თბილისი. გენდერული საინფორმაციო პორტალის ინფორმაციის თანახმად, საზოგადოებრივი მაუწყებლის სამეურვეო საბჭოს წევრთა შესარჩევმა კომისიამ მეურვეობის მსურველი 14 კანდიდატიდან 12 შეარჩია და სია პარლამენტს გადაუგზავნა. „კანდიდატებმა კომისიის წინაშე საკუთარი პრეზენტაციები წარადგინეს და კომისიის წევრთა კითხვებს უპასუხეს. პროცედურის თანახმად, 12 კანდიდატიდან საბოლოოდ პარლამენტი მაუწყებლის ოთხ მეურვეს აირჩევს. სამეურვეო საბჭოში ოთხი ვაკანტური თანამდებობაა, საქართველოს კანონმდებლობით, საკონკურსო კომისიამ თითო ვაკანტურ თანამდებობაზე სამი პირი უნდა წარადგინოს”, ნათქვამია ვებგვერდზე. სრულად... წყარო: ginsc.net

თბილისი. საქართველოს ახალგაზრდა იურისტთა ასოციაცია საზოგადოებრივი მაუწყებლის სამეურვეო საბჭოს მიერ ზვიად რტიანთან დაკავშირებით მიღებულ გადაწყვეტილებას ეხმაურება. „2018 წლის 01 მარტს, საზოგადოებრივი მაუწყებლის სამეურვეო საბჭომ შეცვალა მანამდე გადაცემა ,,მოამბის” სიუჟეტში დაფიქსირებული პოზიცია და ზვიად რატიანის საჩივარი არ დააკმაყოფილა. საია მიიჩნევს, რომ წერილობითი გადაწყვეტილება ვერ აკმაყოფილებს გადაწყვეტილებისთვის საჭირო მინიმალურ სტანდარტსაც კი", - ნათქვამია ორგანიზაციის მიერ გავრცელებულ განცხადებაში. სრულად  წყარო: ორგანიზაციის ვებგვერდი

თბილისი. „სამართლიანი არჩევნებისა და დემოკრატიის საერთაშორისო საზოგადოება" (ISFED) აქვეყნებს ბლოგპოსტს: „პოლიტიკური რეკლამის ახალი წესები „ფეისბუქზე". „საქართველოს რეალობაში, გამჭვირვალობის კუთხით პრობლემას მხოლოდ ფარული ანტირეკლამა არ წარმოადგენს. საარჩევნო სუბიექტების მიერ აუდიტის სამსახურისთვის წარდგენილი დეკლარაციებიდან ჩანს, რომ დეტალურ დეკლარირებას ექვემდებარება მხოლოდ სატელევიზიო რეკლამის ხარჯი, ხოლო ყველა სხვა რეკლამის, მათ შორის - ბეჭდურ მედიაში, ფეისბუქზე თუ სხვა ონლაინ პლატფორმაზე განთავსების ხარჯი ჯამურად დეკლარირდება. შესაბამისად, ცნობილი არ არის რა ოდენობის ხარჯებს გასწევენ საარჩევნო სუბიექტები ონლაინ პლატფორმებზე, მათ შორის, საქართველოში ყველაზე მასშტაბურ სოციალურ ქსელ ფეისბუქზე", ნათქვამია ორგანიზაციის ვებგვერდზე. სრულად... წყარო: www.isfed.ge

აჭარა. დისკუსიათა ციკლი „მედია და საზოგადოება” გრძელდება. თავისუფალ ჟურნალისტთა სახლი, ამჯერად, ქედის მუნიციპალიტეტის სოფელ მერისს ეწვია. „დასაწყისში მედიის წარმომადგენლებმა მონაწილეებს გააცნეს მათი მიზნები და მუშაობის პრინციპები. შემდგომ ნაწილში კი მოსახლეობამ უშუალოდ ის საკითხები გამოკვეთა რაც აწუხებთ, მათ შორის იყო სწრაფი ჩარიცხვის აპარატების არარსებობა, ბაგა-ბაღის შენობის მძიმე პირობები, სოფლის მოსახლეობის დასაქმების პრობლემა და მისგან გამოწვეული მიგრაცია. მონაწილეებმა ფაროსანას მიერ გამოწვეულ ზარალზე და პრობლემებზეც ისაუბრეს. შეხვედრის ბოლოს ჟურნალისტებმა მერისის ბაგა-ბაღის შენობაც მოინახულეს, რომელზეც მოსახლეობამ დისკუსიის პროცესში ისაუბრა”, ნათქვამია ორგანიზაციის ვებგვერდზე. სრულად... წყარო: ორგანიზაციის ვებგვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია საზოგადოებრივი მაუწყებლის სამეურვეო საბჭოს წევრების შესარჩევ პროცესთან დაკავშირებით მედიაში გასულ ინფორმაციას ეხმაურება. „2018 წლის 04 მარტს რუსთავი 2-ის გადაცემაში ,,P.S.” გავიდა სიუჟეტი საზოგადოებრივი მაუწყებლის სამეურვეო საბჭოს კანდიდატების შერჩევის პროცესში არხის გენერალური დირექტორის ვასილ მაღლაფერიძისა და კომუნიკაციების ეროვნული კომისიის თავმჯდომარე კახი ბექაურის შესაძლო ჩართულობასთან დაკავშირებით", - ნათქვამია ორგანიზაციი მიე გავრცელებულ განცხადებაში, - „კომუნიკაციების ეროვნული კომისია მაუწყებლობის სფეროში საქმიანობის მარეგულირებელი ორგანოა. შესაბამისად, დაუშვებელია კომისიის თავმჯდომარის მხრიდან მის რეგულირებას დაქვემდებარებული სუბიექტის - საზოგადოებრივი მაუწყებლის ერთ-ერთი ხელმძღვანელი ორგანოს წევრთა შესარჩევ პროცესებში მონაწილეობა". სრულად  წყარო: ორგანიზაციის ვებგვერდი

თბილისი. საქართველოს ჟურნალისტური ეთიკის ქარტიის საბჭოს გადაწყვეტილებით „პრაიმ ტაიმის" ჟურნალისტმა ლილუ მიროტაძემ ქარტიის მეშვიდე (დისკრიმინაცია) და მერვე (ბავშვის ინტერესების დაცვა) პრინციპები დაარღვია. „მის წინააღმდეგ განცხადება ორგანიზაციამ „პარტნიორობა ადამიანის უფლებებისთვის" შემოიტანა. სადავო მასალა ეხებოდა 1 დეკემბერს ხორავას ქუჩაზე მოკლული არასრულწლოვანის ახლობლის Facebook სტატუსს", ნათქვამია ორგანიზაციის ვებგვერდზე. სრულად... წყარო: qartia.ge

თბილისი. საქართველოს ჟურნალისტური ეთიკის ქარტიის საბჭოს გადაწყვეტილებით საზოგადოებრივი მაუწყებლის ჟურნალისტებმა რატი ხვისტანმა და ლიკა ალელიშვილმა ქარტიის პირველი პრინციპი დაარღვიეს, რომელიც ჟურნალისტს ზუსტი ინფორმაციის გადაცემას ავალდებულებს. „მათ წინააღმდეგ განცხადება პროფკავშრების თავმჯდომარე ირაკლი პეტრიაშვილმა შემოიტანა. სადავო ორი სიუჟეტი ეხებოდა რკინიგზაში დასაქმებულთა აქციას და პროფკავშირების თავმჯდომარის არჩევას", ნათქვამია ორგანიზაციის ვებგვერდზე. სრულად... წყარო: qartia.ge

თბილისი. საქართველოს ჟურნალისტური ეთიკის ქარტიის საბჭოს გადაწყვეტილებით, „იმედის" მიერ მომზადებულ სიუჟეტში ქარტიის პირველი პრინციპი დაირღვა. „საინფორმაციო გამოშვება „ქრონიკაში" გასული სიუჟეტით ქარტიის პირველი პრინციპი, სიზუსტე დაირღვა. მასალას არ აქვს მითითებული ავტორი, ქარტიასთან არ ითანამშრომლა ტელეკომპანიამ, შესაბამისად ვერ მოხდა პასუხისმგებელი ჟურნალისტის იდენტიფიცირება", ნათქვამია ორგანიზაციის ვებგვერდზე. სრულად... წყარო: qartia.ge

თბილისი. საია-ს დახმარებით რადიო „ჰერეთმა" კომუნიკაციების მარეგულირებელ კომისიას სასამრთლო დავა მოუგო. თბილისის საქალაქო სასამართლომ ბათილად ცნო კომუნიკაციების ეროვნული კომისიის ის გადაწყვეტილება, რომლითაც ქ. ბათუმში რადიო სიხშირეზე გამოცხადებული კონკურსი ჩაშლილად გამოცხადდა. სრულად  წყარო: gyla.ge

თბილისი. საქართველოს ჟურნალისტური ეთიკის ქარტია სახელმძღვანელო წესებს აქვეყნებს პირადი ცხოვრების ხელშეუხებლობაზე. „ყველა ადამიანის პირადი ცხოვრების ხელშეუხებლობა დაცულია. ამიტომაც საქართველოს ჟურნალისტური ეთიკის ქარტიის მეათე პრინციპი ცალკე გამოყოფს მას - „ჟურნალისტმა პატივი უნდა სცეს ადამიანის პირად ცხოვრებას და არ შეიჭრას პირად ცხოვრებაში, თუ არ არსებობს განსაკუთრებული საზოგადოებრივი ინტერესი". პირადი ცხოვრების ქონის უფლება ყველას, მათ შორის საჯარო პირებსაც აძლევს შესაძლებლობას დაიცვას საკუთარი ცხოვრება სხვების არასასურველი ყურადღებისგან, არ გაასაჯაროვოს ისეთი დეტალები, რომელიც უკავშირდება მის ჯანმრთელობას, პირად ურთიერთობებს, და ა.შ. პირადი ცხოვრების ხელშეუხებლობის პრინციპი ფართო ცნებაა და არ გააჩნია ზუსტი განმარტება", ნათქვამია ორგანიზაციის ვებგვერდზე. სრულად... წყარო: qartia.ge

თბილისი. საქართველოს ახალგაზრდა იურისტთა ასოციაცია (საია) ზვიად რატიანის ინტერესებს საზოგადოებრივი მაუწყებლის თვითრეგულირების სააპელაციო სასამართლოში დაიცავს. „2018 წლის 7 თებერვალს, საზოგადოებრივი მაუწყებლის სამეურვეო საბჭოში გასაჩივრდა ამავე მაუწყებლის თვითრეგულირების ორგანოს მიერ ზვიად რატიანის საქმეზე მიღებული გადაწყვეტილება, რომელიც წინააღმდეგობაში მოდის „მაუწყებელთა ქცევის კოდექსით" დადგენილ მოთხოვნებთან", ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საქართველოს ჟურნალისტური ეთიკის ქარტიის საბჭო სამართალდამცავ უწყებებს მიმართავს და ჟურნალისტ ბუბა ჩივაძის მიმართ სოციალური ქსელით გავრცელებული ბრალდებისა და მუქარის შემცველი განცხადების შესწავლას ითხოვს. საინფორმაციო სააგენტო "ქუთაისი თუდეის" რედაქტორი, ბუბა ჩივაძე აცხადებს, რომ, მისთვის ჟურნალისტური საქმინობის ხელის შეშლის მიზნით, ანონიმური წყაროები სოციალურ მედიაში მცდარ და ცილისმწამებლურ ინფორმაციას ავრცელებენ, რაც, მისი აზრით, ზიანს აყენებს პირადად მას და მის მედიასაშუალებას. სრულად  წყარო: ორგანიზაიიც ვებგვერდი

თბილისი. 16 თებერვალს კოალიცია „მედიის ადვოკატირებისათვის", „საერთაშორისო გამჭვირვალობა საქართველოსა" და ფონდ „ღია საზოგადოება - საქართველოს" ორგანიზებით, მედიის უახლესი გამოწვევების შესახებ, მრგვალი მაგიდა ჩატარდა. შეხვედრას მედიისა და საექსპერტო წრეების, საქართველოს კომუნიკაციების მარეგულირებელი ეროვნული კომისიის, სახალხო დამცველის ოფისის, აშშ-ისა და ევროპის დიპლომატიური მისიების წარმომადგენლები ესწრებოდნენ. სრულად  წყარო: ორგანიზაციის ვებგვერდი

თბილისი. "საერთაშორისო გამჭვირვალობა-საქართველოს” მიერ ჩატარებული კვლევის თანახმად, დგინდება, რომ საზოგადოებრივი მაუწყებლის ახალი შენობის ასაშენებლად გამოყოფილი მიწის მესაკუთრე სახელმწიფოა და შესაბამისად, ახალი შენობის მესაკუთრეც სახელმწიფო იქნება. ამის შესახებ ორგანიზაციის ვებგვერდზე გამოქვეყნებული ინფორმაცია იუწყება. „სახელმწიფოსა და საზოგადოებრივი მაუწყებლის მენეჯმენტს შორის შემდგარი გარიგების საფუძველზე, მაუწყებელს მიწა "სარგებლობის უფლებით” უსასყიდლოდ გადაეცა, რაც სახელმწიფოს უტოვებს უფლებას საკუთარი შეხედულებისამებრ განკარგოს მის მფლობელობაში დარჩენილი აღნიშნული მიწისა და სამომავლოდ მასზე აშენებული შენობის ბედიც. საზოგადოებრივი მაუწყებლის მენეჯმენტის გადაწყვეტილებამ მნიშვნელოვანი დარტყმა მიაყენა მაუწყებლის დამოუკიდებლობის გარანტიებს, მიეცა რა სახელმწიფოს დამატებითი ბერკეტი სამომავლოდ ზეგავლენა მოახდინოს საზოგადოებრივი მაუწყებლის საქმიანობაზე", - ნათქვამია ინფორმაციაში. სრულად  წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაცია საზოგადობრივი მაუწყებლის წინააღმდეგ კომუნიკაციების ეროვნულ კომისიას მიმართავს. სსიპ საზოგადოებრივმა მაუწყებელმა უარი განაცხადა ეთერში განეთავსებინა საქართველოს ახალგაზრდა იურისტთა ასოციაციის მიერ მომზადებული სოციალური რეკლამა, რომელიც მიზნად ისახავს მოსახლეობის ინფორმირებას 1984 წელს მიღებული სამართალდარღვევათა კოდექსის ცვლილების საჭიროების თაობაზე. აღნიშნული ნორმატიული აქტი ვერ აკმაყოფილებს სამართლიანი პროცესის მოთხოვნებს და ყოველდღიურად იწვევს არაერთი პირის ფუნდამენტური უფლებების დარღვევას. საზოგადოებრივი მაუწყებელი ვალდებულია ეთერში განთავსების მიზნით დაინტერესებული პირების მიერ წარმოდგენილ სოციალურ რეკლამას უსასყიდლოდ და არადისკრიმინაციულად დაუთმოს 1 საათში ჯამში არანაკლებ 60 წამი", - ნათქვამია საია-ს განცხადებაში. სრულად  წყარო: ორგანიზაციის ვებგვერდი

თბილისი. „მითების დეტექტორი" ავრცელებს ინფორმაციას Heritage Foundation-ის საგაერო პოლიტიკის ცენტრის მიერ ჩატარებული კვლევის - "ნატოს წევრობა საქართველოსთვის: აშშ-ის და ევროპის ინტერესებში" - ირგვლივ გავრცელებული მოსაზრებების შესახებ. „მანიპულაციები, თითქოს დასავლეთი საქართველოს ნატოში გაწევრიანებას ოკუპირებული ტერიტორიების გარეშე სთავაზობს, არასწორია", - აცხადებს „მითების დეტექტორი", - „Heritage Foundation-ის კვლევაში არსად არაა აღნიშნული, რომ საქართველო ნატოში ოკუპირებული ტერიტორიების დათმობის ხარჯზე უნდა გაწევრიანდეს. კვლევის ავტორის ლუკ კოფის განმარტებით, მისი რეკომენდაცია გულისხმობს ნატოს წესდების მე-5 მუხლის დროებით არ გავრცელებას რუსეთის მიერ ოკუპირებული ცხინვალის რეგიონსა და აფხაზეთზე, მანამდე სანამ არ აღდგება საქართველოს ტერიტორიული მთლიანობა საერთაშორისოდ აღიარებულ საზღვრებში. ამასთან, Heritage Foundation დამოუკიდებელი კვლევითი ორგანიზაციაა და არ წარმოადგენს რომელიმე ქვეყნის ოფიციალურ პოზიციას". სრულად  წყარო: http://mythdetector.ge

აჭარა. 9 თებერვალს ბათუმის ახალგაზრდული ცენტრის წევრებისთვის ჩატარდა ტრენინგი თემაზე „სოციალური მედია", რომელსაც რადიო აჭარის ჟურნალისტი და ბლოგერი დათო ტრაპაიძე უძღვებოდა. შეხვედრის მიზანი იყო ონლაინ მედია-საშუალებების შესახებ მონაწილეთა ინფორმირება, აგრეთვე ბლოგის შექმნისა და მართვის სპეციფიკის გაცნობა. სრულად... წყარო: ორგანიზაციის ვებგვერდი სოციალურ ქსელში

თბილისი. არასამთავრობო ორგანიზაციები და საზოგადო მოღვაწეები საზოგადოებრივ მაუწყებელში კრიზისის დაძლევისთვის 6 პუნქტიანი გეგმის ჩანაწერს ავრცელებენ. „გამოვხატავთ უკიდურეს შეშფოთებას საზოგადოებრივი მაუწყებელში არსებული ღრმა ინსტიტუციური კრიზისის გამო. მაუწყებლის მიმართ საზოგადოების ნდობა კრიტიკულად დაბალ დონეზეა მაშინ, როცა მოქალაქეები ყოველწლიურად სულ უფრო მზარდ თანხას იხდიან სახელმწიფო ბიუჯეტიდან მის დაფინანსებაში. სამწუხაროდ, საზოგადოებრივი მაუწყებელი არ ემსახურება საზოგადოების ინტერესებს, ვერ ასრულებს კანონით დაკისრებულ როლსა და წარმოადგენს ვიწრო პარტიული ინტერესების გამტარებელ მედია ორგანიზაციას", ნათქვამია განცხადებაში. სრულად... წყარო: www.transparency.ge

თბილისი. რადიო "თავისუფლების" სათაო ოფისი 1 თებერვალს რადიოს მენეჯმენტისადმი გაგზავნილ სამოქალაქო საზოგადოების ორგანიზაციების ღია წერილს პასუხობს. წერილში ნათქვამია, რომ ქართულ სამსახურთან დაკავშირებული ცვლილებები ორგანიზაციის შინაარსის თანამედროვე მიდგომების დანერგვას უკავშირდება. წერილში ხაზგასმულია, რომ ის გადაცემები, რომელზეც სამოქალაქო ორგანიზაციები აკეთებდნენ აქცენტს, რადიოს ეთერში დარჩება. სრულად  წყარო: http://www.osgf.ge

თბილისი. კოალიცია „მედიის ადვოკატირებისთვის" მიმართავს საქართველოს პარლამენტს და საზოგადოებრივი მაუწყებლის სამეურვეო საბჭოს, მოახდინონ რეაგირება და ღიად დააფიქსირონ პოზიცია საზოგადოებრივი მაუწყებლის სამეურვეო საბჭოს წევრის, გიორგი იაკობაშვილის საჯარო განცხადებასთან დაკავშირებით. „გიორგი იაკობაშვილი სისტემატიურად აკეთებს არაეთიკურ, შეურაცხმყოფელ, უხამს განცხადებებს. ბოლო ასეთი განცხადება მან 3 თებერვალს გამოაქვეყნა, სადაც მან უხამსად მოიხსენია თვითრეგულირების დამოუკიდებელი ორგანო, საქართველოს ჟურნალისტური ეთიკის ქარტია, რომელიც 318 ჟურნალისტს აერთიანებს, მისი წევრი რეგიონული ჟურნალისტები, ზოგადად არასამთავრობო ორგანიზაციები", - ნათქვამია განცხადებაში. სრულად  წყარო: http://qartia.ge

თბილისი. საქართველოს ჟურნალისტური ეთიკის ქარტიის საბჭოს გადაწყვეტილებით ტელეკომპანია „რუსთავი 2-ის" ჟურნალისტმა თამთა დოლენჯაშვილმა ქარტიის პირველი პრინციპი დაარღვია, რომელიც ჟურნალისტს ზუსტი ინფორმაციის გადაცემას ავალდებულებს. „თამთა დოლენჯაშვილის წინააღმდეგ ქარტიაში განცხადება შეიტანა „საქართველოს სოციალურ მუშაკთა ასოციაციამ". მათი უკმაყოფილება გამოიწვია 14 იანვარს, საინფორმაციო გამოშვება „კურიერში" გასულმა სიუჟეტმა. მასალა ეხებოდა სოციალურად დაუცველთა ბაზაში მოქალაქეთა რეგისტრაციას, რომელსაც სოციალური აგენტი ახორციელებს. ჟურნალისტმა კი პასუხისმგებელ პირად მოიხსენია სოციალური მუშაკი. საბჭომ განხილვის შემდეგ პირველი პრინციპის დარღვევა დაადგინა. გადაწყვეტილების სამოტივაციო ნაწილი მოგვიანებით გამოქვეყნდება", ნათქვამია ქარტიის ვებგვერდზე. სრულად... წყარო: qartia.ge

თბილისი. საზოგადოებრივი ორგანიზაციები რადიო „თავისუფლების" მენეჯმენტს ღია წერილით მიმართავენ. წერილი რადიოს ქართული სამსახურის ირგვლივ განვითარებულ მოვლენებს ეხება. „ჩვენ, ქვემორე ხელისმომწერი სამოქალაქო საზოგადოების ორგანიზაციები, ყურადღებით ვადევნებთ თვალს ბოლო დროს რადიო თავისუფლების ქართული სამსახურის ირგვლივ განვითარებულ მოვლენებს. ქართული სამსახურის დირექტორის თანამდებობიდან დავით კაკაბაძის გათავისუფლებამ რადიო თავისუფლების ერთგულ აუდიტორიას კითხვები გაუჩინა. თბილისის ბიუროს ხელმძღვანელის მარინა ვაშაყმაძის მიერ თანამდებობის დატოვებამ კიდევ უფრო გაამწვავა წუხილი იმის თაობაზე, რომ მმართველ რგოლსა და ქართული სამსახურის თანამშრომლებს შორის კონფლიქტი უმნიშვნელო შიდა დავას სცდება და, შესაძლოა, უფრო ღრმა საფუძველი ჰქონდეს", - ვკითხულობთ წერილში. სრულად  წყარო: www.osgf.ge