თბილისი. ადამიანის უფლებების საერთაშორისო დღესთან დაკავშირებით, სოციალური სამართლიანობის ცენტრი ადამიანის უფლებების მდგომარეობის შესახებ ყოველწლიურ ანგარიშს აქვეყნებს.   „2021 წელს ქვეყანა განგრძობადი პოლიტიკური კრიზისით შეხვდა, რომელიც ვერც საერთაშორისო პარტნიორების მედიატორობით გაფორმებულმა 19 აპრილის პოლიტიკურმა შეთანხმებამ განმუხტა და ვერც 2021 წლის ადგილობრივი თვითმმართველობის არჩევნებმა. პოლიტიკური კრიზისზე დაფუძნებული დღის წესრიგიდან სრულად აღმოჩნდა გამოტოვებული: პანდემიის შემაშფოთებელი ადამიანიური და სოციალური შედეგები; ქვეყანაში არსებული მძიმე სოციალური და ეკონომიკური მდგომარეობა, რომელიც ინფილაციის უპრეცედენტო მასშტაბების ფონზე კიდევ უფრო დამძიმდა; ადამიანის უფლებებისა და თანასწორობის დაცვაზე მიმართული რეფორმების საკითხები“, - ვკითხულობთ ანგარიშში.  სრულად...   წყარო: ორგანიზაციის ვებგვერდი

თბილისი. „საქართველოს დემოკრატიული ინიციატივა“ წარმოადგენს ანგარიშს „ადამიანის უფლებები საქართველოში 2021“.  ანგარიშში განხილულია ადამიანის უფლებათა დაცვის კუთხით საქართველოში 2021 წელს არსებული მდგომარეობა. დოკუმენტში თემატურად მიმოხილულია ამ წლის ის ძირითადი მოვლენები და შემთხვევები, რომელიც წარმოაჩენს, თუ რამდენად ასრულებს საქართველოს ხელისუფლება თავის ვალდებულებებს ადამიანის უფლებებისა და სამართლის უზენაესობის სფეროებში. სრულად...  წყარო: ორგანიზაციის ვებგვერდი

თბილისი. „საერთაშორისო გამჭირვალობა-საქართველოს“ ახალი ანგარიში მიუთითებს, რომ პარლამენტის წევრების არადეკლარირებული ბიზნეს აქტივები და მათ სტატუსთან შეუთავსებელი საქმიანობა პრობლემას წარმოადგენს მეათე მოწვევის პარლამენტშიც.  "არადეკლარირებული კომპანიები რეალურად ეწევიან თუ არა სამეწარმეო საქმიანობას, ამის დადგენის შესაძლებლობა ჩვენ არ გაგვაჩნია და ამ საკითხით საჯარო სამსახურის ბიურო უნდა დაინტერესდეს; ინტერესთა შეუთავსებლობის საკითხი კი პარლამენტის საპროცედურო საკითხთა და წესების კომიტეტმა უნდა შეისწავლოს", - აღნიშნულია დოკუმენტში.  პარლამენტის წევრთა ქონებრივი მდგომარეობის დეკლარაციებსა და კომპანიებში მათი კუთვნილი წილების შესახებ ინფორმაცია კვლევაში მოცემულია 2021 წლის 16 სექტემბრის მდგომარეობით.  სრულად...  წყარო: ორგანიზაციის ვებგვერდი

თბილისი. ადამიანის უფლებათა დაცვის დღესთან დაკავშირებით, საია 2021 წელს საქართველოში ადამიანის უფლებათა დაცვის მდგომარეობის შეფასებას აქვეყნებს.  „10 დეკემბერს აღინიშნება ადამიანის უფლებათა დაცვის საერთაშორისო დღე. ეს თარიღი უკავშირდება 73 წლის წინანდელ ფაქტს, როდესაც გაერთიანებული ერების ორგანიზაციის გენერალურმა ასამბლეამ ადამიანის უფლებათა საყოველთაო დეკლარაცია მიიღო. საია ტრადიციულად წარმოადგენს მიმდინარე წლის განმავლობაში ადამიანის უფლებათა სფეროში იდენტიფიცირებულ ძირითად გამოწვევებს“, - ნათქვამია დოკუმენტში, რომელიც ქვეყანაში ადამიანის უფლებებს სოციალურ-ეკონომიკური, განათლების, შეკრებისა და გამოხატვის თავისუფლების, გარემოსდაცვითი, საარჩევნო კუთხით მიმოიხილავს.  სრულად...  წყარო: ორგანიზაციის ვებგვერდი

თბილისი. 9 დეკემბერი კორუფციის წინააღმდეგ ბრძოლის საერთაშორისო დღეა. ამ დღესთან დაკავშირებით, ინფორმაციის თავისუფლების განვითარების ინსტიტუტი (IDFI) აქვეყნებს ბლოგპოსტს ორგანიზაციის ანტიკორუფციული საქმიანობისა და არსებული გამოწვევების შესახებ. „IDFI აქტიურად განაგრძობს კორუფციასთან ბრძოლის ხელშეწყობას. ორგანიზაცია მნიშვნელოვან ძალისხმევას სწევს ანტიკორუფციული მიმართულებით ცნობიერების ასამაღლებლად და უკვე მესამე წელია წარმატებით ახორციელებს კორუფციასთან ბრძოლის სასერტიფიკატო პროგრამას. IDFI განაგრძობს მუნიციპალიტეტებთან თანამშრომლობას ადგილობრივ დონეზე უფრო ღია და მონაწილეობითი მმართველობის დამკვიდრების მიზნით. ორგანიზაცია სისტემატურად ადევნებს თვალყურს ეროვნული ანტიკორუფციული პოლიტიკის განხორციელებას და აქტიურად მონაწილეობს მონიტორინგის პროცესში“... სრულად... წყარო: idfi.ge

თბილისი. ინფორმაციის თავისუფლების განვითარების (IDFI) ინსიტუტის ანალიტიკური სტატიის თანახმად, 2021 წელს  საქართველოში კორუფციის მდგომარეობა გაუარესდა. ამაზე საერთაშორისო ორგანიზაციების მიერ გამოქვეყნებული ანტიკორუფციული რეიტინგების უმეტესობა  მიუთითებს. „არსებული გამოწვევების საპასუხოდ უმნიშვნელოვანესია საქართველოს მთავრობამ: მეტი ყურადღება დაუთმოს ქვეყანაში კორუფციასთან ბრძოლას; პირნათლად შეასრულოს კორუფციის წინააღმდეგ მებრძოლი საერთაშორისო ინსტიტუტების რეკომენდაციები“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. 9 დეკემბერი კორუფციასთან ბრძოლის საერთაშორისო დღეა. ამ დღესთან დაკავშირებით საერთაშორისო გამჭვირვალობა - საქართველო განცხადებას ავრცელებს. „საქართველო ერთ დროს აღიარებული იყო, როგორც კორუფციასთან წარმატებით მებრძოლი ქვეყანა. მაგალითად, მექრთამეობასთან – ე.წ. წვრილმან კორუფციასთან ბრძოლაში მოპოვებული მიღწევები დღესაც ნარჩუნდება, რაც ცალსახად მისასალმებელია. თუმცა, ამავე დროს, ქვეყანაში საგანგაშოდ ძლიერდება კორუფციის უფრო კომპლექსური გამოვლინებები, როგორიცაა, მაგალითად: მაღალი დონის კორუფცია – მაღალი თანამდებობის პირების ან მმართველ ჯგუფთან დაკავშირებული გავლენიანი ადამიანების მონაწილეობა კორუფციული შინაარსის დარღვევებში; და სახელმწიფოს მიტაცება – მდგომარეობა, როდესაც სახელმწიფო ინსტიტუციები არა ქვეყნისა და მისი მოქალაქეების წინაშე არიან ანგარიშვალდებული, არამედ გარეშე პირების კერძო ინტერესების სამსახურში დგანან“. სრულად... წყარო: transparency.ge

თბილისი. „საერთაშორისო გამჭვირვალობა - საქართველოს“ ინიციატივით გაიმართა დისკუსია - „საპარლამენტო კონტროლის განხორციელება COVID-19-ის პანდემის დროს”. „დისკუსიაში მონაწილეობა მიიღეს საერთაშორისო და ადგილობრივმა ორგანიზაციებმა, დეპუტატებმა, სახალხო დამცველის წარმომადგენელმა და პარლამენტის აპარატის თანამშრომლებმა“. სრულად... წყარო: ორგანიზაციის გვერდი სოციალურ ქსელში

თბილისი. ღია მმართველობის პარტნიორობის (OGP) პროცესში ჩართული არასამთავრობო ორგანიზაციები განცხადებას ავრცელებენ საქართველოში ღია მმართველობის პარტნიორობის (OGP) შეჩერებული პროცესის შესახებ. „მოვუწოდებთ საქართველოს მთავრობას, დაუყოვნებლივ აღადგინოს ღია მმართველობის პარტნიორობის პროცესი და უზრუნველყოს მასში არასამთავრობო ორგანიზაციების ქმედითი ჩართულობა. წინააღმდეგ შემთხვევაში, ყველასთვის ცხადი გახდება, რომ ღია მმართველობის პროცესი, მისი მისია და ღირებულებები საქართველოს მთავრობისთვის პრიორიტეტს აღარ წარმოადგენს. ამასთან, დამატებით მივმართავთ OGP-ის საერთაშორისო სამდივნოს, პროცესის აღდგენის მიზნით, აქტიურად ჩაერთოს ამ ხანგრძლივი კრიზისის მოგვარებაში და მოუწოდოს საქართველოს მთავრობას ქმედითი ნაბიჯების გადადგმისკენ“, ნათქვამია განცხადებაში. სრულად... წყარო: civilin.org

თბილისი. საერთაშორისო გამჭვირვალობა - საქართველო გთავაზობთ შეავსოთ ტესტი და გაიგოთ, გესმით თუ არა კორუფციის ანაბანა. „ამ ტესტში კარგი შედეგის მიღება არ ნიშნავს, რომ კორუფცია კარგად გამოგდის, არამედ - საჭირო ინფორმაციით ხარ აღჭურვილი, ხოლო უფრო მეტი კორუფციულ სქემებსა და კონკრეტულ შემთხვევებზე შეგიძლია გაიგო საერთაშორისო გამჭვირვალობა - საქართველოს ანგარიშებიდან. ტესტი...  წყარო: ორგანიზაციის გვერდი სოციალურ ქსელში

თბილისი. „საერთაშორისო გამჭვირვალობა - საქართველომ“ „საჯარო დაწესებულებაში ინტერესთა შეუთავსებლობისა და კორუფციის შესახებ“ კანონის პრაქტიკაში მოქმედება საქართველოს სამინისტროების მაგალითზე გამოკვეთა. ძირითადი მიგნებების მიხედვით: „2016-2020 წლებში სამინისტროებში არ გამოვლენილა კორუფციული სამართალდარღვევის, ინტერესთა შეუთავსებლობის, დაუსაბუთებელი ქონების ფლობის, კანონით აკრძალული შეთავაზების მიღების და საჩუქართან დაკავშირებული შეზღუდვის დარღვევის შემთხვევები. რაც იმას ნიშნავს, რომ დარღვევების გამოვლენა სამინისტროებში პარქტიკაში არ ხდება. გამოვლინდა თანამდებობრივი შეუთავსებლობის მხოლოდ 1 შემთხვევა. ეროვნული ანტიკორუფციული პოლიტიკის შემუშავება, განხორციელების მონიტორინგი და კოორდინაცია, ასევე ანტიკორუფციული საბჭოს მუშაობა შეჩერებულია. ანტიკორუფციული საბჭოს სამდივნო რეალურად არ არსებობს“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. საერთაშორისო გამჭვირვალობა - საქართველო აქვეყნებს კვლევას: 2013-2020 წლებში სახელისუფლებო პიარის თანამშრომლებზე 140 მლნ ლარზე მეტი დაიხარჯა. კვლევის ძირითადი მიგნებების თანახმად: „ყველაზე სოლიდური თანხა, 19.9 მლნ ლარზე მეტი, 2016 წელს დაიხარჯა. 2020 წელს, 2012 წელთან შედარებით, 578-დან 969-მდე (68%) გაიზარდა სახელმწიფო უწყებების პიარში დასაქმებული თანამშრომლების რაოდენობა. 322 სახელმწიფო უწყებიდან 35 დაწესებულებამ ინფორმაცია არ ან არასრულად მოგვაწოდა“. სრულად... წყარო: transparency.ge

თბილისი. სახალხო დამცველმა და ორგანიზაციამ „უფლებები საქართველო“ სპეციალური ანგარიში გამოაქვეყნეს, რომელიც თბილისისა და რუსთავის საქალაქო სასამართლოებში ჩატარებული სასამართლო პროცესების მონიტორინგის შედეგებს ასახავს. პროექტის მკვლევარები სისხლის სამართლის 30 საქმეზე დააკვირდნენ ოჯახში ძალადობის მსხვერპლი ქალების დაკითხვას. „უფლებების და მხარდამჭერი სერვისების შესახებ არასრულყოფილი ინფორმირება ერთ-ერთია იმ სირთულეებიდან, რომლებსაც ოჯახში ძალადობის მსხვერპლი ქალები სასამართლოში დაკითხვისას აწყდებიან“.  სრულად... წყარო: rights.ge

თბილისი. „საერთაშორისო გამჭვირვალობა-საქართველომ” პანდემიის პერიოდში სამშენებლო სექტორში სახელმწიფოს მიერ დადებული გამარტივებული შესყიდვების კონტრაქტები შეისწავლა. „2020 წლის პირველი ივნისიდან 2021 წლის 15 სექტემბრამდე სახელმწიფომ სამშენებლო მომსახურების შესყიდვის 125 მლნ ლარამდე ჯამური ღირებულების 4 500-მდე პირდაპირი კონტრაქტი გააფორმა  აქედან 33.8 მლნ ლარის ჯამური ღირებულების კონტრაქტები პარტია „ქართული ოცნების“ და სალომე ზურაბიშვილის შემომწირველების კომპანიებზე მოდის, რომელთაც 2016-2021 წლებში მმართველი პარტიის სასარგებლოდ 1.1 მლნ ლარზე მეტი გაიღეს“, ნათქვამია ორგანიზაციის ბლოგპოსტში. სრულად... წყარო: transparency.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს კვლევას, რომელიც მიმოიხილავს კიბერსივრცეში პერსონალური მონაცემების დაცვისა და კიბერუსაფრთხოების მარეგულირებელ სამართლებრივ გარემოს. „საუკეთესო ევროპულ სამართლებრივ ჩარჩოებზე დაყრდნობით, კვლევაში მოცემულია მტკიცებულებებზე დაფუძნებული რეკომენდაციები“. სრულად... წყარო: idfi.ge

სამეგრელო. საერთაშორისო გამჭვირვალობა - საქართველოს ინფორმაციით, ზუგდიდის მუნიციპალიტეტის 2017 წლის მოწვევის საკრებულომ გადაწყვიტა, ახალი საკრებულოს უფლებამოსილების ცნობამდე, დაჩქარებული წესით განიხილოს ზუგდიდის 2022 წლის ბიუჯეტის პროექტი და მიიღოს იგი. ორგანიზაციის შეფასებით, 2017 წლის მოწვევის საკრებულოს აღნიშნული ნაჩქარევი გადაწყვეტილება საგულისხმო პრობლემებს შეიცავს. „ზუგდიდის მერის მოვალეობის შემსრულებლისა და 2017 წლის მოწვევის საკრებულოს ნაჩქარევი გადაწყვეტილება ხელს უშლის ახალარჩეულ საკრებულოს, რომ შეასრულოს თავისი ფუნქცია. ეს დღეს ზუგდიდის საკრებულოს სხდომათა დარბაზში გააპროტესტა ახალარჩეული საკრებულოს 4 წევრმა „ერთიანი ნაციონალური მოძრაობიდან”, თუმცა ისინი სხდომათა დარბაზიდან საპატრულო პოლიციამ ძალის გამოყენებით გააძევა. მნიშვნელოვანია, ცენტრალურმა საარჩევნო კომისიამ დროულად დანიშნოს ახალი მოწვევის საკრებულოს პირველი სხდომა, რათა მას მიეცეს საქმიანობის წარმართვის, მათ შორის 2022 წლის ბიუჯეტის პროექტის განხილვისა თუ დამტკიცების შესაძლებლობა, და ახალარჩეული საკრებულოს წევრები სრულფასოვნად ჩაერთონ პროცესებში“, ნათქვამია ორგანიზაციის გვერდზე სოციალურ ქსელში.  სრულად...  წყარო: ორგანიზაციის გვერდი სოციალურ ქსელში

თბილისი. 18 ნოემბერს, ინფორმაციის თავისუფლების განვითარების ინსტიტუტმა (IDFI), USAID-ის ეკონომიკური მმართველობის პროგრამის მხარდაჭერით, პროექტის „საჯარო-კერძო დიალოგის ხარისხის შეფასების მექანიზმი“ პრეზენტაცია გამართა. „პროექტის ფარგლებში, IDFI შეაფასებს საკანონმდებლო აქტების შემუშავების პროცესში საჯარო-კერძო დიალოგის ხარისხს. შეფასება განხორციელდება სამი წლის განმავლობაში“. სრულად... წყარო: idfi.ge

თბილისი. საერთაშორისო გამჭვირვალობა - საქართველო მიიჩნევს, რომ საქართველოს მთავრობის მიერ OECD/ACN-ის მონიტორინგის მისიის მიერ მომზადებული ანგარიშის დამტკიცებაზე უარი ზიანს აყენებს საქართველოს რეპუტაციას და ეწინააღმდეგება ქართველი ხალხის მიერ კონსტიტუციით გამყარებულ ნებას ევროპული, დემოკრატიული, კორუფციისგან თავისუფალი და დამოუკიდებელი მართლმსაჯულების მქონე ქვეყნის მშენებლობის შესახებ. „მოვუწოდებთ მთავრობას, კონსტრუქციულად ითანამშრომლოს მონიტორინგის ჯგუფთან, უზრუნველყოს საპილოტე ანგარიშის დამტკიცება და მისი საჯაროდ ხელმისაწვდომობა“. სრულად... წყარო: transparency.ge

თბილისი. „საერთაშორისო გამჭვირვალობა-საქართველომ“ სარეკლამო ბაზარზე 2020 წელს არსებული მდგომარეობა და ძირითადი ტენდენციები შეისწავლა. კვლევაში მიმოხილულია, თუ როგორ აისახა „კოვიდ 19-ის“ გავრცელების შეკავების მიზნით დაწესებული შეზღუდვები და საპარლამენტო არჩევნების დროს პოლიტიკური პარტიების მიერ რეკლამისთვის დახარჯული თანხები სარეკლამო ბაზარზე. ერთ-ერთი მიგნების თანახმად: 2020 წელს, 2019 წელთან შედარებით, სატელევიზიო სარეკლამო ბაზარი 7.7 მლნ ლარით (11%) გაიზარდა და 75.2 მლნ ლარი შეადგინა. ზრდა ძირითადად საპარლამენტო არჩევნების დროს პოლიტიკური პარტიების მიერ სატელევიზიო რეკლამაში დახარჯულმა თანხამ გამოიწვია. სრულად... წყარო: transparency.ge

თბილისი. „საერთაშორისო გამჭვირვალობა - საქართველომ“ 2021 წლის 30 ოქტომბრის მუნიციპალიტეტის ორგანოთა არჩევნების მეორე ტურზე საარჩევნო კომისიებსა და სასამართლოებში 53 საჩივარი/სარჩელი შეიტანა, მათგან საარჩევნო კომისიებში 43, სასამართლოებში კი - 10. ორგანიზაციის ცნობით, საარჩევნო საჩივრების უმეტესობა არ დაკმაყოფილდა. „სამწუხაროა, რომ სასამართლოები საქმეებს მეტწილად არასრულყოფილად განიხილავდნენ. საოლქო საარჩევნო კომისიების ნაწილი კი დავებს ფორმალისტურად უდგებოდა და საქმის გარემოებების შესწავლისა და ფაქტების დადგენის ინტერესი არ ჰქონდა“. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI) საქართველოს ეკონომიკის პერიოდულ მიმოხილვას აქვეყნებს. „მიმდინარე მიმოხილვაში მოცემულია მთლიანი შიდა პროდუქტის, ვაჭრობის, ფულადი გზაცნილების, პირდაპირი უცხოური ინვესტიციების, გაცვლით კურსის, ბიუჯეტის, ვალის 2021 წლის ცხრა თვის მდგომარეობა და მოსალოდნელი პროგნოზები მომდევნო წლებში“. სრულად... წყარო: idfi.ge

თბილისი. ეუთო/ოდირი და ევროპარლამენტი საქართველოს ადგილობრივი თვითთმართველობის არჩევნების მეორე ტურის დაკვირვების შედეგებზე განცხადებას აქვეყნებს. „მუნიციპალურ ორგანოთა არჩევნების მეორე ტური ზოგადად კარგად ადმინისტრირებული იყო, მაგრამ უწყვეტმა პოლარიზაციამ და ნეგატიური რიტორიკის გამწვავებამ პროცესზე უარყოფითად იმოქმედა. კამპანია კონკურენტული იყო და ხასიათდებოდა ეროვნულ საკითხებზე ფოკუსირებით, რამაც ადგილობრივი საკითხები დაჩრდილა. ზოგადად კანდიდატებს კამპანიის თავისუფლად წარმართვა შეეძლოთ, მაგრამ ამომრჩევლებთა დაშინებისა და ზეწოლის ბრალდებები შენარჩუნდა. რესურსებს შორის მკვეთრმა დისბალანსმა და ხელისუფლებაში ყოფნით მინიჭებულმა შეუსაბამო უპირატესობამ საასპარეზო პირობები შეცვალა. არჩევნების დღემ მთლიანობაში მშვიდად ჩაიარა და კარგად იყო ადმინისტრირებული. თუმცა საარჩევნო უბნების გარეთ პარტიების მხარდამჭერებს შორის დაპირისპირებისა და ორმხრივი პროვოკაციების ერთეული შემთხვევა დაფიქსირდა. ბოლოდროინდელი საკანონმდებლო ცვლილებების მიუხედავად, რომელთა მიხედვითაც საარჩევნო უბნის გარეთ 100 მეტრის პერიმეტრში შეკრებები აიკრძალა, საერთაშორისო საარჩევნო სადამკვირვებლო მისიის დამკვირვებლებმა აღნიშნეს, რომ მათ მიერ მონახულებული საარჩევნო უბნების 29 პროცენტში, დროდადრო შეიმჩნეოდა ცალკეულ პირთა ჯგუფების დამაშინებელი ყოფნა უშუალოდ საარჩევნო უბნების მიმდებარე ტერიტორიაზე“... სრულად... წყარო: www.osce.org