თბილისი. საერთაშორისო გამჭვირვალობა - საქართველო თვლის, რომ პრემიერმინისტრობის კანდიდატის განცხადებით სახელმწიფო აუდიტის სამსახური უნდა დაინტერესდეს. „აღნიშნული შემთხვევის სრულყოფილი შესწავლა უაღრესად მნიშვნელოვანია, ვინაიდან საქმე ეხება ქვეყნის უმაღლესი პოლიტიკური თანამდებობის მსურველ კანდიდატს, რომელსაც კარგი საჯარო მმართველობის უზრუნველყოფის საკითხში მთავარი როლი აკისრია. საქართველოს პრემიერმინისტრობის კანდიდატმა კიდევ ერთხელ უნდა განმარტოს, რა სახით მონაწილეობდა „ერთიანი ნაციონალური მოძრაობის” სასარგებლოდ შემოწირულობის განხორციელებაში. აუცილებელია, გაირკვეს, იყო თუ არა იგი ჩართული კანონსაწინააღმდეგო ქმედებებში", ნათქვამია ორგანიზაციის ვებგვერდზე. სრულად... წყარო: www.transparency.ge

თბილისი. საქართველოს სახალხო დამცველმა დღეს „ფემიციდის მონიტორინგის ანგარიში" წარმოადგინა. ანგარიშში ასახულია 2016 წელს მომხდარი ქალთა მკვლელობებისა და მკვლელობის მცდელობების ანალიზი, ქვეყნის მიერ ქალთა მიმართ ძალადობისგან დაცვისა და დახმარების კუთხით ნაკისრ ვალდებულებებთან მიმართებაში. ანგარიშის წარდგენას ესწრებოდნენ: საერთაშორისო და ადგილობრივი ექსპერტები, სახელმწიფო უწყებებისა და არასამთავრობო ორგანიზაციების წარმომადგენლები, სხვა დაინტერესებული პირები. შეხვედრის ბოლოს გაიმართა დისკუსია. ღონისძიება გაეროს ქალთა ორგანიზაციის ტექნიკური და ფინანსური მხარდაჭერით განხორციელდა. სრულად  წყარო: სახალხო დამცველის ვებგვერდი

თბილისი. „საერთაშორისო გამჭვირვალობა - საქართველომ” (TI) და „ადამიანის უფლებების სწავლებისა და მონიტორინგის ცენტრმა” (EMC) ერთობლივ კონფერენციაზე სახელწოდებით „დემოკრატიული რეფორმები უსაფრთხოების სექტორში” კვლევის შედეგები წარადგინეს. ინფორმაცია საქართველოს უსაფრთხოების სამსახურის რეფორმირების საჭიროებაზე მიუთითებს. სრულად... წყარო: www.transparency.ge

თბილისი. 14 ივნისს, ადამიანის უფლებათა ცენტრმა წარმოადგინა ანგარიში - „მსჯავრდებული, ბრალდებული და დაზარალებული ქალების სასამართლო მონიტორინგი". ანგარიში მომზადდა ადამიანის უფლებათა ცენტრის პროექტის - „სასამართლო მონიტორინგი ქალებისათვის" ფარგლებში, რომელიც ორგანიზაციამ ბულგარეთის განვითარების ფონდის ფინანსური მხარდაჭერით განახორციელა. სრულად... წყარო: ორგანიზაციის ვებგვერდი სოციალურ ქსელში

თბილისი. „საერთაშორისო გამჭვირვალობა - საქართველო" აქვეყნებს ვლოგს, სადაც იუსტიციის მინისტრის განცხადებებია გაანალიზებული.  თეა წულუკიანი: შინაგან საქმეთა სამინისტრომ ხორავას ქუჩაზე მომხდარი ტრაგედიის პირველივე დღიდანვე ძალიან მნიშვნელოვანი სამუშაო გასწია.  პასუხი: 2017 წლის დეკემბერში, შინაგან საქმეთა მინისტრი გიორგი გახარია აცხადებდა, რომ დანაშაულში მონაწილე ყველა ფიგურა გამოვლენილი და დაკავებული იყო. თუმცა ამის შემდეგ განვითარებულმა მოვლენებმა დაადასტურა, რომ საქმესთან შემხებლობაში მყოფი ყველა პირი გამოვლენილი არ იყო.  სრულად... წყარო: ორგანიზაციის ვებგვერდი სოციალურ ქსელში

თბილისი. 2018 წლის 12 ივნისს, ადამიანის უფლებათა დაცვის ეროვნულ სტრატეგიასა და ადამიანის უფლებათა სამთავრობო სამოქმედო გეგმის მონიტორინგზე მომუშავე საზოგადოებრივი ორგანიზაციები საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის წინაშე 2016-2017 წლების ადამიანის უფლებათა სამთავრობო სამოქმედო გეგმის შესრულების მონიტორინგის წინასწარ შედეგებს ზეპირი მოსმენის ფარგლებში წარადგენენ. „2014 წელს სახელმწიფოს მიერ ადამიანის უფლებათა დაცვის ეროვნულ სტრატეგიისა და ადამიანის უფლებათა სამთავრობო სამოქმედო გეგმების მიღება მნიშვნელოვანი წინგადადგმული ნაბიჯი იყო, ადამიანის უფლებებზე დაფუძნებული სახელმწიფო პოლიტიკის გატარებისთვის, ამ სფეროში სახელმწიფო უწყებების საქმიანობის უკეთესი კოორდინირებისა და მასზე სამთავრობო და საპარლამენტო ზედამხედველობის გაძლიერებისთვის. თუმცა, სამწუხაროდ, ამ წლების განმავლობაში ადამიანის უფლებათა სამთავრობო გეგმა მთავრობისთვის, ისევე როგორც პარლამენტისთვის არ გახდა ადამიანის უფლებების დაცვის ძირითადი დოკუმენტი და მონაწილეობითი და ანგარიშვალდებული პოლიტიკური პროცესი. ადამიანის უფლებების უწყებათაშორისი საბჭოს მაღალი წარმომადგენლობის და ფართო კომპეტენციის მიუხედავად, საბჭოს საქმიანობა წლების განმავლობაში მეტწილად ნომინალური იყო და თითქმის არ იკრიბებოდა. პროცესზე სუსტი და არაეფექტიანია საპარლამენტო ხედამხედველობის მექანიზმიც და სამოქმედო გეგმის შესრულების შეფასება სათანადოდ არ აისახება პარლამენტის მიერ მიღებულ დოკუმენტში", - ვკითხულობთ საზოგადოებრივი ორგანიზაციების მიერ გავრცელებულ ინფორმაციაში. სრულად  წყარო: emc.org.ge

თბილისი. ხორავას ქუჩაზე მომხდარი მკვლელობის გამოძიებასთან დაკავშირებით, საქართველოს სახალხო დამცველმა სპეციალური განცხადება გააკეთა. „სახალხო დამცველი საქმეს ორი მიმართულებით სწავლობს: ერთი - რამდენად ჩატარდა აუცილებელი საგამოძიებო მოქმედებები ან ჩატარებული საგამოძიებო მოქმედებები რამდენად საკმარისი იყო; მეორე - რამდენად არიან გამოკვეთილი საქმის მასალებში კონკრეტული პირები, რომელთა პასუხისმგებლობის იდენტიფიცირება შესაძლებელია. ჩვენს მიერ ამ ეტაპისთვის იდენტიფიცირებულია გარკვეული ფაქტები, რომელთა გარშემოც გვინდა საზოგადოებას მივაწოდოთ ინფორმაცია. საქმის შესწავლის შედეგად გაჩნდა კითხვები”, - აღნიშნავს სახალხო დამცველი, „აქვე გვსურს მივესალმოთ შინაგან საქმეთა სამინისტროს მიერ წარმოებულ აქტიურ საგამოძიებო პროცესს. ჩვენი დაკვირვებით პარალელურ რეჟიმში უამრავი საგამოძიებო მოქმედება ხორციელდება და ასევე გავრცელდა ინფორმაცია, რომ რამდენიმე პირს წარედგინა ბრალი. ვფიქრობთ, აღნიშნული პირებისთვის ბრალის წაყენება არსებული კითხვების ნაწილს მაინც გასცემს პასუხს. იმედს ვიტოვებთ, პარალელურ რეჟიმში შინაგან საქმეთა სამინისტროც გასცემს საქმეში არსებულ კითხვაზე პასუხს. უნდა აღვნიშნოთ, რომ საქმის მასალების სრულად გაცნობის შემდეგ, ჩვენი შეფასების ერთ-ერთი საგანი შინაგან საქმეთა სამინისტროს ფარგლებში 2018 წლის ივნისიდან წარმოებული გამოძიების ეფექტურობის შეფასება იქნება". სრულად  წყარო: სახალხო დამცველის ვებგვერდი

თბილისი. საქართველოს სახალხო დამცველი საქართველოს პარლამენტის წევრსა და სპეციალური საპარლამენტო კომისიის ხელმძღვანელს, სერგი კაპანაძესა და კომისიის წევრ ელენე ხოშტარიას შეხვდა. შეხვედრაზე განიხილეს არასრულწლოვანი დავით სარალიძის მკვლელობის გამოძიების მიმდინარეობა, საგამოძიებო კომისიის მუშაობის გეგმები და პრიორიტეტები, სახალხო დამცველისა და კომისიის თანამშრომლობისა და კოორდინაციის საკითხები. სრულად  წყარო: სახალხო დამცველის ვებგვერდი

თბილისი. „ინფორმაციის თავისუფლების განვითარების ინსტიტუტი" (IDFI) აქვეყნებს საქართველოს მთავრობის სარეზერვო ფონდის 2013-2017 წლების ხარჯვის მიმოხილვას. „ყოველწლიურად, საქართველოს სახელმწიფო ბიუჯეტის ფარგლებში, იქმნება სარეზერვო ფონდები, რომელიც გაუთვალისწინებელი ხარჯების დასაფარად გამოიყენება. თავისი არსიდან გამომდინარე, სარეზერვო ფონდების რესურსები ძირითადად ფორს-მაჟორულ სიტუაციებზე უნდა იხარჯებოდეს, მაგალითად, სტიქიური უბედურებები, ეპიდემიები, ეკოლოგიური და სხვა სახის კატასტროფები. თუმცა, საქართველოს მთავრობის სარეზერვო ფონდის შემთხვევაში, 2013-2017 წლებში, იგივე მოცულობის თანხა დაიხარჯა ღონისძიებების ჩატარებაზე, რაც ფორს-მაჟორულ ან გაუთვალისწინებელ სიტუაციებზე", - ნათქვამია დოკუმენტის შესავალში. სრულად  წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენტრი (EMC) გიორგი შარაბიძის სისხლის სამართლის საქმეს აფასებს, რომელიც დანაშაულს არ აღიარებს და მისი დაკავების ფარულ მოტივებზე მიუთითებს.  „27 თებერვლის განაჩენით გიორგი შარაბიძე ცნობილ იქნა დამნაშავედ ბრალად წარდგენილი დანაშაულებრივი ქმედების ჩადენისათვის და შეეფარდა 6 წლით თავისუფლების აღკვეთა. დაცვის მხარის მიერ განაჩენი გასაჩივრდა თბილისის სააპელაციო სასამართლოში. სასამართლო საჩივარი დასაშვებად ცნო და ამჟამად, თბილისის სააპელაციო სასამართლოში მიმდინარეობს საქმის განხილვა", ნათქვამია ორგანიზაციის ვებგვერდზე. სრულად...  წყარო: emc.org.ge

თბილისი. მედიის განვითარების ფონდმა გამოაქვეყნა 2017 წლის კვლევის შედეგები. იგი მოიცავს როგორც მედია საშუალებებზე, ასევე სხვა წყაროებზე – პოლიტიკურ კლასზე, სასულიერო პირებზე, საზოგადოებრივ ორგანიზაციებსა და საზოგადოების ცალკეულ წარმომადგენლებზე  დაკვირვების შედეგს. „...მონიტორინგის პერიოდში (2017 წლის 1 იანვარი – 31 დეკემბერი) სულ 1926 დისკრიმინაციული შინაარსის კომენტარი გამოვლინდა, რომელთაგან ყველაზე დიდი წილი ქსენოფობიაზე (49,1%) მოდის, შემდეგ ადგილზეა ჰომოფობია (38%), შედარებით ნაკლებად რელიგიური ნიშნით დისკრიმინაცია (7,3%), სიძულვილის ენა სხვადასხვა მოტივით (4,5%), რასიზმი (1%) და 1 შემთხვევაში (0,1%) გეოგრაფიული ნიშნით დისკრიმინაცია", ნათქვამია კვლევაში. სრულად... წყარო: mdfgeorgia.ge

აშშ-ს სახელმწიფო დეპარტამენტი, ყოველწიურად, სპეციალური ანგარიშით აფასებს მსოფლიოში რელიგიის თავისუფლების კუთხით არსებულ მდგომარეობას. „ადამიანის უფლებების სწავლებისა და მონიტორინგის ცენტრის" (EMC) მიერ გავრცელებული ინფორმაციის მიხედვით, საქართველოსთან დაკავშირებით, ანგარიშში ნათქვამია, რომ, კონსტიტუციით სახელმწიფოსა და ეკლესიის გამიჯვნის მუხედავად, კანონმდებლობა და სახელმწიფო პოლიტიკა საქართველოს მართლმადიდებელი ეკლესიის პრეფერენცირებას ახდენს და სხვა რელიგიური ორგანიზაციებისგან განსხვავებით პრივილეგიებს ანიჭებს. მაგალითისთვის, ანგარიში უთითებს პატრიარქის ექსკლუზიურ იმუნიტეტზე, დისკრიმინაციულ საგადასახადო კანონმდებლობაზე, სახელმწიფო საკუთრების გადაცემის დისკრიმინაციული წესზე, სახელმწიფოს მიერ საპატრიარქოს სკოლების დაფინანსებაზე. სრულად  წყარო: emc.org.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს უკანონო თევზჭერის სტატისტიკას.  „2010-2017 წლებში თევზჭერის წესების დარღვევის 4,688 შემთხვევა გამოვლინდა, საიდანაც 18% სისხლის სამართლის დანაშაულის ნიშნებს შეიცავდა". სრულად... წყარო: ორგანიზაციის ვებგვერდი სოციალურ ქსელში

თბილისი. საია მთავარ პროკურატურას მიმართავს და „თბილისის სახელმწიფო საკონცერტო დარბაზის” სახელმწიფო საკუთრებაში არსებული 100%-იანი წილი მართვის უფლებით გადაცემის თაობაზე გამოძიების დაწყებას მოითხოვს. საქმე ეხება 2007 წელს სსიპ სახელმწიფო ქონების ეროვნულ სააგენტოსა და შ.პ.ს. „ინტერნეიშენალ ივენთსს" შორის, შ.პ.ს. "თბილისის სახელმწიფო საკონცერტო დარბაზის” სახელმწიფო საკუთრებაში არსებული 100%-იანი წილი მართვის უფლებით გადაცემის თაობაზე ხელშეკრულების შეუსრულებლობას. „სახელმწიფო ქონების ეროვნული სააგენტოს 2018 წლის 16 მაისის კორესპონდენციის მიხედვით, შ.პ.ს. „ინტერნეიშენალ ივენთსს" არ წარმოუდგენია განსახორციელებელი ვალდებულებების შესრულების დამადასტურებელი დოკუმენტაცია. გარდა ამისა, გადაუხდელი მართვის საზღაური 2018 წლის 14 მაისის მდგომარეობით შეადგენს 950,140 ლარს. ხოლო, დაკისრებული პირგასამტეხლო ამავე პერიოდზე 1,606,394 ლარს და 10,102 აშშ დოლარს. დარიცხული დავალიანება მიუთითებს, რომ მმართველი პირი წლების განმავლობაში, 2010 წლიდან დღემდე, არ ახორციელებს ვალდებულების ჯეროვნად და კეთილსინდისიერად შესრულებას. არ იხდის მართვის საზღაურს და დაკისრებულ პირგასამტეხლოს მიუხედავად არაერთი გაფრთხილებისა. ამასთან არ ასრულებს ხელშეკრულებით ნაკისრ სხვა ვალდებულებებს", - ნათქვამია საია-ს მიერ გავრცელებულ ინფორმაციაში. სრულად  წყარო: ორგანიზაციის ვებგვერდი

თბილისი. „ადამიანის უფლებების სწავლებისა და მონიტორინგის ცენტრი" (EMC) აქვეყნებს ანგარიშს - „დისკრიმინაციისგან დაცვის უფლების განხორციელება სხვადასხვა ჯგუფისთვის საქართველოში". ანგარიში, რომელიც ფონდ „ღია საზოგადოება - საქართველოს" ხელშწყობით მოზადდა, აანალიზებს 2017 წელს, საქართველოში ცალკეულ ჯგუფთა თანასწორობის უფლების რეალიზებას და ასახავს დისკრიმინაციასთან ბრძოლის კუთხით არსებულს მდგომარეობას, ძირითად გამოწვევებს, სახელმწიფოს პოლიტიკას, კანონმდებლობასა და პრაქტიკას. დოკუმენტი, "კოალიცია თანასწორობისთვის" მიერ მომზადებული რიგით მეორე ანგარიშია, რომელიც მიზნად ისახავს ქვეყანაში ეფექტური ანტიდისკრიმინაციული პოლიტიკის გატარების ხელშეწყობას და თანასწორობის უზრუნველყოფას. სრულად  წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენტრი (EMC), მაჩალიკაშვილის საქმის საიდუმლო მასალებზე წვდომის პრობლემაზე მიუთითებს. „თ. მაჩალიკაშვილის სიცოცხლის ხელყოფის საქმეზე პროკურატურაში მიმდინარე გამოძიების ფარგლებში თემირლან მაჩალიკაშვილის ოჯახის ადვოკატებსა და დამოუკიდებელ ექსპერტებს ამ დრომდე არ აქვთ დაშვება საქმისთვის არსებითი მნიშვნელოვანის მქონე მტკიცებულებებზე, რომელიც საიდუმლო ინფორმაციად არის მიჩნეული... სისხლის სამართლის საქმეში სახელმწიფო საიდუმლოების მასალებზე წვდომის შეზღუდვის გამო პრობლემურია თბილისის პროკურატურის საგამოძიებო ნაწილის მიერ საქმეზე კომპლექსური ექსპერტიზის დანიშვნის საკითხიც", ნათქვამია ორგანიზაციის ვებგვერდზე. ორგანიზაცია მოუწოდებს სუს-ს, უზრუნველყოს საიდუმლო მასალებზე წვდომის შესაძლებლობა. სრულად...  წყარო: emc.org.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს თეატრების სპექტაკლებისა და მაყურებელთა სტატისტიკას. საქართველოს მასშტაბით, ყველა თეატრში ჩატარებული სპექტაკლების რიცხვი, 2016 წლის გარდა, ყოველწლიურად იზრდებოდა; 2015-2016 წლებში თბილისის შემდეგ ყველაზე მეტი სპექტაკლი იმერეთის რეგიონში ჩატარდა; სპექტაკლების მაყურებელთა რიცხვი ყოველწლიურად იზრდებოდა. ბოლო წლებში მაყურებელთა უმრავლესობა (63-65%) თბილისზე მოდიოდა. სრულად... წყარო: ორგანიზაციის ვებგვერდი სოციალურ ქსელში

თბილისი. 23-24 მაისს, საერთაშორისო გამჭვირვალობა - საქართველომ, იურიდიულ საკითხთა კომიტეტის აპარატის თანამშრომლებს საპარლამენტო კონტროლის თემაზე ტრენინგი ჩაუტარა. ტრენინგი, რომელსაც ჩვენი საპარლამენტო მდივანი, ლიკა საჯაია წარმართავდა, შემდეგ საკითხებს მოიცავდა: საპარლამენტო კონტროლის საკანონდებლო მექანიზმები და მათი პრაქტიკაში გამოყენება მე-8 და მე-9 მოწვევის პარლამენტების საქმიანობის ანალიზზე დაყრდნობით; საკონსტიტუციო ცვლილებები საპარლამენტო კონტროლის გაძლიერების მიმართულებით და პარლამენტის რეგლამენტში მათი ასახვა; კომიტეტების და მათი აპარატების როლი საპარლამენტო კონტროლის განხორციელების პროცესში; საზღვარგარეთის ქვეყნების საუკეთესო პრაქტიკა; სრულად... წყარო: ორგანიზაციის ვებგვერდი სოციალურ ქსელში

თბილისი. „საერთაშორისო გამჭვირვალობა - საქართველოს" (TI) განცხადებით, მარნეულის მუნიციპალიტეტი საჯარო ინფორმაციის პროაქტიურად გამოქვეყნების კანონით დადგენილ სტანდარტებს არ იცავს. „მარნეულის მუნიციპალიტეტი ერთ-ერთია იმ თვითმმართველ ერთეულებს შორის, რომელსაც საჯარო ინფორმაციის პროაქტიულად გამოქვეყნების წესი ამ დრომდე არ აქვს მიღებული, რითაც არღვევს ზოგადი ადმინისტრაციული კოდექსის მოთხოვნებს", - ვკითხულობთ TI-ის მიერ გამოქვეყნებულ ინფორმაციაში, - „ჩატარებულმა კვლევამ ცხადჰყო, რომ მარნეულის მუნიციპალიტეტი საჯარო ინფორმაციის უმეტეს ნაწილს ვებ-გვერდზე არ აქვეყნებს". სრულად  წყარო: ორგანიზაციის ვებგვერდი

თბილისი. 1 მაისიდან, „ადამიანის უფლებების სწავლებისა და მონიტორინგის ცენტრი" (EMC) პარტნიორ ორგანიზაციებთან, „ინფორმაციის თავისუფლების განვითარების ინსტიტუტთან" (IDFI) და „კავკასიის კვლევითი რესურსების ცენტრთან"(CRRC) ერთად ახორციელებს პროექტს „სასამართლო რეფორმის განხორციელების მხარდაჭერა”. „ევროკავშირის მიერ დაფინანსებული პროექტის მიზანია, მართლმსაჯულების სისტემის რეალური რეფორმირების ხელშეწყობა მონიტორინგის, მტკიცებულებებზე დაფუძნებული ადვოკატირების, ინდივიდუალური მოსამართლეების გაძლიერებისა და მათთან დიალოგის ხელშეწყობის გზით. პროექტი, ასევე მიზნად ისახავს საზოგადოებრივი ჯგუფების ჩართულობის გაზრდას მართლმსაჯულების სფეროში მიმდინარე რეფორმებში, მათი ცნობიერების ამაღლების და მობილიზაციის გზით", ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაციამ გამართა დისკუსია თემაზე - "2017 წლის საარჩევნო დავები − მიგნებები და გამოწვევები." დისკუსიაზე წარმოდგენილი იყო კვლევა − „საია-ს სტრატეგიული სამართალწარმოება და სხვა სუბიექტების (ადგილობრივი სადამკვირვებლო ორგანიზაციებისა და საარჩევნო სუბიექტების) მიერ წარმოებული საარჩევნო დავების დაკვირვება − 2017 წლის საარჩევნო დავების ანალიზი". კვლევა პროექტის − „საქართველოში კონკურენტული, სამართლიანი და ინკლუზიური საარჩევნო გარემოს ხელშეწყობა 2016-2018 საარჩევნო ციკლისთვის" ფარგლებში განხორციელდა და ამერიკის შეერთებული შტატების საერთაშორისო განვითარების სააგენტოს (USAID) ფინანსური მხარდაჭერით მიმდინარეობს. სრულად  წყარო: ორგანიზაციის ვებგვერდი

თბილისი. „საერთაშორისო გამჭვირვალობა - საქართველო" მიერ ჩატარებული კვლევის თანახმად, ლანჩხუთის მუნიციპალიტეტის ვებგვერდი გამჭვირვალობის სტანდარტებს არ აკმაყოფილებს. ორგანიზაცია მოუწოდებს ლანჩხუთის მუნიციპალიტეტს, შესაბამის დადგენილებაში შეიტანოს ცვლილებები და მოიყვანოს შესაბამისობაში საქართველოს მთავრობის N219 დადგენილებასთან, ასევე უზრუნველყოს ინფორმაციის სრულად ატვირთვა ოფიციალურ ვებ-გვერდზე. სრულად... წყარო: www.transparency.ge