თბილისი. ადამიანის უფლებების სწავლებისა და მონიტორინგის ცენტრის (EMC) სოციალური უფლებების პროგრამამ სამუშაო შეხვედრა გამართა აქტივისტური ჯგუფების „მწვანე მუშტი", „თვითორგანიზების ქსელი", „აუდიტორია 115"-ის წევრებთან. შეხვედრის მონაწილეებმა ისაუბრეს მშრომელთა გაერთიანებისა და ორგანიზების ფორმებზე, სტრუქტურებსა და გამოწვევებზე, ასევე პრობლემების გადაჭრის გზებსა და მემარცხენე აქტივისტური ჯგუფების როლსა და სტრატეგიებზე მშრომელთა თვითორგანიზების პროცესებში," ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. კოალიცია თანასწორობისთვის ეხმიანება ჰომოფობიისა და ტრანსფობიის წინააღმდეგ საერთაშორისო დღესთან (IDAHO) დაკავშირებით ლგბტ თემის წევრებისა და აქტივისტებისთვის შეკრების თავისუფლების შეზღუდვას. „კოალიცია მოუწოდებს სახელმწიფოს: „უზრუნველყოს ლგბტი აქტივისტებისთვის შეკრების თავისუფლების რეალური სარგებლობა და მათ შორის, ადამიანის უფლებათა ევროპული სასამართლოს საქმეზე „იდენტობა და სხვები საქართველოს წინააღმდეგ" გაკეთებული შეფასებების გათვალისწინებით, სახელმწიფო ვალდებულებების განუხრელი შესრულება; უზრუნველყოს 2013 წლის 17 მაისს შეკრების დროს და მასთან კავშირში ძალადობრივი კონტრ-დემონსტრაციის მონაწილეების მხრიდან შეკრების ხელშეშლისა და სხვა ძალადობრივი ინციდენტების დროული გამოძიება და კონკრეტული პირებისთვის ადეკვატური სამართლებრივი პასუხისმგებლობის დაკისრება...," ნათქვამია ერთობლივ განცხადებაში. სრულად... წყარო: emc.org.ge

აჭარა. 11 მაისს, 18 საჯარო სკოლაში, თამარის დასახლების საზოგადოებრივი დარბაზის შეხვედრა გაიმართა. შეხვედრა მიზნად ისახავდა დარბაზის საქმიანობის გააქტიურებას და თემატური შეხვედრების ციკლის გაგრძელებას. გასულ თვეში დარბაზის წევრები მუნიციპალიტეტის ერთ-ერთი სამსახურის წარმომადგენელს ა(ა)იპ კორპუსის დირექტორს შეხვდნენ, რომლის საფუძველზე ადგილობრივებმა აღნიშნულ სამსახურს დასახლებაში არსებული პრობლემები და ინიციატივები მოახსენეს, ასევე მოისმინეს ა(ა)იპ კორპუსის გეგმები, რომელიც მათ უბანში თვითმმართველობის ბიუჯეტით 2016 წელსაა გათვალისწინებული. მაისის თვეში ჩატარებული შეხვედრა დარბაზის წევრების ცნობიერების დონის ამაღლების მიზნით ჩატარდა შეზღუდული შესაძლებლობის მქონე პირებთან დაკავშირებით. შეხვედრა დარბაზის თავმჯდომარემ გახსნა და შშმ პირთა ახალგაზრდული ორგანიზაციის წარმომადგენლებმა გააგრძელეს. ორგანიზაციამ ცვლილებები თანაბარი უფლებებისათვის პროექტის - „გაეროს 2006 წლის კონვენცია შშმ პირთა უფლებების შესახებ იმპლემენტაციის ხელშეწყობა" - ფარგლებში პირველი შეხვედრა გამართა. პროექტის ფარგლებში დაგეგმილია ბათუმის ყველა ტერიტორიულ ერთეულში არსებულ საზ. დარბაზთან შეხვედრა. შეხვედრის მიზანია დარბაზის წევრებში შშმ პირთა თემის მიმართ ჯანსაღი დამოკიდებულების დამკვიდრება, არსებული სტერეოტიპების, როგორც ბარიერების წარმოჩენა და ერთობლივად საზოგადოებრივი აქტივობის საფუძველზე შშმ პირთა უფლებების დაცვა.

თბილისი. საქართველოს სახალხო დამცველი განცხადებას ავრცელებს ჰომოფობიასა და ტრანსფობიასთან ბრძოლის საერთაშორისო დღესთან დაკავშირებით. „საქართველოში განვითარებულმა მოვლენებმა დაგვანახა, რომ საზოგადოებრივი ცნობიერების ამაღლებისა და შემწყნარებლობის კულტურის ჩამოყალიბებისათვის ქმედითი ნაბიჯები არ გადადგმულა. კვლავ პრობლემას წარმოადგენს სიძულვილით მოტივირებული დანაშაულების დროული, ეფექტიანი და ანგარიშვალდებული გამოძიების წარმართვა," ნათქვამია ომბუდსმენის განცხადებაში. სრულად... წყარო: www.ombudsman.ge

თბილისი. საქართველოს ახალგაზრდა იურისტთა ასოციაციამ (საია) ფემიციდის დანაშაულად აღიარებასთან მიმართებით საქართველოს პარლამენტს საკუთარი მოსაზრებები წარუდგინა. „ქვეყანაში არსებული ქალთა მიმართ ძალადობის ზოგადი კონტექსტის გათვალისწინებით, საია ერთმნიშვნელოვნად მხარს უჭერს წარმოდგენილ ინიციატივას და აუცილებლად მიიჩნევს გენდერის ნიშნით ჩადენილი ქალთა მკვლელობების მიმართ განსაკუთრებული მიდგომის არსებობას. მომზადებული დასკვნაც, სწორედ კანონპროექტის შემდგომ სრულყოფას ისახავს მიზნად და იმედს ვიტოვებთ, რომ გათვალისწინებული იქნება კანონპროექტის ავტორთა/ინიციატორთა მიერ. მომზადებულ დოკუმენტს საფუძვლად უდევს ორგანიზაციის მიერ უახლოეს წარსულში ჩატარებული სიღრმისეული კვლევა, რომლის ფარგლებშიც შესწავლილი იქნა ფემიციის საქმეები, ამ მიმართულებით არსებული პრაქტიკა და პრობლემატიკა", ნათქვამია ორგანიზაციის ვებ-გვერდზე. სრულად... კვლევა... წყარო: gyla.ge

თბილისი. 16 მაისს, ომბუდსმენმა საქართველოში აკრედიტებული დიპლომატიური კორპუსის, ხელისუფლების, საერთაშორისო და არასამთვრობო ორგანიზაციების წარმომადგენლებს საპარლამენტო ანგარიშის მოკლე ვერსია წარუდგინა. „საპარლამენტო ანგარიშში შესული 34 თავი მოიცავს სამოქალაქო, პოლიტიკურ, ეკონომიკურ, სოციალურ და კულტურულ უფლებათა ფართო სპექტრს და თავს უყრის ხელისუფლების სხვადასხვა შტოების მისამართით შემუშავებულ იმ ძირითად რეკომენდაციებს, რომელთა შესრულების დროულობასა და ხარისხზე დიდწილად იქნება დამოკიდებული ადამიანის უფლებათა დაცვის მაღალი სტანდარტების დამკვიდრება ქვეყანაში", ნათქვამია ომბუდსმენის ვებ-გვერდზე. სრულად... წყარო: www.ombudsman.ge

თბილისი. სახალხო დამცველმა რეკომენდაციით მიმართა სასჯელაღსრულებისა და პრობაციის მინისტრს, არ დაუშვას ფსიქიკური პრობლემების მქონე პატიმრის სამარტოო საკანში მოთავსება. „საქართველოს სახალხო დამცველის 2015 წლის საპარლამეტო ანგარიშში აღნიშნულია, რომ დისციპლინური სახდელის დაკისრებამდე ციხის ადმინისტრაციამ უნდა გათვალოს, რამდენად შეიძლებოდა პატიმრის ფსიქიკური ჯანმრთელობის მდგომარეობას ან განვითარების დარღვევას ემოქმედა მის ქცევასა და დანაშაულებრივ ქმედებაზე ან ქმედებაზე, რომელიც საფუძვლად დაედო დისციპლინურ სახდელს. დაუშვებელია, ციხის ადმინისტრაციამ სასჯელი დაუწესოს პატიმარს რაიმე სახის ქმედებისთვის, თუ ეს ქმედება პირდაპირი შედეგია მისი ფსიქიკური დაავადების ან შეზღუდული გონებრივი შესაძლებლობების.", ნათქვამია ომბუდსმენის ვებ-გვერდზე. სრულად... წყარო: www.ombudsman.ge

თბილისი. 13 მაისს, ომბუდსმენმა მთავრობის წარმომადგენლებს, საერთაშორისო ორგანიზაციებსა და არასამთავრობო სექტორს საქართველოში ქალთა უფლებრივი მდგომარეობისა და გენდერული თანასწორობის შესახებ ანგარიში წარუდგინა. „2015 წლის სახალხო დამცველის საპარლამენტო ანგარიშის მიხედვით ქალთა უფლებრივი მდგომარეობის დაცვა და გენდერული თანასწორობის მიღწევა კვლავ გამოწვევას წარმოადგენს", ნათქვამია ომბუდსმენის ვებ-გვერდზე. სრულად... წყარო: www.ombudsman.ge

თბილისი. 13 მაისს, ომბუდსმენმა რეკომენდაციით მიმართა საქართველოს მთავრობას, შეიმუშავოს „უმაღლესი განათლების შესახებ" საქართველოს კანონში შესატანი ცვლილებების პროექტი. „სახალხო დამცველი მიიჩნევს, რომ სტუდენტის უფლება, არჩეულ იქნას ფაკულტეტის წარმომადგენლობით ორგანოში და მონაწილეობა მიიღოს უნივერსიტეტის მართვის პროცესში, გაუმართლებლად არის დაკავშირებული მის გაერთიანებისადმი წევრობასთან, რამდენადაც, აღნიშნული წარმოადგენს ბარიერს სტუდენტისთვის მისი უფლებებით სარგებლობისას და არანაირი პრაქტიკული დანიშნულება არ გააჩნია. მსგავსი მიდგომა კი გონივრული გამართლების გარეშე არათანაბარ მდგომარეობაში აყენებს იმ სტუდენტებს, რომლებიც არ არიან თვითმმართველობის წევრები, რაც წარმოადგენს პირდაპირ დისკრიმინაციას გაერთიანების წევრობის ნიშნით", ნათქვამია ომბუდსმენის ვებ-გვერდზე. სრულად... წყარო: ombudsman.ge

თბილისი. საქართველოს სახალხო დამცველი განცხადებას აქვეყნებს სექსუალური შევიწროების დეფინიციის განსაზღვრისთვის მომზადებული საკანონმდებლო ინიციატივის შესახებ. „განსაკუთრებით მნიშვნელოვანია, რომ საკანონმდებლო ინიციატივა იზიარებს ევროპის საბჭოს კონვენციის „ქალთა მიმართ ძალადობის და ოჯახში ძალადობის პრევენციისა და აღკვეთის შესახებ" მე-40 მუხლის სულისკვეთებას, რომლის მიხედვითაც სახელმწიფოებმა უნდა მიიღონ ყველა ზომა სექსუალური შევიწროების დეფინიციისა და აკრძალვისათვის. აღსანიშნავია, რომ კონვენციის რატიფიცირება უახლოეს პერიოდში იგეგმება. და ბოლოს, იმედს ვიტოვებთ, რომ საქართველოს პარლამენტი მხარს დაუჭერს წარდგენილ საკანონმდებლო ინიციატივას და კიდევ ერთი მნიშვნელოვანი ნაბიჯი გადაიდგმება გენდერული თანასწორობის მიღწევის ხელშეწყობისათვის", ნათქვამია სახალხო დამცველის ვებ-გვერდზე. სრულად... წყარო: www.ombudsman.ge

თბილისი. ინფორმაციის თავისუფლების განვითარების ინსტიტუტი (IDFI) ომბუდსმენის აპრილის თვის ანგარიშში ასახულ ინფორმაციის თავისუფლებაზე, ადამიანის უფლებების დაცვაზე ამახვილებს ყურადღებას. „სახალხო დამცველის ანგარიში ხაზს უსვამს ინფორმაციის თავისუფლების შესახებ ახალი კანონის დროული მიღების მნიშვნელობას. ამ კანონმა უნდა აღმოფხვრას დღეს არსებული ყველა ის ძირითადი პრობლემა, როგორიცაა: პერსონალურ მონაცემთა დაცვასა და საჯარო ინფომრაციის გაცემას შორის არსებული დისბალანსი; გადაწყვეტილების მიღებისას არსებული საჯარო ინტერესის გაუთვალისწინებლობა; ინფორმაციის ხელმისაწვდომობის უზრუნველყოფისა და ინფორმაციის თავისუფლებაზე მონიტორინგის განმახორციელებელი მექანიზმის არარსებობა და საჯარო ინფორმაციის გაცემაზე უარის უკანონოდ თქმისთვის სანქციების დაკისრების შეუძლებლობა. ანგარიშში გამახვილებულია ყურადღება „ღია მმართველობის პარტნიორობის საქართველოს 2014-2015 წლების სამოქმედო გეგმაზე", რომლის მიხედვითაც, კანონპროექტი საქართველოს მთავრობისა და საქართველოს პარლამენტისთვის ჯერ კიდევ 2015 წლის გაზაფხულზე უნდა წარდგენილიყო. იგი ამ დრომდე არ არის წარდგენილი", ნათქვამია ორგანიზაციის ვებ-გვერდზე. სრულად... წყარო: idfi.ge

თბილისი. სახალხო დამცველის რეკომენდაციები N7 დაწესებულებასთან დაკავშირებით უცვლელი რჩება. „2015 წლის საპარლამენტო ანგარიშში აღნიშნულია, რომ სახალხო დამცველმა არაერთხელ მიმართა რეკომენდაციით სასჯელაღსრულებისა და პრობაციის მინისტრს დაწესებულებაში არსებული მძიმე საყოფაცხოვრებო პირობებიდან გამომდინარე გაეუქმებინა N7 დაწესებულება. სამინისტროდან მიღებული პასუხის თანახმად, სამინისტრო ამ ეტაპზე ვერ იღებს გადაწყვეტილებას დაწესებულების სრული ლიკვიდაციის შესახებ, თუმცა უახლოეს მომავალში იგეგმება დაწესებულებაში განთავსებულ პატიმართა რაოდენობის მნიშვნელოვნად შემცირება და მსჯავრდებულების შესაბამისი რისკის დაწესებულებებში გადანაწილება, ასევე იგეგმება N7 დაწესებულების სრულყოფილი რეაბილიტაცია და დაწესებულების პირველი სართულის სრული გაუქმება, ამასთან დაწესებულებაში პატიმართა განთავსების ლიმიტის მნიშვნელოვნად შემცირება. აღსანიშნავია, რომ 2016 წლის თებერვალში N7 დაწესებულებიდან უკვე განხორციელდა N6 დაწესებულებაში 19 მსჯავრდებულის გადაყვანა", ნათქვამია ომბუდსმენის ვებ-გვერდზე, სრულად... წყარო: www.ombudsman.ge

თბილისი. საქართველოს სახალხო დამცველი აქვეყნებს აპრილის თვის საინფორმაციო ბიულეტენს. „ბიულეტენში განსაკუთრებული მნიშვნელობის საკითხთა შორის აღნიშნულია საერთაშორისო მრჩეველთა საბჭოს წევრთა ვიზიტი, რომლის მიზანია დაეხმაროს სახალხო დამცველს ადამიანის უფლებათა დაცვის სფეროში პრიორიტეტებისა და პერსპექტივების განსაზღვრა-განხორციელებაში. მიმოხილულია საბჭოს მიერ შემუშავებული რეკომენდაციების შესრულების მდგომარეობა და ექსპერტთა შეფასებები...", ნათქვამია ომბუდსმენის ვებ-გვერდზე. სრულად... წყარო: ombudsman.ge

თბილისი. საქართველოს ახალგაზრდა იურისტთა ასოციაცია უმაღლესი განათლების კანონის იმ ნორმას, რაც სტუდენტურ თვითმმართველობას პრივილეგიებს ანიჭებს საკონსტიტუციო სასამართლოში ასაჩივრებს. „კონსტიტუციური სარჩელით სადავოდ არის გამხდარი ,,უმაღლესი განათლების შესახებ" კანონის ის ნორმები, რაც, სტუდენტური თვითმმართველობის წევრების გარდა, სხვა სტუდენტებს ართმევს უფლებას, აირჩიონ აკადემიური საბჭოს წევრები. ასევე, გასაჩივრებული ნორმებით, მხოლოდ სტუდენტური თვითმმართველობის წევრები ღებულობენ მონაწილეობას ფაკულტეტის საბჭოს დაკომპლექტების პროცესში. ფაკულტეტის საბჭოს წევრი შეიძლება იყოს მხოლოდ და მხოლოდ სტუდენტური თვითმმართველობის წევრი. თვითმმართველობის არაწევრ სტუდენტს არა აქვს, აკადემიური საბჭოს წევრის არჩევის შესაძლებლობა. დამოუკიდებელი სტუდენტი ვერც ფაკულტეტის საბჭოს წევრს აირჩევს და ვერც ამ ორგანოში იქნება არჩეული", ნათქვამია ორგანიზაციის ვებ-გვერდზე. სრულად... წყარო: gyla.ge

2-3 მაისს გაეროს რასობრივი დისკრიმინაციის აღმოფხვრის კომიტეტმა საქართველოს მთავრობის მიერ „რასობრივი დისკრიმინაციის ყველა ფორმის აღმოფხვრის შესახებ" მე-6, მე-7 და მე-8 პერიოდული ანგარიშები განიხილა. „რასობრივი დისკრიმინაციის აღმოფხვრის კომიტეტი ანგარიშის განხილვის შედეგად საქართველოსთვის შეიმუშავებს რეკომენდაციებს, რომლის შესრულებაზე ანგარიშის წარდგენაც სახელმწიფოს მომავალი ციკლის პერიოდში მოუწევს", ნათქვამია სახალხო დამცველის ვებ-გვერდზე. სრულად... წყარო: www.ombudsman.ge

თბილისი. სახალხო დამცველის საპარლამენტო ანგარიშში ასახულია გამყოფი ხაზის მიმდებარედ მცხოვრები მოსახლეობის უფლებრივი მდგომარეობა. „ადგილობრივებისათვის ერთ-ერთ ყველაზე დიდ პრობლემად შემოსავლის წყაროს მოძიება რჩება. გამყოფი ხაზის სოფლის მოსახლეობის დიდი ნაწილი პრაქტიკაში ვერ იყენებს საქართველოს ეკონომიკისა და სოფლის მეურნეობის სამინისტროების მიერ შემოთავაზებულ პროგრამებს, რადგან პროგრამები ცენტრალიზებულია და ინფორმაცია ადგილობრივებამდე რთულად აღწევს; გარდა ამისა, ადგილობრივ ფერმერებს და მეწარმეებს არ აქვთ თანადაფინანსებისთვის შესაბამისი რესურსები, ხოლო საბანკო კრედიტები მათთვის ხელმიუწვდომელია, რადგან უსაფრთხოების მაღალი რისკის რეგიონში ცხოვრობენ. მეწარმეობისთვის პრობლემას ქმნის ასევე დაურეგისტრირებელი მიწები", ნათქვამია ომბუდსმენის განცხადებაში. სრულად... წყარო: www.ombudsman.ge

თბილისი. საქართველოს სახალხო დამცველის 2015 წლის საპარლამენტო ანგარიშში წარმოდგენილ ერთ–ერთ საკითხს ქალთა პოლიტიკური მონაწილეობის და გენდერული მეინსტრიმინგის გამოწვევების განხილვა წარმოადგენს. „შესწავლის შედეგებმა აჩვენა, რომ რიგი სამინისტროების, ისევე როგორც ადგილობრივი თვითმმართველობის ორგანოების მიერ, დასაქმებულთა გენდერული შემადგენლობის შესახებ ინფორმაცია არ გროვდება, მით უფრო, არ ხდება ამ ინფორმაციის გაანალიზება და გამოქვეყნება. აღმასრულებელი ხელისუფლების დონეზე, როგორც სამინისტროებში, ისე სახელმწიფო მინისტრის აპარატებში დასაქმებულთა უმრავლესობა ქალია, თუმცა ხელმძღვანელ პოზიციებზე ისინი ნაკლებად არიან წარმოდგენილნი", ნათქვამია ომბუდსმენის ვებ-გვერდზე. სრულად... წყარო: www.ombudsman.ge

თბილისი. საქართველოს ახალგაზრდა იურისტთა ასოციაცია სახელმწიფო ბიუჯეტიდან მუსლიმების დისკრიმინაციული დაფინანსების წესს საკონსტიტუციო სასამართლოში ასაჩივრებს. „საიას ასევე მიაჩნია, ქრისტიანულ ჯგუფებთან შედარებით, მუსლიმური ჯგუფის მიმართ ადგილი აქვს კონსტიტუციის მე-14 მუხლით აკრძალულ დისკრიმინაციულ მოპყრობას. მთავრობის დადგენილება არ ავალდებულებს დაფინანსების მისაღებად სომხურ და კათოლიკურ ეკლესიებს ერთი საჯარო სამართლის იურიდიული პირის შექმნას, მაშინ როდესაც სომხური და კათოლიკური ეკლესია ისეთივე სქიზმაში (განხეთქილებაში) იმყოფებიან ერთმანეთთან, როგორც შიიტები და სუნიტები. სომხურ და კათოლიკურ ეკლესიას გაერთიანების გარეშე შეუძლია დაფინანსების მიღება, მაშინ როცა სუნიტებმა და შიიტებმა საერთო საჯარო სამართლის იურიდიული პირი ან წარმომადგენლობითი საბჭო უნდა შექმნან", ნათქვამია ორგანიზაციის ვებ-გვერდზე. სრულად... წყარო: gyla.ge

თბილისი. ომბუდსმენის 2015 წლის საპარლამენტო ანგარიშში მიმოხილულია ოკუპირებულ ტერიტორიებზე მცხოვრებთა უფლებრივი მდგომარეობა. ანგარიშში აღნიშნულია, რომ აფხაზეთსა და ე.წ. სამხრეთ ოსეთში გრძელდება ისეთი ფუნდამენტური უფლებების დარღვევა, როგორიცაა სიცოცხლის, ჯანმრთელობის დაცვის, განათლებისა და გადაადგილების უფლებები. „გალის რაიონში განსაკუთრებით მწვავედ დგას მშობლიურ ენაზე განათლების უფლებისა და მისი ხელმისაწვდომობის პრობლემა. 2015-2016 სასწავლო წლიდან გალის რაიონის იმ 11 სკოლაში, სადაც სწავლება ჯერ ისევ სრულად ქართულ ენაზე მიდიოდა, 1-4 კლასებში სწავლა რუსულ ენაზე გადავიდა, ხოლო დანარჩენ კლასებში შემცირდა ქართული ენისათვის დათმობილი საათები. ამ ცვლილების გამო რამდენიმე ოჯახი იძულებული გახდა მშობლიურ ენაზე სწავლის გასაგრძელებლად ბავშვები საქართველოს მიერ კონტროლირებად ტერიტორიაზე გადმოეყვანა. სწავლების რუსულ ენაზე გადასვლამ ასევე მნიშვნელოვნად გააუარესა განათლების ხარისხი", ნათქვამია სახალხო დამცველის ვებ-გვერდზე. სრულად... წყარო: www.ombudsman.ge

თბილისი. „ახალგაზრდა ადვოკატების" ხელმძღვანელმა ს.ს. „პროკრედიტ ბანკთან" გახმაურებულ სამოქალაქო დავაზე, პრეცედენტი შექმნა. „საქართველოს უზენაესმა სასამართლომ უკვე გამოიტანა გადაწყვეტილება ბანკიდან, მათ შორის რელიგიური აღმსარებლობის ნიშნით გათავისუფლებულის საქმეზე. პირველად, საქართველოს ისტორიაში, შრომითი დავების პრაქტიკასა და საბანკო სფეროდან გათავისუფლების საქმეზე, საქართველოს უზენაესმა სასამართლომ მიუთითა, რომ ქალბატონის ბანკიდან დათხოვნის სამი საბაბიდან - ერთ-ერთი რელიგიური ნიშნით მიღებული გადაწყვეტილება იყო. სასამართლომ ცალსახად აღნიშნა, რომ კლიენტის მიმართ სიტყვები: „ღმერთმა დაგლოცოს", არც ერთ შემთხვევაში არ შეიძლება ფამილარულ დამოკიდებულებად შეფასდეს და დამსაქმებლის მხრიდან დასაქმებულის სამსახურიდან გათავისუფლების საფუძველი გახდეს", ნათქვამია ორგანიზაციის ვებ-გვერდზე. სრულად... წყარო: barristers.ge

თბილისი. კამპანია ეს შენ გეხება აქვეყნებს ინფოგრაფიკას. „ეს ინფოგრაფიკა კარგად აღწერს ცვლილებებს უსაფრთხოების სფეროში და მიყურადების პროცესს იმ კანონპროექტების მიხედვით, რომელიც დღეს წარმოვადგინეთ. ჩვენ ვთავაზობთ სახელმწიფოს, შექმნას სამი ახალი ორგანო და გაატაროს რეფორმა უსაფრთხოების სფეროში. საკანონმდებლო პაკეტის მიხედვით, ახლებურად უნდა განისაზღვროს სახელმწიფო უსაფრთხოების სამსახურის (სუს) ფუნქციები, შეიქმნას სპეციალური სააგენტო, რომელიც იქნება თვალთვალის უფლებამოსილების მქონე ერთადერთი ორგანო, გაძლიერდეს საპარლამენტო ზედამხედველობა უსაფრთხოების სამსახურებზე, კერძოდ, შეიქმნას საპარლამენტო საზედამხედველო საბჭო, რომელსაც ექნება უფლება დააკვირდეს და აკონტროლოს თვალთვალის პროცესი და უსაფრთხოების სამსახურების საქმიანობა. შესაბამისად, ეს სამსახურები ანგარიშვალდებულნი იქნებიან საპარლამენტო საბჭოს და პარლამენტის წინაშე. მიყურადება განხორციელდეს სასამართლოს კონტროლით. ვადის და მიყურადების წესების დარღვევის შემთხვევაში მიყურადების შეჩერება შეეძლოს პერსონალურ მონაცემთა დაცვის ინსპექტორს. ეს გააძლიერებს პერსონალურ მონაცემთა დაცვის ინსპექტორის მაკონტროლებელ ფუნქციას", ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. 26 აპრილს, საქართველოს ეროვნულ ბიბლიოთეკაში ომბუდსმენთან არსებული ტოლერანტობის ცენტრის ორგანიზებით გაიმართა სამუშაო შეხვედრა „ბოშების დღევანდელობა საქართველოში". „მნიშვნელოვანია, ევროპული ქვეყნების გამოცდილების გაზიარებით, ხელი შევუწყოთ ქსელურ ინიციატივებს, რომელიც გაზრდის ბოშათა თემის ხელმისაწვდომობას განათლებაზე, ჯანდაცვისა და სოციალური დაცვის სისტემებზე, დასაქმებაზე; ეს ინიციატივები კოორდინირებული უნდა იყოს და, პირველ რიგში, ხელს უწყობდეს ბოშათა თემის ინფორმირებას თავიანთი უფლებების შესახებ" - განაცხადა სახალხო დამცველის პირველმა მოადგილემ. სრულად... წყარო: www.ombudsman.ge