თბილისი. ინფორმაციის თავისუფლების განვითარების ინსტიტუტმა (IDFI), ადამიანის უფლებების სწავლებისა და მონიტორინგის ცენტრმა (EMC) და კავკასიის კვლევითი რესურსების ცენტრმა (CRRC), დღეს, ევროკავშირის მხარდაჭერით წარმართული „სასამართლო რეფორმის განხორციელების მხარდაჭერის (FAIR)“ პროექტის დახურვის ღონისძიება გამართეს.  შემაჯამებელ ღონისძიებაზე წარმოდგენილი იყო პროექტის ფარგლებში შექმნილი სამი უახლესი კვლევა, რომელიც აფასებს სასამართლო სისტემის სამოქმედო გეგმის შესრულების მდგომარეობას, საქმეთა ელექტრონული განაწილების სისტემის ფუნქციონირებასა და სასამართლოს ხელმისაწვდომობას.  სრულად  წყარო: ორგანიზაციის ვებგვერდი

თბილისი. ეკონომიკური პოლიტიკის კვლევის ცენტრი აქვეყნებს პოლიტიკის დოკუმენტს - „COVID-19-ის ეპოქა და საინვესტიციო პერსპექტივები”. დოკუმენტი მოზადდა ეკონომიკური დისკუსიის პლატფორმა, KAS EPRC ეკონომიკური არენას ფარგლებში, რომელიც კონრად ადენაუერის ფონდმა (KAS) და ეკონომიკური პოლიტიკის კვლევის ცენტრმა (EPRC) 2019 წელს დააფუძნეს.  პლატფორმა ხელისუფლებას და საზოგადოებას სთავაზობს ანალიტიკურ დოკუმენტებს, რომელიც დაინტერესებულ მხარეებს შესაძლებლობას აძლევს შეაფასონ ინიცირებული და, ზოგ შემთხვევაში, უკვე მიღებული გადაწყვეტილებების კონკრეტული შედეგები და ეფექტი.  სრულად   წყარო: გვერდი სოციალურ ქსელში

თბილისი. საბჭოთა წარსულის კვლევის ლაბორატორია საქართველოს მთავრობას განცხადებით მიმართავს. „უკვე 4 თვეზე მეტია, კორონავირუსის პანდემიის გამოცხადებისა და შესაბამისი ზომების - კარანტინისა და საზოგადოებრივ სივრცეებში მასობრივი თავშეყრის შეზღუდვის შემოღების გამო მოქალაქეთა მიღება და მომსახურეობა შეჩერებული აქვს სახელმწიფო არქივებსა და პარლამენტის ეროვნულ ბიბლიოთეკას. თითქმის 1 თვეა, რაც საჯარო და კერძო დაწესებულებების უმრავლესობამ განაახლა მოქალაქეთა მომსახურეობა, ვირუსისაგან დაცვის შესაბამისი ზომების გათვალისწინებით. სამწუხაროდ, სახელმწიფო არქივები და პარლამენტის ბიბლიოთეკა კვლავ დახურულია. არ მოიპოვება ინფორმაცია თუ როდიდან იგეგმება მათი მუშაობის განახლება. პანდემიისაგან შექმნილი საფრთხის გათვალისწინებით, მკვლევართა და მკითხველთა საზოგადოება ამ თვეების განმავლობაში ადეკვატურად აფასებდა არსებულ შეზღუდვებს, რომლებმაც მრავალი დაბრკოლება შეგვექმნა კვლევის პროცესში. დღეისათვის, შექმნილი სიტუაციიდან გამომდინარე მოვითხოვთ, ამ დაწესებულებებმა მაქსიმალურად სწრაფად განაახლონ მკვლევართა და მკითხველთა მიღება, შესაბამისი უსაფრთხოების ზომების გათვალისწინებით“, ნათქვამია მიმართვაში. სრულად... წყარო: sovlab.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს სტატიას: 5G ტექნოლოგია, რუსული დეზინფორმაცია და კორონავირუსი. სტატიაში საუბარია 5G ტექნოლიგიასთან დაკავშირებული კონსპირაციის თეორიებზე მთელი მსოფლიოს მასშტაბით, მათ შორის საქართველოშიც. ამ ტექნოლოგიას ადამიანების არცთუ მცირე ნაწილი სიცოცხლისთვის საფრთხისშემცველად მიიჩნევს და პანდემიის პერიოდში, კოვიდ 19-ის გავრცელებასთანაც დააკავშირეს. საქართველოში სოციალურ ქსელში ამ ტექნოლოგიის საწინააღმდეგო ორი ჯგუფია შექმნილი და მანიფესტიც კი არსებობს, ახალი თაობის უსადენო ინტერნეტის დანერგვის აკრძალვასთან დაკავშირებით. „სინამდვილეში 5G წარმოადგენს უსადენო კავშირის ტექნოლოგიის მე-5 თაობას, რომელსაც სმარტფონები და სხვა მობილური მოწყობილობები ინტერნეტ კავშირისთვის იყენებენ. როგორც 4G LTE და 3G ქსელები, 5G-ც რადიოტალღების საშუალებით ვრცელდება, რომლებიც ადამიანისთვის უსაფრთხო ელექტრომაგნიტურ სპექტრს არ აღემატება“, ნათქვამია სტატიაში. სრულად... წყარო: idfi.ge

თბილისი. 25 თებერვალს, საქართველოს მწერალთა სახლში წიგნის, "ჩემი თავგადასავალი და ზოგიერთნი მოგონებანი", პრეზენტაცია გაიმართა. „საბჭოთა წარსულის კვლევის ლაბორატორიამ" 1921 წლი¬დან ბერლინში პოლიტიკურ ემიგრაციაში მცხოვრები ქალის, ქრისტინე (ბადუ) თოდუა-წულუკიძის მოგონებები წარმოადგინა. იგი თავის სოციალ-დემოკრატ მეუღლეს, მიხეილ წულუკიძეს გაჰყვა ემიგრაციაში და დასახლდა ბერ¬ლინში, სადაც ქრისტინემ უმაღლესი სამედიცინო განათლების მიღება და წარმატებული საექიმო პრაქტიკის მოწყობა შეძლო. მოგონებებში ის სწორედ თავისი ურთულესი ცხოვრებისეული გზის შესახებ მოგვითხრობს. სრულად...  წყარო: http://sovlab.ge

თბილისი. 21-23 დეკემბერს საბჭოთა წარსულის კვლევის ლაბორატორიის ორგანიზებით, ილიას სახელმწიფო უნივერსიტეტში ჩატარდა კომბინირებული, საბაზისო კურსი დამწყები მკვლევრებისათვის - „საარქივო კვლევა XX საუკუნის ისტორიის გააზრებისათვის“. „ლექცია საბჭოთა წარსულის კვლევის ლაბორატორიის მკვლევარმა, ისტორიკოსმა, ირაკლი ხვადაგიანმა წაიკითხა. კურსი წარმოადგენს არაფორმალურ, შემჭიდროვებულ, პრაქტიკაზე ორიენტირებულ 2 სალექციო შეხვედრას, რომლის მიზანია მაქსიმალურად შეუწყოს ხელი დაინტერესებულ მსმენელებს, მიიღონ ხელშესახები ცოდნა საარქივო კვლევის საბაზისო პრინციპების შესახებ. კურსის მიზანია დაეხმაროს მონაწილეს გახდეს ინფორმირებული დამწყები მკვლევარი“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. შოთა რუსთაველის ფონდი, მაგისტრანტთა სასწავლო-კვლევითი პროექტების დასაფინანსებლად, მიმდინარე წლის სექტემბერში ინდივიდუალურ სასწავლო-კვლევით გრანტებს გასცემს. კონკურსის მიზანია მაგისტრატურის აკრედიტებულ საგანმანათლებლო პროგრამაზე ჩარიცხული მაგისტრანტების სამაგისტრო ნაშრომის ფარგლებში სამეცნიერო კვლევების ხარისხის გაზრდის, აკადემიური დონის ამაღლებისა და კვლევითი უნარ-ჩვევების განვითარების ხელშეწყობა, ასევე, საქართველოს უმაღლესი საგანმანათლებლო დაწესებულების სამეცნიერო-კვლევითი პოტენციალის გაუმჯობესების, სწავლის პროცესში კვლევის ინტეგრაციისა და თემატური და/ან ინტერდისციპლინური მიმართულებით კვლევითი აქტივობის განვითარების ხელშეწყობა. სრულად  წყარო: ფონდის ვებგვერდი

თბილისი. 13 ივლისს, საქართველოს ახალგაზრდა იურისტთა ასოციაციამ (საია) გამართა კვლევის „ბავშვის მიმართ ძალადობა" პრეზენტაცია.  „კვლევაში აღწერილია საქართველოში ბავშვთა მიმართ ძალადობის ფორმები სფეროების მიხედვით: ოჯახი, სკოლა, საზოგადოება და მედიასივრცე და  ქვეყანაში ბავშვის მიმართ ძალადობის გამომწვევი მიზეზები. კვლევა, ასევე, მოიცავს სახელმწიფოსთვის განკუთვნილ რეკომენდაციებს", ნათქვამია ორგანიზაციის ვებგვერდზე. სრულად...  წყარო: gyla.ge

ოზურგეთი. 22 ივნისს, ბავშვის უფლებათა დღისადმი მიძღვნილი კვირეულის ფარგლებში კიდევ ერთი საჯარო ლექცია ჩატარდა. ბავშვის ძალადობასთან დაკავშირებული ნაწარმოებების „პერსეპოლისი" და „ურჩხული გიხმობს" განხილვა ლიტერატორმა, აღნიშნული წიგნების მთარგმნელმა მიხეილ ციხელაშვილმა ჩაატარა. „ყურადღება გამახვილდა ძალადობისა და ჩაგვრის ფორმებზე, ასევე იმ საკითხზე თუ რა როლი აქვს ბავშვის განვითარებაში კულტურას, რელიგიას და იმ ღირებულებებს, რომელშიც ბავშვს უწევს ჩამოყალიბება. მნიშვნელოვანია მოზარდებს მიეცეთ აზრის გამოხატვის შესაძლებლობა, თუნდაც ეს აზრი არასწორი იყოს, რადგან დისკუსიაში, მსჯელობაში უნდა დაიბადოს ჭეშმარიტება", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. „ინფორმაციის თავისუფლების განვითარების ინსტიტუტი" და საქართველოს ახალგაზრდა იურისტთა ასოციაცია „საჯარო დაწესებულებაში შრომის ანაზღაურების შესახებ" საქართველოს კანონისა და თანდართულ კანონებში (მათ შორის, „საჯარო სამსახურის შესახებ" საქართველოს კანონი) შესატანი ცვლილებების პროექტს სპეციალური განცხადებით ეხმაურებიან. „საჯარო სამსახურის შესახებ" საქართველოს კანონის პროექტში წარმოდგენილი ცვლილებებით, საჯარო სამსახურში პირის შრომითი ხელშეკრულებით მისაღებად გამარტივებული საჯარო კონკურსის ჩატარების ვალდებულება უქმდება", - თაქვამია განცხადებაში, - „მიგვაჩნია, რომ ეს გაზრდის საჯარო სამსახურის სისტემაში გაუმჭვირვალე და ერთპიროვნული გადაწყვეტილებების, ასევე ნეპოტიზმისა რისკს, რაც თავის მხრივ ეწინააღმდეგება საჯარო სამსახურის რეფორმისა და „საჯარო სამსახურის შესახებ" საქართველოს ახალი კანონის მიზნებს. გარდა ამისა, წარმოდგენილი ცვლილება საჯარო დაწესებულებებს ანიჭებს ფართო დისკრეციულ უფლებამოსილებას მიიღოს გადაწყვეტილება პირის შრომითი ხელშეკრულებით დასაქმებისათვის გამარტივებული საჯარო კონკურსის ჩატარების თაობაზე, ასევე მოქალაქეებს არ ექნებათ შესაძლებლობა მიიღონ მასში მონაწილეობა". სრულად  წყარო: idfi.ge

თბილისი. აღმოსავლეთ პარტნიორობის სამოქალაქო საზოგადოების ფორუმის საქართველოს ეროვნული პლატფორმის წევრი ორგანიზაციები განცხადებას ავრცელებენ აზერბაიჯანელი ჟურნალისტის აფგან მუხთარლის საქმეზე. „საქართველოს ეროვნული პლატფორმის წევრი ორგანიზაციები მივიჩნევთ, რომ გამოძიებას ჰქონდა საკმარისი დრო საქმის ობიექტური და დეტალური გამოძიებისთვის, თუმცა პროცესი ცალსახად ფერხდება, რაც ლახავს ქვეყნის იმიჯს საერთაშორისო საზოგადოების წინაშე და კითხვის ნიშნის ქვეშ აყენებს ადამიანის უფლებებისა და უსაფრთხოების დაცვას საქართველოში, რაც თავის მხრივ, მნიშვნელოვან გამოწვევას წარმოადგენს ქვეყნის პლურალისტური, დემოკრატიული, ღირსეული განვითარების გზაზე. ყოველივე აღნიშნულიდან გამომდინარე, ხელმომწერი ორგანიზაციები მოვითხოვთ ობიექტურად იქნას გამოძიებული აფგან მუხთარლის საქმე და დაისაჯოს დამნაშვეები. ასევე მოვითხოვთ, დაუყოვნებლივ მოხდეს საზოგადოების დეტალური ინფორმირება გამოძიების მიმდინარეობის შესახებ, რათა პასუხი გაეცეს საზოგადოებაში არსებულ ყველა კითხვას. ამასთანავე, მივმართავთ ადამიანის უფლებათა დაცვისა და სამოქალაქო ინტეგრაციის კომიტეტს უზრუნველყოს ჟურნალისტის საქმის მოსმენა, ხოლო საქართველოს პარლამენტმა შეასრულოს მასზე დაკისრებული საჯარო ფუნქცია და მაღალი საზოგადოებრივი ინტერესის გათვალისწინებით, შექმნას დროებითი საპარლამენტო საგამოძიებო კომისია", ნათქვამია განცხადებაში. სრულად... წყარო: qartia.org.ge

თბილისი. შოთა რუსთაველის ეროვნული სამეცნიერო ფონდი აანონსებს ინფორმაციას CNRS - PICS-ის კონკურსის თაობაზე. შოთა რუსთაველის ეროვნული სამეცნიერო ფონდის პარტნიორი ორგანიზაცია, საფრანგეთის სამეცნიერო კვლევების ეროვნულმა ცენტრი (CNRS) პროგრამის „საერთაშორისო სამეცნიერო თანამშრომლობის პროექტი" (The International Scientific Cooperation Project - PICS) ფარგლებში აპრილის თვეში, გამოაცხადებს კონკურსს, რომელშიც ერთობლივი საპროექტო განაცხადის წარმოდგენა უნდა მოხდეს მეცნიერთა ორი ჯგუფის მიერ. კონკურსში მონაწილეობის მიღება შეუძლიათ ქართველ მეცნიერებს, რომელთაც აქვთ ფრანგ კოლეგებთან თანამშრომლობის გამოცდილება და აქვთ ერთობლივი სამეცნიერო პუბლიკაცია(ები). სრულად.. წყარო: rustaveli.org.ge

თბილისი. კავკასიის კვლევითი რესურსების ცენტრი (CRRC) მორიგ ბლოგპოსტს აქვეყნებს. „საზოგადოების დამოკიდებულება კონფლიქტებისადმი სამხრეთ კავკასიაში" ბლოგის მიზანია „ენახა, თუ როგორ იცვლება სამხრეთ კავკასიის ქვეყნების მოსახლეობის მოსაზრებები რეგიონში არსებულ კონფლიქტებთან დაკავშირებით. საერთო ჯამში, თუკი აფხაზეთის მომავალ სტატუსთან დაკავშირებით ქართველებს და აზერბაიჯანელებს მსგავსი მოსაზრებები აქვთ, სომხეთის მოქალაქეთა მოსაზრებები მნიშვნელოვნად განსხვავებულია. რაც შეეხება დამოკიდებულებას მთიანი ყარაბაღის მიმართ, აზერბაიჯანის მოსახლეობის დამოკიდებულებები უფრო მძაფრია სომხეთის მოსახლეობის დამოკიდებულებებთან შედარებით, საქართველოს მოქალაქეები კი ან თავს არიდებენ მოსაზრების გამოთქმას, ან ამ საკითხთან დაკავშირებით მოსაზრება არ გააჩნიათ", ნათქვამია ორგანიზაციის ვებ-გვერდზე. სრულად... წყარო: blog.crrc.ge

თბილისი. საქართველოს ტექნიკურ უნივერსიტეტში, საქართველოს ვიცე პრემიერი/ენერგეტიკის მინისტრმა კახა კალაძემ გახსნა კონფერენცია: „ახალგაზრდების მონაწილეობა ელექტროენერგიით ვაჭრობის მექანიზმის შემუშავების პროცესში". ტექნიკური უნივერსიტეტის დოქტორანტურის სტუდენტები და USAID G4G-ის ახალგაზრდა ექსპერტები წარმოადგენენ პრეზენტაციებს ელექტროენერგიით ვაჭრობის მექანიზმის თემაზე. კონფერენციას დაესწრებიან ენერგეტიკის სფეროს წამყვანი ორგანიზაციები, ენერგეტიკული და საინჟინრო ფაკულტეტების სტუდენტები და პროფესორ-მასწავლებლები. სრულად... წყარო: ორგანიზაციის ვებ-გვერდი სოციალურ ქსელში

თბილისი. „ივანე ჯავახიშვილის ნაკვალევზე", ასე ჰქვია პროექტს, რომელსაც სოფლის სოციოლოგიური კლუბი ამჟამად მუშაობს. პროექტის მიზანია ჩაატაროს ივანე ჯავახიშვილის მიერ 1910 წელს ჩატარებული სოციოლოგიური კვლევის განმეორებითი კვლევა და გაანალიზოს საუკუნის განმავლობაში სოფელში მომხდარი ცვლილებები. სოფლის სოციოლოგიური კლუბი ახალგაზრდა სოციოლოგთა გაერთიანებაა, რომელიც თსუ–ს სოციალურ და პოლიტიკურ მეცნიერებათა ფაკულტეტის ბაზაზე ჩამოყალიბდა. კლუბი ეძებს მოხალისეებს სოფლის პრობლემებით დაინტერესებულ ახალგაზრდა სოციოლოგებსა და ჟურნალისტებს, რომლებიც ჩაერთვებიან პროექტის განხორციელებაში. სრულად... წყარო: სოფლის სოციოლოგთა კლუბი

თბილისი. 4 ნოემბერს, სამეცნიერო-კვლევითი პროექტის „შარეულას ხეობის სამეცნიერო კვლევის" პრეზენტაცია და ფოტოგამოფენა გაიმართა. პროექტი ილიას უნივერსიტეტის სტუდენტთა სამეცნიერო წრის, არასამთავრობო ორგანიზაცია ,,განედი 42’’-ის ორგანიზებით და სპორტისა და ახალგაზრდობის საქმეთა სამინისტროს ბავშვთა და ახალგაზრდობის განვითარების ფონდის მხარდაჭერით განხორციელდა. პროექტის მთავარი მიზანი იყო რაჭაში, კერძოდ, შარეულას ხეობაში გრძელვადიანი ექსპედიციის ჩატარება და ხეობის ტურისტული მარშრუტისა და რუკების მომზადება. კვლევისა და ექსპედიციის შედეგად მომზადდა სპეციალური პაკეტი ტურიზმის ეროვნული სააგენტოსა და გარემოს დაცვის სამინისტროსთვის. ღონისძიებას ბავშვთა და ახალგაზრდობის განვითარების ფონდის დირექტორი ირაკლი ჟორჟოლიანი დაესწრო. წყარო:ბავშვთა და ახალგაზრდობის ფონდის გვერდი სოციალურ ქსელში

თბილისი.ინფორმაციის თავისუფლების განვითარების ინსტიტუტმა კვლევა – „საჯარო მოსამსახურეთა ანაზღაურების სისტემები: ევროკავშირის წევრი სახელმწიფოები და საქართველო" – გამოაქვეყნა. „საჯარო მოსამსახურეთა ანაზღაურების ეფექტური სისტემის შექმნა მნიშვნელოვანი წინაპირობაა გამჭვირვალე და ანგარიშვალდებული საჯარო სამსახურის ჩამოყალიბებისა და საჯარო მოსამსახურეთა ფინანსური გარანტიების უზრუნველყოფის პროცესში, რაც მოითხოვს სახელმწიფო ხელისუფლების მიერ საჯარო მოსამსახურეთა ანაზღაურების ერთიანი სახელმწიფო პოლიტიკის შემუშავებას, აღნიშნული საკითხის კანონმდებლობით დეტალურ მოწესრიგებასა და მის ეფექტურ იმპლემენტაციას საჯარო მმართველობის სისტემაში", ნათქვამია კვლევაში. სრულად წყარო: idfi.ge

მცხეთა–მთიანეთი. 19 ოქტომბერს საქართველოს ადგილობრივ თვითმმართველობათა ეროვნულმა ასოციაციამ დუშეთის მუნიციპალიტეტში პირველი ფოკუს-ჯგუფის შეხვედრა გამართა. საბაზისო კვლევის ”კლიმატის ცვლილების ზეგავლენის შერბილება და ადაპტაცია ადგილობრივ დონეზე” ფარგლებში ჩატარებულ პირველ საჯარო შეხვედრას  ესწრებოდნენ მუნიციპალიტეტის ადგილობრივი თვითმმართველობის, ადგილობრივი არასამთავრობო ორგანიზაციების წარმომადგენლები  და ექსპერტები.  შეხვედრაზე განხილულ იქნა დუშეთის მუნიციპალიტეტში სპეციალური კითხვარის საშუალებით მოპოვებული ინფორმაცია და გაიმართა დისკუსია. საბაზისო კვლევა ”კლიმატის ცვლილების ზეგავლენის შერბილება და ადაპტაცია ადგილობრივ დონეზე”  საქართველოს ყველა მუნიციპალიტეტში განხორციელდება და მიზნად ისახავს კლიმატის ცვლილებასთან დაკავშირებული პრობლემებისა და გამოწვევების დეტალურ შეფასებას. აღნიშნული საბაზისო კვლევა, ასევე ადაპტაციისა და კლიმატის დაცვის  საერთაშორისო გამოცდილებისა და ადგილობრივი ხელისუფლების შესაძლებლობების ანალიზი  საფუძვლად დაედება საქართველოს მუნიციპალიტეტების ”კლიმატის გზამკვლევის” შემუშავებას. პირველი სამუშაო შეხვედრა პროგრამის ,,საქართველოს რეგიონებში კლიმატის ცვლილებისადმი ადაპტაციისა და ზეგავლენის შერბილების ზომების ინსტიტუციონალიზაცია” ფარგლებში  ჩატარდა, რომელიც ხორციელდება საქართველოს ადგილობრივ თვითმმართველობათა ეროვნული ასოციაციის მიერ და ამერიკის შეერთებული შტატების საერთაშორისო განვითარების სააგენტოს (USAID) ძალისხმევის საფუძველზე. წყარო: CENN

თბილისი. 13 ივლისს, საქართველოს პარლამენტის ეროვნულ ბიბლიოთეკაში გამაირთა საზოგადოებრივი პოლიტიკის ინსტიტუტის მიერ ჩატარებული კვლევის – „თაობები და ღირებულებების" – პრეზენტაცია. კვლევა, რომელიც ფონდ „ღია საზოგადოება – საქართველოს" მხარდაჭერით განხორციელდა, ეხება ღირებულებებთან მიმართებაში თაობებს შორის განსხვავებების დადგენას და ქვეყნის დემოკრატიული განვითარების გამოწვევების იდენტიფიკაციას. კვლევის ინსტრუმენტებად შერჩეულ იქნა ორი ღირებულებითი ორიენტაცია – ინდივიდუალიზმი, კოლექტივიზმი და მატერიალისტური, პოსტმატერიალისტური და მათთან დაკავშირებული ღირებულებლები. ასევე შესწავლილ იქნა მათთან დაკავშირებული ისეთი ფაქტორები, როგორიცა ნდობა, ოპტიმიზმი, თვითშეფასება და სხვა. კვლევა ჩატარდა 2011 21 ნომრიდან 19 დეკემბრამდე თბილისში და საქართველოს ყველა რეგიონში. მასში მონაწილეობდა სამი თაობის 1058 ინდივიდი.

იმერეთი. 12 ივლისს,  ქუთაისში, სასტუმრო „აიეტი პალასში" NDI-ის საქართველოს ოფისის დირექტორმა ლუის ნავარომ პრეს-ბრიფინგი გამართა. NDI-ის კვლევის შედეგების მიხედვით, არჩევნების მოახლოებასთან ერთად, მოსახლეობისათვის პრიორიტეტად კვლავ დასაქმება რჩება. გამოკითხულთა 52 % მნიშვნელოვან საკითხად სამუშაო ადგილების შექმნას, 34%- ტერიტორიულ მთლიანობის აღდგენას, ხოლო 37% ხელმისაწვდომ ჯანდაცვას ასახელებს. კვლევა პირისპირ ინტერვიუს წარმომაგდენლობითი შერჩევის საფუძველზე ჩატარდა და სულ 6299 ადამიანი გამოიკითხა. NDI-ის კვლევებს საქართველოში კავკასიის კვლევითი რესურსების ცენტრი ატარებს და საერთაშორისო თანამშრომლობის განვითარების სააგენტო აფინანსებს. 

თბილისი. 10 ივლისს ეროვნულ–დემოკრატიული ინსტიტუტის (NDI) საზოგადოებრივი აზრის კვლევის შედეგები გახდა ცნობილი. საზოგადოების განწყობა სხვადასხვა საკითხებზე NDI-ის დაკვეთით კავკასიის კვლევითი რესურსების ცენტრმა იკვლია. კვლევის ფარგლებში 6000–ზე მეტი ინტერვიუ ჩატარდა. კვლევა მთელ საქართველოს მოიცავს და მასში მოხვდა ისეთი საკითხები, როგორიცაა ეროვნული და ადგილობრივი პრობლემები, საქართველო–რუსეთის ურთიერთობა, მედია გარემო, ლაზიკის აშენების იდეა , ქართული დემოკრატიის და ამომრჩველთა სიის დაზუსტებისთვის შექმნილი სპეციალური კომისიის საქმიანობა და ა.შ. კვლევის თანახმად ყველაზე მნიშვნელოვანი ეროვნული საკითხების სამეული ასე გამოიყურება: დასაქმება, ტეროტორიული მთლიანობა და ხელმისაწვდომი ჯანდაცვა.  კვლევის საველე სამუშაოების თარიღი 4 ივნისიდან 22 ივნისამდე პერიოდია. კვლევა რამდენიმე ტალღად ჩატარდა, პრეზენტაციაში მოცემულია ბოლო ოთხი ტალღის შედეგები. NDI წინასაარჩევნოდ კიდევ ერთ კვლევას გამოაქვეყენებს.

თბილისი. 28 ივნისს, ფონდი „ღია საზოგადოება –საქართველოს" ოფისში გაიმართა ახალი საზოგადოებრივი ორგანიზაციის პრეზენტაცია. ორგანიზაცია გამოცდების ეროვნული ცენტრიდან წამოსულმა თანამშრომლებმა დააფუძნეს.  „საგანმანათლებლო პოლიტიკისა და კვლევების ასოციაციის" პრეზიდენტია გამოცდების ეროვნული ცენტრის ყოფილი ხელმძღვანელი, მაია მიმინოშვილი. ასოციაციის მუშაობის ძირითადი მიმართულებებია: სამეცნიერო–საგანმანათლებლო კვლევები სკოლამდელი, სასკოლო და უმაღლესი განათლების საფეხურებზე, საერთაშორისო გამოცდილების შესწავლა, განათლების სფეროში არსებული თანამედროვე ლიტერატურისადმი წვდომის ხელშეწყობა, პედაგოგების პროფესიული განვითარების ხელშეწყობა, განათლების სისტემაში მიმდინარე პროცესების შესახებ საზოგადოების ინფორმირება და ა.შ  „ეს ორგანიზაცია შექმნა გუნდმა, რომელიც 10 წლის განმავლობაში მუშაობდა განათლების სისტემაში. (...) ის გამოცდილება, რომელიც ჩვენ 10 წლის განმავლობაში დავაგროვეთ განათლების სისტემაში ერთად მუშაობით, გვაძლევს იმის თქმის საშუალებას, რომ ეს ახლად შექმნილი ორგანიზაცია ნამდვილად წარმატებული იქნება და  ჩვენ ვაპირებთ ყველაფრის გაკეთებას იმისთვის, რომ ქვეყენაში განათლების ხარისხის ამაღლებას შევუწყოთ ხელი", – თქვა დღევანდელ პრეზენტაციაზე ასოციაციის პრეზიდენტმა, მაია მიმინოშვილმა.