ქვემო ქართლი. 22 მარტს, არასამთავრობო ორგანიზაციების წარმომადგენლებმა სტუდენტებთან და საყდრისის მოსახლეობასთან ერთად ბოლნისის რაიონ დაბა საყდრისთან მდებარე „საყდრისი-ყაჩაღიანის" ტერიტორიაზე აქცია გამართეს. „აქციის წევრები შეეცადნენ, ენახათ, თუ რა მდგომარეობაშია ამჟამად არქეოლოგიური ობიექტი, მაგრამ სამართალდამცველებმა არათუ აქციის მონაწილეები, არამედ მედიის წარმომადგენლებიც არ შეუშვეს, რამაც მცირე ექსცესები გამოიწვია", ნათქვამია „თავისუფალი ასოციაციის" მიერ გავრცელებულ ინფრომაციაში. მონაწილეებმა პროტესტის გამოსახატად ცოცხალი ჯაჭვი გააკეთეს. სრულად წყარო: freea.ge

აჭარა. 22 მარტს, ბათუმის დემოკრატიული ჩართულობის ცენტრში, ჰაინრიხ ბიოლის ფონდის სამხრეთ კავკასიის რეგიონალური ბიურო ორგანიზებით მორიგი დისკუსია – „რატომ არ არის ქალი კაცის თანასწორი საქართველოში?" - გაიმართა. მომხსენებლებმა აჭარის საკანონმდებლო ორგანოდან და ბათუმის სახელმწიფო უნივერსიტეტიდან ყურადღება საქართველოში შექმნილ გენდერულ მდგომარეობაზე გაამახვილეს. მედეა ვასაძე მიიჩნევს, რომ ქალის უფლებები საკანონმდებლო დონეზე უნდა გამყარდეს და მისი როლი საზოგადოებაში კიდევ უფრო გაიზარდოს. შეხვედრაზე გამოიკვეთა ის პრობლემები, რასაც აჭარაში მცხოვრები ქალბატონები აწყდებიან თანასწორობის საკითხებთან დაკავშირებით. შეხვედრას ადგილობრივი სამთავრობო, არასამთავრობო, მედია საშუალებების წარმომადგენლები და სტუდენტები ესწრებოდნენ.

კახეთი. სამოქალაქო ინიციატივა და სათემო განვითარების კავშირი „ნუკრიანი" იწყებენ კოალიციური ახალი პროექტის განხორციელებას – „ჩემი სოფელი". პროექტის მხარდამჭერები არიან აღმოსავლეთ–დასავლეთის მართვის ინსტიტუტი და სათემო განვითარების ცენტრი. პროექტის მიზანია შეიმქნას სოფლის მოსახლეობის თანამონაწილეობისა და სამოქალაქო ჩართულობის კარგი პრაქტიკა და მექანიზმი, რომელიც ხელს შეუწყობს მოქალაქეთა ჩართულობის გაზრდა ადგილზე გადაწყვეტილების მიღების პროცესში და მუნიციპალიტეტეტის წარმომადგენლების ანგარიშვალდებულების გაზრდა მოსახლეობის წინაშე. ამ მიზნის მისაღწევად პროექტის ავტორები გეგმავენ მოსახლეობის ინფორმირებას: უფლებებისა და პრობლემების იდენტიფიცირების შესახებ. და ასევე ადვოკატირების პროცესების დაწყება. წყარო: ორგანიზაციის ვებგვერდი სოციალურ ქსელში

თბილისი. საქართველოს ახალგაზრდა იურისტთა ასოციაციამ ზურაბ ჟვანიას და რაულ უსუფოვის საქმეზე განვითარებულ მოვლენებთან დაკავშირებით განცხადება გაავრცელა. „საზოგადოებრივი ინტერესის გათვალისწინებით აუცილებლად მიგვაჩნია გამოძიება მაღალ პროფესიულ დონეზე, ობიექტურად და ამ საქმის პოლიტიზირების, პოლიტიკურ ძალთა დაპირისპირების, გამოძიების უახლოეს დღეებში დასრულების მრავალჯერადად დაანონსების გარეშე წარიმართოს. ეს აუცილებელია, რათა არ დაზიანდეს გამოძიების ინტერესები. ...გვსურს აღვნიშნოთ, რომ საია დადებითად აფასებს საქართველოს პრეზიდენტის პოზიციას, რომ ,,საზოგადოებრივი ინტერესი არის არა მძიმე კადრების ნახვაში, არამედ გამოძიების დასრულებაში" და მოუწოდებს პროკურატურას გამოიყენოს ყველა ძალისხმევა, რომ აღნიშნული საქმე დროულად, ეფექტურად და მაღალ პროფესიულ დონეზე იქნეს გამოძიებული", ნათქვამია განცხადებაში. სრულად წყარო: gyla.ge

თბილისი. „ლიბერალიზმის სასწავლო ცენტრში" 20 მარტს გაიმართა ფილოსოფოს თათა ცოფურაშვილის ლექცია: „ქალი ქრისტიანობაში". მათ ვინც ვერ შეძლო ლექციაზე დასწრება, ცენტრი საშუალებას აძლევს ჩანაწერი იხილოს. ლექცია: „ქალი ქრისტიანობაში" წყარო: ცენტრის ვებგვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტმა ფინანსთა სამინისტროს ადმინისტრაციული საჩივარით მიმართა. საჩივრის წარდგენის საფუძველი გახდა სამინისტროდან მოთხოვნილი საჯარო ინფორმაციის არასრული მიღება. „თხუთმეტი მოთხოვნიდან სამინისტრომ სრულყოფილად უპასუხა მხოლოდ ხუთ მოთხოვნას. დანარჩენ ორ საკითხზე სამინისტრომ ინფორმაცია არ გასცა. ფინანსთა სამინისტრომ არასრულყოფილი სახით მოგვაწოდა ინფორმაცია თანამდებობის პირთა პრემიების, სახელფასო დანამატების, სამივლინებო და „როუმინგულ", ასევე ავტოპარკის ტექნიკურ მომსახურებაზე გაწეული ხარჯების შესახებ. მოთხოვნებზე ღონისძიებების ხარჯებსა და შესყიდვებთან დაკავშირებით სამინისტროდან მხოლოდ ჯამური ღირებულებები მივიღეთ. უწყებამ არ მოგვაწოდა შესყიდვების გადაუდებელი აუცილებლობის შესახებ წერილობითი შეთანხმებები. ფინანსთა სამინისტრომ უარი განაცხადა სამუშაო ელექტრონული ფოსტიდან სამსახურეობრივ საქმიანობასთან დაკავშირებით მიღებული და გაგზავნილი წერილების ასლების გაცემაზე იმ მოტივით, რომ „აღნიშნული არ წარმოადგენს საჯარო ინფორმაციას", ნათქვამია ორგანიზაციისვებგვერდზე. ინსტიტუტი მიიჩნევს, რომ „საჯარო ინფორმაციის ხელმისაწვდომობის ურუნველყოფაზე პასუხისმგებელი პირის მიერ კანონმდებლობით გათვალისწინებული ვალდებულება არ იქნა შესრულებული" და ითხოვს სამინისტროსგან ინფორმაციის სრულყოფილი სახით გაცემას. სრულად წყარო: idfi.ge

თბილისი. კამპანიის „ეს შენ გეხება! ისევ გვისმენენ!" მონაწილეები, 21 მარტს ფონდ „ღია საზოგადოება საქართველოს" ოფისში შეიკრიბნენ და პროტესტის ნიშნად ერთი საათით (13:00–დან 14:00–მდე) გამორთეს მობილური ტელეფონები. „აქციის სახელწოდებით „ერთი საათი მოსმენების გარეშე" მიზანია მოქალაქეების ინფორმირება საგამოძიებო ორგანოების მიერ ფარული მიყურადების უკანონოდ განხორციელების შესაძლებლობის შესახებ. ყველას მოვუწოდებთ, ყოველ პარასკევს ერთი საათით, 13:00-დან 14:00 საათამდე, გამორთონ მობილური ტელეფონები, სანამ პარლამენტი არ მიიღებს იმ კანონს, რომელიც სამართალდამცავების მიერ მოქალაქეების ტელეფონების უნებართვო მოსმენების პრაქტიკას დაასრულებს. ეს შენ გეხება, ერთად მოვითხოვოთ ცვლილება!", ნათქვამია საერთაშორისო გამჭვირვალობა საქართველოს ვებგვერდზე სოციალურ ქსელში. წყარო: საერთაშორისო გამჭვირვალობა საქართველოს ვებგვერდი სოციალურ ქსელში

თბილისი. კამპანიის „ეს შენ გეხებას" ფარგლებში დღეს, 21 მარტს, აქცია გაიმართება. არასამთავრობო ორგანიზაციები, ფონდ ღია საზოგადოება – საქართველოს" ოფისში ტელეფონებს დემონსტრაციულად 1 საათით გამორთავენ. ამ ფორმით კამპანიაში ჩართული ორგანიზაციები ფარულ მიყურადღებას აპროტესტებენ და აღნიშნულ საკითხთან დაკავშირებით კანონში ცვლილეების შეტანას ითხოვენ. აქციას სისტემური ხასიათი ექნება და ფარული მიყურადების და უკანონო მოსმენების წინააღმდეგ მიმართული საკანონმდებლო პაკეტის მიღებამდე, ყოველ პარასკავს 13:00–14:00 საათამდე გაგრძელდება. წყარო: კამპანიის ვებგვერდი სოციალურ ქსელში

თბილისი. არასამთავრობო ორგანიზაციები საქართველოს რეგიონული განვითარების სამთავრობო კომისიას, თელავის, ოზურგეთის, ზუგდიდის, გორის, ამბროლაურის, მცხეთისა და ახალციხის მუნიციპალიტეტების საკრებულოებს მიმართავენ. „13 მარტს საქართველოს რეგიონული განვითარების სამთავრობო კომისიამ გაავრცელა განცხადება, ... კომისიის განცხადება ჩვენ იმედს გვიტოვებდა, რომ შვიდი მუნიციპალიტეტის „ქალაქად" და „სოფლად" მექანიკური დაყოფის გადაწყვეტილება არ იყო საბოლოო და ხელისუფლებას მართლაც სურდა, მოესმინა სამოქალაქო საზოგადოების აზრი. ...გამომდინარე იმ ფაქტიდან, რომ ადგილობრივი თვითმმართველობის არჩევნებამდე სულ უფრო და უფრო ცოტა დრო რჩება, ჩნდება ეჭვი, რომ სამთავრობო კომისია პროცესს ხელოვნურად აჭიანურებს და არ სურს ალტერნატიული ხედვების მოსმენა". განცხადებაზე ხელმომწერი ორგანიზაციები მოითხოვენ „რეგიონული განვითარების სამთავრობო კომისიამ სასწრაფოდ განაახლოს მუნიციპალიტეტებში მოსახლეობასთან შეხვედრები, სადაც განხილული იქნება ჩვენს მიერ წარდგენილი ალტერნატიული წინადადებებიც". სრულად წყარო:www.lsg.ge

თბილისი. კოალიციამ „მედიის ადვოკატირებისთვის" „TV MR საქართველოს" ირგვლივ განვითარებულ მოვლენებზე განცხადება გაავრცელა. „კოალიცია მიიჩნევს, რომ კომპანია „TV MR საქართველოს" მიერ კვლევაში მონაწილე პირთა პერსონალური მონაცემების მესამე პირისთვის გადაცემა საფრთხის შემცველია ქვეყანაში მაუწყებელთა რეიტინგების გაზომვის პროცესისათვის, ასეთმა ქმედებამ შესაძლოა გამოიწვევს „TV MR საქართველოს" მიმართ კერძო კომპანიების მხრიდან უნდობლობა, რაც უსათუოდ უარყოფითად აისახება როგორც კომპანიის შემოსავლებსა და ფუნქციონირებაზე, ასევე სარეკლამო ბაზრის მდგრადობაზე. მივესალმებით შემოსავლების სამსახურის წარმომადგენლების მიერ კოალიციასთან გაცხადებულ პოზიციას - მედიაციისათვის მზაობის თაობაზე და ვიტოვებთ იმედს, რომ შემოსავლების სამსახური გადახედავს საკითხისადმი უწყების მიდგომას და მოთხოვნებს, იმგვარად, რომ საგადასახადო შემოწმებამ არ დააზარალოს განსაკუთრებული მნიშვნელობის მქონე კერძო კომპანიის საქმიანობა", ნათვამია განცხადებაში. სრულად წყარო: www.idfi.ge

ევროკავშირი იწყებს კონსულტაციებს სამოქალაქო საზოგადოებასთან თანამშრომლობის საგზაო რუკებზე. საგზაო რუკის მიზანია განავითაროს ერთიანი სტრატეგიული ჩარჩო ევროკავშირის დელეგაციებისა და წევრი ქვეყნების სამოქალაქო საზოგადოებასთან ქვეყნის დონეზე თანამშრომლობისთვის. იგი უნდა შემუშავდეს ადგილობრივი სამოქალაქო საზოგადოების წევრების მოსაზრებების გაცნობის შედეგად. თქვენ შესაძლებლობა გეძლევათ გაგზავნოთ კონკრეტული კომენტარები, შეთავაზებები ევროკავშირის წარმომადგენლობაში 2014 წლის 30 აპრილამდე, შემდეგ ელ–ფოსტაზე: Helga.PENDER@eeas.europa.eu იხილეთ სახელმძღვანელო: „ევროკავშირის საგზაო რუკები სამოქალაქო საზოგადოებასთან თანამშრომლობისათვის"

კამპანია „ეს შენ გეხება–ისევ გვისმენენ" გრძელდება. კამპანიაში მონაწილე ორგანიზაციის წარმომადგენლებმა და მოხალისეებმა კამპანიის შესახებ საინფორმაციო ბროშურები დაარიგეს და საქართველოს სხვადასხვა ქალაქში აქციები გამართეს. ასევე, დაიწყო ხელმოწერების შეგროვება მაჟორიტარი დეპუტატების სახელზე, რომლითაც მოქალაქეები საკუთარი წარმომადგენლებისგან საკანონმდებლო ორგანოში მხარდაჭერას მოითხოვენ. აქტივობები უკვე გაიმართა ზუგდიდში, რუსთავში, გორში, ქუთაისში, თელავში, ბათუმსა და ოზურგეთში. სრულად წყარო: ეს შენ გეხება, გვერდი სოციალურ ქსელში

თბილისი. „საქართველოს ახალგაზრდა კონსტიტუციონალისტთა ასოციაციამ" დეპუტატების იმუნიტეტის შესუსტების საკითხთან დაკავშირებით განცხადება გაავრცელა. რიგ საკითხებთან ერთად, ორგანიზაცია „აუცილებლად მიიჩნევს, საქართველოს პარლამენტის რეგლამენტში კონკრეტული მექანიზმის გაწერას, რომელშიც კონკრეტულად აისახება პარლამენტის თანხმობა დეპუტატისთვის იმუნიტეტის მოხსნის თაობაზე". სრულად წყარო: gyca.ge

თბილისი. კამპანია „ეს შენ გეხებას" მონაწილეებმა სოციალურ ქსელში განცხადება გაავრცელეს. ორგანიზაციები იწყებენ აქციას, რომელიც ფარული მიყურადებისა და უკანონო მოსმენების წინააღმდეგ მიმართული საკანონმდებლო პაკეტის პარლამენტში მიღებამდე, ყოველ პარასკევს, 13:00-დან 14:00 საათამდე მობილური ტელეფონების გამორთვას გულისხმობს. „მოქალაქეებს, რომელებსაც არ გსურთ ფარული მიყურადებისა და მოსმენების დანერგილი პრაქტიკის გაგრძელება და გინდათ შეცვალოთ მოქმედი კანონმდებლობა, გთავაზობთ, პარასკევს, 13:00 საათზე, ცოტა ხნით ტელეფონის გამორთვით ჩაერთოთ ჩვენს აქციაში და ჩვენთან ერთად მოითხოვოთ საკანომდებლო ცვლილებების მიღება", ნათქვამია განცხადებაში.  სრულად წყარო:ორგანიზაციის გვერდი სოციალურ ქსელში

თბილისი. „გო ჯგუფმა" ფილმი - „ჯავახეთის გაკვეთილები" გამოაქვეყნა. ფილმი ეხება თემას:  „რა უნდა შეიცვალოს იმისთვის, რომ საქართველოს მოქალაქეებმა ქართული ენა იცოდნენ?”. „სტუდია თვითმხილველის" რეპორტიორებმა თემაზე ფილმები 2010, 2011 წლებშიც გადაიღეს, თუმცა „გადის წლები, მაგრამ პრობლემა ჯერ კიდევ ისეთივე აქტუალურია".  ფილმი   წყარო:ორგანიზაციის გვერდი სოციალურ ქსელში

თბილისი. Media.ge ადამიანის უფლებების სწავლებისა და მონიტორინგის ცენტრის წარმომადგენელთან ინტერვიუს აქვეყნებს. პორტალთან ვახუშტი მენაბდე კამპანია - „ეს შენ გეხებას" - შესახებ საუბრობს. სრულად წყარო: media.ge

თბილისი. არასამთავრობო ორგანიზაციებმა განცხადება გაავრცელეს „თი–ვი ემ–არ საქართველოს" შესახებ, რომელსაც შემოსავლების სამსახური ამოწმებს. კომპანია საქართველოში ნილსენის სატელევიზიო აუდიტორიის გაზომვების ლიცენზირებული წარმომადგენელია და საქართველოში სატელევიზიო რეიტინგებს იკვლევს. არასამთავრობო ორგანიზაციების განცხადებაში ნათქვამია, რომ „შემოსავლების სამსახური კომპანიისგან კვლევაში მონაწილე 330 ოჯახის მისამართების გამჟღავნებას ითხოვს. აღნიშნული ინფორმაცია კონფიდენციალურია და მისი გამჟღავნება ზიანს მიაყენებს არა მხოლოდ კომპანიას, არამედ, ზოგადად, სარეკლამო და სამაუწყებლო სექტორის განვითარებას.... მას შემდეგ, რაც აუდიტორების მოთხოვნებს არ დაემორჩილა, „თი-ვი ემ-არი” 800 ლარით დაჯარიმდა". ხელმომწერი ორგანიზაციები მიიჩნევენ, რომ შემოსავლების სამსახურმა „არ უნდა გადადგას ისეთი ნაბიჯები, რაც ზიანს მიაყენებს საქართველოში თავისუფალი და კონკურენტუნარიანი სარეკლამო ბაზრის განვითარებას, რაც თავის მხრივ, პოლიტიკური ზეგავლენებისგან თავისუფალი მედიაგარემოს არსებობას უზრუნველყოფს. ხისტმა მიდგომამ შესაძლოა შემოსავლების სამსახურის დამოუკიდებლობისა და პროფესიონალიზმისადმი ნდობა კითხვის ნიშნის ქვეშ დააყენოს". სრულად წყარო:transparency.ge

თბილისი. საერთაშორისო გამჭვირვალობა საქართველო აგრარული უნივერსიტეტის პრივატიზებასთან დაკავშირებულ გამოძიებას გამოეხმაურა. „მიგვაჩნია, რომ ძალიან მნიშვნელოვანია, აგრარული უნივერსიტეტის საქმე გამჭვირვალედ და მიუკერძოებლად წარიმართოს. აუცილებელია, რომ საზოგადოებას ჰქონდეს სრული, ობიექტური და დროული ინფორმაცია მიმდინარე პროცესებზე და არ შეიქმნას შთაბეჭდილება, რომ გამოძიება პოლიტიკური მოტივაციით მოქმედებს. აუცილებელია, რომ სახელმწიფომ, ერთი მხრივ, განუხრელად დაიცვას კანონი და უზრუნველყოს კანონის უზენაესობის პრინციპის მოქმედება ყველა პირის მიმართ მათი პოლიტიკური შეხედულებისა თუ სტატუსის მიუხედავად და, მეორე მხრივ, უზრუნველყოს ინვესტორების კანონიერი ინტერესების დაცვა", ნათქვამია ინფორმაციაში. „საერთაშორისო გამჭვირვალობა – საქართველო”, საკითხის მაღალი აქტუალობიდან გამომდინარე, ყურადღებით მიადევნებს თვალს მიმდინარე პროცესს. სრულად წყარო: transparency.ge

თბილისი. ადამიანის უფლებების წავლებისა და მონიტორინგის ცენტრმა სამოქალაქო აქტივიზმის პლატფორმის ფარგლებში გამოაქვეყნა ლუკა ნახუცრიშვილის ლექცია: „რა შეიძლება იყოს სოლიდარობა?". „რა შეიძლება იყოს სოლიდარობა?" წყარო: ორგანიზაციის ვებგვერდი სოციალურ ქსელში

თბილისი.18 მარტს ორგანიზაციამ „პარტნიორობა ადამიანის უფლებებისთვის", საქართველოს რეფორმების ასოციაციასთან ერთად გამართა სამუშაო შეხვედრა, რომლის მიზანი იყო საკანონმდებლო ცვლილების პაკეტის შემუშავება, შეზღუდული შესაძლებლობის მქონე პირთა და ფსიქო-სოციალური საჭიროების მქონე ქალთა უფლებების უკეთ დასაცავად. შეხვედრას ესწრებოდნენ შშმ პირთა საკითხებზე მომუშავე არასამთავრობო ორგანიზაციები. შეხვედრის პირველ ნაწილში განიხილულ იყო შშმ პირთა საკითხებზე მომუშავე არასამთავრობო ორგანიზაციების როლი სხვადასხვა საერთაშორისო ორგანიზაციებში ჩრდილოვანი ანგარიშების წარდგენის დროს. შეხვედრის მეორე ნაწილი დაეთმო შშმ ქალთა მიმართ ძალადობისა და ოჯახში ძალადობის საკითხებს. განსაკუთრებული ყურადღება გამახვილდა საქართველოში ქალთა ძალადობისაგან დაცვის საერთაშორისო სტანდარტების იმპლემენტაციის გამოწვევებზე და დაიგეგმა სამომავლო ღონისძიებები. წყარო: ორგანიზაციის ვებგვერდი სოციალურ ქსელში

თბილისი. საია საქართველოს პარლამენტის თავმჯდომარის იმ განცხადებას ეხმაურება, სადაც „სისხლის სამართლის საპროცესო კოდექსის 167-ე და 169-ე მუხლები არაკონსტიტუციურად არის შეფასებული". საია უარყოფითად აფასებს ინიციატივას არაკონსტიტუციურობის მოტივით სისხლის სამართლის საპროცესო კოდექსში შეტანილ იქნეს იმგვარი ცვლილებები, რაც პროკურატურას უფლებას მისცემს, დეპუტატის მიმართ დაიწყოს სისხლისსამართლებრივი დევნა პარლამენტის თანხმობის გარეშე. ორგანიზაცია ასევე არ ეთანხმება „პარლამენტის თავმჯდომარის განხცხადებას იმის თაობაზე, რომ სისხლის სამართლის საპროცესო კოდექსი აბსოლუტურ იმუნიტეტს ანიჭებს დეპუტატს. აბსოლუტური არ შეიძლება ეწოდოს იმუნიტეტს, რომლის მოხსნაც შესაძლებელია პარლამენტის თანხმობით. ამასთან, გასათვალისწინებელია პარლამენტის თავმჯდომარის შეფასება იმასთან დაკავშირებით, რომ არ არსებობს მოცემული საკითხის მარეგულირებელი ცალკეული რეგულაციები. შესაბამისად, მიზანშეწონილი იქნება პარლამენტის ძალისხმევა ამ რეგულაციების ნათლად დადგენისკენ იქნეს მიმართული და არა დეპუტატის დაცვის მაღალი სტანდარტის შემცველი ნორმების გაუქმებისკენ", ნათქვამია განცხადებაში. სრულად წყარო: gyla.ge

თბილისი. 17 მარტს, სასტუმრო „ქორთიარდ მარიოტში" არასამთავრობო ორგანიზაციებმა რეგიონული განვითარების სამთავრობო კომისიის წევრებთან და მუნიციპალიტეტების მაჟორიტარ დეპუტატებთან ერთად თვითმმართველობის რეფორმაზე იმსჯელეს. შეხვედრაში მონაწილეობდა 50-ზე მეტი საზოგადოებრივი ორგანიზაცია. შეხვედრა წარმოადგენდა სამოქალაქო საზოგადოების რეაგირებას 2014 წლის 13 მარტს რეგიონული განვითარების სამთავრობო კომისიის მიერ გავრცელებულ განცხადებაზე, რომლის თანახმადაც, კომისია „მოსახლეობას სთავაზობს თვითმმართველი ქალაქების გამოყოფის შედეგად დარჩენილ ტერიტორიაზე არსებულ დასახლებათაგან თითო თვითმმართველი თემის შექმნის შესაძლებლობის განხილვას, ადმინისტრაციული ცენტრებით თვითმმართველ ქალაქებში". ამ საკითხზე გუშინვე არასამთავრობო ორგანიზაციებმა განცხადება გაავრცელეს. სრულად წყარო: osgf.ge