თბილისი. გაეროს ბავშვთა ფონდის მხარდაჭერით, სტატისტიკის ეროვნული სამსახურის მიერ ჩატარებული ბავშვთა კეთილდღეობის კვლევის თანახმად, ბავშვის შემწეობა ეხმარება მოწყვლად ბავშვებს, თუმცა ბავშვების 38 პროცენტი განიცდის მატერიალურ და სოციალურ დანაკლისს. კვლევის მიზანი იყო საქართველოში მაცხოვრებელ ბავშვთა კეთილდღეობის რამდენიმე საკვანძო ასპექტის გაზომვა, მათ შორის: განათლების, ჯანდაცვის სერვისებისა და სოციალური დახმარების ხელმისაწვდომობა, სასკოლო კვება, უსაფრთხოება სახლში, მატერიალური და სოციალური დანაკლისი, ფუნქციური სირთულეები და შეზღუდულ შესაძლებლობასთან ასოცირებული სტიგმა. სრულად... კვლევა სრულად ხელმისაწვდომია ბმულზე... წყარო: www.unicef.org ფოტო: UNICEF

თბილისი. საერთაშორისო გამჭვირვალობა - საქართველოს ინფორმაციით, 2022 წელს სიტყვით გამოსვლის უფლებით საერთოდ არ ისარგებლა პარლამენტის 18-მა წევრმა, საიდანაც 10 უმრავლესობის, 6 ოპოზიციის, ხოლო 2 უფრაქციო დეპუტატია. სრულად... წყარო: ორგანიზაციის გვერდი სოციალურ ქსელში

თბილისი. „ღია საზოგადოების ფონდის“ ლიდერობით, რვა ორგანიზაციამ მოამზადა შეფასების დოკუმენტი – სტატუსმეტრი, რომელიც საქართველოს ხელისუფლების მიერ 2023 წლის 31 მარტამდე პერიოდში ევროინტეგრაციის მიმართულებით მიღწეულ პროგრესს, არსებულ მდგომარეობასა და სამომავლოდ განსაზღვრულ ნაბიჯებს ასახავს. საზოგადოებრივი ორგანიზაციების შეფასებით, მოცემულ ეტაპზე სრულად არის შესრულებული ერთი პირობა, დიდწილად შესრულებულია ორი პირობა, ნაწილობრივ შესრულებულია ოთხი პირობა და შესასრულებელია ევროკავშირის ხუთი პირობა. სრულად... წყარო: osgf.ge

ქვემო ქართლი. საერთაშორისო გამჭვირვალობა - საქართველოს ინფორმაციით, ბოლნისის გამგებლის ყოფილი მოადგილის და 2012 წელს ბოლნისში „ქართული ოცნების” საარჩევნო შტაბის უფროსის, დავით ჩართოლანის კომპანია „ქორულდი” მესტიის მუნიციპალიტეტის ტენდერებს უკონკურენტოდ იგებს. ჯამურად მერიისგან კომპანიამ 2 247 897 ლარი მიიღო. ორგანიზაცია მოუწოდებს სახელმწიფო უსაფრთხოების სამსახურის ანტიკორუფციულ სააგენტოს, შეისწავლოს შპს „ქორულდის” მონაწილეობა მესტიის მუნიციპალიტეტის შესყიდვებში და დაადგინოს, შეიცავს თუ არა კორუფციის შესაძლო ნიშნებს. სრულად... წყარო: transparency.ge

თბილისი. 11 აპრილს, CRRC - საქართველომ და სოციალური სამართლიანობის ცენტრმა წარადგინეს კვლევები საქართველოს უსაფრთხოების სექტორის შესახებ.  პირადი და სახელმწიფო უსაფრთხოება: საზოგადოების დამოკიდებულება და აღქმები... საქართველოს ეროვნული უსაფრთხოების არქიტექტურა... CRRC-ის ანგარიშის მიხედვით, დაცულობის შეგრძნება, მეტი ან ნაკლები ინტენსივობით, მოსახლეობის 69%-ს აქვს. მოქალაქეების დაახლოებით 50% უსაფრთხოებისთვის ყველაზე მაღალ რისკად სიღარიბესა და რუსეთიდან მომდინარე სამხედრო აგრესიის შესაძლებლობას ასახელებს. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს კვლევას: 2022 წელს რეგისტრირებული დანაშაულის სტატისტიკა. „2022 წელს შინაგან საქმეთა სამინისტროს მიერ რეგისტრირებულ იქნა 54,435 დანაშაული, რაც 3.39%-ით ნაკლებია წინა წლის ანალოგიურ მაჩვენებელთან შედარებით. 2022 წელს რეგისტრირებულ დანაშაულთა გახსნის მაჩვენებელი - 62.1%, რაც ბოლო 17 წლის მანძილზე უპრეცედენტოდ მაღალ შედეგს წარმოადგენს. 2020 წლიდან, შსს-ს ახალი მინისტრის დანიშვნის შემდეგ, საეჭვოდ უმჯობესდება ისეთი დანაშაულის სტატისტიკა, რომელთა აღრიცხვიანობის არაერთგვაროვანი პრაქტიკა არსებობდა წინა წლებში. მაგალითად, რეგისტრირებული ქურდობის მაჩვენებელი 2022 წელს, 2019 წელთან შედარებით, 21%-ით შემცირდა, ხოლო მისი გახსნის მაჩვენებელი 34%-ით გაიზარდა“, ნათქვამია კვლევაში. გაეცანით IDFI-ის კვლევას... წყარო: idfi.ge

აჭარა. საერთაშორისო გამჭვირვალობა - საქართველოს ცნობით, კორუფციის ნიშნები იკვეთება ბათუმთან ახლოს, Salibauri Hills-ის საცხოვრებელი უბნის მშენებლობის პროექტში, რომელსაც რუსეთის მოქალაქეების კომპანია „ეიჩ გრუპ დეველოპმენტი“ გეგმავს. „კომპანიასთან დაკავშირებულმა საქართველოს ორმა მოქალაქემ ერთსა და იმავე დღეს (2022 წლის 25 ნოემბერს) მმართველ პარტიას ჯამში 40,000 ლარი შესწირა. ორ კვირაში პროექტისთვის კი ხელვაჩაურის საკრებულომ განაშენიანების დეტალური გეგმა (გდგ) დაამტკიცა. შემოწირულებისა და ნებართვის გაცემის თარიღებს შორის სიახლოვე აღძრავს ეჭვს, რომ შემოწირულების მიზანი შესაძლოა მშენებლობის ნებართვის მოპოვება ყოფილიყო“. სრულად... წყარო: transparency.ge

თბილისი. სოციალური სამართლიანობის ცენტრი გიზიარებთ ახალ ანალიტიკურ დოკუმენტს, რომელიც მიმოიხილავს ეროვნული უსაფრთხოების საბჭოსა და მის შემადგენლობაში არსებული უწყებების ინსტიტუციურ მოწყობას, ძირითად ფუნქციებს, მართვისა და ანგარიშვალდებულების საკითხებს.   „საქართველოს უსაფრთხოებას არაერთი რეგიონული და გლობალური გამოწვევა აქვს. ამ პირობებში, პრობლემურია, რომ ქვეყნის ეროვნული დონის კონცეფტუალური დოკუმენტები - ეროვნული უსაფრთხოების კონცეფცია, საფრთხეების შეფასების დოკუმენტი და შესაბამისი სტრატეგიები მოძველებულია და ვერ პასუხობს ახალ გამოწვევებს.  უსაფრთხოების სისტემაში შემავალი ინსტიტუტები ფლობენ ჭარბ ძალაუფლებას, აქვთ არაერთი ბერკეტი, რომელთა გამოყენებითაც მათ შეუძლიათ ადამიანის ფუნდამენტური უფლებების შეზღუდვა“. სრულად... წყარო: socialjustice.org.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს კვლევას: მუნიციპალიტეტების მიერ 2022 წელს გაწეული სარეკლამო ხარჯების ანალიზი. კვლევის მიგნებების თანახმად, 2022 წელს 18-მა მუნიციპალიტეტის მერიამ ჯამურად 503,140 ლარის ღირებულების სარეკლამო მომსახურების ხელშეკრულება გააფორმა. „სახელმწიფო შესყიდვების ელექტრონულ პორტალზე გადამოწმების შედეგად გამოვლინდა, რომ გარკვეულმა მუნიციპალიტეტებმა, რომლებმაც საჯარო ინფორმაციაში მიუთითეს, სარეკლამო ხარჯების არარსებობის შესახებ, IDFI-ის სრულყოფილი ინფორმაცია არ მიაწოდეს, რაც შეიძლება ინფორმაციის დაფარვის მცდელობაზე მიუთითებდეს. კერძოდ, რუსთავისა და ზუგდიდის შემთხვევაში, ორივე მერიამ ორგანიზაციას უპასუხა, რომ მსგავსი ხარჯი 2022 წელს არ ყოფილა გაწეული, თუმცა შესყიდვების ელექტრონული პორტალის თანახმად, აღნიშნულ მერიებს სარეკლამო მომსახურების კონტრაქტები უფიქსირდებათ. მნიშვნელოვანია, რომ რამდენიმე მუნიციპალიტეტს ხელშეკრულება აქვს გაფორმებული ონლაინგამოცემა მარშალპრესთან, რომელიც გამოირჩევა რუსული სამთავრობო და პროპაგანდისტული მედიების მიერ გავრცელებული ინფორმაციის ტირაჟირებით“, ნათქვამია ნაშრომში. გაეცანით IDFI-ის კვლევას აქ... წყარო: idfi.ge

თბილისი. კოალიცია გამჭვირვალე და დამოუკიდებელი მართლმსაჯულებისთვის განცხადებას აქვეყნებს და მიიჩნევს, რომ „გავლენიანი მოსამართლეების მიმართ სანქციების გამოყენება კიდევ ერთხელ ადასტურებს, რამდენად მწვავეა მართლმსაჯულების სისტემაში არაფორმალური გავლენებისა და კლანურობის პრობლემები. ამ პროცესებით რეპუტაციული ზიანი ადგება მთლიანად მართლმსაჯულების სისტემას, საქართველოს მოქალაქეებს კი ეზღუდებათ სამართლიანი, დამოუკიდებელი და ეფექტიანი მართლმსაჯულების უფლება“. კოალიცია მოუწოდებს მმართველ პარტიას: შეასრულოს ევროკავშირის რეკომენდაცია მართლმსაჯულებასთან დაკავშირებით და განახორციელოს მართლმსაჯულების ფუნდამენტური რეფორმა; გადადგას რეალური ნაბიჯები კლანური მმართველობის დასასრულებლად მართლმსაჯულების სისტემაში; დანიშნოს იუსტიციის უმაღლესი საბჭოს მიუკერძოებელი და კეთილსინდისიერი არამოსამართლე წევრები, ამავდროულად შეცვალოს გადაწყვეტილების მიღების არსებული წესი. სრულად... წყარო: idfi.ge

სამეგრელო. საერთაშორისო გამჭვირვალობა - საქართველოს ინფორმაციით, სენაკის მერის, ვახტანგ გადელიას ბიძის, დემურ გადელიას კომპანია სენაკის მერიის ტენდერებს უკონკურენტოდ იგებს.  „სს „არქეოპოლისმა” 2023 წელს ორ ტენდერში უკონკურენტოდ გაიმარჯვა. ხელშეკრულებების ჯამურმა ღირებულებამ კი 5 251 682 ლარი შეადგინა. ვახტანგ გადელია სენაკის მერად 2021 წელს აირჩიეს. ამის შემდეგ მისი ბიძის  კომპანიამ სენაკის მერიის 9 ტენდერი მოიგო, ჯამური ღირებულებით -  10 349 587 ლარი. ამ ტენდერებში „არქეოპოლისს” კონკურენტი მხოლოდ 3 შემთხვევაში ჰყავდა, მათ შორის ორჯერ - სენაკის მერის ბიძაშვილის, იოსებ გადელიას კომპანია შპს „ინდიკო”“, ნათქვამია ორგანიზაციის ბლოგპოსტში. სრულად... წყარო: ორგანიზაციის გვერდი სოციალურ ქსელში

თბილისი. სოციალური მედიის მონიტორინგის ფარგლებში „სამართლიანი არჩევნები” ყოველკვირეულ მიმოხილვას წარმოადგენს. ორგანიზაცია აღწერს იმ გზავნილებს, რომლებიც ეხმიანება პოლიტიკურ საკითხებს, კვირის განმავლობაში სოციალურ ქსელში (მეტნაკლებად) ვირუსულად ცირკულირებს და მის გავრცელებაში ერთზე მეტი აქტორი, ანგარიში თუ გვერდია ჩართული. რიგ შემთხვევებში, წარმოდგენილია კვირის განმავლობაში ყველაზე მაღალინტერაქციული პოსტები. სრულად... წყარო: isfed.ge

თბილისი. საერთაშორისო გამჭვირვალობა - საქართველოს ინფორმაციით, ინდივიდუალურმა მეწარმემ, ალექსანდრე ხერგიანმა, რომელიც წარსულში მესტიის გამგებლის მოადგილე იყო, მესტიის მუნიციპალიტეტის შესყიდვებიდან 243,034 ლარი მიიღო.  „ის ამავე დროს მესტიის მერის მოადგილის, ნელი ნავერიანის შვილის ბიზნესპარტნიორია შპს „ჰაწვალი 2015“-ში. ნელი ნავერიანი საპარლამენტო უმრავლესობის წევრის, ვიქტორ ჯაფარიძის ბიძაშვილის მეუღლეა. მოვუწოდებთ ანტიკორუფციულ სააგენტოს, შეისწავლოს თითოეული შესყიდვა და დაადგინოს, შეიცავს თუ არა კორუფციის შესაძლო ნიშნებს“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. საერთაშორისო გამჭვრივალობა - საქართველოს ინფორმაციით, მარტინ გაბრიელიანი, რომელსაც 2013 წლიდან დღემდე ახალქალაქის მუნიციპალიტეტში სხვადასხვა თანამდებობა უკავია, სახელმწიფო შესყიდვებს იღებს. „მისმა კუთვნილმა შპს „მეგობრობა-5”-მა, 2019 წლის აგვისტოდან დღემდე, 36 სახელმწიფო შესყიდვა მიიღო და ხელშეკრულებები 1,390,861 ლარზე გააფორმა. აქედან, 21 შესყიდვით 667,186 ლარი (47.9%) ახალქალაქის ბიუჯეტიდან დაერიცხა. მოვუწოდებთ სახელმწიფო უსაფრთხოების სამსახურის ანტიკორუფციულ სააგენტოს,  შეისწავლოს შპს „მეგობრობა-5”-ის სახელმწიფო შესყიდვები და გამოარკვიოს, ხომ არ ჰქონდა ადგილი შესაძლო კორუფციულ გარიგებებს მასსა და შემსყიდველ ორგანიზაციებს შორის“, ნათქვამია საერთაშორისო გამჭვირვალობა - საქართველოს ბლოგპოსტში. სრულად... წყარო: transparency.ge

თბილისი. კოალიციის ცნობით, 2023 წლის 14 მარტს გამოქვეყნდა ვენეციის კომისიის მოსაზრება „საერთო სასამართლოების შესახებ“ საქართველოს ორგანულ კანონში დაგეგმილ ცვლილებებთან დაკავშირებით. „მმართველი პარტიის განმარტებით, დაინიცირებული ცვლილებები მიზნად ისახავდა ევროკომისიის მიერ 12 პუნქტიანი რეკომენდაციების მართლმსაჯულების ნაწილის  შესრულებას. ვენეციის კომისიამ სისტემურად შეაფასა ის გამოწვევები რომლის წინაშეც სასამართლო დგას. კომისია მიუთითებს, რომ ცვლილებების პროექტი არ არის ყოვლისმომცველი, იგი არც იუსტიციის უმაღლესი საბჭოს საფუძვლიან რეფორმას ითვალისწინებს და არც ვენეციის კომისიის წინა რეკომენდაციებს. მოვუწოდებთ საქართველოს პარლამენტს, აღიაროს სასამართლოში არსებული პრობლემები და ვენეციის კომისიის რეკომენდაციების გათვალისწინებით, დროულად დაიწყოს სასამართლო სისტემის ფუნდამენტური რეფორმა, რაც რეალურად მოემსახურება ევროკომისიის 12 პუნქტიანი გეგმის შესრულებას“. სრულად... წყარო: transparency.ge

თბილისი. საქართველოს ახალგაზრდა იურისტთა ასოციაციის ინფორმაციით, 2023 წლის 20 მარტს აშშ-ის სახელმწიფო დეპარტამენტმა ადამიანის უფლებების მდგომარეობის შესახებ ყოველწლიური ანგარიში გამოაქვეყნა. დოკუმენტში, მათ შორის, მიმოხილულია საქართველოში არსებული საკვანძო საკითხები ადამიანის უფლებების დაცვასთან მიმართებით, როგორც, საკანონმდებლო ბაზისა და პრაქტიკის კუთხით, ასევე, კონკრეტული საქმეების მაგალითზე.  „აშშ-ის სახელმწიფო დეპარტამენტის შეფასებაში იკვეთება, რომ 2022 წელს საქართველოში ადამიანის უფლებების დაცვის მდგომარეობა გაუარესდა“. სრულად... წყარო: www.gyla.ge

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) შუალედურ/რიგგარეშე არჩევნებს დააკვირდება. ორგანიზაციის ცნობით, 2023 წლის 29 აპრილს საქართველოს პარლამენტისა და მუნიციპალიტეტის საკრებულოების შუალედური, ასევე, მერების რიგგარეშე არჩევნები გაიმართება. კერძოდ, აირჩევიან: საქართველოს პარლამენტის ფოთი-სენაკი-ხობის მაჟორიტარი დეპუტატი, გურჯაანის, თიანეთის, ახალციხის, ტყიბულისა და ქუთაისის საკრებულოების მაჟორიტარი წევრები და ცაგერისა და თერჯოლის მერები. სრულად... წყარო: ორგანიზაციის გვერდი სოციალურ ქსელში

თბილისი. საერთაშორისო გამჭვირვალობა საქართველოს ინფორმაციით, საქართველოს მთავრობა გაუმჭვირვალე რეჟიმში მუშაობს. „2022 წელს საქართველოს მთავრობამ 47 სხდომაზე 372 განკარგულების პროექტი განიხილა, რომელთაგან დღემდე არცერთი არ გასაჯაროებულა. განკარგულებების 40% – 372-დან 150 – კონკრეტული პირებისთვის სახელმწიფო ქონების სხვადასხვა ფორმით გადაცემას ეხებოდა, რაც კორუფციული რისკის შემცველია.  დოკუმენტების არგამოქვეყნებით და საჯარო ინფორმაციის მოთხოვნათა იგნორირებით მთავრობის ადმინისტრაცია მინიმუმ 3 სამართლებრივ აქტს არღვევს“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. ანალიტიკური პლატფორმა „კომენტარი“ გთავაზობთ სტატიებს ე.წ. უცხოური გავლენის აგენტების საკითხზე. სტატიები: FARA: რა უნდა ვიცოდეთ ამერიკულ კანონზე?...  უცხოური გავლენის რეგულირება: ავსტრალია და ისრაელი... რუსული კანონი უცხო ძალის აგენტების შესახებ... რა ბარიერებს აწყდებიან საზოგადოებრივი ორგანიზაციები აზერბაიჯანში? უცხოური გავლენის აგენტების შესახებ კანონპროექტი კონსტიტუციის წინააღმდეგ... წყარო: komentari.ge

თბილისი. ინფორმაციის თავისუფლების განვითარების ინსტიტუტის (IDFI) ცნობით, 2022 წელს საჯარო დაწესებულებებიდან მიღებული პასუხების მაჩვენებელი წინა წელთან შედარებით 24%-ით შემცირდა და 58% შეადგინა. „ეს მაჩვენებელი 2010 წლის შემდეგ ყველაზე დაბალი შედეგია. 2022 წელს 69 დაწესებულება აღმოჩნდა ისეთი, რომელმაც ინფორმაციის თავისუფლების განვითარების ინსტიტუტის (IDFI) ყველა განცხადება უპასუხოდ დატოვა. 2022 წელს, განსაკუთრებით პრობლემური იყო ისეთი მოთხოვნების უპასუხოდ დატოვება, რომლებიც რუსეთ-უკრაინის ომთან და მის საქართველოზე გავლენასთან იყო კავშირში“. სრულად... წყარო: idfi.ge

თბილისი. საერთაშორისო გამჭვირვალობა - საქართველოს ინფორმაციით, საქართველოს სახელმწიფო კომპანიის „ელექტროენერგეტიკული ბაზრის ოპერატორის“ (ესკო) ყოფილი გენერალური დირექტორი ვახტანგ ამბოკაძე რუსულ „ინტერ რაოსთან“ ერთად ფლობს კომპანიას, რომელიც რუსეთიდან ელექტროენერგიის იმპორტში და ტრანზიტშია ჩართული. ორგანიზაციის ცნობით, ამასთან ერთად, იკვეთება სავარაუდო კორუფციაზე მიმანიშნებელი რამდენიმე გარემოება... სრულად... წყარო: transparency.ge

თბილისი. არაკომერციული მედია „აი, ფაქტი“ გამომძიებელ ჟურნალისტთა გაერთიანებაა. ის 2016 წელს დაარსდა და მისი მიზანია საზოგადოებას მიაწოდოს ინფორმაცია ქვეყანაში მიმდინარე მნიშვნელოვანი მოვლენების შესახებ. მედია ორგანიზაციის პრინციპები ემყარება ფაქტების სიზუსტეს, გადამოწმებას, მიუკერძოებლობას, ბალანსის დაცვას.  „აი, ფაქტს“ ორი ოფისი აქვს, ერთი - თბილისში, მეორე კი ქუთაისში. ქუთაისში მოქმედი ოფისი ნიდერლანდების სამეფოს საელჩოს მხარდაჭერით გაიხსნა. მედია ორგანიზაციაში 7 გამომძიებელი ჟურნალისტია დასაქმებული.  „აი, ფაქტი“ საერთაშორისო დონორების და კერძო შემომწირველების დახმარებით არსებობს. ორგანიზაციის დახმარება თქვენც შეგიძლიათ - თქვენ მიერ გადარიცხული თანხა კი ისეთი მასალების შემქნას მოხმარდება, რომელიც ამხელს კორუფციას, უსამართლობას, უთანასწორობას... „აი, ფაქტი“ შეუერთდა დამოუკიდებელი მედია საშუალებების და საზოგადოებრივი ორგანიზაციების მიერ გავრცელებულ განცხადებას „უცხოური გავლენის გამჭვირვალობის“ კანონპროექტის შესახებ. „იმერეთის სოფლებში რომ ჩავდივართ, ხალხი თვალებში შემოგვციცინებს, უხარიათ რომ მათზე დავწერთ. მათთან ურთიერთობა ჩვენთვის ერთი დიდი თერაპიაა. გასაჭირსაც კი ჟღურტულით ამბობენ ამ მხარეში. ხშირად უთქვამთ, აქ მთავრობა არ მოსულა და თქვენ რა ქარმა გადმოგაგდოთო. ამ ხალხს იმედი ესახება, რომ ისინი ისევ ახსოვთ და მათი აზრი მნიშვნელოვანია. ხშირად პრობლემებიც მოგვიგვარებია მათთვის. განსაკუთრებით იმ შემთხვევაში, თუ ადგილობრივი ხელისუფლება ნამუსიანია და ესმის მედიასთან კომუნიკაციის მნიშვნელობა. ასეთი ცოტაა, მაგრამ არიან იმერეთში.   ჰოდა, ხვალ და ზეგ, უცხოური გავლენის აგენტების იარლიყს რომ მოგვაკრავს მთავრობა ამ ახალი, რუსული კანონით და მუშაობას აგვიკრძალავენ დამოუკიდებელ მედიასაშუალებებს, ვეღარავინ დაწერს ამ ალალ და კეთილ იმერლებზე ვეღარაფერს. ვერავინ თანაუგრძნობს მათ გასაჭირში. სამთავრობო მედიები მხოლოდ იმაზე დაწერენ, რაც გაკეთდა. რა არ კეთდება - ამაზე არავინ ისაუბრებს საჯაროდ. ასე მუშაობს პიარი.  მედიის საქმე მთავრობის ნაკლოვანებების გამოჩიჩქვნა და გამოფენაა. მედიის საქმე ყველა ნორმალურ ქვეყანაში ესაა და თუ ნორმალური ქვეყანა გვინდა ვიყოთ, ასეც უნდა ვქნათ“, ნათქვამია „აი, ფაქტის“ მიერ გავრცელებულ განცხადებაში. წყარო: „აი, ფაქტის“ ვებგვერდი და გვერდი სოციალურ ქსელში