თბილისი. სოციალური სამართლიანობის ცენტრი აქვეყნებს ახალ დოკუმენტს, რომელიც იკვლევს დანაშაულის პრევენციის პოლიტიკას საქართველოში. ნაშრომის მიზანია შეაფასოს, რამდენად ქმედითია შესაბამისი ორგანოების მიერ გადადგმული ნაბიჯები პრევენციის დამკვიდრებული პრაქტიკის ცვლილებისა და გაუმჯობესებისთვის. „დანაშაულის პრევენციის არსებული პოლიტიკა, პრევენციული მექანიზმები და ცალკეული ღონისძიებები, სათანადოდ ვერ პასუხობს ქვეყანაში არსებულ გამოწვევებს. ბუნდოვანია მისი იდეოლოგიური ჩარჩოც. სახელმწიფო თითქმის არ იყენებს დანაშაულის სოციალური პრევენციის მეთოდებს. შესაბამისად, პრევენცია კვლავ ვიწროდ, სამართალდამცავი სისტემის ფარგლებშია მოქცეული და საპოლიციო მექანიზმებით ხორციელდება. საპოლიციო რეაგირება დანაშაულზე თითქმის ყოველთვის რეაქტიულია და პოლიცია მეტწილად სიტუაციური მეთოდებით პრევენციის მესამე დონეზე ერთვება. დანაშაულზე მხოლოდ ამგვარ საპოლიციო რეაქციას შეიძლება, ჰქონდეს მისი კონტროლისა და ინდივიდუალურ დონეზე დროებითი შეკავების უნარი, თუმცა საპოლიციო კონტროლით სახელმწიფო ვერ ახდენს სათანადო გავლენას დანაშაულის განმაპირობებელ სოციალურ და ეკონომიკურ ფაქტორებზე. შესაბამისად, არსებული პოლიტიკა ვერ იცავს ზღვარს დანაშაულის კონტროლსა და პრევენციას შორის და ვერ  უზრუნველყოფს მდგრადი პრევენციული შედეგების მიღწევას“. სრულად... წყარო: socialjustice.org.ge

სამეგრელო. საერთაშორისო გამჭვირვალობა - საქართველოს ცნობით, ზუგდიდის მერის, მამუკა წოწერიასა და სამეგრელო-ზემო სვანეთის მხარეში სახელმწიფო რწმუნებულის მოადგილის, დავით კუხალეიშვილის კლასელთან და მეგობართან, ზაზა ანთიასთან დაკავშირებული კომპანიები შპს „როუდ პლიუსი” და  შპს „ბილდინგ გრუპ 17” ადგილობრივ შესყიდვებში იმარჯვებენ. „კომპანიებმა 2018 წლიდან დღემდე, ჯამში 22,108,948 ლარის ტენდერები მიიღეს. აქედან 12,129,286 ლარის შესყიდვები ზუგდიდის მერიაზე მოდის“. სრულად... წყარო: transparency.ge

თბილისი. „საერთაშორისო გამჭვირვალობა - საქართველოს“ ორგანიზებით, საქართველოს უნივერსიტეტში გაიმართა ტრენინგი თემაზე „როგორ ვიკვლიოთ კორუფცია?“ შეხვედრა ჩაატარა ორგანიზაციის მთავარმა იურისტმა გიგი ჩიხლაძემ. ტრენინგს ესწრებოდნენ ჟურნალისტები, მკვლევარები და სამოქალაქო აქტივისტები. მონაწილეებმა იმსჯელეს პოლიტიკური კორუფციის ცნებაზე და მის სახეებზე, ღია მონაცემებზე და იმ ინსტრუმენტებზე, რომელებიც ხელს უწყობს კორუფციის გამოვლენას. ტრენინგი აშშ-ის საერთაშორისო განვითარების სააგენტოს (USAID) მხარდაჭერით ჩატარდა. სრულად... წყარო: ორგანიზაციის გვერდო სოციალურ ქსელში

თბილისი. საერთაშორისო გამჭვირვალობა - საქართველო (TI Georgia) აქვეყნებს ანგარიშს: პოლიტიკური პარტიების დაფინანსება საქართველოში 2022 წელს. ანგარიშის ერთ-ერთი მიგნების თანახმად, „კვლავ პრობლემას წარმოადგენს მმართველი პარტიის შემომწირველების მიერ მრავალმილიონიანი სახელმწიფო შესყიდვების (ტენდერები, პირდაპირი შესყიდვები) კონტრაქტების მოპოვების ფაქტები, რომელიც კორუფციული გარიგებების ეჭვს აჩენს“. სრულად... წყარო: ორგანიზაციის გვერდი სოციალურ ქსელში

თბილისი. საზოგადოებრივი ორგანიზაციების შეფასებით, მოცემულ პერიოდში, ევროკავშირის კანდიდატის სტატუსის მისანიჭებლად განსაზღვრული 12 პირობიდან სრულად არის შესრულებული ერთი პირობა, მეტწილად შესრულებულია ორი, ნაწილობრივ შესრულებულია ხუთი და შესასრულებელია ოთხი პირობა. „სტატუსმესტრის წინა ანგარიშებმა ცხადყო, რომ სამოქალაქო საზოგადოების შეფასებები დიდწილად თანხვედრაშია ევროკავშირის მიერ 2023 წლის 22 ივნისს წარმოდგენილ შუალედურ შეფასებასთან. პირობების შესრულების კუთხით, 2023 წლის 30 აპრილიდან 15 ივნისის ჩათვლით მცირე, თუმცა არასაკმარისი  პროგრესია. ქვეყნისთვის ევროკავშირის კანდიდატის სტატუსის მისანიჭებლად განსაზღვრული 12 პირობის შესრულების მდგომარეობის უფრო ვრცელი შეფასება იხილეთ რიგით მეოთხე სტატუსმეტრში, რომელიც, „ღია საზოგადოების ფონდის“ ლიდერობით, 8 საზოგადოებრივმა ორგანიზაციამ მოამზადა“. წყარო: osgf.ge

რეგიონები. 21, 22 და 23 ივნისს, ინფორმაციის თავისუფლების განვითარების ინსტიტუტმა (IDFI) ქუთაისში, ოზურგეთსა და ზუგდიდში გამართა ტრენინგები თემაზე - ხელისუფლების საქმიანობის მონიტორინგის მეთოდები და მექანიზმები. ტრენინგებს დაესწრნენ რეგიონებში მოქმედი სამოქალაქო საზოგადოებრივი ორგანიზაციების წარმომადგენლები, აქტივისტები, ჟურნალისტები და სტუდენტები. სრულად... წყარო: idfi.ge

თბილისი. საერთაშორისო გამჭვირვალობა - საქართველოს ინფორმაციით, საქართველოს მთავრობამ, 20 წლის განმავლობაში პირველად თქვა უარი „ეკონომიკური თანამშრომლობისა და განვითარების ორგანიზაციის“ სანტიკორუფციული ქსელის (OECD/ACN) მონიტორინგში მონაწილეობაზე. ხელმომწერი ორგანიზაციები კიდევ ერთხელ მოუწოდებენ საქართველოს მთავრობას, დაუბრუნდეს სტამბოლის სამოქმედო გეგმის (IAP) ფარგლებში დაწყებულ მონიტორინგის პროცესს და გააგრძელოს თანამშრომლობა ეკონომიკური თანამშრომლობისა და განვითარების ორგანიზაციის ანტიკორუფციული ქსელთან (OECD/ACN). სრულად... წყარო: transparency.ge

თბილისი. 24 და 25 ივნისს, „საერთაშორისო გამჭვირვალობა - საქართველოს“ მიერ ორგანიზებული ტრენერების ტრენინგი გაიმართა თემაზე „როგორ ვიპოვოთ ინფორმაციის დიდ ზღვაში კორუფციის კენჭები?“. მონაწილეები გაეცნენ ღია მონაცემების დამუშავების სპეციფიკას, შესაძლო კორუფციული გარიგებების, ძალაუფლების ბოროტად გამოყენებისა და ბიუჯეტის დაუსაბუთებლად ხარჯვის ფაქტების გამოვლენის ხერხებს. ორგანიზაციის ცნობით, ტრენერების ტრენინგი ქვემო ქართლის ჟურნალისტებისგან დაიწყო და სხვა რეგიონებში გაგრძელდება. სრულად... წყარო: ორგანიზაციის გვერდი სოციალურ ქსელში

თბილისი. „საერთაშორისო გამჭვირვალობა-საქართველო“ აქვეყნებს ბლოგპოსტს: სამი ტენდენცია, რომელიც მედიის წინააღმდეგ სასამართლო საქმეთა განხილვებში გამოიკვეთა. ორგანიზაცია 200-მდე ჟურნალისტის უფლებებს იცავს სასამართლოში. საქმეების განხილვის პროცესში გამოკვეთილი სამი მნიშვნელოვანი ტენდენციაა: გაუმართლებლად ხანგრძლივი განხილვის ვადები; საქმეთა განხილვა სასამართლო პრაქტიკის იგნორირებით; შრომითი დავების დროს სასამართლო მიერ მტკიცების ტვირთს მედიის წარმომადგენლებზე დაკისრება. სრულად... წყარო: transparency.ge

თბილისი. კოალიცია დამოუკიდებელი და გამჭვირვალე მართლმსაჯულებისთვის ეხმიანება საერთო სასამართლოების შესახებ ორგანულ კანონში შეტანილ ცვლილებებს. 13 ივნისს საქართველოს პარლამენტმა საერთო სასამართლოების შესახებ საქართველოს ორგანულ კანონში ცვლილებები მესამე მოსმენით მიიღო. „„ქართული ოცნების“ მიერ ცვლილებების მიღების გაცხადებული მიზანი, ევროკომისიის რეკომენდაციების შესრულება იყო, თუმცა ვენეციის კომისიის დასკვნის შესაბამისად, კანონპროექტი ვერ ასრულებდა მართლმსაჯულების შესახებ რეკომენდაციას.  სწორედ ამიტომ: მოვუწოდებთ საქართველოს პრეზიდენტს კანონი დაჩქარებული წესით დასკვნის მისაღებად წარუდგინოს ვენეციის კომისიას; მოვუწოდებთ პრეზიდენტსა და საქართველოს პარლამენტს, საჭიროების შემთხვევაში, გამოიყენონ კონსტიტუციური მექანიზმები, რომლებიც უზრუნველყოფს ვენეციის კომისიის რეკომენდაციების შესაბამისად კანონში მართლმსაჯულების ფუნდამენტური რეფორმის ასახვას“, ნათქვამია კოალიციის განცხადებაში. ვრცლად... წყარო: idfi.ge

თბილისი. 14 ივნისს გაიმართა დისკუსია საერთაშორისო ექსპერტების, სსო–ებისა და ბანკების წარმომადგენლების მონაწილეობით, რომლის მიზანიც იყო სამოქალაქო საზოგადოების ჩართულობის გაზრდა და სამოქალაქო ორგანიზაციების ხედვების კონსოლიდაცია საქართველოში ფულის გათეთრების საწინააღმდეგო ქმედებებისა და ტერორიზმის დაფინანსებასთან ბრძოლის (AML/CFT) პროცესებზე. შეხვედრა გაიმართა სამოქალაქო საზოგადოების ინსტიტუტის (CSI) ორგანიზებით, არასამეწარმეო სამართლის ევროპულ ცენტრის (ECNL) და პარტნიორები-საქართველოსთან (Partners Georgia) თანამშრომლობით. სრულად... წყარო: civilin.org

თბილისი. ინფორმაციის თავისუფლების განვითარების ინსტიტუტის (IDFI) ინფორმაციით, ახალი კანონით არსებითად შეიცვალა პერსონალური მონაცემების დაცვისა და ინფორმაციის გამჭვირვალობის ბალანსი და დადგინდა საჯაროობის ახალი სტანდარტები, რაც წინ გადადგმულ ნაბიჯად უნდა შეფასდეს.  პარლამენტმა გაითვალისწინა IDFI-ს არაერთი რეკომენდაცია და ნორმები, რომლებიც ხშირ შემთხვევაში, საჯარო დაწესებულებების მიერ ინფორმაციაზე ხელმისაწვდომობის შეზღუდვის საფუძველი ხდებოდა, შეიცვალა და შეივსო არაორაზროვანი ჩანაწერებით. სრულად... წყარო: idfi.ge

სამცხე-ჯავახეთი. საერთაშორისო გამჭვირვალობა - საქართველოს ინფორმაციით, სამცხე-ჯავახეთის მუნიციპალიტეტების 202 თანამდებობის პირის ქონებრივი დეკლარაციებიდან მეოთხედი დარღვევებითაა შევსებული. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი ეხმაურება „დე-ოლიგარქიზაციის შესახებ“ კანონპროექტის თაობაზე ვენეციის კომისიის საბოლოო დასკვნას.  კომისია საქართველოს ხელისუფლებას ოლიგარქიასთან ბრძოლის „სისტემური“ მიდგომების დანერგვისკენ მოუწოდებს და კანონპროექტის არსებული სახით მიღებას არარეკომენდებულად თვლის.  „მიუხედავად იმისა, რომ კანონპროექტის თავდაპირველი ვერსია კომისიის შუალედური რეკომენდაციების შესაბამისად შეიცვალა და „სადამსჯელო“ მექანიზმების უმრავლესობა ამოღებულ იქნა, ასეთი „პერსონალური“ მიდგომა, კომისიის შეფასებით, ოლიგარქიის პრობლემის არც დემოკრატიული და არც ეფექტური გადაწყვეტაა. მეტიც, ის შესაძლოა სახიფათო იარაღად იქცეს ხელისუფლების მიერ პოლიტიკური ოპონენტების შევიწროვებისათვის“. სრულად... წყარო: socialjustice.org.ge

აჭარა. საერთაშორისო გამჭვირვალობა - საქართველოს ცნობით, სახელმწიფო ტენდერებში შპს „ესია ჯგუფი” 2021 წლის ივლისიდან მონაწილეობს და დღემდე 1,869,747 ლარი მიიღო. „ეს კომპანია ბათუმის მუნიციპალური ა(ა)იპის საქალაქო ინფრასტრუქტურისა და კეთილმოწყობის სამმართველოს დირექტორის, აკაკი ბერიძის ყოფილმა ბიზნესპარტნიორმა, ირაკლი აზნაურიშვილმა დააფუძნა. „ესია ჯგუფი” ქედის მერიისა და აჭარის საავტომობილო გზების დეპარტამენტის ტენდერებში გამარჯვებული კომპანიების ქვეკონტრაქტორია და მნიშვნელოვან შემოსავალს აქედან იღებს. ქედის მერი, როლანდ ბერიძე და გზების დეპარტამენტის უფროსის პირველი მოადგილე, რაულ ბერიძე აკაკი ბერიძის ძმები არიან. სახელმწიფო შესყიდვების სააგენტოს მონაცემებით, „ესია ჯგუფი” ქვეკონტრაქტის ხელშეკრულებებს თითქმის იმავე მოცულობის სამუშაოების შესრულებაზე აფორმებს, რაზეც ქედის მუნიციპალიტეტმა ტენდერები გამოაცხადა. შესაბამისად, ქვეკონტრაქტორი კომპანია ტენდერებით გათვალისწინებული თანხის თითქმის 100% იღებს, რაც კორუფციულ გარიგებებზე მიანიშნებს“. სრულად... წყარო: transparency.ge

თბილისი. საერთაშორისო გამჭვირვალობა - საქართველოს ინფორმაციით, ორგანიზაციამ 2015 წლიდან დღემდე, 1973 ქონებრივი დეკლარაცია შეისწავლა და თანამდებობის პირების 561 დეკლარაციაში დარღვევები აღმოაჩინა. სრულად... წყარო: ორგანიზაციის გვერდი სოციალურ ქსელში

თბილისი. გამომძიებელ ჟურნალისტთა გაერთიანება „აი, ფაქტი“ აქვეყნებს სტატიას: რა გაკეთდა იმერეთში ევროკავშირის ფულით? „2020-2022 წლებში მხოლოდ იმერეთის მუნიციპალიტეტებმა ევროკავშირისგან 70 მილიონი ლარი მიიღო და ეს ფული 76 ინფრასტრუქტურულ პროექტში დაიხარჯა. მაგალითად, საჩხერეში მოეწყო 2,9-მილიონიანი საქალაქო პარკი, ქუთაისში 2 მილიონ ლარად განახლდა ახალგაზრდობის გამზირის ფასადები, ზესტაფონში თეატრონის რეაბილიტაციას მოხმარდა 1 მილიონი ლარი, ჯამში 5 მილიონ ლარად კი აშენდა და განახლდა ხარაგაულის, თერჯოლის, სამტრედიის, ვანისა და სამტრედიის საბავშვო ბაღები. ფული კი დაიხარჯა, მაგრამ ზოგჯერ ხალხს ეს საქმეები მთავრობის ნახელავი ჰგონია, ევროკავშირის როლზე კი არაფერი სმენიათ. რახან იმერლებმა ევროკავშირის კეთილ საქმეებზე ბევრი არაფერი იციან და მათ ინფორმირებაზე არც ადგილობრივი მთავრობა იწუხებს თავს, ამას ჩვენ გავაკეთებთ. სტატიაში მოგიყვებით სამ პროექტზე, რომელიც მოსახლეობისთვის შვებად იქცა და სამივე მათგანი ევროპული დაფინანსების წყალობაა“, ნათქვამია სტატიაში. სრულად... წყარო: ifact.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს კვლევას: საერთო სასამართლოების ძირითადი სტატისტიკური მონაცემების ანალიზი (2010-2022). „საქართველოს უზენაესი სასამართლოდან მიღებული ძირითადი სტატისტიკური მონაცემების ანალიზი აჩვენებს რომ, 2022 წელს წინა წელთან შედარებით სამივე კატეგორიის საქმეებზე სასამართლოზე  მიმართვიანობის რიცხვი გაზრდილია.  2010 წლის შემდეგ, სასამართლოებში შესული სისხლის სამართლის საქმეების 2022 წლის ყველაზე მაღალი მაჩვენებელი, გარკვეულწილად ქვეყანაში კრიმინოგენური მდგომარეობის გაუარესებაზე მიუთითებს.  აღსანიშნავია ის ფაქტი, რომ ბოლო 5 წელში მნიშვნელოვნად არის გაზრდილი სისხლის სამართლის საქმეებზე გამამართლებელი განაჩენების წილი, რაც ერთის მხრივ შესაძლებელია განპირობებული იყოს სასამართლოს მიერ ბრალეულობის დასამტკიცებლად საჭირო მტკიცებულებების სტანდარტის ამაღლებით, ხოლო მეორეს მხრივ საგამოძიებო უწყებების მიერ არაკვალიფიციურად წარმოებული სისხლის სამართლის საქმეების რაოდენობის ზრდით“... სრულად... წყარო: idfi.ge

თბილისი. საერთაშორისო გამჭვირვალობა - საქართველო თვლის, რომ აუცილებელია ბენეფიციარ მესაკუთრეთა რეესტრის შემოღება. რადგან მთელი რიგი სტრატეგიული მნიშვნელობის ობიექტებისა და კომპანიების მფლობელობის კვალი რუსეთში მიდის და რუსეთზე ეკონომიკური დამოკიდებულება სწრაფი ტემპებით იზრდება. როგორ უნდა გამოიყურებოდეს ეს რეესტრი ქართულ რეალობაში და რა უნდა გაკეთდეს მის შესაქმნელად, იხილეთ ორგანიზაციის ბლოგპოსტში. სრულად... წყარო: transparency.ge

თბილისი. კოალიცია დამოუკიდებელი და გამჭვირვალე მართლმსაჯულებისთვის აქვეყნებს კვლევას: მართლმსაჯულების რეფორმების 10 წელი: გამოწვევები და პერსპექტივები. კოალიციის ინფორმაციით, „ბოლო ათწლეულში გატარებული არაერთი რეფორმის მიუხედავად, ქართული სასამართლო კვლავ ფუნდამენტური გამოწვევების წინაშეა და ლეგიტიმაციისა და ნდობის მნიშვნელოვან კრიზისს განიცდის. მიუხედავად იმისა,  რეფორმების საწყისი ეტაპები დადებითად ფასდებოდა, 10 წლის თავზე,  მთლიანობაში, ეს პროცესი შესაძლოა შეფასდეს სასამართლოს ინსტიტუციური მოდერნიზაციის არასრულფასოვან მცდელობად, რომელმაც ვერ შეძლო ქართული კონტექსტისთვის მთავარ გამოწვევასთან – სასამართლო სისტემაში ძალაუფლების კონცენტრაციასა და არაფორმალურ გავლენებთან გამკლავება“. დოკუმენტი ხელმისაწვდომია ბმულზე... წყარო: gyla.ge

თბილისი. საერთაშორისო გამჭვირვალობა - საქართველო (TI Georgia) აქვეყნებს ბლოგპოსტს: პრემიერის მანიპულაციები რუსეთთან პირდაპირი ფრენების აღდგენის გასამართლებლად. “პრემიერ მინისტრი რუსეთთან პირდაპირი ფრენების აღდგენის გამო არსებულ პროტესტს ანტიდასავლური რიტორიკით გამოეხმაურა. თითქოს, ევროკავშირი საქართველოს რუსეთთან ეკონომიკური ურთიერთობების შეწყვეტისკენ მოუწოდებს, თავად კი ჩვეულებრივ აგრძელებს რუსეთთან ვაჭრობას. პრემიერ მინისტრი რიცხვებით მანიპულირების გზით ეცადა რეალობის დამალვას. სიმართლეა, რომ უკრაინაში ომის დაწყების შემდეგ ევროკავშირის რუსეთზე სავაჭრო დამოკიდებულება 3-ჯერ შემცირდა, საქართველოს რუსეთზე სავაჭრო დამოკიდებულება კი 1.5-ჯერ გაიზარდა”, ნათქვამიაა საერთაშორისო გამჭვირვალობა - საქართველოს განცხადებაში. სრულად... წყარო: transparency.ge

თბილისი. საერთაშორისო გამჭვირვალობა - საქართველომ, 2023 წლის იანვარ-მარტის პარტიული შემოწირულებები შეისწავლა. ორგანიზაციის ცნობით, ყველა პარტიამ ჯამში 640 569 ლარის შემოწირულება მიიღო, აქედან მმართველ პარტიაზე თითქმის ნახევარი  - 300 000 ლარი  - მოდიოდა. „„ქართული ოცნების“ 8 დონორიდან 6 ბათუმელი ბიზნესმენია, აქედან ერთ-ერთის, ბათუმის საკრებულოს ყოფილი წევრის, ნუკრი დოლიძის კომპანიები რეგულარულად იგებენ მრავალმილიონიან სახელმწიფო ტენდერებს“. სრულად... წყარო: transparency.ge