საფრანგეთი. 25-28 იანვარს, საფრანგეთში, ინფორმაციის თავისუფლების განვითარების ინსტიტუტის (IDFI) ინიციატივით, საქართველოს პირველი რესპუბლიკისადმი მიძღვნილი ღონისძიებები გაიმართა.  „ღონისძიებების ფარგლებში, დელეგაციის წევრებმა ლევილის მერიის ოფიციალურ ღონისძიებაში მიიღეს მონაწილეობა. მოგვიანებით კი, ლევილის შატო, მამული და ქართველ მამულიშვილთა სასაფლაო მოინახულეს“ სრულად... წყარო: idfi.ge

თბილისი. სოციალური სამართლიანობის ცენტრი გიზიარებთ ანალიტიკურ დოკუმენტს, რომელშიც გაანალიზებულია საქართველოში ზეგანაკვეთური სამუშაოს მახასიათებლები და მის ანაზღაურებასთან დაკავშირებული პრაქტიკები. „კვლევამ ცხადყო, რომ მშრომელთა ყოველდღიურ საქმიანობაში სხვადასხვა ფორმით იკვეთება ზეგანაკვეთურ შრომასთან დაკავშირებული დარღვევები, რაც არსებით გავლენას ახდენს დასაქმებულთა უფლებრივ მდგომარეობაზე. ზეგანაკვეთური შრომის აუნაზღაურებლობის მასშტაბური ხასიათი და მისი უარყოფითი გავლენა მშრომელთა ცხოვრების ხარისხზე სახელმწიფოს მხრიდან ეფექტიან ღონისძიებებს საჭიროებს“. სრულად... წყარო: socialjustice.org.ge

თბილისი. პარტნიორობა ადამიანის უფლებების სამართლებრივი დახმარებით, სენაკის ფსიქიკური ჯანმრთელობის ცენტრს 5 წლის ბავშვისთვის ზიანის ანაზღაურება დაევალა. „2019 წელს დანიელის დედამ, დანიელისთვის შშმ ბავშვის სტატუსის მინიჭება მოითხოვა, მისი მიზანი, დანიელის უფლებების დაცვა იყო. თუმცა, დანიელს სენაკის ფსიქიკური ჯანმრთელობის ცენტრმა უარი უთხრა, ვინაიდან: „...არსებული კანონმდებლობით, დაუნის სინდრომი არ წარმოადგენდა შეზღუდული შესაძლებლობის სტატუსის მინიჭების საფუძველს. ხოლო სხვა გონებრივი ჩამორჩენილობის დადგენა სამ წლამდე ასაკის ბავშვებში, მათი განვითარების გათვალისწინებით, შეუძლებელი იყო.“ სამწუხაროდ, სენაკის ფსიქიკური ჯანმრთელობის ცენტრის უარს დაეთანხმა სსიპ სამედიცინო საქმიანობის სახელმწიფო რეგულირების სააგენტო და სენაკის რაიონული სასამართლოც. თუმცა, ნანას ბავშვის უფლებებისთვის ბრძოლა არ შეუწყვიტავს და საქმე ქუთაისის სააპელაციო სასამართლოში წაიღო. 2020 წლის 9 ივნისს, ქუთაისის სააპელაციო სასამართლომ მიიღო პრეცედენტული გადაწყვეტილება, სადაც სასამართლომ აღნიშნა, რომ: „უარი შშმ სტატუსის განსაზღვრის მიზნით სამედიცინო-სოციალური ექსპერტიზის ჩატარებაზე იმ საფუძვლით, რომ „დაუნის სინდრომი“ არ არის იმ დაავადებათა ჩამონათვალში... ეწინააღმდეგება საქართველოს კონსტიტუციით, საერთაშორისო ხელშეკრულებებით ნაკისრ ვალდებულებებს, საკანონმდებლო და კანონქვემდებარე აქტებს და ზღუდავს ამ აქტებით გარანტირებულ უფლებებს.““ სრულად... წყარო: phr.ge

თბილისი. ადამიანის უფლებათა ცენტრმა ანგარიშის პრეზენტაცია გამართა. ანგარიში „ადამიანის უფლებების მდგომარეობა საქართველოში, 2022“ აფასებს ადამიანის უფლებათა მდგომარეობას და მოიცავს საკვანძო მიმართულებებს ადამიანის უფლებათა ისეთ სფეროებში, როგორიც არის: კანონის წინაშე თანასწორობა, გამოხატვისა და სიტყვის თავისუფლება, სასამართლო სისტემა, ადამიანის უფლებები პენიტენციურ დაწესებულებებში, ოკუპაცია და მისი შედეგები ადამიანის უფლებრივ მდგომარეობაზე, მედიის თავისუფლების საკითხები, შშმ პირთა მდგომარეობა, LGBTQI+ პირთა უფლებები, ქალთა მიმართ ძალადობის, მათ შორის - ოჯახში ძალადობის ფაქტები, რელიგიურ და ეთნიკურ უმცირესობათა უფლებები, სიძულვილით მოტივირებული დანაშაულები და ა.შ. ანგარიშის მიზანია, შეაფასოს სახელმწიფოს სხვადასხვა უწყებების ქმედება ადამიანის უფლებათა დაცვის ჭრილში, როგორც პოზიტიური, ასევე, ნეგატიური ვალდებულებების ნაწილში, მათ შორის - მათი რეაგირების ხარისხი უფლებების დარღვევებზე, მართლმსაჯულების ეფექტიანობა და საკანონმდებლო თუ სისტემური ცვლილებები, რაც მიმართული უნდა იყოს საქართველოში ადამიანის უფლებების დაცვის საერთაშორისო სტანდარტების დამკვიდრებისკენ. იხ. ანგარიში... წყარო: hrc.ge

თბილისი. სამართლიანი არჩევნები (ISFED)-ის, საერთაშორისო გამჭვირვალობა-საქართველო და საქართველოს ახალგაზრდა იურისტთა ასოციაცია (საია) საარჩევნო კანონმდებლობაში 2022 წლის დეკემბერში შეტანილი ცვლილებების შესახებ შეფასებას აქვეყნებენ. „2022 წლის ოქტომბერში საქართველოს პარლამენტმა პირველი მოსმენით მიიღო კანონპროექტები, რომლებიც საარჩევნო კოდექსსა და „მოქალაქეთა პოლიტიკური გაერთიანებების შესახებ“ ორგანულ კანონებში ცვლილებებს ითვალისწინებდა. 10 ოქტომბერს კანონპროექტები პარლამენტის თავმჯდომარემ ვენეციის კომისიასა და ეუთო/ოდირს გაუგზავნა და მოსაზრებების დაჩქარებული წესით მომზადება სთხოვა. 19 დეკემბერს ვენეციის კომისიამ და ეუთო/ოდირმა გაგზავნილი კანონპროექტების შესახებ საკუთარი მოსაზრება გამოაქვეყნეს. პარლამენტმა ამ რეკომენდაციების საფუძველზე კანონპროექტებში გარკვეული ცვლილებები შეიტანა, რომლებიც საბოლოოდ 22 დეკემბერს მესამე მოსმენით იქნა მიღებული. ორგანიზაციების შეფასებით, მიღებული საკანონმდებლო ცვლილებები, როგორც ადგილობრივი სამოქალაქო ორგანიზაციების, ისე ვენეციის კომისიისა და ეუთო/ოდირის მიერ იდენტიფიცირებულ რიგ პრობლემებს პასუხობს, რაც დადებითად უნდა შეფასდეს. თუმცა, ამ ცვლილებებით სრულად არ იქნა გათვალისწინებული ყველა არსებითი ხასიათის რეკომენდაცია, მათ შორის, არ აისახა იმ რეკომენდაციების გარკვეული ნაწილი, რომელიც ვენეციის კომისიამ და ეუთო/ოდირმა 2022 წლის დეკემბერში წარმოადგინეს. მათი ერთობლივი შეფასებით, განხორციელებული რეფორმა საარჩევნო კოდექსის ყოვლისმომცველ ანალიზს არ ეფუძნება და მხოლოდ ცალკეულ საკითხებს შეეხება“. სრულად... წყარო: gyla.ge

31 იანვარს, 18:00 საათზე, სასტუმრო რუმსში - გარდენ ჰოლში, მაკლეინის ასოციაცია ბავშვებისთვის წარმოგიდგენთ ახალ ინიციატივას სახელწოდებით - საუბრების სერია „შუქი მოვიდა”. სრულად...

31 იანვარს, 17:00 საათზე, საქართველოს ახალგაზრდა იურისტთა ასოციაცია გამართავს ონლაინ დისკუსიას თემაზე: „იურიდიულ პროფესიათა დამოუკიდებლობა“. სრულად...

31 იანვარს, 16:00 საათზე, ლიტერატურული თარგმანების პროგრამაში მონაწილეობის მსურველებისთვის აპლიკაციის შევსების თაობაზე ტრენინგი ჩატარდება. ტრენინგში მონაწილეობის მსურველებმა გთხოვთ გაიაროთ რეგისტრაცია... სრულად...

ამ წუთებში, ადამიანის უფლებათა ცენტრი ანგარიშის „ადამიანის უფლებების მდგომარეობა საქართველოში, 2022“ პრეზენტაციას მართავს. მისამართი: თბილისი, ა. გახოკიძის 11 ა, 0 სართ (თბილისის ადამიანის უფლებათა სახლის საკონფერენციო დარბაზი)

თბილისი. სოციალურ მუშაკთა ასოციაციის განმარტებით, ახალგაზრდებს ცხოვრების სხვადსხვა ეტაპზე მენტალური ჯანმრთელობის მხარდაჭერა სჭირდებათ. „ახალგაზრდული მუშაკი კი არის ის ადამიანი, რომელიც ახალგაზრდას უსმენს, აძლევს დროსა და სივრცეს გულწრფელად გასახსნელად და არ განიკითხავს მას. ახალგაზრდულ მუშაკს უნდა შეეძლოს ახალგაზრდის ქცევაში ცვლილებების შემჩნევით ფსიქიკური ჯანმრთელობის სირთულეების ნიშნების ამოცნობა, სიტუაციის კონტროლი და ცოდნა, თუ როდის არის აუცილებელი დამატებითი მხარდაჭერა ახალგაზრდის დასახმარებლად, სიმშვიდის შენარჩუნება, ყველაფრის მოსასმენად მზადყოფნა, პრობლემის აღიარება და გადაწყვეტის გზებზე ფოკუსირება“. კამპანია ხორციელდება პროექტის „Skills4Success - უნარები წარმატებისთვის“ ფარგლებში. პროექტს ევროკავშირის დაფინანსებით ახორციელებს Save the Children International-ი პარტნიორ ორგანიზაციებთან: საქართველოს ახალგაზრდულ მუშაკთა ასოციაციასთან, ახალგაზრდობის სააგენტოსა და კონრად ადენაუერის ფონდთან ერთად. სრულად... წყარო: ორგანიზაციის გვერდი სოციალურ ქსელში

თბილისი. „უფლებები საქართველო“ უფასო სამართლებრივ დახმარებას სთავაზობს გენდერული და ოჯახში ძალადობის მსხვერპლებს. სამართლებრივი დახმარებისათვის შეგიძლიათ დაგვიკავშირდეთ ცხელ ხაზზე: 577541655, ან მიმართოთ ორგანიზაციის ოფისებს შემდეგ რეგიონებში: კახეთი: თელავის სამართლებრივი დახმარების ცენტრი (მის: არსენიშვილის №2) ზემო იმერეთი: ჭიათურის სამართლებრივი დახმარების ცენტრი (მის: წერეთლის №1) რაჭა-ლეჩხუმ-ქვემო სვანეთი: ამბროლაური სამართლებრივი დახმარების ცენტრი (მის: აღმაშენებლის №24) სამართლებრივი დახმარება ხორციელდება პროექტის „გენდერული და ოჯახში ძალადობის მსხვერპლთა მხარდაჭერა“ ფარგლებში, ევროკავშირისა და ASB საქართველოს მხარდაჭერით. სრულად... წყარო: ორგანიზაციის გვერდი სოციალურ ქსელში

აჭარა. 27 იანვარს, ორგანიზაციებმა „ცვლილებები თანაბარი უფლებებისათვის“ და „კოალიცია დამოუკიდებელი ცხოვრებისათვის“ 2021-2023 წლების პროექტის „სამოქალაქო საზოგადოება შეზღუდული შესაძლებლობის მქონე პირთა უფლებებისათვის საქართველოში“ დახურვის ღონისძიება გამართეს.  ამ დღესვე გაიმართა, ასევე, 2022-2025 წლების ახალი პროექტის, „სამოქალაქო საზოგადოების კოორდინირებული ადვოკატირება საქართველოში შეზღუდული შესაძლებლობის მქონე პირთა უფლებების დაცვის ვალდებულებების განხორციელებისთვის“ პრეზენტაცია. სრულად... წყარო: ორგანიზაციის გვერდი სოციალურ ქსელში

გურია. ახალგაზრდა პედაგოგთა კავშირის მხარდამჭერთა პროგრამის ფარგლებში, შემოქმედის იდეებისა და მეწარმეობის ლაბორატორიაში მენტორის - ვახუშტი მენაბდის და მოწვეულო სტუმრის - რეჟისორ ლევან შუბაშვილის ფასილიტაციით ფილმის ჩვენება-განხილვა მოეწყო. ფილმის ჩვენების შემდეგ წარიმართა დისკუსია მრავალფეროვნებისა და ტოლერანტობის მნიშვნელობაზე მსოფლიოში. შეხვედრა განხორციელდა პროექტის „უკეთესი მომავლისთვის“ ფარგლებში ორგანიზაცია Brot für die Welt-ის ფინანსური მხარდაჭერით. სრულად... წყარო: ორგანიზაციის გვერდი სოციალურ ქსელში

თბილისი. მწვანე ალტერნატივა მოუწოდებს გარემოს ეროვნულ სააგენტოს შეწყვიტოს ნატახტარი-რუსთავის ჩქაროსნული ავტომაგისტრალის ნატახტარი-ჟინვალის მონაკვეთის მშენებლობისა და ექსპლუატაციის პროექტის შესახებ გარემოსდაცვითი გადაწყვეტილების მიღებისათვის მიმდინარე პროცესი.  „განსახილველი გარემოზე ზემოქმედების შეფასების ანგარიში (გზშ) დოკუმენტი არ მოიცავს მთელი რიგი საკითხების შესახებ ინფორმაციას, რომლის წარმოდგენა სავალდებულოა.  დოკუმენტის ნაკლოვანებების სია ვრცელია, თუმცა განსაკუთრებით აღსანიშნავია, რომ ანგარიში არ მოიცავს პროექტის საჭიროების დასაბუთებასა და ხარჯ-სარგებლიანობის ანალიზს; ასევე, არ არის გათვალისწინებული საპროექტო დერეფანში მოხვედრილი საკმაოდ მასშტაბური ინფრასტრუქტურის გადატანით მოსალოდნელი ზემოქმედება.   მიგვაჩნია, რომ გზშ-ის ანგარიშში აღნიშნული ინფორმაციის არარსებობა დაუშვებელს ხდის პროექტზე გადაწყვეტილების მიღებას და წარმოდგენილი განაცხადის განუხილველად დატოვების საფუძველს წარმოადგენს“, ნათქვამია განცხადებაში. სრულად... წყარო: greenalt.org

30 იანვარს, ორშაბათს, 19:00 საათზე, ქალაქის თეატრში (თამარ მეფის გამზირი #18) გაიმართება სამუშაო შეხვედრა თემაზე - დაფინანსების მოძიების გზები და ხერხები, რომელსაც თანამედროვე ხელოვნების მკვლევარი და პროექტების მენეჯერი, ნიკოლოზ ნადირაშვილი გაუძღვება. სრულად...

თბილისი. პარტნიორობა ადამიანის უფლებებისთვის (PHR) ინფორმაციით, მამინაცვალმა, რომელიც არასრულწლოვან გერზე წლების განმავლობაში სექსუალურად ძალადობდა, მის მიმართ სისხლის სამართლის გამამტყუნებელი განაჩენის დადგომამდე რამდენიმე დღით ადრე, გერისთვის ქონების წართმევა გადაწყვიტა. მან სასამართლოს ბინის ჩუქების ხელშეკრულების ბათილობა მოითხოვა. „2021 წელს, მამინაცვალმა გერს ბინა აჩუქა. თუმცა, მას შემდეგ რაც გერმა სექსუალური ძალადობის გამო უჩივლა, გერის დასჯა (ბინის წართმევა და გერის ქუჩაში დატოვება) მოისურვა. საქმეში PHR-ის ადვოკატები ჩაერთნენ. სასამართლომ სექსუალური ძალადობის მსხვერპლის პოზიცია გაიზიარა და მოძალადეს ჩუქების ხელშეკრულების გაუქმების გზით, ეკონომიკური ძალადობის განხორციელების შესაძლებლობაზე უარი უთხრა“. სრულად... წყარო: phr.ge

თბილისი. Grlz Wave-ის ცნობით, იანვარი საშვილოსნოს ყელის კიბოს შესახებ ცნობიერების ამაღლების თვეა. იანვრის თვის კამპანიის მიზანი კი საშვილოსნოს ყელის კიბოს სიმპტომების ნაადრევი აღმოჩენა, რეგულარული თვითშემოწმება და სკრინინგული კვლევების საჭიროებისამებრ ჩატარებაა.  რა არის საშვილოსნოს ყელის კიბოს პრევენციის საუკეთესო გზა? რეგულარული სკრინინ ტესტების (მაგ: პაპ-ტესტი) ჩატარება და შემდგომი მეთვალყურეობა; HPV-ს (ადამიანის პაპილომა ვირუსი) საწინააღმდეგო ვაქცინაცია.  სრულად... წყარო: ორგანიზაციის გვერდი სოციალურ ქსელში

თბილისი. სამოქალაქო საზოგადოების ორგანიზაციები და სპეციალისტები მიმართავენ ქალაქის მერსა და საკრებულოს, უარი თქვას ლაგუნა ვერეს მიმდებარედ, ცათამბჯენების მშენებლობაზე. „ქალაქის მერმა, მთავრობის სხდომაზე საჯაროდ მოიწონა  პროექტის იდეა, ტერიტორიის მოსაწესრიგებლად აუცილებელ ღონისძიებად შეაფასა და მისი მშენებლობის განხორციელების გარანტიები შექმნა, მიუხედავად იმისა, რომ ჯერ არ არის წარმოდგენილი და შესაბამისად განხილული, მშენებლობის არქიტექტურული პროექტი და კანონით გათვალისწინებული აუცილებელი კვლევები. ასევე, წინასაპროექტო კვლევით  არ არის წარმოდგენილი ჯერვანი ინფორმაცია ამ მასშტაბისა და სიმჭიდროვის მშენებლობის ზეგავლენის შესახებ საინჟინრო, საცხოვრებელ, სოციალურ, სარეკრეაციო ინფრასტრუქტურაზე, რაც საჯარო ინტერესის საზიანოდ, გავლენიანი კერძო პირის სასარგებლო გადაწყვეტილების მიღების, მორიგი პრეცედენტის განტკიცების საფრთხეს ქმნის. მივიჩნევთ, რომ პროექტის იდეა შეიცავს ქალაქის ისტორიული ნაწილის განადგურებისა და  სატრანსპორტო  გამტარუნარიანობის კიდევ უფრო გართულების საფრთხეებს და მისი განხილვა დაუშვებელია“. ვრცლად... წყარო: osgf.ge

აჭარა. 26 იანვარს, აჭარის ჰაბმა ქობულეთის მუნიციპალიტეტში, სოფელ სახალვაშოს მოსახლეობასთან შეხვედრა გამართა.  „შეხვედრაზე მოწვეული იყო საქართველოს დაუნის სინდრომის ასოციაციის აჭარის ფილიალის ხელმძღვანელი, დარინა დუმბაძე.  ადგილობრივმა მოსახლეობამ, 18 წელს მიღწეულ შშმ პირთა (ეტლით თუ  სხვა დამხმარე საშუალებებით მოსარგებლეთა) რეაბილიტაციის პროგრამებით სარგებლობის საჭიროება, ერთ-ერთ მნიშვნელოვან პრობლემად დაასახელა.   დარინა დუმბაძემ ამ საკითხზე მონაწილეებს ყველა საჭირო ინფორმაცია მიაწოდა“. აჭარის რეგიონული ჰაბი ევროკავშირისა და კონრად ადენაუერის ფონდის დაფინანსებული პროექტის „სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის“ ფარგლებში  შეიქმნა.  პროექტს ახორციელებს კონსორციუმი კონრად ადენაუერის ფონდის (KAS) ხელმძღვანელობით შემდეგ არასამთავრობო ორგანიზაციებთან ერთად: საქართველოს სტრატეგიული კვლევებისა და განვითარების ცენტრი (CSRDG), სამოქალაქო საზოგადოების ინსტიტუტი (CSI), კონსულტაციის და ტრენინგის ცენტრი (CTC), განათლების განვითარების და დასაქმების ცენტრი (EDEC) და ევროპული პოლიტიკის ინსტიტუტი (IEP). სრულად... წყარო: ორგანიზაციის გვერდი სოციალურ ქსელში

თბილისი. გაეროს განვითარების პროგრამის ინფორმაციით, 2021 წლის ოქტომბერში, გაეროს ადამიანის უფლებათა საბჭომ მიიღო რეზოლუცია, რომლის თანახმად სუფთა, ჯანსაღი და მდგრადი გარემო ადამიანის უფლებად იქნა აღიარებული... „მსოფლიოში, ყოველი მეექვსე ნაადრევად გარდაცვლილი ადამიანი დაბინძურების გამო იღუპება. კლიმატის ცვლილების გამო, ათობით მილიონი ადამიანი ცხოვრებას დევნილობაში ატარებს. ხოლო ბიომრავალფეროვნების დანაკარგი ეკოსისტემების კოლაფსით გვემუქრება. აუცილებელია, რომ ქვეყნების მთავრობებმა და მთლიანად საერთაშორისო თანამეგობრობამ ერთიანად იმოქმედონ და ყველა არსებული რესურსი გამოიყენონ იმისთვის, რომ ადამიანის უფლებას იცხოვროს ჯანსაღ გარემოში საფრთხე აღარ დაემუქროს“. სრულად... წყარო: ორგანიზაციის გვერდი სოციალურ ქსელში

თბილისი. კოალიცია დამოუკიდებელი და გამჭვირვალე მართლმსაჯულებისთვის მოუწოდებს საქართველოს პარლამენტს:  შეარჩიოს დამოუკიდებელი, კეთილსინდისიერი, კომპეტენტური და პოლიტიკურად ნეიტრალური კანდიდატები, რომელთა მიმართაც მაღალი საზოგადოებრივი ნდობა არსებობს. იუსტიციის უმაღლესო საბჭოს 5 წევრის არჩევის თაობაზე გადაწყვეტილება მიიღოს საპარლამენტო ოპოზიციასთან პოლიტიკური კონსენსუსის საფუძველზე. სასამართლო სისტემაში არსებული პრობლემების სიღრმისეული ანალიზის საფუძველზე შეიმუშავოს იუსტიციის უმაღლესი საბჭოს და მთლიანად სასამართლო სისტემის რეფორმა, რომელიც ფოკუსირებული იქნება პოლიტიკური და შიდა კორპორატიული გავლენებისგან თავისუფალი სასამართლოს შექმნაზე. სრულად... წყარო: rights.ge

თბილისი. ნეტგაზეთზე დაყრდნობით, Grlz Wave წერს, რომ პაპილომა ვირუსის ვაქცინა, რომელიც ადამიანებს საშვილოსნოს ყელის კიბოსგან იცავს, 26 წლამდე ქალებისთვის უფასოდ იქნება ხელმისაწვდომი. „არსებული მონაცემებით, საქართველოში ყოველწლიურად 200 ქალი იღუპება საშვილოსნოს ყელის კიბოს დიაგნოზით. საშვილოსნოს ყელის კიბო, ძირითად შემთხვევაში, სწორედ ადამიანის პაპილომა ვირუსითაა გამოწვეული“. სრულად... წყარო: ორგანიზაციის გვერდი სოციალურ ქსელში