თბილისი. ტოლერანტობისა და მრავალფეროვნების ინსტიტუტი (TDI) აქვეყნებს ყოველწლიურ ანგარიშს: რელიგიისა და რწმენის თავისუფლება საქართველოში 2022. „ანგარიშის მიზანია, საქართველოში რელიგიისა და რწმენის თავისუფლებასთან დაკავშირებული მდგომარეობის სამართლებრივი და პოლიტიკური ასპექტების მიმოხილვა და ანალიზი. ანგარიში მოიცავს 2022 წლის პერიოდს. გაანალიზებულია ის სისტემური პრობლემები, რომლებსაც არადომინანტური რელიგიური ორგანიზაციები უკვე მრავალი წელია აწყდებიან და ისინი საანგარიშო პერიოდშიც გადაუჭრელი რჩება. გარდა ამისა, მიმოხილულია ახალი სამართლებრივი და პოლიტიკური საკითხები, რომლებიც რელიგიისა და რწმენის თავისუფლებას უკავშირდება“. TDI-ის ანგარიში რელიგიისა და რწმენის თავისუფლება საქართველოში 2022... წყარო: tdi.ge

სამცხე-ჯავახეთი. საერთაშორისო გამჭვირვალობა - საქართველოს (TI Georgia) სამოქალაქო საბჭოების აქტიურობით, რეგიონების მოსახლეობისთვის 300-ზე მეტი ინფრასტრუქტურული პრობლემა მოგვარდა. მათ შორის, ახალციხის სოფელ ურავალში, მოსახლეობამ მოაგროვა ხელმოწერები და სასმელი წყლის შიდა ქსელის მოწესრიგების შედეგად წყალი უწვეტად მიეწოდებათ. ასევე, ახალციხის სამოქალაქო საბჭოს ადვოკატირების შედეგად, სოფელ აწყურში აშენდა ტრანსპორტის მოსაცდელი, სპორტული მოედანი, მოწყობის პროცესშია აწყური-თისელი დამაკავშირებელი გზა, სოფელ ანში აშენდა საბავშვო ბაღი...  ეს ყველაფერი კი საერთაშორისო გამჭვირვალობა - საქართველოს სამოქალაქო საბჭოების ახალციხის მერიასთან თანამშრომლობის კარგი მაგალითია. სრულად... წყარო: ორგანიზაციის გვერდი სოციალურ ქსელში

კახეთი. საქართველოს ახალგაზრდა იურისტთა ასოციაციამ (საია), თელავში, სამოქალაქო საზოგადოების წარმომადგენლებთან კვლევის - „ევროკომისიის 2022 წლის 17 ივნისის რეკომენდაციების შესრულების მდგომარეობა საქართველოში - პარლამენტის საქმიანობის მონიტორინგი საპარლამენტო კონტროლის, არჩევნებისა და მართლმსაჯულების საკითხებთან დაკავშირებით“ პრეზენტაცია და პანელური დისკუსია გამართა.  საია პროექტს „საქართველოს სტრატეგიული კვლევებისა და განვითარების ცენტრის“ მხარდაჭერით , ევროკავშირისა და კონრად ადენაუერის ფონდის მიერ დაფინანსებული პროექტის “სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის” ფარგლებში, ახორციელებს. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციამ (საია) პანელური დისკუსია გამართა თემაზე: ევროკომისიის 2022 წლის 17 ივნისის რეკომენდაციების შესრულების მდგომარეობა საქართველოში. „როგორც მონიტორინგის შედეგად გამოიკვეთა, თითოეული მიმართულებით ცალკეული გაუმჯობესებების მიუხედავად, კვლავ რჩება გამოწვევები. კერძოდ, საპარლამენტო კონტროლის მიმართულებით გასაძლიერებელია მინისტრების მიმართ ინდივიდუალური პასუხისმგებლობის მექანიზმები; საარჩევნო სისტემაში კვლავ რჩება ადმინისტრაციული რესურსის ბოროტად გამოყენებისა და ამომრჩევლის დაშინებისა თუ მოსყიდვის რისკი, სათანადო ეფექტიანი რეგულაციების არარსებობის გამო.  განსაკუთრებული სამუშაოა გასაწევი მართლმსაჯულების რეფორმის კუთხით, სადაც ჯერჯერობით ყველაზე ნაკლები წინსვლა შეინიშნება - ამ მიმართულებით მხოლოდ ფასადური ცვლილებებია მიღებული და სისტემაში არსებულ ფუნდამენტურ პრობლემებს ვერ აგვარებს, როგორიცაა სასამართლო სისტემაში კორპორატივიზმი და პირადი ინტერესების არსებობა“. ანგარიში იხილეთ ბმულზე... წყარო: gyla.ge

თბილისი. საქართველოს ახალგაზრდა იურისტთა ასოციაციის კვლევით, კულტურის სფეროში განხორცილებულმა ცვლილებებმა და რეორგანიზაციამ აჩვენა, რომ გადაწყვეტილებების მიზანი კულტურისა და მეცნიერების სფეროს კონტროლი და ცენზურაა. ორგანიზაციამ 2021 წლიდან დღემდე იმუშავა 12 საქმეზე. საია გიზიარებთ არსებულ საქმეებში გამოკვეთილ ტენდენციებს და პრობლემებს. სრულად... წყარო: gyla.ge

აჭარა. „საერთაშორისო გამჭვირვალობა - საქართველომ” შეისწავლა 2021 წლის 3 დეკემბრიდან 2022 წლის 31 დეკემბრამდე, ქალაქ ბათუმის 2021 წლის მოწვევის საკრებულოს მიერ გაწეული საქმიანობა. „ანგარიში მოიცავს ძირითად მიგნებებსა და რეკომენდაციებსაც, რომელთა გათვალისწინებაც დაეხმარება საკრებულოს მომავალ საქმიანობაში. ანგარიშის საფუძვლად გამოყენებულია საკრებულოდან გამოთხოვილი საჯარო ინფორმაცია, „საერთაშორისო გამჭვირვალობა - საქართველოს” დაკვირვებები და მედიის მასალები“. სრულად... წყარო: transparency.ge

თბილისი. სამი სამოქალაქო საზოგადოების ორგანიზაციის შეფასებით, იუსტიციის უმაღლესი საბჭოს გამჭვირვალობის ხარისხი კიდევ უფრო გაუარესდა. „იუსტიციის საბჭოს სხდომების წინა დღეს დანიშვნა, სხდომების თარიღისა და დროის ქაოტური გადადება,  ართულებს სადამკვირვებლო ორგანიზაციების მუშაობას და კიდევ ერთხელ ნათლად აჩვენებს იუსტიციის საბჭოს ანგარიშვალდებულების არარსებობას და მისი საქმიანობის გამჭვირვალობის ხარისხს“. სრულად... წყარო: gdi.ge

თბილისი. საერთაშორისო გამჭვირვალობა - საქართველოს (TI Georgia) ინფორმაციით, ქუთაისის მერიამ თვენახევრის დაფუძნებულ კომპანიას პირდაპირი შესყიდვით მსხვილი კონტრაქტი გაუფორმა. „„ქართული ოცნების“ შემომწირველის კომპანიამ შპს „დ-კ ქონსტრაქშენმა“  დაარსებიდან თვენახევარში 214,524 ლარის კონტრაქტი მიიღო გამარტივებული (პირდაპირი) შესყიდვის გზით. შპს „დ-კ ქონსტრაქშენი“ 2023 წლის 4 აპრილს დაარსდა და თვენახევარში, 18 მაისს ქუთაისის მერიისგან 214,524 ლარის კონტრაქტი მიიღო. მერიამ პირდაპირი შესყიდვით ხელშეკრულება ბიზნესსაქმიანობის გამოცდილების არმქონე კომპანიას გაუფორმა“. სრულად... წყარო: transparency.ge

თბილისი. USAID-ის ადგილობრივი თვითმმართველობის პროგრამამ დაიწყო ახალი პროექტი - „საკრებულოების საზედამხედველო შესაძლებლობების გაძლიერება“, რომლის კომპონენტს დასავლეთ საქართველოში საქართველოს ახალგაზრდა იურისტთა ასოციაცია (საია) განახორციელებს. პროექტის მიზანია მუნიციპალიტეტების საკრებულოების საზედამხედველო  და მტკიცებულებებზე დაფუძნებული გადაწყვეტილების მიღების შესაძლებლობების გაძლიერება, მათ შორის, ახალი საზედამხედველო მექანიზმების დანერგვის გზით. ღონისძიების ფარგლებში, საია-მ წარმოადგინა საქართველოს 9 საკრებულოში (თბილისი, ბათუმი, ზუგდიდი, ოზურგეთი, ქუთაისი, გორი, დუშეთი, რუსთავი, თელავი) ჩატარებული კვლევის შედეგები, რომლის მიზანიც საზედამხედველო ფუნქციების და მოქალაქეთა ჩართულობის არსებული ინსტრუმენტების გამოყენების ანალიზი იყო. იხ. კვლევა... USAID-ის ადგილობრივი თვითმმართველობის პროგრამა ხუთწლიანი ინიციატივაა,  რომელიც აერთიანებს ცენტრალური ხელისუფლებისა და ადგილობრივი თვითმმართველობის წარმომადგენლებს, რათა იმუშაონ სამოქალაქო საზოგადოებასთან და კერძო სექტორთან საქართველოს დეცენტრალიზაციის სტრატეგიის მიზნების მისაღწევად. წყარო: gyla.ge

იმერეთი. „საერთაშორისო გამჭვირვალობა - საქართველო” აფასებს ქალაქ ქუთაისის მუნიციპალიტეტის საკრებულოს 2022 წელს გაწეულ საქმიანობას. „ანგარიში ეფუძნება საკრებულოდან გამოთხოვილ, საკრებულოს ოფიციალურ ვებ-გვერდზე არსებულ ინფორმაციასა და ჩვენი ორგანიზაციის დაკვირვებებს. კვლევის საანგარიშო პერიოდი მოიცავს 2021 წლის ნოემბრიდან 2022 წლის დეკემბრის ჩათვლით დროის მონაკვეთს“. სრულად... წყარო: transparency.ge

სამეგრელო. „საერთაშორისო გამჭვირვალობა - საქართველომ” შეაფასა ზუგდიდის მუნიციპალიტეტის საკრებულოს 2022 წელს გაწეული საქმიანობა. ანგარიში ეფუძნება საკრებულოდან გამოთხოვილ, საკრებულოს ოფიციალურ ვებ-გვერდზე არსებულ ინფორმაციას და ორგანიზაციის დაკვირვებებს. კვლევის საანგარიშო პერიოდი მოიცავს 2022 წელს. ძირითადი მიგნებები და რეკომენდაციები ვრცლად იხილეთ ანგარიშში... წყარო: transparency.ge

თბილისი. საერთაშორისო გამჭვირვალობა საქართველოს კვლევის თანახმად, კომუნიკაციების ეროვნული კომისიის წევრმა, ნათია კუკულაძემ 2022 და 2023 წლებში შევსებულ დეკლარაციებში არ მიუთითა თანამდებობიდან მიღებული შემოსავალი, უძრავი ქონება და ინფორმაცია მისი მეუღლის, ოთარ ლორთქიფანიძის, სამეწარმეო საქმიანობის შესახებ. „კუკულაძესა და მის მეუღლეს ეკუთვნით 5 ერთეული დაუდეკლარირებელი უძრავი ქონება. დეკლარაციებში არ არის მითითებული ინფორმაცია მეუღლის, ოთარ ლორთქიფანიძის სამეწარმეო საქმიანობის შესახებ. კუკულაძემ დამალა ხელფასი, რომელსაც ის კომუნიკაციების ეროვნული კომისიის წევრობიდან იღებს. ინფორმაციისთვის, მარეგულირებელი კომისიის წევრების ანაზღაურება ერთ-ერთი ყველაზე მაღალია ქვეყანაში. 2020 წლის ქონებრივი დეკლარაციების მიხედვით, კომისიის წევრის საშუალო თვიური ანაზღაურება 15 ათას ლარს აღემატება“, ნათქვამია ორგანიზაციის ბლოგპოსტში. სრულად... წყარო: transparency.ge

თბილისი. „საერთაშორისო გამჭვირვალობა - საქართველომ” აჭარაში გაჭიანურებული მსხვილი ინფრასტრუქტურული პროექტები და მათი მიმდინარეობა შეისწავლა. ორგანიზაციამ წინა მოკვლევის მსგავსად, ის პროექტები შეარჩია, რომელთა განხორციელება დაიწყო, გაფორმდა შესაბამისი ხელშეკრულებებიც, თუმცა დასრულების ვადები, ხელშეკრულებებში არაერთი ცვლილების შეტანის მიუხედავად, ამ დრომდე გაურკვეველია. იხ. სრულად... წყარო: transparency.ge

თბილისი. საერთაშორისო გამჭვირვალობა - საქართველოს ინფორმაციით, ეკონომიკის და მდგრადი განვითარების ყოფილი მინისტრის, დიმიტრი ქუმსიშვილის ორგანიზაცია „საქართველოს ანგელოზი ინვესტორების ქსელი“ ტენდერის გარეშე ფულს იღებს იმ საჯარო სამართლის იურიდიული პირისგან (სსიპ), რომელიც მას ექვემდებარებოდა მინისტრის პოსტზე ყოფნის დროს. სრულად... წყარო: transparency.ge

სამცხე-ჯავახეთი. „საერთაშორისო გამჭვირვალობა - საქართველომ” შეისწავლა სახელმწიფო შესყიდვები, რომელსაც ახალქალაქის მუნიციპალიტეტში იგებს მუნიციპალური ააიპ-ის დირექტორის, მარტინ გაბრიელიანის კომპანია - შპს „მეგობრობა 5“. ორგანიზაციის კვლევის გამოქვეყნების შემდეგ, სახელმწიფო შესყიდვების სააგენტომ ამ შესყიდვებში 20-ზე მეტი დარღვევა დაადგინა და ადმინისტრაციული სამართალდარღვევის ოქმი თბილისის საქალაქო სასამართლოს გადაუგზავნა. სასამართლომ  ახალქალაქის მერიის სატენდერო კომისიის წევრებს სიტყვიერი გაფრთხილება მისცა. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი აქვეყნებს ახალ დოკუმენტს, რომელიც იკვლევს დანაშაულის პრევენციის პოლიტიკას საქართველოში. ნაშრომის მიზანია შეაფასოს, რამდენად ქმედითია შესაბამისი ორგანოების მიერ გადადგმული ნაბიჯები პრევენციის დამკვიდრებული პრაქტიკის ცვლილებისა და გაუმჯობესებისთვის. „დანაშაულის პრევენციის არსებული პოლიტიკა, პრევენციული მექანიზმები და ცალკეული ღონისძიებები, სათანადოდ ვერ პასუხობს ქვეყანაში არსებულ გამოწვევებს. ბუნდოვანია მისი იდეოლოგიური ჩარჩოც. სახელმწიფო თითქმის არ იყენებს დანაშაულის სოციალური პრევენციის მეთოდებს. შესაბამისად, პრევენცია კვლავ ვიწროდ, სამართალდამცავი სისტემის ფარგლებშია მოქცეული და საპოლიციო მექანიზმებით ხორციელდება. საპოლიციო რეაგირება დანაშაულზე თითქმის ყოველთვის რეაქტიულია და პოლიცია მეტწილად სიტუაციური მეთოდებით პრევენციის მესამე დონეზე ერთვება. დანაშაულზე მხოლოდ ამგვარ საპოლიციო რეაქციას შეიძლება, ჰქონდეს მისი კონტროლისა და ინდივიდუალურ დონეზე დროებითი შეკავების უნარი, თუმცა საპოლიციო კონტროლით სახელმწიფო ვერ ახდენს სათანადო გავლენას დანაშაულის განმაპირობებელ სოციალურ და ეკონომიკურ ფაქტორებზე. შესაბამისად, არსებული პოლიტიკა ვერ იცავს ზღვარს დანაშაულის კონტროლსა და პრევენციას შორის და ვერ  უზრუნველყოფს მდგრადი პრევენციული შედეგების მიღწევას“. სრულად... წყარო: socialjustice.org.ge

სამეგრელო. საერთაშორისო გამჭვირვალობა - საქართველოს ცნობით, ზუგდიდის მერის, მამუკა წოწერიასა და სამეგრელო-ზემო სვანეთის მხარეში სახელმწიფო რწმუნებულის მოადგილის, დავით კუხალეიშვილის კლასელთან და მეგობართან, ზაზა ანთიასთან დაკავშირებული კომპანიები შპს „როუდ პლიუსი” და  შპს „ბილდინგ გრუპ 17” ადგილობრივ შესყიდვებში იმარჯვებენ. „კომპანიებმა 2018 წლიდან დღემდე, ჯამში 22,108,948 ლარის ტენდერები მიიღეს. აქედან 12,129,286 ლარის შესყიდვები ზუგდიდის მერიაზე მოდის“. სრულად... წყარო: transparency.ge

თბილისი. „საერთაშორისო გამჭვირვალობა - საქართველოს“ ორგანიზებით, საქართველოს უნივერსიტეტში გაიმართა ტრენინგი თემაზე „როგორ ვიკვლიოთ კორუფცია?“ შეხვედრა ჩაატარა ორგანიზაციის მთავარმა იურისტმა გიგი ჩიხლაძემ. ტრენინგს ესწრებოდნენ ჟურნალისტები, მკვლევარები და სამოქალაქო აქტივისტები. მონაწილეებმა იმსჯელეს პოლიტიკური კორუფციის ცნებაზე და მის სახეებზე, ღია მონაცემებზე და იმ ინსტრუმენტებზე, რომელებიც ხელს უწყობს კორუფციის გამოვლენას. ტრენინგი აშშ-ის საერთაშორისო განვითარების სააგენტოს (USAID) მხარდაჭერით ჩატარდა. სრულად... წყარო: ორგანიზაციის გვერდო სოციალურ ქსელში

თბილისი. საერთაშორისო გამჭვირვალობა - საქართველო (TI Georgia) აქვეყნებს ანგარიშს: პოლიტიკური პარტიების დაფინანსება საქართველოში 2022 წელს. ანგარიშის ერთ-ერთი მიგნების თანახმად, „კვლავ პრობლემას წარმოადგენს მმართველი პარტიის შემომწირველების მიერ მრავალმილიონიანი სახელმწიფო შესყიდვების (ტენდერები, პირდაპირი შესყიდვები) კონტრაქტების მოპოვების ფაქტები, რომელიც კორუფციული გარიგებების ეჭვს აჩენს“. სრულად... წყარო: ორგანიზაციის გვერდი სოციალურ ქსელში

თბილისი. საზოგადოებრივი ორგანიზაციების შეფასებით, მოცემულ პერიოდში, ევროკავშირის კანდიდატის სტატუსის მისანიჭებლად განსაზღვრული 12 პირობიდან სრულად არის შესრულებული ერთი პირობა, მეტწილად შესრულებულია ორი, ნაწილობრივ შესრულებულია ხუთი და შესასრულებელია ოთხი პირობა. „სტატუსმესტრის წინა ანგარიშებმა ცხადყო, რომ სამოქალაქო საზოგადოების შეფასებები დიდწილად თანხვედრაშია ევროკავშირის მიერ 2023 წლის 22 ივნისს წარმოდგენილ შუალედურ შეფასებასთან. პირობების შესრულების კუთხით, 2023 წლის 30 აპრილიდან 15 ივნისის ჩათვლით მცირე, თუმცა არასაკმარისი  პროგრესია. ქვეყნისთვის ევროკავშირის კანდიდატის სტატუსის მისანიჭებლად განსაზღვრული 12 პირობის შესრულების მდგომარეობის უფრო ვრცელი შეფასება იხილეთ რიგით მეოთხე სტატუსმეტრში, რომელიც, „ღია საზოგადოების ფონდის“ ლიდერობით, 8 საზოგადოებრივმა ორგანიზაციამ მოამზადა“. წყარო: osgf.ge

რეგიონები. 21, 22 და 23 ივნისს, ინფორმაციის თავისუფლების განვითარების ინსტიტუტმა (IDFI) ქუთაისში, ოზურგეთსა და ზუგდიდში გამართა ტრენინგები თემაზე - ხელისუფლების საქმიანობის მონიტორინგის მეთოდები და მექანიზმები. ტრენინგებს დაესწრნენ რეგიონებში მოქმედი სამოქალაქო საზოგადოებრივი ორგანიზაციების წარმომადგენლები, აქტივისტები, ჟურნალისტები და სტუდენტები. სრულად... წყარო: idfi.ge

თბილისი. საერთაშორისო გამჭვირვალობა - საქართველოს ინფორმაციით, საქართველოს მთავრობამ, 20 წლის განმავლობაში პირველად თქვა უარი „ეკონომიკური თანამშრომლობისა და განვითარების ორგანიზაციის“ სანტიკორუფციული ქსელის (OECD/ACN) მონიტორინგში მონაწილეობაზე. ხელმომწერი ორგანიზაციები კიდევ ერთხელ მოუწოდებენ საქართველოს მთავრობას, დაუბრუნდეს სტამბოლის სამოქმედო გეგმის (IAP) ფარგლებში დაწყებულ მონიტორინგის პროცესს და გააგრძელოს თანამშრომლობა ეკონომიკური თანამშრომლობისა და განვითარების ორგანიზაციის ანტიკორუფციული ქსელთან (OECD/ACN). სრულად... წყარო: transparency.ge