თბილისი. სოციალური სამართლიანობის ცენტრი ეხმაურება გავრცელებულ კადრებს, სადაც ნათლად ჩანს პოლიციის მხრიდან მოქალაქეზე ძალადობის, ღირსების შელახვისა და დამცირების ფაქტები.  „განსაკუთრებით საგანგაშოდ მიგვაჩნია, რომ ბოლო დროს პოლიციის მხრიდან ძალის აშკარა გადამეტების ერთეულ შემთხვევასთან არ გვაქვს საქმე. გავრცელებულ კადრებში საზოგადოებამ იხილა სამართალდამცავი უწყების მხრიდან გამოვლენილი ფიზიკური ძალადობა, რომლის წინაშეც მხედველობის და სმენის შეფერხების მქონე ადამიანი დაუცველი და ღირსებაშელახული იყო. განსაკუთრებით შემაშფოთებელია, თუ როგორ უგულებელყოფს პოლიცია ზრუნვისა და მხარდაჭერის მოვალეობას და ამის ნაცვლად, ჩვენი საზოგადოების ყველაზე დაუცველი ნაწილის ჩაგვრის და საგულდაგულო დასჯის პრაქტიკას ეწევა“. სრულად... წყარო: socialjustice.org.ge

თბილისი. პარტნიორობა ადამიანის უფლებების (PHR) ინფორმაციით, 22 იანვარს მედიაში გავრცელდა ნელი დოროყაშვილისა და ნიკოლოზ ბასილაშვილის საუბრის ჩანაწერები, რაც წარმოადგენს მტკიცებულებებს სისხლის სამართლის საქმეში. აღნიშნული ჩანაწერები აგრეთვე შეიცავს ინფორმაციას ბავშვის შესახებ. ორგანიზაციას მიუღებლად მიაჩნია აუდიო ჩანაწერების გასაჯაროება, რაც პირველ რიგში ზიანს აყენებს დაზარალებულების, განსაკუთრებით ბავშვის ინტერესებს და იწვევს მათ მეორეულ ვიქტიმიზაციას. „ჩვენთვის უცნობია ინფორმაციის გასაჯაროების პირველადი წყარო, შესაბამისად, მოვუწოდებთ ინფორმაციის შენახვაზე პასუხისმგებელ ყველა პირს, ასევე მედიას, თავი შეიკავონ პირადი ცხოვრების ამსახველი ჩანაწერების გასაჯაროებისაგან და უზრუნველყონ აღნიშნული ჩანაწერების აღება საჯარო სივრციდან“. სრულად... წყარო: ორგანიზაციის გვერდი სოციალურ ქსელში

თბილისი. „უფლებები საქართველოს“ ინფორმაციით, ორგანიზაცია პერსონალურ მონაცემთა დაცვის სამსახურის უფროსის შესარჩევ საკონკურსო კომისიის საქმიანობაში ჩაერთო. „საკონკურსო კომისიაში „უფლებები საქართველოს“ მონაწილეობა მიზნად ისახავს პროცესის გამჭვირვალობის და საზოგადოების ინფორმირებულობის უზრუნველყოფას პერსონალურ მონაცემთა დაცვის სამსახურის უფროსის შერჩევის შესახებ. კომისიის საქმიანობის გამჭვირვალობა განსაკუთრებულ მნიშვნელობას იძენს იმ ფონზე, რომ პერსონალურ მონაცემთა დაცვის სამსახურის და მასთან ერთად, მეორე დამოუკიდებელი ორგანოს - სპეციალური საგამოძიებო სამსახურის შექმნის გადაწყვეტილება საქართველოს პარლამენტმა გასული წლის ბოლოს დაჩქარებულად, სამოქალაქო სექტორის, საერთაშორისო ორგანიზაციების და დიპლომატიური წარმომადგენლობების მწვავე კრიტიკის ფონზე მიიღო“. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციამ პარტნიორ ორგანიზაცია ადამიანის უფლებათა დაცვის ევროპულ ცენტრთან (EHRAC) ერთად ევროპის საბჭოს მინისტრთა კომიტეტს ცინცაბაძის ჯგუფის საქმეების აღსრულებასთან დაკავშირებით წერილობითი მოსაზრებები წარუდგინა. სრულად... წყარო: gyla.ge

თბილისი. სოციალური სამართლიანობის ცენტრი ანალიტიკურ დოკუმენტში, მარნეულის მუნიციპალიტეტისა და აჭარის მაგალითზე, აღწერს ჯანდაცვის სფეროში არსებულ გამოწვევებსა და ბარიერებს, რომლებსაც რეგიონებში მცხოვრები ქალები ყოველდღიურად აწყდებიან. „შეიძლება რამე გტკიოდეს მაგრამ ითმენ იმის გამო, რომ ექიმთან მისვლით უფრო მეტი ხარჯებია. არ არის ჩვენთან ის სიტუაცია რომ ფული გქონდეს და [ექიმთან] გაიქცე საკუთარი თავისთვის … მართალია, ჯერ საკუთარი თავისთვის უნდა იზრუნო, მაგრამ უკან როცა ოჯახს ხედავ, [რომელსაც] არ აქ საშუალება ... თავს არ აძლევ უფლებას, რომ მიხვიდე და წინასწარ ჩაიტარო კვლევა საკუთარ თავზე". (რესპონდენტი მაღალმთიანი აჭარიდან) “სახელმწიფო ზოგადად პრევენციაში არ დებს რესურსს, და ეს ხელმიუწვდომელი რჩება მოსახლეობისთვის, იმდენად ძვირია ... სახელმწიფო დაფინანსება არის უკიდურესი ზომისთვის განკუთვნილი". (რესპონდენტი მარნეულის მუნიციპალიტეტიდან) „ვერ ვუმკლავდები [მედიკამენტების ყიდვას], რადგან მაქვს ფინანსური პრობლემები. ზოგჯერ დროულად ვერ ვყიდულობ მედიკამენტებს ან ნახევარს ვყიდულობ და ნაწილს ვერა“. (რესპონდენტი მარნეულის მუნიციპალიტეტიდან) სრულად... წყარო: socialjustice.org.ge

თბილისი. 25-27 იანვარს, საქართველოს სახალხო დამცველი ნინო ლომჯარია ოფიციალური ვიზიტით სტრასბურგში მიემგზავრება, სადაც მაღალი რანგის შეხვედრებს გამართავს. ომბუდსმენი ინფორმაციას მიაწვდის საქართველოში ადამიანის უფლებების მდგომარეობის შესახებ. ძირითადი აქცენტები გაკეთდება მართლმსაჯულების, მედია გარემოს, თანასწორობის და სხვა დემოკრატიულ პროცესებზე. სრულად... წყარო: ombudsman.ge

თბილისი. საქართველოს სოციალურ მუშაკთა ასოციაცია თანადგომას უცხადებს კოლეგას, თამარ საუთიევას, რომელიც სანატორიუმ „ქართლის“ მაცხოვრებელია. „სოციალური მუშაკებისთვის კარგად ცნობილია, თუ რა პრობლემების და რთული მდგომარეობის წინაშე დგანან იძულებით გადაადგილებული პირები, შეიარაღებული კონფლიქტით დაზარალებული პირები. დღეს ადამიანები ელემენტარული საჭიროების, უსაფრთხო გარემოს, საცხოვრებლის უსაფრთხოებისთვის იბრძვიან. აქვე გვინდა მივუსამძიმროთ გარდაცვლილი პირის ოჯახის წევრებს. იმედს ვიტოვებთ, სანატირიუმ „ქართლში“ მაცხოვრებლების მოთხოვნები სულ მალე დაკმაყოფილდება და საშუალება ექნებათ, უსაფრთხო გარემოში განაგრძონ ცხოვრება“. სრულად... წყარო: ასოციაციის გვერდი სოციალურ ქსელში

თბილისი. სახალხო დამცველმა სქესის ნიშნით დისკრიმინაციის საქმის ფარგლებში რეკომენდაციით მიმართა საქართველოს ფეხბურთის ფედერაციას (სფფ-ს). „ომბუდსმენმა დისკრიმინაციად მიიჩნია ის გარემოება, რომ სფფ-ს რეგულაციებში არ არის გათვალისწინებული ქალების სპეციალური საჭიროებები რეპროდუქციული ჯანმრთელობის მიმართულებით.  სახალხო დამცველმა საქართველოს ფეხბურთის ფედერაციას მოუწოდა, რომ ქალი ფეხბურთელების სექსუალური და რეპროდუქციული უფლების, ასევე შრომის უფლების დაცვის მიზნით, შემოიღოს რეგულაციები, რომელთა დარღვევისას გამოიყენებს მის ხელთ არსებულ სპორტულ სანქციებს. გარდა ამისა, საჭიროების შემთხვევაში, მიიღოს სახელმძღვანელო დოკუმენტები და გაატაროს სხვა ღონისძიებები“. სრულად... წყარო: ombudsman.ge

თბილისი. სოციალური სამართლიანობის ცენტრის ინფორმაციით, საინიციატივო ჯგუფი „ხელოვნების მუზეუმისთვის“ კულტურის სფეროში განხორციელებული წმენდის გასაპროტესტებლად, კულტურის სამინისტროსთან აქციას მართავს. „კულტურის, სპორტისა და ახალგაზრდობის მინისტრად თეა წულუკიანის დანიშვნის შემდეგ კულტურის სამინისტროს დაქვემდებარებულ დაწესებულებებში რეორგანიზაცია და მასშტაბური საშტატო ცვლილებები დაიწყო, რამაც საბოლოოდ საკადრო წმენდის სახე მიიღო. მიგვაჩნია, რომ კულტურის სამინისტრო ახორციელებს საკადრო წმენდას განსხვავებული მოსაზრებების გამო. Რეორგანიზაციის ფარგლებში დასაქმებულები ფასდებიან არა კვალიფიკაციისა და პროფესიონალიზმის, არამედ მათი განსხვავებული მოსაზრებების, საჯარო პოზიციებისა და პოლიტიკური შეხედულებების საფუძველზე, რაც ცალსახად წარმოადგენს საერთაშორისო სტანდარტებითა და საქართველოს კანონმდებლობით დადგენილი შრომითი უფლებების უხეშ დარღვევას“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. საერთაშორისო გამჭვირვალობა - საქართველოს ინფორმაციით, თვითმმართველობის არჩევნების შემდგომ პერიოდში ვრცელდება ცნობები ადგილობრივი საჯარო სამსახურებიდან თანამშრომელთა გათავისუფლების შესახებ. თუ თვლით, რომ თქვენი უფლებები ირღვევა, უკანონოდ გაგათავისუფლეს საჯარო სამსახურიდან, იურიდიული დახმარებისთვის მიმართეთ ორგანიზაციას.  სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი იპოდრომზე უკანონო სამუშაოების აღსაკვეთად სასამართლოს მიმართავს. „უკვე, ერთ წელზე მეტია, იპოდრომზე უკანონო სამშენებლო სამუშაოები მიმდინარეობს. ამ დრომდე არ არსებობს პარკის დეტალური პროექტი და მერიის არქიტექტურის სამსახურის თანხმობა მის შესახებ. სოციალური სამართლიანობის ცენტრი თბილისის საქალაქო სასამართლოს უკანონო მშენებლობის შეჩერების მოთხოვნით მიმართავს“. განცხადება სრულად... წყარო: socialjustice.org.ge

თბილისი. საქართველოს ახალგაზრდა იურისტთა ასოციაციის (საია) ინფორმაციით, ევროპულმა სასამართლომ პოლიციელების მიერ სავარაუდო ფსიქოლოგიური და ფიზიკური ძალადობის გამო თვითმკვლელობამდე მიყვანის საქმეზე დარღვევა დაადგინა. „საია ევროპულ სასამართლოში აწარმოებდა მამუკა მიქაუტაძის საქმეს, რომელმაც შსს-ში გამოკითხვიდან მეორე დღეს თბილისის ზღვაზე თავი მოიკლა. ნარკოტიკულ დანაშაულთან მიმართებით გამოძიების ფარგლებში მამუკა მიქაუტაძე 2013 წლის 5 ივლისს გამოკითხეს, რა დროსაც მის მიმართ სავარაუდოდ გამოყენებულ იქნა ფიზიკური და ფსიქოლოგიური ძალადობა“. სრულად... წყარო: gyla.ge

თბილისი. სამოქალაქო საზოგადოების ორგანიზაციების ნაწილი ეხმიანება სანატორიუმ „ქართლის“ შენობაში მცხოვრები დევნილების პროტესტს და 16 იანვარს ადგილზე მომხდარ უმძიმეს ტრაგედიას.  „მოვუწოდებთ საქართველოს ხელისუფლებას სწრაფი რეაგირებისკენ, დევნილების უსაფრთხო და ღირსეულ პირობებში განსახლების უზრუნველსაყოფად. მიგვაჩნია, რომ სახელმწიფომ უგულებელყო საფრთხის შემცველ გარემოში დევნილთა სიცოცხლისა და ჯანმრთელობის დაცვის ვალდებულება და 16 იანვარს ადგილზე მომხდარი ტრაგედია სწორედ უმოქმედობის და უნდობლობის პოლიტიკის შედეგია“. სრულად... წყარო: socialjustice.org.ge

თბილისი. საქართველოს სახალხო დამცველი სანატორიუმ „ქართლში“ ჩასახლებულ დევნილებს შეხვდა და ადგილზე მოისმინა მათი პრობლემების შესახებ. „ომბუდსმენი მიიჩნევს, რომ ვინაიდან, ობიექტი სახიფათოა საცხოვრებლად, მათ შორის შენობაში ცხოვრობენ არასრულწლოვნებიც, მნიშვნელოვანია სახელმწიფომ აწარმოოს შედეგზე ორიენტირებული მოლაპარაკებები დევნილ ოჯახებთან, მოისმინოს საცხოვრებლის მოძიების პროცესში არსებული დაბრკოლებებისა და ქირის სარგებლობის შემთხვევაში შეწყვეტის თაობაზე გამოთქმული წუხილების შესახებ, პრევენციულად მოახდინოს რეაგირება შესაძლო რისკებზე, რათა უმოკლეს ვადებში შესაძლებელი გახდეს დევნილი ოჯახების უსაფრთხო ადგილას განსახლება“. სრულად... წყარო: ორგანიზაციის გვერდი სოციალურ ქსელში

თბილისი. „სამართლიანი არჩევნებისა და დემოკრატიის საერთაშორისო საზოგადოების“ (ISFED) ინფორმაციით, ახალციხის რაიონულმა სასამართლომ, ორგანიზაციის დაცვის ქვეშ მყოფი საკრებულოს აპარატის ყოფილი უფროსის სარჩელი დააკმაყოფილა, სამსახურში აღადგინა და ახალციხის მუნიციპალიტეტის საკრებულოს მისთვის განაცდურის სრულად ანაზღაურების ვალდებულება დააკისრა.  სრულად... წყარო: isfed.ge

თბილისი. სახალხო დამცველი მწუხარებას გამოთქვამს თბილისში, ზღვის უბნის დასახლებაში, ყოფილი სანატორიუმ „ქართლის“ შენობაში მცხოვრები დევნილი მამაკაცის თვითმკვლელობის გამო და სამძიმარს უცხადებს გარდაცვლილის ოჯახის წევრებსა და ახლობლებს. „სახალხო დამცველმა ჯერ კიდევ გასულ წლებში შეისწავლა ყოფილი სანატორიუმი „ქართლის“ შენობაში მცხოვრები დევნილების უფლებრივი მდგომარეობა და დაადგინა, რომ სსიპ დევნილთა, ეკომიგრანტთა და საარსებო წყაროებით უზრუნველყოფის სააგენტო დაუსაბუთებლად აცხადებდა უარს შენობის ტექნიკური მდგრადობის შემოწმებაზე (შესაბამისი ექსპერტიზის ჩატარებაზე). შედეგად, სახალხო დამცველმა 2020 წლის 21 დეკემბერს რეკომენდაციით მიმართა სააგენტოს და შენობის ტექნიკური მდგრადობის შემოწმება მოითხოვა. არსებული საექსპერტო დასკვნით დასტურდება შენობაში სიცოცხლისა და ჯანმრთელობისათვის მომეტებული საფრთხის შემცველი გარემოს არსებობა“. სრულად... წყარო: ombudsman.ge

თბილისი. პარტნიორობა ადამიანის უფლებებისთვის (PHR) აქვეყნებს ინფოგრაფიკას: ბავშვის უფლება ღირსეულ საცხოვრისზე. „განვითარებად ქვეყნებში სამიდან ერთი ბავშვი არ ცხოვრობს ადეკვატურ პირობებში. იძულებით გამოსახლება ბავშვების განვითარებაზე შეიარაღებული კონფლიქტით გამოწვეულ გავლენას უტოლდება“. სრულად... წყარო: ორგანიზაციის გვერდი სოციალურ ქსელში

სამეგრელო. საქართველოს ახალგაზრდა იურისტთა ასოციაციის ზუგდიდის ოფისის იურისტების დახმარებით, საჯარო მოხელე სამსახურში აღდგა. „საჯარო მოხელე სასამართლოში ამტკიცებდა, რომ მისი გათავისუფლება უკანონოდ მოხდა. შესაბამისად, მოითხოვდა სამსახურიდან გათავისუფლების შესახებ სენაკის მუნიციპალიტეტის მერის ბრძანების ბათილად ცნობას, სამსახურში აღდგენას და იძულებითი განაცდურის ანაზღაურებას. სენაკის რაიონულმა სასამართლომ დააკმაყოფილა სარჩელი და საჯარო მოხელე სამსახურში აღადგინა. მას ასევე აუნაზღაურდება განაცდური ხელფასი“. სრულად... წყარო: gyla.ge

თბილისი. „საერთაშორისო გამჭვირვალობა - საქართველოს“ იურისტების დახმარებით, აბესალომ ყორშიამ ანაკლიაში 5 000 კვ.მ სასოფლო - სამეურნეო დანიშნულების მიწის ნაკვეთი დაირეგისტრირა.  სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრის ინფორმაციით, მთელი ქვეყნის მასშტაბით, 390-მდე სოციალურმა აგენტმა გაფიცვა გადაწყვიტა. „დასაქმებულთა მოთხოვნები, გაწეული სამუშაოს ტარიფებისა და სამგზავრო ხარჯის ანაზღაურების გაზრდას უკავშირდება. ამასთან, კოლექტიური დავის მონაწილენი დეკრეტული შვებულების სრულყოფილ ანაზღაურებას, ჯანმრთელობის დაზღვევასა, ჯანმრთელობის მდგომარეობის გამო საავადმყოფო ფურცელზე (ბიულეტენზე) არსებობისას სამუშაო ანაზღაურების შენარჩუნებას და პროფესიულ კავშირთან კოლექტიური ხელშეკრულების დადებას მოითხოვენ. ღირსეული შრომის პლატფორმა სოლიდარობას უცხადებს სოციალური სააგენტოს 390-მდე თანამშრომლის საგაფიცვო მოთხოვნებს“. სრულად... წყარო: socialjustice.org.ge

თბილისი. გაერთიანებული ერების ორგანიზაცია (UN Georgia) შეშფოთებულია საქართველოს მთავრობის გადაწყვეტილებით სახელმწიფო ინსპექტორის სამსახურის გაუქმების შესახებ. „2022 წლის 13 იანვარს პრეზიდენტმა ხელი მოაწერა ახალ კანონს, რომლითაც უქმდება სახელმწიფო ინსპექტორის სამსახური და იქმნება ორი ცალკეული ინსტიტუტი: სპეციალური საგამოძიებო სამსახური და პერსონალურ მონაცემთა დაცვის სამსახური. განსაკუთრებით შეშფოთებულნი ვართ, რომ გადაწყვეტილება საქართველოში ერთ-ერთი ყველაზე სანდო, დამოუკიდებელი და ავტორიტეტული ინსტიტუტის, რომელიც უფლებამოსილია გამოიძიოს სამართალდამცავი ორგანოების მიერ ჩადენილი ადამიანის უფლებათა სავარაუდო დარღვევები და უზრუნველყოს პერსონალური მონაცემების დაცვის ზედამხედველობა, მიღებულ იქნა დაჩქარებული წესით და ინკლუზიური და გამჭვირვალე დისკუსიების გამართვის გარეშე. სახელმწიფო ინსპექტორის სამსახურის გაუქმების შესაბამისი საფუძვლისა და სახელმწიფო ინსპექტორისთვის ექვსწლიანი მანდატის ჩამორთმევის აუცილებლობის დამაჯერებელი დასაბუთების არარსებობა შემაშინებელი გზავნილია ადამიანის უფლებათა დამცველ დამოუკიდებელ ინსტიტუტების მიმართ. მოვუწოდებთ ხელისუფლებას, გამოითხოვოს შესაბამისი საერთაშორისო ინსტიტუტების მოსაზრება ამ გადაწყვეტილებების საერთაშორისო სტანდარტებთან თანხვედრის შესახებ“, ნათქვამია განცხადებაში. სრულად... წყარო: georgia.un.org

თბილისი. საერთაშორისო გამჭვირვალობა - საქართველო ეხმაურება 12 იანვარს, თბილისის საქალაქო სასამართლოს მიერ მამუკა ხაზარაძის, ბადრი ჯაფარიძისა და ავთანდილ წერეთლის სისხლის სამართლის საქმეზე გამოტანილ განაჩენს. „სასამართლომ დაადგინა, რომ არ არსებობდა ფულის გათეთრების დანაშაულის ნიშნები და ქმედება თაღლითობად გადააკვალიფიცირა. დღეს, ქართული საზოგადოება კიდევ ერთხელ გახდა პოლიტიკური მართლმსაჯულების განხორციელების მომსწრე. მიუხედავად იმისა, რომ შედეგად პოლიტიკური გაერთიანება „ლელოს” ლიდერებისა და კრიტიკული მედია არხის „ტვ პირველის” დამფუძვნებლის ოჯახის წევრის თავისუფლების აღკვეთა არ დადგა, სასამართლოს გადაწყვეტილებაში იკვეთებოდა პოლიტიკური მოტივი და მათ მიადგათ სერიოზული რეპუტაციული ზიანი. მხარეთა მიერ განაჩენის გასაჩივრების შემთხვევაში, „საერთაშორისო გამჭვირვალობა - საქართველო” გააგრძელებს ამ საქმის მონიტორინგს ზემდგომი ინსტანციის სასამართლოებში“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში