თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ბლოგპოსტს: საქართველოს მთავრობის სარეზერვო ფონდის ხარჯვის მიმოხილვა: 2013-2017 წლები. „საქართველოს მთავრობის სარეზერვო ფონდის თანხები ძირითადად გაუთვალისწინებელ ხარჯებზე დაიხარჯა". სრულად... წყარო: idfi.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ბლოგპოსტს: „საქართველოსთვის საჯარო დაწესებულებებისა და ბიუჯეტისთვის უსასყიდლოდ გაწეული ფინანსური დახმარება: 1995-2017". 1995-2017 წლებში საქართველოსთვის გაწეული ფინანსური დახმარება 2,4 მილიარდ ამერიკულ დოლარს შეადგენს. ყველაზე მეტი უსასყიდლო ფინანსური დახმარება აშშ-მ გამოყო: 1,03 მილიარდი ამერიკული დოლარი. სრულად...  წყარო: idfi.ge

თბილისი. „ინფორმაციის თავისუფლებისა და განვითარების ინსტიტუტი" (IDFI) გაეროს 2018 წლის ელექტრონული მმართველობის კვლევის მონაცემებს აქვეყნებს. როგორც ორგანიზაციის მიერ გამოქვეყნებულ ინფორმაციაშია აღნიშნული, ელექტრონული მმართველობისა (ელ-მმართველობის) და ელექტრონული ჩართულობის (ელ-ჩართულობის) განვითარების კუთხით ქულები მცირედით გაიუმჯობესა. თუმცა, ქვეყნის პოზიცია ელ-მმართველობის ინდექსში მხოლოდ ერთი პოზიციით გაუმჯობესდა, ელ-ჩართულობის მხრივ კი პირიქით, თერთმეტი ადგილით დაქვეითდა. სრულად  წყარო: idfi.ge

თბილისი. უკვე მესამე წელია IDFI სახელდება, როგორც ფინანსურად ერთ-ერთი ყველაზე გამჭვირვალე კვლევითი ორგანიზაცია. Transparify-მ მას 2018 წელსაც უმაღლესი – ხუთვარსკვლავიანი შეფასება მიანიჭა. „იმ ორგანიზაციას შორის, რომელთაც 2018 წელს გამჭვირვალობის კუთხით უმაღლესი შეფასება დაიმსახურეს, IDFI-ის გარდა კიდევ 4 საქართველოში მოქმედი ადგილობრივი არასამთავრობო ორგანიზაციაა, კერძოდ: ეკონომიკური პოლიტიკის კვლევის ცენტრი (EPRC), საერთაშორისო გამჭვირვალობა - საქართველო, ISET- კვლევითი ინსტიტუტი და PMCG - კვლევითი ცენტრი", ნათქვამია ორგანიზაციის ვებგვერდზე. სრულად... წყარო: idfi.ge

თბილისი. „საერთაშორისო გამჭვირვალობა - საქართველო” (TI) გამოაქვეყნა მუნიციპალიტეტების მიერ საჯარო ინფორმაციის პროაქტიულად გამოქვეყნების შესახებ კვლევის მორიგი ნაწილი, რომელიც ამბროლაურის მუნიციპალიტეტს ეხება. ორგანიზაციის დასკვნით, მერიისა და საკრებულოს საერთო ვებ-გვერდზე (http://ambrolauri.gov.ge) განთავსებული ინფორმაცია არ პასუხობს დადგენილებით ნაკისრი პროაქტიულად გამოსაქვეყნებელი ინფორმაციის ნუსხას; რთულია მერიისა და საკრებულოს ვებ-გვერდზე განთავსებული საძიებო სისტემის გამოყენება, რაც საჯარო ინფორმაციაზე წვდომის შესაძლებლობას აფერხებს. სრულად  წყარო: ორგანიზაციის ვებგვერდი

აჭარა. 23-24 ივლისს, ბათუმში, „საერთაშორისო გამჭვირვალობა - საქართველოს" ორგანიზებით ანტიკორუფციული საზაფხულო სკოლის სემინარები წელს პირველად ჩატარდა.  „ანტიკორუფციულ სკოლაში მოწვეული პროფესიონალი სპიკერები კორუფციის წინააღმდეგ ბრძოლის, ინსტიტუტების გამჭვირვალობისა და მათი ანგარიშვალდებულების შესახებ ესაუბრნენ მსმენელებს, რომლებიც საჯარო სამსახურში, არასამთავრობო სექტორში, ბიზნესსა და მედიაში დასაქმებულ შერეულ ჯგუფს წარმოადგენდნენ. კურსის დასრულების შემდეგ მათ სკოლის დამამთავრებელი სერთიფიკატები გადაეცათ", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. საერთაშორისო გამჭვირვალობა - საქართველო აქვეყნებს კვლევას „საქართველოს IX მოწვევის პარლამენტის საქმიანობის შეფასება". „კვლევაში შეფასებულია პარლამენტის მიერ მიღებული კანონებიც. პოზიტიურად შეფასებულ კანონთა შორისაა: სტამბოლის კონვენციის რატიფიცირებიდან გამომდინარე ცვლილებები, ქონებრივი დეკლარაციის წარდგენის წესის შესახებ ცვლილება, პატიმრობის კოდექსში ცვლილებები, თამბაქოს მოწევის აკრძალვის შესახებ ინიციატივა, გამარტივებული ელექტრონული ტენდერის გაუქმება და ა.შ. კვლევაში ნეგატიურადაა შეფასებული რამდენიმე საკანონდებლო ცვლილება, მათ შორის ოპერატიულ-ტექნიკური სააგენტოს შექმნა, მორატორიუმი მიწის გასხვისებაზე, თვითმმართველი ერთეულების გაუქმება, საარჩევნო კომისიების დაკომპლექტების ახალი წესი, საკანონმდებლო წინადადების განხილვის წესის ცვლილება”, ნათქვამია ორგანიზაციის ვებგვერდზე. სრულად... წყარო: www.transparency.ge

თბილისი. „ადამიანის უფლებების სწავლებისა და მონიტორინგის ცენტრმა (EMC)” და საქართველოს ახალგაზრდა იურისტთა ასოციაციამ (საია), 12 მაისის მოვლენებთან დაკავშირებით მომზადებული, ერთობლივი ანგარიშის პრეზენტაციას გამართეს. ანგარიში ეხება, 2018 წლის 12 მაისს, თბილისის ღამის კლუბებში ჩატარებულ მასშტაბურ საპოლიციო ოპერაციას და მასთან დაკავშირშებით განვითარებულ მოვლენებს. ანგარიშში მოყვანილი შეფასებები ეფუძნება სხვადასხვა წყაროდან მოპოვებული ინფორმაციის შეფასებას. ანგარიშის ავტორებმა, დოკუმენტზე მუშაობის დროს, დეტალური ახსნა-განმარტება ჩამოართვეს, 12 მაისის მოვლენების მონაწილე, 38 პირს; დაამუშავეს საჯარო უწყებებიდან მიღებული ინფორმაცია; შეისწავლეს ადმინისტრაციული წარმოების მასალები და სხვა ოფიციალური დოკუმენტები. სრულად  წყარო: gyla.ge

თბილისი. „საერთაშორისო გამჭვირვალობა - საქართველო” (TI) საჯარო უწყებების მიერ „გლობალ მოტორს ჯორჯია - ჯი ემ ჯისგან” რუსული წარმოების ავტომობილების - „LADA 4x4, 21214” (იგივე „ნივა") შესყიდვების შესახებ აქვეყნებს ინფორმაციას. „ჩვენმა კვლევამ აჩვენა, რომ ბოლო 5 წლის განმავლობაში საქართველოს საჯარო უწყებებმა, უმეტესწილად უკონკურენტო ტენდერის გზით, 3 მლნ ლარამდე ღირებულების რუსული „ნივა” შეისყიდეს. ამ პროცესში სხვა ავტომწარმოებლები, როგორც წესი, არ მონაწილეობდნენ, ვინაიდან შემსყიდველ ორგანიზაციებს სატენდერო დოკუმენტაცია, ფაქტობრივად, მორგებული ჰქონდათ „ნივაზე” - მითითებული იყო ძალიან დაბალი ფასი და მარტივად დასაკმაყოფილებელი ტექნიკური პირობები", - აღნიშნულია კვლევაში. სრულად  წყარო: ორგანიზაციის ვებგვერდი

თბილისი. 10 ივლისს საქართველოს სახალხო დამცველმა „ხელვაჩაურის კულტურის ცენტრს" შევიწროებით გამოხატული განსხვავებული მოსაზრების ნიშნით დისკრიმინაციის აღმოფხვრის რეკომენდაციით მიმართა. „საქმის ფაქტობრივი გარემოებების თანახმად, „ხელვაჩაურის კულტურის ცენტრის" დირექტორის მოადგილემ განცხადებით მიმართა სახალხო დამცველს, სადაც აღნიშნავდა, რომ ცენტრის დირექტორი, იურისტი და ხელვაჩაურის გამგეობის მაღალი თანამდებობის პირები მის მიმართ განწყობილნი არიან არაკოლეგიალურად - უზღუდავენ უფლება-მოვალეობებს, ჩამოაშორეს შიდასამსახურეობრივ საქმიანობას და დისციპლინურ ღონისძიებებს მხოლოდ მის წინააღმდეგ ატარებენ. ასევე, არ აძლევენ პრემიას, ვინაიდან იგი საჯაროდ აკრიტიკებდა დირექტორისა და იურისტის კვალიფიკაციას. ზემოაღნიშნულის გათვალისწინებით, სახალხო დამცველმა რეკომენდაციით მიმართა ააიპ „ხელვაჩაურის კულტურის ცენტრს" შეწყვიტოს შევიწროება და შრომითი ურთიერთობა წარმართოს თანასწორობის პრინციპის დაცვით, ასევე ყველა დასაქმებულს შეუქმნას ადამიანის ღირსებისათვის შესაბამისი თანასწორი სამუშაო გარემო", ნათქვამია ომბუდსმენის ვებგვერდზე. სრულად...  წყარო: ombudsman.ge

თბილისი. „საერთაშორისო გამჭვირვალობა - საქართველო” აქვეყნებს ინფორმაციას, თანამდებობის პირთა არასრული ქონებრივი დეკლარაციებისა და თანამდებობასთან შეუთავსებელი საქმიანობის შესახებ, ქუთაისის მერიასა და საკრებულოში. სრულად  წყარო: ორგანიზაციის ვებგვერდი

თბილისი. სახალხო დამცველი მთავარ პროკურატურას ხორავას ქუჩაზე არასრულწლოვანთა მკვლელობის გამოძიებაზე პასუხისმგებელი პირების მიერ სავარაუდოდ ჩადენილი სამოხელეო დანაშაულის ფაქტებზე გამოძიების დაწყების წინადადებით მიმართავს. „სახალხო დამცველმა შეისწავლა ხორავას ქუჩაზე არასრულწლოვანთა მკვლელობის საქმე და გამოძიებაში არაერთი ხარვეზი გამოავლინა, რომელთა შედეგადაც საგამოძიებო ორგანოებმა ვერ უზრუნველყვეს გარდაცვლილი დავით სარალიძის მკვლელობაში მონაწილე ყველა პირის დამნაშავედ ცნობისთვის საკმარისი მტკიცებულებების მოპოვება და სასამართლოსთვის წარდგენა”, - ვკითხულობთ სახალხო დამცველის აპარატის მიერ გავრცელებულ ინფორმაციაში, - „საქმის მასალების საფუძვლიანად შესწავლასთან ერთად, სახალხო დამცველმა მოისმინა საპარლამენტო საგამოძიებო კომისიის მიერ პროკურორთა და გამომძიებელთა დაკითხვები. ჩაუტარებელი ან დაგვიანებით ჩატარებული საგამოძიებო მოქმედებების და კომისიის სხდომაზე დაკითხვისას გამოძიებაზე პასუხისმგებელი პირების მიერ საგამოძიებო ტაქტიკაზე გაცემული პასუხების ერთობლივი ანალიზით სახალხო დამცველი მივიდა დასკვნამდე, რომ გამოძიების ტაქტიკა შესაძლოა არ ემსახურებოდა დამნაშავეთა სრულად გამოვლენის საჯარო ინტერესს". სრულად  წყარო: სახალხო დამცველის ვებგვერდი

თბილისი. „საერთაშორისო გამჭვირვალობა - საქართველომ” 2017 წლის 15 ყველაზე მსხვილი შემსყიდველი სახელმწიფო ორგანიზაციის შესყიდვების წლიური გეგმები გააანალიზა. დოკუმენტის მიხედვით, სახელმწიფო შესყიდვის დაგეგმვაში ძირითადად, ორი სახის პრობლემაა: შესყიდვების წლიური გეგმების შინაარსი და წლის განმავლობაში შესყიდვების გეგმაში შეტანილი ცვლილებები; შესყიდვების წლიური გეგმები, ხშირ შემთხვევაში, ფორმალურად არის შედგენილი; 15 ორგანიზაციის თავდაპირველ გეგმებში შეტანილი შესყიდვების დაახლოებით 52%-მა წლის განმავლობაში განიცადა კორექტირება, რაც, ორგანიზაციის დასკვნით, ტენდერებში მიმწოდებლებს შორის კონკურენციაზე და შესყიდული საქონლის და მომსახურების ხარისხზე უარყოფითად აისახება. სრულად წყარო: ორგანიზაციის ვებგვერდი

თბილისი. საერთაშორისო გამჭვირვალობა - საქართველო განაგრძობს თანამდებობის პირთა ქონებრივი დეკლარაციების შესწავლას. ამჯერად, ორგანიზაცია ბაღდათის და ხარაგაულის მუნიციპალიტეტების თანამდებობის პირების შესახებ წარმოგიდგენთ ინფორმაციას. მათ 2017-2018 წლებში არასრულად შეავსეს ქონებრივი დეკლარაცია. სრულად... წყარო: www.transparency.ge

თბილისი. საერთაშორისო გამჭვირვალობა - საქართველო აქვეყნებს კვლევას: ხელისუფლების პიარ ღონისძიებებისა და რეკლამის მზარდი ხარჯები. „რეკლამასა და პიარ ღონისძიებებში დახარჯულმა თანხამ, ისევე როგორც პრესსამსახურებში დასაქმებულ თანამშრომელთა ხელფასების ოდენობამ, საარჩევნო 2016 წელს ყველაზე მაღალ ნიშნულს მიაღწია და 28 მილიონ ლარზე მეტი შეადგინა. 2016 წლის ხარჯების ზრდა, სავარაუდოდ, საპარლამენტო არჩევნების პერიოდმა გამოიწვია - როგორც ჩანს,  ხელისუფლებამ მაქსიმალურად მოახდინა საბიუჯეტო სახსრების მობილიზაცია", ნათქვამია ორგანიზაციის ვებგვერდზე. სრულად... წყარო: www.transparency.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ბლოგპოსტს: სამინისტროების ოპტიმიზაციის შედეგები. „სამინისტროების გაერთიანების შედეგად, ცენტრალური აპარატების გარკვეულწილად შემცირებულმა საშტატო რიცხოვნობამ არ განაპირობა სამინისტროს შრომის ანაზღაურების ხარჯების შემცირება. მაგალითად, კულტურისა და ძეგლთა დაცვის, სპორტისა და ახალგაზრდობის და განათლებისა და მეცნიერების სამინისტროების სტრუქტურული ცვლილებების შედეგად ცენტრალური აპარატების საერთო საშტატო რიცხოვნობა 35 ერთეულით შემცირდა, თუმცა შრომის ანაზღაურების ხარჯები წინა წლის ანალოგიური პერიოდის ნიშნულზე შენარჩუნდა", ნათქვამია ორგანიზაციის ვებგვერდზე. სრულად... წყარო: idfi.ge

თბილისი. „საერთაშორისო გამჭვირვალობა - საქართველომ” წარადგინა კვლევა, რომელშიც საქართველოს საერთო სასამართლოების სისტემაში კორუფციის რისკებია შეფასებული. „სასამართლო სისტემაში არსებული მდგომარეობის კვლევამ აჩვენა, რომ სასამართლო სისტემაში კორუფციის სავარაუდო შემთხვევების ხელშემწყობი ძირითადი ფაქტორებია: (ა) მართლმსაჯულების ადმინისტრირებაზე არასათანადო გავლენა მოსამართლეთა გავლენიანი ჯგუფის მიერ და (ბ) სასამართლო ხელისუფლების სისტემური პრობლემები, რომლებიც გამოწვეულია ხარვეზიანი კანონმდებლობით და  რომელთა გამოსწორებაც არ მოხერხდა სასამართლო სისტემაში და მის გარეთ არსებული წინააღმდეგობის გამო", ნათქვამია ორგანიზაციის ვებგვერდზე. სრულად... წყარო: www.transparency.ge

თბილისი. საქართველოს ახალგაზრდა იურისტთა ასოციაცია (საია) ამომრჩევლის სავარაუდო მოსყიდვის ფაქტს ეხმაურება. „27 ივნისს „ერთიანი ნაციონალური მოძრაობის" წარმომადგენლებმა ზუგდიდში მცხოვრებ 100 მოქალაქეს „გარანტიის სერთიფიკატი" გადასცეს. აღნიშნული სერტიფიკატების გადაცემა „ერთიანი ნაციონალური მოძრაობის" ახალი პროექტის ფარგლებში მოხდა, რომლის სახელწოდებაა  „ხალხი ივანიშვილის წინააღმდეგ." ა.წ. 29 მაისს ცნობილი გახდა „ერთიანი ნაციონალური მოძრაობის" ახალი ინიციატივის შესახებ, რომლის თანახმადაც, ხელისუფლებაში მოსვლის შემთხვევაში პარტია გეგმავს „ქართული ოცნების" მმართველობის პერიოდში საბანკო სექტორისგან დაზარალებულ მოსახლეობას ზიანი აუნაზღაუროს, ასევე, საბანკო და მიკროსაფინანსო ორგანიზაციებისათვის ვალების გადახდაზე 2 წლიანი მორატორიუმი გამოაცხადოს. პროექტის ფარგლებში პარტია მძიმე ეკონომიკურ და სამართლებრივ მდგომარეობაში მყოფ მოქალაქეებს მათთან თანამშრომლობას სთავაზობს. მიგვაჩნია, რომ აღნიშნულ ქმედებაში,  სავარაუდოდ,  იკვეთება „მოქალაქეთა პოლიტიკური გაერთიანებების შესახებ" საქართველოს ორგანული კანონის მოთხოვნების დარღვევა, პარტიის, მისი წარმომადგენლების მიერ აკრძალული საქმიანობის განხორციელებისა და ამომრჩევლის მოსყიდვის კუთხით", ნათქვამია ორგანიზაციის ვებგვერდზე. სრულად...  წყარო: gyla.ge

თბილისი. 29 ივნისს, საქართველოს ახალგაზრდა იურისტთა ასოციაციამ საკონსტიტუციო სასამართლოს გაუგზავნა ბათუმის საქალაქო სასამართლოს მოსამართლის, ირაკლი შავაძის კონსტიტუციური სარჩელი. „ირაკლი შავაძე 2016 წლის 4 იანვრიდან სამწლიანი გამოსაცდელი ვადით შეუდგა მოსამართლის მოვალეობის შესრულებას ბათუმის საქალაქო სასამართლოში. მან 2017 წელს უვადოდ გამწესების მოთხოვნით მიმართა იუსტიციის უმაღლეს საბჭოს. 2018 წლის 14 და 15 თებერვალს, იუსტიციის უმაღლესი საბჭოს წევრებმა შეავსეს შეფასების ფურცლები. საბჭოს ხუთი წევრის შეფასებით, ირაკლი შავაძე სრულად აკმაყოფილებდა კეთილსინდისიერების კრიტერიუმს, ხოლო კომპეტენტურობის კრიტერიუმთან დაკავშირებით ირაკლი შავაძემ 70%-ზე მეტი შეფასება მიიღო. მიუხედავად ამისა, ფარული კენჭისყრით იუსტიციის უმაღლესმა საბჭომ შავაძე არ აირჩიო მოსამართლედ უვადოდ. საია-ს მიაჩნია, რომ საბჭოს უფლებამოსილება, დაუსაბუთებლად უარი უთხრას უვადოდ მოსამართლედ დანიშვნაზე იმ მოსამართლეს, რომელიც აკმაყოფილებს როგორც კეთილსინდისიერების, ისე კომპეტენტურობის კრიტერიუმებს, ეწინააღმდეგება საქართველოს კონსტიტუციის 29-ე მუხლს. ამ კონსტიტუციური დებულებით გარანტირებულია ადამიანის უფლება, უსაფუძვლოდ და თვითნებურად არ ეთქვას უარი სახელმწიფო სამსახურში საქმიანობაზე", ნათქვამია ორგანიზაციის ვებგვერდზე. სრულად... წყარო: gyla.ge

თბილისი. დღეს, "ადამიანის უფლებათა სახლში", არასამთავრობო ორგანიზაცია „ადამიანის უფლებათა ცენტრმა" საქართველოში ქალი და არასრულწლოვანი პატიმრების მდგომარეობის შესახებ სპეციალური ანგარიში წარმოადგინა. ანგარიში მომზადდა ბულგარეთის განვითარების ფონდის ფინანსური მხარდაჭერით, „ადამიანის უფლებათა ცენტრის" პროექტის - „ქალი და არასრულწლოვანი პატიმრების მდგომარეობის მონიტორინგი" ფარგლებში. სრულად  წყარო: სახალხო დამცველის ვებგვერდი

თბილისი. საქართველოს ახალგაზრდა იურისტთა ასოციაციამ და „საერთაშორისო გამჭვირვალობა - საქართველომ" დღეს წარადგინეს საქართველოს იუსტიციის უმაღლესი საბჭოს მონიტორინგის მეექვსე, 2017 წლის საქმიანობის ანგარიში. ანგარიშში შეფასებულია საბჭოს საქმიანობის მარეგულირებელი კანონმდებლობა და საბჭოს საქმიანობა მოსამართლეთა შერჩევა/დანიშვნის, საბჭოს საქმიანობის გამჭვირვალობის, სასამართლოს თავმჯდომარის დანიშვნის წესისა და პრაქტიკის, მოსამართლეთა დისციპლინური პასუხისმგებლობის და სხვა მიმართულებებით. სრულად  წყარო: ორგანიზაციის ვებგვერდი

21 ივნისს, „სამართლიანმა არჩევნებმა" და საქართველოს ახალგაზრდა იურისტთა ასოციაციამ, შეხვედრები გამართეს ქუთაისში და გურჯაანში. შეხვედრებზე ადგილობრივი ხელისუფლების, პოლიტიკური პარტიების, საარჩევნო ადმინისტრაციის, არასამთავრობო ორგანიზაციებისა და მედიის წარმომადგენლებს სამი არასამთავრობო ორგანიზაციის - „სამართლიანი არჩევნების", საიას და საერთაშორისო გამჭვირვალობა-საქართველოს მიერ საარჩევნო გარემოს გაუმჯობესებისათვის შემუშავებული საკანონმდებლო რეკომენდაციები წარუდგინეს. სრულად... წყარო: ორგანიზაციის ვებგვერდი სოციალურ ქსელში