შიდა ქართლი. რონდელის ფონდი აქვეყნებს „ცხინვალის რეგიონში საოკუპაციო ხაზთან არსებული ვითარების მონიტორინგის“ მეხუთე გამოცემას, რომელიც ელენე მინდიაშვილმა მოამზადა. „12 დეკემბერს სოფ. ნიქოზის მიმდებარედ საქართველოს მოქალაქე მამუკა ჩხიკვაძე, რომელიც ადრე ქართულ შეიარაღებულ ძალებში მსახურობდა, დააკავეს. აგვისტოში დაკავებული გელა გოჭოშვილი გაათავისუფლეს. დათა და ვალია ვანიშვილების სახლთან მოძრაობის დეტექტორი დაამონტაჟეს. გამყოფი ხაზის მიმდებარე სოფლებში მცხოვრები მოსახლეობა ზამთრის პერიოდში ფინანსურ დახმარებას მიიღებს“. სრულად... წყარო: kremlin-roadmap.gfsis.org

თბილისი. „საერთაშორისო გამჭვირვალობა - საქართველოს“ იურისტების დახმარებით, ლეილა ქაროსანიძეს, ხონის სოფელ გორდში 2800 კვ.მ. მიწის ნაკვეთი საკუთრებაში დაურეგისტრირდება.  სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია (საია) მიიჩნევს, რომ ლექსო ლაშქარავას საქმეზე ექსპერტიზის პროცესში საერთაშორისო ექსპერტების ჩაურთველობა, ასევე, არაპროპორციული მოცულობით ექსპერტიზის დასკვნის გავრცელება, ამცირებს გამოძიების პროცესის მიმართ ნდობას. „საია ლექსო ლაშქარავას ოჯახთან შეთანხმებით, გააგრძელებს მიმდინარე გამოძიებების პროცესში ოჯახის უფლებების დაცვას. ორგანიზაციის ადვოკატი მიმართავს საგამოძიებო უწყებას ექსპერტიზის დასკვნის გადმოცემის თაობაზე, ხოლო დამატებით ინფორმაციას საზოგადოებას სწორედ აღნიშნული დოკუმენტის სრულყოფილად გაცნობის შედეგად გავაცნობთ“, ნათქვამია ორგანიზაციის განცხადებაში. სრულად... წყარო: gyla.ge

თბილიში. ამერიკის საელჩო საქართველოში განცხადებას ავრცელებს. „გასულ კვირას მმართველმა პარტიამ ძირი გამოუთხარა მთავრობის ანგარიშვალდებულებას, სახელმწიფო ინსპექტორის სამსახურის გაუქმებით, რომლის მოვალეობა პოლიციის მხრიდან ძალადობის გამოძიება და მონაცემთა კონფიდენციალურობის დაცვაა; ზიანი მიაყენა ცალკეული მოსამართლის დამოუკიდებლობას საერთო სასამართლოების შესახებ კანონში ცვლილებების განხორციელებით და შეასუსტა ნდობა სასამართლოს მიმართ უზენაესი სასამართლოს კიდევ ერთი მოსამართლის დანიშვნით, რაც შერჩევის ხარვეზიანი პროცესით განხორციელდა. საზოგადოებას არ მიეწოდა სარწმუნო არგუმენტები, თუ რატომ გახდა საჭირო ამ ცვლილებების ნაჩქარევად მიღება, სათანადო კონსულტაციების გარეშე. ნაბიჯები, რომლებიც ასუსტებს დემოკრატიულ ინსტიტუტებს, როგორიცაა სასამართლო ან დამოუკიდებელი საზედამხედველო უწყებები, აზიანებს საქართველოს მისწრაფებებს ნატოსა და ევროკავშირში გაწევრიანებისკენ და ძირს უთხრის ძირითად თავისუფლებებს, რაც ქართული კულტურისა და საზოგადოების საძირკველს წარმოადგენს“, ნათქვამია განცხადებაში. სრულად... წყარო: საელჩოს გვერდი სოციალურ ქსელში

თბილისი. ომბუდსმენის ინფორმაციით, საქართველოს პარლამენტში განიხილება მიხეილ სარჯველაძის მიერ ინიცირებული კანონპროექტი ამნისტიის შესახებ. ამნისტიის შესახებ კანონპროექტის ალტერნატიულ ვერსიას საქართველოს პარლამენტს ასევე წარუდგენს პარტია „ლელო“. „საქართველოს სახალხო დამცველი მიესალმება აღნიშნულ ინიციატივებს და იმედოვნებს, რომ პარლამენტი შემჭიდროვებულ ვადებში განიხილავს და დაამტკიცებს ამნისტიის კანონს, რომელიც კოვიდ-პანდემიის პერიოდში პენიტენციურ სისტემაში მყოფ მაქსიმალურად ბევრ პატიმარს მოიცავს და თანხვედრაში იქნება სისხლის სამართლის მართლმსაჯულების ძირითად პრინციპებსა და დაზარალებულთა მიმართ სახელმწიფოს პოზიტიურ ვალდებულებებთან“. სრულად... წყარო: www.ombudsman.ge

თბილისი. საქართველოს სახალხო დამცველი ეხმიანება მიხეილ სააკაშვილის N12 პენიტენციურ დაწესებულებაში დაბრუნებას. „ომბუდსმენის რწმუნებულებმა მოიპოვეს სამედიცინო დოკუმენტაცია, ასევე გაესაუბრნენ დაწესებულების ექიმსა და ადმინისტრაციის წარმომადგენლებს, რომლებმაც დააფიქსირეს, რომ ეტაპირების პროცესში არასათანადო მოპყრობას ადგილი არ ჰქონია. სახალხო დამცველი მიიჩნევს, რომ მიხეილ სააკაშვილის ჯანმრთელობის მდგომარეობის მართვის პროცესში აქტიურად უნდა ჩაერთოს სახელმწიფო კონსილიუმი და შესრულდეს სახალხო დამცველის ექსპერტთა ჯგუფის მიერ გაცემული რეკომენდაციები“. სრულად... წყარო: ombudsman.ge

თბილისი. ევროკავშირის წარმომადგენლობა პარლამენტში სახელმწიფო ინსპექტორის სამსახურსა და სასამართლო სისტემასთან დაკავშირებული კანონპროექტების დაჩქარებული წესით განხილვას ეხმაურება. „სახელმწიფო ინსპექტორის სამსახური არის საქართველოში არსებული დამოუკიდებელი მექანიზმი სამართალდამცავი ორგანოების თანამშრომლების მიერ ჩადენილი არასათანადო მოპყრობისა და უფლებამოსილების ბოროტად გამოყენების გამოსაძიებლად და, შესაბამისად, კარგად ფუნქციონირებადი დემოკრატიისა და ადამიანის უფლებების დაცვისთვის საკვანძო ინსტიტუტს წარმოადგენს. ევროკავშირი ჩართული იყო ამ სამსახურის შექმნაში და მის განვითარებაში მნიშვნელოვანი ფინანსური და ადამიანური რესურსების ინვესტირება მოახდინა. ამიტომ, ჩვენ ამ ქმედებებით ძალიან იმედგაცრუებულები ვართ და ვწუხვართ იმ ფაქტის გამო, რომ ამ საკითხთან დაკავშირებით ევროკავშირის წარმომადგენლების პარლამენტთან ურთიერთქმედება შესაძლებელი არ აღმოჩნდა“, - ამბობს ასუნსიონ სანჩეს რუისი, ევროკავშირის წარმომადგენლობის ხელმძღვანელის მოვალეობის შემსრულებელი. სრულად... წყარო: eeas.europa.eu

თბილისი. ქალთა ფონდმა სტრატეგიული გზამკვლევი „მლხენელების საკითხავი“ მოამზადა. „იგი საგანგებოდ მომზადდა სოციალური სამართლიანობის მოძრაობებისთვის, ადამიანის უფლებების დამცველებისთვის, ქალთა და ქვიარ საკითხების ადვოკატებისთვის, პრაქტიკოსი მლხენელებისთვის და ფემინისტი აქტივისტებისთვის - ყველასთვის, ვინც სოციალური ტრანსფორმაციისთვის იბრძვის. სიტყვა “მლხენელი” ალბათ უცხოა მკითხველთა უმრავლესობისთვის, თუმცა ეს ცნება ახალი არ არის. სულხან-საბას განმარტებით, “სნეულთ მლხენელი” მკურნალს აღნიშნავს, სიტყვა “ლხენა” კი ახსნილია, როგორც ჭირისაგან ხსნა, მორჩენა და შველა (ორბელიანი, 1991, გვ. 425, 491). საკითხავის ავტორებმა არჩევანი ამ ტერმინზე გავაკეთეთ და არა სიტყვაზე “მკურნალი”, რომელიც უფრო მეტად მედიცინის და ზრუნვის დასავლურ და ინსტიტუციურ პრაქტიკებთან ასოცირდება“.  სრულად... წყარო: womenfundgeorgia.org

თბილისი. ჰაინრიხ ბიოლის ფონდის ფემინისტური ვებგვერდი წარმოგიდგენთ წლის ყველაზე პოპულარულ ხუთ სტატიას. „მადლობას ვუხდით ჩვენს ავტორებს გაწეული შრომისა და საჭირო და დროული სათქმელის მკითხველამდე მიტანისთვის. თითოეულ ავტორთან თანამშრომლობა ფონდისთვის ძალიან ღირებულია.  2021 წელს, ჩვენი პლატფორმის საშუალებით, ზრუნვის თანმიმდევრული პოლიტიკის არარსებობასა და საჭიროებაზე დავიწყეთ საუბარი. შევეცადეთ იმ ჯგუფებთან გვესაუბრა და მიგვეტანა სათქმელი, რომლებიც საზოგადოების ფუნქციონირებისთვის საკვანძო შრომას გასწევენ. მათ შორის არიან შინმშრომელი ქალები, ძიძები, სოფლად მცხოვრები ქალები, მარტოხელა დედები“. სრულად... წყარო: feminism-boell.org

აჭარა. ინფორმაციის თავისუფლების განვითარების ინსტიტუტის (IDFI) ინფორმაციით, პროექტის „საპარლამენტო დემოკრატიის კონსოლიდაცია საქართველოში“ ფარგლებში, რომელიც ხორციელდება ევროკავშირისა (EU) და გაეროს განვითარების პროგრამის (UNDP) მხარდაჭერით, ადაპტირდა უმაღლესი საბჭოს ვებგვერდი sca.ge. „ადაპტირებულ ვებგვერდზე შესაძლებელია ტექსტისა და ფონის, ფერის, ფონტის შეცვლა სპეციალური წამკითხველი პროგრამით, რომლის საინსტალაციო ფაილი განთავსებულია ვებგვერდზე; შესაძლებელია ტექსტის წაკითხვა; ვებგვერდი ასევე იძლევა საშუალებას, რომ საინფორმაციო მასალები განთავსდეს სინქრონიზებული სუბტიტრებით“. სრულად... წყარო: idfi.ge

თბილისი. სოციალური სამართლიანობის ცენტრის ინფორმაციით, სპეცოპერაციიდან, რომელსაც თემირლან მაჩალიკაშვილი ემსხვერპლა, 4 წელი გავიდა. „მაჩალიკაშვილის სიცოცხლის ხელყოფის ჯეროვან გამოძიებას კრიტიკული მნიშვნელობა ჰქონდა მაჩალიკაშვილების ოჯახის და ზოგადად პანკისის ადგილობრივი თემისთვის სამართლებრივი სახელმწიფოს მიმართ ნდობის დაბრუნებისთვის. ბოლო ათწლეულებში პანკისის ხეობაში სახელმწიფოს მიერ სიცოცხლის ხელყოფის არცერთი მძიმე შემთხვევა არ არის სათანადოდ გამოძიებული, რაც ადგილობრივებში ნდობის და გაუცხოების პრობლემას ქმნის. სამწუხაროდ, სახელმწიფომ ამ შემთხვევაშიც უარი თქვა ობიექტურ გამოძიებაზე და გამოძიების დაწყებიდან სამი წლის შემდგომ, 2020 წლის 25 იანვარს თბილისის პროკურატურამ დანაშაულის ნიშნების არარსებობის მოტივით გამოძიება შეწყვიტა“... სრულად... წყარო: socialjustice.org.ge

თბილისი. „საერთაშორისო გამჭვირვალობა - საქართველოს“ იურისტების დახმარებით, ანა გუგავას გათავისუფლების ბრძანება სასამართლომ ბათილად ცნო. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი აქვეყნებს დოკუმენტს: სტაციონარული სერვისები ფსიქიკური ჯანმრთელობის პროგრამაში: სახელმწიფო ზედამხედველობის გარეშე. „2021 წლის აგვისტოში ივანე ბოკერიას სახელობის თბილისის რეფერალურ ჰოსპიტალში („ევექსი“) ფსიქიკური ჯანმრთელობის განყოფილების გაუქმება, - დედაქალაქში არსებული სამიდან უკვე მეორე სასიცოცხლოდ მნიშვნელოვანი ცენტრის გაქრობა, - მორიგი მძიმე დარტყმა აღმოჩნდა ფსიქიკური ჯანმრთელობის სისტემის დეინსტიტუციონალიზაციის პროცესისათვის. განყოფილების დახურვამ კიდევ ერთხელ გააშიშვლა ის სისტემური ხარვეზები, რომელთა გამოც ფსიქოსოციალური საჭიროებების მქონე ადამიანები ზარალდებიან და კვლავ დღის წესრიგში დააყენა ფსიქიკური ჯანმრთელობის სახელმწიფო პროგრამის ფარგლებში სტაციონარული ადგილების დაფინანსების წესის გადახედვის საჭიროება“. სრულად... წყარო: socialjustice.org.ge

თბილისი. სოციალური სამართლიანობის ცენტრი აქვეყნებს ანგარიშს, რომელიც არასტანდარტული და არაფორმალური შრომის თანამედროვე სახეებს შეისწავლის საქართველოში. „ერთი მხრივ, მასში თავმოყრილია ადგილობრივი ცოდნა არაფორმალურად და არასტანდარტულად დასაქმებულთა შრომითი, სოციალური და უფლებრივი მდგომარეობის შესახებ; მეორე მხრივ, წარმოდგენილია არაფორმალურ და არასტანდარტულ შრომაში ჩართულ დასაქმებულთა გამოკითხვაც“. სრულად... წყარო: socialjustice.org.ge

თბილისი. სოციალური სამართლიანობის ცენტრი ბათუმის პოლიციაში გიორგი არობელიძის და რატი რატიანის მიმართ ძალადობის ფაქტებს ეხმიანება. ორგანიზაცია მოუწოდებს სახელმწიფო ინსპექტორის სამსახურს, დროულად და ეფექტიანად გამოიძიოს აღნიშნული ინცინდენტი. სრულად... წყარო: socialjustice.org.ge

აჭარა. სოციალური სამართლიანობის ცენტრის ინფორმაციით, მაღალმთიან აჭარაში, სხვა რეგიონების მსგავსად ბოლო დღეებში ძლიერად მოთოვა და 2-3 დღეა სოფლების ნაწილს არ მიეწოდება ელექტროენერგია, ჩაკეტილია გზებიც. „მაღალმთიანი აჭარისთვის მკაცრი ზამთარია დამახასიათებელი და ზედა სოფლები ცუდი ინფრასტრუქტურის გამო ხშირად იზოლაციაში ხვდება. ამ კლიმატური პირობების მიუხედავად, მაღალმთიან აჭარას არ ემსახურება საკუთარი რეანომობილი, რომელიც ჯანმრთელობის საჭიროების დროს მოქალაქეების სასწრაფო სამედიცინო მხარდაჭერას დროულად შეძლებდა“. ორგანიზაცია უკვე მერამდენედ მოითხოვს, სახელმწიფომ მაღალმთიანი აჭარისთვის შესაბამისი სამედიცინო ინფრასტრუქტურა შექმნას მოქალაქეების სასწრაფო სამედიცინო მხარდაჭერის უზრუნველსაყოფად. სრულად... წყარო: ორგანიზაციის გვერდი სოციალურ ქსელში ფოტო: შორენა შავაძე

თბილისი. საქართველოს დემოკრატიული ინიციატივა (GDI) პრაიდზე თავდასხმაში ბრალდებულების გათავისუფლებას განცხადებით ეხმაურება. „სასამართლოს მიერ მიღებული გადაწყვეტილება არის ხელისუფლების ერთიანი პოლიტიკის ნაწილი - უარი თქვას სიძულვილით მოტივირებული დანაშაულების წინააღმდეგ სათანადოდ ბრძოლაზე და მოძალადეების დასჯაზე. დღევანდელი გადაწყვეტილება განსაკუთრებით საგანგაშოა იმ ფონზე, როდესაც მოძალადეთა გათავისუფლებას დიდი ხანია ითხოვენ ძალადობრივი ჯგუფები, მათ შორის ალტ-ინფო. მსგავსი მოწოდებებით აქცია დაანონსდა 24 დეკემბერსაც, ამგვარი თანადროული პროცესი კი დამატებით კითხვებს აჩენს სახელმწიფოს რეალურ ზრახვებთან დაკავშირებით“, ნათქვამია განცხადებაში. სრულად... წყარო: gdi.ge

თბილისი. სოციალური სამართლიანობის ცენტრის ინფორმაციით, კორონავირუსის პრევენციისთვის შეზღუდვების შემოღების უფლებამოსილება მთავრობას 2023 წლამდე უგრძელდება. „ადამიანის უფლებებთან დაკავშირებული ასეთი ფუნდამენტური საკითხების გადაწყვეტა საქართველოს პარლამენტის კონსტიტუციური უფლებამოსილებაა. „საზოგადოებრივი ჯანმრთელობის დაცვის შესახებ“ კანონი კი ითვალისწინებს ამ უფლებამოსილების მთლიანად მთავრობაზე გადანდობას, რაც პარლამენტის მიერ საკანონმდებლო ფუნქციის შესრულებაზე უარის თქმასა და ქვეყანაში დე-ფაქტო საგანგებო მდგომარეობის დაკანონებას უტოლდება“. ორგანიზაციის აზრით, პარლამენტი არ უნდა შემოიფარგლოს მთავრობაზე უფლებამოსილების დელეგირების ვადის ავტომატური გაგრძელებით და დეტალურად უნდა მოწესრიგდეს პანდემიის მართვის პროცესში მთავრობის უფლებამოსილების ფარგლები. სრულად... წყარო: socialjustice.org.ge ფოტო: parliament.ge

იმერეთი. საქართველოს ახალგაზრდა იურისტთა ასოციაციის ქუთაისის ფილიალის მიერ ქუთაისის მცირე საოჯახო ტიპის სახლში ტრენინგი ჩატარდა. თემები: არასრუწლოვანთა ქორწინება და რისკები. სტიგმა და დისკრიმინაცია. გენდერული თანასწორობა. სრულად... წყარო: ორგანიზაციის გვერდი სოციალურ ქსელში

თბილისი. საქართველოს სახალხო დამცველი აქვეყნებს სპეციალურ ანგარიშს „(ა)იპ ჯავახეთის ნინოწმინდის წმინდა ნინოს სახელობის მზრუნველობამოკლებულ ბავშვთა პანსიონის აღსაზრდელთა უფლებრივი მდგომარეობის შესახებ“. „კვლევის შედეგებმა ცხადყო, რომ 2021 წლის გაზაფხულზე განვითარებული მოვლენების შემდეგ გადადგმული ნაბიჯების მიუხედავად, პანსიონში კვლავ რჩება არაერთი გამოწვევა, როგორც დაწესებულების და აღსაზრდელთა დოკუმენტაციის წარმოების, ისე არასრულწლოვანთა ინდივიდუალური, მათ შორის, ბიო-ფსიქო-სოციალური საჭიროებების შეფასებისა და უზრუნველყოფის კუთხით. პრობლემური და არაეფექტურია ბავშვებთან მომუშავე უწყებებსა და დაწესებულებებს შორის კომუნიკაციისა და ინფორმაციის გაცვლის საკითხი, რაც არსებითად უარყოფითად აისახება არასრულწლოვანთა საჭიროებების დაკმაყოფილების პროცესზე და ეწინააღმდეგება მათ ინტერესებს“, - ნათქვამია კვლევაში. სრულად... წყარო: ombudsman.ge

თბილისი. სოციალური სამართლიანობის ცენტრი წარმოგიდგენთ ორგანიზაციის შეფასებას: როგორი იყო რელიგიის თავისუფლების და არადომინანტური ეთნიკური ჯგუფების მდგომარეობა ქვეყანაში 2021 წელს. „მიმდინარე წელს ისევ ვიხილეთ რელიგიური და ეთნიკური კონოტაციის მქონე სოციალური კონფლიქტები ჩვენს ქვეყანაში, რომელიც ხელისუფლებისთვის თანასწორობისა და ინტეგრაციის პოლიტიკაში პოზიტიური გარდაქმნებისა და არსებითი რეფორმების სიგნალი ისევ არ გახდა. მეტიც, ეთნიკური უმცირესობებით კომპაქტურად დასახლებულ რეგიონებში წინასაარჩევნო პროცესებმა და ხელისუფლების მხრიდან მათი პოლიტიკური ინსტრუმენტალიზების გამოცდილებამ კიდევ ერთხელ აჩვენა, ამ რეგიონების ინტეგრაციის სუსტი პოლიტიკის, დემოკრატიიდან გამორიცხვისა და პერიფერიალიზაციის პოლიტიკური განზრახვები“. სრულად... წყარო: socialjustice.org.ge

თბილისი. სოციალური სამართლიანობის ცენტრი გთავაზობთ შეფასებას: როგორი იყო უფლებრივი მდგომარეობა კონფლიქტის რეგიონებში 2021 წელს. „2021 წელს კონფლიქტის რეგიონებში მდგომარეობა არ გაუმჯობესებულა. კრიტიკული უფლებრივი გამოწვევები კვლავაც ართულებს აქ მცხოვრები ადამიანების ყოველდღიურობას. გალში და ახალგორში გრძელდება ეთნიკურად ქართველების მიმართ დისკრიმინაციული პრაქტიკა. 2021 წელს გალის სკოლებში სრულად აიკრძალა ქართულ ენაზე სწავლება. ამ გადაწყვეტილებით პრაქტიკულად დასრულდა რუსიფიკაციის პროცესი გალის სკოლებში რომლებიც წლების წინ დაიწყო. იგივე მდგომარეობაა ახალგორის საგანმანათლებლო სექტორშიც. კვლავ ვერ ხერხდება კონფლიქტის რეგიონებთან მიმოსვლის რეჟიმის გაუმჯობესება, რასაც 2021 წელს არაერთი ტრაგიკული შედეგი მოჰყვა“. სრულად... წყარო: socialjustice.org.ge