხებზე გამოცდილების გაზიარებისა და სამომავლო თანამშრომლობის მიზნით ომბუდსმენის აპარატმა სომეხ კოლეგებს უმასპინძლა. „სამ დღიანი სამუშაო შეხვედრის ფარგლებში საქართველოს სახალხო დამცველის აპარატის თანამშრომლებმა სომეხ კოლეგებს გააცნეს სახალხო დამცველის მანდატი, ინსტიტუტის როლი ოჯახში ძალადობისა და ქალთა მიმართ ძალადობის პრევენციის საკითხებში, საქმისწარმოების წესები და ინდივიდუალურ საქმეებზე მუშაობის პრაქტიკა", ნათქვამია ომბუდსმენის ვებ-გვერდზე. სრულად... წყარო: ombudsman.ge

თბილისი. გენდერული საინფორმაციო პორტალი კვლევის შედეგად მაღალმთიან რეგიონებში გამოვლენილი გენდერული დისკრიმინაციის პრობლემებზე ამახვილებს ყურადღებას. „საქართველოს მთიან დასახლებებში ქალების ეკონომიკურ დამოუკიდებლობას და ქონების გადანაწილებას თან სდევს გენდერული სტერეოტიპები - ასეთია კვლევა, რომელიც საქართველოს მაღალმთიან რეგიონებში საჭიროებებსა და პრიორიტეტებს შეეხება. ის გაეროს ქალთა ორგანიზაციამ სოციალურ მეცნიერებათა ცენტრთან ერთად განახორციელა", ნათქვამია პორტალზე. ინფორმაციას თან ახლავს ჯამპ სტარტ ჯორჯიას ინფოგრაფიკა. სრულად... წყარო: ginsc.net

თბილისი. ადამიანის უფლებებისა და მონიტორინგის ცენტრი (EMC) მამაკაცებისთვის ბავშვის მოვლის გამო შვებულების და მისი ანაზღაურების უფლების არარსებობას საკონსტიტუციო სასამართლოში ასაჩივრებს. „მოქმედი შრომის კოდექსი ბავშვის მოვლის გამო შვებულების უფლებას ანიჭებს დასაქმებულს, რაც ერთი შეხედვით ნეიტრალური ჩანაწერია, თუმცა, მოსარჩელე მხარე ასაბუთებს, რომ არსებული ჩანაწერისა და მასთან კავშირში მყოფი ნორმების ერთობლივი ანალიზით ნათელია, რომ შვებულების უფლების მქონე დასაქმებულში მოიაზრება მხოლოდ ქალი და დასახელებული შვებულების უფლებით ვერ სარგებლობენ ბავშვის ბიოლოგიური მამები", ნათქვამია ორგანიზაციის ვებ-გვერდზე. სრულად... წყარო: emc.org.ge

თბილისი. დევნილთა სამინისტრომ გენდერული თანასწორობის სტრატეგია და სამოქმედო გეგმა მიიღო. „მინისტრის პირველმა მოადგილემ გრიგოლ გიორგაძემ ისაუბრა გენდერული მეინსტრიმინგის განსახორციელებელი ახალი ინსტიტუციური მექანიზმის მხარდაჭერაზე და სამომავლო გეგმებზე. ხოლო, ნათია ხაინდრავამ, გენდერული თანასწორობის სპეციალისტმა სამინისტროში, წარმოადგინა გენდერული თანასწორობის სტრატეგია და სამოქმედო გეგმა", ნათქვამია გენდერული საინფორმაციო პორტალის ვებ-გვერდზე. სრულად... წყარო: ginsc.net

თბილისი. „ქალთა ფონდმა საქართველოში" გერმანულ ქალთა ფონდ „ფილიას" უმასპინძლა. „ფონდებმა, გერმანულ და ქართულ მხარეთა ერთობლივი ინიციატივაში, „გოგონები ერთად ცვლიან საზოგადოებას" ჩართულ გოგონებთან ერთად გორი და ქუთაისი მოინახულეს. ქ. გორში ჯგუფს ახალგაზრდა ფემინისტებმა უმასპინძლეს, რომლებიც ფილიას ფინანსური მხარდაჭერით, კიდევ ერთ საინტერესო პროექტს ახორციელებენ. სტუმრებმა ქ. ქუთაისში არსებული ფონდი სოხუმიც მოინახულეს. აქ ქართველ და გერმანელ გოგონებს საშუალება ჰქონდათ უკეთ გასცნობოდნენ ერთმანეთს და ფორუმ თეატრისთვის მომზადებულიყვნენ. ფორუმ თეატრის მთავარი იდეა მდგომარეობს იმაში, რომ მისი წევრები ირჩევენ თემებს, რაც ყველაზე მეტად აწუხებთ, შემდეგ კი დგამენ მცირე სცენებს და მაყურებელს უტოვებენ საშუალებას, იმსჯელოს ნანახი სიტუაციიდან გამოსავალზე", ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. ადამიანის უფლებებისა და მონიტორინგის ცენტრი (EMC) აქვეყნებს სალომე ლაცაბიძის თარგმანს კრისტინ დელფისა და დიანა ლეონარდის წიგნიდან: „ნაცნობი ექსპლუატაცია. ქორწინების ახლებური ანალიზი თანამედროვე დასავლურ საზოგადოებებში". „1970-80-იან წლებში ქალთა ჩაგვრის შესახებ მარქსისტულ-ფემინისტური მიდგომის ანალიზი მნიშვნელოვნად იცვლება. ავტორები ცდილობდნენ, ზუსტად განესაზღვრათ ის გზები, რომლითაც კაპიტალიზმი აყალიბებს ქალების ჩაგვრას როგორც ზოგადად საზოგადოების, ასევე კერძოდ, შრომის ბაზრის შიგნით. თუმცა, ასევე, შედარებით ვიწროდ განმარტავდნენ, თუ რატომ ინარჩუნებს კაპიტალიზმი ბირთვული ოჯახს და მასში ქალების ჩაგვრას. მიუხედავად იმისა, რომ ყველა ავტორი აღიარებდა ქალების ავტონომიური მოძრაობის საჭიროებას, მათი შეხედულებები განსხვავდებოდა იმის შესახებ, თუ რამდენად უწყვეტადაა ქალთა ჩაგვრა კაპიტალიზმთან გადაჯაჭვული ან რამდენად წარმოადგენს განცალკევებულ სისტემას, რომელიც გადახლართულია კაპიტალიზმთან; ამასთანავე, რამდენად ხედავდნენ ისინი პატრიარქატის მატერიალურ საფუძვლებს", ნათქვამია ორგანიზაციის ვებ-გვერდზე. სრული თარგმანი... წყარო: emc.org.ge

თბილისი. გენდერული საინფორმაციო პორტალი აქვეყნებს სალომე ბელქანიას ბლოგპოსტს: „გოგოების გადამრჩენელ სეხნიას". „ადამიანის უშუალობა რიცხვებში რომ იზომებოდეს, პირველი იქნებოდა. ხიდი რომ არსებობდეს გოგოებსა და დანარჩენ სამყაროს შორის, აი ის დამაკავშირებელი ხიდი იქნებოდა. ისეთი სასწორი რომ იდგას სადმე, რომელზეც ერთ მხარეს გადასარჩენი გოგოები დადგებოდნენ ხოლო მეორე მხარეს სალომე ბენიძის წიგნით გადარჩენილი გოგოები, ეს უკანასკნელი გადაწონიდა", ნათქვამია ბლოგპოსტში. სრულად... წყარო: ginsc.net

თბილისი. გენდერული საინფორმაციო პორტალი 2016 წლის მოწვევის პარლამენტში ქალთა პროცენტულ მაჩვენებელზე ინფოგრაფიკას აქვეყნებს. „მეორე ტურის შემდეგ, ბოლო მონაცემების მიხედვით, პარლამენტში 24 ქალი და 126 კაცი მოხვდა", ნათქვამია პორტალზე. სრულად... წყარო: ginsc.net