თბილისი. 23 მარტს, ომბუდსმენმა ისაუბრა კონფლიქტურ და პოსტ–კონფლიქტურ სიტუაციებში ადამიანის უფლებათა ეროვნული ინსტიტუტების როლის მნიშვნელობაზე ჟენევაში. სახალხო დამცველმა ხაზი გაუსვა კონფლიქტის მშვიდობიანი მოგვარების პროცესში საერთაშორისო და სამოქალაქო საზოგადოების ჩართულობის აუცილებლობას და საქმიანობას, რომელსაც ამ კუთხით ომბუდსმენის აპარატი ახორციელებს. სრულად... წყარო: www.ombudsman.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს სტატიას: „კანონმდებლობაში შესული ცვლილებები ე.წ. ოდეერების საქმიანობის მონიტორინგს მნიშვნელოვნად გაართულებს". „იმ უწყებებში, რომლებიც მთავრობის დადგენილების შესაბამისად სახელმწიფო უსაფრთხოებისათვის მაღალი რისკის მქონე სუბიექტებს არ წარმოადგენენ, (მათ შორის საქართველოს განათლებისა და მეცნიერების სამინისტრო, უმაღლესი სასწავლებლები), ე.წ. „ოდეერის" საქმიანობა ცალსახად წარმოადგენს კანონმდებლობის დარღვევას. ხოლო, „ინტერესთა შეუთავსებლობისა და კორუფციის შესახებ" საქართველოს კანონში შეტანილმა ბოლო ცვლილებებმა შესაძლებელია წაართვას საზოგადოებას აღნიშნული პროცესის სრულყოფილი მონიტორინგის ერთ-ერთი უმნიშვნელოვანესი მექანიზმი, როდესაც შეიზღუდა წვდომა იმ პირთა დეკლარაციებზე რომლებსაც „სახელმწიფო საიდუმლოების შესახებ" საქართველოს კანონის შესაბამისად უკავიათ საიდუმლოების გრიფის მქონე თანამდებობა", ნათქვამია ორგანიზაციის ვებ-გვერდზე. სრულად... წყარო: idfi.ge

თბილისი. 22 მარტს, გავრცელდა ინფორმაცია შპს „საქნახშირი ჯი აი ჯი ჯგუფის" მიერ ტყიბულში დასაქმებულ მეშახტეებისათვის ახალი ინდივიდუალური ხელშეკრულების შეთავაზების თაობაზე. „ადამიანის უფლებების სწავლებისა და მონიტორინგის ცენტრი მიიჩნევს, რომ საწარმოს მხრიდან დასაქმებულთათვის უფლებაშემლახავი პირობების შეთავაზებისა და ხელშეკრულებაზე დასაქმებულთა დაუყოვნებელი დათანხმების მცდელობა, არაკეთილსინდისიერი და კანონსაწინააღმდეგო ნაბიჯია, რაც მიზნად ისახავდა 2016 წლის 29 თებერვალს ტყიბულის გაფიცვისას მიღწეული შეთანხმებისა და სხვა მანამდე არსებული შეთანხმებების შედეგების გაუქმებას", ნათქვამია ორგანიზაციის განცხადებაში. სრულად... წყარო: emc.org.ge

თბილისი. „ტოლერანტობისა და მრავალფეროვნების ინსტიტუტი" (TDI) საქართველოს სახელმწიფო საზღვარზე, სარფის სასაზღვრო გამტარ პუნქტზე, საქართველოს მუსლიმი თემის წევრების უფლებების სავარაუდო დარღვევის ფაქტებს სწავლობს. „აჭარის რეგიონში ჩატარებული კვლევის შუალედური შედეგები გვიჩვენებს, რომ მუსლიმი თემის წარმომადგენლების უფლებათა დარღვევის სავარაუდო ფაქტები ხშირად, თურქეთ-საქართველოს საზღვარის გადაკვეთისას, კერძოდ, საქართველოს სასაზღვრო პუნქტზე ხდება, განსაკუთრებით, თუ მათ თან აქვთ არაქართულენოვანი ლიტერატურა ან/და რელიგიური დანიშნულების ნივთები", ნათქვამია ორგანიზაციის ვებ-გვერდზე. სრულად... წყარო: tdi.ge

თბილისი. საქართველოს მთავრობამ უნივერსალური პერიოდული მიმოხილვის 31-ე სესიის ფარგლებში წარადგინა დასკვნითი დოკუმენტი. ეს დოკუმენტი შეიცავს პასუხს სახელმწიფოს მიერ მიღებულ რეკომენდაციებზე, რომელთა შესახებ პასუხის გასაცემად სახელმწიფომ მანამდე დრო ითხოვა. გაეროს ადამიანის უფლებათა საბჭოს უნივერსალური პერიოდული მიმოხილვის (UPR) სამუშაო ჯგუფის მიერ გამოქვეყნებული 2016 წლის 23 თებერვლის ანგარიშის თანახმად, საქართველომ ყველა მნიშვნელოვანი რეკომენდაცია მიიღო. არასამთავრობო ორგანიზაციების კოალიცია (თანადგომა, ჰერა XXI, იდენტობა, ადამიანის უფლებების სწავლებისა და მონიტორინგის ცენტრი (EMC)) ეხმიანება უნივერსალური პერიოდული მიმოხილვის (UPR) მეორე ციკლის ფარგლებში საქართველოს მიერ აღებულ რეკომენდაციებს და მიიჩნევს, რომ მნიშვნელოვანია, საქართველოს მთავრობამ მოახდინოს აღნიშნული რეკომენდაციების ეფექტური განხორციელება", ნათქვამია EMC-ის ვებ-გვერდზე. სრულად... წყარო: emc.org.ge

თბილისი. 21 მარტს, გაეროს ქალთა სტატუსის განმსაზღვრელი კომისიის მე-60-ე სესიაზე გლობალური ფონდი ქალებისთვის ორგანიზებით ღონისძიება გაიმართა, რომლის პარტნიორებიც მოძრაობა სოფლად მცხოვრები ქალებისთვის და სოს საჰელი იყვნენ. „ღონისძიება სახელწოდებით „ადამიანის უფლებათა დრო სოფლად მცხოვრები ქალებისთვის დღეს" ეძღვნებოდა ერთგვარ ანგარიშს პროექტისა, რომელიც მიზნად ისახავდა აფრიკაში ქალთა ჯგუფების გაძლიერებას საკვების უსაფრთხოებისა და ქალთა უფლებების გაზრდისთვის", ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. 22 მარტს, ჟენევაში გამართულ შეხვედრაზე ომბუდსმენი ადამიანის უფლებათა ეროვნული ინსტიტუტების გლობალური ალიანსის (GANHRI) ბიუროს სრულუფლებიან წევრად აირჩიეს. საქართველოს გაწევრიანებას ალიანსის მმართველ ბიუროში მხარი 100–მდე ადამიანის უფლებათა დაცვის ეროვნული ინსტიტუტების წარმომადგენელმა დაუჭირა. სრულად... წყარო: ombudsman.ge

თბილისი. 21-22 მარტს, პარლამენტში ევროპის საბჭოს საპარლამენტო ასამბლეის მიგრაციის, ლტოლვილთა და იძულებით გადაადგილებულ პირთა კომიტეტის გასვლითი სხდომა გაიმართა. კომიტეტის სხდომის პირველი დღის მთავარი თემა იყო „მიგრაციის გამოწვევები სამხრეთ კავკასიასა და რეგიონში". სხდომას ესწრებოდნენ როგორც ევროპის საბჭოს საპარლამენტო ასამბლეის წევრი ქვეყნების, ასევე საქართველოს აღმასრულებელი და საკანონმდებლო ორგანოს წარმომადგენლები. სრულად... წყარო: ombudsman.ge

თბილისი. პრაიმ ტაიმის პრესკლუბში პარტნიორობა „თავისუფალი არჩევნისათვის" შემავალმა ორგანიზაციებმა პრესკონფერენცია გამართეს. პრესკონფერენციის თემა იყო დაგეგმილი საკანონმდებლო ცვლილებები და ინფორმაციის ხელმისაწვდომობა წინასაარჩევნო პერიოდში. „პარლამენტმა პირველი მოსმენით უკვე მიიღო ცვლილებები მაუწყებლობის შესახებ კანონში, რომლის თანახმადაც: მაუწყებლობაზე ავტორიზებული ლიცენზირებული ტელემაუწყებელი ვალდებულია, პროგრამები განათავსოს მხოლოდ სახელმწიფო ენაზე. აღნიშნული რედაქციის საბოლოო დამტკიცების შემთხვევაში, განსაკუთრებით, პრობლემური გახდება ეთნიკური უმცირესობების ინფორმირება", ნათქვამია ერთობლივ განცხადებაში. სრულად... წყარო: ორგანიზაციის ვებ-გვერდი სოციალურ ქსელში

აჭარა. 21 მარტს, ბათუმის დემოკრატიის სკოლაში ახალგაზრდა იურისტთა ასოციაციის და რადიო თავისუფლების წარმომადგენლებმა პროექტის შედეგების პრეზენტაცია წარმოადგინეს. აღნიშნული პროექტი ეხებოდა აჭარის მუნიციპალიტეტში არსებული სიტუაციის ანალიზს გენდერული თანასწორობის ჭრილში. მომხსენებლებმა ფოკუს ჯგუფების შედეგებზე ისაუბრეს, რომელიც ქალთა მიმართ ფსიქოლოგიურ ძალადობას უსვამდა ხაზს. სტერეოტიპებისა და საზოგადოების არაჯანსაღი აზრი, განსაკუთრებით მაღალმთიან აჭარაში მცხოვრებ ქალებს აჩვევს იმ გარემოს, რომელიც მათ მიმართ უპატივცემულობასა და ჩაგვრაში გამოიხატება. შეხვედრაზე განხილულ იქნა ანონიმური მაგალითები, რომლებიც ქალთა უფლებების დარღვევასა და უგულვებელყოფას ეხებოდა, საუბარი შეეხო ასევე, სახელმწიფო პოლიტიკის ცვლილებას, რომლის დაჩქარებას აუცილებელია. შეხვედრას სტუდენტები, მესამე სექტორისა და მედია ორგანიზაციების წარმომადგენლები ესწრებოდნენ.

თბილისი. 19 მარტს, მოძრაობა „ეს შენ გეხება"-ას ორგანიზებით აქცია გამართა. აქცია 13:00 საათზე ფილარმონიასთან დაიწყო, რის შემდეგაც აქციის მონაწილეები, მსვლელობით, კანცელარიასთან მივიდნენ. მოძრაობა „ეს შენ გეხება", პირადი ცხოვრების ამსახველი კადრების გამოქვეყნებას გმობს და ხელისუფლებას სწრაფი გამოძიების ჩატარებისკენ მოუწოდებს. თბილისის გარდა იგივე მოთხოვნებით აქცია საქართველოს სხვადასხვა რეგიონებშიც გაიმართა. სრულად... წყარო: ორგანიზაციის ვებ-გვერდი სოციალურ ქსელში

თბილისი. 21 მარტს მსოფლიო დაუნის სინდრომის დღეს აღნიშნავს. „აუცილებელია საზოგადოების თითოეულმა წევრმა გავაცნობიეროთ ჩვენი როლი და პასუხისმგებლობა დაუნის სინდრომის მქონე ადამიანებისთვის ინკლუზიური გარემოს მშენებლობის, მათი ღირსებისა და უფლებრივი მდგომარეობის დაცვის მიმართულებით. პასუხისმგებლობის ხარისხი განსაკუთრებით მაღალია ხელისუფლების ორგანოების თანამდებობის პირების, პოლიტიკოსების და სხვა საზოგადოებისთვის ცნობილი სახეებისთვის", ნათქვამია სახალხო დამცველის ვებ-გვერდზე. სრულად... წყაrო: ombudsman.ge

თბილისი. 18 მარტს, საქართველოს ახალგაზრდა იურისტთა ასოციაციამ (საია) საინფორმაციო ფლაერები დაარიგა და მოსახლეობას ფილარმონიასთან, 13:00 საათზე დაგეგმილ აქციაზე მოსვლისკენ მოუწოდა. „მოძრაობა „ეს შენ გეხებამ" კამპანია განაახლა ფარული თვალთვალის წინააღმდეგ. 2012 წელს ამ მოძრაობის წყალობით შეიქმნა გარემო, რომელმაც საზოგადოებას თავისუფალი და ობიექტური არჩევანის გაკეთების საშუალება მისცა. 2014 წელს კამპანია ისევ განახლდა და მისი წევრები ამტკიცებდნენ, რომ გრძელდებოდა უკანონო თვალთვალი, ისევ გვისმენდნენ, ისევ ავრცელებდნენ ძველ თუ ახალ კადრებს, არ გვიტოვებდნენ პირად სივრცეს… კამპანიამ მიაღწია ცვლილებას კანონმდებლობაში, მაგრამ ეს საკმარისი არ აღმოჩნდა! გელით შაბათს13:00 საათზე ფილარმონიასთან. მიზანს მხოლოდ ჩვენი ერთიანობით მივაღწევთ!", ნათქვამია ორგანიზაციის ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში

თბილისი. საქართველოს შინაგან საქმეთა სამინისტრომ არ გაითვალისწინა სახალხო დამცველის 2015 წლის 14 დეკემბერის რეკომენდაცია, გამყოფი ხაზის პირას მცხოვრები მოქალაქის კომპენსაციით უზრუნველყოფის თაობაზე. „შესაბამისად, სახალხო დამცველი მოუწოდებს შინაგან საქმეთა სამინისტროს კიდევ ერთხელ განიხილოს აღნიშნული საკითხი და მიიღოს ისეთი გადაწყვეტილება, რომელიც უზრუნველყოფს მოქალაქე ტ.თ.-ს სათანადო საცხოვრებლის უფლების დაცვას", ნათქვამია ორგანიზაციის ვებ-გვერდზე. სრულად... წყარო: www.ombudsman.ge

თბილისი. „ახალგაზრდა ადვოკატები" პარლამენტის ადამიანის უფლებათა დაცვისა და სამოქალაქო ინტეგრაციის კომიტეტთან არსებული სამეცნიერო-საკონსულტაციო საბჭო სხდომას დაესწრო. ორგანიზაცია, როგორც საბჭოს წევრი, მიღებულ ერთობლივ განცხადებას შეუერთდა. „ჩვენ, საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტთან არსებული სამეცნიერო-საკონსულტაციო საბჭოს შემადგენლობაში მყოფი სამოქალაქო ორგანიზაციები, მოწვეული სპეციალისტები და ექსპერტები, ვგმობთ პირადი ცხოვრების ამსახველი ვიდეო-მასალის გასაჯაროების ფაქტებს და მოვუწოდებთ საქართველოს სამართალდამცავ ორგანოებს, დროის მოკლე ვადაში მოხერხდეს ამ შემზარავი დანაშაულებრივი ქმედების სრულფასოვანი გამოძიება, ყველა დამნაშავის გამოვლენა და კანონის წინაშე მთელი სიმკაცრით დასჯა", ნათქვამია ერთობლივ განცხადებაში. სრულად... წყარო: barristers.ge

კახეთი. 15 მარტს პანკისის ხეობის სოფელ დუისში, პანკისის სათემო რადიოს ოფისში, ადამიანის უფლებათა ცენტრის წარმომადგენლებმა შეხვედრა გამართეს ხეობაში მცხოვრებ ქალებთან და სამოქალაქო აქტივისტებთან. ადამიანის უფლებათა ცენტრის აღმასრულებელმა დირექტორმა ისაუბრა პროექტის -„ქალების, რელიგიური და ეთნიკური უმცირესობების უფლებების დაცვის ხელშეწყობა საქართველოს რეგიონებში" შესახებ. პროექტი მიზნად ისახავს, სტრატეგიული სამართალწარმოების გზით, მოწყვლადი ჯგუფების, ქალების, რელიგიური და ეთნიკური უმცირესობების წარმომადგენლებისათვის მართლმსაჯულების ხელმისაწვდომობის გაუმჯობესების ხელშეწყობას საქართველოს რეგიონებში, კერძოდ - ქვემო ქართლსა და კახეთში. სრულად... წყარო: ცენტრის ვებგვერდი სოციალურ ქსელში

თბილისი. 15 მარტს, სახალხო დამცველის გორის ოფისის თანამშრომლები გორის მუნიციპალიტეტის სოფელ ჯარიაშენში იმყოფებოდნენ. სახალხო დამცველის წამომადგენლები ადგილზე გაეცვნენ სოფლის განაპირას ოკუპირებული ტერიტორიიდან გადმოსული შეიარაღებული პირების მიერ გზის გაყვანის საკითხს. „მათ ადგილზე დახვდათ მოჭრილი ხილის ხეები. ახლად გაყვანილი გზის მონაკვეთი, რის გამოც სოფლის მოსახლეობას შეეზღუდათ საკუთარ ბაღებში სასოფლო სამეურნეო სამუშაოების წარმოება. სოფლის ტერიტორიული ორგანოს წარმომადგენლის განცხადებით ამ ეტაპზე 31 ოჯახი ვეღარ ისარგებლებს საკუთარი ბაღით, თუმცა აღნიშნული ოჯახების რიცხვი შესაძლებელია გაიზარდოს გზის გაყვანის პროცესის დასრულების შემდგომაც", ნათქვამია ომბუდსმენის ვებ-გვერდზე. სრულად... წყარო: ombudsman.ge

თბილისი. საქართველოს სახალხო დამცველი 15 მარტს თსუ–ში განვითარებულ პროცესებზე დაკვირვების შედეგებს აჯამებს. „სამწუხაროა, რომ უმრავლეს შემთხვევებში სამართალდამცავები ინფორმაციას არ აწვდიდნენ სახალხო დამცველის წარმომადგენლებს, არ იყვნენ ინფორმირებულები სახალხო დამცველის უფლებამოსილებისა და მის საპასუხოდ მათთვის დაკისრებული მოვალეობების შესახებ. მოვუწოდებ შინაგან საქმეთა მინისტრს, დაუყოვნებლივ უზრუნველყოს ზომების მიღება აღნიშნული მასშტაბური პრობლემის მოსაგვარებლად”, ნათქვამია ორგანიზაციის ვებ-გვერდზე. სრულად... წყარო: სოციალური ქსელი

თბილისი. ინფორმაციის თავისუფლების განვითარების ინსტიტუტი აქვეყნებს ბლოგპოსტს: „რეკომენდაციები 2016-2017 წლების ადამიანის უფლებათა დაცვის სამთავრობო სამოქმედო გეგმის გამოხატვის თავისუფლების თავზე". „IDFI თვლის, რომ სამოქმედო გეგმის მიზნის ამგვარი ფორმულირება საკმარისად არ ასახავს ხელისუფლების მხრიდან გამოხატვის თავისუფლების კუთხით სიტუაციის გაუმჯობესებისთვის გადასადგმელ საკმარის ნაბიჯებს. უპირველეს ყოვლისა, სასურველია მიზანი „გამოხატვის თავისუფლების უზრუნველყოფა" შეიცვალოს და ჩამოყალიბდეს შემდეგი სახით - "გამოხატვის თავისუფლების კუთხით ვითარების გაუმჯობესება”. მიზნის აღნიშნული ფორმულირება უზრუნველყოფს მის შიგნით შემავალი კომპონენტების პროაქტიულობას", ნათქვამია ორგანიზაციის ვებ-გვერდზე. სრულად... წყარო: idfi.ge

თბილისი. საქართველოს ჟურნალისტური ეთიკის ქარტია თბილისის სახელმწიფო უნივერსიტეტში განვითარებულ მოვლენებთან დაკავშირებით გაცხადებას ავრცელებს. „თსუ-ში აქციები კვლავაც გრძელდება, მნიშვნელოვანია, რომ მედიის წარმომადგენლებს მიეცეთ პროფესიული საქმიანობის თავისუფლად განხორციელების საშუალება და შეძლონ აუდიტორიისთვის ინფორმაციის მიწოდება. შესაბამისად, ჟურნალისტური ეთიკის ქარტიის საბჭო მოუწოდებს სამართალდამცავ ორგანოებს, უნივერსიტეტის დაცვის თანამშრომლებს, უზრუნველყონ ჟურნალისტების უსაფრთხო სამუშაო პირობები", ნათქვამია ქარტიის განცხადებაში. სრულად... წყარო: qartia.org.ge

თბილისი. სახალხო დამცველის წარმომადგენლის დაკვირვებისას, პოლიციელთა მხრიდან მოსახლეობაზე ძალადობა, არასათანადო მოპყრობა და უფლებამოსილების გადამეტება არ დაფიქსირებულა. „ზუგდიდის მერიის მუნიციპალიტეტის ზედამხედველობის სამსახურის უფროსის გადაწყვეტილებით, ზუგდიდის ბაზრის შიდა ტერიტორიაზე არსებული მსუბუქი კონსტრუქციების დემონტაჟი გადაიდო, რათა პროცესის მონაწილე ყველა მხარემ შეძლოს შეთანხმების მიღწევა", ნათქვამია ომბუდსმენის ვებ-გვერდზე. სრულად... წყარო: www.ombudsman.ge

თბილისი. არასამთავრობო ორგანიზაციები პირადი ცხოვრების ამსახველი ვიდეოების გავრცელებას ეხმაურებიან. „საქართველოს დემოკრატიული განვითარებისთვის და მისი ევროპულ სივრცეში სრულფასოვანი ინტეგრაციისთვის უაღრესად დიდი მნიშვნელობა აქვს მოახლოებულ საპარლამენტო არჩევნებს, რომელიც თავისუფალ და სამართლიან გარემოში უნდა წარიმართოს. ეს წინაპირობა კი ვერ იქნება მიღწეული, თუ საარჩევნო პროცესის მონაწილე სუბიექტები - პოლიტიკური კლასი და მედიის წარმომადგენლები პერმანენტული შანტაჟის პირობებში იქნებიან. მოვუწოდებთ სამართალდამცავ ორგანოებს, დროულად გამოიძიონ აღნიშნული ფაქტები და მოახდინონ ადეკვატური რეაგირება მათზე; გატარდეს ეფექტური პრევენციული ღონისძიებები მსგავსი სამართალდარღვევების შემდგომში თავიდან აცილების მიზნით; მოვუწოდებთ ყველა მედიას, არ დაუშვან კადრების გასაჯაროება და არ დაასახელონ კადრებში სავარაუდოდ ასახული პირების ვინაობა", ნათქვამია ერთობლივ განცხადებაში. სრულად... წყარო: mdfgeorgia.ge