თბილისი. „საერთაშორისო გამჭვირვალობა – საქართველომ“ აჭარაში 2019 წელს განხორციელებული ინვესტიციების შესახებ კვლევა მოამზადა... ორგანიზაციამ შეისწავლა აჭარის ავტონომიური რესპუბლიკის მთავრობის მიერ პირდაპირი მიყიდვის ფორმით, მათ შორის სიმბოლურ ფასად (1 ლარად), პირობიანი და უპირობო აუქციონით გასხვისებული ქონების მესაკუთრეები, პრივატიზაციის საფასური და ინვესტიციების მოცულობა.  სრულად...   წყარო: ორგანიზაციის ვებგვერდი

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) Facebook-ზე მოქმედი კიდევ ერთი ორგანიზებული ქსელის შესახებ აცხადებს.  „სამართლიანი არჩევნები“ 2018 წლის საპრეზიდენტო არჩევნების წინა პერიოდიდან „ფეისბუქზე“ როგორც ოპოზიციური პარტიების, ისე მმართველი პარტიის წინააღმდეგ მოქმედი გვერდების ქცევას აკვირდება. ქართული გვერდების, ჯგუფებისა და ანგარიშების წინააღმდეგ „ფეისბუქის“ მიერ განხორციელებული ორი მასშტაბური ოპერაციის შედეგად დადასტურდა ამ გვერდების კავშირი მმართველ პარტია „ქართულ ოცნებასთან“ და ოპოზიციურ პარტია „ერთიან ნაციონალურ მოძრაობასთან“. 2020 წლის საპარლამენტო არჩევნების მოახლოებასთან ერთად, „ფეისბუქზე“ კიდევ ერთი პარტიის - „საქართველოს პატრიოტთა ალიანსის“ სასარგებლოდ მასშტაბური კამპანიაც შეინიშნება. საგულისხმოა, რომ მოცემული ქსელი „პატრიოტთა ალიანსის“ სასარგებლოდ პოზიტიურ კამპანიასთან ერთად, მიმართულია მკვეთრად ნეგატიური, დისკრედიტაციული აქტივობისკენ როგორც მმართველი პარტიის, ისე, განსაკუთრებით, სხვა ოპოზიციური პარტიების წინააღმდეგაც“, - ნათქვამია ISFED-ის მიერ გავრცელებულ ინფორმაციაში.  სრულად...   წყარო: ორგანიზაციის ვებგვერდი

თბილისი. „სამოქალაქო პლატფორმა 20/20“-მა, დღეს, საზოგადოებას 2020 წლის საპარლამენტო არჩევნების წინასაარჩევნო პროცესის შეფასება/ანგარიშში წარუდგინა.  „სახელმწიფომ უნდა უზრუნველყოს არჩევნების ჩატარება უსაფრთხო ეპიდემიოლოგიურ გარემოში და არსებული გამოწვევა არ უნდა გახდეს საარჩევნო პროცესზე მანიპულირების ინსტრუმენტი. საარჩევნო რეფორმის ჰარმონიზაციის ფარგლებში არ მოხდა ეუთო/ODHIR-ის პრიორიტეტული რეკომენდაციების ძირითადი ნაწილის გაზიარება, თუმცა, განხორციელებული ცვლილებები არის წინ გადადგმული ნაბიჯი. სახელმწიფო ინსტიტუტებმა უნდა უზრუნველყონ დემოკრატიული საარჩევნო გარემოს შექმნა. არჩევნების საყოველთაო, თავისუფალ, გამჭირვალე და კონკურენტულ საარჩევნო პირობებში ჩატარებაზე პასუხისმგებელი არის ცენტრალური საარჩევნო კომისიის ადმინისტრაცია. მნიშვნელოვანია, 2020 წლის საპარლამენტო არჩევნებში საერთაშორისო სადამკვირვებლო ორგანიზების ინტენსიური ჩართულობა“,- აღნიშნულია სამოქალაქო პლატფორმა 20/20-ის ანგარიშის დასკვნაში.  სრულად...   წყარო: გვერდი სოციალურ ქსელში

თბილისი. საერთაშორისო გამჭვირვალობა - საქართველო (TI) აქვეყნებს მასალას ახალციხის მინიციპალიტეტის ჯანდაცვის ზედამხედველობის სფეროში არსებული ვითარების შესახებ.  ორგანიზაციის ინფორმაციით, - „ახალციხის მუნიციპალიტეტის ააიპ “საზოგადოებრივი ჯანდაცვის ცენტრის” დირექტორი ნაირა ხაბულიანი რამდენიმე ანაზღაურებად საქმიანობას ითავსებს. მათ შორის ერთ-ერთი „ახალციხის კლინიკა იმედში“ ეპიდემიოლოგის პოზიციაა. იგი, როგორც ააიპ-ის ხელმძღვანელი, ეპიდზედამხედეველობას საკუთარ თავსაც უწევს. გარდა ამისა, კორონავირუსის დროს სამცხე-ჯავახეთში შექმნილ ცხელების ორივე ცენტრში ხაბულიანი ეპიდემიოლოგად ერთდროულად მუშაობდა, რასაც კანონი კრძალავდა. სამსახურს კი, რომელიც ეპიდზედამხედველობას მთელ რეგიონში ახორციელებს, ნაირა ხაბულიანის შვილი ხელმძღვანელობს - ნინო ზედგინიძე დაავადებათა კონტროლის ეროვნული ცენტრის სამცხე-ჯავახეთის განყოფილების უფროსია“.  სრულად...   წყარო: ორგანიზაციის ვებგვერდი

თბილისი. ადამიანის უფლებების სწვალებისა და მონიტორინგის ცენტრმა (EMC) მოამზადა ვიდეომასალა - „რეფორმები სასამართლო სისტემაში“.  საქართველო-ევროკავშირის ასოცირების ფარგლებში, სახელმწიფომ აიღო სასამართლო სისტემაში რეფორმების გატარების ვალდებულება, თუმცა: რეფორმების გასატარებლად შემუშავებული 2017-2018 წლების სამოქმედო გეგმის 92 აქტივობიდან: შესრულებულია - 35, ნაწილობრივ შესრულებულია - 31, შეუსრულებელია - 26; დღემდე არ არის დამტკიცებული 2019-2020 წლების სამოქმედო გეგმა; უკანასკნელი წელიწად-ნახევრის განმავლობაში სამუშაო ჯგუფის მხოლოდ 3 შეხვედრა ჩატარდა“, - ვკითხულობთ EMC-ის ვებგვერდზე.  სრულად...   წყარო: ორგანიზაციის ვებგვერდი

რამდენად ასრულებს საქართველო ევროკავშირთან ასოცირების შეთანხმების შედეგად აღებულ ვალდებულებებს? გაეცანით პუბლიკაციებს ასოცირების შეთანხმების შესახებ, რომელიც ევროკავშირის მხარდაჭერით შეიქმნა.  სრულად...  წყარო: გვერდი სოციალურ ქსელში

„მითების დეტექტორი“ აქვეყნებს ამერიკის შეერთებული შტატების სახელმწიფო დეპარტამენტის ახალ ანგარიშს - „რუსეთის დეზინფორმაციისა და პროპაგანდის ეკოსისტემის საყრდენები“. სრულად...  წყარო: გვერდი სოციალურ ქსელში

თბილისი. სამართლიანი არჩევნებისა და დემოკრატიის საერთაშორისო საზოგადობა (ISFED) აჭარის უმაღლესი საარჩევნო კომისიის პროფესიული წევრების შერჩევის პროცესის შეფასებას აქვეყნებს.  „ეუთოს დემოკრატიული ინსტიტუტებისა და ადამიანის უფლებების ოფისის საერთაშორისო სადამკვირვებლო მისიის საბოლოო ანგარიშში, რომელიც საქართველოს 2018 წლის საპრეზიდენტო არჩევნების შემდეგ მომზადდა, საუბარია საარჩევნო ადმინისტრაციის დაკომპლექტების წესის ცვლილებაზე, რაც უფრო დაბალანსებულ პოლიტიკურ წარმომადგენლობას შეუწყობს ხელს. პრობლემას წარმოადგენს ის გარემოება, რომ კომისიის წევრთა დანიშვნის არსებული წესით, შეიძლება ერთ პარტიას ერთზე მეტი წარმომადგენელი ყავდეს საარჩევნო კომისიაში, რაც ზრდის პოლიტიკური გავლენის ხარისხს ყველა დონის საარჩევნო კომისიაში. ამ ფონზე უფრო მნიშვნელოვანი ხდება პროფესიული წევრების შერჩევის ობიექტური კრიტერიუმების არსებობა, რათა არჩევნების ადმინისტრირების პროცესში ჩართული ორგანოები სარგებლობდნენ საზოგადოების ნდობით და მათ მიმართ არ გაჩნდეს პოლიტიკური მიკერძოების განცდა“, - აღნიშნულია შეფასებაში. სრულად...  წყარო: ორგანიზაციის ვებვგერდი

თბილისი. „უფლებები საქართველოს“ ორგანიზებით, გაიმართა ონლაინ დისკუსია - „ელექტრონული მართლმსაჯულების ეფექტიანობა“.  დისკუსიის ფარგლებში, ადვოკატებმა, არასამთავრობო ორგანიზაციების, სახალხო დამცველის, სასამართლოს, პროკურატურისა და შინაგან საქმეთა სამინისტროს წარმომადგენლებმა ელექტრონული მართლმსაჯულების ეფექტიანობა განიხილეს.  „უფლებები საქართველოს“ ექსპერტებმა, დისკუსიის მონაწილეებს წარუდგინეს ორგანიზაციის მიერ მომზადებული ანგარიში, რომელშიც ადგილობრივი და საერთაშორისო სტანდარტების და პრაქტიკის ჭრილში გაანალიზებულია ელექტრონული მართლმსაჯულების ეფექტიანობა კოვიდ-19 პანდემიის დროს.  სრულად...  წყარო: გვერდი სოციალურ ქსელში

თბილისი. საერთასორისო გამჭვირვალობა - საქართველოს (TI) ინფორმაციით, ზუგდიდში ყინულის მოედნის მშენელობის პროცესი, რომელიც 2007 წელს დაიწყო, დღემდე არ დასრულებულა. ამ პერიოდში მოედანი ორჯერ აშენდა და ორჯერ მოხდა მისი დემონტაჟი, მიმდინარე წელს კი მოედანი მესამედ უნდა აშენდეს. გაწეულმა ხარჯებმა ჯამში 8,194,145 ლარი შეადგინა. საერთაშორისო გამჭვირვალობა-საქართველოს პოზიციით, მნიშვნელოვანია, რომ ზუგდიდის ყინულის მოედნის მშენებლობის პროცესი შეისწავლონ შესაბამისმა საგამოძიებო ორგანოებმა და დაადგინონ, ჰქონდა თუ არა ადგილი რაიმე სახის დანაშაულს; ასევე, აუცილებელია, ამჯერად მაინც ხარისხიანად აშენდეს ყინულის მოედანი და გამოირიცხოს ფინანსური რესურსების არაეფექტური ხარჯვა. სამშენებლო სამუშაოების დასრულების შემდგომ ზუგდიდის მუნიციპალიტეტმა უნდა უზრუნველყოს მოედნის სათანადო მოვლა-პატრონობა. სრულად...  წყარო: ორგაზანიზაციის ვებგვერდი

თბილისი. „საერთაშორისო გამჭვირვალობა - საქართველომ” ქალაქ ბათუმის 2017 წლის მოწვევის საკრებულოს მიერ 2017 წლის ნოემბრიდან 2019 წლის 31 დეკემბრის ჩათვლით გაწეული საქმიანობა შეისწავლა. ანგარიშის საფუძვლად გამოყენებულია საკრებულოდან გამოთხოვილი ინფორმაცია, „საერთაშორისო გამჭვირვალობა -საქართველოს” დაკვირვებები და მედიის მასალები. ანგარიში ასევე მოიცავს ძირითად მიგნებებსა და რეკომენდაციებს, რომელთა გათვალისწინებაც დაეხმარება 2021 წლის ადგილობრივი თვითმმართველობის არჩევნების შემდეგ დაკომპლექტებულ საკრებულოს მომავალ საქმიანობაში. სრულად...  წყარო: ორგანიზაციის ვებგვერდი

თბილისი. ევროკავშირის პროექტი წარმოგიდგნეთ ექსპერტ ეკა ლომთათიძის კვლევას და რეკომენდაციებს, იუსტიციის უმაღლესი საბჭოს სამართლებრივი აქტების დასაბუთებასთან დაკავშირებით.  საქართველოს კანონმდებლობის და რელევანტური სასამართლო პრაქტიკის წინამდებარე მიმოხილვის მიზანია იუსტიციის საბჭოს, როგორც კოლეგიური ორგანოს, აქტების სახეობების განსაზღვრა და აქტების იმ ჯგუფის იდენტიფიცირება, რომელთან მიმართებითაც დასაბუთება აუცილებელია.  კვლევა   სრულად... წყარო: გვერდი სოციალურ ქსელში

თბილისის ადამიანის უფლებათა სახლმა და თბილისის ადამიანის უფლებათა სახლების ფონდმა ერთობლივად წარადგინეს ანგარიში გაეროს ადამიანის უფლებათა საბჭოს უნივერსალური პერიოდული მიმოხილვის (UPR) მესამე ციკლის ფარგლებში... დოკუმენტში შეფასებულია ბოლო საანგარიშო პერიოდში (2015-2020 წწ.) საქართველოში უფლებადამცველების და აქტივისტების უფლებრივი მდგომარეობა და სხვადასხვა პრობლემური ასპექტები, რომლებიც საქართველოში მათ თავისუფალ საქმიანობას აბრკოლებს. განხილულია უფლებადამცველთა დისკრიმინაციის და გამოხატვის თავისუფლების შეზღუდვის შემთხვევები, შეკრების თავისუფლებასთან დაკავშირებული პრობლემები, ცილისმწამებლური და დისკრედიტაციისკენ მიმართული კამპანიები და სხვა.  სრულად...   წყარო: hrht.ge

თბილისი. „საერთაშორისო გამჭვირვალობა-საქართველო” (TI) ქალაქ ფოთის მუნიციპალიტეტის 2017 წლის მოწვევის წარმომადგენლობითი ორგანოს - საკრებულოს (შემდეგში ფოთის საკრებულო) საქმიანობას აფასებს. TI-ის მიერ მომზადებული ანგარიში ეფუძნება საკრებულოდან გამოთხოვილ, საკრებულოს ოფიციალურ ვებ-გვერდზე არსებულ ინფორმაციასა და ჩვენი ორგანიზაციის მიერ წარმოებულ დაკვირვებებს. კვლევის საანგარიშო პერიოდი მოიცავს 2017 წლის ნოემბრიდან 2019 წლის ჩათვლით დროის მონაკვეთს. სრულად...  წყარო: ორგანიზაციის ვებგვერდი

თბილისი. „სამართლიანი არჩევნებისა და დემოკრატიის საერთაშორისო საზოგადოებამ”, (ISFED), დღეს, საზოგადოებას საქართველოს პარლამენტის 2020 წლის 31 ოქტომბრის არჩევნების წინასაარჩევნო პერიოდის მონიტორინგის მეორე შუალედური ანგარიში წარუდგინა.  მეორე შუალედური ანგარიში მოიცავს 2020 წლის 5 ივლისიდან 3 აგვისტოს ჩათვლით პერიოდს, აგრეთვე ცალკეულ ისეთ მოვლენას, რომელთა განვითარება 5 ივლისამდე დაიწყო და მონიტორინგის პერიოდშიც მიმდინარეობდა ან მათ შესახებ მონიტორინგის პერიოდში გახდა ცნობილი.  საქართველოს პარლამენტის 2020 წლის 31 ოქტომბრის არჩევნების წინასაარჩევნო პერიოდის მონიტორინგს ISFED 1 ივნისიდან ახორციელებს. მონიტორინგი ხორციელდება შეერთებული შტატების საერთაშორისო განვითარების სააგენტოს (USAID) და ევროკავშირის მხარდაჭერით.  სრულად...  წყარო: ორგანიზაციის ვებგვერდი

თბილისი. სამართლიანი არჩევნებისა და დემოკრატიის საერთაშოისო საზოგადოებამ (ISFED) გამოავლინა 34 ფეისბუქ-გვერდი, რომელიც კოორდინირებულად, არაავთენტურად იქცევა და პროპაგანდისტული ნარატივების გამავრცელებელ ორგანიზაცია “ალტ-ინფო”-სთან არის დაკავშირებული.  „ალტ-ინფო“ თავს ალტერნატიული ინფორმაციის წყაროს უწოდებს, რეალურად კი - ის ანტილიბერალურ, ანტისაიმიგრაციო, ლგბტქი თემის საწინააღმდეგო და ანტიდასავლურ პროპაგანდას ეწევა“, - ვკითხულობთ ISFED-ის მიერ წარმოდგენილ ანგარიშში, - „სამართლიანმა არჩევნებმა“ „ფეისბუქზე“ „ალტ-ინფოს“ კოორდინირებული მოქმედება გამოავლინა, რომლის მეშვეობითაც ორგანიზაცია ცდილობს საკუთარი კონტენტის „ფეისბუქ“ მომხმარებლებზე შენიღბულად და მასობრივად გავრცელებას. ამჟამად, „ალტ-ინფოს“ მთავარ იარაღს წარმოადგენს ონლაინ ვიდეო-გადაცემების გაზიარება მათთან დაკავშირებულ 34 „ფეისბუქ“ გვერდზე, რომელთაგან 12 გვერდი ღიად, ხოლო 22 - გვერდი ფარულად არის აფილირებული „ალტ-ინფოსთან“.  34 გვერდის გარდა გამოიკვეთა 25 საჯარო ჯგუფი, რომლებშიც აქტიურად ზიარდება „ალტ-ინფოს“ სიახლეები, მათგან 7 ჯგუფი მჭიდროდ არის კოორდინირებული და შენიღბულად ეწევა „ალტ-ინფოს“ პროპაგანდას.  „ალტ-ინფოს“ ფარულად გამავრცელებელ 22 გვერდს ჯამში 365,549 გამომწერი ჰყავს, ხოლო ოფიციალურად მოქმედ 12 გვერდს - 157,640. მჭიდროდ კოორდინირებულ 7 ჯგუფში სულ 169,734 მომხმარებელია გაწევრიანებული, დანარჩენ 18 ჯგუფს კი, ჯამურად 777,679 წევრი ჰყავს“.  სრულად...  წყარო: ორგანიზაციის ვებგვერდი

თბილისი. პარლამენტის მონიტორინგის ფარგლებში „საერთაშორისო გამჭვირვალობა - საქართველომ” (TI) 2019 წლის 1 იანვრიდან 2019 წლის 31 დეკემბრამდე პერიოდში საკანონმდებლო ორგანოს საქმიანობა შეაფასა.  „2019 წელი პოლიტიკურად აქტიური და დაძაბული იყო. წლის განმავლობაში რამდენიმე მნიშვნელოვანი მოვლენა მოხდა, რამაც საზოგადოებაში პროტესტი გამოიწვია, საპარლამენტო საქმიანობა კი აქციების ფონზე მიმდინარეობდა. პოლიტიკური დაპირისპირებების მიზეზით ცვლილებები საპარლამენტო შემადგენლობამაც განიცადა, დეპუტატების ნაწილმა უმრავლესობა დატოვა, რამაც რეგლამენტის შესაბამისად უმცირესობის დაშლა გამოიწვია. გარდა ამისა, საპარლამენტო ოპოზიციამ საშემოდგომო სესიის ფარგლებში აქტიურად გამოიყენა ბოიკოტის მექანიზმი. ყველაფერმა ამან, გავლენა მოახდინა საკანონმდებლო ორგანოს ნორმალურ ფუნქციორებასა და საქმიანობის განხორციელებაზე“, - ნათქვამია TI-ის მიერ გავრცელებულ ინფორმაციაში.  სრულად... წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ინფოგრაფიკას - სასამართლო სისტემის სტრატეგიისა და 2017-2018 წლების სამოქმედო გეგმის შესრულების მდგომარეობა. „საქართველო-ევროკავშირის ასოცირების დღის წესრიგის საფუძველზე, 2017 წლის 29 მაისს, დაახლოებით ერთწლიანი მუშაობის შემდეგ, საქართველოს იუსტიციის უმაღლესმა საბჭომ 2017-2021 წლების სასამართლო სისტემის სტრატეგია და მისი იმპლემენტაციის 2017-2018 წლების სამოქმედო გეგმა დაამტკიცა. ორივე საანგარიშო პერიოდში მონიტორინგის პროცესის შედეგად გამოვლინდა, რომ იუსტიციის უმაღლესი საბჭო სათანადო ყურადღებას არ უთმობს სტრატეგიის და სამოქმედო გეგმის სრულყოფილად იმპლემენტაციას და ხშირ შემთხვევაში, მხოლოდ ტექნიკურად თუ სრულდება კონკრეტული აქტივობები, ხოლო მათი შინაარსობრივი შედეგი, მართლმსაჯულების ხარისხობრივი გაუმჯობესება, სამოქმედო გეგმის შესრულებაზე პასუხისმგებელი უწყებების ინტერესს მიღმა რჩება, რითიც ამ ფორმატის არსებობას და ქმედითობას, მნიშვნელოვანი ჩრდილი ადგება“, - ნათქვამია EMC-ის მიერ გამოქვეყნებულ ინფორმაციაში. სრულად  წყარო: ორგანიზაციის ვებგვერდი

თბილისი. ინფორმაციის თავისუფლების განვითარების ინსტიტუტმა (IDFI), დღეს, საქართველოში საჯარო ინფორმციის ხელმისაწვდომობის შესახებ 2019 წლის ანგარში წარმოადგინა.  ამ ტიპის მონიტორინგს ორგანიზაცია 2010 წლიდან ახორციელებს. უახლეს ანგარიშში წარმოდგენილია საქართველოში საჯარო ინფორმაციის ხელმისაწვდომობის მდგომარეობის შეფასება 2019 წლის მონაცემებით, ანგარიში, ასევე, მოიცავს საჯარო ინფორმაციის გაცემის ტენდენციების ანალიზს 2010-2019 წლებში და საჯარო დაწესებულებათა საჯარო ინფორმაციის ხელმისაწვდომობის რეიტინგებს.  სრულად  წყარო: ორგანიზაციის ვებგვერდი

თბილისი. დღეს, ინფორმაციის თავისუფლების განვითარების ინსტიტუტმა, საიასთან ერთად, საჯარო მმართველობის რეფორმის 2019-2020 წლების სამოქმედო გეგმის შესრულების შუალედური ალტერნატიული ანგარიში წარადგინა.  პრეზენტაციის ფარგლებში მონაწილეებმა ისაუბრეს სამოქმედო გეგმის პოლიტიკის დაგეგმვისა და კოორდინაციის, ანგარიშვალდებულების, სახელმწიფო სერვისების მიწოდებისა და საჯარო ფინანსების მიმართულებებზე.  სრულად   წყარო: ორგანიზაციის ვებგვერდი

იმერეთი. საერთაშორისო გამჭვირვალობა - საქართველოს (TI) ინფორმაციით, ქუთაისის მუნიციპალიტეტში გარეგანათების მომსახურება გაძვირდა.  „ქუთაისის მუნიციპალიტეტის მიერ დაფუძნებული იურიდიული პირების რაოდენობა ყოველწლიურად იზრდება. ერთ-ერთი იურიდიული პირი კი, რომელიც მუნიციპალიტეტმა ბოლოს დააფუძნა ა(ა)იპ “ქუთგანათების სერვისია”. მისი შექმნის საფუძვლად მერიამ ფულადი სახსრების ეკონომია დაგვისახელა, თუმცა გარე განათების ქსელისა და შუქნიშნების მოვლა/ექსპლოატაცია მერიას დღეს მეტი უჯდება, ვიდრე გასულ წლებში“, - ვკითხულობთ TI-ის ინფორმაციაში.  სრულად  წყარო: ორგანიზაციის ვებგვერდი

თბილისი. დღეს, სამართლიანი არჩევნებისა და დემოკრატიის საერთაშორისო საზოგადოებამ (ISFED) 2016-2019 წლებში საქართველოს ცენტრალური საარჩევნო კომისიის წევრთა და თანამშრომელთა, საქმიანობის ანაზღაურებაზე გაწეული ხარჯების მონიტორინგის ანგარიში წარმოადგინა. დოკუმენტში შესწავლილია საქართველოს ცენტრალური საარჩევნო კომისიის წევრებისა და ხელმძღვანელი პირების, საოლქო საარჩევნო კომისიის წევრების, საშტატო და შტატგარეშე თანამშრომლების შრომითი ანაზღაურების წესი (ხელფასი, დანამატი და პრემია/ფულადი ჯილდო) და არსებული პრაქტიკა. ანგარიშის მიზანია გააანალიზოს, რა პოზიტიური ცვლილებები განხორციელდა საარჩევნო ადმინისტრაციაში შრომის ანაზღაურების გაცემის წესთან დაკავშირებით და რა გამოწვევების წინაშე დგას ამ მიმართულებით დაწესებულება.  სრულად   წყარო: ორგანიზაციის ვებგვერდი