თბილისი. საქართველოს ახალგაზრდა იურისტთა ასოციაციის გამგეობის გადაწყვეტილებით, ადამიანის უფლებათა დაცვის პროგრამის დირექტორი მარიამ სვიმონიშვილი გახდა. მარიამმა ამ პოზიციაზე მერაბ ქართველიშვილი ჩაანაცვალა. „მარიამი გეგმავს აქტიურად გააგრძელოს მუშაობა როგორც სამოქალაქო და პოლიტიკურ, ასევე სოციალურ და ეკონომიკურ უფლებებზე. მისი ამოცანაა პროგრამის მიერ ადგილობრივ და საერთაშორისო დონეზე ადვოკატირების გაძლიერება“. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი აქვეყნებს კვლევას: უსახლკარო ჯგუფების საცხოვრისით უზრუნველყოფის პრაქტიკა - რა არის ქალთა განსაკუთრებული საჭიროებები. „სათანადო საცხოვრისის გარანტირება და უსახლკარობის წინააღმდეგ ბრძოლა ის საკითხია, რომელიც სახელმწიფოს მხრიდან კომპლექსურ და მრავალმხრივ ღონისძიებებს საჭიროებს. საერთაშორისო სტანდარტები ნათლად მიუთითებს იმაზე, რომ უსახლკარობა გაცილებით უფრო ფართო ცნებაა, ვიდრე ქუჩაში ცხოვრება და, სხვა მრავალ ფორმასთან ერთად, გულისხმობს საცხოვრისის სერვისებში, სხვადასხვა დანიშნულების მქონე ინსტიტუციებში, არასათანადო და გადატვირთულ საცხოვრისებში ცხოვრებას“. სრულად... წყარო: socialjustice.org.ge

თბილისი. საქართველოს სახალხო დამცველმა სპეციალური ანგარიში: „დისკრიმინაციის წინააღმდეგ ბრძოლის, მისი თავიდან აცილებისა და თანასწორობის მდგომარეობის შესახებ“ გამოაქვეყნა.  „ანგარიში მიმოიხილავს 2021 წლის განმავლობაში თანასწორობის უფლების რეალიზაციის მხრივ არსებულ დაბრკოლებებს, რომელსაც ქალები, შეზღუდული შესაძლებლობის მქონე პირები, რელიგიური და ეთნიკური უმცირესობების წარმომადგენლები, ლგბტ+ თემის წევრები და სხვა დაუცველი ჯგუფები აწყდებოდნენ. მასში ასევე შეფასებულია ახალი კორონავირუსის თავიდან აცილების მიზნით დაწესებული რეგულაციების თანასწორობის უფლებასთან შესაბამისობა; სოციალური დაცვის სისტემის ხარვეზები თანასწორობის უფლების დაცვის მხრივ და წინასაარჩევნო პერიოდში პოლიტიკური მოსაზრების გამო სახელმწიფო სამსახურში შრომითი უფლებების დარღვევის შემთხვევები. ანგარიშს შესაბამისი უწყებების მიმართ შემუშავებული რეკომენდაციები ერთვის თან“. სრულად... წყარო: ombudsman.ge

თბილისი. საქართველოს კოალიცია სისხლის სამართლის საერთაშორისო სასამართლოსთვის (GCICC) სოლიდარობას უცხადებს უკრაინელ ხალხს და გმობს რუსეთის ფედერაციის მიერ უკრაინის წინააღმდეგ განხორციელებულ აგრესიას. კოალიცია მოუწოდებს სისხლის სამართლის საერთაშორისო სასამართლოს და რომის სტატუტის ხელშემკვრელ სახელმწიფოებს, რომ შეასრულონ პირობა, რომელის მიხედვითაც გენოციდი, ომისა და კაცობრიობის წინააღმდეგ მიმართული დანაშაულები არასოდეს დარჩება დაუსჯელი. „მოვუწოდებთ სისხლის სამართლის საერთაშორისო სასამართლოს: დაიწყოს გამოძიება უკრაინის სიტუაციაზე, რომელთან დაკავშირებითაც, უკვე 8 წელია მიმდინარეობს წინასაგამოძიებო ეტაპი. მიიღოს კონკრეტული ზომები, რათა გასამართლდნენ ის პირები, რომლებმაც რუსეთ-საქართველოს ომში ჩაიდინეს უმძიმესი დანაშაულები“. სრულად... წყარო: gyla.ge

თბილისი. ადამიანის უფლებათა ცენტრმა გამოაქვეყნა ანგარიში: „კონფლიქტით დაზარალებული ეთნიკურად ოსი მოქალაქეების ქონებრივი რესტიტუციის და მოქალაქეობის დაბრუნების პროცესის სამართლებრივი ანალიზი“. „წინამდებარე ანგარიშში გამოკვეთილია ორი მნიშვნელოვანი პრობლემა, რაც უკავშირდება ეთნიკურად ოსი პირებისთვის საქართველოს მოქალაქეობის მინიჭების პროცესს და საქართველოს პარლამენტის მიერ 2006 წელს მიღებული კანონის - „ყოფილ სამხრეთ ოსეთის ავტონომიურ ოლქში კონფლიქტის შედეგად საქართველოს ტერიტორიაზე დაზარალებულთა ქონებრივი რესტიტუციისა და კომპენსაციის შესახებ“ აღუსრულებლობას“. ანგარიში... წყარო: hrc.ge

თბილისი. სოციალური სამართლიანობის ცენტრი წარმოგიდგენთ პოდკასტების ციკლს „დაკარგული ხმები“. ამ პოდკასტებში ორგანიზაცია გთავაზობთ იმ სოციალური ჯგუფებისა და ადამიანთა ისტორიებს, რომელთა ხმები საზოგადოებას სუსტად, ან საერთოდ არ ესმის. „დღევანდელი პოდკასტი ტრანსგენდერ ქალებს ეხება. ჩვენი სტუმარია ლიკა, ტრანსგენდერი ქალი, რომლის სახელი და ხმაც, ანონიმურობის დაცვის მიზნით, შეცვლილია. ვიმედოვნებთ, რომ ამ და მომდევნო პოდკასტებში გაჟღერებული ხმები და ისტორიები ერთი მხრივ, ადამიანებისთვის საკუთარი პრობლემებისა და წუხილების გაზიარების, მეორე მხრივ კი პოლიტიკის ცვლილებების ხელშემწყობი გახდება“. სრულად... წყარო: socialjustice.org.ge

თბილისი. 22 თებერვალს საქართველოს სახალხო დამცველი ნინო ლომჯარია საქართველოში ოფიციალური ვიზიტით მყოფ ევროპის საბჭოს ადამიანის უფლებათა კომისარს დუნია მიატოვიჩს შეხვდა.  ომბუდსმენმა დუნია მიატოვიჩს ინფორმაცია მიაწოდა გამოხატვის თავისუფლების შესახებ, ისაუბრა მედია თავისუფლების ხარისხზე, ჟურნალისტთა და უფლებადამცველთა წინააღმდეგ ბოლო პერიოდში ჩადენილ დანაშაულებებსა და მათ არასათანადო გამოძიებაზე და ზოგადად, მართლმსაჯულების ხარვეზებზე ქვეყანაში. სრულად... წყარო: ombudsman.ge

თბილისი. საქართველოს ახალგაზრდა იურისტთა ასოციაციის (საია) ინფორმაციით, ეკატერინე კიკნაძემ თეა წულუკიანისა და მუზეუმის დირექტორატის წინააღმდეგ სახალხო დამცველს დისკრიმინაციის დადგენის თაობაზე მიმართა.  კულტურის, სპორტისა და ახალგაზრდობის მინისტრად თეა წულუკიანის დანიშვნის შემდეგ სამინისტროს დაქვემდებარებულ დაწესებულებებში რეორგანიზაცია და მასშტაბური ცვლილებები დაიწყო. კიკნაძე ჯერ მუზეუმის მმართველის პოზიციიდან ლაბორანტის პოზიციაზე მისი თანხმობის გარეშე გადაიყვანეს, შემდეგ კი საერთოდ გაათავისუფლეს სამსახურიდან. ეკატერინე კიკნაძის ინტერესებს თბილისის საქალაქო სასამართლოსა და სახალხო დამცველის აპარატში საია წარმოადგენს. სრულად... წყარო: ორგანიზაციის გვერდი სოციალურ ქსელში

ევროკომისიის მხარდაჭერით „უფლებები საქართველო“ რაჭა-ლეჩხუმში, ზემო იმერეთსა და კახეთში სამართლებრივი დახმარების ცენტრებს გახსნის. ცენტრები გაიხსნება პროექტის „გენდერულ და ოჯახში ძალადობაგადატანილთა მიმართ დახმარებაზე ხელმისაწვდომობის უზრუნველყოფა“ ფარგლებში. სრულად... წყარო: ორგანიზაციის გვერდი სოციალურ ქსელში

თბილისი. სახალხო დამცველმა წინადადებით მიმართა საქართველოს პარლამენტს, რათა კანონმდებლობაში განხორციელდეს ცვლილება და პატიმრობაში მყოფ ბრალდებულებს, სატელეფონო საუბრის შეზღუდვის პერიოდშიც, სრულად შეეძლოთ ადვოკატებთან დარეკვა. ომბუდსმენის შეფასებით, ცვლილება აუცილებელია ბრალდებულთა ეფექტიანი დაცვის უფლების უზრუნველსაყოფად. სრულად... წყარო: ombudsman.ge

თბილისი. სოციალური სამართლიანობის ცენტრის ინფორმაციით, ორგანიზაციამ წარმატებით დასრულდა 2019 წელს გათავისუფლებული 18 სოციალური მუშაკის საქმე. „2019 წელს სამსახურიდან გათავისუფლებული 33 სოციალური მუშაკიდან, 8 გათავისუფლებულის უფლებებს სოციალური სამართლიანობის ცენტრი იცავდა, 7-ს სოლიდარობის ქსელი, 8-ს კი ახალგაზრდა იურისტთა ასოციაცია. მოსარჩელეთა მოთხოვნები სრულად დააკმაყოფილეს – ბათილად ცნეს სამსახურიდან გათავისუფლების ბრძანებები და „სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს“ როგორც სოციალური მუშაკების სამსახურში აღდგენა, ისე მათთვის იძულებითი განაცდურის სრულად ანაზღაურება დაავალეს“, ნათქვამია ორგანიზაციის ვებგვერდზე.  განცხადება ვრცლად ნახეთ... წყარო: socialjustice.org.ge

თბილისი. ორგანიზაციამ „პარტნიორობა ადამიანის უფლებებისთვის (PHR) საქართველოში პირველი საქმე მოიგო სპორტში ქალების, მათ შორის არასრულწლოვანი გოგოების მიმართ სექსუალურ შევიწროებაზე. ორგანიზაციის ინფორმაციით, შევიწროებას კაცი მწვრთნელი ახორციელებდა. „მოსამართლემ სრულად დააკმაყოფილა მორალური ზიანის მოთხოვნაც. ეს გადაწყვეტილება დასაწყისია საქართველოში ათლეტი ქალებისთვის უსაფრთხო გარემოს შესაქმნელად“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. UNDP-ისა და OHCHR-ის ხელშეწყობით, საქართველოს შინაგან საქმეთა სამინისტროსთვის გაიმართა ორდღიანი ტრენერთა ტრენინგი შეზღუდული შესაძლებლობის მქონე პირთა უფლებების დაცვის შესახებ. სრულად... წყარო: ორგანიზაციის გვერდი სოციალურ ქსელში

თბილისი. საქართველოს სტრატეგიული კვლევებისა და განვითარების ცენტრის (CSRDG) ინფორმაციით, უფლებებზე დაფუძნებული სოციალური მომსახურების ხარისხის მართვისთვის საჭირო დოკუმენტები შეზღუდული შესაძლებლობის მქონე ბავშვთა დღის ცენტრისთვის უკვე ხელმისაწვდომია. CSRDG ექსპერტებთან, პარტნიორ, და გრანტის მიმღებ ორგანიზაციებთან ერთად, ევროკავშირის მხარდაჭერით, ნაბიჯ-ნაბიჯ ქმნის უფლებებზე დაფუძნებული მომსახურების განვითარებისთვის საჭირო ღია საინფორმაციო-ექსპერტულ ბაზას, რომლის გამოყენება შეუძლია ნებისმიერ სოციალური მომსახურების მიმწოდებელ ორგანიზაციას. სრულად... წყარო: www.csrdg.ge

თბილისი. სოციალური სამართლიანობის ცენტრი აქვეყნებს ტიგრან თარზიანის ბლოგპოსტს: „1+4“ ერთ-ერთი წარმატებული სახელმწიფო პროგრამაა. ავტორი ბლოგპოსტში ცდილობს გაანალიზოს, რაში მდგომარეობს ამ პროგრამის უთანასწორობა და რატომაა ის დისკრიმინაციული? სრულად... წყარო: socialjustice.org.ge

თბილისი. ინფორმაციის თავისუფლების განვითარების ინსტიტუტისა (IDFI) და სახელმწიფო ინსპექტორის სამსახურის ერთობლივი პროექტის „პერსონალური მონაცემების დაცვის მხარდაჭერა საქართველოში“ ფარგლებში, სახელმწიფო ინსპექტორის სამსახურის თანამშრომლების ტრენინგი ჩატარდა. ტრენინგი შეეხებოდა ადამიანის უფლებათა ევროპული სასამართლოს და ევროკავშირის მართლმსაჯულების სასამართლოს პრაქტიკას პერსონალურ მონაცემთა დაცვის საკითხებზე. ვრცლად... წყარო: idfi.ge

აჭარა. საქართველოს ახალგაზრდა იურისტთა ასოციაციის (საია) აჭარის ფილიალმა წარმატებით დაიცვა „საქართველოს ფოსტის“ ბათუმის სერვისცენტრიდან გათავისუფლებული 9 პირის შრომითი უფლებები და დამსაქმებელს მათ სასარგებლოდ კომპენსაციის გადახდა დაეკისრა. სრულად... წყარო: gyla.ge

სამეგრელო. სამართლიანი არჩევნებისა და დემოკრატიის საერთაშორისო საზოგადოების (ISFED) ინფორმაციით, სენაკის რაიონულმა სასამართლომ დააკმაყოფილა ორგანიზაციის დაცვის ქვეშ მყოფი, მერის ყოფილი წარმომადგენლის ასისტენტის გ.მ-ს სარჩელი. „სენაკის მუნიციპალიტეტის მერიას მისი სამსახურში აღდგენა და განაცდურის სრულად ანაზღაურების ვალდებულება დააკისრა. მერის გადაწყვეტილებით გ.მ, მერის წარმომადგენლის ასისტენტის პოზიციიდან პოლიტიკური ნიშნით გათავისუფლდა“. სრულად... წყარო: ორგანიზაციის გვერდი სოციალურ ქსელში

თბილისი. საერთაშორისო გამჭვირვალობა - საქართველო თეა წულუკიანის მმართველობის დროს გათავისუფლებული 18 თანამშრომლის ინტერესებს იცავს. „უკანონო გათავისუფლების გამო ბიუჯეტმა 332 172 ლარი იზარალა“. სრულად... წყარო: ორგანიზაციის გვერდი სოციალურ ქსელში

თბილისი. სამართლიანი არჩევნებისა და დემოკრატიის საერთაშორისო საზოგადოებამ (ISFED) საქპატენტის“ გათავისუფლებული თავმჯდომარის საქმესთან დაკავშირებით სასამართლოს მეგობრის პოზიცია წარადგინა. ორგანიზაციის შეფასებით, მინდია დავითაძის გათავისუფლების საქმეში პოლიტიკური ნიშნით დისკრიმინაციის ელემენტები იკვეთება. „მოსაზრებაში განხილულია ის ძირითადი ფაქტობრივი და სამართლებრივი ასპექტები, რაც ვფიქრობთ, ხელს შეუწყობს სასამართლოს მიერ საკითხის სამართლიანად და სათანადო სტანდარტების დაცვით გადაწყვეტას“. სრულად... წყარო: isfed.ge

შიდა ქართლი. ომბუდსმენმა გორის მუნიციპალიტეტის ტრანსპორტის სააგენტოს რეკომენდაციით მიმართა და შრომითსამართლებრივ ურთიერთობაში პოლიტიკური შეხედულების ნიშნით დისკრიმინაციის აღმოფხვრა მოითხოვა. „განმცხადებელი აგვისტოს დასაწყისში ხელშეკრულების ვადის გასვლის გამო გაათავისუფლეს თანამდებობიდან. მისი მტკიცებით, ხელშეკრულების ვადის გაგრძელებაზე უარის მიზეზი მისი ძმის ყოფილ პრემიერ-მინისტრ გიორგი გახარიას პარტიასთან „საქართველოსთვის“ მჭიდრო კავშირით იყო განპირობებული“. სახალხო დამცველმა მოუწოდა სააგენტოს, სამსახურში აღდგინოს განმცხადებელი და მომავალში არ დაუშვას შრომით ურთიერთობაში პოლიტიკური მოსაზრების ან/და სხვა ნიშნით დისკრიმინაციული მოპყრობა და საქმიანობა წარმართოს თანასწორობის პრინციპის დაცვით. სრულად... წყარო: ombudsman.ge

სამეგრელო. ომბუდსმენმა ზუგდიდის მუნიციპალიტეტის მოსწავლე-ახალგაზრდობის სასახლეს შრომითსამართლებრივ ურთიერთობაში პოლიტიკური შეხედულების ნიშნით დისკრიმინაციის აღმოფხვრის შესახებ რეკომენდაციით მიმართა. „მოსწავლე-ახალგაზრდობის სასახლის ადმინისტრატორ-კოორდინატორი თანამდებობიდან ეპიდემიოლოგიური ვითარების გაუარესების გამო გაათავისუფლეს; მოპასუხე მხარის განმარტებით, მუშაობის დისტანციურ რეჟიმზე გადასვლა შეუძლებელს ხდიდა, რომ განმცხადებელს მასზე დაკისრებული ვალდებულებები შეესრულებინა. განმცხადებელი კი მიუთითებდა, რომ შრომითი ხელშეკრულების ვადაზე ადრე შეწყვეტა განპირობებული იყო მისი პოლიტიკური აქტივობით პარტიაში „საქართველოსთვის“ და რომ დამსაქმებელმა ვადაზე ადრე ხელშეკრულება მხოლოდ მასთან შეწყვიტა“. სრულად... წყარო: ombudsman.ge