თბილისი. „ყოველი მესამე მოქალაქე ფიქრობს, რომ ადგილობრივი თვიმმართველობის ორგანოები მის ინტერესებს არ გამოხატავენ", - ამ დასკვნას ორგანიზაცია „საერთშორისო გამჭვირვალობა - საქართველო" აქვეყნებს. გამოკითხვამ, რომელიც, ორგანიზაციის დაკვეთით, „კავკასიის კვლევითი რესურსების ცენტრმა” 2018 წლის მარტში განახორციელა, ცხადჰყო, რომ გამოკითხულთა 32% აზრით, ქალაქის მერი მათ ინტერესებს არ გამოხატავს, საკრებულოს შემთხვევაში კი, ეს მაჩვენებელი უფრო მეტია - 34%. შესაბამისად, მერების შემთხვევაში, გამოკითხულთა მხოლოდ 26% ეთანხმება მოსაზრებას, რომ მერი გამოხატავს მათ ინტერესებს, საკრებულოს შესახებ იმავე აზრს კი 22% იზიარებს. სრულად  წყარო: ორგანიზაციის ვებგვერდი

თბილისი. „საერთაშორისო გამჭვირვალობა - საქართველო” განაგრძობს მუნიციპალიტეტებში საჯარო ინფორმაციის პროაქტიული გამოქვეყნების არსებული პრაქტიკის შესწავლას. ამჯერად წარმოგიდგენთ ჩოხატაურის მუნიციპალიტეტის შედეგებს, რომლის მიხედვითაც, მუნიციპალიტეტის ვებ-გვერდზე (www.chokhatauri.ge) განთავსებული ინფორმაცია მუნიციპალიტეტის დადგენილებით ნაკისრი პროაქტიულად გამოსაქვეყნებელი ინფორმაციის ნუსხას არ შეესაბამება. სრულად  წყარო: ორგანიზაციის ვებგვერდი

თბილისი. „ადამიანის უფლებების სწავლებისა და მონიტორინგის ცენტრი" (EMC) და საქართველოს ახალგაზრდა იურისტთა ასოციაცია 12 მაისის მოვლენების სამართლებრივ შეფასებას მოამზადებენ. „ამ დრომდე, შინაგან საქმეთა სამინისტროს მხრიდან გაკეთებული განმარტებების მიუხედავად, საზოგადოებაში რჩება კითხვები სპეცრაზმისა და საპოლიციო ძალის გამოყენების დასაბუთებულობასა და თანაზომიერებაზე, კლუბ "ბასიანის” მიმდებარე ტერიტორიაზე სპონტანური აქციის მონაწილეთა მიმართ პოლიციის მიერ გამოყენებული ძალის და ათეულობით პირის ადმინისტრაციული წესით დაკავების კანონიერებაზე. 12 მაისის ღამის მოვლენები, საპოლიციო ღონისძიების მასშტაბების, მასობრივი დაკავებებისა და პოლიციის მხრიდან ძალის გამოყენების ფაქტების გათვალისწინებით, სათანადო დოკუმენტირებას და შეფასებას მოითხოვს. ამ მიზნით, „ადამიანის უფლებების სწავლებისა და მონიტორინტის ცენტრი (EMC)” და საქართველოს ახალგაზრდა იურისტთა ასოციაცია დეტალურად შეისწავლიან 12 მაისის ღამეს და მასთან კავშირში განვითარებულ მოვლენებს", - ვკითხულობთ გავრცელებულ განცხადებაში. სრულად  წყარო: emc.org.ge  

თბილისი. „ინფორმაციის თავისუფლების განვითარების ინსტიტუტმა" (IDFI) მოამზადა საინფორმაციო ბროშურა „საჯარო შესყიდვების კანონმდებლობისა და პრაქტიკის შეფასება". ბროშურაში საუბარია ორგანიზაციის მიმდინარე გლობალური ინიციატივის - „გამჭვირვალე საჯარო შესყიდვების რეიტინგი - სახელმწიფო შესყიდვების კანონმდებლობისა და აღსრულების პროცესის შეფასება" - მიზნებისა და დაგეგმილი აქტივობების შესახებ. სრულად წყარო: ორგანიზაციის ვებგვერდი

თბილისი. „საერთაშორისო გამჭვირვალობა-საქართველო" აქვეყნებს კვლევას: ქართული ნეონაციზმის ანატომია. ორგანიზაციის კვლევა მიზნად ისახავს იმ ნეონაცისტური ჯგუფებისა და მათთან დაკავშირებული ადამიანების იდენტიფიცირების მცდელობას, რომლებიც ბოლო პერიოდში ლიბერალური შეხედულებების მქონე ჯგუფების მიმართ ძალადობითა და აგრესიით გამოირჩევიან.  „ისინი ხშირ შემთხვევაში არაფორმალური გაერთიანებების წევრები არიან, ამიტომ სია, შესაძლოა, გაცილებით ვრცელი იყოს. მართალია, ნეონაცისტური ორგანიზაციების დაფინანსების პირდაპირი წყაროების იდენტიფიცირება ვერ ხდება, თუმცა, ცალკეული ლიდერები პირდაპირ უკავშირდებიან რუსეთის სახელმწიფოს ან ადგილობრივ პოლიტიკურ ორგანიზაციებს", ნათქვამია ორგანიზაციის ვებგვერდზე. სრულად...  წყარო: www.transparency.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს თბილისის ქუჩის ცხოველების სტატისტიკურ ანალიზს.  მის მიხედვით, თავშესაფარში ყველაზე მეტი ცხოველი 2016 წელს გადაიყვანეს, ცხოველთა მონიტორინგის სააგენტოს ბიუჯეტი 3.2 მილიონიდან 3.7-მდე მერყეობს. სრულად... წყარო: www.datalab.ge

თბილისი. ინფორმაციის თავისუფლების განვითარების ინსტიტუტის (IDFI) მიხედვით, საკონსტიტუციო სასამართლო პროაქტიული გამოქვეყნების სტანდარტს არ იცავს. „2018 წლის მარტში IDFI-მ გამოიკვლია საკონსტიტუციო სასამართლოს ვებგვერდზე განთავსებული საჯარო ინფორმაცია. სტატისტიკური მონაცემების თანახმად, დადგენილების მოთხოვნების დაცვით გამოქვეყნებულია მხოლოდ 7 ქვეტიპის საჯარო ინფორმაცია, 5- არასრულად, ხოლო საერთოდ არ არის გამოქვეყნებული - 25. IDFI მიიჩნევს, რომ ინფორმაციის საჯაროობის პრინციპის დასაცავად და საკონსტიტუციო სასამართლოს საქმიანობის მეტი გამჭვირვალობისათვის, აუცილებელია სასამართლომ შეასრულოს 2013 წლის 27 დეკემბრის დადგენილებით განსაზღვრული საჯარო ინფორმაციის პროაქტიული გამოქვეყნებისა და ელექტრონული ფორმით მოთხოვნის სტანდარტები. გარდა ამისა, ინფორმაციის საჯაროობის პრინციპის დასაცავად, მნიშვნელოვანია სასამართლომ ვებგვერდზე განათავსოს მაღალი საზოგადოებრივი ინტერესის მქონე ნებისმიერი ინფორმაცია", ნათქვამია ორგანიზაციის ვებგვერდზე. სრულად...  წყარო: idfi.ge

სამეგრელო. 13 მაისს, საქართველოს ახალგაზრდა იურისტთა ასოციაცია ზუგდიდის საკრებულოს შუალედურ არჩევნებს დააკვირდა.  „არჩევნები სულ სამ საარჩევნო უბანზე, ცაიშის თემის ადგილობრივ მაჟორიტარულ საარჩევნო ოლქში გაიმართა. უნდა აღინიშნოს, რომ არჩევნები მშვიდ ვითარებაში წარიმართა და  ამომრჩეველს არჩევანის თავისუფლად გაკეთების შესაძლებლობა ჰქონდა. კენჭისყრის დღეს საიას დამკვირვებლებმა სულ 6 საჩივარი წარადგინეს საარჩევნო ადმინისტრაციაში, რაც „ერთიანი ნაციონალური მოძრაობის" კომისიის წევრების მიერ კომისიის წევრის მოვალეობის შესრულებაზე უარის თქმას უკავშირდებოდა", ნათქვამია ორგანიზაციის ვებგვერდზე. სრულად... წყარო: gyla.ge

თბილისი. „საერთაშორისო გამჭვირვალობა - საქართველო" განაგრძობს თანამდებობის პირთა ქონებრივი დეკლარაციების შესწავლას. ამჯერად, ხონის, საჩხერისა და ჭიათურის მუნიციპალიტეტის იმ თანამდებობის პირების შესახებ არის ინფორმაცია მოწოდებული, რომლებმაც 2017-2018 წლებში არასრულად შეავსეს დეკლარაცია.  „შესწავლის შედეგად გამოიკვეთა, საჯარო სამსახურში ინტერესთა შეუთავსებლობისა და კორუფციის შესახებ კანონის მე-13 მუხლის მოთხოვნათა კიდევ ერთი დარღვევა, რომელიც ავალდებულებს საჯარო მოსამსახურეს სამსახურის ვადით გავლის სამართავად სხვას გადასცეს მის საკუთრებაში არსებული სამეწარმეო საქმიანობის სუბიექტის საწარმოს კაპიტალის წილები. ხონის მუნიციპალიტეტში საწარმოში არსებული წილები სამართავად არ გადაუცია 3, ხოლო ჭიათურაში - 3 თანამდებობის პირს", ნათქვამია ორგანიზაციის ვებგვერდზე. სრულად... წყარო: ორგანიზაციის ვებგვერდი სოციალურ ქსელში

თბილისი. „საერთაშორისო გამჭვირვალობა - საქართველო" აქვეყნებს საზოგადოებრივი აზრის კვლევის შედეგებს: კორუფცია, ნდობა ინსტიტუტების მიმართა და საჯარო პოლიტიკის საკითხები. ორგანიზაციის თქმით, განსაკუთრებულ აღნიშვნას იმსახურებს კვლევის ზოგიერთი შედეგი: გამოკითხულთა მხოლოდ 1% ამბობს, რომ ბოლო 12 თვის განმავლობაში მათ ან მათი ოჯახის წევრებს ქრთამი მოსთხოვეს სახელმწიფო მომსახურების სანაცლოდ; გამოკითხულთა 36% ფიქრობს, რომ საქართველოში გავრცელებულია საჯარო მოხელეთა მიერ თანამდებობის ბოროტად გამოყენება პირადი მიზნების მისაღწევად, ხოლო 16% ფიქრობს, რომ ასეთი რამ გავრცელებული არ არის... სრულად... წყარო: www.transparency.ge

თბილისი. საერთაშორისო გამჭვირვალობა - საქართველო თვლის, რომ საზოგადოებრივმა მაუწყებელმა თანამშრომელთა ხელფასების გამჭვირვალობა უნდა უზრუნველყოს. სამეურვეო საბჭოს წევრის, ნინია კაკაბაძის მიერ გადაცემების მთლიანი დაფინანსების და თანამშრომელთა ხელფასების შესახებ მონაცემების გამოთხოვას დიდი გამოხმაურება მოჰყვა. კაკაბაძეს მენეჯმენტისგან ინფორმაცია დღემდე არ მიუღია. გამჭვირვალობის განცხადებით კი „კანონმდებლობა პირდაპირ აძლევს სამეურვეო საბჭოს უფლებას,  არა თუ წვდომა ჰქონდეს თანამშროემელთა ანაზღაურებაზე, არამედ თავადვე დაამტკიცოსს საშტატო განრიგი, რომელიც დღემდე არ აქვს მიღებული მაუწყებელს, განსაზღვროს თანამშრომელთა სარგო, სახელფასო ფონდი, პრემიის ოდენობა და ა.შ." სრულად... წყარო: www.transparency.ge

თბილისი. 2 მაისს, საქართველოს ახალგაზრდა იურისტთა ასოციაციამ გამართა კვლევის პრეზენტაცია: „რა ღირს საზოგადოებრივი მაუწყებელი?". „კვლევაში წარმოდგენილია, რამდენად საჭიროებს საზოგადოებრივი მაუწყებელი დამატებით შემოსავლებს და როგორ განკარგავს სახელმწიფო ბიუჯეტიდან გამოყოფილ თანხებს, რამდენად ეფექტურად მუშაობს სამეურვეო საბჭო და როგორ იღებს გადაწყვეტილებებს საზოგადოებრივი მაუწყებლის ბიუჯეტში ცვლილებების შეტანის თაობაზე", ნათქვამია ორგანიზაციის ვებგვერდზე. სრულად... წყარო: gyla.ge

თბილისი. „ადამიანის უფლებების სწავლებისა და მონიტორინგის ცენტრი" (EMC) წარმოადგენს ანალიტიკურ დოკუმენტს „როგორ იზომება სასამართლოს დამოუკიდებლობის ხარისხი - გამამართლებელი განაჩენების სტატისტიკა". „წლების განმავლობაში, სასამართლოს დამოუკიდებლობის შეფასების ერთ-ერთ კრიტერიუმად სასამართლოში საქმეთა განხილვის სტატისტიკა გამოიყენებოდა. 2013 წლამდე, მედიისთვის დახურული სასამართლო პროცესების ფონზე, საქმეთა განხილვის მაჩვენებლები, ქმნიდა ზოგად წარმოდგენას რამდენად თავისუფალი იყო სასამართლო სისტემა ხელისუფლების სხვა შტოების გავლენებისგან. სასამართლოზე გავლენების შეფასებისას, განსაკუთრებული ყურადღება სისხლის სამართლის საქმეთა განხილვის მაჩვენებლებზე, მიღებულ გამამართლებელ და გამამტყუნებელ განაჩენებზე, მახვილდებოდა”, - ვკითხულობთ დოკუმენტში, - „მიუხედავად იმისა, რომ ცალკე აღებული გამამართლებელი/გამამტყუნებელი განაჩენების რიცხვი მართლმსაჯულების სისტემის შეფასებისთვის, არასაკმარის და არასანდო მონაცემს წარმოადგენს, უკიდურესად დაბალი გამამართლებელი განაჩენების სტატისტიკა, სისტემის სხვა გამოწვევებთან ერთად, თავისთავად ქმნიდა ავთენტურ სურათს სასამართლოს სისტემაზე". სრულად  წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაცია 2018 წლის 28 აპრილს ვანსა და ხონში მაჟორიტარული სისტემით გასამართ საქართველოს პარლამენტის შუალედური არჩევნების დაკვირვების შედეგებს აქვეყნებს. „კენჭისყრის პროცესი ძირითადად მშვიდ ვითარებაში წარიმართა, ადგილი არ ჰქონია ძალადობის შემთხვევებს. ინციდენტს ჰქონდა ადგილი ხონის #5 საარჩევნო უბანთან, როდესაც ერთმანეთს „ევროპული საქართველოსა" და „ქართული ოცნების" მხარდამჭერები დაუპირისპირდნენ. მნიშვნელოვანი დარღვევებით წარიმართა გადასატანი ყუთის სიაში ამომრჩევლების შეყვანის პროცესი. ვანის #53 საოლქო საარჩევნო კომისიის მიერ 2018 წლის 26 აპრილს მიღებული გადაწყვეტილებით, ვანის #53 საარჩევნო ოლქში შემავალ 31 საარჩევნო უბნიდან 25 საარჩევნო უბანზე გადასატანი ყუთის სიებში დამატებით შეიყვანეს დაახლოებით 300 ამომრჩეველი, რამაც საარჩევნო კანონმდებლობით 3%-იანი ზღვარის გადამეტება განაპირობა. 31 საარჩევნო უბნიდან 25 საარჩევნო უბანზე გადასატანი ყუთის სიებში ამომრჩევლების დამატებით შეყვანა გამონაკლისს აღარ წარმოადგენდა, რაც ბადებს ეჭვს გადასატანი ყუთის მეშვეობით ამომრჩეველთა ხმების მობილიზების შესახებ. აღნიშნულმა შემთხვევებმა დღის წესრიგში დააყენა საკანონმდებლო ცვლილებების აუცილებლობა", - ვკითხულობთ დოკუმენტში. სრულად  წყარო: ორგანიზაციის ვებგვერდი

თბილისი. 28 აპრილს, სამართლიანი არჩევნებისა და დემოკრატიის საერთაშორისო საზოგადოება პარლამენტის შუალედურ არჩევნებს ხონისა და ვანის #54-ე მაჟორიტარულ საარჩევნო ოლქში 25 საუბნო, 2 საოლქო საარჩევნო კომისიის დამკვირვებლისა და 2 მობილური ჯგუფის მეშვეობით აკვირდებოდა. არჩევნების დღეს, ცენტრალურ ოფისში ფუნქციონირებდა მონაცემთა ანალიზისა და ინციდენტების ცენტრები. „28 აპრილის შუალედურ არჩევნებზე გამოკვეთილ ტენდენციას წარმოადგენდა გადასატანი ყუთის საარჩევნო სიებში ამომრჩეველთა მაღალი პროცენტული მაჩვენებელი, რაც საარჩევნო უბნების უმრავლესობაზე უტოლდებოდა ან აღემატებოდა საარჩევნო კოდექსით დადგენილ 3%-იან ზღვარს. საარჩევნო კოდექსის თანახმად, იმ საარჩევნო უბნებთან დაკავშირებით, სადაც გადასატანი საარჩევნო ყუთის სიაში მყოფი ამომრჩეველი აღემატება საარჩევნო უბანზე ამომრჩეველთა ერთიან სიაში ამომრჩევლების 3 პროცენტს, აღნიშნული რაოდენობის შევსების შემდეგ გადასატანი ყუთის სიაში ამომრჩევლის დამატებით შეყვანის მიზანშეწონილობის შესახებ გადაწყვეტილებას იღებს შესაბამისი საოლქო საარჩევნო კომისია. აღნიშნულ საკითხზე, #53 ვანის საოლქო საარჩევნო კომისიის 26 აპრილის #13/2018 განკარგულება არ არის საკმარისად დასაბუთებული, რაც გადასატანი ყუთის სიაში ამომრჩეველთა შეყვანის მიზანშეწონილობას ეჭვქვეშ აყენებს”, ნათქვამია ორგანიზაციის ვებგვერდზე. სრულად... წყარო: www.isfed.ge

თბილისი. „სამართლიანი არჩევნებისა და დემოკრატიის საერთაშორისო საზოგადოება" (ISFED) 28 აპრილს ხონისა და ვანის მაჟორიტარულ ოლქში დანიშნული შუალედური საპარლამენტო არჩევნების წინასაარჩევნო პერიოდის შეფასებას აქვეყნებს. ორგანიზაციის დასკვნით, წინასაარჩევნო კამპანია მშვიდ ვითარებაში მიმდინარეობდა. არ დაფიქსირებულა საარჩევნო კანონმდებლობის მასიურიუ დარღვევებს, საარჩევნო ადმინისტრაციაში წინასაარჩევნო კამპანიასთან დაკავშირებით საჩივარი დაფიქსირებული არ არის. სრულად წყარო: ორგანიზაციის ვებგვერდი

თბილისი. საერთაშორისო გამჭვირვალობა - საქართველო აქვეყნებს 2017 წლის ანგარიშს. „2017 წელს ჩვენ ორი მნიშვნელოვანი პროცესის აქტიური მონაწილეები ვიყავით - ერთი კონსტიტუციაში ფუნდამენტურ ცვლილებებს, ხოლო მეორე სასამართლო სისტემასთან დაკავშირებულ გამოწვევებს უკავშირდებოდა", ნათქვამია ორგანიზაციის დოკუმენტში. სრულად... წყარო: www.transparency.ge

თბილისი. „საერთაშორისო გამჭვირვალობა - საქართველო" რეგულარულად აკვირდება საჯარო უწყებების მიერ განხორციელებულ შესყიდვებს. ორგანიზაციის ყურადღება მიიპყრო ფინანსთა სამინისტროს აკადემიის მიერ ჩატარებულმა ტენდერმა, რომელშიც მხოლოდ ერთმა სასტუმრომ მიიღო მონაწილეობა. აღმოჩნდა, რომ ტენდერი თავიდანვე არაგონივრული პირობებით იყო შეზღუდული. „ტენდერის მოთხოვნებში სასტუმროს ადგილმდებარეობის მითითება (ორთაჭალის მიმდებარე ტერიტორია, სასწავლო ცენტრიდან არაუმეტეს 10 წუთის სავალზე ტრანსპორტით) მნიშვნელოვნად ზღუდავს კონკურენციას. ამასთან, გაუგებარია, რა საჭიროა ის, რომ სასტუმროს ჰქონდეს შიდა პარკინგი და ერთ შენობაში განთავსებული დახურული აუზი, საუნა და სპა ცენტრი, რომლით სარგებლობა სტუმრებს 24 საათის განმავლობაში შეეძლებათ", ნათქვამია ორგანიზაციის ვებგვერდზე. სრულად... წყარო: www.transparency.ge

თბილისი. საქართველოს ახალგაზრდა იურისტთა ასოციაციის წარმომადგენლებმა შეხვედრა გამართეს თეთრიწყაროს რაიონის სოფელ კოდის დევნილთა დასახლების სათემო ცენტრში, 2008 წლის აგვისტოს ომის შედეგად დაზარალებულ პირებთან. შეხვედრა შეეხებოდა სისხლის სამართლის საერთაშორისო სასამართლოს მიერ ომის დროს ჩადენილი დანაშაულების გამოძიებას, რომელიც სასამართლოს პროკურორის ოფისმა 2 წლის წინ დაიწყო. ორგანიზაციის წარმომადგენლებმა ინდივიდუალურად გამოკითხეს დასახლებაში მცხოვრები დევნილები სპეციალურად შედგენილი კითხვარების მეშვეობით. აღნიშნული მიზნად ისახავს დევნილთა ამჟამინდელი საჭიროებებისა და პრობლემების გამოკვლევას და მიღებული ინფორმაციის საფუძველზე სპეციალური ანგარიშის მომზადებას, რომელშიც ომიდან 10 წლის შემდეგ დევნილთა არსებული მდგომარეობა იქნება ასახული. შეგროვებული ინფორმაცია ანალიტიკური დამუშავების შემდეგ მიეწოდება სისხლის სამართლის საერთაშორისო სასამართლოს სხვადასხვა ორგანოებსა და დაზარალებულთა ნდობის ფონდს. სრულად  წყარო: ორგანიზაციის ვებგვერდი

თბილისი. „პარტიებისთვის განკუთვნილი სახელმწიფო დაფინანსების განაწილების წესი კვლავ გაუარესდა", - ასეთ დასკვნას აკეთებენ „საერთაშორისო გამჭვირვალობა - საქართველო", „სამართლიანი არჩევნებისა და დემოკრატიის საერთაშორისო საზოგადოება", საქართველოს ახალგაზრდა იურისტთა ასოციაცია და, საკითხთან დაკავშირებით, შესაბამის განცხადებას ავრცელებენ. „18 აპრილს საქართველოს პარლამენტმა 77 ხმით ერთის წინააღმდეგ მიიღო „მოქალაქეთა პოლიტიკური გაერთიანების შესახებ" კანონის ცვლილებები, რომელთა მიხედვითაც პარტიას კვალიფიციურის სტატუსი მიენიჭება და შესაბამისად მიიღებს საბიუჯეტო დაფინანსებას თუ მის მიერ წარდგენილი მაჟორიტარული სისტემით არჩეული პარლამენტის წევრ(ებ)ი შექმნის საპარლამენტო ფრაქციას, მიუხედავად იმისა გადალახავს თუ არა ეს პარტია არჩევნებში 3%-იან ზღვარს. მიგვაჩნია, რომ ეს ცვლილება ყოვლად გაუმართლებელია, ვინაიდან იგი გარდა იმისა, რომ მხოლოდ ერთ პარტიაზე არის შეგნებულად მორგებული, ასევე, მნიშვნელოვნად ამცირებს სახელმწიფო დაფინანსების მისაღებად საჭირო სტანდარტს და შეზღუდული სახელმწიფო რესურსის არამიზანშეწონილად გამოყენების რისკებს ზრდის", - ნათქვამია განცხადებაში. სრულად  წყარო: ორგანიზაციის ვებგვერდი

თბილისი. არასამთავრობო ორგანიზაციები თვლიან, რომ დეპუტატ არველაძის ინიციატივა ეწინააღმდეგება საქართველოს ანტიკორუფციული პოლიტიკის მიზნებსა და ქვეყნის საერთაშორისო ვალდებულებებს. „შემოთავაზებული პროექტი მნიშვნელოვნად ასუსტებს დღეს არსებულ პრევენციისა და სანქცირების სტანდარტს, ზრდის ინტერესთა კონფლიქტის შესაძლებლობას და ამცირებს თანამდებობის პირების მიმართ საზოგადოებრივი კონტროლის განხორციელების შესაძლებლობას. განსაკუთრებით შემაშფოთებელია წინადადება, რომ გაუქმდეს ჯარიმა თანამდებობის პირის ქონებრივ დეკლარაციაში საჯარო სამსახურის ბიუროს მიერ დარღვევის აღმოჩენის შემთხვევაში, რადგანაც ასეთი ცვლილება არსებითად აზრს დაუკარგავს ქონებრივი დეკლარაციების მონიტორინგის სისტემას, რომელიც გასულ წელს ამოქმედდა და ყველაზე მნიშვნელოვანი ანტიკორუფციული რეფორმა იყო უკანასკნელ წლებში. აღსანიშნავია, რომ მონიტორინგის სისტემის ეფექტიანი ფუნქციონირების უზრუნველყოფა საქართველოს ხელისუფლების ვალდებულებაა საქართველო-ევროკავშირის 2017-2020 წლების ასოცირების დღის წესრიგის თანახმად", ნათქვამია ერთობლივ განცხადებაში. სრულად... წყარო: www.transparency.ge

თბილისი. „საერთაშორისო გამჭვირვალობა - საქართველო” (TI) სამტრედიის, ვანისა და ტყიბულის მუნიციპალიტეტების იმ თანამდებობის პირების ქონებრივი დეკლარაციების შესწავლის შედეგებს წარმოადგენს. კვლევის ფარგლებში, ორგანიზაციამ შეისწავლა 90-მდე ქონებრივი დეკლარაცია. შედეგად, TI სამტრედიის მუნიციპალიტეტში დეკლარაციის არასრულად შევსების 7, ვანის მუნიციპალიტეტში - 1, ხოლო ტყიბულის მუნიციპალიტეტში - 3 ფაქტს ასახელებს. ორგანიზაცია, ასევე, სამტრედიის მუნიციპალიტეტში თანამდებობასთან შეუთავსებელი საქმიანობის - 2 და ტყიბულში 1 შემთხვევაზე მიუთითებს. სრულად  წყარო: ორგანიზაციის ვებგვერდი