სამცხე–ჯავახეთი. ახალციხეში, მესამე საჯარო სკოლის ინიციატივით, საქველმოქმედო აქცია გაიმართა. სკოლის მოსწავლეებმა, პირველიდან მეთორმეტე კლასის ჩათვლით, პროდუქტი შეიძინეს, თანაბრად გაანაწილეს და ახალციხეში მცხოვრებ მოხუცებს დახმარება გაუწიეს. მოსწავლეებთან ერთად აქციაში აქტიურად ჩაერთვნენ  მშობლები,  მასწავლებლები და ახალციხის ახალგაზრდული ცენტრი.  დასახმარებელთა კატეგორიაში შევიდნენ მარტოხელა, სოციალურად დაუცველი და მარჩენალდაკარგული მოხუცები. როგორც კლუბის წევრებმა აღნიშნეს, თავდაპირველად დახმარება 20 ოჯახზე იყო გათვლილი, მაგრამ შეგროვებული პროდუქტის სიმრავლიდან გამომდინარე, შემოწირულობა 60 ოჯახზე გადანაწილდა.

კახეთი. 3 აპრილს თელავის დემოკრატიული ჩართულობის ცენტრში სპორტისა და ახალგაზრდობის სამინისტროს მრგვალი მაგიდის შეხვედრა გაიმართა, რომელსაც კახეთში მოქმედი არასამთავრობო ორგანიზაციების წარმომადგენლები ესწრებოდნენ. შეხვედრაზე საუბარი იყო სპორტისა და ახალგაზრდობის სამინისტროს 2013 წლის პრიორიტეტულ მიმართულებებზე, რომელიც მორგებულია ახალგაზრდებზე. ნანა ათუაშვილი, არასამთავრობო ორგანიზაცია ვოლდ ვიჟენის წარმომადგენელი. „აღნიშნული შეხვედრაზე დასწრება განსაკუთრებით მნიშვნელოვანია იმ არასამთავრობო ორგანიზაციებისთვის, რომლებიც ახალგაზრდების კუთხით ახორციელებენ პროექტებს. ასევე მნიშვნელოვანია რეგიონებში მოქმედი არასამთავრობო ორგანიზაციების ჩართვა ამ საქმიანობაშიც".

4 აპრილს, 12:00 საათზე, „საქართველოს დასაქმების ასოციაცია" გამართავს დიკუსიას თემაზე  შრომის კოდექსის ახალ პროექტის შესახებ. მისამართი: ბათუმი, ფარანვაზ მეფის 62-64, დემოკრატიული ჩართულობის ცენტრი

თბილისი. საქართველოს აღმოსავლეთ პარტნიორობის ეროვნულ ფორუმშის წევრმა ორგანიზაციებმა განცხადება გაავრცელეს. ისინი მიესალმებიან საქართველოს აღმასრულებელი და საკანონმდებლო ხელისუფლების მიერ გადადგმულ ნაბიჯებს ევროინტეგრაციის გზაზე. „მიღწეული პროგრესის მიუხედავად, პრობლემატურია  კოაბიტაციის პროცესის თანმდევი  სირთულეების შესახებ როგორც მცდარი ინფორმაციის გავრცელება, ასევე, მისი არასწორი ფორმით საზღვრებს გარეთ გატანა, რამაც შეიძლება უარყოფითი გავლენა იქონიოს ევროკავშირთან დაახლოების პერსპექტივებზე, მათ შორის ასოცირების შესახებ ხელშეკრულების გაფორმების პროცესზე. ერთი მხრივ, ამის ნათელი მაგალითია, ნაციონალური მოძრაობის მიერ ევროინტეგრაციის საკითხებით მანიპულირების ინიცირება ვიწრო პარტიული მიზნების მისაღწევად. ხოლო მეორე მხრივ, საქართველოს აღმასრულებელი ხელისუფლებისა და მმართველი პოლიტიკური ძალის ღია დებატი ევროპის სახალხო პარტიასთან და მისი თანმდევი შეფასებები, რაც თანდათანობით ცდება კონსტრუქციულობის ჩარჩოებს. დაპირისპირების ზრდა შესაძლოა ზიანის მომტანი აღმოჩნდეს ქვეყნის იმიჯისა და ინტერესებისთვის", ნათქვამია განცხადებაში. არასამთავრობო ორგანიზაციებს მიაჩნიათ, რომ ხელისუფლების ყველა შტომ უნდა უზრუნველყოს ევროსტრუქტურებსა და ევროპულ პოლიტიკურ პარტიებთან პირდაპირი და ინტენსიური კომუნიკაცია, ზუსტი და დეტალური ინფორმაციის მიწოდებით, რათა ხელი არ შეეშალოს ვილნიუსის სამიტზე საქართველო-ევროკავშირს შორის ასოცირების ხელშეკრულების გაფორმების პროცესს. ამასთანავე, გამოვთქვამთ მზადყოფნას პროცესში ჩართულ ყველა მხარეს მივაწოდოთ ობიექტური ინფორმაცია. ვრცლად წყარო: osgf.ge

კახეთი. 2 აპრილს,  თელავის დემოკრატიული ჩართულობის ცენტრში გაიმართა ლექცია თემაზე: ,,საქართველოს სოციალური პოლიტიკა’’. შეხვედრა  „სამოქალაქო საზოგადოების კვლევისა და განვითარების ცენტრის" პროექტის „თელავის მუნიციპალიტეტში ადვოკატირების საშუალებით მოქალაქეთა ჩართულობის ხელშეწყობა ადგილობრივი მნიშვნელობის საკითხების გადაწყვეტის საქმეში" ფარგლებში ჩატარდა. შეხვედრაზე განხილული იყო სოციალური მომსახურების სააგენტოს  მიერ განხორციელებულ პროგრამებზე, კერძოდ: სოციალურად დაუცველი სტატუსის მინიჭების წესზე (ოჯახის შეფასების მეთოდოლოგია, განკუთვნილი ბენეფიტები და შეღავათები); თელავის სტატისტიკაზე სოციალურად დაუცველი მოსახლეობის შესახებ; სოციალურად დაუცველი მოსახლეობის კონტროლის მექანიზმები; ბავშვთა ზრუნვის პროგრამების მიმოხილვა და სხვა. „სამოქალაქო საზოგადოების კვლევისა და განვითარების ცენტრის" აღმასრულებელი დირექტორის, ლიზი სოფრომაძეს თქმით, „სამოქალაქო საზოგადოების კვლევისა და განვითარების ცენტრის" პროექტი მიზნად ისახავს თელავის მუნიციპალიტეტის მოსახლეობის ჩართულობის უზრუნველყოფას ადგილობრივი ბიუჯეტის დაგეგმვისა და განხილვის პროცესში, მოსახლეობასა და ადგილობრივ ხელისუფლებას შორის თანამშრომლობითი ურთიერთობების ჩამოყალიბებასა და გამტკიცებას.

თბილისი.ევრაზიის თანამშრომლობის ფონდმა პროგრამის – „თანამონაწილეობა და მონიტორინგი ცვლილებებისათვის" – ფარგლებში დოკუმენტური ფილმი შექმნა.  პროექტზე, რომელზეც დოკუმენტური ფილმი მოგვითხრობს, ერთ–ერთია იმ 34–ს შორის, რომელიც ევრაზიის თანამშრომლობის ფონდის აღნიშნული პროგრამის ფარგლებში განხორციელდა. პროგრამის მიზანია სათემო ჯგუფები, სამოქალაქო საზოგადოების ორგანიზაციები და მედია საშუალებები საკუთარ რეგიონებში აქტიურად იყვნენ ჩართულნი პოლიტიკური და ეკონომიკური გადაწყვეტილებების მიღების პროცესში. დოკუმენტური ფილმი ერთ–ერთ ასეთ პროექტზე – სამოქალაქო განვითარების ასოციაციის მიერ ლაგოდეხში განხორციელებულ აქტივობებსა და შედეგებზე მოგვითხრობს. დოკუმენტური ფილმი: „თანამონაწილეობა და მონიტორინგი ცვლილებებისათვის"  

თბილისი. პარლამენტმა არ უნდა დაუშვას საზოგადოებრივი მაუწყებლის სამეურვეო საბჭოს დათხოვნის პრეცედენტი - ამის შესახებ დღეს, 3 აპრილს გამართულ პრესკონფერენციაზე ორგანიზაციებმა „საერთაშორისო გამჭვირვალობა-საქართველოს” და „სამართლიანი არჩევნების” წარმომადგენლებმა  განაცხადეს. მათი აზრით, მაუწყებელი არასოდეს ყოფილა მოწოდების სიმაღლეზე, რაც მენეჯმენტის არაეფექტიანი მართვით და მუდმივი პოლიტიკური წნეხით იყო განპირობებული. ორგანიზაციები მიიჩნევენ, რომ სამეურვეო საბჭოს სრული დათხოვნა შექმნის საშიშ პრეცედენტს, რაც საპარლამენტო უმრავლესობებს მომავალშიც მისცემს მაუწყებლის სამეურვეო საბჭოს სურვილისამებრ შეცვლის შესაძლებლობას.  „ასეთი პრეცედენტის შემთხვევაში, მატულობს პოლიტიკური ჩარევის რისკი არა მხოლოდ საზოგადოებრვი მაუწყებლის, არამედ ყველა იმ სამთავრობო სტრუქტურის საქმიანობაში, რომლებიც პოლიტიკურ ნეიტრალიტეტს უნდა ინარჩუნებდნენ". წყარო:media.ge

გურია. 1 მაისიდან საზოგადოებრივ ორგანიზაცია გურიის ახალგაზრდულ რესურსცენტრში იწყება დასაქმებისა და მცირე ბიზნესის მხარდაჭერის პროგრამა პირობით მსჯავრდებულთათვის. დასაქმების პროგრამა მოიცავს ერთთვიან სასწავლო კურსს პირობით მსჯავრდებულთათვის პროფესიული უნარ-ჩვევების განვითარების საკითხებზე, სტაჟირებასა და უშუალო დასაქმებას სხვადასხვა დაწესებულებაში; მცირე ბიზნესის მხარდაჭერის პროგრამა მოიცავს მცირე ბიზნესის მართვის ორთვიან კურსს და მიკრო გრანტების პროგრამას ბიზნესის დაწყების მსურველ პირობითმსჯავრდებულთათვის.  თითოეულ პროგრამა გათვლილია 30 პირობითმსჯავრდებულზე. ასაკობრივი ზღვარი განისაზღვრება 18-35 წლამდე. ასაკობრივი ზღვარი არ ეხება ქალბატონებს.  პროგრამაში მონაწილეობასთან დაკავშირებული ყველა ხარჯი, მათ შორის სასწავლო მასალები და ტრანსპორტირება, იფარება პროგრამის მიერ.  პროგრამაში მონაწილე პირობითმსჯავრდებულებმა უნდა გაირონ რეგისტრაცია გურიის ახალგაზრდულ რესურსცენტრში ან გურიის პრობაციის ბიუროში. რეგისტრაცია დაიწყება მიმდინარე წლის 4 აპრილს და გაგრძელდება 20 აპრილამდე. წყარო:ორგანიზაციის გვერდი სოციალურ ქსელში

თბილისი.საქართველოს იურისტთა ასოციაციამ  კვლევის - „დევნილთა უფლება სათანადო საცხოვრებელზე" - პრეზენტაცია  გამართა.  კვლევის მიზანს იმ სამართლებრივი მექანიზმების ანალიზი წარმოადგენს, რომელთა საფუძველზეც სახელმწიფო შებოჭილია ვალდებულებით, უზრუნველყოს დევნილთა უფლება სათანადო საცხოვრებელზე. ანგარიშში ნაჩვენებია რამდენად ეფექტურია აღნიშნული მექანიზმები და განხილულია ეროვნული სასამართლო პრაქტიკა, რომელიც საცხოვრებლის უფლების ტენდენციებს მოიცავს. „კვლევამ აჩვენა, რომ დევნილის საცხოვრებლის უფლების აღიარების მიუხედავად, ქვეყნის შიდა კანონმდებლობით მკაფიოდ  არ არის  განსაზღვრული ის სტანდარტები, რასაც სათანადო საცხოვრებელი უნდა აკმაყოფილებდეს. კვლევაში წარმოდგენილი სასამართლო საქმეების ანალიზი ცხადყოფს, რომ ხშირად სასამართლო სამართლებრივი ნორმების ფორმალისტურ ინტერპრეტაციას ახდენდა, თუმცა პრობლემას ქმნიდა ისიც, რომ საცხოვრებლის უფლების მნიშვნელოვანი ასპექტები შიდა მექანიზმებში სათანადოდ  არ არის ასახული", ნათქვამია კვლევაში. კვლევა წყარო:gyla.ge

თბილისი. 2 აპრილს, ბავშვთა და ახალგაზრდობის განვითარების ფონდის ორგანიზებით კოტე მარჯანიშვილის სახელობის სახელმწიფო დრამატულ თეატრში საქველმოქმედო აქცია–კონცერტი გაიმართა. ღონისძიებიდან შემოსული თანხა გალის რაიონის სკოლებს მოხმარდება. წყარო:ორგანიზაციის გვერდი სოციალურ ქსელში

თბილისი. „ინფორმაციის თავისუფლების განვითარების ინსტიტუტმა" 2 აპრილს საჯარო დაწესებულებების საზოგადოებასთან ურთიერთობის სამსახურების  წარმომადგენლებთან დისკუსია გამართა. შეხვედრაზე განხილულ იქნა საჯარო დაწესებულებების ელექტრონული საკომუნიკაციო პლატფორმების ეფექტურობის საკითხი. IDFI -მ წარმოადგინა კვლევები 23 საჯარო დაწესებულების ვებგვერდებზე არსებული საკომუნიკაციო მექანიზმებისა და მოქალაქეებთან ურთიერთობის სტრატეგიის  შესახებ. პროექტი ხორციელდება აღმოსავლეთ-დასავლეთის მართვის ინსტიტუტის (EWMI) მხარაჭერით, პროგრამის - „საქართველოში საჯარო პოლიტიკის, ადვოკატირებისა და სამოქალაქო საზოგადოების განვითარების" (G-PAC). წყარო: ორგანიზაციის გვერდი სოციალურ ქსელში

სამეგრელო. 2 აპრილს ზუგდიდში ასოციაცია „დეამ" პროექტის – „ადგილობრივ თვითმმართველობაში ზუგდიდის მუნიციპალიტეტის ახალგაზრდების მონაწილეობის მხარდაჭერა"  – დასკვნითი პრეზენტაცია გამართა. ორგანიზაციის აღმასრულებელმა დირექტორმა მადონა ხარებავამ განაცხადა, რომ ზუგდიდის საკრებულოსთან ახალგაზრდული საბჭო ამოქმედდება, რომელიც მუნიციპალიტეტის მასშტაბით პრობლემების იდენტიფიცირებას მოახდენს და ადგილობრივ ხელისუფლებასთან ერთად მათი მოგვარების სტრატეგიას დასახავს. საკრებულომ პეტიციის სახით შესული ინიციატივა თებერვალს გამართულ სხდომაზე მოიწონა, თუმცა ამ დრომდე უცნობია საბჭოს ფუნქციონირების ფორმა და ამოქმედების დრო. ორგანიზაციის წარმომადგენლების განცხადებით, სოფლად მცხოვრებ ახალგაზრდებს ხშირ შემთხვევაში პრობლემების ფორმულირება და ჩამოყალიბება უჭირთ. ბევრმა მათგანმა კი თემებში გამართული შეხვედრების დროს თვითმმართველობებში საკუთარი წარმომადგენელი პირველად ნახა. საბჭოს მოვალეობა ახალგაზრდების ინტერესებისა და საჭიროებების ფოკუსირებაა, ხოლო იდენტიფიცირებული პრობლემების ადგილობრივი ხელისუფლებისთვის წარდგენა იქნება. 

აჭარა. 2 აპრილს, ბათუმის დემოკრატიული ჩართულობის ცენტრში, ახალი საზოგადოებირივი ორგანიზაციის - „კანონიერებისა და სამართლიანობის დაცვის ინსტიტუტის" პრეზენტაცია გაიმართა. მას აჭარის უმაღლესი საბჭოს ჯანმრთელობის დაცვისა და სოციალური კომისიის თავმჯდომარის ყოფილი თანაშემწე უხელმძღვანელებს. ორგანიზაციის მიზანი საქართველოში დემოკრატიული პრინციპების, სამართიანობის, კანონიერებისა და ადამიანის უფლებების დაცვაა.

სამეგრელო. საერთაშორისო გამჭვირვალობა-საქართველომ ბლოგპოსტი - „ზუგდიდში უპატრონო ძაღლებს ცეცხლსასროლი იარაღით ხოცავენ" - გამოაქვეყნა. ორგანიზაციის თქმით, ზუგდიდის ოფისს მოსახლეობამ ტელეფონით გადაღებული ფოტოები მიაწოდა, თუ როგორ ხოცავენ „ზუგდიდდასუფთავების" თანამშრომლები უპატრონო ძაღლებს, რაც სისხლის სამართლის კოდექსის მიხედვით ისჯება ჯარიმით, ან გამასწორებელი სამუშაოთი.  „იმის გათვალისწინებით, რომ უპატრონო ძაღლების პრობლემა არა მარტო ზუგდიდში, არამედ სხვა მუნიციპალიტეტებში დგას, „საერთაშორისო გამჭვირვალობა - საქართველო" რეკომენდაციით მიმართავს გარემოს დაცვისა და ბუნებრივი რესურსების სამინისტროს, შეიმუშავოს ერთიანი მიდგომა ამ პრობლემის მოსაგვარებლად. ძაღლების ქუჩაში დახოცვა, ვფიქრობთ, ყველაზე არაჰუმანური მიდგომაა. ამასთან, „საერთაშორისო გამჭვირვალობა - საქართველო" მიმართავს ადგილობრივ მუნიციპალიტეტებს, შინაური ცხოველების დასახოცად არ გამოიყენონ ცეცხლსასროლი იარაღი", ნათქვამია ორგანიზაციის ვებგვერდზე. სრულად წყარო: transparency.ge

ევროკომისია აწყობს საჯარო დისკუსიას მედიის საკითხებზე. ორგანიზაციის მიზანია დისკუსიის მოწყობა მედიის თავისუფლებისა და პლურალიზმის და აუდიოვიზუალის მარეგულირებელი ორგანოების დამოუკიდებლობის თემაზე - ამის შესახებ ინფორმაციას თავად ევროკომისა ავრცელებს. დისკუსია ორი მიმართულებით წარიმართება - საჯარო დისკუსია აუდიოვიზუალის დამარეგულირებელი ორგანოების დამოუკიდებლობა და მედიის თავისუფლება და პლურალიზმი. სრულად   წყარო: media.ge

თბილისი. ახალგაზრდა იურისტთა ასოციაციამ, 2 აპრილს, საგანგებო განცხადება გაავრცელა. იგი 29 მარტს ბათუმში საიას თანამშრომლებსა და პოლიციის მაღალჩინოსან ვალერიან თელიას შორის მომხდარი ინციდენტის შესახებ შსს–ს გენერალური ინსპექციის სამსახურებრივი შემოწმების დასკვნას ეხმიანება. „შსს-ს განცხადება, რომელიც დასკვნას ეყრდნობა, შესაშური თანმიმდევრობით ჩამოთვლის დარღვევებსა და გადაცდომებს, რომელსაც შემოწმების შედეგების თანახმად, საიას თანამშრომლის მხრიდან ჰქონდა ადგილი, თუმცა, არაფერს ამბობს ვალერიან თელიას მიერ განხორციელებულ ფიზიკურ და სიტყვიერ შეურაცხყოფაზე, საგზაო მოძრაობის დარღვევის ფაქტზე, რომელსაც  ადასტურებს თავად შსს-ს მიერ გავრცელებული ვიდეოჩანაწერი. როინ ფარტენაძემ, მართალია, დაარღვია საგზაო მოძრაობის წესები (ის იმყოფებოდა მსუბუქი ალკოჰოლური თრობის მდგომარეობაში და არ დაიცვა მანევრირების წესები), თუმცა, მტკიცება არ სჭირდება იმ ფაქტს, რომ ეს არ აძლევს სახელმწიფო დაწესებულებების წარმომადგენლებს სამართალდამრღვევი მოქალაქეების ფიზიკური ან სიტყვიერი შეურაცხყოფის უფლებას",ნათქვამია ორგანიზაციის ვებგვერდზე განთავსებულ განცხადებაში. საიას თქმით, გენინსპექციის დასკვნაში მოცემული ფაქტები და შეფასებები არის არა ინციდენტის სრულყოფილი და ობიექტური აღწერა, არამედ ამ ინციდენტის ცალმხრივი ვერსია, რომელიც არათუ არ პასუხობს კითხვებს, არამედ აჩენს დამატებით ეჭვებს. განცხადება წყარო: gyla.ge

ქუთაისი. 2 აპრილს ქუთაისის ახალგაზრდულმა ცენტრმა აუტიზმის შესახებ ინფორმაციის გავრცელების მსოფლიო დღე საინფორმაციო კამპანიით აღნიშნა. სპეციალურად ამ დღისთვის ახალგაზრდულმა ცენტრმა ბროშურები მოამზადა და ქალაქის ცენტრალურ უბნებში მსვლელობა მოეწყო. აქცია მიზნად ისახავდა აუტიზმით დაავდებული ადამიანებისთვის სოლიდარობის გამოცხადებას და საზოგადოების ინფორმირებას. ახალგაზრდული ცენტრის წევრებმა მოსახლეობას ბროშურები დაურიგეს. ისინი ქუჩაში გამვლელებს უხსნიდნენ თუ რა არის აუტიზმი. ღონისძიებები ორგანიზებული იქნა „საქართველოში ეროვნული ინტეგრაციის გაძლიერების" პროექტის (ANI) ფარგლებში, რომელიც ხორციელდება საქართველოს გაეროს ასოციაციის (UNAG) მიერ, აშშ-ს საერთაშორისო განვითარების სააგენტოს (USAID) მხარდაჭერით. წყარო: ორგანიზაციის გვერდი სოციალურ ქსელში

აჭარა. საქართველოს ახალგაზრდა იურისტთა ასოციაციის ბათუმის ოფისის თანამშრომელსა და აჭარის მთავარის სამმართველოს უფროსს შორის, 28 მარტს, ბათუმში მომხდარი ინციდენტის შესახებ შს სამინისტროს გენინსპექციამ დასკვნა გამოაქვეყნა. 2 აპრილს საიას ბათუმის ფილიალმა და არასამთავრობო ორგანიზაციებმა შსს გენინსპექციის დასკვნასთან დაკავშირებით საპროტესტო აქცია გამართეს.

კახეთი. გურჯაანში ეკო აქციის – „მწვანე დღეები 2013"– ის ფარგლებში კიდევ ერთი აქცია გაიმართა. აქციის, „დარგე შენი მომავალი", ფარგლებში საზოგადოებრივი კოლეჯის „აისის'' წარმოამდგენლებმა 100 ძირი ხე დარგეს, მათ შორის 50 კაკალი, ზეთისხილი, ოლეანდრი და სხვა. აქციის მიზანია ბიომრავალფეროვნების მდგრადი განვითარების ხელშეწყობა, გარემოსდაცვითი ცნობიერების ამაღლება, ახალგაზრდა თაობებისათვის ხის დარგვის, მოვლისა და მისი აუცილებლობის სწავლება, გარემოსდაცვითი საკითხების პოპულარიზაცია და საზოგადოების პრაქტიკულ ღონისძიებებში ჩართვა.

3 აპრილს, 15:00 საათზე, სტუდია „ქვაკუთხედი" გამართავას ბინათმშენებლობის შესახებ საკანონმდებლო ინიციატივის პრეზენტაციას. მისამართი: ბათუმი, ფარნავაზ მეფის 62-64, დემოკრატიული ჩართულობის ცენტრი

3 აპრილს, 11:00 საათზე, ახალგაზრდა იურისტთა ასოციაცია გამართავს კვლევის „დევნილთა უფლებათა სათანადო საცხოვრებელზე" – პრეზენტაციას. მისამართი: თბილისი, სასტუმრო „ამბასადორი".

3 აპრილს, 10:00 საათზე, „საქართელოს დამსაქმებელთა ასოციაცია" გამართავას ორგანიზაციის  აქტივობების პრეზენტაციას. მისამართი: ბათუმი, ფარნავაზ მეფის 62-64, დემოკრატიული ჩართულობის ცენტრი