თბილისი. ინფორმაციის თავისუფლების განვითარების ინსტიტუტი (IDFI) აქვეყნებს გზამკვლევს მშობლებისთვის - ბავშვების მიერ ინტერნეტის უსაფრთხოდ მოხმარება. „საბედნიეროდ, კომპიუტერული მოწყობილობებისა და ინტერნეტ პლატფორმების უმეტესობას ჩაშენებული აქვს ბავშვთა უსაფრთხოების ფუნქციები, რომლებიც ამცირებენ შეუსაბამო მასალასთან არასრულწლოვანი ბავშვების წვდომის რისკებს. IDFI-ის მშობელთა გზამკვლევი გთავაზობთ ამ ფუნქციების აღწერას ყველაზე პოპულარული მოწყობილობებისა (Windows 7 და 10, Android, iPhone, iPad) და პლატფორმებისთვის (Google, Youtube და Facebook)", ნათქვამია ორგანიზაციის ვებგვერდზე. სრულად... წყარო: idfi.ge

იმერეთი. ქუთაისის ახალგაზრდული ცენტრის წევრმა დავით ჟორჟოლიანმა სკოლის მოსწავლეებისთვის ჩაატარა მედია წიგნიერების ტრენინგი, რომლის მიზანი იყო ახალგაზრდების ცნობიერების ამაღლება სოციალური მედიის და ყალბი ინფორმაციის გავრცელების თავიდან აცილების საკითხებზე. ტრენინგზე განხილული იქნა შემდეგი საკითხები: სოციალური მედია და ყალბი ინფორმაციის გავრცელების გამოწვევები; როგორ გადავამოწმოთ ვებ-გვერდები, წყაროები, პიროვნებები, ტროლები; როგორ გადავამოწმოთ ყალბი ფოტოები. სრულად... წყარო: ორგანიზაციის ვებგვერდი სოციალურ ქსელში

თბილისი. საზოგადოებრივი ორგანიზაციები, აფგან მუხტარლის საქმესთან დაკავშირებით, მთავარ პროკურორთან შეხვედრას ითხოვენ. ამის შესახბე საუბარია განცხადებაში, რომელიც 13 ორგანიზაციის ხელმოწერით გავრცელდა. „ხელმომწერი ორგანიზაციები მივმართავთ საქართველოს მთავრობას, - გაასაჯაროვოს საქართველოში 2017 წლის 29 მაისს აზერბაიჯანელი ჟურნალისტის, აფგან მუხთარლის, სავარაუდო გატაცებასთან დაკავშირებით მიმდინარე გამოძიების დეტალები; საქართველოს პროკურატურას, - უზრუნველყოს აფგან მუხთარლის საქმეზე დამოუკიდებელი და ეფექტური გამოძიება; უზრუნველყოს გამოძიების შედეგებისა და მიმდინარეობის თაობაზე არასამთავრობო ორგანიზაციების წარმომადგენლების მთავარ პროკურორთან შეხვედრა; გამოძიება აწარმოოს სისხლის სამართლის კოდექსის 143-ე მუხლის მე-2, მე-3 და მე-4 ნაწილებით, რაც გულისხმობს თავისუფლების უკანონოდ აღკვეთას დამამძიბელ გარემოებებში, ასევე 154-ე მუხლით (ჟურნალისტისთვის პროფესიულ საქმიანობაში უკანონოდ ხელის შეშლა); მიანიჭოს დაზარალებულის სტატუსი აფგან მუხთარლის და მის მეუღლეს, ლეილა მუსტაფაიევას", - ნათქვამია განცხადებაში. სრულად  წყარო: emc.org.ge

თბილისი. არასამთავრობო ორგანიზაციები მიესალმებიან საქართველოს პრეზიდენტის გადაწყვეტილებას ვეტო დაადოს „მაუწყებლობის შესახებ" კანონში შესატან ცვლილებებს. „ცვლილებები სხვა საკითხებთან ერთად ითვალისწინებს საზოგადოებრივი მაუწყებელისთვის გაუმჭვირვალე შესყიდვების პროცედურებს, კომერციული რეკლამისა თუ სპონსორობის განთავსების დროის გაზრდას და სხვა პრობლემატურ საკითხებს. წარმოდგენილი კანონი მნიშვნელოვნად ზრდის საზოგადოებრივ მაუწყებელში გაუმჭვირვალობისა და კორუფციის რისკებს. ასევე, დააზარალებს კერძო მაუწყებლებს და ზოგადად ქართულ მედიაგარემოს. შესაბამისად, მოვუწოდებთ საქართველოს პარლამენტს, არ დაძლიოს პრეზიდენტის ვეტო და გაითვალისწინოს პრეზიდენტის, დარგობრივი ეკონომიკის კომიტეტის წევრების, კერძო მედიისა და სამოქალაქო საზოგადოების მიერ წარმოდგენილი დასაბუთებული არგუმენტები, რომლის საფუძველზეც კანონში ცვლილებები იმ ფორმით მიიღოს, რომ ზიანი არ მიადგეს მედიაგარემოს და შესაბამისობაში იყოს საზოგადოებრივი მაუწყებლის იდეასთან", ნათქვამია ორგანიზაციის ვებგვერდზე. სრულად... წყარო: gyla.ge

თბილისი. ადამიანის უფლებათ სახლი ავრცელებ ინფორმაციას იმის შესახებ, რომ აფგან მუხტარლის 6 წლით თავისუფლების აღკვეთა მიუსაჯეს. „ქალაქ ბელაქანის რაიონულ სასამართლოში აფგან მუხთარლის სასამართლო პროცესი დასრულდა. სასამართლო გადაწყვეტილებით, აფგანს 6 წლით თავისუფლების აღკვეთა მიესაჯა: საზღვრის უკანონო გადაკვეთის, კონტრაბანდისა და პოლიციელისთვის წინააღმდეგობის გაწევის ბრალდებებით. თბილისის ადამიანის უფლებათა სახლი უსამართლოდ მიიჩნევს აღნიშნულ გადაწყვეტილებას და განაგრძობს აფგანისა და მისი ოჯახის მხარდაჭერას", - ნათქვამია განცხადებაში. სრულად  წყარო: ორგანიზაციის გვერდი სოციალურ ქსელში

თბილისი. საქართველოს ჟურნალისტური ეთიკის ქარტიის საბჭოს გადაწყვეტილებით, ტელეკომპანია "იმედის" ჟურნალისტმა, სოფო ბერიძემ ქარტიის პირველი პრინციპი დაარღვია, რაც ზუსტი ინფორმაციის გავრცელებას გულისხმობს. სადაო მასალა 25 დეკემბერს გავიდა ეთერში და საქართველოს კათალიკოს პატრიარქის, ილია მეორის აღსაყდრებიდან 40 წლისთავს ეძღვნებოდა. ჟურნალისტმა ჩართვაში განაცხადა, რომ საზეიმო წირვას არ ესწრებოდა მიტროპოლიტი დიმიტრი. განმცხადებელი მიიჩნევდა, რომ სოფო ბერიძემ არაზუსტი ინფორმაცია გაავრცელა, რადგან მიტროპოლიტი დიმიტრი წირვას ესწრებოდა. სრულად  წყარო: ორგანიზაციის ვებგვერდი

თბილისი. არასამთავრობო ორგანიზაცია საზოგადოება და ბანკების მედია სკოლის მერვე ნაკადის მსმენელებს სერტიფიკატები გადაეცათ. „სასწავლო კურსი 2 თვის განმავლობაში გრძელდებოდა და მისი მიზანი ჟურნალისტებისთვის ფინანსური განათლების ამაღლება იყო”, ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. საქართველოს ჟურნალისტური ეთიკის ქარტიის საბჭოს გადაწყვეტილებით, საზოგადოებრივი მაუწყებლის ახალი და მიმდინარე ბლოკის დირექტორმა და ვებსაიტის რედაქტორმა ქარტიის პირველი და მეათე პრინციპები დაარღვიეს. პირველი პრინციპი ჟურნალისტს სიზუსტის დაცვას ავალდებულებს, მეათე პრინციპი კი ამბობს, რომ "ჟურნალისტმა პატივი უნდა სცეს ადამიანის პირად ცხოვრებას და არ შეიჭრას პირად ცხოვრებაში, თუ არ არსებობს განსაკუთრებული საზოგადოებრივი ინტერესი." სადავო მასალა ეხება პოეტ ზვიად რატიანის დაკავებას. საზოგადოებრივმა მაუწყებელმა 27 დეკემბერს გამოაქვეყნა შინაგან საქმეთა სამინისტროს მიერ მიწოდებული ვიდეო კადრები, სადაც არაფხიზელ მდგომარეობაში მყოფი ზვიად რატიანია ასახული. სრულად  წყარო: ორგანიზაციის ვებგვერდი

თბილისი. საქართველოს ჟურნალისტური ეთიკის ქარტიის სამდივნომ დასაშვებად სცნო მოქალაქეთა ჯგუფის განცხადება საზოგადოებრივი მაუწყებლის წინააღმდეგ. სადაო მასალა ეხება პოეტ ზვიად რატიანის დაკავებას. საზოგადოებრივმა მაუწყებელმა 27 დეკემბერს გამოაქვეყნა შინაგან საქმეთა სამინისტროს მიერ მიწოდებული ვიდეო კადრები, სადაც არაფხიზელ მდგომარეობაში მყოფი ზვიად რატიანია ასახული. განცხადების თანახმად, მაუწყებელმა ქარტიის პირველი (სიზუსტე) და მეათე( პირადი ცხოვრების ხელშეუხებლობა) პრინციპი დაარღვია. სრულად წყარო: ორგანიზაციის ვებგვერდი

თბილისი. საქართველოს ჟურნალისტური ეთიკის ქარტიის საბჭოს გადაწყვეტილებით, ტელეკომპანია "იბერიის" წამყვანს, არჩილ გამზარდიას ქარტიის პრინციპები არ დაურღვევია. მის წინააღმდეგ ქარტიას მომართა "ტრანსგენდერ ქალთა ცენტრმა", რომელიც მიიჩნევდა, რომ მეშვიდე პრინციპი (დისკრიმინაცია) იყო დარღვეული 27 ოქტომბერს გადაცემაში, რომელიც საქართველოს ნაკრების ვიცე-კაპიტნის, გურამ კაშიას მიერ ჰოლანდიის საფეხბურთო ჩემპიონატში ლგბტ პირთა ძალადობის საწინააღმდეგო კამპანიაში ჩართვას ეხება. სრულად  წყარო: ორგანიზაციის ვებგვერდი

თბილისი. საქართველოს ჟურნალისტური ეთიკის ქარტიის საბჭოს გადაწყვეტილებით, ტელეკომპანია "იბერიის" წამყვანმა, მაკა რაზმაძემ ქარტიის მეშვიდე პრინციპი დაარღვია. ამ პრინციპში საუბარია მედიის ვალდებულებაზე, თავიდან აიცილოს ნებისმიერი დისკრიმინაციის წახალისება. მაკა რაზმაძის წინააღმდეგ ქარტიას "ქალთა ინიციატივების მხარდამჭერი ჯგუფმა" (WISG) მიმართა. განცხადების თანახმად, 2017 წლის 1 ოტომბერს გადაცემა "პრიორიტეტში" რესპონდენტმა ჰომოფიბიური გამონათქვამი გამოიყენა, თუმცა, გადაცემის მხრიდან ამას სათანადო რეაგირება არ მოჰყოლია. სრულად  წყარო: ორგანიზაციის ვებგვერდი

თბილისი. „მედიის განვითარების ფონდმა" გამოაქვეყნა მედიის ფინანსური გამჭვირვალობის კვლევა, რომელშიც მედიის ფინანსური გარემო, მათ შორის ინფორმაციისა და რეკლამის გავრცელების მიზნით მედიაში საბიუჯეტო სახსრების განაწილების პრაქტიკაა შესწავლილი. კვლევა, ძირითადად, დოკუმენტების ანალიზს ეყრდნობა, რაც სახელმწიფო შესყიდვების სააგენტოსა და კომუნიკაციების მარეგულირებელი კომისიის ელექტრონულ მონაცემთა ბაზაში ხელმისაწვდომ დოკუმენტაციას, ასევე დამატებით საჯარო დაწესებულებებიდან გამოთხოვნილ მონაცემებს და ღია წყაროებით გავრცელებულ ცნობებს მოიცავს. სრულად  წყარო: ორგანიზაციის ვებგვერდი

თბილისი. საქართველოს სახალხო დამცველის ადამიანის უფლებათა აკადემიამ ჟურნალისტებისა და ჟურნალისტიკის ფაკულტეტის სტუდენტებისთვის გამართა სემინარი თემაზე - „მედიის როლი კონფლიქტების გენდერულ ჭრილში გაშუქებისა და მშვიდობის მშენებლობის პროცესში". სემინარი, რომელიც გაეროს ქალთა ორგანიზაციის (UN Women) ფინანსური მხარდაჭერით გაიმართა, მიზნად ისახავდა მედია სივრცეში ქალთა საკითხების ეთიკურ და გენდერულად მგრძნობიარე გაშუქებასთან დაკავშირებით ცნობიერების ამაღლებას, არსებული პრაქტიკის განხილვასა და საერთაშორისო გამოცდილების გაცნობას. სრულად  წყარო: ორგანიზაციის ვებგვერდი

თბილისი. „საერთაშორისო გამჭვირვალობა-საქართველო" საზოგადოებრივი მაუწყებლის მუშაობას აფასებს. „კვლევის მიზანია, ახალი მენეჯმენტის პირობებში მაუწყებელში მიმდინარე პროცესების შესწავლა და არსებული გამოწვევების დადგენა", ნათქვამია ორგანიზაციის ვებგვერდზე. სრულად... წყარო: www.transparency.ge

თბილისი. საერთაშორისო გამჭვირვალობა - საქართველო აქვეყნებს საზოგადოებრივი მაუწყებლის აჭარის ტელევიზიის და რადიოს მუშაობის შეფასებას. „ნათია კაპანაძის სახელთან, რომელიც გასული წლის დეკემბერში აირჩიეს აჭარის ტელევიზიის და რადიოს დირექტორად, ასოცირდება მაუწყებელში გარკვეული რეფორმების ინიცირება, კერძოდ, შემუშავდა ორგანიზაციის განვითარებისთვის საჭირო მთელი რიგი დოკუმენტაცია, განახლდა ძველი და დაიწყო ახალი გადაცემები, უფრო გამჭვირვალე გახდა თანამშრომელთა დასაქმების პროცესი. ორგანიზაცია არის გახსნილი მოქალაქეებისა და დაინტერესებული პირებისთვის, თუმცა აჭარის ტელევიზია და რადიო კვლავ არაერთი გამოწვევის წინაშე დგას", ნათქვამია ორგანიზაციის ვებგვერდზე. სრულად... წყარო: www.transparency.ge

აჭარა. ბათუმში, საქართველოს ევროპული და ევროატლანტიკური ინტეგრაციის თემებზე დასავლეთ საქართველოში მომუშავე ჟურნალისტებისთვის ორდღიანი ტრენინგი ჩატარდა. „შეხვედრაზე საინფორმაციო ცენტრის საქმიანობა, მიმდინარე პროექტები, ანტიდასავლური პროპაგანდის თავისებურებები და ევროინტეგრაციის პროცესში რეგიონული მედიის როლზე ისაუბრეს. ყურადღება გამახვილდა საინფორმაციო ცენტრის რეგიონული ქსელის გაფართოებასა და სამომავლო გეგმებზე. ტრენინგზე, ასევე, განიხილეს ნატო, შავი ზღვის უსაფრთხოება, საქართველოს საგარეო კურსის ევროპეიზაცია, ევროინტეგრაციის პროცესი და სხვა", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. კოალიცია მედიის ადვოკატირებისათვის მიესალმება პარლამენტის დარგობრივი ეკონომიკისა და ეკონომიკური პოლიტიკის კომიტეტის გადაწყვეტილებას, რომელმაც მხარი არ დაუჭირა კანონპროექტს „მაუწყებლობის შესახებ" კანონში ცვლილებების შეტანის თაობაზე. „მოვუწოდებთ, პარლამენტის წევრებს, მხარი არ დაუჭირონ საკანონმდებლო ცვლილებების არსებული რედაქციას. გულისყურით მოეკიდნონ წამყვანი კომიტეტის დასაბუთებულ პოზიციას, გაიზიარონ ის მნიშვნელოვანი შენიშვნები რაც არსებობს კანონპროექტთან დაკავშირებით, როგორც პარლამენტის შესაბამისი კომიტეტის, ისე არასამთავრობო ორგანზიაციების მნიშვნელოვანი ნაწილისა და კერძო მედია ორგანიზაციების მხრიდან", ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საქართველოს ჟურნალისტური ეთიკის ქარტიის საბჭოს გადაწყვეტილებით, ტელეკომპანიების - "იმედის", "რუსთავი 2-ისა" და "ობიექტივის", აგრეთვე, ონლაინ-გამოცემა „qiziyi.ge"-ს ჟურნალისტებმა დაარღვიეს ქარტიის მე-8 პრინციპი, რომელიც მედიას ბავშვის ინტერესების დაცვას ავალდებულებს. საქმე ეხება 1 დეკემბერს თბილისში, ხორავას ქუჩაზე მოზარდების მკვლელობას, რომელშიც ბრალდებულები არასრულწლოვნები არიან. 4 დეკემბერს ერთ-ერთი მათგანი სამართალდამცავებს ჩაბარდა. აღნიშნულმა მედიასაშუალებებმა ამ თემაზე მომზადებულ მასალებში ბრალდებულის იდენტიფიცირება მოახდინეს. სრულად წყარო: ორგანიზაციის ვებგვერდი

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) აქვეყნებს ვიქტორია ძანელატის ბლოგპოსტს: „დეზინფორმაციასთან გამკლავება წინასაარჩევნოდ - არის თუ არა ონლაინ რეგულირება შესაძლო გამოსავალი?" „ონლაინ პლატფორმებს ნამდვილად აქვთ გავლენა საზოგადოებრივ ცხოვრებაზე, ისევე, როგორც ციფრული დეზინფორმაცია ზემოქმედებს საზოგადოებრივ დისკურსზე. მიუხედავად იმისა, რომ აუცილებელია წახალისდეს დეზინფორმაციასთან ბრძოლის ნებაყოფლობითი ზომები, როგორიცაა ინფორმაციის გადამოწმების ინიციატივები და ონლაინ პლატფორმებზე რეკლამის გამჭვირვალობის გაზრდა, მხოლოდ ეს არ არის საკმარისი. შესაძლოა, რიგ შემთხვევებში, სახელმწიფოს მიერ საკანონმდებლო რეგულირება საზოგადო ინტერესის დაცვისთვის გამართლებული იყოს და გერმანიის მთავრობამ სწორედ რეგულირების გზა აირჩია. თუმცა, რა საბოლოო შედეგს გამოიღებს ეს კანონი და მივიღებთ უფრო უსაფრთხო, სანდო ინტერნეტს თუ ცენზურას, მხოლოდ დრო გვიჩვენებს", ნათქვამია ბლოგპოსტში. სრულად... წყარო: www.isfed.ge

თბილისი. 2017 წლის კონკურსის – „ევროკავშირის პრიზი ჟურნალისტიკაში" გამარჯვებულები გამოვლინდნენ. კონკურსს ახორციელებს საქართველოში ევროკავშირის წარმომადგენლობა და ევროკავშირის სადამკვირვებლო მისია ერთობლივი თანამშრომლობით. „2012 წელს დაარსებული „ევროკავშირის პრიზი ჟურნალისტიკაში" პროფესიული და ეთიკური ჟურნალისტიკის მხარდაჭერას ისახავს მიზნად. ყოველწლიურად, პრიზები გაიცემა ბეჭდურ, სამაუწყებლო, ონლაინ და ფოტო ჟურნალისტიკაში. დამატებით, ევროკავშირის სადამკვირვებლო მისია გასცემს სპეციალურ პრიზს მშვიდობის ჟურნალისტიკაში მაღალი პროფესიული სტანდარტების და ეთიკური ჟურნალისტური ნაშრომისთვის, რომელიც ნდობის აღდგენასა და გრძელვადიანი მშვიდობის დამკვიდრებას უწყობს ხელს", ნათქვამია ორგანიზაციის ვებგვერდზე. სრულად... წყარო: www.media.ge

თბილისი. „კოალიცია მედიის ადვოკატირებისთვის” მოუწოდებს საქართველოს ხელისუფლებას, საგარეო საქმეთა სამინისტროს, მოახდინონ სწრაფი და ეფექტიანი რეაგირება უკრაინაში შეშვებაზე საქართველოს საზოგადოებრივი მაუწყებლის, ტელეკომპანია ,,პირველის” და ,,რუსთავი 2”-ის გადამღები ჯგუფებისთვის უარის თქმის გამო. „კოალიცია მიიჩნევს, რომ მნიშვნელოვანია პარტნიორი ქვეყნის ხელისუფლება პასუხისგმებლობით ეკიდებოდეს საზოგადოების ინტერესს - მიიღონ ინფორმაცია უშუალოდ მოვლენათა ეპიცენტრიდან და დაუშვებელია ამ მიზნის მიღწევაში რომელიმე მედიასაშუალებას მუშაობა შეეზღუდოს" - ნათქვამია კოალიციის განცხადებაში. სრულად  წყარო: http://qartia.ge

თბილისი. საქართველოს ჟურნალისტური ეთიკის ქარტიის წარმომადგენლები, UNICEF Georgia-ს მხარდაჭერით, განხორციელებული პროექტის ფარგლებში, სსიპ - ქალაქ თბილისის N150 საჯარო სკოლას ეწვივნენ. შეხვედრისას გაიმართა საუბარი თემაზე - მედია და მანიპულაცია. მოსწავლეები გაეცნენ, თუ როგორ ვრცელდება ყალბი ამბები, ფოტო თუ ვიდეო მასალები; იმსჯელეს თუ რამდენად მნიშვნელოვანია ინფორმაციის კრიტიკულად მიღება და როგორ შეიძლება მისი გადამოწმება. სრულად წყარო: ორგანიზაციის ვებგვერდი