თბილისი. გაეროს ბავშვთა ფონდი (იუნისეფი) შეშფოთებულია არასრულწლოვანთა მიმართ არასათანადო მოპყრობის შესაძლო ფაქტებით. „იუნისეფი აფასებს შინაგან საქმეთა სამინისტროს მიერ გაწეულ სამუშაოს არასრულწლოვანთა საქმეებზე მომუშავე პოლიციელთა გამოყოფის და გადამზადების მხრივ და ამავე დროს, მოუწოდებს სამინისტროს, დაუყონებლივ გადადგას საჭირო ნაბიჯები პოლიციელთა სპეციალიზაციის პროცესის გაძლიერების და დაჩქარების მიზნით და უზრუნველყოს ხარისხის კონტროლისა და ეფექტიანი მეთვალყურეობის მექანიზმი. იუნისეფი, სხვა დონორებთან და ადგილობრივ პარტნიორებთან თანამშრომლობით, ეხმარება საქართველოს მთავრობას არასრულწლოვანთა მართლმსაჯულების სისტემის რეფორმაში და სურვილს გამოთქვამს გააგრძელოს ყველა პარტნიორის მხარდაჭერა ბავშვის უფლებათა კონვენციის და სხვა საერთაშორისო შეთანხმებების თანახმად", ნათქვამია ორგანიზაციის ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია ეხმაურება მაგდა პაპიძის საქმესთან დაკავშირებით პროკურატურის მიერ გავრცელებულ შუალედურ ინფორმაციას. „გვსურს, გამოვეხმაუროთ საქართველოს პროკურატურის მიერ გამოქვეყნებულ შუალედურ ინფორმაციას მაგდა პაპიძის სისხლის სამართლის საქმესთან დაკავშირებით. ვთვლით, რომ ანგარიშის შინაარსი, ტერმინოლოგია და ხასიათი, ისევე როგორც მასში მოყვანილი კონკრეტული მტკიცებულებების დეტალურად გამოქვეყნება, არსებითად ზღუდავს და აზარალებს ბრალდებულის უფლებრივ მდგომარეობას; აღნიშნულ ინფორმაციას შეუძლია ნეგატიური ზეგავლენა იქონიოს სისხლის სამართლის საქმის შემდგომ მიმდინარეობაზეც", ნათქვამია ორგანიზაციის ვებ-გვერდზე. სრულად... წყარო: gyla.ge

თბილისი. არასამთავრობო ორგანიზაციები ქორწინებასთან დაკავშირებულ საკონსტიტუციო ცვლილებებს ეხმაურებიან. „განცხადების ხელმომწერი არასამთავრობო ორგანიზაციები ქორწინების შესახებ საკონსტიტუციო ცვლილების ინიციატივას ეხმაურებიან და პარლამენტს მოუწოდებენ, მხარი არ დაუჭიროს პოლიტიკური პარტიებისა და სხვადასხვა ჯგუფების მიერ ინიცირებულ საკონსტიტუციო ცვლილებას, რომელიც თავისი არსით ეწინააღმდეგება ადამიანის თავისუფლებისა და თანასწორობის იდეებს. ჩვენი აზრით, აღნიშნული ინიციატივა პოპულისტურ სვლას წარმოადგენს, რომელიც მეტწილად წინასაარჩევნო პერიოდში რელიგიური ინსტიტუციისა და უმრავლესობის ლოიალობის მოპოვებისკენ არის მიმართული და ლგბტ ადამიანთა დისკრიმინაციისა და მარგინალიზაციის პრობლემებს გააღრმავებს", ნათქვამია ერთობლივ განცხადებაში. სრულად... წყარო: emc.org.ge

თბილისი. „საქართველოს დემოკრატიული ინიციატივა" ავრცელებს იანვრის თვის საინფორმაციო ბიულეტენს. ბიულეტენში მიმოხილულია: ევროსაბჭოს ადამიანის უფლებათა კომისრის ანგარიში საქართველოში ადამიანის უფლებათა მდგომარეობის თაობაზე, ევროსაბჭოს ანგარიში საქართველოში ეროვნული უმცირესობების მდგომარეობის შესახებ...", ნათქვამია ორგანიზაციის ვებ-გვერდზე. სრულად... წყარო: gdi.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ბლოგპოსტს: „მთავრობას კანონით განსაზღვრულ ვადაში შრომით ექსპლუატაციაზე ზედამხედველობის განხორციელების წესი არ მიუღია". ორგანიზაცია სახელმწიფოს მოუწოდებს: „კანონმდებლობით განისაზღვროს შრომითი ექსპლუატაციის ცნება, შრომის საერთაშორისო ორგანიზაციის სტანდარტების შესაბამისად, შეასრულოს კანონით დაკისრებული ვალდებულება და დაუყოვნებლივ მიიღოს შრომით ექსპლუატაციასა და იძულებით შრომაზე პრევენციის და მათზე რეაგირების მიზნით სახელმწიფო ზედამხედველობის განხორციელების წესი", ნათქვამია ორგანიზაციის ვებ-გვერდზე. სრულად... წყარო: emc.org.ge

თბილისი. ინფორმაციის თავისუფლების განვითარების ინსტიტუტი (IDFI) „სტრატეგიული გეგმა საქართველო - 2020"-ის ფარგლებში აქვეყნებს სტატიას: „საჯარო სამსახური რეკრუტირების პოლიტიკა: ყველას აძლევს თუ არა www.hr.gov.ge დასაქმების თანაბარ შანსს?". „სტატიის მიზანია, დასაქმების პორტალ www.hr.gov.ge-ს საჯარო სამსახურში რეკრუტირების სიტემის გამჭვირვალობის და სამართლიანი კონკურენციის გარემოს უზრუნველყოფის ეფექტურ/არაეფექტურ ინსტრუმენტად განხილვა. კონკრეტულად, კვლევის კითხვაა: რამდენად უზრუნველყოფს კონკურსის გამოცხადების პროცესი ყველა მონაწილის დასაქმების თანაბარ შანსს? რამდენად ეფექტურია საჯარო სამსახურის რეკრუტირების სისტემის ერთ-ერთი ძირითადი მდგენელი საჯარო სამსახურში კომპეტენტური კადრების მოზიდვის კონტექსტში?...", ნათქვამია სტატიაში. სრულად... წყარო: idfi.ge

თბილისი. ადამიანის უფლებების სწავლებისა და მონიტორინგის ცენტრი (EMC) საზღვრის კვეთის დროს პოლიციის მიერ მუსლიმი თემის წარმომადგენლებისთვის შექმნილ სავარაუდო დისკრიმინაციულ პრაქტიკას სწავლობს. „ორგანიზაციამ მუსლიმი თემის რამდენიმე წარმომადგენელი გამოკითხა. მათ განცხადებებში ნათქვამია საქართველო-თურქეთის საზღვარზე მუსლიმი პირების გაუმართლებელი და ხანგრძლივი დაყოვნების, რელიგიური მიკუთვნების საკითხებზე თვითნებური დაკითხვისა და რელიგიური ლიტერატურის ჩამორთმევის განმეორებად შემთხვევებზე. განმცხადებლების თქმით მსგავს პრობლემებს მხოლოდ მუსლიმი თემის წევრები აწყდებიან. პოლიციის შემოწმების საგანს სწორედ მათი რელიგიური კუთვნილება და რელიგიური საქმიანობა წარმოადგენს", ნათქვამია ორგანიზაცის ვებ-გვერდზე. EMC-მ აღნიშნულთან დაკავშირებით შინაგან საქმეთა სამინისტროს გენერალურ ინსპექციასა და სახალხო დამცველის თანასწორობის დეპარტამენტს განცხადებით მიმართა. სრულად... წყარო: emcrights.wordpress.com

თბილისი. 15 თებერვალს, სახალხო დამცველის პირველი მოადგილე ქალთა მიმართ ძალადობის, ძალადობის მიზეზებისა და შედეგების შესახებ გაეროს სპეციალური მომხსენებელ დუბრავკა სიმონოვიჩს შეხვდა. „საქართველოში ოფიციალური ვიზიტით მყოფი მომხსენებელი გაეცნო საქართველოს სახალხო დამცველის აპარატის ხედვას და რეკომენდაციებს ქალთა მიმართ ძალადობისა და ოჯახში ძალადობის საკითხებზე. შეხვედრის მიმდინარეობისას საუბარი შეეხო ადრეულ ასაკში ქორწინების, ოჯახში ძალადობის, ქალთა მკვლელობებისა და ქალთა მიმართ ძალადობის სხვა ფორმების ირგვლივ არსებულ მდგომარეობას, სახელმწიფო პოლიტიკასა და ინსტიტუციურ მოწყობას, ასევე სერვისების მიწოდების სფეროში არსებულ გამოწვევებს", ნათქვამია ომბუდსმენის ვებ-გვერდზე. სრულად... წყარო: www.ombudsman.ge

თბილისი. თბილისის ადამიანის უფლებათა სახლმა საქართველოში ადამიანის უფლებათა და თავისუფლებათა დაცვის მდგომარეობის შესახებ წლიურ ანგარიში - „ადამიანის უფლებები რეგიონებში" მოამზადა. „ანგარიშმა გამოავლინა ისეთი დარღვევები, როგორიცაა ეროვნულ და ეთნიკურ უმცირესობას მიკუთვნებულ ჯგუფთა, შშმ პირთა, დევნილთა, თავშესაფრის არმქონე პირთა, რელიგიურ უმცირესობას მიკუთვნებულ პირთა უფლებების დარღვევები. მნიშვნელოვანია აღინიშნოს, რომ ანგარიშში სხვა უფლბებთან ერთად ძირითადი აქცენტი სოციალურ თემატიკაზეა გაკეთებული და მონიტორინგის ის შედეგები, რაც განხილულია მასში, ნათელი მაგალითია იმისა, თუ რა მძიმე ვითარებაა დღეს უფლებრივი მდგომარეობის კუთხით", ნათქვამია ორგანიზაციის ვებ-გვერდზე. სრულად... წყარო: humanrights.ge

თბილისი. „ადამიანის უფლებების სწავლების და მონიტორინგის ცენტრი (EMC)" გთავაზობთ სტატიების სამნაწილიან ციკლს „საჯარო სივრცის ფუნქცია პოსტ-ტოტალიტარულ საზოგადოებაში - საფრთხეებისა და სიმპტომების შესახებ". სტატიებში სამი განსხვავებული იდეოლოგიური პლატფორმისა და პოლიტიკური ხედვის მქონე თანამედროვე მოაზროვნე საუბრობს პოსტ-ტოტალიტარიზმზე, საჯარო სივრცის კონცეფციაზე, მის ფუნქციაზე, რელიგიის როლსა და გავლენაზე საჯარო სივრცეებში. სრულად... წყარო: emc.org.ge

თბილისი. საერთაშორისო გამჭვირვალობა საქართველო აქვეყნებს განცხადებას სს „მეტრო ჯორჯიასთან" დაკავშირებით ზუგდიდში განვითარებულ მოვლენებზე. „საერთაშორისო გამჭვირვალობა - საქართველოს" პოზიციით, ნებისმიერი ქმედება, რომელიც უკანონო ჩარევით საერთო სარგებლობის ბაზრიდან ახალი კომპანიის გამიჯვნისაკენ ან/და უკვე მოქმედი გადამზიდავების უფლებების შელახვისაკენ იქნება მიმართული, საგამოძიებო უწყებების მიერ რეაგირების გარეშე არ უნდა დარჩეს. ორგანიზაციის პოზიციით, შინაგან საქმეთა სამინისტრომ საკმარისი ძალისხმევა არ გამოიჩინა სიტუაციის დაძაბვისა და კომპანია "მეტრო ჯორჯიას” საქმიანობის ხელის შეშლის ფაქტის აღსაკვეთად. ზუგდიდში ახალი სატრანსპორტო კომპანიის გამოჩენა ჯანსაღი კონკურენციის პრინციპების გაღრმავების თვალსაზრისით გადადგმული დადებითი ნაბიჯია. ამდენად, ვფიქრობთ, მნიშვნელოვანია, რომ როგორც ახალ კომპანიას, ასევე ბაზარზე უკვე მოქმედ გადამზიდავებს, სატრანსპორტო მომსახურების სფეროში საქმიანობის განხორციელების განმავლობაში რაიმე სახის შეფერხება არ უნდა შეექმნათ", ნათქვამია ორგანიზაციის ვებ-გვერდზე. სრულად... წყარო: transparency.ge

ქვემო ქართლი. 10 თებერვალს, საქართველოს ახალგაზრდა იურისტთა ასოციაციის იურიდიული განათლების ხელშეწყობის ფონდის წარმომადგენელი ქ.რუსთავის ივ.ჯავახიშვილის სახელობის #24-ე ქართული გიმნაზიის მე-9 მე-10 კლასის მოსწავლეებს შეხვდა. „ლექციის თემა იყო „სამართალი სახელმწიფო და ადამიანის ძირითადი უფლებები". სკოლის მოსწავლეებმა განიხილეს ადამიანის უფლებათა ევროპული სასამართლოს რამდენიმე გადაწყვეტილება. შეხვედრა ინტერაქტიული ხასიათის იყო და ფონდის წარმომადგენელმა მოსწავლეების კითხვებს უპასუხა", ნათქვამია ორგანიზაციის ვებ-გვერდზე. სრულად... წყარო: www.legaleducation.ge

თბილისი. ადამიანის უფლებების სწავლებისა და მონიტორინგის ცენტრი (EMC) მიმოიხილავს საკონსულტაციო კომიტეტის შეფასებებს საქართველოში რელიგიის თავისუფლებასა და ანტიდისკრიმინაციულ პოლიტიკაზე. „კომიტეტი აღნიშნავს, რომ სიძულვილით მოტივირებული დანაშაულის გამოძიების დროს მოტივის იდენტიფიცირება და მტკიცებულებებით გამყარება არ ხდება და ასეთი ქმედებები ხშირად კვალიფიცირდება ხულიგნობად, სისხლის სამართლის კოდექსის 53 (3) მუხლის მითითების გარეშე, რომელიც შეუწყნარებლობით ჩადენილ დანაშაულებს დამამძიმებელ გარემოებებში ჩადენილ დანაშაულად განიხილავს. ამის საილუსტრაციოდ კომიტეტი უთითებს ქობულეთში მუსლიმთა პანსიონატის გარშემო მომხდარ ინციდენტზე, რაზეც სამართალდამცავ ორგანოთა რეაგირება ადმინისტრაციული სამართალდარღვევისათვის 3 პირის დაჯარიმებით შემოიფარგლა", ნათქვამია ორგანიზაციის ვებ-გვერდზე. სრულად... წყარო: emc.org.ge

კახეთი. 8 თებერვალს თელავში გაიმართა დოკუმენტური ფილმის „2014" ჩვენება-დისკუსია. საქართველოს ახალგაზრდა იურისტთა ასოციაციის პროექტის ფარგლებში გადაღებული ფილმი „2014 - მოკლული ქალების ხმა, მიწვდენილი საზოგადოებისთვის მათი სიკვდილის შემდეგ", გადაღებულია პროექტის - „საზოგადოებრივი ცნობიერების ამაღლება და სახელმწიფოს საქმიანობის მონიტორინგი საქართველოში ფემიციდთან ბრძოლის მიზნით” ფარგლებში. ჩვენების დასრულების შემდეგ მოეწყო დისკუსია, რომელშიც მონაწილეობა მიიღო საიას თავმჯდომარემ ანა ნაცვლიშვილმა და პოლიციის აკადემიის წარმომადგენელმა ნოდარ სააკაშვილმა. შეხვედრას ადგილობრივი არასამთავრობო ორგანიზაციების წარმომადგენლებიც ესწრებოდნენ. ფილმის თრეილერი... წყარო: საიას ვებგვერდი სოციალურ ქსელში

თბილისი. ომბუდსმენი განცხადებას ავრცელებს სპეციალიზებულ სადღეღამისო დაწესებულებებში შეზღუდული შესაძლებლობის მქონე პირთა გარდაცვალების ფაქტებთან დაკავშირებით. „აუცილებელია, სამინისტროს შესაბამისმა სამსახურებმა ადეკვატური რეაგირება მოახდინონ ასეთ შემთხვევებზე, გამოიკვეთოს არსებული ცალკეული თუ სისტემური ხარვეზები და გატარდეს ყველა შესაძლო ღონისძიება მათი აღმოფხვრისა და მომავალში ასეთი ფაქტების პრევენციისთვის. ამასთან, სასიცოცხლოდ მნიშნველოვანია მსგავსი ტიპის დაწესებულებების შიდა მონიტორინგისა და ზედამხედველობის მექანიზმის გაძლიერება და აღნიშნულ პროცესში შესაძლო ინტერესთა კონფლიქტის გამორიცხვა”, ნათქვამია ორგანიზაციის ვებ-გვერდზე. სრულად... წყარო: www.ombudsman.ge

თბილისი. „საერთაშორისო გამჭვირვალობა - საქართველო" აქვეყნებს ბლოგპოსტს: „ფარული პატრულირება კონსტიტუციით დაცულ ადამიანის პირადი ცხოვრების უფლებას ეწინააღმდეგება". „ფარული პატრულირება შემოთავაზებული ცვლილებების შინაარსიდან გამომდინარე, ფაქტობრივად წარმოადგენს ოპერატიულ სამძებრო ღონისძიებებს, რომელიც კანონით გათვალისწინებულ განსაკუთრებულ შემთხვევებში არის ნებადართული. აქედან გამომდინარე, აღნიშნული ქმედებების განხორციელება ფაქტიურად გამარტივებული წესით ხდება, რაც კონსტიტუციით აღიარებული ადამიანის უფლებების დარღვევის და პოლიციის მიერ უფლებამოსილების ბოროტად გამოყენების შემდეგ რისკებს შეიცავს...", ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. საქართველოს ახალგაზრდა იურისტთა ასოციაცია აქვეყნებს ბლოგპოსტს დეკემბერ-იანვრის წარმატებული საქმეების შესახებ. „საია-ს ქუთაისის ფილიალი სასამართლოში იცავდა ხონის მუნიციპალიტეტის საკრებულოს ყოფილი თავმჯომარის ინტერესებს, რომელსაც ბრალი ედებოდა სამსახურებრივი უფლებამოსილების ბოროტად გამოყენებაში. საქართველოს უზენაესი სასამართლოს განაჩენით ის ცნობილი იქნა უდანაშაულოდ. საიას დახმარებით გ.გ.-მ მიმართა თბილისის საქალაქო სასამართლოს და მოითხოვა სისხლის სამართლის პასუხისგებაში უკანონოდ მიცემის გამო მიყენებული ზიანის ანაზღაურება. სასამართლოს გადაწყვეტილებით, გ.გ. ზიანის ანაზღაურების სახით მიიღებს 6 324 ლარს," ნათქვამია ორგანიზაციის ვებ-გვერდზე. სრულად... წყარო: gyla.ge

თბილისი. ომბუდსმენი ეხმიანება საინფორმაციო საშუალებებით გავრცელებულ ინფორმაციას, სავარაუდოდ ეთნიკური ნიშნით, სამართალდამცავი ორგანოების მხრიდან გ.გ–სა და ა.წ–ს მიმართ შესაძლო ძალადობის ფაქტთან დაკავშირებით. „საქართველოს სახალხო დამცველი შეახსენებს სამართალდამცავი ორგანოების წარმომადგენლებს, რომ სახელმწიფომ ცალსახად გამოხატა პოლიტიკა სიძულვილით მოტივირებული დანაშაულის მიმართ, როდესაც გაამკაცრა პასუხისმგებლობა და შემოიღო სპეციალური დეფინიცია. შესაბამისად, თუკი ამ დანაშაულის ჩამდენი სამართალდამცავი სისტემის წარმომადგენელია, სახელმწიფოს ეკისრება პასუხისმგებლობა დაუმტკიცოს საზოგადოებას, რომ მისი ეს პოლიტიკა მხოლოდ ფურცელზე დეკლარირებული არ არის. გამოიყენოს კანონი მთელი სიმკაცრით და არ დატოვოს შერჩევითი მართლმსაჯულების თუნდაც მცირედი ეჭვი", ნათქვამია ომბუდსმენის განცხადებაში. სრულად... წყარო: www.ombudsman.ge

თბილისი. ომბუდსმენი ეხმაურება უმრავლესობის დეპუტატის გოგი თოფაძის მიერ სიტყვით გამოსვლისას გაკეთებულ განცხადებას, რომელიც შეიცავს სტიგმას დაუნის სინდრომის მქონე ადამიანების მიმართ. „საქართველოს სახალხო დამცველი მოუწოდებს ყველა პირს საქართველოში, განსაკუთრებით მაღალი საჯარო თანამდებობის პირებს თავი შეიკავონ შეზღუდული შესაძლებლობის მქონე ადამიანების მიმართ სტიგმისა და დისკრიმინაციის შემცველი დამოკიდებულების გამომხატველი განცხადებებისაგან. უფრო მეტიც, ყოველმხრივ უზრუნველყონ მათი უფლებების თანაბარი დაცვა და საქმიანობის გააქტიურება საზოგადოების ცნობიერების ამაღლების მიმართულებით", ნათქვამია სახალხო დამცველის განცხადებაში. სრულად... წყარო: www.ombudsman.ge

თბილისი. ადამიანის უფლებათა ევროპული სასამართლოს გადაწყვეტილებით დაკმაყოფილდა საქართველოს ახალგაზრდა იურისტთა ასოციაციის საჩივარი "ნ.წ და სხვები საქართველოს წინააღმდეგ”. „ევროპული სასამართლო გადაწყვეტილებაში ცალსახად მიუთითებს, რომ საქართველოში მოქმედი კანონმდებლობა ბავშვის უფლებასთან მიმართებით- ჰყავდეს კანონიერი წარმომადგენელი, რომელიც არსებითად დაიცავს მის ინტერესებს- ხარვეზიანია და არ შეესაბამება არსებულ საერთაშორისო სტანდარტებს", ნათქვამია ორგანიზაციის განცხადებაში. სრულად... წყარო: gyla.ge

თბილისი. საზოგადოებრივი ორგანიზაციები საქართველოს პარლამენტს მოუწოდებენ, არ მიიღოს კანონი, რომელიც ადმინისტრაციულ პასუხისმგებლობას აწესებს მორწმუნეთა რელიგიური გრძნობების შეურაცხყოფისათვის. „განსახილველი ნორმა არ შეიცავს იმ ტექსტსაც კი, რომელიც ამგვარი საჯარო გამოხატვის დროს ადმინისტრაციული სამართალდარღვევისთვის შესაბამისი ინტენსივობის ძალადობის რეალური და არსებითი საფრთხეების არსებობის სტანდარტს დაადგენდა. მიგვაჩნია, რომ ასეთი საკანონმდებლო ჩანაწერი გამოხატვის თავისუფლებაზე თვითნებურ და გაუმართლებელ შინაარსობრივ შეზღუდვას დააწესებს და საფრთხეს შეუქმნის თავისუფალ საჯარო დებატებს საზოგადოებაში. სეკულარიზმთან დაკავშირებით არსებული გამოწვევების გათვალისწინებით, რომელიც ძალაუფლებებისა და რელიგიის თემაზე საჯარო დებატებსა და საზოგადოებრივი პროცესების რაციონალიზაციას მოითხოვს, ამგვარი შეზღუდვის დაწესება განსაკუთრებით მიუღებელია", ნათქვამია ერთობლივ განცხადებაში. სრულად... წყარო: gyla.ge

თბილისი. ომბუდსმენმა წინადადებით მიმართა პრემიერ-მინისტრს ოკუპირებულ ტერიტორიაზე ლეგიტიმურად მცხოვრებ პირებს მისცეს შესაძლებლობა C ჰეპატიტის სახელმწიფო პროგრამაში ჩაერთონ. „ოკუპირებულ ტერიტორიებზე მცხოვრები მოსახლეობა განსაკუთრებით მოწყვლად კატეგორიას მიეკუთვნება, რომელთაც მძიმე სოციალურ, ეკონომიკურ და უფლებრივ სიტუაციაში უწევთ ცხოვრება. სავალალო მდგომარეობაშია კლინიკები და ამბულატორიები, მცირეა კვალიფიციური ექიმების რაოდენობა. მოსახლეობას უამრავი წინააღმდეგობის გადალახვა უწევს საოკუპაციო ხაზის გადმოსაკვეთად. ამ პირობებში, სახალხო დამცველს მიაჩნია, რომ საქართველოს ეკისრება პოზიტიური ვალდებულება დაიცვას ოკუპირებულ ტერიტორიაზე მცხოვრებ პირთა ჯანმრთელობა და სოციალური უფლებები, უზრუნველყოს სამედიცინო დახმარება ყველასათვის განსხვავების გარეშე", ნათქვამია ორგანიზაციის ვებ-გვერდზე. სრულად... წყარო: www.ombudsman.ge