თბილისი. 10 ოქტომბერს ინფორმაციის თავისუფლების განვითარების ინსტიტუტმა (IDFI) erasmus + -ის ფარგლებში დაფინანსებული სასწავლო ვიზიტის მონაწილეებს IDFI-ის მეხსიერებისა და დეზინფორმაციის კვლევების მიმართულების საქმიანობა და მიღწეული შედეგები გააცნო. აღნიშნული ღონისძიების ორგანიზატორი იყო არასამთავრობო ორგანიზაცია „გერგარტი“. „სასწავლო ვიზიტის ფარგლებში, მონაწილეები შეხვდნენ იმ ორგანიზაციებსა და მკვლევრებს, რომლებიც საბჭოთა წარსულის გადააზრებაზე მუშაობენ. შეხვედრების ფარგლებში, გაეცნენ მათ საქმიანობას და სურვილი აქვთ, მიღებული ცოდნა/გამოცდილება შემდგომ საქმიანობაში გადაიტანონ“. სრულად... წყარო: idfi.ge

თბილისი. საქართველოს სტრატეგიის და განვითარების ცენტრი (GCSD) გთავაზობთ პუბლიკაციას „ნატო უსაფრთხოების თანამედროვე გამოწვევების კვალდაკვალ“. https://bit.ly/3EmV575  პუბლიკაციაში გაეცნობით ექსპერტთა შეფასებებს ისეთ მნიშვნელოვან თემებზე, როგორებიცაა ალიანსში გაწევრიანების სამოქმედო გეგმა (MAP), ნატო-საქართველოს თანამშრომლობის პერსპექტივები და სხვა. პუბლიკაცია მომზადდა პროექტის „უკეთ გავიცნოთ ნატო“ ფარგლებში, რომელსაც GCSD, ნატოს სახალხო დიპლომატიის განყოფილების მხარდაჭერით ახორციელებს. სრულად...  წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტის (IDFI) ინფორმაციით, რუსეთ-უკრაინის ომის დაწყების შემდეგ (24 თებერვლიდან-31 აგვისტომდე): რუსეთის მოქალაქეების მიერ საქართველოს ბანკებში განთავსებული დეპოზიტების ნაშთი,  დაახლოებით 1,2 მილიარდი ლარით (+ 170%) გაიზარდა. საქართველოს  ბანკებში ახალი ანგარიშები გახსნა რუსეთის 45,349 მოქალაქემ და რუსეთში რეგისტრირებულმა 19-მა იურიდიულმა პირმა. 2022 წლის მეორე კვარტალში ვალუტის გადამცვლელმა პუნქტებმა იყიდეს 949,8 მილიონი რუბლი, ხოლო გაყიდეს 929,4 მილიონი რუბლი, რაც დაახლოებით სამჯერ მეტია 2021 წლის ანალოგიურ პერიოდთან შედარებით. ორგანიზაცია მიიჩნევს რომ, რუსეთის მოქალაქეების ქვეყანაში აქტიური შემოსვლით მოკლევადიან პერიოდში მიღებული  გარკვეული დადებითი ეკონომიკური ეფექტის მიუხედავად, მათი ქვეყანაში დარჩენის მზარდი ტენდენცია შესაძლოა წარმოადგენდეს გამოწვევას სახელმწიფო უსაფრთხოების თვალსაზრისით, რაც საჭიროებს შესაბამის ღონისძიებებს რისკების შემცირების კუთხით. სრულად... წყარო: idfi.ge

რეგიონები. 29-30 სექტემბერს, ინფორმაციის თავისუფლების განვითარების ინსტიტუტმა (IDFI) საქართველოს პარლამენტის ეროვნულ ბიბლიოთეკასთან თანამშრომლობით კასპში, ბორჯომსა და გორში რეპრესირებულთა საკითხზე პრეზენტაცია და „რადიო თავისუფლების“ ფილმის „დახვრეტილთა სასაფლაო ბათუმში“ ჩვენება გამართა. ორგანიზაციის გადმოცემით, შეხვედრების ფარგლებში წარმოდგენილი ფილმი „დახვრეტილთა სასაფლაო ბათუმში“ მოგვითხრობს, თუ როგორ აღმოჩნდა ბათუმის მახლობლად, ყოფილი რუსული სამხედრო ბაზის ტერიტორიაზე, სავარაუდოდ, საბჭოთა რეჟიმის მიერ დახვრეტილი ასობით ადამიანის სამარხი. ფილმის ჩვენებამდე, ინფორმაციის თავისუფლების განვითარების ინსტიტუტის (IDFI) მეხსიერებისა და დეზინფორმაციის კვლევების მიმართულების ხელმძღვანელმა, ანტონ ვაჭარაძემ პრეზენტაცია წარადგინა რეპრესირებულთა თემატიკის ირგვლივ და ისაუბრა საქართველოში 1937-1938 წლებში მიმდინარე დიდი ტერორის შესახებ, დამსწრე საზოგადოებას გააცნო სხვადასხვა ისტორია აღნიშნული ეპოქიდან, ასევე ყურადღება გაამახვილა მასობრივი სამარხების აღმოჩენის სპეციფიკასა და მნიშვნელობაზე. სრულად... წყარო: idfi.ge

თბილისი. ინფორმაციის თავისუფლების განვითარების ინსტიტუტის (IDFI) ცნობით, უკრაინაში რუსეთის შეჭრის შემდეგ, 2022 წლის მარტი-ივლისის პერიოდში საქართველოში ბინადრობის ნებართვა გაიცა რუსეთის 1,598 მოქალაქეზე, ხოლო უარი ეთქვა 434 მათგანს. „2021 წლის შესაბამის პერიოდთან შედარებით, 2022 წელს რუსეთის მოქალაქეების მიერ საქართველოში ბინადრობის უფლების მისაღებად მიმართვიანობა 54%-ით, ხოლო დაკმაყოფილების მაჩვენებელი 25%-ით გაიზარდა. 2022 წლის მარტი-ივლისი პერიოდში, 2019 წლის შესაბამის პერიოდთან შედარებით  1321-ით (+185%) მეტმა რუსეთის მოქალაქემ მიმართა სააგენტოს ბინადრობის ნებართვის მისაღებად, დაკმაყოფილებულმა განცხადებებმა, 2019 წელთან შედარებით 972-ით მეტი (+155%), 1598 შეადგინა“. სრულად... წყარო: idfi.ge

თბილისი. სოციალური სამართლიანობის ცენტრი გთავაზობთ ელის ბოლქვაძის სტატიას, რომელიც მიზნად ისახავს ნათელი მოჰფინოს იმ მეხსიერებას, რომელიც ჯავახეთში გენოციდის შესახებ არსებობს. კერძოდ, აღმოაჩინოს, 1915 წლის გენოციდის უცნობი ისტორიები. ამასთანავე, გამოავლინოს ჯავახეთის სომეხი თემის „კომუნიკაციური“ და „კულტურული მეხსიერება“, რომელიც სომეხ მოსახლეობას წარსულის არ დავიწყებასა და საკუთარი იდენტობის განსაზღვრაში ეხმარება. სტატია სრულად იხ. ბმულზე... წყარო: socialjustice.org.ge

თბილისი. 2022 წელს, სახალხო დამცველის აპარატმა საქართველოში მცხოვრები სამუშაო ასაკის შშმ პირების მიერ შრომისა და დასაქმების უფლების დაცვის მდგომარეობა შეისწავლა. „კვლევის შედეგებმა ცხადყო, რომ სახალხო დამცველის აპარატის მიერ 2017 წელს ჩატარებული  მონიტორინიგის შემდეგ, შეზღუდული შესაძლებლობის მქონე პირთა დასაქმების ხელშემწყობი სახელმწიფო პროგრამების განხორციელების  კუთხით მდგომარეობა ფაქტობრივად არ გაუმჯობესებულა და 5 წლის წინანდელ ანგარიშში ასახული რეკომენდაციების დიდი ნაწილი კვლავ შეუსრულებელია. ის ნაბიჯები, რაც დღემდე ტარდება დასაქმების კუთხით სახელმწიფოსა და კერძო სექტორის მხრიდან, არ არის საკმარისი. მეტიც, ისინი არასისტემური და დროებითია“. სრულად... წყარო: ombudsman.ge

თბილისი. ინფორმაციის თავისუფლების განვითარების ინსტიტუტის (IDFI) მოსაზრებით, სახელმწიფო არქივების ღიაობის და საბჭოთა წარსულის გადააზრების მნიშვნელობა ნათლად აჩვენა უკრაინაში დაწყებულმა ომმა.  „ვლადიმერ პუტინის 23 თებერვლის ვრცელ მიმართვაში ტენდენციურად და დამახინჯებულად იყო წარმოჩენილი უკრაინის ისტორია, განდიდებული იყო საბჭოთა ტოტალიტარული სახელმწიფო და უგულებელყოფილი მის მიერ კაცობრიობის, მათ შორის უკრაინელი ხალხის წინააღმდეგ ჩადენილი დანაშაულები. ამ შემთხვევაში კრემლის მიერ უკრაინის ისტორიის ინსტრუმენტალიზაციისა და პროპაგანდის გამოყენების ხარისხი უპრეცედენტო აღმოჩნდა. ღია არქივების პლატფორმა და ხელმომწერი ორგანიზაციები, პირველ რიგში, სოლიდარობას უცხადებენ უკრაინას! ასევე, მოუწოდებენ პოსტსაბჭოთა და აღმოსავლეთის ბლოკის ქვეყნების მთავრობებს და სახელმწიფო საარქივო დაწესებულებებს: უზრუნველყონ არქივების მაქსიმალური გამჭვირვალობის სტანდარტის ამაღლება და საუკეთესო სამართლებრივი პრაქტიკის დამკვიდრება; შეამცირონ მკვლევრებისთვის არსებული ბარიერები საარქივო მასალაზე ხელმისაწვდომობის თვალსაზრისით; ღია არქივების პლატფორმა მხარს დაუჭერს არქივების ღიაობისკენ მიმართულ სხვადასხვა აქტივობას შემდეგი საშუალებებით: პოსტსაბჭოთა და პოსტსოციალისტურ ქვეყნებში საუკეთესო პრაქტიკის დამკვიდრებისთვის შესაბამისი რეკომენდაციების შემუშავებით და ცვლილებების პროცესში ექსპერტული დახმარების უზრუნველყოფით; სხვადასხვა ქვეყანასა და ექსპერტს შორის ინფორმაციისა და პრაქტიკული მაგალითების მიმოცვლისთვის კომუნიკაციის უზრუნველყოფით; არქივების ღიაობისკენ მიმართული ნებისმიერი სახელმწიფო თუ სამოქალაქო იდეის აქტიური მხარდაჭერითა და პოპულარიზაციით“. სრულად... წყარო: idfi.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს საქართველოს მოქალაქეების მიერ საპარლამენტო საქმიანობაში ჩართულობის მექანიზმების გამოყენების ზოგად სტატისტიკურ მიმოხილვას. მიმოხილვა შექმნილია საქართველოს პარლამენტიდან გამოთხოვილი საჯარო ინფორმაციის საფუძველზე და მიზნად ისახავს დაინტერესებულ პირებს მიაწოდოს რაოდენობრივი სტატისტიკური ინფორმაცია, როგორც საქართველოს მოქალაქეების მიერ საქართველოს პარლამენტის მიერ  შემოთავაზებული მექანიზმების და სერვისების გამოყენების შესახებ, ასევე, საქართველოს პარლამენტის მიერ საკანონმდებლო და საზედამხედველო ფუნქციების განხორციელებაზე. სტატისტიკური მიმოხილვა მომზადდა ინფორმაციის თავისუფლების განვითარების ინსტიტუტის (IDFI) მიერ ევროკავშირისა (EU) და გაეროს განვითარების პროგრამის (UNDP) მხარდაჭერით. სრულად... წყარო: idfi.ge

თბილისი. ინფორმაციის თავისუფლების განვითარების ინსტიტუტის (IDFI) ინფორმაციით, 2022 წლის ივნისში საქართველოს პარლამენტში დარეგისტრირდა საჯარო შესყიდვების შესახებ საქართველოს კანონის პროექტი. კანონპროექტი მოამზადა სახელმწიფო შესყიდვების სააგენტომ, ხოლო წარადგინა საქართველოს მთავრობამ და ითვალისწინებს მრავალ მნიშვნელოვან და კარდინალურ ცვლილებას, რომელიც ფაქტობრივად გარდაქმნის სახელმწიფო შესყიდვების არსებულ სისტემას. IDFI-ის ანალიზის ფარგლებში განხილულია კანონპროექტით გათვალისწინებული მნიშვნელოვანი ცვლილებები და მათი შესაბამისობა საქართველოს მიერ სხვადასხვა საერთაშორისო პლატფორმის ფარგლებში აღებულ ვალდებულებებთან და ადგილობრივი სამოქალაქო სექტორის მიერ წლების განმავლობაში გაცემულ რეკომენდაციებთან მიმართებით. სრულად... წყარო: idfi.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს კვლევას: პოლიტიკის დოკუმენტების შემუშავების მონიტორინგისა და შეფასების წესის პრაქტიკაში აღსრულება. კვლევის მიგნებების თანახმად, 2020-2021 წლებში სათანადოდ არ შესრულდა მთავრობის პოლიტიკის დოკუმენტების ყოველწლიური გეგმა. საჯარო უწყებების მხრიდან საჯარო კონსულტაციების გამართვის პრაქტიკა არაერთგვაროვანია. იკვეთება ადამიანური რესურსებისა და შესაბამისი კომპეტენციების ნაკლებობა საჯარო პოლიტიკის დოკუმენტების შექმნის, მონიტორინგის და ხარისხის უზრუნველყოფის მიმართულებით. სრულად... წყარო: idfi.ge

თბილისი. ინფორმაციის თავისუფლების განვითარების ინსტიტუტის (IDFI) ინფორმაციით, 2018-2022 წლებში საქართველოს პრეზიდენტის ბრძანებულებით საქართველოს მოქალაქეობა მიენიჭა 13,575 პირს. საქართველოს მოქალაქეობის მიმღები (მოქალაქეობის აღდგენის შემთხვევების გარდა) 8,464 პირიდან 72% (6,075 პირი) წარმოადგენდა რუსეთის მოქალაქეს. 2022 წელს რუსეთის უკრაინაში შეჭრის შემდეგ საქართველოს მოქალაქეობა საგამონაკლისო წესით მიიღო რუსეთის 551-მა მოქალაქემ, ხოლო უკრაინის 8 მოქალაქემ. გაეცანით IDFI-ის კვლევას...  წყარო: idfi.ge

თბილისი. „საერთაშორისო გამჭვირვალობა - საქართველომ” და „სამართლიანმა არჩევნებმა“ გამოაქვეყნეს ერთობლივი კვლევა: სახელმწიფო რესურსები მმართველი პარტიის სამსახურში: ამომრჩევლის მოსყიდვისა და უკანონო მობილიზების აპრობირებული მეთოდები საქართველოში. ორგანიზაციებმა შეისწავლეს დოკუმენტაცია, რომლებიც სავარაუდოდ მმართველი პარტიის - „ქართული ოცნების“ მიერ შექმნილი ელექტრონული ფოსტის securgd@gmail.com, 2018-2019 წლების კორესპონდენციასა და 2020 წლით დათარიღებულ დოკუმენტაციას მოიცავდა. ამასთანავე, საჯარო ინფორმაციის მეშვეობით გადამოწმდა დოკუმენტებში არსებული გარკვეული მონაცემები. „კვლევის საფუძველზე გამოიკვეთა მმართველი პარტიის სასარგებლოდ არაკანონიერი გზებით ამომრჩევლის ხმების მობილიზების მასშტაბური სქემა, რომლითაც მაღალი ალბათობით დასტურდება სახელმწიფო უწყებების (მათ შორის სამართალდამცავი ორგანოების) საარჩევნო/პარტიული მიზნებით გამოყენება... სრული სქემის მასშტაბი გვაძლევს საშუალებას ვივარაუდოთ, რომ ამ მეთოდებით არჩევნების პროცესში ჩარევის შედეგად შესაძლებელი იყო ამომრჩევლის ხმის მმართველი პარტიის სასარგებლოდ მასშტაბური მობილიზება“, ნათქვამია კვლევაში. სრულად...  წყარო: isfed.ge

თბილისი. ღირსეული შრომის პლატფორმამ, საქართველოში მოპარული ხელფასის ანგარიში გამოაქვეყნა, რომელიც ქვეყანაში მოპარული ხელფასის უკანონო პრაქტიკას და მასთან ბრძოლის სახელმწიფო სტრატეგიას აფასებს. ანგარიშის თანახმად, დასაქმებულთა 88%-ს მოპარული ხელფასის გამო კუთვნილი შრომის ანაზღაურება სახლში სრულად ვერ მიაქვთ, მშრომელთა მოპარული ხელფასის საერთო ოდენობა კი დაახლოებით 25 მილიონს ლარს უტოლდება. სრულად... წყარო: osgf.ge

თბილისი. საბჭოთა წარსული კვლევის ლაბორატორია აქვეყნებს პუბლიკაციას: ეკლესია - პოლიტიკური ინსტრუმენტი საბჭოეთისთვის. „საბჭოთა კავშირის რელიგიური პოლიტიკის ანალიზისას მნიშვნელოვანია, ფართო კონტექსტში გავიაზროთ თითოეული მოვლენა, ფაქტი თუ გადაწყვეტილება. საბჭოთა კავშირის რელიგიურ პოლიტიკას თავისი არსებობის მანძილზე განსაზღვრავდა ათეისტური ნარატივი და ანტირელიგიური პროპაგანდა. არსებული პოლიტიკური დისკურსის პარალელურად, 1962 წელს საბჭოთა კავშირში არსებული მართლმადიდებელი ეკლესიები ხდებიან ეკლესიათა მსოფლიო საბჭოს წევრები. რა განაპირობებდა მკაცრი ანტირელიგიური პოლიტიკის პარალელურად საბჭოთა კავშირში არსებული მართლმადიდებელი ეკლესიების გაწევრიანებას ეკუმენურ მოძრაობაში? როგორ ხდებოდა ეკლესიების ინსტრუმენტალიზაცია 1960-იან წლებში? ნაშრომი შეეცდება აღნიშნულ კითხვებს გასცეს პასუხი. სტატიაში განხილულია ეკლესიის პოლიტიკურ ინსტრუმენტად გამოყენების ფაქტი საქართველოს მართლმადიდებელი ეკლესიის ემს-ში გაწევრიანების მაგალითზე“. სრულად... წყარო: archive.ge

თბილისი. ორგანიზაცია „საფარის“ ინფორმაციით, 20 ივლისს, გაიმართა სამუშაო შეხვედრა საქართველოში ალიმენტის გადაუხდელობის პრობლემის დარეგულირების შესახებ. შეხვედრაზე „საფარის“ მკვლევარებმა, გიორგი ურჩუხიშვილმა და ეკა ლომთათიძემ წარადგინეს კვლევები: „ალიმენტის გადაუხდელობა – კულტურული და საკანონმდებლო გამოწვევები საქართველოში” და  „ალიმენტის განსაზღვრა და აღსრულება - საუკეთესო პრაქტიკის კვლევა”. სრულად... წყარო: sapari.ge

თბილისი. ინფორმაციის თავისუფლების განვითარების ინსტიტუტი (IDFI) გიზიარებთ კვლევას - საარქივო მასალა სახელმწიფო დაწესებულებებში საქართველოს დამოუკიდებლობიდან დღემდე. „კვლევა მოიცავს საუწყებო არქივებში დაცულ მასალათა სახეობებს, მათი შენახვის ფორმატსა და ეროვნული არქივისთვის გადაცემის ისტორიას საქართველოს დამოუკიდებლობის პერიოდში, 1991 წლიდან დღემდე. კვლევა ასევე შეისწავლის დაწესებულებათა მიერ ელექტრონულად შექმნილი და მათი ვებგვერდისა თუ სოციალური მედიაპლატფორმების საშუალებით გამოქვეყნებული მონაცემების არქივირების პოლიტიკასა და პრაქტიკას“. სრულად... წყარო: idfi.ge

სამეგრელო-ზემო სვანეთი. საერთაშორისო გამჭვირვალობა - საქართველო აქვეყნებს კვლევას, სადაც თავმოყრილია ინფორმაცია ზუგდიდის, ფოთის, აბაშის, მარტვილის, სენაკის, ხობის, წალენჯიხის, ჩხოროწყუსა და მესტიის მუნიციპალიტეტების მიერ დაფუძნებული ა(ა)იპ-ების შესახებ, ასევე, მხოლოდ იმ შპს-ების შესახებ, რომლებიც სუბსიდიას ადგილობრივი ბიუჯეტიდან იღებენ. საანგარიშო პერიოდი მოიცავს 2020-2022 წლებს. „სამეგრელო-ზემო სვანეთის ცხრა მუნიციპალიტეტის 92 იურიდიულ პირში დასაქმებულთა რაოდენობა და შრომის ანაზღაურება 2022 წელს გაიზარდა - ა(ა)იპ-ებსა და შპს-ებში მომუშავე 8,406 ადამიანზე მიმდინარე წელს უკვე გაცემული და წლის ბოლომდე გასაცემი შრომის ანაზღაურების ჯამური მოცულობა 52,237,836 ლარია, რაც რეგიონის მუნიციპალიტეტების ბიუჯეტების ჯამური ასიგნებების 24%-ს შეადგენს“. სრულად... წყარო: transparency.ge

თბილისი. გაეცანი საქართველოს ახალგაზრდა იურისტთა ასოციაციის (საია) ანალიტიკოსის ნინო კაპანაძის ბლოგპოსტს „ტექნოკრატიული (ტექნიკური) მთავრობები - ჩვენი დროის გმირები?“. „ტექნიკური, იგივე ტექნოკრატიული მთავრობა დარგის პროფესიონალებისგან შედგება, რომლებიც ინიშნებიან მაშინ, როცა ქვეყანაში რაიმე სახის კრიზისი ჩნდება. ტექნოკრატია სწორედ არაპარტიული და ექსპერტული ელიტის აღმასრულებელი უფლებამოსილებებით აღჭურვას გულისხმობს, რათა მათ ამ კონკრეტულ მომენტში კრიზისის გადასალახად მართვის სადავეები აიღონ ხელში. საქართველოს სინამდვილეში ეს ნაკლებად შესწავლილი ფენომენი ბოლო პერიოდში აჩენს იმის ინტერესს, თუ რას წარმოადგენს ტექნიკური მთავრობა, შეესაბამება თუ არა ამგვარი მმართველობა და მთავრობები დემოკრატიულ სტანდარტებს, როდის ჩნდება მისი შემოღების აუცილებლობა, როგორი გამოცდილება არსებობს ქვეყნების მიხედვით და არის თუ არა მართვის ეს კონცეფცია ქვეყნის გადარჩენისთვის საუკეთესო გზა“. სრულად... წყარო: gyla.ge

თბილისი. ინფორმაციის თავისუფლების განვითარების ინსტიტუტის (IDFI) გადმოცემით, ფილმი არის იმაზე, თუ როგორ აღმოჩნდა ბათუმის მახლობლად, ყოფილი რუსული სამხედრო ბაზის ტერიტორიაზე, სავარაუდოდ საბჭოთა რეჟიმის მიერ დახვრეტილი ასობით ადამიანის სამარხი. „ეს ამბავი სავარაუდოდ დიდი ტერორის დროს, მეოცე საუკუნის 30-იან წლებში იწყება. სიკვდილმისჯილებს მაშინ საქართველოს ოთხ დიდ ქალაქთან: თბილისთან, ქუთაისთან, სოხუმსა და ბათუმთან ახლოს ხვრეტდნენ. ბათუმისა და ლაზეთის ეპარქიისა და #IDFI-ის მოწვევით, პოლონეთის ეროვნული მეხსიერების ინსტიტუტის (#IPN) მკვლევრებმა, 2022 წლის თებერვალში, სრულად გახსნეს №6 სამარხი და დაიწყეს ნეშტების ამოსვენების და შესწავლის პროცესი“. წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ანალიზს: საქართველოს მთავრობის სარეზერვო ფონდის ხარჯვა 2021 წელს. კვლევის თანახმად, 2021 წლის სარეზერვო ფონდიდან გამოყოფილი თანხების განკარგვის პრაქტიკა ნაკლებად არის შესაბამისობაში ფონდის მიზნებთან და პრინციპებთან. 2021 წელს გამოყოფილი თანხების უმეტესობის ბიუჯეტში გათვალისწინება შესაძლებელი იყო. 2017-2021 წლებში შინაგან საქმეთა სამინისტროს თანამშრომლების ფულადი ჯილდოებით (პრემია) წახალისებისთვის მთავრობის სარეზერვო ფონდიდან გამოიყო ჯამურად 20.5 მილიონი ლარი. სრულად... წყარო: idfi.ge

თბილისი. 7 ივლისს, სოციალური სამართლიანობის ცენტრმა გამართა ორი კვლევის პრეზენტაცია.: მოსამართლეთა დისციპლინური პასუხისმგებლობის სისტემა... საქმეთა ელექტრონული განაწილების სისტემა სასამართლოში... სრულად... წყარო: socialjustice.org.ge