აჭარა.  6 - 13 აგვისტოს USAID-ის პროგრამამ INRMW-საქართველომ მოაწყო ეკობანაკი მტირალას ეროვნულ პარკში.  ბანაკის მიზანი იყო მოსწავლე ახალგაზრდებში ცნობიერების ამაღლება წყალჭარბ და რელიქტურ ტერიტორიებზე, წყალჭარბი ტერიტორიების ბიომრავალფეროვნების მნიშვნელობაზე. 29 მოსწავლე თელავის, ნაფარეულის, ქისტაურის, მატანის, ზემო და ქვემო ალვანის საჯარო სკოლების ეკოკლუბებიდან გაეცნენ დასავლეთ საქართველოს დაცულ ტერიტორიებს სხვადასხვა ტურისტული მარშრუტებითა და მოწვეული სტუმრების ლექციებით. დახურვის ღონისძიებაზე INRMW-საქართველოს პროგრამის დირექტორმა გადასცა დიპლომები 5 ეკოკლუბს საუკეთესო საპროექტო წინადადებისათვის, განათლებისა და მეცნიერების სამინსტროს და დაცული ტერიტორების სააგენტოს წარმომადგენლებმა 15 მოსწავლეს გადასცეს ეკოტრენერების სერთიფიკატები. ეკოკლუბებმა თემატიკისა და დამსახურების მიხედვით მიიღეს საგრანტო საჩუქრები: 7 მიკროსკოპი TK2, 4 ზურგჩანთა წყლის მინი  ლაბორატორიის საველე აღჭურვილობით და 5 ჩანთა ეკოტრენერებისთვის. წყარო: cenn

თბილისი. ინტერნიუს - საქართველომ  გამოაქვეყნა  რეგიონალური ტელევიზიების ახალი ამბების წინასაარჩევნო მონიტორინგის მორიგი  ანგარიში, რომელიც  მოიცავს 2012 წლის 30 ივლისი-12  აგვისტოს პერიოდს.   მონიტორინგი ტარდება  საარჩევნო სისტემების საერთაშორისო ფონდის (IFES) ოთხწლიანი პროექტის „ნდობის გაზრდა საარჩევნო პროცესებისადმი" (ITEP) ფარგლებში, რომელსაც საერთაშორისო განვითარების სააგენტო (USAID) აფინანსებს. ინტერნიუსის კვლევის ობიექტს წარმოადგენს  20 რეგიონული ტელეკომპანია. ანგარიში წყარო: Media.Ge

თბილისი.ფონდ ღია საზოგადოება – საქართველოს ოფისი 20 აგვისტოდან 3 სექტემბრამდე საზაფხულო არდადეგების გამო დროებით ხურავს ოფისს. ფონდის ადმინისტრაციის განცხადებაში ნათქვამია, რომ ოფისი მუშაობას 3 სექტემბერს განაახლებს. წყარო: osgf.ge  

20 აგვისტოს, 12:00 საათზე, საერთაშორისო გამჭვირვალობა – საქართველო გამართავს კვლევის პრეზენტაციას. ანგარიშში განხილულია პოლიტიკური პარტიების 2011 წლის ფინანსური დეკლარაციები. მისამართი: თბილისი, რუსთაველის 26, საერთაშორისო გამჭვირვალობა – საქართველოს ოფისი.

თბილისი. კამპანია „ეს შენ გეხებამ", 17 აგვისტოს,  საარჩევნო ქცევის წესების შესახებ პოლიტიკურ პარტიებს მიმართავს. ორგანიზაციის მიერ გავრცელებულ განცხადებაში გამოთქმულია მზადყოფნა ორგანიზაციის მიერ შემუშავებულ პოლიტიკურ პარტიათა ქცევის წესებს მოდიფიცირება გაუკეთდეს და შესთავაზოს მხარეებს. სრულად წყარო: esshengexeba.ge

სამცხე–ჯავახეთი. საზოგადოებრივი განვითარების ახალციხის ცენტრისა და ახალციხის ახალგაზრდული ცენტრის  ხელშეწყობით  აწყურის მოსწავლე-ახალგაზრდობის  ბანაკში ახალციხის მუნიციპალიტეტის სამოქალაქო კლუბის წევრებისათვის  ვიზიტი მოეწყო. აწყურის ბანაკში ამჟამად ხორციელდება პროექტი „ჩართე მზე – გაათბე სახლი",  სადაც მოსახლეობას უტარებენ  ტრენინგებს მზის ენერგიის გამოყენების შესახებ. საზოგადოებრივი განვითარების ახალციხის ცენტრის თავმჯდომარე ნუგზარ თათეშვილი სამოქალაქო კლუბის წევრებს  მზით წყლის გამათბობებ კოლექტორებსა და მათი დამონტაჟების წესებზე ესაუბრა. აწყურის ბანაკში ვიზიტი მიზნად ისახავდა საბუნებისმეტყველო მეცნიერების პრაქტიკაში გამოყენებას, სამოქალაქო კლუბის  წევრებმა  მზის ენერგიის გამოყენების შესახებ ამომწურავი ინფორმაცია მიიღეს და ადგილზე ნახეს მზის  კოლექტორები.

იმერეთი. 16 აგვისტოს ქუთაისის „დემოკრატიული ჩართულობის ცენტრში" საარჩევნო პორტალის პრეზენტაცია გაიმართა. იგი წარმოადგენს სამი არასამთავრობო ორგანიზაციის - „სამართლიანი არჩევნებისა და დემოკრატიის საერთაშორისო საზოგადოების", „საქართველოს ახალგაზრდა იურისტთა ასოციაციისა" და „საერთაშორისო გამჭვირვაობა - საქართველოს" ერთობლივ ინიციატივას. ვებ-გვერდის მიზანია 2012 წლის საპარლამენტო არჩევნების შესახებ დაინტერესებული მხარეებისათვის  ინფორმაციის მიწოდება. წინასაარჩევნო პერიოდში, არჩევნების დღეს და მის შემდგომ აღნიშნული ორგანიზაციები არჩევნების პორტალზე განათავსებენ ინფორმაციას, მათ მიერ დაფიქსირებული სავარაუდო დარღვევების შესახებ, ინციდენტების რუკაზე. გარდა ამისა, არჩევნების პორტალი electionsportal.ge  საშუალებას აძლევს ნებისმიერ მოქალაქეს ,თავად განათავსოს ინფორმაცია საარჩევნო პერიოდის სავარაუდო დარღვევებისა და ინციდენტების შესახებ. პორტალთან ერთად მუშაობს უფასო ცხელი ხაზი, SMS ნომერი 2500, რომელზეც ინფორმაციის გაგზავნა შეუძლია ნებისმიერ მოქალაქეს ნებისმიერი მობილური ქსელიდან.

სამცხე–ჯავახეთი. საზოგადოებრივი ორგანიზაციის „ბილიკის" ინიციატივით, ახალციხის ახალგაზრდულ ცენტრში, გორისა და ახალციხის სამოქალაქო კლუბის წევრების შეხვედრა გაიმართა. 10 აგვისტოს გამართული შეხვედრა, რომელიც  სამოქალაქო განათლებისა და პედაგოგთა გადამზადების პროგრამის ფარგლებში დაიგეგმა, თანამშრომლობითი ხასიათის ღონისძიებებს ისახავდა მიზნად და მასში ორგანიზაცია ,,ბილიკის” ბენეფიციარები და ჟურნალისტიკის კლუბების წევრებიც მონაწილეობდნენ. შეხვედრა მოიცავდა გაცნობითი ხასიათის  სავარჯიშოებს, სადაც მონაწილეები დაწყვილდნენ და ერთმანეთზე  ინფორმაციებს ცვლიდნენ.  ასევე, კლუბის წევრებმა სამომავლოდ  ერთობლივი ღონისძიებები დაგეგმეს  და  გაცვალეს ელექტრონული ფოსტის მისამართები. შეხვედრის ორგანიზატორების თქმით, მსგავსი პრაქტიკა სხვადასხვა რეგიონში არსებული სამოქალაქო კლუბების აქტიურ თანამშრომლობაზეა ორიენტირებული.

16 აგვისტოს, 15:00 საათზე, დემოკრატიული ჩართულობის ცენტრში, საქართველოს ახალგაზრდა იურისტთა ასოციაცის ქუთაისის ოფისის წარმომადგენლები გამართავენ შეხვედრას. მისამართი: ქუთაისი, პუშკინის #6, დემოკრატიული ჩართულობის ცენტრი

კახეთი.საზოგადოებრივი ორგანიზაცია ,,სამოქალაქო საზოგადოების კვლევისა და განვითარების ცენტრი’’ კახეთის რეგიონის ყველა მუნიციპალიტეტში საინფორმაციო შეხვედრებს მართავს. კახეთის რეგიონული განვითარების სამუშაო ჯგუფი 4 მიმართულებით მუშაობს, ესენია: სოფლის მეურნეობა, ტურიზმი, ეკონომიკა და ინფრასტრუქტურა. ჯგუფის წევრები არიან ექსპერტები, საზოგადოებრივი ორგანიზაციების წარმომადგენლები. ჯგუფი მუნიციპალიტეტებში აწყობს გეგმის პრეზენტაციას, რომელიც 2012-2017 წლების სტრატეგიის შემუშავებას ეხება. კახეთის რეგიონული განვითარების პროექტის კოორდინატორის, ლიზა სოფრომაძის თქმით, პროექტის მიზანია კახეთის ეფექტიანი მართვა და რეგიონის განვითარების სტრატეგიის ჩამოყალიბება: ,,კახეთის გუბერნიასთან შექმნილი რეგიონალური განვითარების საბჭო მუშაობს კახეთის განვითარების სტრატეგიის შემუშავებაზე.  სამუშაო ჯგუფმა დაიწყო შეხვედრები და ასევე, ინფორმაციების მოძიება სფეროების მიხედვით. შეხვედრებს კახეთის რვავე მუნიციპალიტეტებში ვმართავთ, ვავრცლებთ ინფორმაციას პროექტის შესახებ რათა პროცესი უნდა იყოს მაქსიმალურად გამჭვირვალე.’’ პროექტი დაფინანსებულია გერმანიის საერთაშორისო განვითარების საბჭოს (GIZ) მიერ.

სამეგრელო. ზუგდიდში მოქმედმა საზოგადოებრივმა ორგანიზაციამ ინვალიდ ქალთა და ინვალიდ ბავშვთა დედათა ასოციაციამ „დეამ" „ადგილობრივ თვითმმართველობაში ზუგდიდის მუნიციპალიტეტის ახალგაზრდების მონაწილეობის მხარდაჭერის" პროექტის ფარგლებში სტუდენტებთან შეხვედრა გამართა. შეხვედრაზე ისაუბრეს ახალგაზრდების პრობლემებზე. მათი თქმით, სათანადო განათლება ბევრისთვის დღემდე ხელმიუწვდომელია მაღალი გადასახადების, უნივერსიტეტებში საჭირო წიგნების სიმწირის მიზეზით. ასევე დაბალია უმაღლეს სასწავლო დაწესებულებებში თვითმმართველობების დონე, არც ინფრასტრუქტურაა შესაბამისად მოწყობილი განსხვავებული შესაძლებლობების პირთა საჭიროებების შესაბამისად, არ ფუნქციონირებს სტუდენტური საცხოვრებლებიც. ასოციაცია „დეას" აღმასრულებელმა დირექტორმა, მადონა ხარებავამ ისაუბრა სტუდენტური სესხების საქართველოში იმ სახით შემოღების თაობაზე, როგორც ეს არაერთ განვითარებულ ქვეყანაშია, რომლის შედეგად ახალგაზრდები უპროცენტო, გრძელვადიანი მომსახურებით ისარგებლებენ. მისივე თქმით, უნივერსიტეტებმა სწავლების პროცესში ასევე უნდა იხელმძღვანელონ თანამედროვე ტექნოლოგიებით. შეხვედრაზე ასევე განიხილეს ჯანდაცვის, დასაქმების პრობლემები, ამასთან კულტურულ-ინტელექტუალური განვითარების შესაძლებლობების ხელშეწყობა.

აჭარა. 14 აგვისტოს, ბათუმის დემოკრატიული ჩართულობის ცენტრში, თვითმმართველი ქალაქი ბათუმის საკრებულოსთან არსებული სამოქალაქო მრჩეველთა კომიტეტისა და ბათუმის დემოკრატიული ჩართულობის ცენტრის ორგანიზებით, „ბათუმის წყალი" ადმინისტრაციის წარმომადგენლები ბინათმესაკუთრეთა ამხანაგობების წარმომადგენლებს შეხვდნენ. შეხვედრაზე ისაუბრეს წყალმომარაგების სისტემის სრულყოფაზე, გამრიცხველიანობასა და წყლის ხარისხზე ბათუმში. ასევე სასმელი წყლის ქსელზე მომხმარებელთა მიერთების ახალ პროცედურებზე. პრეზენტაციის შემდეგ „ბათუმის წყლის" წარმომადგენლებმა დამსწრე საზოგადოების შეკითხვებს უპასუხეს. შეხვედრა კითხვა–პასუხის რეჟიმში გაიმართა. „სამოქალაქო მრჩეველთა კომიტეტი" მომავალშიც აპირებს მოსახლეობისათვის აქტუალურ საკითხებზე საჯარო შეხვედრების გამართვას.

თბილისი. საქართველოს ახალგაზრდა იურისტთა ასოციაციის მედიის სამართლებრივი დაცვის ცენტრი მედიის წარმომადგენლებს დახმარებას სთავაზობს. იგი მზადყოფნას გამოთქვამს სამართლებრივი დახმარება გაუწიოს მედიის წარმომადგენლებს ცესკოში აკრედიტაციის გავლის საკითხებში. სრულად წყარო: gyla.ge

თბილისი.ომისა და მშვიდობის გაშუქების ინსტიტუტის კავკასიის პროგრამა ფოტოკონკურსს აცხადებს – „ქალი და კონფლიქტი". კონკურსი ხორციელდება ინიციატივის – „ქალები ერთიანდებიან მშვიდობისათვის – ცვლილებათა ხმა" – ფარგლებში. აღნიშნული ინიციატივა გაეროს ქალთა პროექტის  – ქალები თანასწორობისათვის, მშვიდობა და განვითარების – ინიციატივას წარმოადგენს. დეტალური ინფორმაცია წყარო:  media.gehttp://media.ge

გურია. 14 აგვისტოს საქართველოს დემოკრატიული კავშირის წარმომადგენლები ოზურგეთის მუნიციპალიტეტის მაკვანეთის თემს ეწვივნენ, რომლის  მიზანიც იყო სოფლის განვითარების პროგრამით გათვალისწინებული სამუშაობის მონიტორინგი. როგორც მონიტორინგმა აჩვენა დაგეგმილი საქმიანობების ნაწილი შესრულებულია. კერძოდ, შემოიღობა კულტურის სახლი, გარემონტდა საბავშვო სახლი, ზემო მაკვანეთის გზა მოპირკეთდა. დაგეგმილი სამუშაოების ნაწილის შესრულება მომავალ ერთ თვეში იგეგმება. მონიტორიგის ერთ–ერთ საგანს საკრებულოში სოფლის დეპუტატის მიერ ამომრჩევლებთან, კანონით გათვალისწინებული ნორმების ფარგლებში, შეხვედრები წარმოადგენს.

15 აგვისტოს, 13:00 საათზე „ახალგაზრდა ფინანსისტთა და ბიზნესმენთა ასოციაცია – აფბა" ბრიფინგს გამართავს. ბრიფინგის თემა: მიკროსაფინანსო ორგანიზაციებში სესხებზე არსებული საპროცენტო განაკვეთები. მისამართი: თბილისი, თაქთაქიშვილის ქუჩა 11, for.ge-ს პრეს–კლუბი.

15 აგვისტოს, 11:30 საათზე, სასტუმრო „რედისონ ბლუ ივერიაში" საარჩევნო სისტემების საერთაშორისო ფონდი (IFES) გამართავს ღონისძიებას, სადაც განიხილავენ, ქალის როგორც პოლიტიკოსის მიმართ საქართველოში არსებულ განწყობებსა და დამოკიდებულებას. მისამართი: თბილისი, სასტუმრო რედისონ ბლუ ივერია

აჭარა. ბათუმის დემოკრატიული ჩართულობის ცენტრში, საერთაშორისო განათლების ცენტრის ორგანიზებით იმართება ფილმების ჩვენება. პროექტის „კავკასიური ფილმების" ფარგლებში მაყურებლები ნახავენ მიგრაციის, გენდერისა და დემოკრატიის განვითარების თემატიკაზე გადაღებულ ფილმებს. 13 აგვისტოს მოეწყო ფილმის ჩვენება – „ღარიბი საქრთველოდან"  (რეჟისორი– ლევან კოღუაშვილი). ფილმში ასახულია ამერიკაში სამუშაოდ წასული ქართველი ქალების ცხოვრება. ჩვენების შემდეგ გაიმართა დისკუსია, დარბაზში მყოფმა საზოგადოებამ პარალელები გაავლო რუმინეთში არსებულ მსგავს სიტუაციასთან.

კახეთი.  გურჯაანის მუნიციპალიტეტის სოფელ ველისციხეში  13 აგვისტოს ,,საზოგადოებრივი საქმიანობის კლუბმა" დასუფთავების აქცია მოაწყო. მოხალისეები, რომლებიც აქციაში აქტიურად ჩაერთნენ, ამავე სოფლის საჯარო სკოლის მოსწავლეები არიან. საზოგადოებრივი კლუბის ლიდერის, ზაურ მირიანაშვილის თქმით, მათი საქმიანობის ერთ-ერთი ძირითადი მიმართულება სწორედ გარემოს დაცვაა: „დღეს დავასუფთავეთ პატარა სკვერი, რომელიც სოფლის ცენტრში მდებარეობს.  10 დღის წინ კი დავასუფთავეთ ჩვენი საჯარო სკოლის ეზო  და  სოფლის ცენტრში მდებარე საცურაო აუზი".

თბილისი. 13 აგვისტოს  სასტუმრო „შერატონ მეტეხი პალასში" ადამიანის უფლებათა ცენტრმა  „საპარლამენტო არჩევნების გაშუქების მედიამონიტორინგის" შედეგები წარუდგინა საზოგადოებას.  ადამიანის უფლებათა ცენტრი მედიამონიტორინგს ახორციელებს ამერიკის საერთაშორისო განვითარების სააგენტოს  (USAID) დაფინანსებული ოთხწლიანი პროექტის - „ნდობის გაზრდა საარჩევნო პროცესებისადმი"  ფარგლებში, რომელსაც ახორციელებს საარჩევნო სისტემების საერთაშორისო ფონდი (IFES). პროექტის ფარგლებში, ადამიანის უფლებათა ცენტრის მონიტორები აკვირდებიან შემდეგ ტელეარხებზე გასულ სოციალურ და ფასიან პოლიტიკურ რეკლამებს: საზოგადოებრივი მაუწყებელი, „იმედი", „რუსთავი 2", „კავკასია", „მაესტრო" და „მე-9 არხი". მედიამონიტორინგის მიზანია, მედიის მიერ წინასაარჩევნო პერიოდში სოციალური და პოლიტიკური რეკლამების გაშუქების ტენდენციების შესწავლა, ფარული პოლიტიკური რეკლამების გამოვლენა და საარჩევნო გარემოს გაუმჯობესების მიზნით რეკომენდაციების შემუშავება. ანგარიში – 18 ივნისი -29 ივლისი წყარო: humanrights.ge

14 აგვისტოს,  19:00 საათზე სამოქალაქო მრჩველეთა კომიტეტისა და ბათუმის დემოკრატიული ჩართულობის ცენტრის ორგანიზებით შპს "ბათუმის წყალი" გამართავს საჯარო შეხვედრას ბინათმესაკუთრეთა ამხანაგობების თავმჯდომარეებთან. მისამართი: ბათუმი, ფარნავაზ მეფის 62–64, დემოკრატიული ჩართულობის ცენტრი

აჭარა. 13 აგვისტოს, ბათუმის დემოკრატიული ჩართულობის ცენტრში ლიბერალური განათლების ქართულ–ამერიკულმა ინიციატივამ, პოლიტიკური განხილვების 4 დღიანი სერია დაასრულა. იგი პროექტის „ახალგაზრდები დემოკრატიისათვის" – ფარგლებში ტარდებოდა. განსახილველი საკითხები მრავალფეროვნებით გამოირჩეოდა. ახალგაზრდებმა მწვავედ დასვეს და განიხილეს აქტუალური საკითხები და პრობლემათა გადაწყვეტის თავიანთ მოდელებზე ისაუბრეს. ლიბერალური განათლების ქართულ–ამერიკული ინიციატივა დისკუსიების გამართვას ახლო მომავალში კვლავ გეგმავს.