თბილისი. საქართველოს ადვოკატთა ასოციაციის თავმჯდომარე ნარკომანიასთან ბრძოლის პროგრამის შექმნის ინიციატივით გამოდის და საქართველოს პატრიარქს მიმართავს. „გთხოვთ, ყველამ ერთად ავიღოთ ეს პასუხისმგებლობა, ჩვენი ახალგაზრდა თაობის წინაშე. ეს ბოროტებაა, რომელიც არ ვიცით ხვალ ვის კარს შეაღებს. მხოლოდ ერთიანი ძალისხმევით შეძლო ევროპამ და ამერიკამ ამ ბოროტებასთან შებრძოლება და თუ ჩვენს ქვეყანას პოლიტიკური მართვის დასავლური კურსი აქვს აღებული, მაშ რატომ არ უნდა გაიზიაროს მისი წარმატებული პრაქტიკა ამ სენთან ბრძოლის საწინააღმეგოდ და რატომ უნდა იაროს კვლავ ნულოვანი ტოლერანტობის გზით, რომელმაც ქვეყანას, როგორც უკვე ვნახეთ, კარგი არაფერი მოუტანა", ნათქვამია მიმართვაში. სრულად წყარო: ორგანიზაციის ვებგვერდი სოციალურ ქსელში

თბილისი. არასამთავრობო ორგანიზაციებმა  კვლტურისა და ძეგლთა დაცვის სამინისტროს საყდრისი–ყაჩაღიანის თაობაზე ერთობლივი მიმართვა გაუგზავნეს.  ხელმომწერი ორგანიზაციები მოუწოდებენ საქართველოს კულტურისა და ძეგლთა დაცვის სამინისტროს, პროაქტიულად  გამოაქვეყნოს საკუთარ ვებგვერდზე საყდრისი-ყაჩღიანთან დაკავშირებით მიღებული ის გადაწყვეტილება, რომლის საფუძველზეც  შპს ,,RMG Gold''-ს საყდრისი-ყაჩაღიანის ტერიტორიაზე შესაბამისი სამუშაოების წარმოების უფლება მისცა. ასევე, გამოაქვეყნოს ყველა ის ოფიციალური დოკუმენტი, რომელიც სამინისტროს მხრიდან გადაწყვეტილების მიღების საფუძვლად იქნა გამოყენებული. სრულად წყარო:gyla.ge

თბილისი. ახალგაზრდულმა მოძრაობამ „დავითიანნმა" საყდრისის მაღაროს ირგვლივ განვითარებულ მოვლენებზე განცხადება გააკეთა. „სამწუხაროდ, როგორც ირკვევა აღნიშნული პრობლემა გადაწყდა ცალმხრივად და უპასუხისმგებლოდ. კულტურის სამინისტრომ, კომპანია RMG gold-ს, საკითხის მართლზომიერად შესწავლის გარეშე, მისცა სამუშაოების გაგრძელების უფლება იმ მოტივით, რომ საყდრის-ყაჩაღიანში ოქროს უძველესი მაღაროს არსებობა არ დასტურდება. არგუმენტი მხოლოდ აღნიშნული განცხადებაა. მივიჩნევთ, რომ გადაწყვეტილება ნაჩქარევად არის მიღებული და სასწრაფო გადახედვასა და ადეკვატურ რეაგირებას საჭიროებს", ნათქვამია ორგანიზაციის ვებგვერდზე. სრულად წყარო: davitianni.ge

თბილისი. სამოქალაქო საზოგადოების წარმომადგენლები საქართველოს მთავრობას საქართველოს რეგიონული განვითარების სამთავრობო კომისიის 13 მარტის განცხადების თაობაზე მიმართვას უგზავნიან. „...საქართველოს რეგიონული განვითარების სამთავრობო კომისიამ გაავრცელა განცხადება, რომლის თანახმადაც კომისია „მოსახლეობას სთავაზობს თვითმმართველი ქალაქების გამოყოფის შედეგად დარჩენილ ტერიტორიაზე არსებულ დასახლებათაგან თითო თვითმმართველი თემის შექმნის შესაძლებლობის განხილვას, ადმინისტრაციული ცენტრებით თვითმმართველ ქალაქებში." ხელმომწერ საზოგადოებრივ ორგანიზაციებს მიაჩნიათ, რომ ასეთი მოდელი: „1. ვერ შექმნის თვითმმართველობის ისეთ სისტემას, რომელიც მოსახლეობას დააახლოვებდა თვითმმართველობასთან და მისცემდა საშუალებას, მონაწილეობა მიეღო ადგილობრივ გადაწვეტილებათა მიღების პროცესში; 2. ვერ შექმნის საჭირო პირობებს ადგილობრივ ინტერესებზე ორიენტირებული თვითმმართველობის შექმნისთვის; 3. ვერ შექმნის ახალ კულტურულ, ეკონომიკურ და სოციალურ მიზიდულობის ცენტრებს გეოგრაფიულად და ინფრასტრუქტურულად ურთიერთდაკავშირებულ ტერიტორიებზე; 4. ვერ შექმნის საჭირო პირობებს სოფლის განვითარებისა და ადგილობრივი ლიდერებისა და კვალიფიციურ საჯარო მოხელეთა ზრდისთვის". საზოგადოებრივი ორგანიზაციები გამოთქვამენ მზადყოფნას ჩაერთონ აღნიშნული საკითხის გადაწყვეტის პროცესში და საქართველოს მთავრობას მიაწოდონ ხედვები. სრულად წყარო: droa.ge

თბილისი. სტუდენტური მოძრაობა „წვანე მუშტის" ორგანიზებით ივანე ჯავახიშვილის სახელობის თბილისის სახელმწიფო უნივერსიტეტის მეორე კორპუსის წინ აქცია გაიმართა. „გადავარჩინოთ საყდრისი", „არა ხუდონჰესს", „სოლიდარობა მუშებს", „დაიცავი ვაკის პარკი" - აქციის მიზანი იყო სტუდენტების მიერ პროტესტის გამოხატვა ბუნებრივი რესურსების მაქსიმალური ათვისების სახელმწიფო პოლიტიკის წინააღმდეგ. აქციის ამსახველი ვიდეო-მასალა ადამიანის უფლებების სწავლებისა და მონიტორინგის ცენტრმა გამოაქვეყნა წყარო:freea.ge, emc

აჭარა. 15 მარტს, ბათუმის პრესკაფეში გაიმართა სტუდენტური დისკუსია. სტუდენტებმა ისაუბრეს თუ როგორ განვითარდა მოვლენები სოფელ ღურტაში და რა მდგომარეობაა ახლა. მომხსენებლები იყვნენ ახალგაზრდული მოძრაობა „ალტერნატივას" წევრები: მარიამ ზედგინიძე, ბათუმის სახელმწიფო უნივერსიტეტი, ინგლისური, ფილოლოგიის პირველი კურსი; ზურა მელქაძე, ბათუმის სახელწიფო უნივერსიტეტი, ფილოსოფია – მეორე კურსის სტუდენტი; გოჩა სურგულაძე, ბათუმის სახელმწიფო უნივერსიტეტი, ფინანსების – მეოთხე კურსის სტუდენტი. დისკუსია მომზადდა „თავისუფალ ჟურნალისტთა სახლის" პროექტის ფარგლებში - „ახალგაზრდებში დემოკრატიული იდეების პოპულარიზაცია". პროექტი ხორციელდება „დემოკრატიის მხარდამჭერი ნაციონალური ფონდის" (NED) მხარდაჭერით.

თბილისი. 13 მარტს, ლიბერალიზმის სასწავლო ცენტრში გაიმართა ფილოსოფოს ლევან ღამბაშიძის ლექცია თემაზე: „მოქალაქე და მისი როლი სახელმწიფოში". მათ, ვინც ვერ შეძლო ლექციაზე დასწრება ცენტრი საშუალებას აძლევს იხილოს ლექციის ვიდეოჩანაწერი. ლექცია (პირველი ნაწილი) ლექცია (მეორე ნაწილი) წყარო: ცენტრის ვებგვერდი სოციალურ ქსელში

14 მარტს, კამპანიის „ეს შენ გეხებას" პრეზენტაციები გაიმართა ბათუმსა და ქუთაისში. კამპანიაში მონაწილე ორგანიზაციებმა ადგილობრივ მოსახლეობას და საზოგადოებრივი ორგანიზაციების წარმომადგენლებს გააცნეს კამპანიის შესახებ ინფორმაცია და ის საკანონმდებლო ინიციატივა, რომლის ფარგლებშიც განახლდა იგი. როგორც საერთაშორისო გამჭვირვალობა - საქართველოს ქუთაისის ოფისის კოორდინატორი თამარ ჭარბაძე ამბობს, მათი მიზანია ქუთაისში მოქმედ არასამთავრობო ორგანიზაციებს გააცნონ გეგმები კამპანიის ფარგლებში. „ჩვენი მიზანია, მოვუწოდოთ თანამშრომლობისკენ და რაც მთავარია, მოვუწოდოთ საქართველოს პარლამენტს დროულად განახორციელოს ისეთი საკანონმდებლო ცვლილებები, რომლებიც უზრუნველყოფს ჩვენი კანონმდებლობის საერთაშორისო სტანდარტებთან შესაბამისობაში მოყვანას იმგვარად, რომ დაცული იყოს საჯარო და კერძო ინტერესებს შორის ბალანსი და თავისუფალი ვიყოთ პირად ცხოვრებაში უკანონო ჩარევებისგან,"- აღნიშნა ჭარბაძემ.

თბილისი. საქართველოს პრეზიდენტი დღეს კამპანიაში – „ეს შენ გეხება" – ჩაბმული არასამთავრობო და მედიაორგანიზაციების წარმომადგენლებს შეხვდა. მათ გიორგი მარგველაშვილს წამოწყებული მოძრაობის შესახებ დეტალური ინფორმაცია მიაწოდეს. როგორც საქართველოს პრეზიდენტმა აღნიშნა, ის პრობლემური საკითხები და მანკიერი მხარეები, რომლებიც ჯერ კიდევ არის როგორც კანონმდებლობაში, ისე პრაქტიკაში, აუცილებლად უნდა გამოსწორდეს. მისი თქმით, ადამიანის უფლებების დაცვა ხელისუფლების უმთავრესი პრიორიტეტია და მის უზრუნველყოფა ყველა მხარის ვალდებულებაა. შეხვედრა პრეზიდენტის სასახლეში ქვეყნის პირველი პირის ინიციატივით გაიმართა და მასში მონაწილეობდნენ საქართველოს ახალგაზრდა იურისტთა ასოციაცია, „საერთაშორისო გამჭვირვალობა - საქართველო", სამართლიანი არჩევნებისა და დემოკრატიის საერთაშორისო საზოგადოება, ადამიანის უფლებათა ცენტრი, ლიბერალური აკადემია - თბილისი, ჟურნალისტური ეთიკის ქარია, ფონდი - ღია საზოგადოება საქართველო, ადამიანის უფლებების სწავლებისა და მონიტორინგის ცენტრი, კონსტიტუციის 42-ე მუხლი, ინფორმაციის თავისუფლების განვითარების ინსტიტუტი. სრულად წყარო: საქართველოს პრეზიდენტის ვებგვერდი სოციალურ ქსელში

კახეთი. 14 მარტს, მედია კაფე თელავში, საქართველოში ნატოს და ევროკავშირის საინფორმაციო ცენტრის შეხვედრა გაიმართა, რომელსაც ადგილობრივი მედია ორგანიზაციების წარმომადგენლები ესწრებოდნენ. ნატოს და ევროკავშირის საინფორმაციო ცენტრის დირექტორის, ელენე გოცაძეს თქმით, შეხვედრის დროს საუბრის მთავარი თემა საქართველოს ნატოსა და ევროკავშირში ინტეგრაციის მიმდინარეობის პრიორიტეტები იყო: ,,შეხვედრაზე დეტალურად იქნა განხილული ნატოსა და ევროკავშირში საქართველოს გაწევრიანების აუცილებლობა და ის პრიორიტეტები, რასაც ჩვენი ქვეყანა მიიღებს. ჟურნალისტებს ასევე დეტალურად გავაცანით ორივე კავშირის შექმნის მიზანი და საქმიანობები. შეხვედრაზე, ასევე ხაზი გაესვა ამ ორგანიზაციების გლობალურ მნიშვნელობას. დაისახა საინფორმაციო ცენტრის და მასმედიასთან თანამშრომლობის, აგრეთვე მათი სხვადასხვა აქტივობებში ჩართვის გეგმები.’’ დღესვე, თელავში, ნატოსა და ევროკავშირის შესახებ საინფორმაციო ცენტრის რეგიონული ბიურო გაიხსნა.

აჭარა. 12-14 მარტს, სამოქალაქო საზოგადოების ინსტიტუტის, ქედის, ხელვაჩაურისა და ქობულეთის ადგილობრივი საზოგადოებრივი დარბაზების ერთობლივი ორგანიზებით, საჯარო შეხვედრები გაიმართა. შეხვედრის მიზანი სოფლის მხარდაჭერის პროგრამის პრიორიტეტების განხილვა და მისი შეფასება იყო. შეხვედრის ფარგლებში მოსახლეობის ნაწილმა დამატებით დაასახელეს ის პრობლემები, რისი გათვალისწინებაც საჭიროა მომავალი წლის პრიორიტეტების განსაზღვრისას.

თბილისი. საქართველოს ახალგაზრდა იურისტთა ასოციაცია საყდრისი–ყაჩაღიანის თაობაზე კულტურის სამინისტროს მიერ მიღებულ გადაწყეტილებას ეხმაურება. 14 მარტს გამართულ პრესკონფერენციაზე საია საქართველოს კულტურისა და ძეგლთა დაცვის სამინისტროს მიერ „RMG Gold”-ისთვის საყდრისი-ყაჩაღიანის ტერიტორიაზე წიაღისეულის მოპოვების მიზნით გაცემულ ნებართვას გამოეხმაურა და სამინისტროს მიერ მიღებულ აღნიშნულ გადაწყვეტილება უარყოფითად შეაფასა. ორგანიზაციის ვებგვერდზე ნათქვამია, რომ კულტურისა და ძეგლთა დაცვის სამინისტრომ გადაწყვეტილება კულტურული მემკვიდრეობის დაცვის ეროვნული სააგენტოს მიერ ჩატარებული კვლევის შედეგად მიიღო, რომელმაც დაადგინა, რომ „საყდრისი-ყაჩაღიანი უძველესი ოქროს მაღარო არ არის. .. საზოგადოებისთვის ამ დრომდე უცნობია, კონკრეტულად რომელი კვლევით იხელმძღვანელა სამინისტრომ გადაწყვეტილების მიღების დროს. უცნობია კვლევის შინაარსიც. როგორც ირკვევა, აღნიშნული გადაწყვეტილება მიღებულია საერთაშორისო ექპერტთა დასკვნის არარსებობის პირობებში, მაშინ როდესაც კულტურისა და ძეგლთა დაცვის მინისტრი იზიარებდა საქართველოში გერმანიის ფედერაციული რესპუბლიკის საელჩოს რეკომენდაციას საყდრისი-ყაჩაღიანის შესახებ საერთაშორისო ექპსერტთა დასკვნის აუცილებლობის თაობაზე. აღნიშნული რეკომენდაციის გაზიარებას მხარს უჭერდა საქართველოს საგარეო საქმეთა სამინისტროც. ამ დროისათვის სრულიად გაუგებარია, თუ რამ გამოწვია საქართველოს კულტურისა და ძეგლთა დაცვის სამინისტროს პოზიციის ცვლილება. .." სრულად წყარო: gyla.ge

თბილისი. საქართველოს ახალგაზრდა კონსტიტუციონალისტთა ასოციაციამ პრესკონფერენცია გამართა 14 მარტს. ორგანიზაციის წარმომადგენლები სახელწიფო საკონსტიტუციო კომისიას სახელმწიფო სიმბოლოების დაცვისკენ მოუწოდებს და მოითხოვს აღნიშნული საკითხი გაწერილი არა მარტო ორგანული კანონით, არამედ საქართველოს კონსტიტუციითაც იყოს. სრულად წყარო: ორგანიზაციის ვებგვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტმა თაკო გეგელიას ბლოგპოსტი – „დაშინების ნარკოპოლიტიკა" – გამოაქვეყნა. „...ნარკოტიკული დანაშაულის წინააღმდეგ ბრძოლის სტრატეგიას სახელმწიფო არ ცვლის. ხელისუფლება ერთი მხრივ, ადგენს ნარკოტიკული საშუალების მოხმარების პრევენციაზე, ზიანის შემცირებაზე, ნარკომომხმარებელთა მიმართ არსებული სტიგმისა და დისკრიმინაციის დაძლევაზე ორიენტირებულ სტრატეგიას, მაგრამ მეორე მხრივ, სხვათა დასაშინებლად პრაქტიკულად პოლიციურ და სასტიკ სისხლის სამართლის პოლიტიკას ატარებს, რომლის ერთადერთი მიზანი პირის დასჯაა, რაც სასჯელს ფსიქოლოგიური იძულების მეთოდად აქცევს. მსგავსი დამოკიდებულება მიუღებელია, რადგან არღვევს პირის კონსტიტუციით გარანტირებულ პატივისა და ღირსების უფლებას. გარდა ამისა, ასეთი მიდგომა უშედეგოა, რადგან პრაქტიკამ მრავალჯერ დაადასტურა, რომ მხოლოდ სასჯლის გამკაცრება ვერ უზრუნველყოფს დანაშაულის კლებას", ნათქვამია ბლოგპოსტში. სრულად წყარო: emc.org.ge

იმერეთი. 14 მარტს ქუთაისის დემოკრატიის ჩართულობის ცენტრში გაიმართა საიას ქუთაისის ფილიალის პროექტის „იაქტიურე და ჩაერთე გადაწყვეტილების მიღების პროცესში" პრეზენტაცია. შეხვედრას ესწრებოდნენ: იმერეთის რეგიონის მაჟორიტარი დეპუტატები, სახელმწიფო რწმუნებული-გუბერნატორის ადმინისტრაციის, მაჟორიტარი დეპუტატის ბიუროს, ადგილობრივი თვითმმართველობის, სამოქალაქო საზოგადოებისა და მასმედიის წარმომადგენლები. წყარო: ორგანიზაციის ვებგვერდი სოციალურ ქსელში

თბილისი. კამპანიის „ეს შენ გეხება" მონაწილე ორგანიზაციები შინაგან საქმეთა მინისტრის მოადგილეს ლევანიზორიას განცხადებაზე პასუხობენ. „უკანონო მიყურადებისა და თვალთვალის წინააღმდეგ არასამთავრობო ორგანიზაციების ნაწილმა სამოქალაქო კამპანია „ეს შენ გეხება" წამოიწყო. .. კამპანიის დაწყებისთანავე შინაგან საქმეთა მინისტრმა ბატონმა ალექსანდრე ჭიკაიძემ დიალოგისთვის მზადყოფნა გამოთქვა. კამპანიაში ჩართული ორგანიზაციები გამოვეხმაურეთ, მინისტრის აღნიშნულ განცხადებას და მზადყოფნა გამოვთქვით უწყების ხელმძღვანელ პირებთან შესახვედრად... სამწუხაროდ შინაგან საქმეთა სამინისტროს წარმომადგენლებმა არ ისურვეს აღნიშნული საკითხების სამუშაო ფორმატში განხილვა და არგუმენტირებული პოზიციების დაფიქსირება კანონპროექტის პრინციპებსა და კონკრეტულ მუხლებზე. ამის ნაცვლად, ყველასთვის მოულოდნელად, მინისტრის მოადგილის, ლევან იზორიას მხრიდან გაჟღერდა უსაფუძვლო ბრალდებები კამპანიაში ჩართული არასამთავრობო ორგანიზაციების წინააღმდეგ", ნათქვამია ორგანიზაციების განცხადებაში, რომლითაც მინისტრის მოადგილეს დასმულ საკითხზე დეტალურად პასუხობენ. სრულად წყარო: კამპანიის ვებგვერდი სოციალურ ქსელში

თბილისი. ორგანიზაცია „მწვანე ალტერნატივა" კულტურისა და ძეგლთა დაცვის სამინისტროს მოუწოდებს „არ დაარღვიოს კანონი და არ განიხილოს RMG Gold-ის უკანონო მოთხოვნა". ორგანიზაციის ვებგვერდზე ნათქვამია, რომ „2014 წლის 14 იანვარს RMG Gold-მა საქართველოს მთავრობას ადმინისტრაციული საჩივრით მიმართა და მოითხოვა კულტურისა და ძეგლთა დაცვის მინისტრის იმ გადაწყვეტილების გაუქმება, რომლითაც RMG Gold-ს არ მიეცა საყდრისი-ყაჩაღიანის უძველესი ოქროს მაღაროს ტერიტორიაზე მოპოვებითი სამუშაოების დაწყების შესაძლებლობა. საქართველოს მთავრობის კანცელარია დღემდე არ აქვეყნებს ადმინისტრაციულ საჩივარზე მიღებულ გადაწყვეტილებას, თუმცა, როგორც მწვანალტერნატივასთვის გახდა ცნობილი, საკითხი განსახილველად კვლავ კულტურისა და ძეგლთა დაცვის სამინისტროს დაუბრუნდა. მწვანე ალტერნატივა აცხადებს, რომ კულტურისა და ძეგლთა დაცვის სამინისტრო არაა უფლებამოსილი, არათუ დააკმაყოფილოს RMG Gold-ის მოთხოვნა კარიერის დამუშავებისა და მოპოვებითი სამუშაოების დასაწყებად დადებითი დასკვნის გაცემის თაობაზე, არამედ საკითხის განხილვითაც კი, სამინისტრო დაარღვევს საქართველოს კანონმდებლობის მოთხოვნებს..." სრულად წყარო: greenalt.org

თბილისი. კულტურის სფეროში მომუშავე არასამთავრობო ორგანიზაციები პრემიერ–მინისტრის განცხადებას გამოუხმაურნენ, რომელიც პრემიერმა საყდრისი–ყაჩაღიანის არქეოლოგიური ობიექტის შესახებ გააკეთა. „...უდიდესი უსამართლობაა, 9 წლიანი საერთაშორისო სამეცნიერო კვლევის შედეგებისა და იმ ფართო საზოგადოებრივი ინტერესის უგულებელყოფა, რაც არსებობს საყდრისი-ყაჩაღიანის მიმართ. პრემიერის კომენტარი ბადებს ეჭვს, რომ საქართველოს მთავრობამ უკვე მიიღო გადაწყვეტილება, რომლითაც RMG Gold-ს ეძლევა ნებართვა, გააფართოვოს თავისი საქმიანობა საყდრისი-ყაჩაღიანის არქეოლოგიური ობიექტის სიახლოვეს. ჩვენ, საქართველოს საზოგადოების სახელით, ვეწინააღმდეგებით ასეთ გადაწყვეტილებას. მოვითხოვთ კულტურის მინისტრის მიერ გერმანიის მხარისათვის მიცემული დაპირების შესრულებას და საერთაშორისო ექსპერტების მოწვევას არქეოლოგიური ობიექტის მნიშვნელობის მიუკერძოებელი შეფასების მიზნით. ფართომასშტაბიანი სამუშაოების წარმოება საყდრისი-ყაჩაღიანის სიახლოვეს გამოიწვევს კულტურული მემკვიდრეობის განადგურებას, გარემოს დაბინძურებას, და საფრთხეში ჩააგდებს გარშემო დასახლებული ადამიანების ჯანმრთელობას. ყოველივე ეს კიდევ უფრო დაამძიმებს რეგიონში არსებულ სოციალურ კრიზისს", ნათქვამია განცხადებაში. ორგანიზაციებმა ამ საკითხზე დღეს პრესკონფერენცია გამართეს სრულად წყარო: ფრონტლაინ ჯორჯიას ვებგვერდი სოციალურ ქსელში

თბილისი. არასამთავრობო ორგანიზაცია „ახალგაზრდა ადვოკატები" საქართველოს მთავარი პროკურატურის ინიციატივასთან დაკავშირებით, გარკვეული კატეგორიის დანაშაულებზე, საპროცესო შეთანხმება აღარ გაფორმდეს, განცხადებას ავრცელებს. მათი აზრით, პროკურატურამ საპროცესო შეთანხმების ინსტიტუტის გადახედვა ფართო დიალოგის რეჟიმში უნდა დაიწყოს. სრულად წყარო: ორგანიზაციის ვებგვერდი სოციალურ ქსელში

თბილისი. აღმოსავლეთ პარტნიორობის სამოქალაქო საზოგადოების ფორუმის საქართველოს ეროვნული პლატფორმის წევრი ორგანიზაციების მიერ განხორციელებული ღონისძიებების შესახებ საინფორმაციო ბიულეტენს ავრცელებს. ბიულეტენი წყარო: პლატფორმის ვებგვერდი სოციალურ ქსელში

თბილისი. აღმოსავლეთ პარტნიორობის სამოქალაქო ფორუმის საქართველოს ეროვნული პლატფორმამ გაავრცელა განცხადება უკრაინაში მიმდინარე მოვლენების შესახებ. „საქართველოს სამოქალაქო საზოგადოება გმობს რუსეთის ფედერაციის მიერ სუვერენული ევროპული სახელმწიფოს - უკრაინის წინააღმდეგ დაწყებულ აგრესიას", ნათქვამია განცხადებაში. ხელმომწერი ორგანიზაციები მოუწოდებენ საერთაშორისო ორგანიზაციებსა თუ სამოქალაქო საზოგადოებას ხმა აღიმაღლონ და ყველა არსებული შესაძლებლობა გამოიყენონ, რათა შეჩერდეს სუვერენულ უკრაინაში „რუსეთის მიერ დაგეგმილი ფართო მასშტაბიანი ინტერვენციისა და მისი შემდგომი ოკუპაციის, ასევე, მისი ტერიტორიის მნიშვნელოვანი ნაწილის ანექსიის მცდელობა". სრულად წყარო: 42–ე მუხლის ვებგვერდი სოციალურ ქსელში

თბილისი. ევრაზიის თანამშრომლობის ფონდი და მისი პარტნიორი საზოგადოებრივი ორგანიზაციები შეშფოთებას გამოთქვამენ სასურსათო ბაზრის მარეგულირებელი კანონმდებლობის რეფორმირების ნელი ტემპის გამო. ისინი მოუწოდებენ საქართველოს პარლამენტსა და მთავრობას, რათა დააჩქაროს რეფორმები ამ სფეროში მომხმარებლის უფლებების დასაცავად. მიმართვა წყარო: epfound.ge