თბილისი. 2022 წლის 1 ივლისს, ინფორმაციის თავისუფლების განვითარების ინსტიტუტმა (IDFI) მონაცემების გლობალური ბარომეტრის (GDB) კვლევის რეგიონული შედეგების ონლაინ პრეზენტაცია გამართა.  ონლაინ ღონისძიების მთავარ მიზანს მონაცემების გლობალურ ბარომეტრის თემატური მოდულების მიხედვით, აღმოსავლეთ ევროპისა და ცენტრალური აზიის რეგიონის შედეგების მთავარი მიგნებების, გამოწვევებისა და რეკომენდაციების გაზიარება წარმოადგენდა.  სრულად... წყარო: idfi.ge

თბილისი. სოციალური სამართლიანობის ცენტრი გთავაზობთ დევიდ პ. ბარაშის თარგმანს „არსებობს ომის ინსტინქტი?”. „ადამიანურ აგრესიასთან, ძალადობასთან და ომთან დაკავშირებით არ არსებობს ცალსახა პოზიცია, რომელსაც ევოლუცია გაუმაგრებდა ზურგს. ერთი მხრივ, ჩვენ შეგვიძლია, ჩავიდინოთ გაუგონარი ძალადობა. მეორე მხრივ, ჩვენ შეგვწევს ძალა, გამოვავლინოთ განსაკუთრებული თანაგრძნობა თუ თავგანწირვა. ჩვენი ეგოისტი გენები პასუხისმგებელია საშინელ, გამანადგურებელსა და უსიამოვნო ქმედებათა მთელ რიგზე. თუმცა, ამავდროულად, ამ ეგოისტ გენებს ისიც შეუძლიათ, გვიბიძგონ განსაცვიფრებელი ალტრუისტული საქციელისკენ, რომელშიც არაფერია ისეთი, რაც საკუთარ თავზე ზრუნვას შეიძლება დავუკავშიროთ... ... ფსიქოლოგი ბ. ფ. სკინერი წერდა: “არც ერთი თეორია არ ცვლის იმას, რასაც თავად გვიხსნის; ადამიანი იმად რჩება, რაც ყოველთვის იყო.” ეს მსჯელობა უმრავლესი ფენომენის შემთხვევაში სწორია. თუმცა ადამიანის ბუნების შესახებ თეორიები ასეთი არ არის. არ ვამბობ, რომ ადამიანის ბუნების შეცვლა ერთ კონკრეტულ თეორიას შეუძლია. ვგულისხმობ იმას, რომ ამ დროს იცვლება ჩვენი მოლოდინები და, შესაბამისად, ჩვენი ქცევა, რასაც საკმაოდ სერიოზული შედეგები მოჰყვება. თუ, მაგალითად, დარწმუნებული ვიქნებით, რომ თომას ჰობსი მართალი იყო და ადამიანები ბუნებრივად არიან მიდრეკილი აგრესიული, აუტანელი ქცევისკენ, ამას გავლენა ექნება ჩვენს პოლიტიკაზე, მათ შორის ჩვენი ეროვნული ბიუჯეტის პრიორიტეტებზე - რამდენი ჩავდოთ, მაგალითად, განათლებასა და ჯანდაცვაში და რამდენი - პოლიციასა და სამხედრო შეიარაღებაში - რაც შეიძლება გახდეს კიდეც საკუთარივე წინასწარმეტყველების აღმსრულებელი““. სრულად... წყარო: socialjustice.org.ge

გურია. 20 ივნისს „ახალგაზრდა პედაგოგთა კავშირის“ ორგანიზებით ჩატარდა კვლევის - „მშობლების შრომით მიგრაციის ზეგავლენა მათი არასრულწლოვანი შვილების აღზრდისა და განვითარების ფაქტორებზე“ საბოლოო ანგარიშის პრეზენტაცია. „შეხვედრაზე დამსწრე აუდიტორია შეთანხმდა, რომ კვლევის რეკომენდაციების შემუშავების მიზნით შეიქმნება სამუშაო ჯგუფი, რომელიც ასევე ჩაერთვება შემუშავებული რეკომენდაციების ადვოკატირების პროცესებში. კვლევის ანგარიში უახლოეს მომავალში გამოქვეყნდება ორგანიზაციის ვებ-გვერდზე. კვლევა განხორციელდა „ახალგაზრდა პედაგოგთა კავშირის“ მიერ   პროექტის „უკეთესი მომავლისთვის“ ფარგლებში ორგანიზაცია Brot für die Welt-ის ფინანსური მხარდაჭერით“. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს შეფასებას ფულის გათეთრებისა და ტერორიზმის დაფინანსების აღკვეთის ხელშეწყობის შესახებ საქართველოს კანონში შეტანილ ცვლილებებთან დაკავშირებით. ორგანიზაცია მიიჩნევს, რომ „ფულის გათეთრებისა და ტერორიზმის დაფინანსების აღკვეთის ხელშეწყობის შესახებ“ კანონში შეტანილი ცვლილებები არ არის საკმარისი ქვეყანაში ამ მიმართულებით არსებული გამოწვევების აღმოსაფხვრელად და აუცილებელია, საქართველოს მთავრობამ ამბიციური საპასუხო ნაბიჯები გადადგას. „მნიშვნელოვანია, ხელისუფლებამ ძალისხმევა არ დაიშუროს MONEYVAL-ისა და FATF-ის რეკომენდაციების, მათ შორის, ბენეფიციარ მესაკუთრეებთან მიმართებით არსებული რეკომენდაციების შესასრულებლად, რამდენადაც აღნიშნული რეკომენდაციები წარმოადგენს ძირითად ფუნდამენტს, რომლის შესრულებითაც სახელმწიფოებმა ფულის გათეთრებისა და ტერორიზმის დაფინანსებასთან ბრძოლის საერთო მიზანს შეიძლება მიაღწიონ“, ნათქვამია შეფასებაში. სრულად... წყარო: idfi.ge

თბილისი. კავშირი „საფარი” 2021 წლის ივლისიდან მუშაობს რელიგიური კონფესიებს დაქვემდებარებული პანსიონების მოქმედ და ყოფილ აღსაზრდელებთან. ორგანიზაცია მათ იურიდიულ, სოციალურ, ფსიქოლოგიურ და სამედიცინო სერვისებს აწვდის. „საფარმა“, ჯამში, 9 თვის განმავლობაში ნინოწმინდისა და მარტვილის პანსიონების 32 მოქმედ და ყოფილ აღსაზრდელთან იმუშავა. ორგანიზაცია გთავაზობთ დოკუმენტს, რომელიც ნინოწმინდისა და მარტვილის სასულიერო პანსიონების ყოფილ აღსაზრდელებთან 9-თვიანი (2021 წლის ივლისიდან 2022 წლის აპრილის ჩათვლით) მუშაობის შედეგად შემუშავდა. დოკუმენტში ასახულია ბენეფიციარების ძირითადი საჭიროებები და მათი დაკმაყოფილებისთვის გადასადგმელი აუცილებელი ნაბიჯები რეკომენდაციის სახით. სრულად... წყარო: sapari.ge

ალბანეთი. 23-27 მაისს, ალბანეთში, ქალაქ ბერატში, ევროკავშირისა და კონრად ადენაუერის ფონდის ორგანიზებით, ისტორიკოსებს შორის დიალოგის პლატფორმის (Platform for Dialogue Between Historians) პირველი შეხვედრა გაიმართა. შეხვედრაზე განიხილეს ისტორიკოსის, როგორც მედიუმის როლი საზოგადოებასა და ხელისუფლებას შორის, გარდამავალი სამართლიანობის პერიოდში და იმ ქვეყნებში, რომლებსაც ტრავმული უახლესი წარსული აქვთ. აზერბაიჯანის, სომხეთისა და საქართველოს წარმომადგენლებმა ისაუბრეს საკუთარ და მეზობელ ქვეყნებში ისტორიის სახელმძღვანელოების რევიზიაზე, რათა შეფასდეს - როგორ არის წარმოჩენილი ზოგიერთი ისეთი საკითხი, რომელზეც ამ ქვეყნებს შორის საერთო აზრი არ არსებობს. ანტონ ვაჭარაძე შეხვედრაზე წარსდგა მოხსენებით - „საარქივო ღიაობა ყოფილ საბჭოთა რესპუბლიკებსა და აღმოსავლეთის ბლოკის ქვეყნებში“. სრულად... წყარო: idfi.ge

რეგიონები. USAID-ის სამოქალაქო ჩართულობის პროგრამამ თებერვალში საქართველოს 5 რეგიონში (ქვემო ქართლი, კახეთი, შიდა ქართლი, იმერეთი, გურია) ჩაატარა ფოკუს ჯგუფის კვლევა იმ პრობლემების გამოსავლენად, რაც ხალხს ყველაზე მეტად აწუხებს განათლების, სოციალური დაცვისა და ჯანდაცვის სფეროებში. ჯანდაცვის სფეროში ყველაზე ხშირად დასახელებული პრობლემები იხილეთ სლაიდზე. ამ ეტაპზე, გამოცხადებულია საგრანტო კონკურსი, რომელიც კვლევისა და ადვოკატირების გზით ჯანდაცვის, განათლების და სოციალური დაცვის სფეროში პრიორიტეტული საკითხების მოგვარებას ისახავს მიზნად. სრულად... წყარო: პროგრამის გვერდი სოციალურ ქსელში

თბილისი. „საქართველოს ახალგაზრდა იურისტთა ასოციაციამ“ გამართა კვლევის დოკუმენტის - „უმცირესობა უმრავლესობაში - პროცედურული ომი და არჩევნების შემდგომი კრიზისი საკრებულოებში“ პრეზენტაცია. „კვლევის შედეგად გამოვლინდა, რომ 6-ვე საკრებულოში (ბათუმი, ზუგდიდი, წალენჯიხა, ჩხოროწყუ, სენაკი, რუსთავი) კრიზისის ძირითადი მიზეზი პარტიებს შორის მკვეთრი პოლიტიკური პოლარიზაცია იყო. მათთვის გადაულახავ წინააღმდეგობად ერთმანეთთან კონსესუსი და თანამდებობებზე ერთიანი კანდიდატების წარდგენა იქცა. შეთანხმების პროცესი თვეები გაგრძელდა, რამაც ამ საკრებულოების საქმიანობის დაწყება მნიშვნელოვნად შეაფერხა. კვლევამ გამოავლინა აგრეთვე, რომ არც თვითმმართველობის კოდექსი და არც საკრებულოთა რეგლამენტები არ აღმოჩნდა მზად მსგავს პოლიტიკურ კრიზისებთან გასამკლავებლად“, ნათქვამია საია-ს მიერ მომზადებულ დოკუმენტში. სრულად... წყარო: gyla.ge

რეგიონები. გაეროს ბავშვთა ფონდისა და საქართველოს ადგილობრივ თვითმმართველობათა ეროვნული ასოციაცია (NALAG)-ის პარტნიორობით და ევროკავშირის მხარდაჭერით ბათუმის, ქუთაისის, ზუგდიდის, ორზურგეთის, ამბროლაურის, ახალციხის, ქარელის, დუშეთის, მარნეულისა და თელავის მუნიციპალიტეტების წარმომადგენლებისთვის ადგილობრივ დონეზე საჭიროებათა კვლევის მეთოდოლოგიის ტრენინგები ჩატარდა. პროექტის მიზანია, დაეხმაროს  მუნიციპალიტეტებს ბავშვის საჭიროებაზე მორგებული სოციალური პროგრამების შემუშავებაში. სრულად... წყარო: ორგანიზაციის გვერდი სოციალურ ქსელში

თბილისი. სამოქალაქო საზოგადოების ინსტიტუტმა (CSI) პროექტის „სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის“ ფარგლებში, მოამზადა კვლევა: „ფილანთროპია და მოხალისეობრივი საქმიანობა: საერთაშორისო პრაქტიკა და საქართველო“. კვლევა მიზნად ისახავს განსაზღვროს ფილანთროპიული საქმიანობის, მათ შორის, მოხალისეობრივი საქმიანობის ეკოსისტემის ელემენტები, საქართველოში არსებული გამოწვევები და შესაძლებლობები, ამასთან, შეისწავლოს სფეროში არსებული საუკეთესო საერთაშორისო გამოცდილება. დოკუმენტში აღწერილია ფილანთროპიული საქმიანობის სფეროში ამ დროისათვის გამოკვეთილი მიგნებები და გამოწვევები საკანონმდებლო, ინსტიტუციურ თუ პრაქტიკულ დონეებზე. იხ. კვლევა: „ფილანთროპია და მოხალისეობრივი საქმიანობა: საერთაშორისო პრაქტიკა და საქართველო“...

იმერეთი. 21 მაისს, სოციალური სამართლიანობის ცენტრისა და საქართველოს ახალგაზრდა იურისტთა ასოციაციის ორგანიზებით, ასევე, სახალხო დამცველის დასავლეთ საქართველოს სამმართველოს წარმომადგენლის მონაწილეობით, ჭიათურის მუნიციპალიტეტის სოფელ ითხვისში სოფლის შეკრება გაიმართა. „ითხვისის მაცხოვრებლებისთვის კვლავ უცნობია, შეიქმნა თუ არა უწყებათაშორისი კომისია სოფელში მომხდარი მიწის ჩაქცევის სიღრმისეული შესწავლის მიზნით, როგორია მისი შემადგენლობა და რა ვადებში გეგმავენ სახელმწიფო უწყებები მომხდარ ფაქტზე რეაგირებას. აღნიშნულის შესახებ საიას მიერ გარემოს ეროვნული სააგენტოსთვის გაგზავნილი წერილი საჯარო ინფორმაციის მოთხოვნის შესახებ ასევე რეაგირების გარეშეა დარჩენილი. სოფლის მოსახლეობა ითხოვს, რომ სახელმწიფო უწყებებმა უზრუნველყონ სოფელში ნიადაგის ჩაქცევის შემსწავლელ კომისიაში სოფლის მოსახლეთა მიერ ნდობით აღჭურვილი პირის ჩართვა და გასაჯაროვდეს კომისიის მიერ სიღრმისეული კვლევის დასრულების ზუსტი თარიღი“. სრულად... წყარო: socialjustice.org.ge

თბილისი. სოციალური სამართლიანობის ცენტრი აქვეყნებს ამერიკელი ისტორიკოსის, ფრანსინ ჰირშის მიერ 2005 წელს გამოცემული ცნობილი ნაშრომის „ერების იმპერია - ეთნოგრაფიული ცოდნა და საბჭოთა კავშირის ჩამოყალიბება“, მეორე თავის მეოთხე ქვეთავის მიმოხილვას.  ამ ქვეთავში ბელორუსისა და უკრაინის, ასევე ცენტრალური აზიის ქვეყნების მაგალითზე აღწერილია საბჭოთა ნაციონალური იდენტობებისა ჩამოყალიბების რთული პროცესი და საბჭოთა რეჟიმის გადაწყვეტილებების ლოგიკები. სრულად... წყარო: socialjustice.org.ge

თბილისი. სოციალური სამართლიანობის ცენტრი აქვეყნებს მარიამ შალვაშვილის ინტერვიუს პროფესორ მათიას პელკმანსთან.  „მათიას პელკმანსი ლონდონის ეკონომიკის სკოლაში (LSE) ანთროპოლოგიის სრული პროფესორია და კავკასიასა და ცენტრალური აზიას იკვლევს. იგი 1990-იანი წლების ბოლოდან 2000-იანი წლების დასაწყისამდე კვლევას აჭარაში აწარმოებდა. მას ეკუთვნის 2006 წელს გამოცემული წიგნი „საზღვრის დაცვა: იდენტობა, რელიგია და მოდერნულობა საქართველოს რესპუბლიკაში“, სადაც სარფის საზღვართან დაკავშირებულ საკითხებზე მუშაობდა. ბოლო რამდენიმე წელია მათიას პელკმანსი დაინტერესებულია ეჭვებისა და შეთქმულების თეორიების ეთნოგრაფიით“, აღნიშნულია ინტერვიუს აღწერაში. სრულად... წყარო: socialjustice.org.ge

თბილისი. გაეროს ქალთა ორგანიზაციამ სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს მენეჯმენტთან თანამშრომლობით საქართველოში Global Rights for Women წარმომადგენლები მოიწვია.  ექსპერტები შეაფასებენ ძალადობაგამოვლილი ქალებისთვის სახელმწიფოს მიერ შეთავაზებულ მომსახურებებს, კერძოდ თავშესაფრებსა და კრიზისულ ცენტრებში არსებულ სერვისებს, და მათი გაუმჯობესების მიზნით მოამზადებენ რეკომენდაციებს. სრულად...  წყარო: ორგანიზაციის გვერდი სოციალურ ქსელში

თბილისი. WeResearch-მა ჰაინრიხ ბიოლის ფონდის თბილისის ოფისის სამხრეთ კავკასიის რეგიონული ბიუროს მხარდაჭერით განახორციელა კვლევა „საქართველოს ახალგაზრდები და ისტორია: გამოცდილების, დამოკიდებულებებისა და ღირებულებების კვლევა“. „კვლევა შეეხებოდა იმასაც, თუ როგორ ესმით ახალგაზრდებს საქართველოს ისტორია, რა იციან და რა აინტერესებთ ამ სფეროში, რა ძირითადი წყაროები აქვთ ისტორიის შესახებ ინფორმაციის მისაღებად და როგორ აფასებენ ისტორიის სწავლის გამოცდილებას“. სრულად... წყარო: ge.boell.org

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ბლოგპოსტს: მონაცემების გლობალური ბარომეტრის კვლევის შედეგები - საქართველოსა და აღმოსავლეთ ევროპის და ცენტრალური აზიის რეგიონის ქვეყნების შედეგების მიმოხილვა. „მონაცემების გლობალური ბარომეტრი (GDB) ერთიანი მეთოდოლოგიით, სხვადასხვა ინდიკატორების საფუძველზე, აფასებს 108 ქვეყანას და შედეგად ადგენს ქვეყნების რეიტინგს. ბარომეტრის მეშვეობით შესაძლებელია არსებული გამოწვევების და კარგი პრაქტიკის გამოკვეთა, და ქვეყნების შედეგების ერთმანეთთან შედარება. GDB-ის საერთო შედეგების მიხედვით, აღმოსავლეთ ევროპის და ცენტრალური აზიის რეგიონის 12 ქვეყნიდან საქართველო 40.25 ქულით მეხუთე ადგილს იკავებს, უკრაინის, სომხეთის, ყაზახეთის და მოლდოვას შემდეგ. საქართველომ რეგიონში ერთ-ერთი დაბალი შედეგი მონაცემთა მართვის/განკარგვის კომპონენტში აჩვენა, რამაც ცხადყო, რომ აუცილებელია ღია მონაცემების ერთიანი პოლიტიკის, საჯარო მონაცემების მიმოცვლის საკანონმდებლო ჩარჩოსა და საჯარო მონაცემების მართვის/განკარგვის ერთიანი სტანდარტის არსებობა“. სრულად... წყარო: idfi.ge

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) აქვეყნებს მედია გარემოს შეფასების ანგარიშს. „ბოლო რამდენიმე წლის განმავლობაში მედიის თავისუფლების გამოწვევებს შორის არის ისეთი საკითხები, როგორებიცაა მედიაპოლარიზაცია, ჟურნალისტების მიმართ ძალადობა, დამოუკიდებელ და კრიტიკულ მედიაზე ზეწოლა და ინფორმაციის ხელმისაწვდომობის ხარვეზები. ცალკე აღნიშვნას იმსახურებს გამოხატვის თავისუფლების შეზღუდვის მცდელობა. მმართველი პარტიისა და საქართველოს კომუნიკაციების ეროვნული კომისიის წარმომადგენლები ხშირად საუბრობენ ქვეყანაში ლიბერალური კანონმდებლობის არსებობაზე და სხვადასხვა შეზღუდვის დაწესებაზე მიუთითებენ. ცალსახაა, რომ მედია დღეს მნიშვნელოვანი გამოწვევების წინაშე დგას. წინამდებარე დოკუმენტის მიზანია, აღწეროს და გააანალიზოს მედიაში მიმდინარე მოვლენები“. სრულად... წყარო: isfed.ge

თბილისი. 11 მაისს, საქართველოს სახალხო დამცველმა და არასამთავრობო ორგანიზაციამ „პრევენცია პროგრესისთვის“ საერთო კვლევის ანგარიში წარადგინეს - „პენიტენციურ სისტემაში კოვიდ 19 პანდემიის გავლენა პატიმრების და პერსონალის ჯანმრთელობის და სხვა სახის უფლებრივ მდგომარეობაზე“. „კვლევაში შეფასებულია სპეციალური პენიტენციური სამსახურის მიერ 2020 წლის მარტიდან 2021 წლის ჩათვლით პანდემიის პირობებში მიღებული განსაკუთრებული ზომების ზეგავლენა პატიმართა უფლებრივ მდგომარეობაზე. კვლევის შედეგებმა ცხადყო, რომ პანდემიის პერიოდში გადაჭარბებულად იქნა გამოყენებული შეზღუდვების პოლიტიკა და შესაბამისი ძალისხმევა არ იქნა გაწეული გადაწყვეტის ალტერნატიული შესაძლო გზების მოძიების მიმართულებით“, ნათქვამია ომბუდსმენის ვებგვერდზე. სრულად... წყარო: ombudsman.ge

თბილისი. სოციალური სამართლიანობის ცენტრი აქვეყნებს ბრაიან ს. ტერნერის სტატიას (შემოკლებულ ვერსიას), რომელიც მოქალაქეობის კვლევების ერთ-ერთი ფუნდამენტური ტექსტია. „ტერნერი აჩვენებს, თუ რა მნიშვნელობა ჰქონდა მუშაობას, ქორწინებასა და სამხედრო სამსახურს სოციალური უფლებების მიღების პროცესში, როგორ შეიცვალა ეს ტენდენცია და ამის კვალდაკვალ როგორ ძლიერდება გლობალური, კერძოდ, ეკოლოგიური, აბორიგენული (ადგილობრივი) და კულტურული უფლებები. „მოქალაქეობა ერთდროულად ინკლუზიური პროცესია, რომელიც მჭიდროდაა დაკავშირებული რესურსების გადანაწილებასთან და ამასთანავე ის გამრიყველი, ექსკლუზიური პროცესია, რადგან ის ეფუძნება იდენტობის საერთო ან წარმოსახვით მშენებლობას და გარიყავს სხვებს, რომლებიც ამ წარმოსახვაში არ ჯდებიან. მოქალაქეობის სტატუსის მიღება შეზღუდულია სხვადასხვა კრიტერიუმით. ამასთანავე, მოქალაქედ გახდომის პროცესი ხასიათდება ძლიერი იდენტობის შექმნით, რომელსაც არა მხოლოდ იურიდიული, არამედ ეთნიკური, რელიგიური და სექსუალური განზომილება აქვს“. სრულად... წყარო: socialjustice.org.ge

თბილისი. 6 მაისს, ფაბრიკაში ლგბტქი თემის მიმართ არსებული საზოგადოებრივი დამოკიდებულებისა და მათი უფლებრივი მდგომარეობის შესახებ ახალი კვლევების წარდგენა გაიმართა. „ლგბტქი ადამიანები საქართველოს საზოგადოების ერთ-ერთ ყველაზე დაუცველ და მარგინალურ ნაწილს წარმოადგენენ. ისინი ცხოვრების სხვადასხვა სფეროში დისკრიმინაციასა და ძალადობას განიცდიან, ხოლო მათი უფლებების დაცვისა და პრაქტიკაში რეალიზების მხრივ, კვლავაც მნიშვნელოვანი გამოწვევები არსებობს. შექმნილი ვითარების მიუხედავად, საზოგადოების ნეგატიური დამოკიდებულება ლგბტქი თემის მიმართ თანდათან მცირდება, რაც გაეროსა და შვედეთის მთავრობის ხელშეწყობით ჩატარებულმა ორმა ახალმა კვლევამაც დაადასტურა. ღონისძიება შვედეთის მთავრობისა და გაეროს სამი სააგენტოს - გაეროს ქალთა ორგანიზაციის (UN Women), გაეროს განვითარების პროგრამისა (UNDP) და გაეროს მოსახლეობის ფონდის (UNFPA) ხელშეწყობით ჩატარდა. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტის (IDFI) ინფორმაციით, 11 მაისს მონაცემების გლობალური ბარომეტრის პრეზენტაცია და შედეგების წარდგენა გაიმართება. გაიარეთ რეგისტრაცია ბმულზე... IDFI ცენტრალური აზიისა და აღმოსავლეთ ევროპის რეგიონული ჰაბია და კოორდინაციას უწევდა კვლევას 12 ქვეყანაში. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი აქვეყნებს ანალიტიკურ დოკუმენტს: ყარაბაღის მეორე ომის გავლენები საქართველოს არადომინანტურ ეთნიკურ ჯგუფებზე. „27 სექტემბერს აზერბაიჯანისა და სომხეთის სახელმწიფოებს შორის ყარაბაღის მეორე ომი დაიწყო. ამ ომმა მნიშვნელოვანი ზეგავლენა მოახდინა არა მხოლოდ მასში ჩართულ ქვეყნებზე, არამედ მთლიანად რეგიონზე და რეგიონში არსებულ ძალთა ბალანსზე. ჩვენი ანალიტიკური დოკუმენტი მიზნად ისახავს, გამოიკვლიოს საქართველოს მოქალაქეებზე ყარაბაღის ომის გავლენები“. სრულად... წყარო: socialjustice.org.ge