ეუთოს დემოკრატიული ინსტიტუტებისა და ადამიანის უფლებების ოფისმა (OSCE/ODIHR) გამოაქვეყნა წევრ სახელმწიფოებში სიძულვილის მოტივით ჩადენილი დანაშაულების 2018 წლის სტატისტიკა.  ODIHR-ის სიძულვილით მოტივირებული დანაშაულების ბაზა ყველაზე დიდია მსოფლიოში. ის აერთიანებს როგორც სახელმწიფო უწყებებისგან, ისე სამოქალაქო საზოგადოებისგან მიღებულ მონაცემებს; მათ შორისაა საქართველოდან მიღებული მონაცემებიც.  სრულად... წყარო: http://tdi.ge

თბილისი. საია მოუწოდებს ხელისუფლებას დროულად და აქტიურად იმუშაოს ეგრეთ წოდებული სამხრეთ ოსეთის ოკუპაციური რეჟიმის უკანონო პატიმრის, ვაჟა გაფრინდაშვილის გათავისუფლების საკითხზე. „გავრცელებული ინფორმაციით, ვააჟა გაფრინდაშვილის ე.წ. ადმინისტრაციულ საზღვართან მისვლის მიზანიც ახალგორში მცხოვრები პირისთვის სათანადო სამედიცინო დახმარების აღმოჩენა იყო. კერძოდ, ვაჟა გაფრინდაშვილის ოჯახი ერთ-ერთ ვერსიად განიხილავს, რომ ქართველი ექიმი ოკუპირებულ ახალგორში ღრმა ჭაში ჩავარდნილი ადგილობრივი მცხოვრების დასახმარებლად გაემართა, რომელსაც თბილისში გადმოყვანაზე და კვალიფიციური სამედიცინო დახმარების მიღებაზე უარი უთხრეს“, - აღნიშნულია ორგანიზაციის მიერ გავრცელებულ განცხადებაში, - „საია მოუწოდებს საქართველოს ხელისუფლებას, სწრაფად და ეფექტიანად მიიღოს ყველა შესაძლო ზომა ვაჟა გაფრინდაშვილის უკანონო პატიმრობიდან გათავისუფლების საკითხზე; მაქსიმალურად გამოიყენოს ყველა შესაძლო საერთაშორისო სამართლებრივი მექანიზმები, რათა დაიძლიოს ოკუპირებულ ტერიტორიებზე არსებული ჰუმანიტარული კრიზისი და იქ მცხოვრებ პირებს მიეცეთ შესაძლებლობა მიიღონ საბაზისო საჭიროებები, მათ შორის მაღალკვალიფიციური სამედიცინო დახმარება". საია, ასევე მოუწოდებს საერთაშორისო თანამეგობრობასა და შესაბამის საერთაშორისო ორგანიზაციებს, დაეხმაროს ქართულ მხარეს აღნიშნული პრობლემების მოგვარებაში; გაააქტიურონ ძალისხმევა აფხაზეთსა და ცხინვალის რეგიონში უფლებების მასობრივი დარღვევის წინააღმდეგ საბრძოლველად და ოკუპირებულ ტერიტორიებზე მათი წარმომადგენლობის სადამკვირვებლო საქმიანობის განსახორციელებლად“. სრულად...  წყარო: https://gyla.ge/ge

გაეროს ქალთა ორგანიზაცია ძირითადი ანგარიშის „მსოფლიო ქალთა პროგრესი 2019: ოჯახები ცვალებად მსოფლიოში” პრეზენტაციას მართავს. „2019 წლის მსოფლიო ქალთა პროგრესის გამოცემა წარმოადგენს ოჯახების ამჟამინდელი რეალობის ყოვლისმომცველ შეფასებას, რომელშიც გათვალისწინებულია ფართო ეკონომიკური, დემოგრაფიული, პოლიტიკური და სოციალური ცვლილებები. ანგარიში აერთიანებს გლობალურ, რეგიონულ და ეროვნულ მონაცემებს, ასევე, მოიცავს ისეთი მნიშვნელოვანი საკითხების სიღრმისეულ ანალიზს, როგორებიცაა საოჯახო სამართალი, შემოსავალი და დასაქმება, აუნაზღაურებელი შრომა, ქალთა მიმართ ძალადობა, ოჯახები და მიგრაცია და სხვა”, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. გაეროს ქალთა ორგანიზაციის მხარდაჭერით, საქართველოს ადვოკატთა ასოციაციის სასწავლო ცენტრში ქალთა მიმართ და ოჯახში ძალადობის საკითხებზე ადვოკატ ტრენერთა ტრენინგი მიმდინარეობს. „ტრენინგი მიზნად მონაწილეებისთვის ახალი საკანონმდებლო რეგულაციების, ქალთა მიმართ და ოჯახში ძალადობის ფსიქოლოგიური ასპექტების სწავლებას ისახავს, რაც, უპირველეს ყოვლისა, ძალადობაგანცდილი პირების მეორეული ვიქტიმიზაციის პრევენციას ითვალისწინებს. ტრენერები ადვოკატებისთვის განკუთვნილ სასწავლო პროგრამას საქართველოს სხვადასხვა რეგიონში გაუძღვებიან“. სრულად... წყარო: ორგანიზაციის გვერდი სოციალურ ქსელში

თბილისი. თბილისის ადამიანის უფლებათა სახლის სახელით წევრი ორგანიზაციები ეხმაურებიან 2019 წლის 8 ნოემბერს, კინოთეატრ „ამირანთან“, უფლებადამცველების – ანა სუბელიანისა და თამაზ სოზაშვილის მიმართ ფიზიკური და სიტყვიერი შეურაცხყოფის ინციდენტს, ასევე კინოთეატრ ამირანში დაგეგმილი კინოჩვენების ხელის შეშლის ფაქტს. „უფლებადამცველების განსაკუთრებით მნიშვნელოვანი როლი საზოგადოებისა და დემოკრატიის განვითარებაში მსოფლიო მასშტაბით არის აღიარებული, არსებობს უფლებადამცველების დაცვისთვის აღიარებული პრინციპები, მათ შორის გაეროს უფლებადამცველების შესახებ დეკლარაცია. შესაბამისად, მოვუწოდებთ საქართველოს ხელისუფლებას უზრუნველყოს უფლებადამცველების ეფექტიანი დაცვა, შეუქმნას მათ უსაფრთხო და თავისუფალი გარემო, რათა შეფერხების გარეშე და უსაფრთხოდ განახორციელონ თავიანთი საქმიანობა“, ნათქვამია ორგანიზაციის ვებგვერდზე. სრულად... წყარო: hrht.ge

პრატფორმა European.ge აქვეყნებს ირაკლი ჭედიას ბლოგპოსტს: ლიბერალური ტოტალიტარიზმი – რატომ ცდილობენ ჩვენს გამარტოსულებას? „საზოგადოებისა და ინდივიდების ატომიზირებისთვის დღეს საკმარისია, მათ უბიძგოთ კონფორმიზმისკენ, გადამეტებული მომხმარებლობისაკენ და ამავდროულად განუწყვეტლივ აწარმოოთ მათი ინდოქტრინაცია პროპაგანდის ყველა იმ თანამედროვე საშუალებით, რომლებიც ფრიდრიხ გებელსს არც კი დასიზმრებია. პარალელურად, გავლენის ქვეშ მყოფი მედია და ფსევდოინტელექტუალთა ჯარი განუწყვეტლივ ცდილობს არამეინსტრიმული და არაპოლიტკორექტული ხედვების, ასევე არასასურველი პიროვნებების მარგინალიზაციას; დასცინის და ამცირებს მათ. არასასურველი შეხედულებების მქონე ადამიანებს ფიზიკურად აღარ ხვრეტენ და არც ასახლებენ, თუმცა ხდება მათი იზოლირება სოციუმიდან გარიყვის გზით. ტოტალიტარული რეჟიმებისთვის დამახასიათებელი ფიზიკური განადგურება ჩანაცვლდა არანაკლებ ეფექტური ვირტუალური განადგურებით“, ნათქვამია ბლოგპოსტში. სრულად... წყარო: european.ge

თბილისი. „ადამიანის უფლებების სწავლებისა და მონიტორინგის ცენტრი (EMC)“ 2019 წლის 2 დეკემბერს ორგანიზებას გაუწევს ერთდღიან ტრენინგს სისხლის სამართლის ადვოკატებისთვის, თემაზე “მოქმედი ნარკოპოლიტიკა და ადამიანის უფლებები”.  „ტრენინგის მიზანია, სისხლის სამართლის ადვოკატებთან ერთად მოქმედი ნარკოპოლიტიკის გამოწვევების განხილვა, ნარკოპოლიტიკის ცვლილების მიზნით მომზადებული საკანონმდებლო ცვლილებების შინაარსის განხილვა, ნარკოტიკული დანაშაულის მიმართ სახელმწიფოს არაჰუმანურ პოლიტიკასთან დაკავშირებით ცნობიერების ამაღლება და მგრძნობელობის გაზრდა სისხლის სამართლის ადვოკატებისთვის. ამ მიზნით, ტრენინგის ფარგლებში მიმოხილული იქნება ნარკოტიკულ დანაშაულებთან მიმართებით საკანონმდებლო და მართლმსაჯულების პრობლემები, საკონსტიტუციო სასამართლოს როლი ნარკოპოლიტიკის ლიბერალიზაციის თვალსაზრისით, წამალდამოკიდებულების მკურნალობასთან დაკავშირებული მიდგომებისა და ზიანის შემცირების საკითხები“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. გენდერული საინფორმაციო პორტალის თანახმად, მაკო გომური დაზარალებულად ცნეს. „პროკურატურამ „გავრილოვის ღამის“ ერთ-ერთი დაზარალებული მაკო გომური, რომელმაც თვალი დაკარგა, დაზარალებულად ცნო. პროკურატურის ინფორმაციით, დაზარალებულის სტატუსი მიენიჭათ ომარ სეხნიაშვილსა და მირზა ლიპარტელიანსაც, თუმცა არა გიორგი სულაშვილს, რომელმაც, მაკო გომურის მსგავსად, თვალი დაკარგა“. სრულად... წყარო: www.ginsc.net

იმერეთი. PITA ქუთაისის ახალგაზრდული ცენტრის წევრებისთვის ჩატარდა სამდღიანი ტრენინგი თემაზე: „მრავალფეროვნების მართვა, ტოლერანტობა და სოციალური ინოვაციები“. „ტრენინგის მიზანი იყო ახალგაზრდების ცნობიერების ამაღლება მრავალფეროვნების, ტოლერანტობის და სოციალური ინოვაციების საკითხებზე“. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია (საია) 6 თვის მანძილზე პენსიის დაზოგვის გამო პენსიონერისათვის საპენსიო თანხის გადახდის შეჩერებას საია საკონსტიტუციო სასამართლოში ასაჩივრებს. „საიამ პენსიონერ მედია კვაჭაძის სახელით საკონსტიტუციო სასამართლოს მიმართა. წარდგენილი სარჩელით საია ითხოვს „სახელმწიფო პენსიის შესახებ“ კანონის და საქართველოს ჯანდაცვის მინისტრის ბრძანების იმ ნორმის არაკონსტიტუციურად ცნობას, რომელიც ითვალისწინებს პენსიის შეჩერებას, თუ პენსიონერმა 6 თვის განმავლობაში საბანკო ანგარიშზე დატოვა პენსია. პენსიონერს აქვს პენსიის განახლების მოთხოვნის უფლება, თუმცა მას აუნაზღაურდება მხოლოდ ერთი წლის პენსია“, ნათქვამია ორგანიზაციის ვებგვერდზე. სრულად... წყარო: gyla.ge

კავშირი „საფარი“ აქვეყნებს theguardian.com-ზე გავრცელებული ბლოგ პოსტის ქართულენოვან თარგმანს. „იაპონურ საზოგადოებაში გავრცელებული სილამაზის სტანდარტების გამო, მხედველობის პრობლემების მქონე ქალებს აქ დამსაქმებელი აიძულებს, სათვალის ნაცვლად კონტაქტური ლინზები გამოიყენონ. ჰეშთეგი „სათვალის აკრძალვა“ (#メガネ着用禁止) იაპონიის სოციალურ ქსელებში ამ კვირაში ძალზე პოპულარული გახდა მას შემდეგ, რაც ტელეარხმა Nippon-მა სიუჟეტი გაუშვა იმ კომპანიების შესახებ, რომლებიც თავის ახლო- ან შორსმხედველი თანამშრომლებისგან სამუშაო ადგილას სათვალის ნაცვლად კონტაქტური ლინზების გამოყენებას მოითხოვდნენ. ფლეშმობის ფარგლებში, იაპონელმა ქალებმა Twitter-ზე თავისი სათვალის ან სათვალეში გადაღებული ფოტოების გამოქვეყნება დაიწყეს. ზოგიერთმა მსგავსმა ტვიტმა 25 000 რეტვიტიც კი დააგროვა“. სრულად... წყარო: sapari.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება ლევან აკინის ფილმის „და ჩვენ ვიცეკვეთ“ პრემიერის წინააღმდეგ ქართული მარშის ლიდერებისა და ლევან ვასაძის მიერ ორგანიზებულ ძალადობრივ აქციას. ორგანიზაცია მოუწოდებს ხელისუფლებას მიიღოს დროული სამართლებრივი ზომები ძალადობის ორგანიზებაზე პასუხისმგებელი პირების მიმართ. „ამასთან, არსებითი შეცდომა, რომელიც ხელისუფლებამ დაუშვა პრემიერამდე გაკეთებული მუქარის შემცველი განცხადებების იგნორირება და მათზე გამოძიების დაწყებისგან თავის შეკავება. გამოძიებას და შეკრების ორგანიზატორების დაკითხვას პრევენციული ფუნქცია ექნებოდა და მათ ძალადობრივ ინიციატივებს შეზღუდავდა“, ნათქვამია ორგანიზაციის განცხადებაში. სრულად... წყარო: emc.org.ge

თბილისი. სამოქალაქო პლატფორმა „არა-ფობიას" 2019 წლის 8 ნოემბერს ფილმის "And then We Danced" პრემიერასთან დაკავშირებით განვითარებულ მოვლენებს ეხმაურება.  „მიგვაჩნია, რომ სამართალდამცავი უწყებების მიერ გატარებული ღონისძიებები არ ყოფილა საკმარისი ძალადობრივი ჯგუფების ქმედებებისა და მათგან მომდინარე საფრთხეების აღსაკვეთად. მნიშვნელოვანია სახელმწიფომ გამოავლინოს შესაბამისი ძალისხმევა და მკვეთრი პოლიტიკური ნება სიძულვილით მოტივირებული დანაშაულების წინააღმდეგ საბრძოლველად. ამასთან, აუცილებელია გატარდეს ღონისძიებები ძალადობრივი ჯგუფების ქმედებების მზარდი ტენდენციის წინააღმდეგ, რაც აღვივებს დაპირისპირებას საზოგადოებაში და ქმნის დაუცველ და არატოლერანტულ გარემოს“, - აღნიშნულია განცხადებაში.  სრულად...  წყარო: www.gdi.ge

თბილისი. თბილისისა და ბათუმის კინოთეატრებში, ფილმის “და ჩვენ ვიცეკვეთ” (And then we danced) ჩვენებასთან დაკავშირებული ვითარების გამო, საქართველოს ჟურნალისტური ეთიკის ქარტიის საბჭო განცხადებას ავრცელებს.  „ქარტიის საბჭო მოუწოდებს: აქციების ორგანიზატორებს - მუშაობაში ხელი არ შეუშალონ მედიის წარმომადგენლებს; სამართალდამცავ უწყებას - განსაკუთრებული ყურადღება გამოიჩინონ ამბის გასაშუქებლად მისული ჟურნალისტების უსაფრთხოების დასაცავად. ქარტიის საბჭო, ასევე, მიმართავს მედიის წარმომადგენლებს, მაქსიმალურად აღიჭურვონ ამომცნობი, მაიდენტიფიცირებელი ნიშნებით (ბეიჯით, ჟილეტით და ა.შ.), რათა სამართალდამცავებმა საჭიროების შემთხვევაში მარტივად შეძლონ მათი ამოცნობა და უსაფრთხოების უზრუნველყოფა“, - ნათქვამია განცხადებაში.  სრულად...  წყარო: https://www.qartia.ge

თბილისი. კავშირი საფარი აქვეყნებს საინფორმაციო ბლოგპოსტს, რომელიც პაემანზე ნარკოტიკების შეტყუებით სექსუალურ ძალადობაზე მოგვითხრობს. რა ხერხებს მიმართავენ მოძალადეები თქვენს წინააღმდეგ, როგორ უნდა დაიცვათ მათგან თავი და რა ზომებს უნდა მიმართოთ ინციდენტის შემთხვევაში - ამ კითხვებზე პასუხს ორგანიზაციის ბლოგპოსტში იპოვით. „ზოგადად, „პაემანზე გაუპატიურების ნარკოტიკად“ შეიძლება ჩაითვალოს ნებისმიერი ნარკოტიკი, რომელიც პოტენციური მსხვერპლის გონების დაბინდვას და მისი წინააღმდეგობის უნარის წართმევის მდგომარეობას იწვევს, მათ შორის ზოგიერთი ურეცეპტოდ დაშვებული პრეპარატი, ასევე ე. წ. ქუჩის ნარკოტიკები, მაგალითად ჰეროინი. ასევე „პაემანზე გაუპატიურების ნარკოტიკად“ შეიძლება გამოყენებულ იქნას კანაფიც და დიდი რაოდენობით ალკოჰოლიც. თუმცა, „პაემანზე გაუპატიურების ნარკოტიკებად“ მოძალადეები მაინც სპეციფიკურ პრეპარატებს იყენებენ, რომელთა ასპროცენტიანი შედეგის იმედი აქვთ“. სრულად... წყარო: sapari.ge

თბილისი. ადამიანის უფლებათა ცენტრი ივლისის, აგვისტოს, სექტემბრისა და ოქტომბრის თვეების წარმატებული საქმეების შესახებ ჩანაწერს ავრცელებს.  მათ შორისაა ისეთი საქმეები, როგორიცაა: სასამართლოს მიერ თბილისის მერიისთვის თბილისის ზღვის ტერიტორიაზე გამაფრთხილებელი ბანერებისა და კედლის მოწყობის დავალება;  20 ივნისის აქციის დროს დაკავებულ პირთა საქმეებზე ადმინისტრაციული საქმის წარმოების შეწყვეტა;  საჯარო რეესტრის მიერ საოკუპაციო ხაზთან მდებარე მიწის ნაკვეთის მოქალაქისთვის საკუთრებაში დარეგისტრირების დავალება;  სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრმა (EMC) საკონსტიტუციო სასამართლოს სარჩელით მიმართა.  EMC არაკონსტიტუციურად მიიჩნევს კანონმდებლობის იმ ნორმებს, რომელიც ერთი მხრივ, გაფიცვის უფლების ფარგლებს, და მეორე მხრივ, მისი შეზღუდვის საფუძვლებსა და პროცედურებს ადგენს.  სრულად...  წყარო: emc.org.ge

თბილისი. საფარის ბენეფიციარს, რომელიც ქმართან გაცილებულია, ყოფილმა მეუღლემ იმის გამო უჩივლა, რომ შვილს ჩაცმულობასთან დაკავშირებით შენიშვნა მისცა. „შემაკავებელი ორდერის თანახმად, დედას აეკრძალა შვილთან ურთიერთობა 15 დღის ვადით. ბავშვის დედამ დახმარებისთვის კავშირ „საფარს“ მიმართა. „საფარის“ იურისტმა თეა თადაშვილმა დედის მიმართ გამოწერილი შემაკავებელი ორდერი სასამართლოში გაასაჩივრა. 2019 წლის 6 ნოემბრის გადაწყვეტილებით, თბილისის საქალაქო სასამართლოს ადმინისტრაციულ საქმეთა კოლეგიამ სარჩელი დააკმაყოფილა და დედის წინააღმდეგ გამოწერილი შემაკავებელი ორდერი გააუქმა“, ნათქვამია ორგანიზაციის ვებ-გვერდზე. სრულად... წყარო: sapari.ge

თბილისი. ადამიანის უფლებების სწავლებისა და მონიტორინგის ცენტრი (EMC) ქვეყანაში აზარტულ თამაშებთან დაკავშირებით არსებული პრობლემების გადაჭრისთვის სახელმწიფოსგან აქტიური პოლიტიკის გატარებას მოითხოვს. „ხელმისაწვდომი კვლევების თანახმად, საქართველოში, აზარტულ თამაშებში მოსახლეობის, მათ შორის ბავშვების, ჩართულობა საგანგაშოდ მაღალია. აზარტული თამაშების გავრცელება და სოციალურ-ეკონომიკური მოწყვლადობა ერთმანეთთან მჭიდროდ გადაჯაჭვული მოვლენებია და, ცალკეულ შემთხვევებში, ერთმანეთს განაპირობებენ კიდეც“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაციის ინფორმაციით, პროკურატურამ ბრალი წარუდგინა პირს, რომელიც მის მიმართ გამოძალვის მიზნით განხორციელებულ ფიზიკურ და ფსიქოლოგიურ ძალადობაზე დავობს. „საია მიიჩნევს, რომ თენგიზ ერგემლიძეს ბრალი უსაფუძვლოდ, არასაკმარისი მტკიცებულებების პირობებში წარედგინა, რაც აჩენს ეჭვებს, რომ პროკურატურა მიკერძოებულად მოქმედებს“. სრულად... წყარო: gyla.ge

თბილისი. 7 ნოემბერს EMC-მ პრესკონფერენცია ჩაატარა და შეაფასა თემირლან მაჩალიკაშვილის სიცოცხლის ხელყოფის საქმის გამოძიების ფარგლებში ჩატარებული ახალი საგამოძიებო მოქმედებები, მათ შორის, სახელმწიფო უსაფრთხოების სამსახურის (სუს) ამჟამინდელი და ყოფილი მაღალჩინოსნების გამოკითხვის პროცესი. „სუს-ის მაღალი თანამდებობის პირების განმარტებებმა აჩვენა, რომ ამ სისტემაში კრიტიკულად მნიშვნელოვანი გადაწყვეტილებები, მათ შორის, სპეცრაზმისა და ლეტალური ძალის გამოყენების შესახებ, სათანადო ანალიზისა და ადეკვატური სამართლებრივი სტანდარტების გარეშე მიიღება. ცხადად ჩანს, რომ ამ პროცესში პრობლემურია სათანადო კოორდინაცია და არ არსებობს ფორმალურად გაწერილი პროცედურული სტანდარტები. უწყების შიგნით პროცესების ამ ფორმით ორგანიზება და გადაწყვეტილებების მიღების ეს წესი ადამიანის უფლებების დარღვევის ძალიან მაღალ რისკებს ქმნის და უკიდურესად შემაშფოთებელი პრაქტიკაა“, ნათქვამია ორგანიზაციის გვერდზე. სრულად... წყარო: emc.org.ge

თბილისი. საქართველოს სახალხო დამცველის ინიციატივით და გაეროს განვითარების პროგრამის (UNDP) მხარდაჭერით 2019 წლის 5 ნოემბრიდან გაეროს შეზღუდული შესაძლებლობის მქონე პირთა უფლებების კომიტეტის ზოგადი კომენტარები სახალხო დამცველის ვებ-გვერდზე ქართულ ენაზე იქნება ხელმისაწვდომი. „სახალხო დამცველი იმედოვნებს, რომ დასახელებული საერთაშორისო დოკუმენტების ქართულ ენაზე მისაწვდომობა მნიშვნელოვნად შეუწყობს ხელს შეზღუდული შესაძლებლობის მქონე პირებს და სფეროში მომუშავე ორგანიზაციებს ყოველდღიურ საქმიანობაში, უფლებების ადვოკატირების პროცესში აქტიურად გამოიყენონ კომიტეტის მიდგომები და განმარტებები, რაც გააუმჯობესებს ქვეყანაში შშმ პირთა უფლებების დაცვის ხარისხს“, - ნათქვამია სახალხო დამცველის აპარატის მიერ გავრცელებულ ინფორმაციაში. სრულად...  წყარო: http://ombudsman.ge