თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს სტატიას: „შრომის ინსპექტირების ეფექტური მექანიზმის შექმნის აუცილებლობა". „მივიჩნევთ, რომ სრული მანდატის მქონე ინსპექციის შექმნაზე სოციალური პარტნიორების მიერ კონსესუსის მიღწევამდე, დასაქმებულთა მასიური დაშავებისა და გარდაცვალების შემთხვევების დაუყოვნებლივი პრევენციისათვის, აუცილებელია დღის წესრიგში დადგეს ინსპექტირების არსებული მექანიზმის გადახედვის საკითხი და გამონაკლისის სახით, პირველი ეტაპისათვის დეპარტამენტს დაუყოვნებლივ განესაზღვროს დაუბრკოლებელი და პირდაპირი ინსპექტირების განხორციელების უფლებამოსილება მძიმე, მავნე და საშიშპირობებიან საწარმოებში, რომელსაც ამასთან ექნება უფლებამოსილება მოახდინოს სათანადო და ეფექტური რეაგირება შრომის პირობებისა და უსაფრთხოების სტანდარტების დარღვევების ფაქტებზე", ნათქვამია ორგანიზაციის ვებ-გვერდზე. სრულად... წყარო: emc.org.ge

თბილისი. ომბუდსმენის 2015 წლის საპარლამენტო ანგარიშის ერთ-ერთ რელევანტურ საკითხს ბავშვთა მინდობით აღზრდისა და რეინტეგრაციის სახელმწიფო ქვეპროგრამების მონიტორინგი წარმოადგენს. „მონიტორინგის დროს შემოწმდა მინდობით აღზრდისა და რეინტეგრაციის პროცედურების განმახორციელებელი ორგანოების მიერ აღნიშნული სერვისების შესრულება გაეროს ბავშვის უფლებათა კონვეციის (CRC), ევროპის მინისტრთა საბჭოს შესაბამისი რეზოლუციებისა და ვენეციის კომისიის რეკომენდაციების საფუძველზე, შემდეგი მიმართულებებით: ძალადობის, ექსპლუატაციისა და სხვა სახის არასათანადო მოპყრობა, სიღარიბისა და ცხოვრების არასათანადო პირობებისაგან დაცვა, კონფიდენციალურობა და ინდივიდუალური მიდგომა, ხარისხიანი და დროული ჯანმრთელობის უფლება, განათლების უფლების თანაბარი ხელმისაწვდომობა, დისკრიმინაცია და არათანასწორი მოპყრობა", ნათქვამია სახალხო დამცველის ვებ-გვერდზე. სრულად... წყარო: www.ombudsman.ge

აჭარა. 26 აპრილს, ბათუმის დემოკრატიული ჩართულობის ცენტრში არასამთავრობო ორგანიზაცია „თავისუფალ ჟურნალისტთა სახლის" ორგანიზებით დისკუსია გაიმართა - „16 წლამდე გოგოსთან ქორწინება და სასჯელი". დისკუსიის მომხსენებლები იყვნენ: სახალხო დამცველის აპარატის რეგიონალური დეპარტამენტის აჭარის სამმართველოს უფროსი - ციალა ქათამიძე, რომელმაც მცირეწლოვნებთან ქორწინების შესახებ სახალხო დამცველის ხედვაზე ისაუბრა; არასამთავრობო ორგანიზაცია „ჩვენი უფლებებისთვის" წარმომადგენელმა თამაზ ბაკურიძემ ისაუბრა, იმაზე უნდა დაისაჯონ თუ არა მამაკაცები, რომლებიც 16 წელს მიუღწეველ გოგონაზე იქორწინებს; მოდერატორი გახლდათ „გაზეთ ბათუმელების" რედაქტორი ეთერ თურაძე. დისკუსია მომზადდა ამერიკული ორგანიზაციის NED-ის დაფინანსებული პროექტის „ახალგაზრდებში დემოკრატიული იდეების პოპულარიზაცია" ფარგლებში.

თბილისი. 22 აპრილს, ომბუდსმენის არსებული შეზღუდული შესაძლებლობის მქონე პირთა უფლებების კონვენციის პოპულარიზაციის, დაცვისა და იმპლემენტაციის მონიტორინგის საკონსულტაციო საბჭოს მორიგი სამუშაო შეხვედრა გაიმართა. „საბჭომ განიხილა დღის წესრიგით გათვალისწინებული საკითხები: შეზღუდული შესაძლებლობის მქონე პირთა უფლებების კონვენციის პოპულარიზაციის, დაცვისა და იმპლემენტაციის მონიტორინგის მიზნით დაგეგმილი და განხორციელებული ღონისძიებები, განიხილა შეზღუდული შესაძლებლობის მქონე პირთა უფლებების კონვენციის იმპლემენტაციის შესახებ სახელმწიფოს პირველადი ანგარიში; იმსჯელა შშმ პირთა უფლებების კონვენციის იმპლემენტაციის მონიტორინგის მეთოდოლოგიის გამოყენების გეგმასა და საკონსულტაციო საბჭოს წევრების მიერ შშმ პირთა უფლებების კონვენციის იმპლემენტაციის თაობაზე სხვა ალტერნატიული ანგარიშების მომზადების პროცესში მონაწილეობაზე", ნათქვამია ომბუდსმენის ვებ-გვერდზე. სრულად... წყარო: www.ombudsman.ge

თბილისი. საქართველოს ახალგაზრდა იურისტთა ასოციაციას მიმართეს TSpress-ის წარმომადგენლებმა და აღნიშნეს, რომ 2016 წლის 5 აპრილს, ფოთის მერის მიერ გამართულ საჯარო შეხვედრაზე მოსახლეობასთან, TSpress-ის ჟურნალისტი და ოპერატორი არ შეუშვეს. „საია ხაზგასმით აღნიშნავს, რომ საქართველოს ადმინისტრაციული კანონმდებლობის ერთ-ერთი უმთავრესი პრინციპია საჯარო დაწესებულებების ღიაობა და საჯარო ინფორმაციის ხელმისაწვდომობა ყველა მსურველისათვის. მსგავსი ფაქტები ლახავს მედიის უფლებებს და უარყოფითად აისახება მის სამუშაო გარემოზე. საია მოუწოდებს ყველა ადგილობრივი და ცენტრალური საჯარო დაწესებულებების წარმომადგენლებს ღიაობისაკენ და მოუწოდებს მათ არ შეუზღუდონ მოქალაქეების მიერ ინფორმაციის მიღებისა და ინფორმაციის გავრცელების კონსტიტუციური უფლებები", ნათქვამია ორგანიზაციის განცხადებაში. სრულად... წყარო: gyla.ge

თბილისი. არასამთავრობო ორგანიზაციები ერთობლივ მიმართვას ავრცელებენ საქართველოს შინაგან საქმეთა მინისტრისა და სახელმწიფო უსაფრთხოების სამსახურის ხელმძღვანელთან. „მიმართვაზე ხელმომწერი ორგანიზაციები ვეხმაურებით ბოლო დღეებში სტუდენტური მოძრაობა „აუდიტორია 115"-ის წარმომადგენლების მიერ გაკეთებულ საჯარო განცხადებებს, რომელშიც ისინი მათი აქტიურობის ფონზე ოჯახის წევრებსა და ახლობლებზე შესაძლო ზეწოლის ფაქტებზე საუბრობენ. მიგვაჩნია, რომ გავრცელებული ინფორმაცია უნდა გახდეს შინაგან საქმეთა მინისტრისა და სახელმწიფო უსაფრთხოების სამსახურის ხელმძღვანელის უშუალო დაინტერესების საფუძველი. ამასთან, საჭიროა დაუყოვნებლივ დაიწყოს სამსახურებრივი მოკვლევა ხსენებულ ფაქტებზე, ვინაიდან შესაძლოა ადგილი ჰქონდეს კონკრეტული პირების მხრიდან საკუთარი სტატუსისა და უფლებამოსილების არამიზნობრივ გამოყენებას. საკმაოდ მსგავსი და ერთგვაროვანი ხელწერის პირობებში, ასევე დასადგენია რამდენად ჰქონდა ადგილი აღნიშნული პროცესის ორგანიზებას ხელმძღვანელი/ზემდგომი პირების მხრიდან", ნათქვამია ორგანიზაციის ვებ-გვერდზე. სრულად... წყარო: www.transparency.ge

კახეთი. 20 აპრილს პანკისის ხეობის მოსახლეობასთან პაციენტის უფლებების შესახებ საინფორმაციო შეხვედრები გაიმართა. შეხვედრები პროექტის „პაციენტის უფლებების დაცვის ცხელი ხაზის" ფარგლებში „საქართველოს ბიოეთიკის ასოციაციამ" ჩაატარა. პროექტი ფონდი „ღია საზოგადოება-საქართველოს" მხარდაჭერით მიმდინარეობს. „ადგილობრივ მოსახლეობას მიეწოდა ინფორმაცია რა უნდა იცოდეს მოქალაქემ პაციენტის უფლებების შესახებ; რა შეიძლება გამოიწვიოს პაციენტის უფლებების არცოდნამ; როგორ უნდა მოიქცეს საქართველოს მოქალაქე, თუკი მისი, როგორც პაციენტის უფლებები ირღვევა; რა მექანიზმები არსებობს უფლებების შესაძლო დარღვევაზე რეაგირებისთვის და ა.შ", ნათქვამია ორგანიზაციის ვებ-გვერდზე. სრულად... წყარო: www.osgf.ge

თბილისი. საქართველოს ახალგაზრდა იურისტთა ასოციაცია ეხმიანება სულხან წულაძის მიმართ აღკვეთი ღონისძიების სახით პატიმრობის გამოყენების საკითხს. „საიას მიაჩნია, რომ მოცემულ შემთხვევაში აღკვეთის ღონისძიების სახით პატიმრობის გამოყენება ვერ აკმაყოფილებს აღნიშნულ სტანდარტებს. ამასთან, განჩინება არის დაუსაბუთებელი, რადგან მასში განვითარებული მსჯელობა არის ზოგადი და აბსტრაქტული ხასიათის და აღკვეთის ღონისძიების სახით პატიმრობის გამოყენების აუცილებლობა და კანონიერება არ არის გამყარებული საქმეში არსებული კონკრეტული ფაქტებითა და ინფორმაციის ერთობლიობით", ანთქვამია ორგანიზაციის განცხადებაში. სრულად... წყარო: gyla.ge

თბილისი. საქართველოს დემოკრატიული ინიციატივა აქვეყნებს 2016 წლის თებერვლის საინფორმაციო ბიულეტენს ავრცელებს. ბიულეტენი მიმოიხილავს ამ თვის მნიშვნელოვან საკითხებს - საქართველოს პრეზიდენტის მიერ საქართველოს პარლამენტისათვის წლიური ანგარიში წარდგენა, სისხლის სამართლის საერთაშორისო სასამართლოს (ICC) მიერ რუსეთ-საქართველოს ომის გამოძიების დაწყება, საქართველოს საგარეო საქმეთა სამინისტროს მიერ მომზადებულ ანგარიში ოკუპირებულ ტერიტორიებზე ადამიანის უფლებების მდგომარეობის შესახებ, საქართველოს მოსამართლეთა რიგგარეშე კონფერენციასა და მოსამართლეთა ტესტირების სკანდალს, ასევე ტელეკომპანია მაესტროს საქმესთან დაკავშირებულ დეტალებს, ადიგენში რელიგიურ ნიადაგზე დაპირისპირების შემთხვევასა და სხვა. სრულად... წყარო: gdi.ge

თბილისი. სახალხო დამცველი შეზღუდული შესაძლებლობის მქონე პირთა დასაქმების მდგომარეობას საგანგაშოდ აფასებს. „სახელმწიფო შეზღუდული შესაძლებლობის მქონე პირთა დასაქმების ვალდებულებას ჯეროვნად ვერც საჯარო სექტორში ასრულებს. საჯარო სამსახურის ბიუროს 2015 წლის ანგარიშის მიხედვით, საჯარო სექტორში დასაქმებული 53 109 ადამიანიდან მხოლოდ 112 არის შეზღუდული შესაძლებლობის მქონე პირი", ნათქვამია ომბუდსმენის ვებ-გვერდზე. სრულად... წყარო: www.ombudsman.ge

თბილისი. საქართველოს ახალგაზრდა იურისტთა ასოციაცია ეხმაურება პროკურატურის მიერ ეკატერინე მიშველაძის საქმის შინაგან საქმეთა სამინისტროსთვის გადაცემას. „საია მიიჩნევს, რომ ეკატერინე მიშველაძის საქმის გამოსაძიებლად შსს სამინისტროსათვის გადაცემა იმთავითვე ეჭვქვეშ აყენებს გამოძიების დამოუკიდებლობასა და ეფექტურობას", ნათქვამია ორგანიზაციის განცხადებაში. სრულად... წყარო: gyla.ge

თბილისი. საქართველოს სახალხო დამცველი ეხმაურება მედიაში ბოლო პერიოდში გამოთქმულ მოსაზრებებს. „ბოლო პერიოდში სისტემატიური ხასიათი მიიღო სახალხო დამცველის ყოველწლიურ ანგარიშში, რელიგიის თავისუფლების თავში ასახული პრობლემატიკისა და შეფასებების მიზანმიმართულმა დამახინჯებამ. კერძოდ, მედიაში გავრცელებული ინფორმაციით, სახალხო დამცველი ბავშვების ექსკურსიაზე ტაძრებში წაყვანის აკრძალვას ითხოვს, რაც არ შეესაბამება სინამდვილეს", ნათქვამია ომბუდსმენის ვებ-გვერდზე. სრულად... წყარო: www.ombudsman.ge

სამცხე-ჯავახეთი. 21-22 აპრილს, „კონსტიტუციის 42-ე მუხლი" პროექტის „ქალთა, განსაკუთრებით კი ეთნიკურ უმცირესობათა ჯგუფს მიკუთვნებულ ქალთა გაძლიერება და მართლმსაჯულებაზე ხელმისაწვდომობის ხელშეწყობა" ფარგლებში გეგმავს ვიზიტს ახალციხის მუნიციპალიტეტში. „ვიზიტის მიზანია ორ დღიანი ტრენინგის ჩატარება ეთნიკური უმცირესობების წარმომადგენელი მოსახლეობისათვის. ტრენინგის თემატიკა შეირჩა რეგიონში არსებული პრობლემატური საკითხების მიხედვით და შეეხება ისეთ თემებს, როგორიცაა გენდერული თანასწორობა, საკუთრების უფლება გენდერული თანასწორობის ჭრილში, ოჯახში ძალადობა და ადრეული ქორწინება. ტრენინგის ფარგლებში მოხდება ბენეფიციარების ინფორმირება მათი უფლებების შესახებ, თუ როგორ ისარგებლონ ამ უფლებებით და როგორ მოიქცნენ მათი უფლებების დარღვევის შემთხვევაში", ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. სახალხო დამცველი განცხადებას ავრცელებს სამაუწყებლო სივრცეში არსებული სტიგმისა და დისკრიმინაციის შემცველი დამოკიდებულების თაობაზე. „ომბუდსმენი მოუწოდებს სამაუწყებლო კომპანიებს და სხვა მედია საშუალებებს, რომ ნებისმიერი პროგრამის/გადაცემის მომზადებისა და გაშუქების პროცესში იხელმძღვანელონ მრავალფეროვნების, თანასწორობისა და ტოლერანტობის პრინციპებით. არ შეუწყონ ხელი ადამიანების ღირსების შემლახავ მდგომარეობაში ჩაყენებას და მკაცრად დაიცვან საერთაშორისო სტანდარტებითა თუ ეროვნული კანონმდებლობით დადგენილი მოთხოვნები", ნათქვამია განცხადებაში. სრულად... წყარო: www.ombudsman.ge

თბილისი. 15 და 18 აპრილს, საქართველოს სახალხო დამცველმა უკანონო დაკავების ფაქტზე გამოძიების დაწყების წინადადებებით მიმართა საქართველოს მთავარ პროკურორს. „საქართველოს სახალხო დამცველმა მიიჩნია, რომ მოცემულ შემთხვევაში, შინაგან საქმეთა სამინისტროს პასუხისმგებელმა თანამშრომლებმა დაარღვიეს საქართველოს კონსტიტუციის და საქართველოს ადმინისტრაციულ სამართალდარღვევათა კოდექსის მოთხოვნები", ნათქვამია ომბუდსმენის ვებ-გვერდზე. სრულად... წყარო: www.ombudsman.ge

თბილისი. საქართველოს სახალხო დამცველი პრევენციის ეროვნული მექანიზმის კვარტალურ საინფორმაციო ბიულეტენს აქვეყნებს. „ნომერი მიმოიხილავს საერთაშორისო სტანდარტებით განსაზღვრულ არასათანადო მოპყრობის მსხვერპლთა სამართლებრივი დაცვის, კომპენსაციისა და რეაბილიტაციის საკითხს. ბიულეტენის ფოკუსს წარმოადგენს ანგარიში ხანდაზმულ პირთა უფლებრივი მდგომარეობა სადღეღამისო სპეციალიზებულ დაწესებულებებში, რომელიც საქართველოს სახალხო დამცველთან არსებულმა სპეციალურმა პრევენციულმა ჯგუფმა და სახალხო დამცველის შეზღუდული შესაძლებლობის მქონე პირთა უფლებების დეპარტამენტმა მოამზადეს", ნათქვამია ორგანიზაციის ვებ-გვერდზე. სრულად... წყარო: www.ombudsman.ge

ახალციხე. დემოკრატ მესხთა კავშირის იურისტები, სოფელ სხვილისს, გიორგი წმინდას, მუგარეთს და ქალაქ ვალეს ესტუმრნენ და ადგილობრივ მოსახლეობას უფასო იურიდიული კონსულტაცია გაუწიეს. „პროექტს „უმცირესობების უფლებების გაუმჯობესება სტრატეგიული სამართალწარმოების გზით" დემოკრატ მესხთა კავშირი და საქართველოს დემოკრატიული ინიციატივა (GDI) ახორციელებს, რომლის მიზანია მართლმსაჯულების ხელმისაწვდომობის გაზრდა რელიგიური და ეთნიკური უმცირესობებისთვის, ისეთი პრობლემების გადასაწყვეტად როგორიც არის სამართალდამცავი ორგანოების მხრიდან რელიგიის თავისუფლების დარღვევის დროს არაადეკვატური და არაეფექტური რეაგირება, ხელისუფლების ადგილობრივი ორგანოების მიერ, რელიგიური კონფლიქტების დროს რელიგიური ნეიტრალიტეტის დარღვევა, ქართული ენის არცოდნით გამოწვეული ბარიერები და მათი უფლებების შესახებ ცნობიერების დაბალი დონე", ნათქვამია ორგანიზაციის ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში

სამეგრელო. 16 აპრილს ზუგდიდში, გრიგოლ ხვიტიას სახელობის სასწავლო უნივერსიტეტში გაიმართა მორიგი შეხვედრა სერიიდან „დიალოგები დემოკრატიაზე". სამუშაო თემას წარმოადგენდა პირადი საიდუმლოების დაცვა და კამპანია „ეს შენ გეხება". სრულად... წყარო: cela.ge

თბილისი. კამპანიის „ეს შენ გეხებას" წევრი ორგანიზაციები პროკურატურას სტატისტიკურ მონაცემებს სთხოვს. „მოგმართავთ კამპანიის „ეს შენ გეხება” სახელით და საქართველოს კონსტიტუციისა და საქართველოს ზოგადი ადმინისტრაციული კოდექსის მოთხოვნების გათვალისწინებით. გთხოვთ, მოგვაწოდოთ შემდეგი საჯარო ინფორმაცია 2012 წლის 1 ოქტომბრიდან დღემდე: რამდენ საქმეზე დაიწყო გამოძიება პირადი ცხოვრების ამსახველი ინფორმაციის ან პერსონალური მონაცემების ხელყოფის ფაქტებთან დაკავშირებით, ასევე, კერძო კომუნიკაციის საიდუმლოების დარღვევის, კიბერდანაშაულისა და კიბერტერორიზმის ფაქტებთან დაკავშირებით (გთხოვთ, მიგვითითოთ სსკ-ის შესაბამისი მუხლები); რამდენი პირი მიეცა სისხლისსამართლებრივ პასუხისგებაში ხსენებული დანაშაულის საფუძველზე, მათ შორის, ბრალდებულებიდან რამდენი წარმოადგენდა საჯარო მოხელეს (გთხოვთ, მიგვითითოთ მათი სამსახურებრივი პოზიციები)...", ნათქვამია მიმართვაში. სრულად... წყარო: esshengexeba.ge

თბილისი. ადამიანის უფლებების სწავლებისა და მონიტორინგის ცენტრი მეტროს მემანქანეთა გაფიცვის გადადების თაობაზე სასამართლო გადაწყვეტილებას აფასებს. „EMC ეხმიანება თბილისის საქალაქო სასამართლოს განჩინებას შპს „თბილისის სატრანსპორტო კომპანიის" დასაქმებულ მემანქანეთა გაფიცვის 30 დღის ვადით გადადების შესახებ, რამდენადაც აღნიშნული გადაწყვეტილება არის პირველი პრეცედენტი სასამართლოს მიერ გაფიცვის უფლების შეზღუდვის თაობაზე,  სხვა მნიშვნელოვანი სიკეთის დაცვის მიზნით და შესაძლოა იქონიოს გავლენა სასამართლო პრაქტიკის შემდგომ განვითარებაზე...." სრულად... წყარო: emc.org.ge

თბილისი. სახალხო დამცველი ქალებზე, მშვიდობასა და უსაფრთხოებაზე ეროვნული სამოქმედო გეგმის განხორციელება საქართველოში - მონიტორინგის შედეგებზე ანგარიშს აქვეყნებს. „მონიტორინგის შედეგებმა ცხადყო, რომ სამოქმედო გეგმა ფაქტიურად არ ასახულა იმ მოსახლეობაზე, რომელსაც განსაკუთრებული საჭიროებები აქვთ ამ მიმართულებით. ოკუპირებული რეგიონების მიმდებარე სოფლებსა და დევნილთა ჩასახლებებში მცხოვრები ქალები ძალიან ბევრი პრობლემის წინაშე დგანან, თუმცა მათზე მიმართული დამცავი თუ სარეაბილიტაციო ღონისძიებების ნაკლებობა თვალსაჩინოა", ნათქვამია ომბუდსმენის ვებ-გვერდზე. სრულად... წყარო: www.ombudsman.ge

აჭარა. 14 აპრილს, ხულოს მუნიციპალიტეტში, ახალგაზრდა იურისტთა ასოციაციის მიერ მორიგი ტრენინგი ჩატარდა. ნაადრევი ქორწინება და ქალთა უფლებები ამჯერად ადგილობრივებს ამ მიმართულებით ესაუბრა. შეხვედრაზე ქალბატონებს მისცეს კონკრეტული რჩევები, როგორ იმოქმედონ ოჯახში ძალადობის შემთხვევაში. საიას ბათუმის ორგანიზაციის ხელმძღვანელის განმარტებით, ქალთა მიმართ ძალადობის ფაქტები არა მხოლოდ მაღალმთიან აჭარაშია, არამედ ეს პრობლემა დღემდე მთელი ქვეყნის მასშტაბით აქტუალურია. შეხვედრაზე ასევე აღინიშნა, რომ სახელმწიფომ უნდა მოახდინოს დროული რეაგირება ნაადრევი ქორწინების საწყის ეტაპზე, რათა არასრულწლოვანთა ქორწინებები შეწყდეს. ტრენინგის ბოლოს „ახალგაზრდა იურისტთა ასოციაციასა" და „ქალთა ოთახს" შორის ურთიერთთანამშრომლობის მემორანდუმი გაფორმდა.