თბილისი. ინფორმაციის თავისუფლების განვითარების ინსტიტუტი (IDFI) აქვეყნებს სტატიას, სადაც განხილულია 2019 წლის განმავლობაში 2020 წლის 3 ივნისამდე მმართველი პარტიის სასარგებლოდ გაცემული შემოწირულობების ისეთი შემთხვევები, რომლებიც კითხვებს ბადებს კანონიერებისა და კეთილსინდისიერების მხრივ. „პოლიტიკური შემოწირულებები ხშირად კორუფციის რისკის შემცველია. კომპანიები, რომლებიც მმართველ პარტიას აფინანსებენ, შესაძლოა იგებდნენ დიდი რაოდენობის ტენდერებს და ამ გზით ფაქტობრივად უკან იბრუნებდნენ გაცემულ თანხებს, ან სარგებლობდნენ სხვა სახის შეღავათებითა თუ პრივილეგიებით. ამასთან, კომპანიები ხშირად სხვადასხვა გზებით გვერდს უვლიან კანონით დადგენილ ლიმიტებს და მმართველ პარტიას იმაზე ბევრად მეტით აფინანსებენ, ვიდრე ეს დაშვებულია“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. საერთაშორისო გამჭვირვალობა - საქართველო აქვეყნებს ზუგდიდის მუნიციპალიტეტის 2017 წლის მოწვევის წარმომადგენლობითი ორგანოს - საკრებულოს (შემდეგში ზუგდიდის საკრებულო) საქმიანობის შეფასებას. „ანგარიში ეფუძნება საკრებულოდან გამოთხოვილ, საკრებულოს ოფიციალურ ვებ გვერდზე არსებულ ინფორმაციასა და ჩვენი ორგანიზაციის დაკვირვებებს“. სრულად... წყარო: transparency.ge

თბილისი. მითების დეტექტორის ინფორმაციით, იმისთვის, პლატფორმაზე დეზინფორმაციის გავრცელება შეჩერდეს, Google ფოტოების ძიების შედეგების გადამოწმებას დაიწყებს. „რატომ არის ეს მნიშვნელოვანი: ტექსტზე დაფუძნებული მისინფორმაციის საფრთხე შესაძლოა დაჩრდილოს შეცდომაში შემყვანმა, მანიპულაციურმა და ყალბმა ფოტოებმა/ვიდეოებმა, მათ შორის დამაჯერებელმა deepfake-ებმა, რომელიც ხელოვნური ინტელექტის მეშვეობით არის გენერირებული“, ნათქვამია მითების დეტექტორის ვებგვერდზე. სრულად... წყარო: mythdetector.ge

თბილისი. ინფორმაციის თავისუფლების განვითარების ინსტიტუტის (IDFI) ინფორმაციით, 22 ივნისს, დეპუტატ ირაკლი სესიაშვილის შუამდგომლობის საფუძველზე, კომიტეტმა მხარი დაუჭირა „ინფორმაციული უსაფრთხოების შესახებ“ კანონპროექტის საკანონმდებლო ცვლილებების მესამე მოსმენიდან მეორე მოსმენით პლენარულ სხდომაზე განხილვისათვის დაბრუნების საკითხს. „კანონპროექტის მესამე მოსმენიდან მეორე მოსმენაზე დაბრუნება კიდევ ერთხელ ნათლად ადასტურებს, რომ მისი შემუშავების პროცესი მიმდინარეობდა დაჩქარებულად, დახურულ რეჟიმში, სამოქალაქო და კერძო სექტორის წარმომადგენლებისა და სფეროს ექსპერტების სრულფასოვანი ჩართულობის გარეშე“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. ინფორმაციის თავისუფლების განვითარების ინსტიტუტის (IDFI) ცნობით, ორგანიზაციამ 2017 წელს საერთაშორისო მკვლევრებთან ერთად დაიწყო პროექტის - „სახელმწიფო არქივების ღიაობის შეფასება ყოფილ საბჭოთა რესპუბლიკებში“ განხორციელება. „2017-2018 წლების პროექტის ფარგლებში შეიქმნა სახელმწიფო არქივების ღიაობის შეფასების მეთოდოლოგია და შეფასდა 10 ყოფილი საბჭოთა ქვეყნის 20 არქივი. პროექტი გაგრძელდა მომდევნო წლებშიც (2019-2020) და რეიტინგს აღმოსავლეთი და ცენტრალური ევროპის 8 ახალი ქვეყანა დაემატა. პროექტის შედეგად თითოეულ ქვეყანაში შეფასდა 2 არქივი“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. საერთაშორისო გამჭვირვალობა - საქართველო აქვეყნებს ბლოგპოსტს: „ქართული ოცნების“ მიერ აჭარის ტელევიზიის ხელში ჩაგდების მცდელობის ქრონოლოგია. „მმართველი პარტიის მხრიდან აჭარის ტელევიზიაზე ზეგავლენის მოპოვების აქტიური მცდელობა 2019 წლის აპრილში აჭარის ტელევიზიისა და რადიოს დირექტორის, ნათია კაპანაძის, დაუსაბუთელი იმპიჩმენტით დაიწყო. თავად იმპიჩმენტი იმ ფონზე განხორციელდა, როდესაც კაპანაძის დირექტორობის პერიოდში, მაუწყებელი ადგილობრივი და საერთაშორისო ორგანიზაციების შეფასებით, პოლარიზებულ მედიაგარემოში დაბალანსებულობითა და მიუკერძოებლობით გამოირჩეოდა. ამის შემდეგ კი ხელისუფლების მხრიდან მთელი რიგი ნაბიჯები გადაიდგა აჭარის ტელევიზიაზე ზეგავლენის საბოლოოდ მოსაპოვებლად“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. სამართლიანი არჩევნებისა და დემოკრატიის საერთაშორისო საზოგადოების (ISFED) ინფორმაციით, ამერიკული კვლევითი ორგანიზაციის „გრაფიკას“ სოციალური მედიის მკვლევრებმა გამოააშკარავეს და დეტალურად აღწერეს 6 წლის განმავლობაში ფარულად მიმდინარე რუსული საინფორმაციო ოპერაცია. „Secondary Infektion ოპერაცია ძირითადად უკრაინას, აშშ-სა და თურქეთს ეხებოდა, თუმცა მათ გარდა დეზინფორმაციის სამიზნედ ბევრი სხვა სახელმწიფოც იყო შერჩეული. „გრაფიკას“ მიერ მომზადებულ ანგარიშის მიხედვით, საქართველო ერთ-ერთია იმ რამდენიმე სახელმწიფოს შორის, რომელთა წინააღმდეგაც მიმდინარეობდა დეზინფორმაციული კამპანიები. აღნიშნული ოპერაციის ფარგლებში საქართველო წარმოჩენილი იყო, როგორც ქვეყანა, რომელიც მზად არ არის ევროკავშირსა და ნატოში გაერთიანებისათვის. ამის მიზეზად სახელდებოდა საქართველოს რბილი პოზიცია რუსეთთან მიმართებაში და დასავლურ ფასეულობებთან შეუსაბამობა. რუსული საინფორმაციო ოპერაცია ასევე მოიცავდა გზავნილებს, თითქოს საქართველო არ არის სანდო ქვეყანა კორუფციის მაღალი რისკის გამო; რომ მისი საგარეო პოლიტიკური კურსი არ არის მკაფიოდ ჩამოყალიბებული და შესაბამისად, არაპროგნოზირებადია“, ნათქვამია ორგანიზაციის ანგარიშში. სრულად... წყარო: isfed.ge

თბილისი. ინფორმაციის თავისუფლების განვითარების ინსტიტუტმა (IDFI) საქართველოს მდგრადი განვითარების მიზნების 2020 წლის ნებაყოფლობითი ეროვნული მიმოხილვის ანგარიშზე კომენტარები წარადგინა რამდენიმე საკითხზე, რომელიც ორგანიზაციის საქმიანობის მნივშენლოვან მიმართულებებს წარმოადგენენ. ორგანიზაციას მიაჩნია რომ ჩამოთვლილი მიმართულებებით (მდგრადი განვითარების მიზნების უწყებათშორისი საბჭოს ინსტიტუციური მოწყობა და ცნობიერების ამაღლება მდგრადი განვითარების მიზნებზე; მდგრადი განვითრების მიზნების ინტეგრაცია ეროვნულ სტრატეგიულ დოკუმენტებში; პოლიტიკის შემუშავების თანამონაწილეობითი პროცესი; მართლმსაჯულების სისტემა; კორუფციის წინააღმდეგ ბრძოლა) არსებობს რიგი ხარვეზები, რომლებიც უარყოფით გავლენას ახდენენ მდგრადი განვითარების მიზნების იმპლემენტაციის პროცესზე. სრულად... წყარო: idfi.ge

თბილისი. ადამიანის უფლებების სწავლებისა და მონიტორინგის ცენტრი (EMC) გთავაზობთ ახალ კვლევას - “ეთნიკური უმცირესობების საკონსულტაციო მექანიზმები - რეალობა საქართველოში და საერთაშორისო გამოცდილება”. „საკონსულტაციო მექანიზმები ეთნიკური უმცირესობების პოლიტიკური ჩართულობისთვის მნიშვნელოვანი ინსტრუმენტია. მსგავსი მექანიზმები განსაკუთრებით მაშინ არის საჭირო, როდესაც ქვეყანაში არ არსებობს უმცირესობების საპარლამენტო დონეზე, ან სხვა არჩევით სისტემებში მონაწილეობის მექანიზმები, ხოლო უმცირესობების ეფექტიანი მონაწილეობის და პოლიტიკურ ცხოვრებაში ჩართულობის თვალსაზრისით, მნიშვნელოვანი ხარვეზებია. საქართველოში არსებული საკონსულტაციო მექანიზმები სუსტი, არაკოორდინირებული და ფრაგმენტულია, რომელიც ვერ უზრუნველყოფს არადომინანტი ეთნიკური ჯგუფების რეალურ ჩართულობას გადაწყვეტილების მიღების პროცესში“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს კვლევას: საჯარო ინფორმაციის პროაქტიული გამოქვეყნების პრაქტიკა საქართველოს საჯარო დაწესებულებებში. „2020 წლის მაისის მდგომარეობით განხორციელებული მონიტორინგის შედეგები აჩვენებს, რომ უწყებების უმრავლესობა კვლავ ვერ უზრუნველყოფს საჯარო ინფორმაციის მაღალი სტანდარტით და თანმიმდევრულ გამოქვეყნებას. ...საქართველოს ხელისფლების მხრიდან სათანადო რეაგირების გარეშე რჩება IDFI-ს ისეთი ინციატივები როგორიცაა: ინფორმაციის პროაქტიული გამოქვეყნების არსებული სტანდარტის გაუმჯობესება და რეფორმის მეორე ტალღის განხორციელება, ინფორმაციის ღია მონაცემების ფორმატში გამოქვეყნების და ღია მონაცემთა პორტალზე - data.gov.ge განთავსების ვალდებულების აღება, კოვიდ-19 კრიზისის დროს საჯარო დაწესებულებების მიერ პროაქტიულად გამოსაქვეყნებელი ინფორმაციის ნუსხის პანდემიის გამოწვევებთან შესაბამისობაში მოყვანა და სხვა“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. საერთაშორისო გამჭვირვალობა - საქართველოს ინფორმაციით, პარტია „ქართული ოცნება-დემოკრატიული საქართველოს” თავმჯდომარის ბიძინა ივანიშვილის ნათესავმა მურმან ტოგონიძემ 2014 წლიდან დღემდე იმერეთის ცალკეული მუნიციპალიტეტების ბიუჯეტიდან ტენდერებისა და გამარტივებული შესყიდვების მეშვეობით 16,395,501 ლარი მიიღო. ბლოგპოსტის თანახმად, მურმან ტოგონიძე ბიძინა ივანიშვილის დის - მაგული ივანაშვილის მულის ქმარია. ორგანიზაცია მოუწოდებს სახელმწიფო უსაფრთხოების სამსახურის ანტიკორუფციულ სააგენტოს და გენერალურ პროკურატურას: „შეისწავლონ ინდივიდუალური მეწარმე მურმან ტოგონიძისა და შპს „მშენინვესტის” მიერ მოგებული ტენდერები და დაადგინონ, ხომ არ იყო ისინი ტოგონიძისა და მისი კომპანიისათვის სასურველ პირობებში გამოცხადებული და შეიცავდა თუ არა კორუფციის შესაძლო ნიშნებს“. სრულად... წყარო: transparency.ge

თბილისი. პროექტის „სამოქალაქო საზოგადოების განვითარების ინიციატივა“ ფარგლებში, შეიქმნა პუბლიკაციები: რამდენად ასრულებს საქართველო ევროკავშირთან ასოცირების შეთანხმების შედეგად აღებულ ვალდებულებებს. დოკუმენტები საქართველოს მიერ სხვადასხვა სფეროში აღებული ვალდებულებების შესრულების მონიტორინგის შედეგებს შეეხება... ყველაფერს ევროკავშირთან ასოცირების შესახებ შეგიძლიათ გაეცნოთ ერთ საიტზე... პუბლიკაციები შეიქმნა პროექტის „სამოქალაქო საზოგადოების განვითარების ინიციატივა“ ფარგლებში, ევროკავშირისა და კონრად ადენაუერის ფონდის (KAS) მხარდაჭერით. წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ბლოგპოსტს: საგანგებო ბიუჯეტის ბიუროკრატიული ხარჯების ანალიზი. „2020 წლის ბიუჯეტის ცვლილების პროექტში გათვალისწინებული ადმინისტრაციული ხარჯების ანალიზი აჩვენებს, რომ პანდემიით გამოწვეული კრიზისული მდგომარეობის ფონზე საქართველოს ხელისუფლება გეგმავს ბიუროკრატიული ხარჯების გარკვეულ შემცირებას. თუმცა, IDFI მიიჩნევს, რომ დაგეგმილი შემცირება არ არის შესაბამისობაში ქვეყნაში არსებულ ეკონომიკურ გამოწვევებთან. კერძოდ, ადმინისტრაციული ხარჯების მუხლით დაგეგმილი ზოგიერთო ცვლილება (სამივლინებო ხარჯები, წარმომადგენლობითი ხარჯები) განპირობებულია პანდემიის შედეგად ბუნებრივ შემცირებასთან და ნაკლებად კავშირშია ე.წ. ქამრების შემოჭერის პოლიტიკასთან“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. ადამიანის უფლებების სწავლებისა და მონიტორინგის ცენტრი ამერიკის შეერთებული შტაბების სახელმწიფო დეპარტამენტის მიერ 10 ივნისს გამოქვეყნებული ანგარიშის მიმოხილვას გთავაზობთ, რომელიც საქართველოში რელიგიის თავისუფლების თვალსაზრისით არსებულ ვითარებას შეეხება. „ზოგადი საკანონმდებლო მდგომარეობის აღწერისას ანგარიშში ხაზგასმულია, რომ საქართველოში კონსტიტუციით გარანტირებულია რელიგიის თავისუფლება და აკრძალულია რელიგიური ნიშნით დევნა. აქვე პარალელურად აღნიშნულია, რომ საქართველოს კონსტიტუცია აღიარებს საქართველოს მართლმადიდებელი ეკლესიის განსაკუთრებულ როლს და სახელმწიფოსა და ეკლესიას შორის ურთიერთობა რეგულირდება კონკორდატის საფუძველზე. ანგარიშში აღნიშნულია, რომ კონკორდატი იმგვარ პრივილეგიებს აძლევს დომინანტ რელიგიურ ორგანიზაციას, რომელიც სხვა ორგანიზაციებს არ აქვთ“, ნათქვამია ორგანიზაციის ვებგვერდზე. სრულად... წყარო: emc.org.ge

ევროკომისიის 10 ივნისის ანგარიშის თანახმად, კოვიდ 19-ის პანდემია ცრუ და შეცდომაში შემყვანი ინფორმაციების მასობრივი ტალღის თანხლებით მიმდინარეობს. ჯანდაცვის საკითხებთან დაკავშირებით შეცდომაში შემყვანმა ინფორმაციებმა, სახიფათო, ცრუ მტკიცებებმა, კონსპირაციის თეორიებმა და სამომხმარებლო თაღლითობამ მნიშვნელოვანი საფრთხე შეუქმნა საზოგადოებრივ ჯანმრთელობას. ყალბი ან შეცდომაში შემყვანი ინფორმაციები კორონა ვირუსის შესახებ, აზიანებს სოციეტალურ ერთობას, თუმცა უპირველესად ჯანდაცვას. ცრუ და შეცდომაში შემყვანი ნარატივები სხვადასხვა ფორმით შეიძლება გავცელდეს, ისინი ვარირებს მიზანმიმართული, წინასწარ განზრახული დეზინფორმაციიდან არასწორ ინფორმაციამდე და განსხვავებულ საპასუხო ქმედებებს მოითხოვს. ევროკომისიის განცხადებით, გარეშე აქტორები, კონკრეტულად, რუსეთი და ჩინეთი მონაწილეობენ მიზანმიმართულ, გავლენის გამავრცელებელ ქმედებებში და დეზინფორმაციის კამპანიებში ევროკავშირში, მის სამეზობლოში და მთელ მსოფლიოში. დეზინფორმაციების მაგალითებად ევროკომისიას მოჰყავს ისეთი მცდარი მტკიცებები, როგორიცაა „ძლიერი ქიმიური საყოფაცხოვრებო ხსნარების და სამედიცინო (ეთილის) სპირტის დალევა კურნავს კორონავირუსს“, რა თქმა უნდა, ეს მტკიცება არასწორია და საზიანოა ჯანმრთელობისთვის. Belgium’s Poison Control Centre-ზე დაყრდნობით, ამ პერიოდში, ქიმიურ საყოფაცხოვრებო ხსნარებთან დაკავშირებული ინციდენტები 15%-ით გაიზარდა. კონსპირაციის ერთ-ერთი თეორიის მტკიცებით: კორონავირუსი „არის ინფექცია, რომელიც მსოფლიო ელიტების მიერ მოსახლეობის ზრდის შესამცირებლად გავრცელდა“. სამეცნიერო მტკიცებულება კი ცხადყოფს, რომ კოვიდ 19 მიეკუთვნება ცხოველური წარმოშობის ვირუსების ოჯახს, რომელიც მოიცავს SARS და MERS ვირუსებსაც. მტკიცება, რომ თითქოს „5G ინსტალაციები ავრცელებს ვირუსს“ შორსაა მეცნიერული დასაბუთებებისგან და ანძებზე თავდასხმისთვის გამოიყენეს. ევროკავშირი გააგრძელებს დეზინფორმაციასთან ბრძოლას, ხელს შეუწყობს მოქალაქეების გაძლიერებას, ცნობიერების ამაღლებას და სოციეტალური მედეგობის ზრდას. ევროკომისია მხარს დაუჭერს მედია-წიგნიერების პროექტებს, კრიტიკული აზროვნების, ციფრული უნარების განვითარების შესაძლებლობების გაზრდას. კომისია ასევე, ყურადღებას გაამახვილებს ისეთ ჯგუფებზე (ბავშვები, ახალგაზრდები), რომლებიც უფრო მოწყვლადები არიან ცრუ, შეცდომაში შემყვანი ინფორმაციების მიმართ. სრულად... წყარო: ec.europa.eu

თბილისი. ინფრომაციის თავისუფლების განვითარების ინსტიტუტის ინფორმაციით, 8 ივნისს კორუფციასთან ბრძოლის სასერტიფიკატო პროგრამის მეშვიდე მოდული დაიწყო, რომელიც მიზნად ისახავს კორუფციასთან ბრძოლის საერთაშორისო პრაქტიკის ანალიზს. „მეშვიდე მოდულის განმავლობაში კურსის მსმენელები შეისწავლიან კორუფციასთან წარმატებული ბრძოლის თვალსაზრისით სხვადასხვა ქვეყნების გამოცდილებას; ქვეყნის წარმატების/ წარუმატებლობის განმაპირობებელ თეორიებს; კაპიტალიზმს, როგორც დომინანტი პოლიტ-ეკონომიკური მოწყობის მოდელს და მის ვარიაციებს; ეკონომიკური ტრანსფორმაციისა და განვითარების ძირითად გამოწვევებს. მათ შესაძლებლობა ექნებათ შეადარონ საქართველოს გამოცდილება და განხორციელებული რეფორმები სხვა ქვეყნების მიერ განხორციელებულ რეფორმებს“. სრულად... წყარო: idfi.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ბლოგპოსტს: რატომ არის მნიშვნელოვანი არქივების ღიაობა. „ღიაობა და ანგარიშვალდებულება დემოკრატიული პრინციპებია, რომლის გარეშეც წარმოუდგენელია თავისუფალი საზოგადოების განვითარება. საბჭოთა კავშირის რღვევის შემდგომ, ინფორმაციაზე წვდომა, არქივების გახსნილობა და საარქივო დოკუმენტების გასაჯაროვება რიგი ქვეყნების უმნიშვნელოვანესი მონაპოვარია, რაც საშუალებას აძლევს საზოგადოებას გაეცნოს და გაიაზროს ისტორია და ტოტალიტარული წარსული. საარქივო დოკუმენტების ფოტოგადაღების დაშვება უმნიშვნელოვანესი წინ გადადგმული ნაბიჯი იქნება არა მხოლოდ ხელმისაწვდომობის და გამჭვირვალობის ზრდის, არამედ ასევე მეცნიერების განვითარების ხელშეწყობის მიმართულებით. ამ გზით ხელისუფლება დაადასტურებს, რომ მას სრულად აქვს გათვითცნობიერებული არქივების ღიაობის მნიშვნელობა და დაამკვიდრებს თავისუფალი, დემოკრატიული ქვეყნების მსგავს პრაქტიკას საქართველოში“. სრულად... წყარო: idfi.ge

თბილისი. საერთაშორისო გამჭვირვალობა - საქართველოს ინფორმაციით, თბილისის მერიის საახალწლო შესყიდვები კორუფციის შესაძლო ნიშნებს შეიცავს. „საქართველოში საახალწლო ღონისძიებებთან დაკავშირებული სახელმწიფო შესყიდვები, როგორც წესი, გამოირჩევა იმით, რომ მაღალია გამარტივებული (პირდაპირი) შესყიდვების წილი. პირდაპირი შესყიდვის საფუძვლად კი გადაუდებელი აუცილებლობა ან სახელმწიფოებრივი და საზოგადოებრივი მნიშვნელობის ღონისძიება სახელდება. მიუხედავად იმისა, რომ ახალი წელი ყოველთვის 1 იანვარს არის, მუნიციპალიტეტები ვერ ახერხებენ დროულად დაიწყონ ახალი წლის ღონისძიებებისთვის მზადება და წლის ბოლოს დაჩქარებულად და მითუმეტეს, პირდაპირი შესყიდვებით არ დახარჯონ ბიუჯეტის ფული. არაეკონომიურობასთან ერთად, პირდაპირი შესყიდვები კორუფციის ეჭვებს აჩენს“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. „საერთაშორისო გამჭვირვალობა - საქართველოს“ დაკვეთით „კავკასიის კვლევითი რესურსების ცენტრმა” (CRRC) 2020 წლის 27 თებერვლიდან 18 მარტამდე პერიოდში საზოგადოებრივი აზრის კვლევა ჩაატარა. „კვლევის ფარგლებში მთელი ქვეყნის მასშტაბით 1763 ადამიანი გამოიკითხა. კვლევის საშუალო ცდომილება 2.2%-ია. საქართველოში კვლავ იშვიათია წვრილმანი კორუფცია, თუმცა გამოწვევად რჩება კორუფციის უფრო კომპლექსური ფორმები და კორუფციის ისეთი შემთხვევების გამოძიება, სადაც მაღალი თანამდებობის პირები ფიგურირებენ“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. ადამიანის უფლებების სწავლებისა და მონიტორინგის ცენტრი (EMC) ინფორმაციის თავისუფლების განვითარების ინსტიტუტთან (IDFI) ერთად აქვეყნებს ჩრდილოვან ანგარიშს „სასამართლო სისტემის სტრატეგიისა და სამოქმედო გეგმის შესრულების მდგომარეობა“. „მონიტორინგის ანგარიშმა გამოკვეთა, რომ იუსტიციის უმაღლესი საბჭო სათანადო ყურადღებას არ უთმობს სტრატეგიის და სამოქმედო გეგმის სრულყოფილად იმპლემენტაციას და ხშირ შემთხვევაში, მხოლოდ ტექნიკურად სრულდება კონკრეტული აქტივობები, ხოლო მათი შინაარსობრივი შედეგი, მართლმსაჯულების ხარისხობრივი გაუმჯობესება, სამოქმედო გეგმის შესრულებაზე პასუხისმგებელი უწყებების ინტერესს მიღმა რჩება“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საერთაშორისო გამჭვირვალობა - საქართველო თვლის, რომ პარლამენტის რეგლამენტის ცვლილებები ოპოზიციის უფლებრივ მდგომარეობას აუარესებს. „უმრავლესობის წევრებმა პარლამენტში 1 ივნისს რეგლამენტში ცვლილებების პროექტი წარადგინეს. ანალიზი მოიცავს პროექტით გათვალისწინებულ მნიშვნელოვან სიახლეებს, რომლითაც უარესდება ოპოზიციის უფლებრივი მდგომარეობა, მათ შორის: სხვადასხვა პოლიტიკური პარტიის ან/და საარჩევნო ბლოკის წარდგენით არჩეული დეპუტატები საერთო ფრაქციას ვეღარ შექმნიან; პოლიტიკური დებატების დროს უმრავლესობის ფრაქციას გამოსვლის დრო ეზრდება, პატარა ფრაქციებს და დამოუკიდებელ დეპუტატებს კი უმცირდებათ; საპროკურორო საბჭოს წევრს ოპოზიცია მისი კვოტის შესავსებად დამოუკიდებლად, უმრავლესობის მხარდაჭერის გარეშე ვეღარ დაამტკიცებს“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. საქართველოს ახალგაზრდა იურისტთა ასოციაციის განმარტებით, თბილისის სააპელაციო სასამართლომ საზოგადოებრივი მაუწყებლის მიერ საჯარო ინფორმაციის გაცემასთან დაკავშირებით მნიშვნელოვანი გამარტება გააკეთა. „თბილისის სააპელაციო სასამართლომ ნაწილობრივ დააკმაყოფილა საიას სააპელაციო საჩივარი და საზოგადოებრივ მაუწყებელს დაევალა სახელმწიფო შესყიდვის ფარგლებში 10 არარეზიდენტ პირთან გაფორმებული ხელშეკრულების (თითოეულზე თანხის მითითებით) გადმოცემა. თბილისის სააპელაციო სასამართლომ განმარტა, რომ „სახელმწიფო შესყიდვების შესახებ“ და „მაუწყებლობის შესახებ“ კანონები გამორიცხავენ საზოგადოებრივი მაუწყებლის მიერ ტელე-, რადიო-, ასევე ვებგვერდებისა და სოციალური ქსელისთვის განკუთვნილი პროდუქციის ან/და მის შესაქმნელად საჭირო მომსახურების შესყიდვაზე სახელმწიფო შესყიდვების კანონმდებლობის გავრცელებას, მაგრამ ეს არ გულისხმობს სახელმწიფო დაფინანსების ფარგლებში განხორციელებული შესყიდვების ამსახველი ხელშეკრულებების საჯაროობის გამორიცხვას და საჯარო ინფორმაციის გაცემის ვალდებულება მაინც არსებობს“, ნათქვამია ორგანიზაციის ვებგვერდზე. სრულად... წყარო: gyla.ge