შიდა ქართლი. გორის მუნიციპალიტეტის გამგეობის სხდომათა დარბაზში ადგილობრივი ხელისუფლების წარმოამადგენლები ახალგაზრდების პრობლემებზე სასაუბროდ ქალაქ გორის საჯარო სკოლების მოსწავლეებს შეხვდნენ. შეხვედრის ინიციატორი გორის მე-7 საჯარო სკოლის სამოქალაქო კლუბი იყო და იგი მცირე გრანტის ,,მე აქტიური თვითმმართველი ვარ" ფარგლებში მოეწყო. შეხვედრა კითხვა-პასუხის რეჟიმში მიმდინარეობდა. ხელისუფლების წარმომადგენლებმა მოსწავლეების მიერ დასმულ ყველა კითხვას გასცეს ამომწურავი პასუხი. კითხვების დიდი ნაწილი ეხებოდა საზოგადოებრივი თავშეყრისა და საერთო სარგებლობის ადგილების მოვლა-პატრონობას. ამ მიმართულებით მხარეებმა ერთმანეთს გაუზიარეს ინიციატივები და სამომავლოდ დაგეგმეს რიგი ერთობლივი აქტივობები. შეხვედრას ესწრებოდნენ გორის მუნიციპალიტეტის საჯარო სკოლების თვითმმართველობებისა და სამოქალაქო კლუბების წარმომადგენლები და პედაგოგები, გამგეობის სხვადასხვა სამსახურების სპეციალისტები და უფროსები.

კახეთი. ,,აისეკ საქართველომ” თელავის უნივერსიტეტში შეხვედრა გამართა. ,,აისეკ საქართველო" საერთაშორისო სტუდენტური ორგანიზაცია, რომელსაც სტუდენტები მართავენ. ახალგაზრდებმა შეკრებილ საზოგადოებასთან იმ გაცვლით პროგრამებსა და აქტივობებზე ისაუბრეს, რომელსაც ორგანიზაცია უკვე მრავალი ათეული წელია მსოფლიოს სხვადასხვა ქვეყანაში ახორციელებს. ,,აისეკ თელავის წარმომადგენელის მარიამ ბაღაშვილის განცხადებით: „აისეკ საქართველო" სტუდენტებს საშუალებას აძლევს განავითარონ ლიდერული თვისებები. სთავაზობს სტუდენტებს როგორც გავლით პროგრამებში, ასევე, ადგილობრივ პროგრამებში მონაწილეობას".

აჭარა. ასოციაცია თავისუფალ ჟურნალისტთა სახლი დემოკრატიის მხარდამჭერი ნაციონალური ფონდის ფინანსური მხარდაჭერით ახორციელებს პროექტს - „ახალგაზრდებში დემოკრატიული იდეების პოპულარიზაცია". პროექტის ფარგლებში ჩართული 12 კაციანი მოხალისეთა სტუდენტების ჯგუფი მედია კოორდინატორის ხელმძღვანელობით 12-15 წუთამდე ანალიტიკურ სიუჟეტებს შემდეგ თემებზე ამზადებს: აღმსარებლობისა და რწმენის თავისუფლება, ქალთა უფლებები/გენდერი, ბავშთა უფლებები/ განათლების უფლებება, ტრადიციები, სოციალური უფლებები, ინფორმაციის მიღების ხელმისაწვდომობა. სიუჟეტების გადაღება ხორცილედება აჭარის ავტონომიური რესპუბლიკის მაღალმთიან მუნიციპალიტეტებში: ხულო, შუახევი, ქედა, ხელვაჩაური და ქობულეთი. წყარო:ორგანიზაციის გვერდი სოციალურ ქსელში

იმერეთი. 8 მარტს, სამეცნიერო-ინტელექტუალურ კლუბ „თაობათა დიალოგში" ჩატარდა ტრენინგი - „როგორ დავწერო პოსტი კორპორაციული ბლოგისთვის". შეხვედრაზე საუბარი იყო იმ ძირითად კრიტერიუმებზე, რაც პოსტის წერისთვის უნდა იყოს გათვალისწინებული. ტრენინგზე დამსწრე თითოეულმა წევრმა დაწერა პოსტი. შემეცნებით-გასართობი სახის პროგრამა 1 წლიანია და ის სპეციალურად კლუბის წევრებისთვის დაიწერა. აღნიშნული პროგრამის მიზანია წევრების ორგანიზაციის მართვის პროცესში ჩართვა, მათი კვალიფიკაციის გაზრდა, დახვეწა და განვითარება. წყარო:ორგანიზაციის გვერდი სოციალურ ქსელში

ქვემო ქართლი. 13 მარტს სიქაში კიდევ ერთი ინგლისურენოვანი კლუბი „კომიქსების კლუბი" დაიწყებს ფუნქციონირებას. კლუბის მიზანია: ინგლისური ენის პრაქტიკაში გამოყენება, სმენისა და ლაპარაკის უნარების განვითარება, ინგლისურენოვანი კომიქსების პოპულარიზაცია. ახალგაზრდები შეისწავლიან კომიკოსებს სხვადასხვა პოპულარული კომპანიებისგან. მონაწილეები გამართავენ დისკუსიას ინგლისურად ამათუ იმ კომიქსზე. ასევე მათ ექნებათ საშუალება თვითონვე შექმნან კომიქსები მათივე იდეებითა და სცენარით კლუბში სამუშაო ენა იქნება ინგლისური. კლუბში გაწევრიანება შეუძლია ყველა დაინტერესებულ პირს ასაკით 12 წლიდან. კლუბში დასწრება თავისუფალია. „კომიქსების კლუბი" გაიმართება ყოველ ხუთშაბათს 17:00 საათზე. წყარო:ორგანიზაციის გვერდი სოციალურ ქსელში

აჭარა. 8 მარტს, არასამთავრობო ორგანიზაციამ „ბორჯღალიმ" დემოკრატიის მთხრობელთა სკოლის ფარგლებში მორიგი სემინარი ჩაატარა. ამჯერად სემინარის თემა სამოქალაქო სექტორი და მოქალაქეობის არსი იყო. მომსენების შემდეგ განხილეს საქართველოს რეალობაში არსებული მესამე სექტორის საქმიანობა, მათი მიღწევები და ის შეცდომები, რომელიც ორგანიზაციების „გაქრობას" იწვევს. დემოკრატიის მთხრობელთა სკოლის მოსწავლეებს პრეოქტების წერის ტექნიკა და დონორების მოძიების პრინციპებზე მიაწოდეს ინფორმაცია.

კახეთი. თელავის განათლების განვითარებისა და დასაქმების ცენტრის ინიციატივით, ,,ახალგაზრდული ცენტრისა" და საინიციატივო ჯგუფების წარმომადგენლები სასამართლო სხდომას დაესწრნენ. თელავის განათლების განვითარებისა და დასაქმების ცენტრის წარმომადგენლის ქრისტინე მჭედლიშვილის თქმით, ,,შეხვედრა ჩატარდა ახალგაზრდების ეროვნული ინტეგრაციის გაძლიერების აქტივობის ფარგლებში. დღევანდელ შეხვედრაზე მონაწილეებმა მიიღეს მეტი ინფორმაცია სასამართლოს მუშაობის შესახებ".

აჭარა. 8 მარტს, მოხუცთა თავშესაფარში, სავანის ბინადრებს, ახალგაზრდული ორგანიზაციის „ახალგაზრდული კოლეგიის" წევრები ესტუმრნენ. ახალგაზრდებმა მოხუც ქალბატონებს ქალთა საერთაშორისო დღე პოეზიის 5 წუთით და ხალხური სიმღერებისთ მიულოცეს. ღონისძიებაში ბათუმის სახელმწიფო უნივერსიტეტის სტუდენტები და უნივერსიტეტთან არსებული ფოლკლორული მუსიკის ანსამბლის წევრები მონაწილეობდნენ.

შიდა ქართლი. არასამთავრობო ორგანიზაცია „სიდას" ინიციატივითა რუსთავში მცხოვრები კანონთან კონფლიქტში მყოფი ახალგაზრდები, თანატოლებთან ერთად უფლისციხის მუზეუმს ესტუმრნენ. ღონისძიება განხორციელდა ქვემო ქართლის პრობაციის ბიუროს მხარდაჭერით. წყარო:ორგანიზაციის გვერდი სოციალურ ქსელში

სამეგრელო. 8 მარტს ასოციაცია, „ათინათის" ახალგაზრდული ცენტრის „ორტუსის" წევრებმა ქალბატონებს ქალთა საერთაშორისო დღე მიულოცეს. ცენტრის წევრების ინიციატივით დაიბეჭდა მისალოცი ბარათები, რომლებიც ქალბატონებს დევნილთა კომპაქტურ დასახლებაში დაურიგეს კომპაქტურ ჩასახლებას, სადაც დევნილები ცხოვრობენ. აქტივობა ჩატარდა პროექტი „ეროვნული ინტერგრაციის გაძლიერება საქართველოში"-ს ფარგლებში, რომელსაც ახორციელებს საქართველოს გაეროს ასოციაცია, ამერიკის შეერთებული შტატების საერთაშორისო განვითარების ფინანსური მხარდაჭერით. წყარო:ორგანიზაციის გვერდი სოციალურ ქსელში

თბილისი. 8-9 მარტს, არასამთავრობო ორგანიზაცია „საქართველოს დემოკრატიული ინიციატივის" ოფისში გაიმართა ტრენინგი სტუდენტებისთვის დისკრიმინაციის აკრძალვის და პირადი ცხოვრების უფლების შესახებ. ტრენინგზე განხილულ იქნა პირადი ცხოვრების უფლების დაცვის მექანიზმები, საერთაშორისო სტანდარტები და შიდა კანონმდებლობა, დისკრიმინაციის ნიშნები და ასევე დისკრიმინაციისგან დამცავი ნორმები. ტრენინგს უძღვებოდნენ ადამიანის უფლებათა სამართლის სპეციალისტები. წყარო:ორგანიზაციის გვერდი სოციალურ ქსელში

კახეთი. თელავის ახალგაზრდული ცენტრის მიერ გაიმართა პროექტ – „მეგობრული გზების" – მხარდამჭერი აქცია, რომლის ფარგლებშიც მომზადდა პოსტერები და მოეწყო მსვლელობა ქალაქის ქუჩებში. აქცია ჩატარდა საქართველოში ეროვნული ინტეგრაციის გაძლიერების პროგრამის ფარგლებში (ANI), რომელიც ხორციელება საქართველოს გაეროს ასოციაციის მიერ (UNAG), აშშ საერთაშორიო განვითარების სააგენტოს მხარდაჭერით (USAID). წყარო:ორგანიზაციის გვერდი სოციალურ ქსელში

აჭარა. 6 მარტს ბათუმის ახალგაზრდული ცენტრის წევრებისათვის გაიმართა საორიენტაციო შეხვედრა ამერიკაში სწავლასთან დაკავშირებით. როგორ მივიღოთ განათლება ამერიკის შეერთებულ შტატებში? სად და როგორ მოვიძიოთ დაფინანსება და შევარჩიოთ სასურველი უნივერსიტეტი ან კოლეჯი? ამ და სხვა კითხვებს „საერთაშორისო განათლების ცენტრის" ამერიკული განათლების კონსულტანტმა - დალი ხომერიკმა უპასუხა. შეხვედრა გაიმართა პროექტის „ეროვნული ინტეგრაციის გაძლიერება საქართველოში" (ANI) ფარგლებში, რომელსაც ახორციელებს საქართველოს გაეროს ასოციაცია (UNAG) აშშ-ს საერთაშორისო განვითარების სააგენტოს (USAID) ფინანსური მხარდაჭერით. წყარო:ორგანიზაციის გვერდი სოციალურ ქსელში

სამეგრელო. 6 მარტს „ათინათის" ახალგაზრდულ ცენტრ „ორტუსის" წევრებმა ქალაქის მიმდბარე ტერიოტიაზე დაარიგეს საინფორმაციო ბროშურები ოჯახში ძალადობისა და „ათინათში" არსებული კრიზისული ცენტრის შესახებ. ბროშურები ფლაერი დამზადებულია ასოციაცია „ათინათის" მიერ. წყარო:ორგანიზაციის გვერდი სოციალურ ქსელში

თბილისი. 6 მარტს არასამთავრობო ორგანიზაციამ „სიდამ" ჟურნალისტებისა და ბლოგერების კონკურსში გამარჯვებულების დაჯილდოვება გამართა. კონკურსი ქვემო ქართლისა და სამცხე–ჯავახეთის ეროვნული უმცირესობების თემებში არასრულწლოვანთა მართლმსაჯულების რეფორმის მხარდაჭერის პროექტის ფარგლებში გაიმართა, რომელიც ევროკავშირის მიერაა დაფინანსებული. საკონკურსო თემა „კანონთან კონფლიქტში მყოფი ახალგაზრდების უფლებები" იყო. წყარო: ორგანიზაციის ვებგვერდი სოციალურ ქსელში

აჭარა. 6 მარტს, ბათუმის ახალგაზრდულ ცენტრში გაიმართა გაეროს მოდელირება სირიის შიდა კონფლიქტის თემაზე. გამოვლინდნენ გამარჯვებულები, რომლებიც მონაწილეობას მიიღებენ ეროვნულ გაეროს მოდელირებაში ქალაქ თბილისში. გაეროს მოდელირება აკადემიური როლური კონფერენციაა, რომელიც გაერთიანებული ერების ორგანიზაციის სხვადასხვა ორგანოს სიმულირებას წარმოადგენს. მოდელირების პროცესში მონაწილეები ხდებიან დიპლომატები, წარადგენენ და იცავენ საკუთარი ქვეყნების პოზიციებს, მართავენ დებატებსა და მოლაპარაკებებს, და მოკავშირეებთან ერთად წარადგენენ რეზოლუციას, როგორც მთელი კონფერენციის საბოლოო შედეგს. ამ დიპლომატიური თამაშის უმთავრესი მიზანია დემოკრატიული ღირებულებების დანერგვა და გავრცელება, კომუნიკაციური და პროფესიული უნარ-ჩვევების განვითარება, საზღვარგარეთის ქვეყნებისა და მსოფლიო მნიშვნელობის პოლიტიკური საკითხების გაცნობა. გაეროს მოდელირების ციკლი ტარდება ეროვნული ინტეგრაციის გაძლიერების პროექტის (ANI) ფარგლებში ჩამოყალიბებულ ყველა ახალგაზრდულ ცენტრში. პროექტს ახორციელებს საქართველოს გაეროს ასოციაცია (UNAG) აშშ-ს საერთაშორისო განვითარების სააგენტოს (USAID) ფინანსური მხარდაჭერით. წყარო: ბათუმის ახალგაზრდული ცენტრი

კახეთი. წნორის საინიციატივო ჯგუფის ორგანიზებით, წნორის ნაგავსაყრელად ქცეული ტყე-პარკისა და სტადიონის ტერიტორია, რომელიც წლების მანძილზე არ გაწმენდილა, ადგილობრივმა ახალგაზრდებმა საკუთარი ძალებით დაასუფთავეს.

სამცხე–ჯავახეთი. 6 მარტს არასამთავრობო ორგანიზაციასთან არსებული ახალციხის ახალგაზრდული ქსელის წევრებმა ქალაქის მეორე საჯარო სკოლაში პრეზენტაცია გამართეს. პრეზენტაციაზე ახალციხის ახალგაზრდული ქსელის წევრებმა სკოლის მოსწავლეთა მშობლებს, პედაგოგიურ კოლექტივს და სხვა თანამშრომლებს ეროვნული ინტეგრაციის გაძლიერების პროექტისა და მის ფარგლებში განხორციელებული საქმიანობები გააცნეს. პროექტი საქართველოს 13 რეგიონში ახორციელებს გაეროს ასოციაცია, აშშ–ის საერთაშორისო განვითარების სააგენტოს ფინანსური მხარდაჭერით.

თბილისი. ინფორმაციის თავისუფლების განვითარების ინსტიტუტმა(IDFI) და ევროპის იურისტ სტუდენტთა ასოციაცია საქართველომ (ELSA) ურთიერთთანამშრომლობის მემორანდუმი გააფორმეს. მემორანდუმი მიზნად ისახავს „ელსასა" და IDFI-ს ურთიერთთანამშრომლობის გზით, სხვადასხვა საკითხებთან, მათ შორის ინფორმაციის თავისუფლებასთან დაკავშირებით სამოქალაქო ცნობიერების ამაღლებას, გარკვეული თემების პუპულარიზაციას, საჯარო და სხვა ინსტიტუტების საქმიანობის გამჭირვალობის ხელშეწყობას, სხვადასხვა აქტივობებში სტუდენტების ჩარულობის გაზრდას. წყარო: idfi.ge

იმერეთი. აკაკი წერეთლის სახელმწიფო უნივერსიტეტში მოხალისეობის ფორუმი გაიმართა. ფორუმში მონაწილე სხვადასხვა ორგანიზაციებმა დამსწრე საზოგადოებას, სტუდენტებსა და მოსწავლეებს თავიანთი საინფორმაციო ბუკლეტები და პროექტები გააცნეს. ფორუმი ქუთაისის განათლების განვითარების და დასაქმების ცენტრის, აშშ მშვიდობის კორპუსის ახალგაზრდობისა და მოხალისეობის კომიტეტის, ქუთაისის საჯარო სკოლების სამოქალაქო კლუბების და „ჰელფინგ ჰენდის” ორგანიზებით გაიმართა

იმერეთი. 5 მარტს, ქუთაისში, საქართველოს პარლამენტის თავმჯდომარემ, დავით უსუფაშვილმა და ცენტრალური და აღმოსავლეთ ევროპისა და დსთ–ს ქვეყნებში გაეროს ბავშვთა ფონდის რეგიონალურმა დირექტორმა, მარი–პიერ პუარიემ 2014 წელი ბავშვთა უფლებათა წლად ოფიციალურად გამოაცხადეს.  აღნიშნული ინიციატივის მიზანია კონკრეტული კანონების შემუშავება და პოლიტიკაზე ზეგავლენის მოხდენა, რათა ბავშვთა უფლებები საქართველოში სრულად იყოს გათვალისწინებული, დაცული და განხორციელებული. წყარო: გაეროს ბავშვთა ფონდის ვებგვერდი სოციალურ ქსელში

სამცხე–ჯავახეთი. ორგანიზაცია ,,დემოკრატ მესხთა კავშირთან" არსებულ, ახალციხის ახალგაზრდული ქსელის წევრებს გაეროს მოდელირების ტრენინგი ჩაუტარდათ. ტრენინგს საქართველოს გაეროს ასოციაცია უძღვებოდა. ახალგაზრდები გაეცნენ გაეროს მოდელირების სპეციფიკას, ძირითად პრინციპებს და მექანიზმებს. აქვე გადაწყდა, რომ მომზადდება და ორ კვირაში გაიმართება მორიგი მოდელირება, რომლის თემა სირიის კრიზისი იქნება. ახალგაზრდები წარმოადგენენ გაეროში შემავალი ქვეყნების პოზიციებს სირიაში მიმდინარე მოვლენებთან დაკავშირებით. გაეროს მოდელირება მსოფლიოში აღიარებული და აპრობირებული თამაშია. მოდელირების ორგანიზატორთა მიერ სპეციალურად შემუშავებული მეთოდოლოგიის გამოყენებით, მონაწილეები პრაქტიკული მაგალითებით ეცნობიან საერთაშორისო პოლიტიკის თავისებურებებს, რაც მათ საშუალებას აძლევთ უკეთ გაეცნონ მრავალმხრივ დიპლომატიას და ამავე დროს გაერთონ.