თბილისი. ომბუდსმენმა წინადადებით მიმართა პრემიერ-მინისტრს ოკუპირებულ ტერიტორიაზე ლეგიტიმურად მცხოვრებ პირებს მისცეს შესაძლებლობა C ჰეპატიტის სახელმწიფო პროგრამაში ჩაერთონ. „ოკუპირებულ ტერიტორიებზე მცხოვრები მოსახლეობა განსაკუთრებით მოწყვლად კატეგორიას მიეკუთვნება, რომელთაც მძიმე სოციალურ, ეკონომიკურ და უფლებრივ სიტუაციაში უწევთ ცხოვრება. სავალალო მდგომარეობაშია კლინიკები და ამბულატორიები, მცირეა კვალიფიციური ექიმების რაოდენობა. მოსახლეობას უამრავი წინააღმდეგობის გადალახვა უწევს საოკუპაციო ხაზის გადმოსაკვეთად. ამ პირობებში, სახალხო დამცველს მიაჩნია, რომ საქართველოს ეკისრება პოზიტიური ვალდებულება დაიცვას ოკუპირებულ ტერიტორიაზე მცხოვრებ პირთა ჯანმრთელობა და სოციალური უფლებები, უზრუნველყოს სამედიცინო დახმარება ყველასათვის განსხვავების გარეშე", ნათქვამია ორგანიზაციის ვებ-გვერდზე. სრულად... წყარო: www.ombudsman.ge

თბილისი. საქართველოს სახალხო დამცველის განცხადება მშენებლობაზე დასაქმებული პირის გარდაცვალებასთან დაკავშირებით. „მწუხარებას გამოვთქვამ აღნიშნულის გამო და ვუსამძიმრებ გარდაცვლილის ოჯახსა და მთლიანად საზოგადოებას. კიდევ უფრო სამწუხაროა ის გარემოება, რომ მრავალი ასეთი შემთხვევის მიუხედავად, სახელმწიფო კვლავაც არ დგამს ნაბიჯებს ეფექტური მექანიზმის შესაქმნელად, რომელიც, პირველ რიგში, მსგავსი ფაქტების დროულ პრევენციას მოემსახურებოდა და მძიმე და საშიშპირობებიან სამუშაოზე თუ სხვაგან დასაქმებული მრავალი ადამიანის სიცოცხლეს იხსნიდა სიკვდილისაგან, ხოლო მათ ჯანმრთელობას - დაზიანებისაგან", ნათქვამია ომბუდსმენის განცხადებაში. სახალხო დამცველი მოუწოდებს საქართველოს პარლამენტს და მთავრობას შექმნან ეფექტური შრომის ინსპექცია. სრულად... წყარო: ombudsman.ge

თბილისი. ოჯახში ძალადობისგან დაცვის ქსელი აქვეყნებს პუბლიკაციას: „არა ძალადობას". „ოჯახში ძალადობის წინააღმდეგ არსებულ კანონებში ცვლილებები „ძალადობისგან დაცვის ეროვნულმა ქსელმა" მოამზადა და პარლამენტმა ის მეორე მოსმენით უკვე მიიღო. ინიციატივის მიხედვით ცვლილებები ეხება „ადგილობრივი თვითმმართველობის კოდექსსა" და საქართველოს კანონს „ოჯახში ძალადობის აღკვეთის, ოჯახში ძალადობის მსხვერპლთა დაცვისა და დახმარების შესახებ", ნათქვამია ორგანიზაციის ვებ-გვერდზე. სრულად... წყარო: avng.ge

თბილისი. 1 თებერვალს, გენდერული თანასწორობის შესახებ კანონში შესატანი ცვლილებების პაკეტი საქართველოს პარლამენტის რეგიონული პოლიტიკისა და თვითმმართველობის კომიტეტის სხდომაზე განიხილეს. კომიტეტის წევრებმა პირველი მოსმენით მხარი დაუჭირეს აღნიშნულ ინიციატივას. „გენდერული თანასწორობის შესახებ შემუშავბული ცვლილებათა პაკეტი ადგილობრივი თვითმმართველობის დონეზე გენდერული თანასწორობის ინსტიტუციური მექანიზმის შექმნას გულისხმობს. მუნიციპალიტეტში, საკრებულოს დონეზე, შეიქმნება გენდერული თანასწორობის საბჭო, ხოლო აღმასრულებელ შტოში, გამგებლის დაქვემდებარებაში, დაინიშნება პირი, რომელიც პასუხისმეგებლი იქნება გენდერული თანასწორობის საკითხებზე”, ნათქვამია ორგანიზაციის ვებ-გვერდზე. სრულად... წყარო: www.ginsc.net

თბილისი. 1 თებერვალს საქართველოს საკონსტიტუციო სასამართლოში მეორე განმწესრიგებელი სხდომა იმართება საქმეზე სახარების რწმენის ეკლესია საქართველოს მთავრობის წინააღმდეგ. სასამართლოს წინაშე ეკლესიის ინტერესებს ადამიანის უფლებების სწავლებისა და მონიტორინგის ცენტრი (EMC) წარმოადგენს. „განსახილველ საქმეზე საკონსტიტუციო სასამართლო დეტალურად სწავლობს საბჭოთა პერიოდში სახარების რწმენის ეკლესიის, იგივე ორმოცდაათიანელთა ეკლესიის, რეპრესირებისა და მისთვის მიყენებული მატერიალური და მორალური ზიანის ისტორიას. ასევე, მოქმედი ეკლესიის ისტორიულ და დოქტრინალურ კავშირს საბჭოთა პერიოდში მოღვაწე ორმოცდაათიანელთა ეკლესიასთან. დევნის ისტორიისა და მემკვიდრეობის საკითხების დადასტურების მიზნით მოსარჩელე მხარე განმწესრიგებელ სხდომაზე დამატებით მტკიცებულებებს წარადგენს", ნათქვამია ორგანიზაციის ვებ-გვერდზე. სრულად... წყარო: emc.org.ge

თბილისი. კოალიცია მედიის ადვოკატირებისთვის თბილისის მასშტაბით მოძრავ მიკროავტობუსებში რადიო-მონოპოლიის დამყარებას ეწინააღმდეგება და განცხადებას ავრცელებს. „მიუღებლად მიგვაჩნია მუნიციპალური სატრანსპორტო კომპანიის მიერ ამგვარი ხელშეკრულების გაფორმება, ვინაიდან ის აწესებს მოსახლეობის ძალიან ფართო სეგმენტზე ფაქტობრივ რადიო-მონოპოლიას, რაც შეუთავსებელია დემოკრატიისა და ადამიანის უფლებათა სამართლის ფუნდამენტურ პრინციპებთან: არჩევანის თავისუფლებასა და მრავალფეროვან ინფორმაციაზე ხელმისაწვდომობის უფლებასთან, რასაც ყველა სახელმწიფო უწყება თუ მუნიციპალური კომპანია უნდა იცავდეს და პატივს სცემდეს", ნათქვამია ორგანიზაციის ვებ-გვერდზე. სრულად... წყარო: gyla.ge

თბილისი. საქართველოს დემოკრატიული ინიციატივა დეკემბრის თვის საინფორმაციო ბიულეტენს აქვეყნებს. ბიულეტენში მიმოხილულია ადამიანის უფლებათა სფეროს მნიშვნელოვანი საკითხები - წამების პრევენციის ევროპული კომიტეტის (CPT) საქართველოში 2014 წლის დეკემბრის ვიზიტის ანგარიში, NDI-ს კვლევა ტელეკომპანია „რუსთავი 2"-თან დაკავშირებით, ე.წ. კორტების საქმეში განვითარებული მოვლენები, შეწყალების კომისიაზე შესაძლო ზეწოლის ფაქტები და სხვა. სრულად... წყარო: gdi.ge

თბილისი. „ფრიდომ ჰაუსის" შეფასებით, 2015 წელი ბოლო ათწლეულის განმავლობაში მსოფლიოში თავისუფლების კუთხით ყველაზე უარესი იყო. „ფრიდომ ჰაუსის" შეფასებით, საქართველო წინა წლების მსგავსად ნაწილობრივ თავისუფალი ქვეყნების კატეგორიაში რჩება. ორგანიზაციას შეფასებული აქვს ვითარება ე.წ. სადავო ტერიტორიებზეც, მათ შორის საქართველოს ოკუპირებულ რეგიონებში. უფლებადამცველი ორგანიზაციის შეფასებით, აფხაზეთი ნახევრად თავისუფალია, სამხრეთი ოსეთი კი არათავისუფალთა კატეგორიაშია", ნათქვამია ანგარიშში. სრულად... წყარო: www.radiotavisupleba.ge

თბილისი. საქართველოს სახალხო დამცველის ბრძანებით დამტკიცდა სპეციალური პრევენციული ჯგუფის განახლებული შემადგენლობა. „პრევენციის ეროვნული მექანიზმის ფუნქციების ეფექტიანი განხორციელების უზრუნველსაყოფად სპეციალური პრევენციული ჯგუფი დაკომპლექტებულია სხვადასხვა დარგის სპეციალისტებით. ჯგუფის შემადგენლობაში შედის 6 იურისტი, 5 ექიმი, 2 ექსპერტი ჯანდაცვის საკითხებში, 2 ფსიქიატრი, 6 ფსიქოლოგი, 5 სოციალური მუშაკი, 4 ექსპერტი დისკრიმინაციის საკითხებში (მათ შორის 2 შშმ პირი), 2 ექსპერტი არასრულწლოვანთა მართლმსაჯულების საკითხებში", ნათქვამია ომბუდსმენის განცხადებაში. სრულად... წყარო: www.ombudsman.ge

თბილისი. ადამიანის უფლებების სწავლებისა და მონიტორინგის ცენტრი (EMC) რელიგიის თავისუფლების შეზღუდვისა და რელიგიური ნიშნით სავარაუდო დისკრიმინაციაზე ანგარიშს აქვეყნებს. „წინამდებარე ანგარიშის მიზანია, საზოგადოებას გაუზიაროს ინფორმაცია იმ საქმეების შესახებ, რომლებსაც EMC აწარმოებდა და რომლებიც რელიგიის თავისუფლების შეზღუდვის ან რელიგიური კუთვნილების ნიშნით სავარაუდო დისკრიმინაციის ფაქტებს უკავშირდება. დოკუმენტი მოიცავს მიმდინარე საქმეების დავის არსისა და დასაბუთების მოკლე მიმოხილვას, ასევე, ინფორმაციას საქმეების მიმდინარეობისა და მნიშვნელობის შესახებ", ნათქვამია ორგანიზაციის ვებ-გვერდზე. სრულად... წყარო: emc.org.ge

თბილისი. „საქართველოს დემოკრატიული ინიციატივა" ავრცელებს ნოემბრის ბიულეტენს, რომელშიც თავმოყრილია ამ თვის მნიშვნელოვანი მოვლენები ადამიანის უფლებათა კუთხით. „აღნიშნულ პერიოდში კვლავ მნიშვნელოვან გამოწვევად რჩებოდა რუსთავი 2-ის საქმე. ბიულეტენში ასევე გამახვილებულია ყურადღება ხელისუფლების წარმომადგენელთა მხრიდან საკონსტიტუციო სასამართლოზე განხორციელებულ ზეწოლაზე. ბიულეტენი შეეხება წამების საკითხებში გაეროს სპეციალური მომხსენებლის ანგარიშსა და გაეროს ადამიანის უფლებათა საბჭოს უნივერსალური პერიოდული მიმოხილვის ფარგლებში საქართველოში ადამიანის უფლებათა მდგომარეობის განხილვასაც", ნათქვამია ორგანიზაციის ვებ-გვერდზე. სრულად... წყარო: gdi.ge

თბილისი. 27 იანვარი ჰოლოკოსტის მსხვერპლთა ხსოვნის საერთაშორისო დღეა. საქართველოს სახალხო დამცველთან არსებულმა ტოლერანტობის ცენტრმა და საერთაშორისო ფონდმა „ლეამ" ამ დღისადმი მიძღვნილი ღონისძიება გამართეს. „შეხვედრის გახსნისას სახელმწიფო უწყებების, დიპლომატიური კორპუსის, საერთაშორისო ორგანიზაციების, სახალხო დამცველთან არსებული რელიგიათა და ეთნიკური უმცირესობების საბჭოების წევრებმა წუთიერი დუმილით პატივი სცეს ჰოლოკოსტის მსხვერპლთ. ... ღონისძიების მონაწილეებმა მენორაზე სანთლები დაანთეს და პატივი მიაგეს ჰოლოკოსტის დროს დაღუპული 6 მილიონი ებრაელის, 2 მილიონი ბოშას და ნაცისტური რეჟიმის ყველა სხვა მსხვერპლის ხსოვნას. დასასრულს, რაბი ავიმელეხ როზენბლატმა მოსახსენიებელი ლოცვა წაიკითხა", ნათქვამია ომბუდსმენის ვებ-გვერდზე. სრულად... წყარო: www.ombudsman.ge

თბილისი. ადამიანის უფლებების სწავლებისა და მონიტორინგის ცენტრმა (EMC) 21 თბილისის სააპელაციო სასამართლოში 17 მაისის საქმესთან დაკავშირებით სასამართლო მეგობრის მოსაზრება (Amicus Curiae) წარადგინა. „სასამართლო მეგობრის მოსაზრება ხაზს უსვამს სახელმწიფოს ვალდებულებას სამართლიანი, ობიექტური და დასაბუთებული შეფასება მისცეს ბრალდებულთა მიერ განხორციელებულ ქმედებას, გამოკვეთოს შესაძლო დისკრიმინაციული მოტივი და საქმეზე ობიექტური გადაწყვეტილება მიიღოს. მნიშვნელოვანია, რომ სასამართლომ გაიაზროს აღნიშნული საქმის მნიშვნელობა საზოგადოების, ლგბტ თემისა და დემოკრატიული ღირებულებების დაცვისთვის. სახელმწიფო ვალდებულია, აღმოფხვრას დაუსჯელობის ატმოსფერო, რაც საბოლოო ჯამში ხელს შეუწყობს ლგბტ პირთა მიმართ დისკრიმინაციული პრაქტიკისა და ძალადობის შემცირებას ქვეყანაში”, ნათქვამია ორგანიზაციის ვებ-გვერდზე. სრულად... წყარო: emc.org.ge

თბილისი. საქართველოს სახალხო დამცველმა ყოფილი პატრულ-ინსპექტორის მიმართ განხორციელებული ქმედებების კანონიერების საკითხის შესწავლის რეკომენდაციით მიმართა საქართველოს შინაგან საქმეთა მინისტრს. „ზემოაღნიშნულიდან გამომდინარე, საქართველოს სახალხო დამცველმა საქართველოს შინაგან საქმეთა მინისტრს რეკომენდაციით მიმართა შეისწავლოს ვ. წ.-ს დაკავებული თანამდებობიდან გათავისუფლების, შრომის სათანადო ანაზღაურების და უკანონო დაკავებით გამოწვეული ზიანის ანაზღაურების საკითხები. ამასთან, საქართველოს სახალხო დამცველი მიიჩნევს, რომ შესწავლილ უნდა იქნეს ვ.წ.-ს ხელმძღვანელი პირის მხრიდან დისციპლინური გადაცდომის ჩადენის საკითხიც. ომბუდსმენის რეკომენდაციით, მინისტრის მხრიდან უშუალოდ შესწავლას საჭიროებს შსს გენერალური ინსპექციის მუშაობაში არსებული ხარვეზები", ნათქვამია ომბუდსმენის ვებ-გვერდზე. სრულად... წყარო: www.ombudsman.ge

თბილისი. სამოქალაქო პლატფორმის „არა ფობიას" წევრი არასამთავრობო ორგანიზაციები ეხმაურებიან საქართველოს პარლამენტის საფინანსო-საბიუჯეტო კომიტეტის თავჯდომარის თამაზ მეჭიაურის მიერ გამოვლენილ „არმენოფობიურ დამოკიდებულებებს" და „ძალადობრივ ქმედებას". „მიგვაჩნია, რომ ხელისუფლების წარმომადგენლებს აქვთ მაღალი თმენის ვალდებულება ნებისმიერი საზოგადოებრივი პროტესტის მშვიდობიანი ფორმის მიმართ, ხოლო მათი საჯარო შეფასებები საზოგადოებრივი ინტერესის საგანია, რაც აკისრებთ პასუხისმგებლობას, თავი შეიკავონ ნებისმიერი ისეთი გამოხატვისაგან, რომელიც შეიცავს ქსენოფობიურ შინაარსს. აღსანიშნავია, რომ თამაზ მეჭიაური თავის გამოსვლებსა და განცხადებებში გამოირჩევა დისკრიმინაციული, მათ შორის, ჰომოფობიური და არმენოფობიური გამონათქვამებით, ასევე, მიუღებელია მისი დამოკიდებულება არასამათავრობო სექტორის მიმართ, როდესაც ის სამოქალაქო საზოგადოების წარმომადგენლებს „ენჯეოელ სოროსელებად" მოიხსენიებს", ნათქვამია ორგანიზაციის ვებ-გვერდზე. სრულად... წყარო: tdi.ge

თბილისი. ფონდ „ღია საზოგადოება საქართველოს" ოფისში მიმდინარეობს სკოლებში ბულინგის წინააღმდეგ პროგრამის პრეზენტაცია. „არაძალადობრივი კომუნიკაციის ინსტიტუტის" და ფონდი „ღია საზოგადოება-საქართველოს" პროექტის მიზანია კონკრეტულ სკოლებში ბულინგის პრევენცია და ასევე ეფექტური მექანიზმის შემუშავება. შემუშავებული მეთოდოლოგია მიმართული იქნება თანატოლებს შორის ჩაგვრის სხვადასხვა ფორმის შემცირებასა და სასწავლო გარემოს გაუმჯობესებისკენ. პროექტის პირველ ეტაპზე სამუშაო ჯგუფი შეისწავლის სკოლის შიდა კულტურას, ურთიერთობებს მოსწავლეებს, მოსწავლეებსა და მასწავლებლებს, მასწავლებლებსა და მშობლებს შორის, რისი გათვალისწინებითაც შემუშავდება ბულინგის დაძლევის მექანიზმი: შემუშავდება სატრენინგო მასალა და მეთოდოლოგია, ბოლო ეტაპზე კი განხორციელდება ტრენინგები სკოლის თემის წარმომადგენლებისათვის", ნათქვამია ორგანიზაციის ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში

თბილისი. ომბუდსმენი სწავლობს თბილისში, აგლაძის ქუჩის მაცხოვრებელთა კოლექტიურ განცხადებას, რომელსაც 343 პირი აწერს ხელს. განცხადებაში აღწერილია სამრეწველო და სხვა დაწესებულებებიდან მომდინარე ხმაურის შედეგად მოსახლეობაში შექმნილი მძიმე მდგომარეობა. „სახალხო დამცველი მიიჩნევს, რომ სახელმწიფო არ ასრულებს მის მიერ ნაკისრ ვალდებულებებს და არღვევს ადამიანთა ჯანმრთელობის დაცვის, სიცოცხლისა და ჯანმრთელობისათვის უვნებელ გარემოში ცხოვრებისა და პირადი და ოჯახური ცხოვრების პატივისცემის უფლებებს. აღნიშნული ვითარება დაუყოვნებლივ საჭიროებს გამოსწორებას. საქართველოს სახალხო დამცველი იმედს გამოთქვამს, რომ საქართველოს პარლამენტი გაითვალისწინებს აღნიშნულ წინადადებას და ეფექტურ ნაბიჯებს გადადგამს ხმაურის რეგულირების უზრუნველსაყოფად", ნათქვამია სახალხო დამცველის ვებ-გვერდზე. სრულად... წყარო: www.ombudsman.ge

თბილისი. ინფორმაციის თავისუფლების განვითარების ინსტიტუტი სახელმწიფო უსაფრთხოების სამსახურიდან მიღებული სტატისტიკური მონაცემების ანალიზს აქვეყნებს. „2015 წელს ოკუპირებული აფხაზეთის რეგიონის მიმართულებით ე.წ. საზღვრის უკანონო კვეთის ბრალდებით დაკავებულია 341 საქართველოს მოქალაქე, ხოლო ოკუპირებული ცხინვალის რეგიონის მიმართულებით - 162 საქართველოს მოქალაქე (შესაბამისად, 2015 წლის აპრილის შემდგომ, 9 თვის განმავლობაში, აფხაზეთის მიმართულებაზე დაკავებული იქნა 225 პირი, ხოლო ცხინვალის მიმართულებაზე - 139 პირი). სახელმწიფო უსაფრთხოების სამსახურიდან მოწოდებული 2015 წლის მონაცემების გათვალისწინებით, 2009-2015 წლებში საოკუპაციო ჯარის მიერ ე.წ. „საზღვრის უკანონო" გადაკვეთის ბრალდებით სულ დაკავებულია 2 481 საქართველოს მოქალაქე, რომელთაგან 1 641 პირი დაკავებულია აფხაზეთის, ხოლო 840 პირი კი ცხინვალის რეგიონის საოკუპაციო ზოლის გადაკვეთისათვის", ნათქვამია ორგანიზაციის ვებ-გვერდზე. სრულად... წყარო: idfi.ge

თბილისი. საერთაშორისო გამჭვირვალობა - საქართველო აცხადებს, რომ „შინაგან საქმეთა მინისტრის მოადგილე ვალდებულია დაიცვას უდანაშაულობის პრეზუმფცია". „ევროპული სასამართლოს პრაქტიკის შეჯამების სახით შეიძლება ითქვას, რომ უდანაშაულობის პრეზუმფციის დაცვა ბრალდების მხარესაც ევალება იმ შემთხვევაში, როდესაც განცხადების გაკეთება ხდება არა სასამართლოში სისხლისამართლებრივი საქმის განხილვის ფორმატში, არამედ პრესკონფერენციის ან სატელევიზიო ინტერვიუს დროს. ასეთ შემთხვევებში მნიშვნელოვანია, რომ საზოგადოებისთვის ინფორმაციის მიწოდება მოხდეს მხოლოდ ფაქტების აღწერის სახით, შეფასებითი, დეკლარაციული მსჯელობის გარეშე", ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. სამოქალაქო პლატფორმაში „არა ფობიას" შემავალი არასამთავრობო ორგანიზაციები პრემიერ მინისტრს მიმართავენ. „მიგვაჩნია, რომ სერიოზულ პრობლემას წარმოადგენს, ერთი მხრივ, ის ფაქტი, რომ მაღალი პოლიტიკური თანამდებობის პირი, რომელიც სახელმწიფოს სახელით საუბრობს, სისტემატურად აღვივებს სიძულვილს და შეუწყნარებლობას მისთვის მიუღებელი მოსაზრებების გამო, მეორე მხრივ, ის, რომ ხელისუფლება რეაგირების გარეშე ტოვებს ამგვარ გამოხატვას, რაც ბოლო დროს გახშირებულ ძალადობრივ ქმედებებზე აისახება. ვინაიდან სანდრო ბრეგაძის მიერ სიძულვილის ენის გამოყენების ფაქტები კვლავაც მეორდება, მოგმართავთ, იმსჯელოთ, თანამდებობაზე სანდრო ბრეგაძის დატოვების მიზანშეწონილობის საკითხზე, ვინაიდან მთავრობის მხრიდან ბრეგაძის საჯარო განცხადებების უგულებელყოფა მათ შეწყნარებად შეიძლება იქნას განმარტებული და იგი ექცევა მთავრობის პასუხისმგებლობის სფეროში", ნათქვამია ორგანიზაციის ვებ-გვერდზე. სრულად... წყარო: www.tdi.ge

თბილისი. იუსტიციის სამინისტრომ მოამზადა კანონპროექტი, რომელიც ქუჩაში მომუშავე და მყოფი ბავშვების უფლებებს დაიცავს. კანონპროექტი მთავრობის დღევანდელ სხდომაზე დამტკიცდა. „ჩვენი ყველას - სახელმწიფოს და საზოგადოების ტკივილია ქუჩაში მცხოვრები და მომუშავე ბავშვები. ყველა ბავშვს აქვს განვითარების უფლება, ამიტომაც პარტნიორ ორგანიზაციებსა და კოლეგა სამინისტროებთან ერთად შევიმუშავეთ ცვლილებების პაკეტი, რომელიც მთავრობამ დღეს ერთხმად დაამტკიცა და რომელიც ემსახურება ქუჩაში მყოფი და მომუშავე ბავშვების უკეთესად დაცვას", განაცხადა იუსტიციის მინისტრმა თეა წულუკიანმა. სრულად... წყარო: www.ginsc.net

თბილისი. საქართველოს სახალხო დამცველმა მორიგო საინფორმაციო ბიულეტენი წარმოადგინა. „დოკუმენტში აპარატის ძირითადი საქმიანობებია განხილული. დეკემბრის მთავარი მოვლენა რა თქმა უნდა, არის ადამიანის უფლებათა დაცვის საერთაშორისო დღე – 10 დეკემბერი. ამ დღეს სახალხო დამცველი უკვე მესამე წელია სპეციალურ ანგარიშით აღნიშნავს. ანგარიშში შეჯამებულია ადამიანის უფლებათა დაცვის თვალსაზრისით მთელი წლის განმავლობაში ქვეყანაში მიმდინარე მოვლენები, სახალხო დამცველის აპარატის საქმიანობა, გეგმები და პერსპექტივები", ნათქვამია სახალხო დამცველის ვებ-გვერდზე. სრულად... წყარო: www.ombudsman.ge