თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება მედიაში გავრცელებულ ინფორმაციას სოფელ ხულგუმოსთან (ახალქალაქის მუნიციპალიტეტი) ადგილობრივი ქრისტიანული სალოცავის დარბევის შესახებ. ორგანიზაცია საქართველოს შინაგან საქმეთა სამინისტროს სავარაუდოდ, სიძულვილით მოტივირებული დანაშაულის სწრაფი და ეფექტიანი გამოძიებისკენ მოუწოდებს. „რელიგიური შეუწყნარებლობით მოტივირებულ დანაშაულებს უმცირესობათა ჯგუფების უსაფრთხოებასა და ინტეგრაციის პროცესზე ნეგატიური სოციალური გავლენა აქვთ, სწორედ ამიტომ არსებითია სამართალდამცავმა ორგანოებმა დროული, ეფექტიანი და სისტემური რეაგირება მოახდინონ“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საქართველოს სახალხო დამცველმა საქართველოს პრემიერ-მინისტრს და საქართველოს შინაგან საქმეთა მინისტრს მიმართა ზოგადი წინადადებით, ბოლო წლებში ლგბტ+ თემის წარმომადგენლების გამოხატვის და შეკრების თავისუფლებების შეზღუდვის ინდივიდუალური ფაქტები სახელმწიფო პოლიტიკის დონეზე გაანალიზდეს და ამ მიმართულებით, ერთიანი პრევენციული და რეაქტიული ღონისძიებები დაიგეგმოს.  „სახალხო დამცველმა ზოგად წინადადებაში მიმოიხილა ლგბტ+ ადამიანების გამოხატვის თავისუფლების რეალიზების მხრივ ქვეყანაში არსებული მდგომარეობა იმ ფაქტების ფონზე, რომელსაც ადგილი ჰქონდა 2018 წლის სექტემბრიდან 2019 წლის ივლისის ჩათვლით. კერძოდ, ყურადღება გაამახვილა 2018 წლის 9 სექტემბერს საფეხბურთო მოედანზე ლგბტ+ სიმბოლიკის შეტანის აკრძალვის საკითხზე, ასევე, 2019 წლის 18-23 ივნისს დაგეგმილი „ღირსების მარშის“ ირგვლივ განვითარებული მოვლენებსა და ლგბტ+ ადამიანების წინააღმდეგ ჰომოფობიურად განწყობილი ულტრა მემარჯვენე ჯგუფების გაძლიერების ტენდენციაზე. სახალხო დამცველის შეფასებით, თვალსაჩინოა, რომ შინაგან საქმეთა სამინისტროს მიერ გატარებული ღონისძიებები ლგბტ+ ადამიანების გამოხატვის თავისუფლების უფლების დაცვის კუთხით, ბუნდოვანია და არ ადასტურებს უფლებათა დაცვის სისტემური ხედვის არსებობას და ფაქტების პოტენციური შედეგების ანალიზს“, - ვკითხულობთ გავრცელებულ ინფორმციაში.  სრულად... წყარო: http://ombudsman.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ქამრან მამედოვის წერილს: დომინანტური მზერა საქართველოს აზერბაიჯანული თემის მიმართ. „იმისათვის, რომ განვსაზღვროთ, თუ რას ნიშნავს უმცირესობების მიმართ დომინანტური მზერა, უპირველეს ყოვლისა, უნდა გავარკვიოთ, რა არის საქართველო და ქართველი, რადგანაც უმცირესობების მიმართ მზერას უმეტესად განსაზღვრავს ის, თუ სად გადის ზღვარი ე.წ. ქართველს, ანუ ჩვენიანს, და სხვებს შორის. საქართველოში ამის შესახებ ორგვარი ნარატივია დომინანტური. ერთის მიხედვით, ქართველი არის ეთნიკური ქართველი და, ამავე დროს, მართლმადიდებელი. ხოლო, ვინც ამ ფორმულის მიღმა რჩება, ისინი წარმოადგენენ უმცირესობებს, უცხოს, პრობლემას. ამის საუკეთესო მაგალითია კავკასიის კვლევითი რესურსების ცენტრის ბოლო კვლევა, რომლის მიხედვითაც, მოსახლეობის თითქმის ნახევარი ეთნიკურ და რელიგიურ მრავალფეროვნებას უარყოფითად მიიჩნევს“, ნათქვამია წერილში. სრულად... წყარო: emc.org.ge

თბილისი. საქართველოს სახალხო დამცველი შინაგან საქმეთა სამინისტროს მოუწოდებს გატარდეს პროაქტიული პრევენციული ღონისძიებები „ქართული მარშის“ მიერ კინოფილმის „და ჩვენ ვიცეკვეთ“ ჩვენებისას თბილისისა და ბათუმის კინოთეატრების შესასვლელების ბლოკირების დაანონსებასთან დაკავშირებით. „სახალხო დამცველი განმარტავს, რომ შეკრებისა და მანიფესტაციის უფლებით დაცულია მხოლოდ მშვიდობიანი შეკრების შესაძლებლობა და არა იმგვარი ქმედებები, რომლებიც მიზნად ისახავს სხვათა უფლებებისა და თავისუფლებების შეზღუდვას. აღნიშნული მიზნით, შეკრებებისა და მანიფესტაციების შესახებ საქართველოს კანონი აქციის ორგანიზატორებს და მონაწილეებს გარკვეულ ვალდებულებებს აკისრებს, მათ შორის დაუშვებელია შეკრებისა და მანიფესტაციის ჩატარებისას შენობების შესასვლელების ბლოკირება“, - აღნიშნულია განცხადებაში. სრულად...  წყარო: http://ombudsman.ge

თბილისი. ათი საზოგადოებრივი ორგანიზაცია, ფილმის „და ჩვენ ვიცეკვეთ“ პრემიერის დღესთან დაკავშირებით, მედიაში გავრცელებულ მუქარას ეხმაურება. „განსხვავებული შეხედულებების მქონე ადამიანებზე ფიზიკური ძალადობა და მათი საკუთრების დაზიანება არის ის მეთოდი, რომელიც „ქართულ მარშს“ და სხვა ძალადობრივ ჯგუფებს წარსულშიც გამოუყენებიათ. შესაბამისად, მათი მუქარის გამო რეალური საფრთხე ექმნებათ იმ პირებს, რომლებსაც განზრახული აქვთ, 8 ნოემბერს ფილმის პრემიერას დაესწრონ. ხელისუფლების პოლიტიკური რიტორიკა და გზავნილები დაუცველი ჯგუფების მიმართ უმეტესწილად ორაზროვანია და ეწინააღმდეგება ადამიანის უფლებებისა და თანასწორუფლებიანობის ცნებებს. ხელისუფლება არათუ რიტორიკის დონეზე არ ეწინააღმდეგება მსგავსი ჯგუფებისგან მომდინარე საფრთხეებს, არამედ ასეთი ფაქტების რეაგირების გარეშე დატოვებით, ხელს უწყობს მათ ძალადობრივ ქმედებებს“, ნათქვამია განცხადებაში. სრულად... წყარო: ორგანიზაციის გვერდი სოციალურ ქსელში

თბილისი. „საერთაშორისო გამჭვირვალობა - საქართველო“ აქვეყნებს ბლოგპოსტს: რას ნიშნავს როცა ხარ საზოგადოებრივად აქტიური ქალი საქართველოში. „ბოლო პერიოდის განმავლობაში განსაკუთრებით გააქტიურდა დისკუსია ქალების საზოგადოებრივ ცხოვრებასა და პოლიტიკაში მონაწილეობის თაობაზე. საქართველოს მოსახლეობის უმრავლესობა საზოგადოებრივ ცხოვრებაში ქალების აქტიურად მონაწილეობას დადებითად აფასებს. საზოგადოებრივი აზრის კვლევის თანახმად, საქართველოს მოსახლეობის 65% მხარს უჭერს პარლამენტში სავალდებულო გენდერული კვოტის შემოღებას. ქალთა უფლებების გაძლიერებისთვის უკანასკნელ წლებში მნიშვნელოვანი საკანონდებლო ცვლილებები განხორციელდა, მათ შორის პარლამენტის გენდერული თანასწორობის საბჭოს ძალისხმევით. თუმცა საკანონმდებლო თვალსაზრისით ყველა წინ გადადგმული ნაბიჯი აზრს კარგავს, თუ ქალების პოლიტიკური და საზოგადოებრივი აქტიურობისა და კრიტიკული პოზიციების გამო მათ წინააღმდეგ ფსიქოლოგიური ტერორის განხორციელების შემთხვევაში, სახელმწიფოს და მმართველი პოლიტიკური ჯგუფების მხრიდან ეფექტური რეაგირება არ იქნება“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. საზოგადოებრივი ორგანიზაციები 20-21 ივნისის მოვლენების შედეგად დაზარალებულებისთვის სამართლებრივი სტატუსის მინიჭებას მოითხოვენ და სპეციალურ განცხადებას ავრცელებენ.  „ხელმომწერი ორგანიზაციები ვეხმაურებით 20-21 ივნისის მოვლენების შედეგად დაზარალებული პირებისათვის სამართლებრივი სტატუსის მინიჭებაზე უარის თქმის ფაქტს და მოვუწოდებთ პროკურატურას, დროულად მოახდინოს ყველა დაზარალებული პირისათვის დაზარალებულის სტატუსის მინიჭება და საქმის დროული, სრულყოფილი და ობიექტური გამოძიება“, - ვკითხულობთ განცხადებაში, - „მოვუწოდებთ საქართველოს გენერალურ პროკურატურას: დაუყოვნებლივ მიანიჭოს დაზარალებულის სტატუსი ყველა იმ პირს, რომლებიც 20-21 ივნისის მოვლენების შედეგად სამართალდამცავთა ქმედებების შედეგად დაზიანდნენ; მიმდინარე საქმეზე დროულად ჩატარდეს ეფექტიანი, ობიექტური და მიუკერძოებელი გამოძიება; მაღალი საზოგადოებრივი ინტერესის გათვალისწინებით, პერიოდულად მოხდეს საზოგადოების ინფორმირებულობა საქმეზე მიმდინარე გამოძიების პროგრესის შესახებ“.  სრულად...  წყარო: article42.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს თამუნა ქებურიას ინტერვიუს გარემოს დაცვის საკითხებში საჯარო პოლიტიკის მრჩეველ და აქტივისტ, სამუელ რიევასთან. ინტერვიუ ეხება ჩილეში, 20 ოქტომბერს დაწყებულ საპროტესტო გამოსვლებს, რომელსაც მნიშვნელოვანი პოლიტიკური ცვლილებები მოჰყვა. „აქ მნიშვნელოვანი ისაა, რომ მეტროს ტარიფების ზრდამდე იყო გარკვეული სიტუაცია, რამაც ძალიან გააბრაზა ხალხი. გაკეთდა რამდენიმე განცხადება მინისტრების მხრიდან, საიდანაც ისინი ხუმრობდნენ და დასცინოდნენ იმ სირთულეებს, რასაც რიგითი ადამიანები ყოველდღიურობაში აწყდებიან. შესაბამისად, ხალხი უკვე ძალიან გაღიზიანებული იყო. მთელი ეს მოვლენები - მინისტრების აგდებული დამოკიდებულება, პროტესტის დელეგიტიმაციის მცდელობა, რიგითი ადამიანების ყოველდღიურ ყოფაზე მიყენებული დარტყმა ძერწავდა იმ დიდ კონტექსტს, სადაც შემდეგ მოვლენები ისე განვითარდა, როგორც განვითარდა“... სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაციის (საია) ინფორმაციით, გაეროს შშმ პირთა უფლებების კომიტეტმა გაეროს შშმ პირთა უფლებების კონვენციის იმპლემენტაციის შესახებ საქართველოს მთავრობის მიერ წარდგენილი რიგით პირველი ანგარიშის წინასასესიო განხილვა ჩანიშნა. „დოკუმენტის პირველადი განხილვა 2020 წლის 30 მარტი - 3 აპრილის შუალედში მოხდება, რომლის შედეგადაც კომიტეტი მას კიდევ ერთხელ - პლენარულ სესიაზე განიხილავს. აღნიშნული პროცედურების შედეგად, საქართველოს მთავრობისა და სამოქალაქო სექტორის მიერ წარდგენილი ანგარიშებისა და ინფორმაციის საფუძველზე, კომიტეტი შეიმუშავებს საქართველოს მიმართ დასკვნით რეკომენდაციებს. ეს იქნება პირველი შემთხვევა, როდესაც კომიტეტის მიერ შეფასდება ქვეყანაში კონვენციის იმპლემენტაციის ხარისხი, მათ შორის, გაანალიზდება პროცესის პოზიტიური ასპექტები და მნიშვნელოვანი გამოწვევები“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საქართვლოს სახალხო დამცველმა შრომით ურთიერთობაში კერძო კომპანიის ხელმძღვანელის მიერ განხორციელებული სექსუალური შევიწროების ფაქტი დაადგინა.  საქმის ფაქტობრივი გარემოებების თანახმად, განმცხადებელი კომპანიაში გადიოდა სტაჟირებას. განმცხადებლის მითითებით, მისი უშუალო ხელმძღვანელის მხრიდან ადგილი ჰქონდა არასასურველ სექსუალური ხასიათის სიტყვიერ და ფიზიკურ ქმედებებს, რის გამოც განმცხადებელს შეექმნა დამამცირებელი სამუშაო გარემო და იძულებული გახდა, სამსახური დაეტოვებინა.  განმცხადებლის ინტერესებს სახალხო დამცველის აპარატში „საქართველოს ახალგაზრდა იურისტთა ასოციაცია“ წარმოადგენდა.  სრულად...  წყარო: http://ombudsman.ge

აჭარა. ღია საზოგადოების ფონდის ორგანიზებით, აჭარის ავტონომიური რესპუბლიკის საჯარო მოხელეებისთვის, დაიწყო ტრენინგები ანტიდისკრიმინაციული კანონმდებლობის აღსრულებასთან დაკავშირებით.  ტრენინგს წინ უძღვოდა კვლევა იმის შესახებ, თუ რამდენად ეფექტურად სრულდება პრაქტიკაში კანონი „დისკრიმინაციის ყველა ფორმის აღმოფხვრის შესახებ“; რამდენად გააზრებული აქვთ თანასწორობის პრინციპები საჯარო მოხელეებს და როგორ ახერხებენ ისინი ყოველდღიურ საქმიანობასა თუ კონკრეტულ კონტექსში თანასწორობის პრინციპის დაცვასა და დისკრიმინაციის შემთხვევების აღკვეთას.  კვლევა და ტრენინგი არის ნაწილი პროექტისა, რომელსაც ღია საზოგადოების ფონდის ევროინტეგრაციის პროგრამა ნიდერლანდების სამეფოს საელჩოს მხარდაჭერით ახორციელებს.  სრულად...  წყარო: https://osgf.ge

თბილისი. საქართველოს საკონსტიტუციო სასამართლომ დაგროვებითი საპენსიო სქემაში დასაქმებულთა ჩართვისა და დამსაქმებელთა შენატანის სავალდებულოობის არაკონსტიტუციურად ცნობის თაობაზე სარჩელი არსებითად განსახილველად მიიღო.  „სასამართლომ საფუძვლიანად მიიჩნია საპენსიო სქემაში დასაქმებულთა სავალდებულოდ ჩართვისა და მათ სასარგებლოდ დამსაქმებლის შენატანების დავალდებულების კონსტიტუციურობის შემოწმების მოთხოვნა საკუთრების უფლებასთან მიმართებით. საკონსტიტუციო სასამართლომ სარჩელი წარმოებაში არ მიიღო და შესაბამისად, თანასწორობის უფლებასთან მიმართებით კონსტიტუციურობის შემოწმების საფუძვლები ვერ დაინახა სახელმწიფოს მხრიდან საპენსიო სქემის მონაწილეთა სასარგებლოდ შენატანების განხორციელების მარეგულირებელ ნორმების ნაწილში“, ნათქვამია საქართველოს დემოკრატიული ინიციატივის ვებგვერდზე.  სრულად... წყარო: gdi.ge

თბილისი. 19 ივნისს, „თბილისი პრაიდი“-ს ორგანიზატორებმა გიორგი თაბაგარმა, თამაზ სოზაშვილმა და მარიამ კვარაცხელიამ მიიღეს მუქარის შემცველი შეტყობინებები, სადაც მათი საქმიანობის გამო სიცოცხლის მოსპობით ემუქრებოდნენ.  „პარტნიორობა ადამიანის უფლებებისთვის (PHR) მიიჩნევს, რომ იმ პირობებში, როდესაც საქართველოში ლგბტქ+ თემის მიმართ დისკრიმინაციული ნიშნით ძალადობრივი დანაშაულის განხორციელების მაჩვენებელი საგანგაშოდ მაღალია, სახელმწიფოს მხრიდან მსგავს შემთხვევაზე არაეფექტური რეაგირება იწვევს სიძულვილით მოტივირებულ დანაშაულებზე დაუსჯელობის განცდას და წამახალისებელია ადამიანის უფლებების წინააღმდეგ მოქმედი პირებისა თუ ჯგუფებისთვის“, ნათქვამია ორგანიზაციის გვერდზე. სრულად... წყარო: phrgeorgia.wordpress.com

თბილისი. „სიძულვილის ენა - გამოწვევები და საერთაშორისო გამოცდილება“ - ეს იყო დისკუსიის თემა, რომელიც 1 ნოემბერს „საერთაშორისო გამჭვირვალობა-საქართველოს” ორგანიზებით ხელისუფლების, მარეგულებელი ორგანოს, მედიის, საერთაშორისო და არასამთავრობო ორგანიზაციების წარმომადგენელთა, ასევე ექსპერტების მონაწილეობით გაიმართა. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) ქედის მუნიციპალიტეტის სკოლების დირექტორების მხრიდან რელიგიური ნეიტრალიტეტის სავარაუდო დარღვევის საკითხს ეხმიანება.  „ორგანიზაცია მოუწოდებს განათლების სამინისტროს, აჭარაში სახელმწიფო განათლების სისტემაზე საპატრიარქოს ჭარბი და უკანონო გავლენის პრაქტიკის შესწავლისკენ და სკოლებში რელიგიური ნეიტრალიტეტის, თანასწორობის და ინკლუზიურობის პრინციპების განუხრელი დაცვისთვის ადეკვატური და ეფექტიანი ზომების მიღებისკენ“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. კავშირი „საფარი“ აქვეყნებს საინფორმაციო გვერდ „ფანჯარას“ ბლოგპოსტს: მშობიარობა თავშესაფარში – ძალადობის მსხვერპლი, რომელსაც წასასვლელი არსად აქვს. „ისევ დავბრუნდი ქმრის სახლში. მაგრამ, ამის შემდეგ, დედამთილი და მამამთილი თითქმის ყოველდღე მლანძღავდნენ, შეურაცხყოფას მაყენებდნენ. მიუხედავად იმისა, რომ რამდენჯერმე მოვითხოვე, ოფიციალურად ხელი დღემდე არ გვაქვს მოწერილი. ქორწილის შემდეგ, ძვირფასეულობა წამართვეს. ორსულობის მე-4-მე-5 თვეში ვიყავი, როდესაც მამამთილმა ხელჯოხი მუცელში ჩამარტყა... ხელით დავიცავი მუცელი, მადლობა ღმერთს, ბავშვს არაფერი დაემართა.“ სრულად... წყარო: sapari.ge

თბილისი. გაეროს ქალთა ორგანიზაციამ, პარტნიორი ბიზნესკომპანიების მხარდაჭერის ფარგლებში, სოკარ პეტროლიუმ ჯორჯიას 15 თანამშრომლისთვის სექსუალური გასაჩივრების მექანიზმების შესახებ სამუშაო შეხვედრას გამართა. „შეხვედრა მიზნად ისახავს კომპანიის მენეჯმენტის ინფორმირებას სექსუალური შევიწროების შესახებ საკანონმდებლო ცვლილებების, ასევე, იმ გასაჩივრების მექანიზმების შესახებ, რომლებიც უახლოეს მომავალში სოკარში დაინერგება. აღნიშნული მექანიზმები წარმოადგენს ქალთა გაძლიერების პრინციპების სამოქმედო გეგმის ნაწილს, რომელიც კომპანიამ 2018 წელს მიიღო“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს თორნიკე გერლიანის სტატიას: არაღიარებული ომის მიგრანტები, ანუ ვინ და როგორ იბრძვის ჰესების წინააღმდეგ. „წინამდებარე სტატია განიხილავს მსოფლიოს სხვადასხვა ადგილას ჰესების საწინააღმდეგო მოძრაობების ბრძოლისა და წინააღმდეგობის მეთოდებსა და სტრატეგიებს. ტექსტის მთავარი ფოკუსი იმ პოლიტიკურ-სამართლებრივი ჩარჩოების გამოკვეთაა, რომელსაც ჰესების საწინააღმდეგო მოძრაობები ეყრდნობიან და რომელთა მეშვეობითაც არტიკულირდება მათი მოთხოვნები. განსახილველი საკითხები მოიცავს სხვადასხვა პოლიტიკური ჩარჩოების გამოყენების საფუძვლებს, პრაქტიკებსა და მათ ურთიერთქმედებას. მსხვილი ჰიდროპროექტების მშენებლობის, გარემოსა და ადამიანზე მათი მძიმე ზეგავლენის შეფასების პარალელურად, ის გაბატონებული პოლიტიკური და ეკონომიკური ხედვები წარმოჩინდება, რომლებიც დიდწილად განსაზღვრავენ განვითარების თანამედროვე მოდელებს“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. 29 ოქტომბერს, გაიმართა ადამიანის უფლებების სწავლებისა და მონიტორინგის ცენტრის (EMC) პროექტის - ეთნიკურ უმცირესობათა უფლებებისა და ინტეგრაციის მხარდაჭერა - პრეზენტაცია.  პროექტი წარადგინა ადამიანის უფლებების სწავლებისა და მონიტორინგის ცენტრის (EMC) თანასწორობის პროგრამის დირექტორმა თამთა მიქელაძემ და ისაუბრა, როგორც პროექტის სამომავლო მიზნებზე, ისე ქვეყანაში უმცირესობათა კუთხით არსებულ მნიშვნელოვან გამოწვევებზე.  „ეთნიკური უმცირესობების ინტეგრაცია ქვეყანაში სტაბილურობის მნიშვნელოვანი წინაპირობაა. პროექტის უმთავრესი კომპონენტი ეთნიკურ უმცირესობებთან მუშაობა, მათი პრობლემების იდენტიფიცირება და ადვოკატირება იქნება“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

შიდა ქართლი. 30 ოქტომბერს, გორის რაიონის სოფელ ტყვიავის საჯარო სკოლის მოსწავლეებისათვის, რომლებიც სულ რაღაც რამდენიმე კვირის წინ ჩაერთვნენ პროგრამა PITA- ში გაიმართა ფილმის ჩვენება და დისკუსია. „ფილმი CineDoc-Tbilisi on Tour-ის ფარგლებში იყო ნაჩვენები. ესენი იყო „პუნამის ბედისწერა“, რომელიც ნაადრევ ქორწინებას ეხებოდა და „კაიაიო“ რომელიც ბავშვთა შრომით ექსპლუატაციას ეხებოდა - ახლგაზრდებს, რომლებიც ესწრებოდნენ ფილმების ჩვენებას საშუალება ეძლევათ მიიღონ მონაწილეობა ესსეების კონკურსში და ათი დღის მანძილზე წარადგენენ საკუთარ ნაშრომებს სამი სექციიდან ერთ-ერთში: 1. ადამიანის უფლებები 2. ნაადრევი ქორწინება 3. ტრადიციები და თანამედროვეობა გამარჯვებულებს გამოავლენს სპეციალური ჟიური თითოეულ სექციაში სადაც სამ-სამი საპრიზო ადგილია“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. 29 ოქტომბერს, ადამიანის უფლებათა ცენტრმა, თბილისის ადამიანის უფლებათა სახლის საკონფერენციო დარბაზში, 20-21 ივნისის საპროტესტო დემონსტრაციებისა და თანმდევი მოვლენების შესახებ მომზადებული ანგარიშის პრეზენტაცია გამართა. „ანგარიში ქრონოლოგიურად მიმოიხილავს 2019 წლის 20 ივნისამდე, უშუალოდ საპროტესტო აქციის დროს და შემდგომ განვითარებულ მოვლენებს“. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება ახალგორის რაიონის სოფელ იკოთის მკვიდრის, მარგო მარტიაშვილის გარდაცვალების ტრაგიკულ ფაქტს და იმ მძიმე ჰუმანიტარულ და სოციალურ მდგომარეობას, რომელშიც საოკუპაციო ხაზს მიღმა მყოფი ადამიანები ბოლო თვეებში ცხოვრობენ. „გამშვები პუნქტების თვითნებური ჩაკეტვების პრაქტიკა არაერთ კრიტიკულ პრობლემას იწვევს, მათ შორის, ზღუდავს წვდომას საბაზისო საჭიროებებზე და სერვისებზე, როგორიც არის მედიკამენტები, საკვები რესურსები, გადაუდებელი სამედიცინო დახმარება, სოციალური დახმარების სერვისები, მათ შორის პენსიები, რომელიც უმრავლეს შემთხვევაში შემოსვლის და არსებობის ერთადერთი წყაროა. პრობლემები იქმნება განათლებაზე ხელმისაწვდომობასთან დაკავშირებითაც. გარდა ამისა, გადაადგილების თვითნებური შეზღუდვა აბრკოლებს ოჯახურ ურთიერთობებს და კავშირებს“, ნათქვამია ორგანიზაციის ვებგვერდზე. სრულად... წყარო: emc.org.ge