თბილისი. „საერთო–სამოქალაქო მოძრაობა მრავალფეროვანი საქართველოს" ორგანიზებით 26 თებერვალს კონფერენცია: „ეთნიკური მრავალფეროვნება ჰარმონიული განვითარებისთვის" ჩატარდა.  კონფერენცია პროექტის „წავახალისოთ მრავალფეროვნება–პატივი ვცეთ ყველას" ფარგლებში მოეწყო და მის მიზანს წარმოადგენდა დაინტერესებული მხარეების ინფორმირება პროექტის ფარგლებში ჩატარებული კვლევის შესახებ. კვლევისას შესწავლილი იქნა საქართველოში მცხოვრები ეთნიკური უმცირესობების თემთა წინაშე არსებული პრობლემები. კონფერენციის მონაწილეებმა გააჟღერეს თავიანთი ხედვები ამ პრობლემების გადაჭრის გზებსა და ფორმებზე. წყარო:npo.ge

თბილისი.ინფორმაციის თავისუფლების განვითარების ინსტიტუტმა (IDFI) თვითმმართველი ერთეულების 2012 წლის საშტატო ნუსხები და პრეზიდენტისა და პარლამენტის წინაშე წარდგენილი 10 დეკემბრის ანგარიშები გამოაქვეყნა. IDFI-მ ინფორმაცია საქართველოს 15 მუნიციპალიტეტის საშტატო ნუსხისა და 18 მუნიციპალიტეტიდან მიღებული 10 დეკემბრის ანგარიშების შესახებ გაავრცელა. საშტატო ნუსხები   10 დეკემრის ანგარიშები  წყარო:ორგანიზაციის გვერდი სოციალურ ქსელში

თბილისი.თავისუფლების განვითარების ინსტიტუტმა 2011–2012 წლებში სასჯელაღსრულების დეპარტამენტის ყოფილი უფროსის, დავით ჭაკუასთვის დარიცხული პრემიების შესახებ გაავრცელა ინფორმაცია. დოკუმენტის მიხედვით, დავით ჭაკუა წახალისების სახით ყოველთვიურად იღებდა თანამდებობრივი ხელფასის ორმაგ ოდენობას, ხოლო 2011წლის დეკემბრის თვეშიოთხმაგი ოდენობა – 10 080 ლარი აიღო.     ინფორმაციის თავისუფლების განვითარების ინსტიტუტმა სასჯელაღსრულების დეპარტამენტს  მიმართა კიდევ 13 თანამშრომელზე ინფორმაციის გაცემის თხოვნით, რომელზედაც დეპარტამენტის მხრიდან უარის საფუძვლად მოყვანილ იქნა საკანონმდებლო ნორმათა ერთობლიობაზე მითითება. ინსტიტუტის განცხადებით, მოთხოვნილი ინფორმაცია საჯაროა მათთვის გაუგებარია დეპარტამენტის პოზიცია. სრულად წყარო:ორგანიზაციის გვერდი სოციალურ ქსელში

თბილისი.ინფორმაციის თავისუფლების განვითარების ინსტიტუტმა საზოგადოებრივი მაუწყებლიდან განთავისუფლებულთა რაოდენობის შესახებ ინფორმაცია გაავრცელა.  2012 წლის 20 ოქტომბრის შემდეგ პერიოდში საზოგადოებრივ მაუწყებლიდან 164 თანამშრომელი განთავისუფლდა, ხოლო კონტრაქტი გაფორმდა მხოლოდ 22 ახალ თანამშრომელთან. მიღებული თანამშრომლების უმეტესობა დაინიშნა იგივე თანამდებობაზე, საიდანაც წინა თვეებში დაითხოვეს თანამშრომლები. „სამწუხაროდ შეკითხვაზე თანამშრომელთა განთავისუფლების მიზეზების შესახებ საზოგადოებრივმა მაუწყებელმა წერილში განმარტა, რომ „შრომითი ხელშეკრულებები შეწყდა სხვადასხვა მიზეზით მოქმედი კანონმდებლობით დადგენილი წესის შესაბამისად”, თუმცა განთავისუფლების კონკრეტული მიზეზები წერილში არ არის განმარტებული", ნათქვამია ორგანიზაციის ვებგვერდზე. სრულად წყარო:ორგანიზაციის გვერდი სოციალურ ქსელში

თბილისი. „საერთაშორისო გამჭვირვალობა - საქართველო" აგრძელებს საჯარო სამსახურებში საკადრო პოლიტიკის საკითხების კვლევას და ლენტეხის მუნიციპალიტეტში მომხდარ ფაქტს ეხმიანება. ორგანიზაციის მიერ 22 თებერვალს გავრცელებულ ინფორმაციაში ნათქვამია, რომ 2013 წლის 13 თებერვალს ლენტეხის მუნიციპალიტეტის გამგებელმა ზაზა ლიპარტელიანმა, რომელიც გამგებლად ლენტეხის მუნიციპალიტეტის საკრებულომ ფრაქცია „ქართული ოცნების" წარდგინებით აირჩია, გამოსცა ბრძანება, რომლის მიხედვითაც, მუნიციპალიტეტის გამგეობის საკადრო ცვლილებების აუცილებლობასთან დაკავშირებით მიმდინარე წლის 13 თებერვლიდან სამსახურეობრივი უფლებამოსილება შეუწყდა გამგეობის ტერიტორიული ერთეულის ყველა რწმუნებულს. „მიგვაჩნია, რომ ეს ბრძანება გარკვეული მიზეზების გამო არის უკანონო და ეხმიანება საპარლამენტო არჩევნების შემდეგ საჯარო სამსახურში (განსაკუთრებით, ადგილობრივ დონეზე) მიმდინარე მანკიერი საკადრო პოლიტიკის ტენდენციას", ნათქვამია ორგანიზაციის ვებგვერდზე. სრულად წყარო:ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტმა გამოაქვეყნა კვლევა „საჯარო დაწესებულებების საზოგადოებასთან ურთიერთობის სტრატეგია". კვლევის მიხედვით საზოგადოებასთან ურთიერთობის სპეციალური დოკუმენტი  23 საჯარო დაწესებულებიდან  21-ს არ აქვს. საზოგადოებასთან ურთიერთობის სამოქმედო გეგმა 2012 წელს  მხოლოდ ერთ საჯარო დაწესებულებას  – საქართველოს თავდაცვის სამინისტროს ჰქონდა შემუშავებული.  „აუცლებელია თითოეულ საჯარო დაწესებულებას შემუშავებული ჰქონდეს  საკომუნიკაციო სტრატეგია  და დეტალური სამოქმედო გეგმა, რომელშიც არამარტო ხედვები და პრიორიტეტები, არამედ დასახული მიზნების მისაღწევად განსახორციელებელი კონკრეტული საქმიანობები იქნება გაწერილი თარიღების მიხედვით და მათ განხორციელებაზე პასუხისმგებელი პირების ვინაობების მითითებით. ასეთი დოკუმენტის არსებობა გაადვილებს  კომუნიკაციას საზოგადოებას და მთავრობას შორის,  უფრო შედეგიანს გახდის სამთავრობო დაწესებულებების მუშაობას და  გაცილებით მეტი ადამიანისათვის გახდის  ხელმისაწვდომს  სახელმწიფო სერვისებს", ნათქვამია ორგანიზაციის ვებგვერდზე.  სრულად წყარო:ორგანიზაციის გვერდი სოციალურ ქსელში

იმერეთი. არასამთავრობოთა კოალიცია „გამჭვირვალობა თვითმმართველობისათვის" ქუთაისის მერის გადადგომას მოითხოვს. კოალიციის განცხადებით, მათ მიერ განხორციელებული მონიტორინგის შედეგად, ასევე მერიიდან გამოთხოვილი საჯარო ინფორმაციებზე დაყრდნობით, თვითმმართველობაში მთელი რიგი დარღვევები იქნა აღმოჩენილი: მერიაში პარტიული ინტერესების მიხედვით ადამიანების დასაქმება, საშტატო ერთეულების ზრდა, თანხების არამიზნობრივი ხარჯვა. კოალიციის მიერ წაყენებული მოთხოვნების არ გათვალისწინების შემთხვევაში, აქციის მონაწილეები  21 თებერვლიდან პერმანენტული აქციების მოწყობას გეგმავენ. შეგახსენებთ, კოალიციაში „გამჭვირვალობა თვითმმართველობისათვის" –  ქუთაისში მოქმედი 20 არასამთავრობო ორგანიზაციაა გაერთიანებული.

თბილისი. ინფორმაციის თავისუფლების განვითარების ინსტიტუტმა კულტურის სამინისტროს მიერ დაფინანსებული 2012 წლის ყველაზე მასშტაბური პროექტების ხარჯთაღრიცხვა გამოაქვეყნა. ივნისში, ყველაზე დიდი თანხა, 1 356 800 ლარი ახალციხეში გამართული შარლ აზნავურის კონცერტისთვის იქნა გამოყოფილი, საიდანაც, ხარჯთაღრიცხვის მიხედვით, ჰონორარის სახით მომღერალს  789169ლარი გადაერიცხა. თბილისსა და ოზურგეთში მიუზიკლ „ვერის უბნის მელოდების" განხორციელებისთვის ხარჯმა  1 679 310 ლარი შეადგინა, საიდანაც 51 000 ლარი ბუბა კიკაბიძემ, ხოლო 15 090 ლარი სოფო ნიჟარაძემ მიიღეს.  სრულად წყარო:ორგანიზაციის გვერდი სოციალურ ქსელში. 

თბილისი. ინფორმაციის თავისუფლების განვითარების ინსტიტუტმა სამთავრობო დაწესებულებების ელექტრონული კომუნიკაციის სტრატეგიის შესახებ კვლევა გამოაქვეყნა. საჯარო დაწესებულებების  მოქალაქეებთან ურთიერთობის სტრატეგიის, ელექტრონული რესურსების გამოყენების ხარისხის და კომუნიკაციის დონის შეფასების მიზნით IDFI–მ კვლევა სამთავრობო უწყებებიდან მოთხოვნილი საჯარო ინფორმაციის ანალიზის საფუძველზე მოამზადა. „საჯარო დაწესებულებების მხრიდან სათანადო ყურადღება არ ეთმობა ვებ-გვერდებზე არსებულ საკომუნიკაციო საშუალებებს, უმეტეს შემთხვევებში არ ხდება ელ-ფოსტითა და ვებ-გვერდზე ინტეგრირებული მიწერის ფუნქციით საჯარო დაწესებულებებში შესული წერილების აღრიცხვა, სამთავრობო უწყებები ხშირად არც მათი ვებ-გვერდების მომხმარებელთა რაოდენობით ინტერესდებიან. საჯარო დაწესებულებების უმეტესობას არ აქვს შემუშავებული საზოგადოებასთან ურთიერთობის სტრატეგიული გეგმა", ნათქვამია ორგანიზაციის ვებ–გვერდზე.  კვლევა წყარო:idfi.ge

თბილისი. „საერთაშორისო გამჭვირვალობა – საქართველომ“ ყოველკვირეული აუდიო პოდკასტის გამოშვება გამოაქვეყნა ვებგვერდზე. 12 თებერვლის გამოშვების თემებია: სპიკერის და პრეზიდენტის შეხვედრა, ეროვნულ ბიბლიოთეკასთან განვითარებული მოვლენები, დეპუტატების პროკურატურაში გამოძახება, ოფიციალური და ეროვნული ტანისამოსის რეგლამენტირების ინიციატივა, ნადირაშვილის გამოსვლა ნეპოტიზმის შესახებ და ეთიკის პრობლემები პარლამენტში. საპარლამენტო ამბების პოდკასტი – 12 თებერვალი წყარო: transparency.ge

თბილისი. საქართველოს ახალგაზრდა იურისტთა ასოციაციამ და საერთაშორისო გამჭვირვალობა – საქართველომ იუსტიციის უმაღლესი საბჭოს მონიტორინგის ანგარიში გამოაქვეყნეს. ანგარიში მოიცავს 2012 წლის მარტი-დეკემბრის პერიოდს, რომლის განმავლობაშიც მონიტორინგი ხორციელდებოდა თუ რამდენად გამჭვირვალედ მიმდინარეობდა მოსამართლეთა დანიშვნა, მივლინება, დისციპლინური სამართალწარმოება და საბჭოს საქმიანობა. მონიტორინგის შედეგების მიხედვით, არასამთავრობო ორგანიზაციები აცხადებენ, რომ პროცესები არ იყო სათანადოდ გამჭირვალე და გარკვეული ინფორმაციები არ იყო ხელმისაწვდომი, რამაც კვლევის პროცესი გაართულა. წყარო: transparency.ge სრულად 

თბილისი. სამართლიანი არჩევნებისა და დემოკრატიის საერთაშორისო საზოგადოებამ არჩევნების შემდგომი პროცესების მონიტორინგის მეორე ანგარიში წარადგინა. ანგარიში თვითმმართველობებში განხორციელებული საკადრო ცვლილებების, საპროტესტო აქციებისა და თვითმმართველობის მოხელეთა მიმართ განხორციელებული სამართლებრივი დევნის შესახებ ინფორმაციას მოიცავს. „"მიგვაჩნია, რომ შექმნილი სიტუაცია კიდევ ერთხელ წარმოაჩენს თვითმმართველობის რეფორმის განხორციელების აუცილებლობას უახლოეს მომავალში, რათა უზრუნველყოფილ იყოს თვითმმართველობის რეალური დამოუკიდებლობა და ჩაურევლობა მის კომპეტენციას მიკუთვნებულ საკითხებში"“, განაცხადა ორგანიზაციამ. სრულად წყარო:ორგანიზაციის გვერდი სოციალურ ქსელში

სამეგრელო.ახლდაფუძნებული არასამთავრობო ორგანიზაციის, დემოკრატიის განვითარების ცენტრის „მერმისის" წარმომადგენლებმა, 11 თებერვალს, დემოკრატიული ჩართულობის ზუგდიდის ოფისში,  ორგანიზაციის მიზნებსა და ამოცანებზე ისაუბრეს. ორგანიზაცია გეგმავს მონიტორინგი გაუწიოს გამგეობის მიერ გამოცხადებულ ტენდერებს და ტენდერების შედეგად განხორციელებულ ღონისძიებებს. ამ მიზნით „მერმისი" ზუგდიდის მუნიციპალიტეტის გამგეობასთან ურთიერთთანამშრომლობის მემორანდუმის გაფორმებას აპირებს. ორგანიზაციის წევრების განცხადებით, თვითმმართველობის ორგანოების მონიტორინგის გარდა, ისინი ქართულ – აფხაზური ურთიერთობების აღდგენის საკითხში, სახალხო დიპლომატიის გზის გამოყენების პროექტებზეც მუშაობენ.  არასამთავრობო ორგანიზაცია „მერმისი" გასული წლის დეკემბერში დაფუძნდა.

თბილისი. საქართველოს ახალგაზრდა იურისტთა ასოციაციამ წინასაარჩევნო გარემოს, არჩევნების დღისა და არჩევნების შემდგომი პერიოდის მონიტორინგის ანგარიშის პრეზენტაცია 11 თებერვალს გამართა. ანგარიში მოიცავს 2012 წლის 1 აგვისტოდან 20 ოქტომბრის ჩათვლით განხორციელებული მონიტორინგის შედეგებს (წინასაარჩევნო პროცესების დაკვირვება საიამ გაცილებით ადრე, 2012 წლის 1 იანვრიდან დაიწყო და     წინასაარჩევნო გარემო ორ შუალედურ ანგარიშში შეაფასა).  როგორც უკვე აღვნიშნეთ დღეს წარმოადგენილი ანგარიში მოიცავს 1 აგვისტოდან წინასაარჩევნო კამპანიის, არჩევნების დღესა და არჩევნების შემდგომ პერიოდს. ანგარიშში ყურადღება გამახვილებულია წინასაარჩევნო პერიოდის, არჩევნების დღისა და არჩევნების შემდგომ საჩივრების განხილვისა და შედეგების შეჯამების პროცედურებზე. ანგარიში წყარო: gyla.ge

თბილისი. ინფორმაციის თავისუფლების განვითარების ინტიტუტმა პროექტ „საქართველო ოკუპანტების გარეშე" ხარჯთაღრიცხვა გამოაქვეყნა. კულტურისა და ძეგლთა დაცვის სამინისტროდან მიღებული დოკუმენტის მიხედვით,  პროექტმა გახარჯული 349 000 ლარი ფოტო გამოფენის, ფილმის დამონტაჟების, სამივლინებო ხარჯების, მაღალი გამავლობის ავტომანქანისა და სხვა საჭიროებებისათვის გამოიყენა. სამინისტრო ასევე აღნიშნავს, რომ პროექტის დასრულების შემდეგ აუთვისებელი 81 525 ლარი სახელმწიფო ბიუჯეტში უკან დაბრუნდა. წყარო:idfi.ge

თბილისი. 7 თებერვალს საქართველოს ახალგაზრდა იურისტთა ასოციაციამ  ორი კვლევის პრეზენტაცია გამართა. ერთი მათგანი თბილისის მერიის პროექტის – „სავაჭრო ჯიხურები ქალაქის მასშტაბით" –  სამართლებრივ მიმოხილვას მოიცავს. აღნიშნული კვლევის მიზანს წარმოადგენდა ერთი მხრივ, იმის გარკვევა, თბილისის მერიის მიერ დაწყებული ახალი პროექტი რომელ კომპანიებზე გავრცელდა  და მეორე მხრივ, რას ემსახურებოდა აღნიშნული პროექტის დაწყება. მეორე კვლევა – ადგილობრივი თვითმმართველობების მიერ დაფუძნებული არასამეწარმეო იურიდიული პირების საქმიანობის მიმოხილვას წარმოადგენს, რომლის მიზანიც იყო, იმის გარკვევა თუ რამდენი ააიპ აქვს დაფუძნებული თვითმმართველობის წარმომადგენლობით და აღმასრულებელ ორგანოებს, მათი წესდებებისა და მასში შეტანილი ცვლილებების მონიტორინგი და ტენდენციების გამოკევეთა. ასევე მათი საქმიანობის კონტროლის ანალიზი და მათ მიერ წარდგენილი ანგარიშების მონიტორინგი. კვლევები: სავაჭრო ჯიხურები ქალაქის მასშტაბით – სამართლებრივი მიმოხილვა, საია, 2013 წ. ადგილობრივი თვითმმართველობების მიერ დაფუძნებული არასამეწარმეო იურიდიული პირების საქმიანობის მიმოხილვა, საია, 2013 წ. წყარო: gyla.ge

თბილისი. საიამ 2012 წლის არჩევნების შემდეგ მთავრობის სარეზერვო ფონდიდან თანხების ხარჯვის შესახებ ინფორმაცია 6 თებერვალს ვებგვერდზე გამოაქვეყნა.  ახალგაზრდა იურისტთა ასოციაციის მიერ მოპოვებულ ინფორმაციაზე დაყრდნობით, 2012 წლის 2 ოქტომბრიდან 2012 წლის 31 დეკემბრის ჩათვლით, საქართველოს მთავრობის სარეზერვო ფონდიდან სულ 16 585 427 ლარი გამოიყო. თანხის ნაწილის –  4 973 773 ლარი გამოყოფა  ყოფილი პრემიერ–მინისტრის ივანე მერაბიშვილის პრემიერ–მინისტრობის პერიოდს უკავშირდება. ხოლო დარჩენილი 11 611 654 ლარის გამოყოფა ბიძინა ივანიშვილის პრემიერ–მინისტრობის პერიოდზე მოდის. საიას მიერ გამოქვეყნებულ ინფორმაციაში ნაჩვენებია სარეზერვო ფონდიდან გამოყოფილი თანხების სფეროების მიხედვით განაწილების შესახებ ინფორმაცია. „საია კიდევ ერთხელ მიუთითებს პრეზიდენტისა და მთავრობის სარეზერვო ფონდებიდან თანხების ხარჯვასთან დაკავშირებული სამართლებრივი ნორმის პრობლემურობაზე, რაც სარეზერვო ფონდიდან თანხების გამოყოფისთვის საჭირო სათანადო სამართლებრივი რეგულაციების არ არსებობაში გამოიხატება და გამოთქვამს მზადყოფნას საკანონმდებლო რეგულირების დახვეწის მიზნით აქტიურად ითანამშრომლოს ყველა შესაბამის უწყებსთან",  ნათქვამია ასოციაციის ვებგვერდზე.  სრულად:http://gyla.ge/geo/news?info=1410 წყარო:gyla.ge 

თბილისი. „საერთაშორისო გამჭვირვალობა–საქართველომ"  5 თებერვალს 2012 წლის ანგარიში – „ინტერნეტის თავისუფლება – ვინ აკონტროლებს საქართველოს ტელეკომუნიკაციების სექტორს?" – გამოაქვეყნა. 56–გვერდიან ანგარიშში ნათქვამია, რომ კომპანიები მომხმარებლებს მონაცემთა შეგროვების, შენახვისა და მათი დაცულობის შესახებ სრულ ინფორმაციას არ აწვდიან. „საერთაშორისო გამჭვირვალობა–საქართველო" მოუწოდებს პარლამენტს დააყენოს საკანონმდებლო ცვლილებების გატარების საკითხი, რომელიც მაუწყებლების მსგავსად საქართველოს ეროვნული კომუნიკაციების კომისიას დაქვემდებარებულ მობილურ ოპერატორებსა და ინტერნეტ პროვაიდერებსაც მოსთხოვს ბენეფიციარ მფლობელთა ვინაობის გამჟღავნებას. ასევე, გათვალისწინებულ უნდა იქნას რეგულაციები, რომლებიც კომერციული ვებ–გვერდებისა და ონლაინ საინფორმაციო საშუალებების მფლობელების გამჭვირვალობის ზრდას უზრუნველყოფს", ნათქვამია ორგანიზაციის ვებგვერდზე. სრულად წყარო: სამოქალაქო ინტერნეტ მაუწყებლობა ნაკადი

თბილისი. საერთაშორისო გამჭვირვალობა – საქართველომ „მბრუნავი კარის" პრობლემების შესახებ კვლევის გამოქვეყნებას გეგმას, მანამდე კი პუბლიკაციას აქვეყნებს. ტერმინი „მბრუნავი კარი" გულისხმობს თანამდებობის პირთა მოძრაობას კერძო და საჯარო სექტორებს შორის. საქართველოში არაერთი პირი გადავიდა კერძო სექტორიდან მაღალ თანამდებობაზე, ან პირიქით. ამიტომ ორგანიზაცია მიიჩნევს, რომ „მბრუნავ კარს" მეტი ყურადღება უნდა დაეთმოს. იგი შეიძლება სასარგებლო იყოს გამოცდილების, ცოდნის, პრაქტიკის გაზიარების კუთხით, მაგრამ შეიძლება პრობლემადაც იქცეს, მაშინ როდესაც ინტერესთა გადაკვეთა წარმოიშვება. ამდენად ორგანიზაცია მნიშვნელოვნად მიიჩნევს „მბრუნავი კარის" მარეგულირებელი სათანადო ნორმების შემოღებას. სრულად წყარო: transparency.ge

თბილისი. ინფორმაციის თავისუფლების განვითარების ინსტიტუტმა 2012 წლის წინასაარჩევნო პერიოდში რეგიონებში განხორციელებული სპეციალური ტრანსფერების შესახებ ინფორმაცია გაავრცელა. 4 თებერვალს გამოქვეყნებულ კვლევაში წარმოდგენილია პრეზიდენტის, მთავრობის სარეზერვო და რეგიონებში განსახორციელებელი პროექტების ფონდების მიერ განხორციელებული გადარიცხვები. სრულად წყარო: opendatablog.wordpress.com

თბილისი. „ინფორმაციის თავისუფლების განვითარების ინსტიტუტი" ცენტრალური ხელისუფლებისთვის 2012 წელს გაცემული პრემიების შესახებ მონაცემების გამოქვეყნებას აგრძელებს. 1 თებერვალს გამოქვეყნებულ მონაცემებში 2012 წელს რამდენიმე საჯარო დაწესებულების მიერ გაცემული პრემიების რაოდენობაა მოცემული, მათ შორისაა: რეგიონული განვითარებისა და ინფრასტრუქტურის სამინისტრო, იუსტიიის სამინისტრო, კულტურის სამინისტრო, განათლებისა და მეცნიერების სამინისტრო, მთავრობის აპარატი. „ინფორმაციის თავისუფლების განვითარების ინსტიტუტი"  პრემიერ–მინისტრების, სახელზე გაცემული პრემიების შესახებაც აქვეყნებს ინფორმაციას. სრულად წყარო: opendatablog.wordpress.com

თბილისი. „საერთაშორისო გამჭვირვალობა – ბრიტანეთის" თავდაცვისა და უსაფრთხოების პროგრამის (TI-DSP) და „საერთაშორისო გამჭვირვალობის" ეროვნული ბიუროების თანამშრომლობის ფარგლებში 2013 წლის 29 იანვარს პირველად გამოქვეყნდა 82 ქვეყნის სახელმწიფო თავდაცვის ანტიკორუფციული ინდექსის შედეგები. საერთაშორისო გამჭვირვალობა – საქართველოს ვებგვერდზე გამოქვეყნებული ინფორმაციის თანახმად, 2013 წლის თავდაცვის ანტიკორუფციული ინდექსის მიხედვით, საქართველო ჯგუფ „D"-შია (კორუფციის მაღალი რისკი) მოქცეული, ანუ ექვსი კატეგორიიდან მეოთხე კატეგორიაში. აღნიშნულ კატეგორიაში საქართველოს მოხვედრა განაპირობა 2012 წლის განმავლობაში მისი თავდაცვის პოლიტიკის,  ფინანსური რესურსებისა და  პერსონალის მართვის, ოპერაციული და შესყიდვების პოლიტიკის ანალიზის შედეგებმა. სრულად წყარო: transparency.ge