შიდა ქართლი. 23 ოქტომბერს, გორის „კეთილდღეობისა და განვითარების ცენტრთან” არსებული გორის სამოქალაქო აქტივიზმის ცენტრის მოხალისეები, გორის მუნიციპალიტეტის მერიის განათლების, კულტურის, სპორტისა და ახალგაზრდული სამსახურის ხელმძღვანელებს შეხვდნენ. ახალგაზრდებმა დეტალური ინფორმაცია მიიღეს მუნიციპალური პროგრამების შესახებ როგორც ახალგაზრდული ასევე კულტურის, სპორტის და განათლების კუთხით. შეხვედრის მეორე ეტაპი კითხვა პასუხის რეჟიმში წარიმართა. სრულად... წყარო: ორგანიზაციის ვებგვერდი სოციალურ ქსელში

თბილისი. სახალხო დამცველი სახელმწიფო თანამდებობის პირებს არასამთავრობო ორგანიზაციებთან მიმართებით საერთაშორისო დემოკრატიული სტანდარტების დაცვისკენ მოუწოდებს. „ბოლო პერიოდში ხელისუფლების მაღალი თანამდებობის პირების მხრიდან გაკეთდა არაერთი განცხადება, რომელიც მიზნად ისახავდა საქართველოს დემოკრატიული განვითარებისთვის უმნიშვნელოვანესი საკითხების, კორუფციის პრევენციის, ადამიანის უფლებების დაცვის, სახელმწიფო ინსტიტუტების საქმიანობის და არჩევნების მონიტორინგის მიმართულებით მომუშავე არასამთავრობო ორგანიზაციებისა და მათი ხელმძღვანელი პირების დისკრედიტაციას. საქართველოს სახალხო დამცველს სურს შეახსენოს ხელისუფლებას ის საერთაშორისო ვალდებულებები, რასაც გაერო, ეუთო, ევროპის საბჭო და სხვა საერთაშორისო ორგანიზაციები სახელმწიფოებს უწესებენ ადამიანის უფლებების დამცველების საქმიანობის ხელშესაწყობად", ნათქვამია ომბუდსმენის ვებგვერდზე. სრულად... წყარო: ომბუდსმენის ვებგვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტმა (IDFI), ღია საზოგადოება - ბუდაპეშტის ფონდის ფინანსური მხარდაჭერით, პოსტსაბჭოთა ქვეყნებში სახელმწიფო არქივების ღიაობის შეფასების ახალი ვებგვერდის - www.Open-Archives.org - პრეზენტაცია გამართა. შეხვედრა IDFI-ის აღმასრულებელმა დირექტორმა გიორგი კლდიაშვილმა გახსნა. მან მიმოიხილა ის მიღწევები და გამოწვევები, რაც არქივების ღიაობის კუთხით არსებობს საქართველოში. გიორგი კლდიაშვილმა დამსწრე საზოგადოებას გააცნო ვებგვერდის ტექნიკური შესაძლებლობები და ასევე ისაუბრა იმ საინტერესო მონაცემებზე, რომლებიც ხელმისაწვდომია ნებისმიერი დაინტერესებული პირისთვის. სრულად  წყარო: ორგანიზაციის ვებგვერდი

თბილისი. საზოგადოებრივი ორგანიზაციები, ხელისუფლების წარმომადგენლების მხრიდან მესამე სექტორის გახშირებული კრიტიკის გამო, კიდევ ერთ განცხადებას ავრცელებენ. საქართველოს ხელისუფლების და მმართველი პარტიის ხელმძღვანელი პირების მხრიდან გრძელდება მიზანმიმართული თავდასხმები არასამთავრობო ორგანიზაციებსა და მათ ხელმძღვანელებზე”, - ვკითხულობთ განცხადებაში, - „იუსტიციის მინისტრის აგრესიული და სიცრუეზე დაფუძნებული კომუნიკაციის სტილი და ხელისუფლების წარმომადგენელთა კოორდინირებული შეტევა სამოქალაქო საზოგადოების აქტიური ორგანიზაციების წინააღმდეგ ამცირებს ხელისუფლებასა და სამოქალაქო საზოგადოებას შორის კონსტრუქციული თანამშრომლობის შესაძლებლობას, რაც ქვეყანაში დემოკრატიული რეფორმების აუცილებელი ატრიბუტია. ამგვარი ქცევა სრულიად შეუფერებელია ადამიანის უფლებებსა და დემოკრატიაზე ორიენტირებული სახელმწიფოს იდეასთან. სამოქალაქო საზოგადოების მიმართ ხელისუფლების აგრესიული რიტორიკა შეშფოთებას იწვევს საერთაშორისო დონეზეც, არაერთი უფლებადაცვითი ორგანიზაცია საქართველოს ხელისუფლებას მოუწოდებს თავი შეიკავოს მსგავსი თავდასხმებისაგან”. სრულად  წყარო: emc.org.ge

აშშ–ის საერთაშორისო განვითარების სააგენტომ გამოაქვეყნა საზოგადოებრივი ორგანიზაციების განვითარების ყოველწლიური ინდექსი. მასში, სხვა ქვეყნების მსგავსად, განხილულია საქართველოში საზოგადოებრივი ორგანიზაციების განვითარების საკითხები, სხვადასხვა ასპექტის მიხედვით. შეგახსენებთ, რომ აშშ–ს საერთაშორისო განვითარების სააგენტო, 1997 წლიდან, ყოველწლიურად სწავლობს საზოგადოებრივი ორგანიზაციების მდგომარეობას სხვადასხვა ქვეყანაში და აქვეყნებს ინდექსს. რიგით 21–ე გამოცემა სააგენტომ საერთაშორისო ორგანიზაციებთან FHI 360 და ICNL პარტნიორობით მოამზადა. საზოგადოებრივი ორგანიზაციების განვითარების ინდექსი... წყარო: fhi360.org

თბილისი. 30 ოქტომბერს, ქალთა მზერა (Women’s Gaze) გამართავს ვებინარს: დონორებთან ურთიერთობა და პროექტის მართვის გამოცდილების გაზიარება. დამატებითი ინფორმაციისთვის და მონაწილეობის მისაღებად დაუკავშირდით ორგანიზაციას მეილზე: Womensgaze@gmail.com ან მისწერეთ პირადად სოციალურ ქსელში. მსურველთა რეგისტრაციის ბოლო ვადაა 28 ოქტომბერი. სრულად... წყარო: ორგანიზაციის ვებგვერდი სოციალურ ქსელში

იმერეთი. 23 სექტემბერს, საქველმოქმედო ჰუმანიტარული ცენტრი „აფხაზეთის" ქუთაისის ოფისში დაიწყო ორდღიანი ტრენინგი თემაზე „ბინათმესაკუთრეთა ამხანაგობების მართვა და განვითარება", რომელსაც დევნილთა თემში მცხოვრები ლიდერი-ახალგაზრდები ესწრებიან. ტრენინგი მოიცავს ისეთ თემებს, რომელიც აუცილებელია ბინათმესაკუთრეთა ამხანაგობის შექმნის, მართვის და წარმატებული ფუნქციონირებისათვის. სრულად... წყარო: ორგანიზაციის ვებგვერდი სოციალურ ქსელში

თბილისი. საერთაშორისო გამჭვირვალობა - საქართველო აქვეყნებს ბლოგპოსტს: „საჯარო სამსახურის ბიურომ უნდა შეისწავლოს თანამდებობის პირების ქონების შესახებ გავრცელებული ინფორმაცია". „შაბათს, 13 ოქტომბერს, ტელეკომპანია „რუსთავი 2-ის" ეთერში გავიდა სიუჟეტი ზოგიერთი მაღალი თანამდებობის პირის ძვირადღირებული უძრავი ქონების შესახებ. სიუჟეტში მოცემული ინფორმაცია ლეგიტიმურ კითხვებს ბადებს იმასთან დაკავშირებით, თუ რამდენად სრულად აქვთ თანამდებობის პირებს დეკლარირებული ქონება და შემოსავლები, ასევე იმის შესახებ, ხომ არ იღებენ ისინი შემოსავალს კანონის გვერდის ავლით". ორგანიზაცია მოუწოდებს ხელისუფლებას შეისწავლოს კორუფციის შესაძლო შემთხვევები. სრულად... წყარო: www.transparency.ge

თბილისი. 25 ოქტომბერს, ხუთშაბათს, ფონდ „ღია საზოგადოება-საქართველოს" ოფისში, გაიმართება კონსულტაციის დღე. ფონდის პროგრამების მენეჯერები თქვენს შეკითხვებს უპასუხებენ. კონსულტაციები ჩატარდება პროგრამების მიხედვით: საზოგადოებრივი ჯანმრთელობა - 12:00 სთ; მონაწილეობითი დემოკრატიის პროგრამა - 14:00 სთ; ადამიანის უფლებები - 16:00 სთ; ევროინტეგრაცია - 17:00 სთ; ეროვნული ინტეგრაცია - 12:00 სთ, 30 ოქტომბერი. სრულად... წყარო: www.osgf.ge

„რეგულირების გავლენის შეფასება - პრაქტიკულ სახელმძღვანელო" USAID/PROLoG-ის მხარდაჭერით თავისუფალი უნივერსიტეტის მიერ შემუშავდა. იგი დაეხმარება დაინტერესებულ მხარეებს შეაფასონ არსებული ან/და შეთავაზებული რეგულაციები და წარმოადგინონ ალტერნატივები. სახელმძღვანელო... წყარო: ორგანიზაციის ვებგვერდი სოციალურ ქსელში

სამეგრელო. „საერთაშორისო გამჭვირვალობა - საქართველოს” ორგანიზებით, ზუგდიდში პარკირების სისტემის ცვლილების პროექტთან დაკავშირებით დისკუსია გაიმართა. „სამუშაო ჯგუფის მიერ მომზადებული დადგენილების პროექტის თანახმად, ამოქმედდება პარკირების სააბონემენტო სისტემა, საფასური დროის მონაკვეთის მიხედვით დაწესდება, გამოიყოფა ადგილები შშმ პირებისთვის, მოეწყობა ელექტრომობილების საპარკინგე ადგილები დასამუხტი აპარატურით. საკრებულო ასევე განიხილავს ცენტრალური ბაზრის მიმდებარე ტერიტორიაზე (კედიას ქუჩაზე) გადახდის საათობრივი რეჟიმის დაწესების შესაძლებლობას, რაც ამ დრომდე პროცესში ჩართულ მხარეებს შორის აზრთა სხვადასხვაობას იწვევს”, ნათქვამია ორგანიზაციის ვებგვერდზე. სრულად... წყარო: ორგანიზაციის ვებგვერდი სოციალურ ქსელში

კახეთი. როგორ მოვამზადოთ და რა მნიშვნელობა აქვს ხარისხიან მასალას ადგილობრივი ხელისუფლების ღიაობის, საქმიანობის და წარმატების უკეთ წარმოსაჩენად? ამ თემას ეხებოდა DFI-ის მიერ ჩატარებული ტრენინგი, რომელსაც კახეთის რეგიონის/8 მუნიციპალიტეტის საზოგადოებასთან ურთიერთობის დეპარტამენტის ხელმძღვანელები ესწრებოდნენ. ტრენინგს უძღვებოდნენ IDFI-ის კომუნიკაციების მენეჯერი მერი მახარაშვილი, IDFI-ის ანტიკორუფციული მიმართულების ხელმძღვანელი საბა ბუაძე. 2016 წლიდან დღემდე, IDFI-იმ 22 ვებგვერდი მოამზადა საქართველოს სხვადასხვა მუნიციპალიტეტებისთვის. სრულად... წყარო: ორგანიზაციის ვებგვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ჯორჯო აგამბენის ნაშრომს „საგანგებო მგომარეობას", ნინო მიქაშავიძის თარგმანით. „სწორედ ეს უკაცრიელი სივრცე, რომელიც საჯარო სამართალსა და პოლიტიკურ ფაქტს, იურიდიულ წესრიგსა და ცხოვრებას შორის არსებობს, არის წინამდებარე ნაშრომის საკვლევი თემა. მხოლოდ იმ შემთხვევაში შევძლებთ მიახლოებით მაინც გავიგოთ მნიშვნელობის მასშტაბურობა, რომელიც პოლიტიკურსა და იურიდიულს, კანონსა და ცოცხალ არსებას შორის არსებულ სხვაობას (ან სავარაუდოდ არსებულ სხვაობას) ეხება, თუ ამ ბუნდოვან ტერიტორიას ფარდას ავხდით. იქნებ მხოლოდ ამის შემდეგ გახდეს შესაძლებელი, რომ პასუხი გაეცეს კითხვას, რომელიც მუდმივად დაისმის დასავლური პოლიტიკის ისტორიაში: რას ნიშნავს, იმოქმედო პოლიტიკურად?". სრულად... წყარო: emc.org.ge

csogeorgia.org საზოგადოებრივ ორგანიზაციებს, ნებისმიერ დაინტერესებულ პირს ყოველ ხუთშაბათს კვირის საგრანტო კონკურსების, სტიპენდიების, ვაკანსიებისა და ტენდერების შესახებ ინფორმაციას სთავაზობს. ელ.ბიულეტენი...

თბილისი. „საერთაშორისო გამჭვირვალობა-საქართველო” ნეგატიურად აფასებს ტელეკომპანია „იბერიის" მაუწყებლობის შეწყვეტის ფაქტს და სოლიდარობას უცხადებს ჟურნალისტებს. „ტელევიზიის ეთერი 16 ოქტომბერს ფინანსური პრობლემების გამო გაითიშა და ეკრანზე მხოლოდ წარწერა „ხელისუფლებამ დახურა იბერია!!!” ჩანს. მიუღებელია, რომ ხელისუფლებასა და "ომეგა ჯგუფს” შორის მიმდინარე დავის შედეგად ტელეკომპანიამ, რომლის მთავარი დამფინანსებელი "ომეგა ჯგუფია”, მაუწყებლობა შეაჩერა. სამწუხაროა, რომ მსგავსი დავების გამო ჟურნალისტებს პრობლემები ექმნებათ, რაც ნეგატიურად მოქმედებს მათ სამუშაო პირობებზე. ტელეკომპანიის მაუწყებლობის შეწყვეტა უარყოფითად აისახება მედია გარემოსა და წინასაარჩევნო პერიოდზე საქართველოში", ნათქვამია ორგანიზაციის ვებგვერდზე სოციალურ ქსელში. ორგანიზაცია მხარდაჭერას უცხადებს ტელეკომპანია „იბერიის" თანამშრომლებს და მზად არის, მათი სურვილის შემთხვევაში, უფასო იურიდიული კონსულტაცია და დახმარება გაუწიოს. სრულად... წყარო: ორგანიზაციის ვებგვერდი სოციალურ ქსელში

თბილისი. საქართველოს სტრატეგიული კვლევებისა და განვითარების ცენტრმა (CSRDG) გამართა ტრენინგების მესამე ციკლი საზოგადოებრივი ორგანიზაციებისათვის ევროკავშირ-საქართველოს ასოცირების შეთანხმების შესახებ ტრენინგის მიზანია ხელი შეუწყოს ქართული საზოგადოებრივი ორგანიზაციების მიერ ასოცირების შეთანხმების შესრულების მონიტორინგს ტრენინგი მიმდინარეობს პროექტის „სამოქალაქო საზოგადოების განვითარების ინიციატივა“ ფარგლებში, ევროკავშირისა და გერმანიის ეკონომიკური თანამშრომლობისა და განვითარების ფედერალური სამინისტროს ფინანსური მხარდაჭერით.

თბილისი. პარტნიორობა ადამიანის უფლებებისთვის (PHR) იურისტებმა ქეთევან კოპალიანმა და სოფიკო მენაბდიშვილმა ქმედუნარიანობის რეფორმის შესახებ მორიგი ტრენინგი ჩაატარეს. „ტრენინგზე PHR-ის წარმომადგენლებმა ისაუბრეს ქმედუნარიანობის რეფორმის ფუნდამენტური პრინციპების შესახებ და შეხვედრის მონაწილეებს მიაწოდეს ინფორმაცია მხარდაჭერის მიმღებისა და მხარდამჭერის კანონმდებლობით გათვალისწინებული უფლება-მოვალეობების შესახებ. ტრენინგის განმავლობაში იურისტებმა ყურადღება გაამახვილეს აღნიშნული რეფორმის გამოწვევებზე და აუდიტორიას უცხო ქვეყნების პრაქტიკა გაუზიარეს", ნათქვამია ორგანიზაციის ვებგვერდზე. სრულად... წყარო: phrgeorgia.wordpress.com

თბილისი. 12 ოქტომბერს, „საერთაშორისო გამჭვირვალობა-საქართველომ" გამართა დისკუსია თემაზე - შრომის უსაფრთხოების შესახებ კანონმდებლობაში დაგეგმილი ცვლილებები. დისკუსიას ესწრებოდნენ პარლამენტის წევრები, საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს წარმომადგენლები, ბიზნეს ორგანიზაციების წევრები, ბიზნესომბუდსმენის მოადგილე, სახალხო დამცველის წარმომადგენელი, არასამთავრობო და საერთაშორისო ორგანიზაციების წევრები. სრულად... წყარო: ორგანიზაციის ვებგვერდი სოციალურ ქსელში

აჭარა. საქართველოს დემოკრატიულმა ინიციატივამ (GDI) ბათუმის მე-16 საჯარო სკოლაში გამართა „მრავალფეროვნების სახეების" დოკუმენტური ვიდეოების პრეზენტაცია. კონკურსის ფარგლებში სტუდენტებმა უნდა მოამზადონ ტექსტური (ბლოგი, სტატია) და/ან მულტიმედიური ნამუშევრები (ფოტოპორტრეტი ან ფოტოამბავი, ვიდეორგოლი) საკუთარი თემის/ქალაქის/რეგიონის კულტურულ მრავალფეროვნებასა და ტოლერანტობის კუთხით არსებულ პრობლემებზე. სრულად... წყარო: ორგანიზაციის ვებგვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია (საია) მის წევრებს აცნობებს, რომ ორგანიზაციის მორიგი (XXVI) საერთო კრება ჩატარდება 2018 წლის 18 ნოემბერს, სასტუმრო „ჰოლიდეი ინ"-ში. „საერთო კრებაზე სხვა მნიშვნელოვან საკითხებთან ერთად, დაგეგმილია საიას წესდებაში შესატანი ცვლილებების განხილვა და დამტკიცება. გთხოვთ, გაეცნოთ წესდებაში შესატან ცვლილებებს და მობრძანდეთ კრებაზე”, ნათქვამია ორგანიზაციის ვებგვერდზე. სრულად... წყარო: gyla.ge

აჭარა. 13 ოქტომბერს, ბათუმში, ევროპის დღე, გრანდიოზულად აღინიშნა. ღონისძიების მიზანს, მოსახლეობისთვის ევროკავშირის მიერ საქართველოში განხორციელებული საქმიანობის შესახებ ინფორმაციის მიწოდება წარმოადგენდა. ღონისძიებაზე, საზოგადოებრივი ორგანიზაცია „ინტელექტი“, წარმოდგენილი იყო, როგორც ევროკავშირის მიერ დაფინანსებული პროექტის „სამოქალაქო საზოგადოების განვითარების ინიციატივის“ ფარგლებში აჭარის ჰაბი. ორგანიზაციამ ღონისძიებაზე წარადგინა, პროექტის ფარგლებში შექმნილი, სხვადასხვა საინფორმაციო მასალები. ღონისძიებას, ევროკავშირის ახალი ელჩი, ბ-ნი კარლ ჰარცელი და აჭარის ავტონომიური რესპუბლიკის მთავრობის თავმჯდომარე, ბ-ნი თორნიკე რიჟვაძე ესწრებოდა. საინფორმაციო ღონისძიებების გარდა, ევროპის დღე მოიცავდა არაერთ გასართობ და შემეცნებით აქტივობებს. ევროპის დღე, ნათია თოდუასა და ვაკის პარკის კონცერტით დასრულდა, სადაც ევროკავშირის ახალმა ელჩმა დრამზე დაუკრა.

თბილისი. 11 ოქტომბერს, ჯანმრთელობისა და ზრუნვის მუნიციპალური პროგრამების შემუშავების გზამკვლევის განხილვის მიზნით, გაიმართა სამუშაო შეხვედრა კონსულტაციისა და ტრენინგის ცენტრში (CTC). „გზამკვლევის მიზანია, კონკრეტული, თანმიმდევრული ნაბიჯების შემუშავების გზით გააუმჯობესოს ჯანმრთელობის დაცვისა და ზრუნვის სფერო-ში, მტკიცებულებებზე დაფუძნებული, კოორდინირებული და ეფექტიანი მუნიციპალური პროგრამების დაგეგმვა და განხორციელება. ექსპერტებმა, მუნიციპალიტეტების ჯანმრთელობისა და სოციალური დაცვის სამსახურების წარმომადგენლებთან ერთად, განიხილეს გზამკვლევის სამუშაო ვერსია, მოისმინეს მათი მოსაზრებები და იმსჯელეს დოკუმენტის შემდგომ გაუმჯობესებაზე", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში