თბილისი. „საერთაშორისო გამჭვირვალობის“ მიერ გამოქვეყნებული 2022 წლის „კორუფციის აღქმის ინდექსის“ (CPI) მიხედვით, საქართველოს 56 ქულა აქვს, რაც წინა წელთან შედარებით ერთი ქულით მეტია. წარსულში 56 ქულა ქვეყანას 3-ჯერ: 2017, 2019 და 2020 წლებში  ჰქონდა. რეიტინგში შემავალ 180 ქვეყანას შორის საქართველო 41-ე ადგილს იკავებს. ორგანიზაციის განმარტებით, „კორუფციის აღქმის ინდექსში“ ქვეყნის შედეგის ერთი ქულით ცვლილება სტატისტიკურად უმნიშვნელოდ ითვლება. საქართველოს შემთხვევაში ქულა 2012 წლის შემდეგ მნიშვნელოვნად არ გაუმჯობესებულა (იხ. გრაფიკი),[1] რაც იმას ნიშნავს, რომ ბოლო 10 წლის განმავლობაში ქვეყანას კორუფციის წინააღმდეგ ქმედითი ნაბიჯები არ გადაუდგამს. რეიტინგში საქართველოს შედეგი, ძირითადად, განპირობებულია წვრილმანი მექრთამეობის დაბალი დონით, თუმცა ამავდროულად კვლავაც გამოწვევად რჩება ელიტური კორუფცია და მის წინააღმდეგ ბრძოლის პოლიტიკური ნების არარსებობა. სრულად... წყარო: transparency.ge

თბილისი. ადამიანის უფლებათა ცენტრმა ანგარიშის პრეზენტაცია გამართა. ანგარიში „ადამიანის უფლებების მდგომარეობა საქართველოში, 2022“ აფასებს ადამიანის უფლებათა მდგომარეობას და მოიცავს საკვანძო მიმართულებებს ადამიანის უფლებათა ისეთ სფეროებში, როგორიც არის: კანონის წინაშე თანასწორობა, გამოხატვისა და სიტყვის თავისუფლება, სასამართლო სისტემა, ადამიანის უფლებები პენიტენციურ დაწესებულებებში, ოკუპაცია და მისი შედეგები ადამიანის უფლებრივ მდგომარეობაზე, მედიის თავისუფლების საკითხები, შშმ პირთა მდგომარეობა, LGBTQI+ პირთა უფლებები, ქალთა მიმართ ძალადობის, მათ შორის - ოჯახში ძალადობის ფაქტები, რელიგიურ და ეთნიკურ უმცირესობათა უფლებები, სიძულვილით მოტივირებული დანაშაულები და ა.შ. ანგარიშის მიზანია, შეაფასოს სახელმწიფოს სხვადასხვა უწყებების ქმედება ადამიანის უფლებათა დაცვის ჭრილში, როგორც პოზიტიური, ასევე, ნეგატიური ვალდებულებების ნაწილში, მათ შორის - მათი რეაგირების ხარისხი უფლებების დარღვევებზე, მართლმსაჯულების ეფექტიანობა და საკანონმდებლო თუ სისტემური ცვლილებები, რაც მიმართული უნდა იყოს საქართველოში ადამიანის უფლებების დაცვის საერთაშორისო სტანდარტების დამკვიდრებისკენ. იხ. ანგარიში... წყარო: hrc.ge

თბილისი. სამართლიანი არჩევნები (ISFED)-ის, საერთაშორისო გამჭვირვალობა-საქართველო და საქართველოს ახალგაზრდა იურისტთა ასოციაცია (საია) საარჩევნო კანონმდებლობაში 2022 წლის დეკემბერში შეტანილი ცვლილებების შესახებ შეფასებას აქვეყნებენ. „2022 წლის ოქტომბერში საქართველოს პარლამენტმა პირველი მოსმენით მიიღო კანონპროექტები, რომლებიც საარჩევნო კოდექსსა და „მოქალაქეთა პოლიტიკური გაერთიანებების შესახებ“ ორგანულ კანონებში ცვლილებებს ითვალისწინებდა. 10 ოქტომბერს კანონპროექტები პარლამენტის თავმჯდომარემ ვენეციის კომისიასა და ეუთო/ოდირს გაუგზავნა და მოსაზრებების დაჩქარებული წესით მომზადება სთხოვა. 19 დეკემბერს ვენეციის კომისიამ და ეუთო/ოდირმა გაგზავნილი კანონპროექტების შესახებ საკუთარი მოსაზრება გამოაქვეყნეს. პარლამენტმა ამ რეკომენდაციების საფუძველზე კანონპროექტებში გარკვეული ცვლილებები შეიტანა, რომლებიც საბოლოოდ 22 დეკემბერს მესამე მოსმენით იქნა მიღებული. ორგანიზაციების შეფასებით, მიღებული საკანონმდებლო ცვლილებები, როგორც ადგილობრივი სამოქალაქო ორგანიზაციების, ისე ვენეციის კომისიისა და ეუთო/ოდირის მიერ იდენტიფიცირებულ რიგ პრობლემებს პასუხობს, რაც დადებითად უნდა შეფასდეს. თუმცა, ამ ცვლილებებით სრულად არ იქნა გათვალისწინებული ყველა არსებითი ხასიათის რეკომენდაცია, მათ შორის, არ აისახა იმ რეკომენდაციების გარკვეული ნაწილი, რომელიც ვენეციის კომისიამ და ეუთო/ოდირმა 2022 წლის დეკემბერში წარმოადგინეს. მათი ერთობლივი შეფასებით, განხორციელებული რეფორმა საარჩევნო კოდექსის ყოვლისმომცველ ანალიზს არ ეფუძნება და მხოლოდ ცალკეულ საკითხებს შეეხება“. სრულად... წყარო: gyla.ge

თბილისი. საქართველოს რეფორმების ასოციაციამ (GRASS) ევროკავშირის მიერ საქართველოსთვის განსაზღვრული 12 პირობის შესრულების შესახებ ანგარიში გამოაქვეყნა. ორგანიზაციის შეფასებით, 12 პირობიდან საქართველომ ამ დრომდე არ შეასრულა 6 პირობა, ნაწილობრივ შეასრულა - 3; მეტწილად შეასრულა 2 პირობა, ხოლო ერთი პირობა სრულად შესრულებულია. სრულად... წყარო: bm.ge

თბილისი. ინფორმაციის თავისუფლების განვითარების ინსტიტუტის (IDFI) ინფორმაციით, 2022 წელს საჯარო ინფორმაციის პროაქტიული ხელმისაწვდომობის საშუალო მაჩვენებელი 60%-ია. 2022 წელს, შესაბამისი სამართლებრივი აქტის მოთხოვნების დაცვით მხოლოდ 3 საჯარო დაწესებულებას ჰქონდა სრულყოფილად გამოქვეყნებული ინფორმაცია; ცენტრალურ საჯარო დაწესებულებებს შორის ყველაზე დაბალი შეფასება აქვთ მთავრობის ადმინისტრაციას (34%) და საგარეო საქმეთა სამინისტროს (35%). ხოლო, კულტურის და სპორტის სამინისტროს საერთოდ არ ჰქონდა საკუთარი ვებგვერდი; ყველაზე პრობლემური საკითხი, კვლავ ფინანსების განკარგვასთან დაკავშირებული ინფორმაციის გამოქვეყნება რჩება; გაეცანით საქართველოს საჯარო დაწესებულებებში საჯარო ინფორმაციის პროაქტიული გამოქვეყნების პრაქტიკას (2022). სრულად... წყარო: idfi.ge

თბილისი. 2022 წლის განმავლობაში საერთაშორისო გამჭვირვალობა - საქართველოს იურისტებმა სასამართლოებში 57 საქმე მოიგეს. ორგანიზაციის ბენეფიციარები კომპენსაციის სახით 752 225 ლარს მიიღებენ. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ბლოგპოსტს: მუნიციპალიტეტების მიერ საზედამხედველო სამუშაოების შესყიდვის პრაქტიკა. „მუნიციპალიტეტებიდან მიღებული ინფორმაციის საფუძველზე ირკვევა, რომ ინფრასტრუქტურული პროექტების ზედამხედველობისათვის 2019-2021 წლებში მუნიციპალიტეტები ძირითადად ერთი და იმავე კომპანიებს ქირაობდნენ. მუნიციპალიტეტებში საზედამხედველო კომპანიების დაქირავების არსებული პრაქტიკა მიუთითებს, რომ უმეტეს შემთხვევაში მათი მომსახურება ფორმალურ ხასიათს ატარებს, რაც ზრდის უხარისხოდ შესრულებული სამუშაოების რისკებს“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. საქართველოს ახალგაზრდა იურისტთა ასოციაცია (საია) აქტიურადაა ჩართული „ღირსეული შრომის პლატფორმის“ საქმიანობაში, რომელიც აერთიანებს დამოუკიდებელ პროფესიულ კავშირებს, ადამიანის უფლებათა დამცველ ორგანიზაციებსა და აქტივისტებს. ორგანიზაცია გიზიარებთ 2022 წლის კვლევას „მოპარული ხელფასი საქართველოში - შრომითი უფლებების დარღვევის ფინანსური გავლენა მშრომელთა უფლებებზე“.  კვლევა... საია-მ ასევე მოამზადა კვლევა „შრომითი უფლებები საჯარო სამსახურში: სამინისტროები და თვითმმართველი ქალაქები“. დოკუმენტში მოცემულია საჯარო სამსახურში შრომითი უფლებების მომწესრიგებელი სამართლებრივი ნორმების შედარებითი ანალიზი. კვლევა... ორგანიზაციის 2022 წლის საქმიანობის ანგარიში... წყარო: ორგანიზაციის გვერდი სოციალურ ქსელში

აჭარა. „საერთაშორისო გამჭვირვალობა - საქართველო“ აფასებს, თუ როგორ შეასრულა თავისი მაკონტროლებელი ფუნქცია  აჭარის ავტონომიური რესპუბლიკის უმაღლესმა საბჭომ 2021-2022 წლებში. „კვლევის შედეგად დადგინდა, რომ აჭარის უმაღლესი საბჭო კანონმდებლობით გათვალისწინებულ ყველა მექანიზმს არ იყენებდა და აჭარის მთავრობას სრულყოფილად ვერ აკონტროლებდა. ეს გავლენას ახდენდა როგორც საბჭოს, ისე მთავრობის ფუნქციონირებაზე“. სრულად... წყარო: transparency.ge

თბილისი. ანტიკორუფციული კვირეულის ფარგლებში, 12 დეკემბერს, ინფორმაციის თავისუფლების განვითარების ინსტიტუტმა (IDFI) ილიას სახელმწიფო უნივერსიტეტთან თანამშრომლობით კორუფციასთან ბრძოლის სასერტიფიკატო პროგრამის მაგისტრატურის ჯგუფის მონაწილეებისთვის ღია ლექცია გამართა. კურსის ფარგლებში მოწვეულმა ლექტორმა, ქალბატონმა თინა ხიდაშელმა ინტერაქციულ რეჟიმში ისაუბრა საერთაშორისოდ დამკვიდრებულ ანტიკორუფციულ კომისიებზე, რომლესაც მნიშვნელოვანი წვლილი მიუძღვით კორუფციასთან ბრძოლის პროცესში. ლექციის მსვლელობისას ლექტორმა მიმოიხილა ანტიკორუფციული კომისიების სხვადასხვა ფორმა და მათი ძირითადი ფუნქციური განსხვავებები. სრულად... წყარო: idfi.ge

თბილისი. ამ წუთებში, ინფორმაციის თავისუფლების განვითარების ინსტიტუტი (IDFI) რიგით მეოთხე საერთაშორისო კონფერენციას „არქივების ღიაობის მნიშვნელობა საბჭოთა წარსულის გადაფასებასა და პროპაგანდისთვის წინააღმდეგობის გაწევაში“ მართავს. კონფერენციას შეგიძლიათ დაესწროთ Zoom პლატფორმის მეშვეობით... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტმა აჭარის უმაღლესი საბჭოს საზედამხედველო საქმიანობაში საზოგადოების მონაწილეობის მხარდასაჭერად მორიგი ტრენინგი გამართა. ტრენინგის თემა ამჯერად თემატურ მოკვლევას შეეხებოდა. მონაწილეები გაეცნენ თემატური მოკვლევის მნიშვნელობას, მისი დაგეგმვისა და განხორციელების პროცესს და სტადიებს, როგორ უნდა ჩაერთოს მესამე მხარე თემატური მოკვლევის პროცესში და რა ფორმით უნდა გაიგზავნოს კითხვებზე პასუხი. სრულად... წყარო: idfi.ge

თბილისი. საქართველოს ახალგაზრდა იურისტთა ასოციაცია აქვეყნებს კვლევას „მინისტრის ინდივიდუალური პასუხისმგებლობა, როგორც საპარლამენტო კონტროლის მექანიზმი“. „მინისტრის ინდივიდუალური პასუხისმგებლობა საპარლამენტო კონტროლის ერთ-ერთი ძლიერი რეპრესიული მექანიზმია. ის აბალანსებს იმ უარყოფით მხარეებს, რაც ზოგადად სოლიდარულ პასუხისმგებლობას ახლავს თან. ეს მექანიზმი საშუალებას აძლევს პარლამენტს, პასუხისმგებლობა არ გაავრცელოს მთლიან კაბინეტზე და მხოლოდ კონკრეტული მინისტრით შემოიფარგლოს. საბოლოოდ, ინდივიდუალური პასუხისმგებლობა აძლიერებს საპარლამენტო კონტროლის ხარისხს ქვეყანაში“. სრული კვლევა... წყარო: ორგანიზაციის გვერდი სოციალურ ქსელში

ბელგია. 5-8 დეკემბერს, სამოქალაქო საზოგადოების ორგანიზაციების წარმომადგნელები ვიზიტით ბრიუსელში იმყოფებოდნენ. ევროპულ სტრუქტურებში შეხვედრები გაიმართა ასოცირებით ნაკისრი ვალდებულებებისა და ევროკომისიის 12 რეკომენდაციის შესახებ. ფონდ „ღია საზოგადოება საქართველოს“ ხელმძღვანელობით, სამოქალაქო საზოგადოების სხვადასხვა ორგანიზაციები, 2014 წლიდან მონიტორინგს უწევენ და ნაკისრი ვალდებულებების შესრულების მონიტორინგის შედეგებს აცნობენ ევროკავშირის ინსტიტუტებს, ასოცირების ხელშეკრულებისა და ასოცირების დღის წესრიგის შესრულების შესახებ. შეხვედრებზე ყურადღება გამახვილდა იმ სფეროებზე, რაც ფუნდამენტურია ქვეყნის წინსვლისა და განვითარებისთვის. სრულად... წყარო: osgf.ge

თბილისი. საქართველოს ახალგაზრდა იურისტთა ასოციაცია (საია) მთელი წლის განმავლობაში აქტიურად აგრძელებდა მუშაობას ადამიანის უფლებათა დასაცავად, როგორც სამართალწარმოების, ასევე მონიტორინგის, ადვოკატირებისა და საკანონმდებლო პროცესში ჩართულობის გზით. საია ყოველწლიურად აფასებს ქვეყანაში ადამიანის უფლებათა დაცვის მდგომარეობას და წარუდგენს მას საზოგადოებას. ორგანიზაციის შეფასებით, 2022 წელი ადამიანის უფლებათა დაცვის თვალსაზრისით კვლავაც გამოწვევებით სავსე იყო და ქვეყანაში გაგრძელდა დემოკრატიული უკუსვლა. ამ წლის უმთავრესი თემა ევროკავშირისგან კანდიდატის სტატუსის მოსაპოვებლად გადმოცემული 12 პირობის შესრულება იყო. ამ დრომდე პრობლემურია ამ პირობებიდან მნიშვნელოვანი ნაწილის შესრულების საკითხი, როგორც ადამიანის უფლებების დაცვის, ისე ინსტიტუციური რეფორმების მიმართულებით. წარმოდგენილ დოკუმენტში დეტალურად არის აღწერილი ადამიანის უფლებათა სფეროში არსებული ის ძირითადი გამოწვევები, რომელიც საია-მ 2022 წლის განმავლობაში გამოავლინა. სრულად... წყარო: gyla.ge

თბილისი. 9 დეკემბერი კორუფციასთან ბრძოლის საერთაშორისო დღეა. “საერთაშორისო გამჭვირვალობა - საქართველო” გასულ წელს წერდა, რომ ქმედითი ნაბიჯების გარეშე კორუფციის ზრდა იყო მოსალოდნელი, რაც ქვეყანას სულ უფრო მეტ ზიანს მოუტანდა, მათ შორის, მეტ წინაღობას შეუქმნიდა მის დემოკრატიულ განვითარებას. ორგანიზაციის შეფასებით, სამწუხაროდ, სწორედ ასეც მოხდა. „ევროკომისიის მიერ საქართველოსთვის გაცემულ 12 რეკომენდაციაში მაღალი დონის კორუფციის საკითხის მოხვედრა ბოლო წლებში ამ პრობლემის გაღრმავების შედეგია; სწორედ ამიტომ დასახელდა კორუფციასთან ბრძოლა ევროკავშირის წევრობის კანდიდატის სტატუტის მიღების ერთ-ერთ მკაფიო წინაპირობად. ამ რეალობის გათვალისწინებითაც კი, ბოლო ერთი წლის განმავლობაში ქმედითი ნაბიჯები არ გადადგმულა კორუფციის მხრივ ქვეყნის წინაშე არსებული მთავარი გამოწვევების, მაღალი დონის კორუფციისა და სახელმწიფოს მიტაცების დასაძლევად. პირიქით, ქვეყანაში გრძელდება კლეპტოკრატიის ჩამოყალიბება, როდესაც სახელმწიფოს მმართველები იყენებენ პოლიტიკურ ძალაუფლებას, რათა მიითვისონ ქვეყნის სიმდიდრე. სულ უფრო იზრდება გამოუძიებელი სავარაუდო  მაღალი დონის კორუფციის შემთხვევების რაოდენობა“. სრულად... წყარო: transparency.ge

თბილისი. ინფორმაციის თავისუფლების განვითარების ინსტიტუტი (IDFI) საჯარო დაწესებულებებს შეახსენებს მათ ვალდებულებას, ყოველი წლის 10 დეკემბერს საქართველოს პარლამენტს, საქართველოს პრეზიდენტსა და საქართველოს პრემიერ-მინისტრს წარუდგინონ, აგრეთვე საკანონმდებლო მაცნეში გამოაქვეყნონ, საჯარო ინფორმაციის ხელმისაწვდომობასთან დაკავშირებით არსებული მდგომარეობის შესახებ მიმდინარე წლის ანგარიში.  ორგანიზაციის შეფასებით, განვლილი წლების (2021 - 2022) ე.წ 10 დეკემბრის ანგარიშების მონიტორინგმა აჩვენა რომ, ხშირია შემთხვევები, როდესაც საჯარო დაწესებულებები ანგარიშებში ასახავენ კანონმდებლობის მოთხოვნების ან/და რეალობასთან შეუსაბამო მონაცემებს. სრულად... წყარო: ორგანიზაციის გვერდი სოციალურ ქსელში

თბილისი. „სამართლიანმა არჩევნებმა“ გააანალიზა უკანასკნელ პერიოდში სოციალური მედიის პლატფორმებზე მიმდინარე პროპაგანდისტული კამპანიები. ორგანიზაციის თქმით დეზინფორმაცია და ინფორმაციით მანიპულირება ქვეყნისთვის მნიშვნელოვან გამოწვევას წარმოადგენს. იხ. კვლევის შედეგები ანგარიშში... წყარო: isfed.ge

იმერეთი. როგორ ვიკვლიოთ პოლიტიკური კორუფცია - ამ თემაზე ქუთაისში „საერთაშორისო გამჭვირვალობა - საქართველოს” ორგანიზებით ტრენინგი ჩატარდა. ტრენინგს, რომელსაც ჟურნალისტები და არასამთავრობო ორგანიზაციების წარმომადგენლები ესწრებოდნენ, ორგანიზაციის მთავარი ეკონომისტი, ბესო ნამჩავაძე უძღვებოდა. შეხვედრაზე საუბარი შეეხო საჯარო მონაცემების ბაზებიდან ინფორმაციის მოპოვებისა და დამუშავების ხერხებს, „საერთაშორისო გამჭვირვალობა - საქართველოს“ მიერ შექმნილი ვებგვერდების გამოყენების მეთოდებს. სრულად... წყარო: ორგანიზაციის გვერდი სოციალურ ქსელში

აჭარა. თემაზე „როგორ ვიკვლიოთ პოლიტიკური კორუფცია“, ბათუმში, „საერთაშორისო გამჭვირვალობა - საქართველოს” ორგანიზებით, ტრენინგი მიმდინარეობს.  შეხვედრაზე განიხილება საჯარო მონაცემების ბაზებიდან ინფორმაციის მოპოვებისა და დამუშავების ხერხები, „საერთაშორისო გამჭვირვალობა - საქართველოს“ მიერ შექმნილი ვებგვერდების გამოყენების მეთოდები. სრულად... წყარო: ორგანიზაციის გვერდი სოციალურ ქსელში

თბილისი. საერთაშორისო გამჭვირვალობა - საქართველოს ინფორმაციით, სახელმწიფომ რაჭაში 104,712 ჰექტარ ტყეზე სამონადირეო მეურნეობის მოწყობის 49 წლიანი ლიცენზია გასცა კომპანიაზე, რომლის საბოლოო ბენეფიციარი მესაკუთრეც რუსული კავშირების მქონე ბიზნესმენი დავით ხიდაშელია. „ამ გარიგებით საქართველომ კონკრეტული ფინანსური ზიანი მიიღო – რაჭის ტერიტორიის მესამედზე კერძო სამონადირეო მეურნეობის მოწყობისთვის ლიცენზიის გაცემის გამო აღარ არის შესაძლებელი შედარებით დიდი ზომის დაცული ტერიტორიის შექმნა, რაც მეტ შემოსავალს მოიტანდა. ჩვენი დათვლით, ამ გზით, სახელმწიფო დაახლოებით 2,057,593 ლარის (619,757 აშშ დოლარი) პირდაპირ შემოსავალს კარგავს. იმის გათვალისწინებით, რომ აღნიშნულის მიზეზს შესაძლოა კორუფციული გარიგება ან გადაწყვეტილების მიმღებ მოხელეთა მიერ სამსახურებრივი მოვალეობის არაჯეროვნად შესრულება წარმოადგენდა, მოვუწოდებთ საქართველოს გენერალურ პროკურატურას, დაიწყოს გამოძიება და დაადგინოს, ხომ არ შეიცავდა რაჭის ტყის განკარგვასთან დაკავშირებული გადაწყვეტილებები დანაშაულის ნიშნებს“, ნათქვამია ორგანიზაციის ვეგვერდზე. სრულად... წყარო: transparency.ge

თბილისი. სამოქალაქო საზოგადოების ორგანიზაციები მიიჩნევენ, რომ საქართველოს მთავრობის პასიურობა OECD/ACN-ის მონიტორინგის მე-5 რაუნდის პროცესში მონაწილეობაზე ზიანს აყენებს საქართველოს რეპუტაციას და კითხვის ნიშნის ქვეშ აყენებს ქვეყანაში ანტიკორუფციული რეფორმების გატარების დღის წესრიგს. ხელმომწერი ორგანიზაციები მოუწიდებენ საქართველოს მთავრობას, კონსტრუქციულად ითანამშრომლოს ეკონომიკური თანამშრომლობისა და განვითარების ორგანიზაციის ანტიკორუფციული ქსელთან და უზრუნველყოს 2023 წელს საქართველოში ანტიკორუფციული გარემოს მონიტორინგის მე-5 რაუნდის შეფასების განხორციელება. სრულად... წყარო: transparency.ge