თბილისი. საერთო-სამოქალაქო მოძრაობა მრავალეროვან საქართველოში შემოსული ინფორმაციის თანახმად, დასაქმების საჭიროების მქონე უკრაინელთა შორისაა სხვადასხვა პროფესიების წარმომადგენლები. ორგანიზაცია მიმართავს საქართველოში მოქმედ კერძო და სამოქალაქო სექტორის წარმომადგენლებს, თუკი გამოთქვამენ სურვილს დაასაქმონ კვალიფიციური კადრები უკრაინიდან, გრაფიკული დიზაინის, ილუსტრატორის, ფინანსური, ან სოციალური მედია მენეჯერის, ასევე მძღოლის, აგრონომისა თუ ეკონომისტის პოზიციებზე, მისწერონ მრავალეროვან საქართველოს მისამართზე 4ukraine@pmmg.org.ge, ან დაუკავშირდნენ ტელეფონის ნომერზე 296 21 25. „გამოვთქვამთ იმედს, რომ შემოგვიერთდებით ამ მნიშვნელოვან წამოწყებაში და საერთო ძალისხმევით შევძლებთ უკრაინელი ხალხის თანადგომას“. გარდა ამისა, მრავალეროვანი საქართველო ორგანიზებას გაუწევს უკრაინელ დევნილთათვის ქართული ენის შემსწავლელი კურსების ფუნქციონირებას. დაინტერესებულ პირებს კი ზემოთხსენებულ ელ-ფოსტის მისამართზე შეუძლიათ მომართვა.  სრულად... წყარო: ორგანიზაციის გვერდი სოციალურ ქსელში

იმერეთი. ადამიანის უფლებათა ცენტრის ინფორმაციით, ქუთაისის საქალაქო სასამართლომ სამოქალაქო აქტივისტის, გიორგი ლოლაძის მიმართ ადმინისტრაციული წარმოება შეწყვიტა ადმინისტრაციული სამართალდარღვევის არარსებობის გამო. 2022 წლის 27 მარტს, ქალაქ ქუთაისში, გიორგი ლოლაძე მონაწილეობდა საპროტესტო აქციაში, რომელიც ბენზინის ფასის ზრდას ეხებოდა. ლოლაძე ამ აქციის ერთ-ერთი ორგანიზატორი იყო. სასამართლო მას პოლიციის წარმომადგენლის მიერ კანონიერი მოთხოვნისადმი დაუმორჩილებლობას ედავებოდა, რაც მტკიცებულებით არ დადასტურდა. სრულად... წყარო: www.humanrights.ge

თბილისი. როგორც საზოგადოებისთვის ცნობილია, საქართველოს ახალგაზრდა იურისტთა ასოციაცია (საია) 2021 წლის 5-6 ივლისს განვითარებული ძალადობრივი მოვლენების შედეგად დაზარალებული პირების უფლებებს იცავს. ამ ეტაპზე ორგანიზაცია ჩართულია 19 პირის საქმეში. 4 აპრილს თბილისის საქალაქო სასამართლომ ლექსო ლაშქარავას, მირანდა ბაღათურიას, ვახტანგ ქარელის, ილია თვალიაშვილის, რატი წვერავას და დეა მამისეიშვილის საქმეზე განაჩენები გამოაცხადა. „საკითხის სრულყოფილად შესწავლის მიზნით, კანონით დადგენილი წესით საია-ს ადვოკატები თბილისის საქალაქო სასამართლოს მიმართავენ დასაბუთებული განაჩენის გადმოცემის მოთხოვნით“. სრულად... წყარო: gyla.ge

თბილისი. სოციალური სამართლიანობის ცენტრის ინფორმაციით, გარდაცვლილი ნუგზარ ფუტკარაძის შვილს ამ დრომდე არ ენიჭება დაზარალებულის სტატუსი. „ეს გადაწყვეტილება წარმოადგენს გარდაცვლილი დეპუტატის ოჯახის წევრების გამოძიებაში მონაწილეობის უფლების გაუმართლებელ შეზღუდვას და აძლიერებს მიმდინარე გამოძიების მიმართ უნდობლობასა და ეჭვებს მისი პოლიტიზირების შესახებ“.  ორგანიზაცია აგრძელებს ნუგზარ ფუტკარაძის ოჯახის წევრების სამართლებრივ დახმარებას და საზოგადოებას რეგულარულად გააცნობს საქმის მსვლელობის თაობაზე მნიშვნელოვან ინფორმაციას. სრულად... წყარო: socialjustice.org.ge

თბილისი. საქართველოს დემოკრატიული ინიციატივას (GDI) ინფორმაციით, ლაშა ჩხვიმიანმა კულტურის, სპორტისა და ახალგაზრდობის სამინისტროსა და მინისტრ თეა წულუკიანის წინააღმდეგ სახალხო დამცველს დისკრიმინაციის დადგენის მოთხოვნით მიმართა. განმცხადებლის ინტერესებს სახალხო დამცველის წინაშე GDI იცავს. „მიგვაჩნია, რომ ლაშა ჩხვიმიანიც სწორედ განსხვავებული შეხედულებების ღიად გაჟღერების გამო გახდა მინისტრ თეა წულუკიანის რეპრესიული პოლიტიკისა და დისკრიმინაციის მსხვერპლი“, ნათქვამია ორგანიზაციის განცხადებაში. სრულად... წყარო: gdi.ge

თბილისი. საქართველოს დემოკრატიული ინიციატივა (GDI) და ადამიანის უფლებათა ცენტრი (HRC) ეხმაურებიან 2022 წლის 4 აპრილს თბილისის საქალაქო სასამართლოს მოსამართლე ნინო ჩახნაშვილის მიერ გამოცხადებულ განაჩენს 2021 წლის 5 ივლისს ჟურნალისტებზე განხორციელებულ ძალადობასთან დაკავშირებულ საქმეზე. ამ საქმეში საქართველოს დემოკრატიული ინიციატივა იცავს „რადიო თავისუფლების“ დაზარალებული ჟურნალისტის, თორნიკე მანდარიას, ხოლო ადამიანის უფლებათა ცენტრი ოპერატორის, დავით ქორიძის ინტერესებს. ორგანიზაციები არ ეთანხმებიან გამოცხადებულ განაჩენს ბრალდების გადაკვალიფიცირებისა და სასჯელის ნაწილში. „ამგვარი მიდგომა ფაქტობრივად გამორიცხავს 2022 წლის 5 ივლისს ჟურნალისტებსა და სამოქალაქო აქტივისტებზე მასშტაბური, ჰომოფობიური ძალადობის ორგანიზატორებისთვის პასუხისმგებლობის დაკისრებას მაშინ, როდესაც დანაშაულის ორგანიზებულ ხასიათზე არაერთი მტკიცებულება მიუთითებს. ... მოვუწოდებთ საქართველოს პროკურატურას, გაასაჩივროს მიღებული განაჩენი სააპელაციო სასამართლოში“, ნათქვამია ერთობლივ განცხადებაში. სრულად... წყარო: www.hrc.ge

თბილისი. გავრცელებული ინფორმაციებითა და კადრებით, ქალაქი ბუჩა და უკრაინის სხვა ქალაქები მშვიდობიანი მოსახლეობის, მათ შორის, ქალების, ბავშვების, მოხუცების მკვლელობის, წამების, გაუპატიურებისა და ომის სხვა უმძიმესი დანაშაულების ადგილი გახდა. სოციალური სამართლიანობის ცენტრი უკიდურეს შეშფოთებას გამოხატავს და სოლიდარობას უცხადებს უკრაინელ ერს. „პოსტ-საბჭოთა ხალხებს, მათ შორის ქართველ ხალხს ამ პოლიტიკისა და იდეოლოგიის ფასი ჩვენს სიცოცხლეზე, სხეულებზე და ყოველდღიურობაში გვაქვს განცდილი და კარგად ვიცით, რა მძიმეა ის ტრაგედია, ტრავმა და დანაკარგი, რომელიც უკრაინელ ხალხს აქვთ. თქვენი ტკივილი, ჩვენი ტკივილია და ჩვენს თანაგრძნობას და სოლიდარობას საზღვარი არ აქვს“. სრულად... წყარო: socialjustice.org.ge

თბილისი. სახალხო დამცველმა საქართველოში ადამიანის უფლებათა დაცვის მდგომარეობის შესახებ წლიური ანგარიში წარმოადგინა. ძირითადი მიგნებების თანახმად, „2021 წელს ადამიანის უფლებების დაცვის მდგომარეობა არსებითად არ გაუმჯობესებულა, მეტიც, რიგი მიმართულებებით მნიშვნელოვანი გაუარესებაც კი შეინიშნებოდა“. სრულად... წყარო: ombudsman.ge

იმერეთი. გავრცელებული ინფორმაციით, უკანასკნელი ორი კვირის განმავლობაში ჭიათურის სოფელ ითხვისში თავი იჩინა საცხოვრებელი სახლების დაზიანების ახალმა შემთხვევებმა. წინასწარი ინფორმაციით აღდგენასა და შეკეთებას აღარ ექვემდებარება უკვე 12 საცხოვრებელი სახლი და დაზარალებულია 11 ოჯახი, რომელთაგან 7, ჭიათურის მერიის ინფორმაციით, საცხოვრებლით უზრუნველყოფას საჭიროებს. სამოქალაქო საზოგადოების ორგანიზაციები მოითხოვენ: მინერალური რესურსების ეროვნულმა სააგენტომ დაუყოვნებლივ შეისწავლოს ითხვისის ტერიტორიაზე და მის მიმდებარედ „ჯორჯიან მანგანეზის” ლიცენზიის ფარგლებში მიმდინარე მოპოვებითი სამუშაოები; გარემოს დაცვისა და სოფლის მეურნეობის სამინისტრომ შეისწავლოს გარემოსთვის მიყენებული ზიანი და ადამიანების სიცოცხლისთვის შექმნილი საფრთხე; ტექნიკური და სამშენებლო ზედამხედველობის სააგენტომ შეაფასოს მაღაროს მდგომარეობა მომავალში საფრთხის თავიდან არიდების მიზნით; ეკონომიკისა და მდგრადი განვითარების, ინფრასტრუქტურისა და რეგიონალური განვითარების და ჯანდაცვისა და საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროებმა დაიწყონ კოორდინირებული მუშაობა განსახლების ღირსეული და საერთო სტანდარტის შემუშავებისთვის. საქართველოს პარლამენტის გარემოს დაცვისა და ბუნებრივი რესურსების კომიტეტმაშეასრულოს კანონით გათვალისწინებული, დროული და ქმედითი საზედამხედველო ფუნქცია. სრულად... წყარო: gyla.ge

აჭარა. პროექტის „სამოქალაქო საზოგადოების ინიციატივის“ ფარგლებში, მიმდინარე წლის მარტის თვეში გაიმართა მოსახლეობასთან შეხვედრები, ქედის მუნიციპალიტეტის სოფელ ხარაულასა და ქობულეთის მუნიციპალიტეტის სოფელ ლეღვაში.  სოფლის მაცხოვრებლებს შეზღუდული შესაძლებლობების მქონე ქალთა ალიანსის წარმომადგენელი, დეა ერემაშვილი შეხვდა. ადგილობრივებს მიეწოდათ ინფორმაცია ორგანიზაციის საქმიანობაზე და იმ სერვისებზე, რომელსაც შშმ ქალთა ალიანსი სთავაზობს ბენეფიციარებს. აჭარის რეგიონული ჰაბი ევროკავშირისა და კონრად ადენაუერის ფონდის მიერ დაფინანსებული პროექტის „სამოქალაქო საზოგადოების ინიციატივა“ ფარგლებში შეიქმნა. სრულად... წყარო: ორგანიზაციის გვერდი სოციალურ ქსელში

კახეთი. 29 მარტს, ადამიანის უფლებათა ცენტრის წარმომადგენლები თელავის მუნიციპალიტეტის საჯარო მოხელეებს შეხვდნენ. ორგანიზაციის აღმასრულებელმა დირექტორმა ალეკო ცქიტიშვილმა შეხვედრის მონაწილეებს გააცნო ადამიანის უფლებათა ცენტრის ანგარიში - „კონფლიქტით დაზარალებული ეთნიკურად ოსი მოქალაქეების ქონებრივი რესტიტუციის და მოქალაქეობის დაბრუნების პროცესის სამართლებრივი ანალიზი“, რომელიც საქართველოში ბრიტანეთის საელჩოს ფინანსური მხარდაჭერით გამოქვეყნდა. სრულად... წყარო: www.humanrights.ge

თბილისი. გავრცელებული ცნობით, ირმა ბოლო 20 წელია თბილისის ერთ-ერთ უბანში, მცირე ზომის სარდაფში თავის მეგობარ ძაღლთან ერთად ცხოვრობს და ეზოში 10-მდე მიუსაფარ კატას უვლის.  2022 წლის 28 მარტს, სოციალურ ქსელში ხალხმა წუხილი გამოთქვა ირმას გაუჩინარების შესახებ. 2022 წლის 29 მარტს, სოციალურ ქსელში გავრცელდა ინფორმაცია, რომ ირმა ხონის ფსიქიკური ჯანმრთელობის ეროვნულ ცენტრში (ე.წ. ხონის ფსიქიატრიულში) გადაიყვანეს ქურდობის ბრალდებით. ამავე დღეს, ორგანიზაცია „პარტნიორობა ადამიანის უფლებებისთვის“ (PHR) საქმეში ჩაერთო. PHR-ის ადვოკატებს მიაჩნიათ, რომ ირმას ფსიქიატრიულ დაწესებულებაში მოთავსება უკანონოა და მისი იძულებითი მკურნალობის საფუძვლები არ არსებობს. შესაბამისად, PHR მოითხოვს ირმას დაუყვნებლივ გათავისუფლებას და ამ მიზნით განახორციელებს შესაბამის სამართლებრივ ქმედებებს. სრულად... წყარო: phr.ge

თბილისი. საქართველოს ახალგაზრდა იურისტთა ასოციაციამ (საია) გოირგი გოგოშიძისა და ინდიკო აბაშიძის სახელით საკონსტიტუციო სასამართლოს მიმართა. ორგანიზაცია აკადემიური თანამდებობისთვის დადგენილ საპენსიო ასაკს ასაჩივრებს.  სრულად... წყარო: gyla.ge

თბილისი. „კოალიცია თანასწორობისთვის“ აქვეყნებს ანგარიშს: სოციალური დაცვის სისტემის ძირითადი გამოწვევები სხვადასხვა დაუცველი ჯგუფებისათვის საქართველოში. „ეს ანგარიში ცენტრალური და ადგილობრივი ხელისუფლების მიერ ადმინისტრირებული სოციალური დაცვის პროგრამებისა და სოციალური დაცვის პოლიტიკის კრიტიკაა სხვადასხვა მოწყვლად ჯგუფებთან მიმართებით. სოციალური სამართლიანობის ცენტრმა, პარტნიორ ორგანიზაციებთან ერთად დააიდენტიფიცირა ის ძირითადი გამოწვევები, რაც შშმ პირთა სოციალური დაცვის მიმართულებით არსებობს და სახელმწიფო უწყებებისათვის შესაბამისი რეკომენდაციები მოამზადა“. სრულად... წყარო: socialjustice.org.ge

თბილისი. „საერთაშორისო გამჭვირვალობა - საქართველომ” შეაფასა 2020 წლის 21 მარტიდან, 2021 წლის 31 დეკემბრის ჩათვლით - პანდემიის მართვასთან დაკავშირებით პარლამენტის მიერ მთავრობის საქმიანობაზე განხორციელებული ზედამხედველობა და მისი შედეგები, იმ გადაწყვეტილების პირობებში, რომლის ფარგლებშიც საკანონმდებლო ორგანომ ადამიანის უფლებათა შეზღუდვის უფლებამოსილება მთავრობას გადასცა. ორგანიზაციის შეფასებით, „კოვიდპანდემიის პერიოდში საქართველოს პარლამენტმა მთავრობის საქმიანობის ეფექტური კონტროლი ვერ განახორციელა. ნათლად გამოიკვეთა ყველა ის პრობლემა, რაც ზოგადად, საქართველოში, საპარლამენტო ზედამხედველობას ახასიათებს. პანდემიასთან და მის თანმდევ პრობლემებთან დაკავშირებით, ქვეყნისთვის კრიზისულ ვითარებაში, პარლამენტმა ვერ შეძლო სრულფასოვნად განეხორციელებინა საპარლამენტო კონტროლი“. სრულად... წყარო: transparency.ge

თბილისი. სოციალური სამართლიანობის ცენტრი ეხმაურება პროპუტინისტური, ექსტრემისტული პოლიტიკური პარტია კონსერვატიული მოძრაობისა და ალტ-ინფოს მხარდამჭერების მიერ ქობულეთში უკრაინის სოლიდარობის აქციის მონაწილეების მიმართ გამოვლენილი ძალადობის, დევნის ფაქტებს. ორგანიზაცია მოუწოდებს შსს-ს უზრუნველყოს მომხდარის დროული გამოძიება, თავდამსხმელების იდენტიფიცირება და სისხლისსამართლებრივი პასუხისმგებლობის დაკისრება. სრულად... წყარო: socialjustice.org.ge ფოტო: ნეტგაზეთი

თბილისი. საფარის ინფორმაციით, ოთხი თვის წინ გაეროს ქალთა უფლებების კომიტეტმა ხანუმ ჯეირანოვას დაადგინა, რომ საქართველომ ვერ უზრუნველყო გამოძიება და სამართლებრივი დევნა ქალის მიმართ გენდერული ნიშნით და ღირსების სახელით ჩადენილ ძალადობასთან დაკავშირებით, რომელიც სასტიკად სცემეს ოჯახის წევრებმა მცირეწლოვანი შვილების თვალწინ, რამაც მისი სიკვდილი გამოიწვია. კომიტეტის გადაწყვეტილება სრულად, ქართულ ენაზე შეგიძლიათ იხილოთ თანდართულ დოკუმენტში. სრულად... წყარო: sapari.ge

თბილისი. დასრულდა ტრენინგების სერია თემაზე: „ქალთა უფლებები და გენდერული თანასწორობა“, რომელსაც „ქალთა ეკონომიკური გაძლიერების“ პროექტში ჩართული 200-ზე მეტი ქალი დაესწრო. ტრენინგები შეეხებოდა ისეთ საკითხებს, როგორიცაა: სქესი, გენდერი, გენდერული იდენტობა, გენდერული ნორმები და სოციალიზაცია, გენდერული სტერეოტიპები და სექსუალური შევიწროება. აღნიშნულ პროექტს „ფონდი ტასო“ გაეროს ქალთა ორგანიზაციის (UN Women) და ნორვეგიის მთავრობის მხარდაჭერით ახორციელებს. სრულად... წყარო: ორგანიზაციის გვერდი სოციალურ ქსელში

თბილისი. საქართველოს სახალხო დამცველმა გამოქვეყნა კვლევა: შეზღუდული შესაძლებლობის მქონე ქალებისა და გოგოების საჭიროებებისა და მათი უფლებების დაცვის მდგომარეობის შეფასება საქართველოში. „კვლევის შედეგები ცხადყოფს, რომ შშმ ქალებისა და გოგოების უფლებების დაცვა, პოლიტიკის დონეზე, არ არის პრიორიტეტული მიმართულება. გარკვეული პოზიტიური ცვლილებები, რაც შშმ პირთა უფლებების დაცვის სტანდარტების გაუმჯობესების მიმართულებით შესაბამისი რეგულაციებისა თუ პროგრამების შექმნაში გამოიხატება, შშმ ქალებისა და გოგოების უფლებების დასაცავად ეფექტიან გზად ვერ ჩაითვლება. ეს მიდგომები და პროგრამები ვერ ხედავენ შშმ ქალებისა და გოგოების საჭიროებებს, რომელიც უმეტესად, შესაძლოა, განსხვავდებოდეს შშმ კაცების საჭიროებებისგან“. ანგარიში მომზადდა ომბუდსმენის აპარატის მიერ, გაეროს ქალთა ორგანიზაციასთან თანამშრომლობით „კარგი მმართველობა გენდერული თანასწორობისთვის“ პროექტის ფარგლებში, რომელიც ნორვეგიის საგარეო საქმეთა სამინისტროს მხარდაჭერით ხორციელდება. სრულად... წყარო: ombudsman.ge

თბილისი. „სხვა კუთხის“ მორიგი ეპიზოდი ეხება საქართველოს აზერბაიჯანელებს, მათ კულტურას, უახლეს ისტორიას და მათი პოლიტიკური, ეკონომიკური და კულტურული პერიფერიალიზაციის საკითხს. „რა ვიცით საქართველოს აზერბაიჯანელების შესახებ და რა არის პრობლემური ჩვენს ამ ცოდნასა და წარმოდგენებში? რა არ ვიცით ამ თემის შესახებ და როგორ ცდილობენ ახალგაზრდა მკვლევრები და აქტივისტები ცოდნის ამ სიცარიელის გარღვევას, ამოვსებას თვითორგანიზებისა და ფიქრის უნიკალური პროცესებით? რა ისტორიულმა ფაქტორებმა, იმპერიულმა და ნაციონალისტურმა პოლიტიკამ განაპირობა ეთნიკური უმცირესობების არაღიარების ამ გარემოს შექმნა და რა შეგვიძლია და რა უნდა მოვითხოვოთ დღეს?! სწორედ ესაა ის მთავარი კითხვები, რომელზეც ინტერვიუში სოციალური სამართლიანობის ცენტრის თანასწორობის პოლიტიკის პროგრამის დირექტორი თამთა მიქელაძე კავკასიოლოგთან, კულტურის მკვლევართან ელნურ ალისოისთან ერთად საუბრობს“. სრულად... წყარო: socialjustice.org.ge

თბილისი. საქართველოს ახალგაზრდა იურისტთა ასოციაცია ეხმიანება რადიკალური და პრორუსული ჯგუფის მხრიდან მუქარისა და ძალადობის ბოლოდროინდელ შემთხვევებს. ორგანიზაცია მოუწოდებს საგამოძიებო ორგანოებს: დროული და ეფექტიანი რეაგირება მოახდინონ აგრესიული ჯგუფის მხრიდან მუქარისა და ძალადობის შემთხვევებზე; სათანადო ზომები გაატარონ მუქარისა და ძალადობის ადრესატი პირების უსაფრთხოების დასაცავად; გააკეთონ მკაფიო განცხადება, რომ ძალადობრივი ჯგუფების ქმედებები არ დარჩება დაუსჯელი. სრულად... წყარო: gyla.ge

შიდა ქართლი და გურია. შეზღუდული შესაძლებლობის მქონე პირთა სექსუალური და რეპროდუქციული უფლებების შესახებ ცნობიერების ამაღლებისა და სტერეოტიპული დამოკიდებულების აღმოფხვრის მიზნით, PHR-ის იურისტები გორსა და ოზურგეთში შშმ ქალების მშობლებს შეხვდნენ. „შშმ ქალები, ისევე როგორც მათი მშობლები განიცდიან ინფორმაციის ნაკლებობას, როგორც ზოგადად, ასევე სექსუალური საჭიროებებისა და სრჯ უფლებების შესახებ“. შეხვედრა შესაძლებელი გახდა პროექტ „Supporting women with disabilities in being, doing and becoming independent” ფარგლებში, რომელსაც ახორციელებს ორგანიზაცია „პარტნიორობა ადამიანის უფლებებისთვის - PHR”, RFSU-ს (Swedish Association for Sexuality Education) ფინანსური მხარდაჭერით. სრულად... წყარო: phr.ge