შიდა ქართლი. 27 ნოემბერს გორის სამოქალაქო აქტივიზმის ცენტრი, გაეროს 16-დღიან კამპანიას, გენდერული ძალადობის წინააღმდეგ შეუერთდა. „კამპანიის ფარგლებში, ცენტრის მოხალისეები, თეატრის ბაღში შეიკრიბნენ და ერთხმად დაგმეს ძალადობა შემოდგომის ცივ ამინდში, ახალგაზრდები ქალაქის ცენტრალურ ქუჩებში გადანაწილდნენ და „ქუჩის განმანათლებლების” სტატუსით მოსახლეობის ინფორმირებაზე იზრუნეს. გარდა ამისა, სიმბოლურად ყავა და ჩაით, ტკბილეულობით, სტიკერებითა და ბევრი პოზიტივით გაუმასპინძლდნენ“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) 26 ნოემბრის მოვლენების შეფასების დოკუმენტს აქვეყნებს.  დოკუმენტში წარმოდგენილია პირველადი შეფასება, რამდენად კანონიერი და პროპორციული იყო სახელმწიფოს მხრიდან გამოყენებული საპოლიციო ძალა.  სრულად...  წყარო: emc.org.ge

თბილისი. „დაკარგული თვალის მიღმა“ - ასე ეწოდება საია-ს მიერ მომზადებულ ანგარიშს, რომელიც 20-21 ივნისის მოვლენებს ეხება. მისი პრეზენტაცია დღეს, 27 ნოემბერს გაიმართა.  ანგარიშში შეფასებულია: 2019 წლის 20-21 ივნისს აქციის დაშლის შესახებ მიღებული გადაწყვეტილების ლეგიტიმურობა და პროპორციულობა; არასათანადო მოპყრობის ფაქტები; ჟურნალისტთა წინააღმდეგ ძალის გადამეტებისა და ჟურნალისტური საქმიანობის განხორციელებაში ჩარევის შემთხვევები. ანგარიშში ასევე შეფასებულია 20-21 ივნისის მოვლენებთან დაკავშირებით ადმინისტრაციული წესით დაკავებისა და სასამართლოებში სამართალდარღვევათა საქმეების განხილვის პრაქტიკა.  სრულად...  წყარო: gyla.ge

თბილისი. საქართველოში ადამიანის უფლებებზე მომუშავე ადგილობრვი და საერთაშორისო ორგანიზაციები ევროპის საბჭოს ადამიანის უფლებათა კომისარს და საპარლამენტო ასამბლეას, ასევე წითელი ჯვრის საერთაშორისო კომიტეტს მიმართავენ. მიმართვა სამხრეთ ოსეთის ოკუპირებულ ტერიტორიაზე შექმნილ ჰუმანიტარულ კრიზისს, მათ შორის, ექიმ ვაჟა გაფრინდაშვილის უკანონო და თვითნებურ დაკავებას ეხება.  ორგანიზაციების ერთობლივ მიმართვაში აღნიშნულია, რომ კონფლიქტის პოლიტიკური და სამართლებრივი რეგულირების რესურსის არარსებობა, ხანგრძლივი პერიოდის განმავლობაში, მძიმედ აისახება უშუალოდ კონფლიქტის და მიმდებარე ტერიტორიაზე მცხოვრები ადამიანების უფლებების მდგომარეობაზე. სიტუაციის სიმძიმეს ხელს უწყობს ადამიანის უფლებათა საერთაშორისო მონიტორინგის მექანიზმების არარსებობა და სისუსტე ოკუპირებულ რეგიონებში. სრულად...  წყარო: www.gdi.ge

თბილისი. ევროპის საბჭოს ადგილობრივ და რეგიონულ ხელისუფალთა კონგრესისა და საქართველოს ადგილობრივ თვითმმართველობათა ეროვნული ასოციაციის (NALAG) ორგანიზებით სემინარი - „ადამიანის უფლებების დაცვის გაძლიერება ადგილობრივ დონეზე“ გაიმართა. „სემინარი, რომელსაც მოდერატორობას ადგილობრივი ექსპერტები - თამარ თომაშვილი და კოკა კიღურაძე უწევდნენ, ადგილობრივ დონეზე ადამიანის უფლებების სფეროში საქართველოს მიერ ნაკისრი ვალდებულებების და შესაბამისი საერთაშორისო სტანდარტების შესრულების ირგვლივ მსჯელობას, მათ შორის, გენდერული თანასწორობის, დისკრიმინაციის, უმცირესობების და მოწყვლადი ჯგუფების უფლებების დაცვასა და სხვა საკითხების განხილვას დაეთმო. მოგვიანებით კი, სემინარი სამუშაო რეჟიმში გაგრძელდა, სადაც ჯგუფებმა ადგილობრივ დონეზე გენდერული თანასწორობის მიმართულებით საკუთარი ხედვები წარმოადგინეს“, ნათქვამია ორგანიზაციის გვერდზე სოციალურ ქსელში. სრულად... წყარო: nala.ge

თბილისი. პარტნიორობა ადამიანის უფლებებისთვის (PHR) ორგანიზებით, 25 ნოემბერს, თბილისის 150-ე საჯარო სკოლის მოსწავლეებს, გასაცნობად და ბავშვთა უფლებებზე სასაუბროდ თბილისის საქალაქო სასამართლოს მოსამართლე, ირაკლი კოპალიანი ეწვია. „არაფორმალურ გარემოში, მოსამართლე პასუხობდა ბავშვების დასმულ შეკითხვებს, რომელიც ეხებოდა სხვადასხვა საინტერესო თემებს, მათ შორის, მოსამართლის როლს ბავშვთა და ადამიანის უფლებების დაცვის პროცესში, მოსამართლედ გახდომის პროცედურებს, სირთულეებს, რომელიც მხარეებს შორის დავების გადაწყვეტას თან ახლავს. შეხვედრის ბოლოს ბავშვები და მოსამართლე შეთანხმდნენ, რომ მომავალი შეხვედრა სასამართლოში გაიმართება, სადაც მოსამართლე უმასპინძლებს ბავშვებს, გააცნობს სასამართლოს და ადგილზე აჩვენებს საქმეთა განხილვის პროცესს, შემდეგ კი მათ შეკითხვებს უპასუხებს“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

20-დან 22 ნოემბრის ჩათვლით გორში, თელავსა და ქუთაისში, სამოქალაქო ორგანიზაციებმა გამართეს ბავშვთა მიმართ ძალადობის შემცირებისკენ მიმართული კამპანია - „თქვენთვის შეტყობინებაა“, რომლის მიზანი იყო მოქალაქეების ინფორმირება ბავშვთა მიმართ ძალადობის ფორმებზე. „კამპანიის ფარგლებში მოეწყო თეატრალიზებული მონოლოგები და დისკუსიები; გაიმართა თემატური პერფორმანსები და გამოფენები. კამპანიის დასასრულს, სამოქალაქო ორგანიზაციებმა და მოქალაქეებმა ხელი მოაწერეს პეტიციას და მოუწოდეს სახელმწიფოს, რომ ბავშვთა კეთილდღეობისა და ჰარმონიული განვითარების მიზნით ნაკისრი ვალდებულებები შეასრულოს და ქმედითი ნაბიჯები გადადგას“, ნათქვამი CIDA-ს გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. 23-24 ნოემბერს, ადამიანის უფლებების სწავლებისა და მონიტორინგმა (EMC) ახალი ინიციატივის ფარგლებში, დააფუძნა სოლიდარობის პლატფორმა, რომელიც აერთიანებს ქვემო ქართლიდან, პანკისიდან, აჭარიდან, სამცხე-ჯავახეთიდან და თბილისიდან ადგილობრივ აქტივისტებს. „სოლიდარობის პლატფორმის მიზანია რელიგიური და ეთნიკური უმცირესობებით დასახლებულ რეგიონებში მოღვაწე აქტივისტების ერთმანეთთან დაკავშირება და საჯარო ცხოვრებაში მათი გავლენების და მონაწილეობის გაძლიერების წახალისება. პლატფორმის პირველი შეხვედრის ზოგადი თემა ეხებოდა ნაციონალიზმის ისტორიას და პოლიტიკას, რომლის ფარგლებშიც თემატურად ლექციები წაიკითხეს მკვლევარებმა და ისტორიკოსებმა: გიორგი მაისურაძე, დავით ჯიშკარიანი, თამთა ხალვაში. სამოქალაქო ნაციონალიზმის მშენებლობის თემაზე პლატფორმის ბოლოს გაიმართა დისკუსია გიგა ბოკერიას და პაატა ზაქარეიშვილის მონაწილეობით“, ნათქვამია ორგანიზაციის ვებ-გვერდზე. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაციის განცხადებით, გენერალურმა პროკურატურამ მაკო გომურს სისხლის სამართლის საქმის მასალები სრულად არ გააცნო. „20-21 ივნისის მოვლენების დროს დაზარალებულ მაკო გომურს გენერალურმა პროკურატურამ შესაბამისი სტატუსი 2019 წლის 11 ნოემბერს მიანიჭა. აღნიშნულის შემდგომ, საიას ადვოკატებმა, რომლებიც მაკო გომურის ინტერესებს იცავენ, მოითხოვეს სისხლის სამართლის საქმის მასალების გაცნობა. 21 ნოემბერს, პროკურატურამ ადვოკატებს და დაზარალებულს სისხლის სამართლის საქმეში არსებული მასალები არასრულად გააცნეს, რითაც დაზარალებულს წაერთვა შესაძლებლობა, შეემოწმებინა და განესაზღვრა საქმეში არსებული დოკუმენტები იყო თუ არა მის შემთხვევასთან შემხებლობაში“, - ვკითხულობთ საიას განცხადებაში, - „მოვუწოდებთ საქართველოს გენერალურ პროკურატურას: მისცეს მაკო გომურს და მის ადვოკატებს საშუალება, გაეცნონ სისხლის სამართლის საქმის მასალებს სრულად; განახორციელოს მასზე დაკისრებული მოვალეობა და ჩაატაროს სრულყოფილი და ყოველმხრივი გამოძიება, მითუმეტეს იმის გათვალისწინებით, რომ მაკო გომურისთვის მიყენებული დაზიანებიდან უკვე 5 თვეზე მეტი გავიდა“. სრულად...  წყარო: https://gyla.ge

თბილისი. ორგანიზაციამ „პარტნიორობა ადამიანის უფლებებისთვის“ (PHR) 150-ე საჯარო სკოლაში ბულინგისა და ბავშვთა მიმართ ძალადობის შესახებ მოსწავლეებთან საინფორმაციო შეხვედრა ჩაატარა. „შეხვედრის ფარგლებში დაგეგმილი პრაქტიკული დავალებების საშუალებით მოსწავლეებმა ბულინგთან დაკავშირებული მნიშვნელოვანი საკითხები გამოკვეთეს; მოსწავლეებთან ერთად განიხილებოდა სასკოლო სივრცეში ბულინგის სხვადასხვა ფორმები; ასევე, ბულინგისა და ბავშვთა მიმართ ძალადობის მათთვის ცნობილი შემთხვევები; მოსწავლეებმა გაიხსენეს მათთვის ნაცნობი ისტორიები, ისაუბრეს აღნიშნული მიმართულებით სკოლების გამოწვევებზე და პრობლემების აღმოსაფხვრელად თავიანთი ხედვა გაგვიზიარეს“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

აჭარა. ევროკლუბის წევრებმა, 21 ნოემბერს კიდევ ერთი თანატოლთა ტრენინგი გამართეს, „გიმნაზია XXI საუკუნის“ მოსწავლეებთან. „არასრულწლოვნების შრომითი ურთიერთობები, შრომის უსაფრთხოება და ასოცირების ხელშეკრულება - ეს ის ძირითადი საკითხებია რაც შეხვედრის პროცესში მონაწილეების ჩართულობით განიხილეს. თანატოლთა ტრენინგები იმართება პროექტის „ევროინტეგრაციის პროცესის გაძლიერება მოქალაქეთა ინფორმირების გზით“ ფარგლებში, რომლის მხარდამჭერია „ფონდი ღია საზოგადოება საქართველო““, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

შიდა ქართლი. 17 ნოემბერს, გორის სახელმწიფო სასწავლო უნივერსიტეტში, CineDoc-Tbilisi on Tour-ის ფარგლებში ნაჩვენები იქნა ფილმი „მოლენბეკის ღმერთები“. „ფილმის ჩვენებისა და დისკუსიის შემდეგ კი მოხდა ესეების კონკურსის დაჯილდოება, რომელიც ეხებოდა ადამიანის და ქალთა უფლებებს“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

იმერეთი. გენდერული ძალადობის წინააღმდეგ 16 დღიანი კამპანიის ფარგლებში, ქუთაისის ახალგაზრდული ცენტრის წევრმა, სალი საკანდელიძემ, ქუთაისის მე-9, მე-19, 23-ე და 30-ე საჯარო სკოლებში ჩაატარა თანატოლთა განათლების ტრენინგი ქალთა უფლებებზე და გენდერული თანასწორობის თემაზე. ტრენინგის მიზანი იყო ქალთა უფლებების და გენდერული თანასწორობის შესახებ მოსწავლეების ცნობიერების ამაღლება. სრულად... წყარო: ორგანიზაციის გვერდი სოციალურ ქსელში

თბილისი. საქართველოს საზოგადოებრივი ორგანიზაციები აქვეყნებენ ერთობლივ განცხადებას და მიიჩნევენ, რომ დაკავებული დემონსტრანტების სასამართლო პროცესები მძიმე დარღვევების ფონზე ჩატარდა. „სასამართლომ 18 ნოემბრის აქციაზე დაკავებული 37 დემონსტრანტიდან ამ დროისთვის მხოლოდ 12 პირის საქმე განიხილა. მათგან 10-ს პატიმრობა შეუფარდა, ერთ დემონსტრანტს ჯარიმა და ერთს სიტყვიერი შენიშვნა მისცა. დანარჩენი დემონსტრანტების საქმეები მოსამართლეს დღეს უნდა განეხილა, თუმცა დილით ცნობილი გახდა, რომ პროცესები გადაიდო. დაკავებული დემონსტრანტების საქმეების განხილვის პროცესში ცალსახად შეიძლება ითქვას, რომ მოსამართლე უგულებელყოფდა კანონით დადგენილ მოთხოვნებს, იყო მიკერძოებული და ზღუდავდა დაკავებულთა უფლებებს“, ნათქვამია ორგანიზაციის ვებგვერდზე. სრულად... წყარო: www.transparency.ge

თბილისი. ევროპის უნივერსიტეტში, არასამთავრობო ორგანიზაციების - „პარტნიორობა ადამიანის უფლებებისთვის“ ( #PHR ) და „წამების მსხვერპლთა ფსიქოსოციალური და სამედიცინო რეაბილიტაციის ცენტრის” ( #GCRT ) ორგანიზებით ბავშვთა კონფერენცია ჩატარდა, სადაც ონლაინ ბულინგისა და ბავშვთა მიმართ სექსუალური ძალადობის თემები განიხილეს. „ბავშვები ეხმარებიან მთავრობას, იმუშაონ ბავშვებისთვის“- ამ სახელწოდების კონფერენცია ევროსაბჭოს პროექტის „ბავშვთა სექსუალურ ექსპლუატაციასა და ძალადობაზე რეაგირება საქართველოში, ფაზა 1“-ის მხარდაჭერით გაიმართა და სექსუალური ექსპლუატაციისა და სექსუალური ძალადობის წინააღმდეგ ბავშვთა დაცვის ევროპულ დღეს მიეძღვნა (18 ნოემბერი, 2019)“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

20 ნოემბერს, მსოფლიო ბავშვთა დღე აღინიშნება. “ბავშვის უფლებათა კონვენციის 30 წლის იუბილეს აღსანიშნავად, გაეროს ბავშვთა ფონდი 130-ზე მეტ ქვეყანაში აწყობს აქციას სახელწოდებით "ბავშვები მართავენ". აქციას თბილისის რამდენიმე სკოლაც შეუერთდა. უფროსკლასელებმა პატარებს საჩვენებელი გაკვეთილები ჩაუტარეს, მოაწყვეს მათთვის საინტერესო ექსპერიმენტები და პირველადი დახმარების გაწევაც ასწავლეს“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. საქართველოს სახალხო დამცველი ეხმიანება 2019 წლის 18 ნოემბერს დაკავებულ პირთა სასამართლო პროცესებს. „ამ ეტაპზე ჩვენს ხელთ არსებული ინფორმაციით დაკავებულთა ნაწილი დაკავებულია 18 ნოემბერს, სამუშაო დროს, შესაბამისად მათ მიმართ დაკავების მაქსიმალური ვადა საქართველოს კანონმდებლობის მიხედვით არის 12 საათი. ამ ვადის გასვლის შემდგომ, აუცილებელია მათი გათავისუფლება. აქვე გვსურს ხაზი გავუსვათ იმ ფაქტს, რომ ადმინისტრაციულად დაკავებულების საქმეებს განიხილავს მხოლოდ ერთი მოსამართლე, რაც ბუნებრივია ართულებს სწრაფი მართლმსაჯულების განხორციელებას. აუცილებელია დამატებით სხვა მოსამართლეთა პროცესში ჩართულობა, რათა არ დაირღვეს დაკავებულთა საპროცესო უფლებები. მოვუწოდებთ თბილისის საქალაქო სასამართლოს, დროულად, კანონმდებლობის მოთხოვნათა დაცვით და სამართლიანად წარმართონ სასამართლო განხილვები“, ნათქვამია ომბუდსმენის ვებგვერდზე. სრულად... წყარო: ombudsman.ge

20-დან 22 ნოემბრის ჩათვლით გორში, თელავსა და ქუთაისში, სამოქალაქო ორგანიზაციები გამართავენ ბავშვთა მიმართ ძალადობის შემცირებისკენ მიმართულ კამპანიას - „თქვენთვის შეტყობინებაა“. „მისი მიზანია მოქალაქეების ინფორმირება ბავშვთა მიმართ ძალადობის ფორმებზე. კამპანიის ფარგლებში, მოეწყობა თეატრალიზებული მონოლოგები და დისკუსიები, რომელიც თვალსაჩინოს გახდის იმ უარყოფით შედეგებს, რასაც ბავშვები საბავშვო ბაღში, სკოლაში, თუ ოჯახში განცდილი ძალადობის შედეგად იღებენ. ასევე გაიმართება თემატური პერფორმანსები და გამოფენები“, ნათქვამია საზოგადოება ბილიკის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. 2 დეკემბერს ადამიანის უფლებების სწავლებისა და მონიტორინგის ცენტრი (EMC) გამართავს ერთდღიან ტრენინგს სისხლის სამართლის ადვოკატებისთვის, თემაზე „მოქმედი ნარკოპოლიტიკა და ადამიანის უფლებები”.  „ტრენინგის მიზანია, სისხლის სამართლის ადვოკატებთან ერთად მოქმედი ნარკოპოლიტიკის გამოწვევების განხილვა, ნარკოპოლიტიკის ცვლილების მიზნით მომზადებული საკანონმდებლო ცვლილებების შინაარსის განხილვა, ნარკოტიკული დანაშაულის მიმართ სახელმწიფოს არაჰუმანურ პოლიტიკასთან დაკავშირებით ცნობიერების ამაღლება და მგრძნობელობის გაზრდა სისხლის სამართლის ადვოკატებისთვის”, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. საქართველოს საზოგადოებრივი ორგანიზაციები ერთობლივ განცხადებას ავრცელებენ და მოუწოდებენ ხელისუფლებას: „უარი თქვას აქციის მონაწილეთა მიმართებით ძალის გამოყენების ნებისმიერ ფორმასა და სიტუაციის ესკალაციაზე, რამაც შესაძლოა გამოიწვიოს სრული პოლიტიკური დესტაბილიზაცია და მოვლენათა შემდგომი განვითარება ყოველგვარი სამართლებრივი ჩარჩოების მიღმა მოაქციოს. სრულად... წყარო: emc.org.ge

თბილისი. ექიმ ვაჟა გაფრინდაშვილის სიცოცხლისა და უსაფრთხოების დაცვის მიზნით, ევროსასამართლომ დროებითი ღონისძიება უნდა გამოიყენოს, - ამის შესახებ ორგანიზაცია „კონსტიტუციის 42-ე მუხლი“ აცხადებს.  „ორგანიზაცია „კონსტიტუციის 42-ე მუხლი“ საოკუპაციო ძალების მიერ ექიმ ვაჟა გაფრინდაშვილის სიცოცხლისა და უსაფრთხოების დაცვის მიზნით, მიზანშეწონილად მიიჩნევს დაუყოვნებლივ მიმართოს ევროსასამართლოს რუსეთის ფედერაციის წინააღმდეგ ევროსასამართლოს რეგლამენტის 39-ე მუხლით გათვალისწინებული დროებითი ღონისძიების გამოყენების მოთხოვნით. აღნიშნული მუხლი ითვალისწინებს შემჭიდროვებულ ვადებში სახელმწიფოსათვის ვალდებულების დაკისრებას, რათა თავიდან იქნას აცილებული გამოუსწორებელი შედეგები. მით უმეტეს, არსებობს უკვე დადასტურებული ფაქტები, როდესაც საოკუპაციო ძალებთან და ე.წ. სამხრეთ ოსეთის ხელისუფლებისათვის წინააღმდეგობის გაწევა საქართველოს მოქალაქეებისათვის ტრაგიკულად დასრულდა“, - აღნიშნულია ორგანიზაციის მიერ გავრცელებულ განცხადებაში.  სრულად...  წყარო: https://article42.ge

თბილისი. ადამიანის უფლებების სწავლებისა და მონიტორინგის ცენტრი (EMC) და „მწვანე ალტერნატივა“ ჭიათურის მუნიციპალიტეტის სოფელ შუქრუთში მიმდინარე პროცესებს აფასებენ. „2019 წლის 7 ნოემბრიდან, ჭიათურის მუნიციპალიტეტის სოფელ შუქრუთის მაცხოვრებლები აქციას მართავენ. მათ სოფელში მდებარე შპს „ჯორჯიან მანგანეზის“ მაღაროს ფუნქციონირება შეაჩერეს. მოსახლეობა კომპანიის საქმიანობის შედეგად მათი სახლებისა და გარემოსთვის მიყენებული ზიანის ანაზღაურებას მოითხოვს. EMC მოუწოდებს სახელმწიფოს შესაბამის უწყებებს, უზრუნველყონ დაზარალებულთა საცხოვრისისა და ჯანსაღ გარემოში ცხოვრების უფლებების დაცვა“, ნათქვამია განცხადებაში.  სრულად... წყარო: emc.org.ge