თბილისი. გავრცელებული ინფორმაციით, სამირა ბაირამოვას „ალტ ინფოს“ მხარდამჭერი მოკვლით ემუქრება - შსს-მ გამოძიება მუქარის მუხლით დაიწყო. საქართველოს ახალგაზრდა იურისტთა ასოციაცია (საია) სამირა ბაირამოვას ინტერესებს დაიცავს მის მიმართ განხორციელებული მუქარისა და ადმინისტრაციული სამართალდარღვევის საქმეებზე. სრულად... წყარო: ორგანიზაციის გვერდი სოციალურ ქსელში ფოტო: marneulifm.ge

თბილისი. ადამიანის უფლებათა ცენტრი 2021-2022 წლის ნოემბერი-თებერვლის წარმატებული საქმეების შესახებ ბლოგპოსტს აქვეყნებს. სრულად... წყარო: www.hrc.ge

ქვემო ქართლი. 14-15 მარტს, ქვემო ქართლის მუნიციპალიტეტებში - გარდაბანსა და დმანისში ჩატარდა 5 ტრენინგი „იყავი მის ადგილას“. „ტრენინგების მიზანი იმ მავნე გენდერული სტერეოტიპების, სოციალური ნორმებისა და დამოკიდებულებების ცვლილებაა, რომლებიც ხშირად ქალთა მიმართ ძალადობის გამოწვევია ან ამართლებს ასეთ ქცევას“. სრულად... წყარო: ორგანიზაციის გვერდი სოციალურ ქსელში

თბილისი. საჯარო რეესტრის ეროვნულ სააგენტოსა და გაეროს ქალთა ორგანიზაციას შორის ურთიერთთანამშრომლობის მემორანდუმი გაფორმდა. „გაეროს ქალთა ორგანიზაცია და საქართველოს იუსტიციის სამინისტროს საჯარო რეესტრის ეროვნული სააგენტო გენდერული თანასწორობისა და ქალთა გაძლიერების მიმართულებით ითანამშრომლებენ“. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციის დემოკრატიული ინსტიტუტების მხარდაჭერის პროგრამას ახალი დირექტორი ჰყავს. ნანუკა ყრუაშვილმა ამ პოზიციაზე საიას გამგეობის გადაწყვეტილებით, ვახუშტი მენაბდე ჩაანაცვლა. „ნანუკა გეგმავს დემოკრატიული ინსტიტუტების მხარდაჭერის პროგრამის გუნდთან ერთად აქტიურად გააგრძელოს მუშაობა საარჩევნო, მართლმსაჯულების, საჯარო მმართველობის, ადგილობრივი თვითმმართველობისა და საპარლამენტო კონტროლის საკითხებზე. ამასთან, მისი ამოცანაა ევროინტეგრაციის საკითხების წინ წამოწევა და ადვოკატირების გაძლიერება ადგილობრივ და საერთაშორისო პარტნიორებთან“.  სრულად... წყარო: ორგანიზაციის გვერდი სოციალურ ქსელში

თბილისი. 7-8 მარტს საქართველოს სახალხო დამცველის წარმომადგენლები იტალიის თავისუფლებააღკვეთილ პირთა უფლებების ეროვნული გარანტორის მოწვევით ქალაქ რომში იმყოფებოდნენ, სადაც შედგა ორმხრივი სამუშაო შეხვედრა იტალიის პრევენციის ეროვნულ მექანიზმთან და გაფორმდა შეთანხმება თანამშრომლობის თაობაზე. სრულად... წყარო: ombudsman.ge

თბილისი. სამოქალაქო საზოგადოების ორგანიზაციები საქართველოს ხელისუფლებას მოუწოდებენ უკრაინიდან ლტოლვილების ორგანიზებული მიღებისა და უკვე საქართველოში მყოფი ლტოლვილების რეალურ მხარდაჭერაზე მიმართული სისტემური პოლიტიკის ამუშავებისკენ. „უკრაინიდან ლტოლვილების შემოსვლის ტენდენცია ჩანს საქართველოშიც. ჩვენი დაკვირვებით, ომის დაწყების შემდეგ საქართველოში თავშესაფრის მოძიებას ძირითადად ის უკრაინელები ცდილობენ, ვისაც საქართველოსთან ნათესაური, საოჯახო ან სხვა მყარი კავშირები აქვთ. ამ რეალობის მიუხედავად, აშკარაა, რომ საქართველოს ხელისუფლებას არ მიუღია პროაქტიური ნაბიჯები ლტოლვილების უკრაინიდან ორგანიზებული გამოყვანისა და შემდგომში უკვე საქართველოში მათი სათანადო და რეალური მხარდაჭერის მიზნით. უფრო მეტიც, საქართველოში რჩება ათასობით უკრაინელი ტურისტი, რომელმაც უკრაინაში 2022 წლის 24 თებერვალს დაწყებული ომის გამო დაბრუნება ვერ მოახერხა და ისინი ასევე გადაუდებელი სოციალური მხარდაჭერის წინაშე დგანან“.  სრულად... წყარო: socialjustice.org.ge

თბილისი. საქართველოს სახალხო დამცველი და სახალხო დამცველთან არსებული ეროვნულ უმცირესობათა საბჭო განცხადებას ავცელებს. „რუსეთის ფედერაციის მხრიდან უკრაინის ტერიტორიაზე მიმდინარე მასშტაბური სამხედრო აგრესიის ფონზე საქართველოს მოსახლეობაში გარკვეული შიშები და კითხვები გაჩნდა რუსეთის ფედერაციის მოქალაქეების საქართველოში შემოსვლის მიზნობრიობასთან დაკავშირებით. მნიშვნელოვანია, რომ დისკუსია იყოს საზოგადოების ინფორმირებულობაზე და არა მხოლოდ ემოციებსა თუ შიშებზე დაფუძნებული, რადგან იგი მარტივად შეიძლება გადაიზარდოს სიძულვილის ენის ფართოდ გამოყენებასა და პირთა ეროვნული ნიშნით შევიწროებაში, რაც კატეგორიულად მიუღებელი და სახიფათო მოვლენაა. შესაბამისად, მივმართავთ საქართველოს ხელისუფლებისა და ოპოზიციის წარმომადგენლებს, პოლიტიკურ პარტიებს, მედიასაშუალებებს და ჩვენს თანამოქალაქეებს, სოციალური ქსელების მომხმარებლებს, ხელი შევუწყოთ საზოგადოებაში ინფორმირებული დისკურსის შექმნას და არ დავუშვათ ეთნიკური ნიშნით დისკრიმინაციის შემთხვევები“. სრულად... წყარო: ombudsman.ge

თბილისი. ბავშვთა ჰოსპისი „ციცინათელა“ ორშაბათიდან დღის ცენტრის მუშაობას ანახლებს. მომსახურება უფასოა. „რა ფუნქცია აქვს დღის ცენტრს და ვის შეუძლია სარგებლობა? - დღის ცენტრი მუშაობს ყოველ დღე და მასპინძლობს პალიატიური მზრუნველობის საჭიროების მქონე ბავშვებს; - ბავშვის ტარება შეგვიძლია ჩვენივე ადაპტირებული ავტომობილით; - დღის ცენტრში ხდება ბავშვის გართობა მისი ინტერესების შესაბამისად. ასევე, შეუძლია მიიღოს ფსიქოლოგის და სპეც პედაგოგის მომსახურება“.  სრულად... წყარო: ჰოსპისის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტის (IDFI) კვლევის მიხედვით, 2021 წელს სულ დარეგისტრირდა 56,343 დანაშაული, რაც 0.45%-ით ნაკლებია 2020 წლის მაჩვენებელზე.  „მიუხედავად დანაშაულის საერთო რაოდენობის მცირედით შემცირებისა, ცალკეული დანაშაულის შემთხვევებმა იმატა. მაგალითად: საფინანსო საქმიანობის სფეროს დანაშაულები (+275%); გაუპატიურება (+56%); 2020-2021 წლებში, დანაშაულის რიცხვის შემცირებაზე მნიშვნელოვანი გავლენა იქონია პანდემიასთან ბრძოლის ფარგლებში ქვეყანაში გამოცხადებულმა საგანგებო მდგომარეობამ და კომენდანტის საათმა“. სრულად... წყარო: idfi.ge

თბილისი. სახალხო დამცველი მოუწოდებს სპეციალურ პენიტენციურ სამსახურს დაუყოვნებლივ გადაიყვანონ მიხეილ სააკაშვილი აუცილებელი სამედიცინო გამოკვლევების ჩასატარებლად. „2022 წლის 9 მარტს სახალხო დამცველის რწმუნებულებმა განახორციელეს ვიზიტი N12 პენიტენციურ დაწესებულებაში, სადაც შეხვდნენ პატიმარ მიხეილ სააკაშვილს და გაესაუბრნენ სამედიცინო პერსონალს. ვიზიტმა ცხადყო, რომ აუცილებელია მიხეილ სააკაშვილისთვის რელევანტური გამოკვლევების შესაბამისი პროფილის კლინიკაში დაუყოვნებლივი ჩატარება და შემდგომი სამედიცინო მომსახურების მიწოდება“. სრულად... წყარო: ombudsman.ge

თბილისი. 8 მარტს, ანიკას დღის ცენტრის ახალგაზრდების მშობლებთან ჩატარდა ტრენინგი „შშმ პირთა სწორი მხარდაჭერა დამოუკიდებელი ცხოვრების უნარების განვითარებაში“. ტრენინგზე განიხილეს ის მიდგომები და ტექნიკები, რომლებიც საჭიროა შშმ პირების დამოუკიდებლობის ხარისხის გაზრდისათვის. ტრენინგი ინტერაქციული ხასიათის იყო. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრის ინფორმაციით, საქართველოში შესაძლოა, გამოსახლებების ახალი ტალღა დაიწყოს და ასობით ადამიანი უსახლკაროდ დარჩეს. „ამის თქმის საფუძველს 1 მარტს, იუსტიციის მინისტრის ბრძანებაში შესული ცვლილები გვაძლევს, რაც საცხოვრისიდან იძულებითი გამოსახლების საქმეებზე კვლავ ძველი, პანდემიამდელი, რეჟიმის განახლებასა და გამოსახლებების ახალი ტალღის დაწყებას ნიშნავდეს“. სრულად... წყარო: socialjustice.org.ge

თბილისი. საერთაშორისო გამჭვირვალობა - საქართველოს შეფასებით, უკრაინის მიმართ სოლიდარობის დემონსტრაციების ფონზე ხელისუფლებამ განაგრძო სამოქალაქო აქტივისტების მიმართ ადმინისტრაციული დაკავების შერჩევითად, არაპროპორციულად და დაუსაბუთებლად გამოყენების პრაქტიკა. „აღნიშნული მიუთითებს ხელისუფლების სურვილზე, რომ უსაფუძვლო დაკავებებით საზოგადოებამ თავი შეიკავოს პროტესტის თუ სოლიდარობის გამოხატვისა და შეკრებისა და მანიფესტაციის უფლებით სარგებლობისგან. მოვუწოდებთ ხელისუფლებას არ გასცდეს კონსტიტუციურ ჩარჩოებს, შეწყვიტოს სამოქალაქო აქტივისტების გამოხატვის თავისუფლების დაუსაბუთებელი, არაპროპორციული და თვითნებური შეზღუდვა“, ნათქვამია განცხადებაში. სრულად... წყარო: transparency.ge

თბილისი. „საფარის” ინფორმაციით, ორგანიზაციის იურისტმა, ცირა ჯგერენაიამ შავი ზღვის საერთაშორისო უნივერსიტის სამართლის ფაკულტეტის მიწვევით სტუდენტებისთვის საჯარო ლექცია ჩაატარა. ლექცია ეხებოდა ძალადობის ფორმებსა და მისგან თავდაცვის გზებს. „იურისტმა კონკრეტული მაგალითების საფუძველზე, დეტალურად განიხილა ფიზიკური, ფსიქოლოგიური და ეკონომიკური ძალადობის ფორმები და ამგვარი დანაშაულების გამოძების პრაქტიკა. გარდა ამისა, წარადგინა Safe You – აპლიკაცია, რომელიც ძალადობის საფრთხის ქვეშ მყოფი ქალების დასახმარებლად შეიქმნა“. სრულად... წყარო: sapari.ge

თბილისი. საქართველოს ახალგაზრდა იურისტთა ასოციაცია (საია) ქალთა უფლებების საერთაშორისო დღეს ეხმაურება და საქართველოში ქალთა უფლებრივი მდგომარეობის შესახებ ანგარიშს აქვეყნებს. „ყველა ქალისა და გოგონას უფლებაა იყოს დაცული ძალადობისა და დისკრიმინაციისაგან, თანასწორად ისარგებლოს სამოქალაქო/პოლიტიკური და ეკონომიკური უფლებებით. მიუხედავად კანონით გარანტირებული, ფუნდამენტალური უფლებებისა საქართველოში ბევრი ქალი და გოგონა კვლავ განიცდის ძალადობის და გენდერული უთანასწორობის სხვადასხვა ფორმას“. სრულად... წყარო: gyla.ge

თბილისი. სოციალური სამართლიანობის ცენტრი სოლიდარობას უცხადებს უკრაინელ ქალებს და რვა მარტს ულოცავს. „წლევანდელი 8 მარტის ჩვენი გამოხმაურება გვინდა უკრაინელ ქალებს მივუძღვნათ. ქალებს, რომლებიც უკვე მეცამეტე დღეა თავდაცვისთვის იბრძვიან, ან დევნილობაში უწევთ ყოფნა საკუთარი შვილებისა და ოჯახის წევრების სიცოცხლის გადასარჩენად. უმძიმესი რეალობის მიუხედავად უკრაინელი ხალხი და ქალები მათ ყოველდღიურობაში ბრძოლის, თვითორგანიზებისა და გამბედაობის უნიკალურ მაგალითებს ქმნიან. ჩვენმა ხალხმა კარგად იცის ომის ტრაგიკული რეალობა. ეთნიკური წმენდა, მკვლელობები, ტყვეობა, ასიათასობით (290 000-მდე) ადამიანის დევნილობა, უსახლკარობა - ბოლო 30 წელში ჩვენს მიერ განცდილი სამი ომის უმძიმესი ჭრილობაა. ქართველ ქალებს ყველაზე უკეთ შეუძლიათ უკრაინელი ქალების ტკივილის, გამბედაობის და რწმენის გაგება. ჩვენ კიდევ ერთხელ ვუცხადებთ სოლიდარობას უკრაინელ ქალებს და უკრაინელ ხალხს“.  სრულად... წყარო: ორგანიზაციის გვერდი სოციალურ ქსელში ნახატი: Maria Primachenko

თბილისი. საქართველოს სახალხო დამცველთან არსებული ტოლერანტობის ცენტრი, ეროვნულ უმცირესობათა და რელიგიათა საბჭოების წევრები აღფრთოვანებას გამოხატავენ გმირი უკრაინელი ერისადმი და გმობენ რუსეთის ფედერაციის დანაშაულებრივ სამხედრო აგრესიას უკრაინის წინააღმდეგ. „ასევე, გვინდა განვაცხადოთ, რომ ევროპულ დემოკრატიულ ოჯახში სრულფასოვანი დამკვიდრება ჩვენი სახელმწიფოს, ჩვენი საზოგადოების ერთერთი უმთავრესი მიზანია - ესაა ჩვენი ისტორიული პასუხისმგებლობა როგორც წინაპართა, ასევე მომავალი თაობების წინაშე; ესაა საქართველოს დამოუკიდებლობის დაცვის, უსაფრთხოებისა და განვითარების საიმედო საფუძველი. ჩვენ მხარს ვუჭერთ მხარს საქართველოს ევროკავშირში გაწევრიანებისკენ სწრაფვას“. სრულად... წყარო: ombudsman.ge

თბილისი. გავრცელებული ინფორმაციის თანახმად, 2022 წლის 5 მარტს, საქართველოში არ შემოუშვეს რუსული დამოუკიდებელი არხის, „დოჟდის“ ჟურნალისტი მიხეილ ფიშმანი. 2022 წლის 06 მარტს ცნობილი გახდა, რომ მიხეილ ფიშმანის ოჯახი საქართველოშია, ჟურნალისტს კი არ ეძლევა შესაძლებლობა გადმოკვეთოს საზღვარი და ისევ ელოდება პასუხს საქართველოს სახელმწიფოსგან.  „საზოგადოებას შევახსენებთ, რომ „დოჟდი“ კრიტიკული სარედაქციო პოლიტიკის მქონე მაუწყებელი იყო რუსეთში. უკრაინაში მიმდინარე საომარი მოქმედებების ფონზე, ტელეკომპანიამ მაუწყებლობა 3 მარტს შეაჩერა. მიგვაჩნია, რომ ჟურნალისტის შეზღუდვის ფაქტი შესაძლოა დისკრიმინაციული იყოს იმ ფონზე, როცა მსგავსს დაბრკოლებებს რუსეთიდან ერევნის გავლით შემოსული სხვა პირები არ აწყდებიან. შესაბამისად, სახელმწიფომ უნდა განმარტოს თუ რა გახდა მიხეილ ფიშმანის არ შემოშვების მიზეზი. კოალიცია მოუწოდებს საქართველოს ხელისუფლებას საზღვრის კვეთისას არ შეუქმნას ხელოვნური დაბრკოლებები პროფესიული საქმიანობის გამო შევიწროებულ რუს ჟურნალისტებს. განუხრელად შეასრულოს „საერთაშორისო დაცვის შესახებ“ საქართველოს კანონის მოთხოვნები და არ შელახოს კრიტიკული ჟურნალისტების და მათთან ერთად მყოფი პირების უფლებები“. სრულად... წყარო: mediacoalition.ge

თბილისი. ომბუდსმენი ნინო ლომჯარია მთავრობას მოუწოდებს, უკრაინას მზრუნველობამოკლებული ბავშვების დროებით, ვითარების გამოსწორებამდე საქართველოში განთავსება შესთავაზოს.  თავის მხრივ, სახალხო დამცველი და მისი გუნდი გამოთქვამს აღნიშნულ პროცესში ჩართვის მზაობას, როგორც დროებითი მიმღები ოჯახების მოძიება/შეფასებისა და მონიტორინგის, ასევე, გამოკვეთილი საჭიროებისამებრ, მრავალმხრივი მოხალისეობრივი საქმიანობის კუთხით. ომბუდსმენი და მისი თანამშრომლები, უშუალოდ უკრაინის ადამიანის უფლებათა საპარლამენტო კომისრისგან, ევროპის ბავშვთა ომბუდსმენთა ქსელისგან (ENOC) და მის მიღმა აქტიურად იღებენ ინფორმაციას უკრაინაში არსებული ვითარების, მათ შორის, ბავშვთა უფლებრივი მდგომარეობის შესახებ. სრულად... წყარო: ombudsman.ge

თბილისი. კოალიცია „მედიის ადვოკატირებისთვის“ თბილისის საქალაქო სასამართლოს ეზოში ჟურნალისტებზე თავდასხმის ფაქტებზე დაუყოვნებლივ რეაგირებას ითხოვს. „2 მარტს 5-6 ივლისის მოვლენებთან დაკავშირებულ სასამართლო პროცესზე გამოკითხვის შემდეგ, „ფორმულას“ ჟურნალისტს, რატი წვერავას სასამართლოსთან, სავარაუდოდ, ძალადობრივ ჯგუფებთან დაკავშირებული პირები დახვდნენ. ისინი ჟურნალისტს აყენებდნენ სიტყვიერ შეურაცხყოფას და ცდილობდნენ ძალადობრივ ანგარიშსწორებას. ამასთანავე, შეურაცხყოფა მიაყენეს „რუსთავი 2” -ის თანამშრომლებს არჩილ ჭიჭიბოშვილს და ხათუნა გაგნიძეს. მიგვაჩნია, რომ ჟურნალისტების წინააღმდეგ მომხდარ ძალადობრივ ქმედებებზე დროული სამართლებრივი რეაგირება აუცილებელია მედიისა და გამოხატვის თავისუფლების დასაცავად და მედიის წარმომადგენლებისთვის უსაფრთხო სამუშაო გარემოს უზრუნველსაყოფად“. სრულად... წყარო: mediacoalition.ge

თბილისი. ადამიანის უფლებათა ცენტრმა გამოაქვეყნა ანალიტიკური დოკუმენტი: სახელმწიფო ინსპექტორის სამსახურის ლიკვიდაცია რეორგანიზაციის სახელით (სამართლებრივი შეფასება).  „კრიტიკას ვერ უძლებს ის ფაქტი, რომ საქართველოს პარლამენტმა სახელმწიფო ინსპექტორის სამსახური გააუქმა პერსონალურ მონაცემთა დაცვის სახელით, მაშინ როდესაც საქართველოს პარლამენტში 2019 წლის მაისიდან უმოძრაოდ დევს კანონპროექტი „პერსონალურ მონაცემთა დაცვის შესახებ“, რომლის მიზანი საქართველოში პერსონალურ მონაცემთა დაცვის მაღალი სტანდარტის დამკვიდრებაა. საერთაშორისო სტანდარტების შესაბამისი ახალი კანონი 2 წელზე მეტია, განხილვის მოლოდინშია; ამასთან, 2021 წელს სახელმწიფო ინსპექტორის სამსახურმა საქართველოს პარლამენტს წარუდგინა 2020 წლის საქმიანობის დეტალური და კრიტიკული ანგარიში, რომელიც ისტორიაში პირველად პარლამენტმა არ მოისმინა“. სრულად... წყარო: hrc.ge