თბილისი. ინფორმაციის თავისუფლების განვითარების ინსტიტუტი (IDFI) და ესტონეთის ელექტრონული მმართველობის აკადემია (eGA) ახორციელებენ ერთობლივ პროექტს - „ელექტრონული მმართველობის ახალი ინიციატივები საქართველოში ღია მმართველობის პარტნიორობის ვალდებულებების შესასრულებლად". „ამ პროექტის ფარგლებში IDFI და eGA ერთობლივად ეხმარებიან საქართველოს სხვადასხვა დაწესებულებებს იმ ვალდებულებების შესრულებაში, რომელიც მათ OGP-ს სამოქმედო გეგმის ფარგლებში აიღეს. კერძოდ, პროექტის ერთ-ერთი ამოცანაა ბათუმის, ახალციხის და ქუთაისის მუნიციპალიტეტების მხარდაჭერა მონაწილეობითი ბიუჯეტირების ელექტრონული მოდულის შექმნაში. აღნიშნული მექანიზმების დანერგვისთვის IDFI-მ მოამზადა შეფასება ბათუმის, ქუთაისის და ახალციხის მუნიციპალიტეტების საქმიანობაში მოქალაქეთა მონაწილეობის ფორმების და ხარისხის შესახებ", ნათქვამია ორგანიზაციის ვებ-გვერდზე. სრულად... წყარო: idfi.ge

თბილისი. პროექტის „საქართველოს ეროვნული პლატფორმის შესაძლებლობებისა და ეფექტურობის გაზრდა" ფარგლებში, გაიმართა ორი ორდღიანი ტრენინგი თემაზე: „მონიტორინგი და პოლიტიკის კეთების პროცესი" და „სიღრმისეული ადვოკატირების დაგეგმვა". „ტრენინგის ფარგლებში, მონაწილეები გაეცნენ საჯარო პოლიტიკის განხორციელების მონიტორინგის მეთოდოლოგიისა და სამოქმედო გეგმის შემუშავების, ადვოკატირებისა და ლობირების მნიშვნელოვან საკითხებს. ტრენინგი განხორციელდა ევროკავშირის ფინანსური მხარდაჭერით", ნათქვამია ორგანიზაციის ვებ-გვერდზე.  სრულად... წყარო: ორგანიზაციის ვებ-გვერდი სოციალურ ქსელში

თბილისი. საერთაშორისო გამჭვირვალობა - საქართველო აქვეყნებს ინფოგრაფიკას ოთარ ფარცხალაძის შემოსავლებზე. იხილეთ „რა შემოსავლების და უძრავი ქონების პატრონი იყო ოთარ ფარცხალაძე და მისი ოჯახი მაშინ, როდესაც ის მთავარი პროკურორის თანამდებობას იკავებდა და რა ქონებას ფლობს ის ახლა?" სრულად... წყარო: www.scribd.com

თბილისი. საქართველოს პარლამენტმა ღია პარლამენტის რიგით მეორე, 2017-2018 წლების სამოქმედო გეგმა დაამტკიცა. „გეგმის მიზანია პარლამენტის საქმიანობის ანგარიშვალდებულების და გამჭვირვალობის გაზრდა და საკანონმდებლო პროცესებში მოსახლეობის მაქსიმალური ჩართულობის უზრუნველყოფა. გეგმა 25 ვალდებულებას მოიცავს, რომელთა განხორციელებას პარლამენტი 2018 წლის ბლომდე გეგმავს. სამოქმედო გეგმა მომზადდა ევროკავშირის მიერ დაფინანსებული და გაეროს განვითარების პროგრამის მიერ IDFI-ისთან თანამშრომლობით განხორციელებული პროექტის - „საპარლამენტო დემოკრატიის სისტემის გაძლიერება საქართველოში" ფარგლებში", ნათქვამია ინფორმაციის თავისუფლების განვითარების ინსტიტუტის ვებ-გვერდზე. სრულად... წყარო: parliament.ge

  თბილისი. ომბუდსმენმა აპრილის თვის საინფორმაციო ბიულეტენი წარმოადგინა. „ბიულეტენში იხილავთ ინფორმაციას საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტში სახალხო დამცველის რეკომენდაციების განხილვის შესახებ. გაეცნობით ფემიციდის შემთხვევებზე ზედამხედველობის ახალ სისტემას, რაც სასამართლოს გადაწყვეტილებათა დეტალურ ანალიზს, სამართალდამცავ უწყებებში მიმდინარე გამოძიებისა და სისხლისსამართლებრივი დევნის შესახებ არსებული ინფორმაციის და სტატისტიკური მონაცემების შესწავლას გულისხმობს", ნათქვამია ომბუდსმენის ვებ-გვერდზე. სრულად... წყარო: www.ombudsman.ge  

თბილისი. იუსტიციის უმაღლესი საბჭო მონიტორინგის მეხუთე ანგარიშს აქვეყნებს.  „საანგარიშო პერიოდში საბჭოს საქმიანობაში გამოვლინდა არაერთი ხარვეზი. მოსამართლეთა შერჩევა/დანიშვნის პროცესი არ იყო გამჭვირვალე, წარმოშობდა ეჭვებს აღნიშნულ საკითხებზე მიღებული გადაწყვეტილებების ობიექტურობისა და ნეიტრალობის თვალსაზრისით; საბჭოში კვლავ არ არის პლურალისტური გარემო;  მოსამართლეთა ანგარიშვალდებულების სისტემა კვლავ არაეფექტურია და შეიცავს საფრთხეებს მოსამართლის დამოუკიდებლობისთვის," ნათქვამია ანგარიშში.  სრულად... წყარო: www.transparency.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ინფორმაციას ახალი ვებ-გვერდის შესახებ. „სულ მალე საქართველოს მთავრობა ელექტრონული პეტიციების პორტალის (ichange.gov.ge) ამოქმედებას გეგმავს. პორტალის გამოყენებით ნებისმიერ მოქალაქეს შეეძლება ელექტრონული პეტიციის შექმნა, ხელმოწერების მოგროვება და, საკმარისი ხელმოწერის მოგროვების შემთხვევაში, მისი მთავრობისთვის გაგზავნა. რაც ყველაზე მნიშვნელოვანია, საქართველოს მთავრობას უჩნდება ვალდებულება უპასუხოს პეტიციას და ეს პასუხი საჯაროდ ხელმისაწვდომი გახადოს პეტიციების ელექტრონულ პორტალზე", ნათქვამია ორგანიზაციის ვებ-გვერდზე. სრულად... წყარო: idfi.ge

თბილისი. არასამთავრობო ორგანიზაციები პარტიების დაფინანსების რეგულაციის დახვეწის საჭიროებაზე ერთობლივ განცხადებას ავრცელებენ. „საარჩევნო საკითხებზე მომუშავე საზოგადოებრივ ორგანიზაციებს მიგვაჩნია, რომ ქართული პოლიტიკური კონტექსტის გათვალისწინებით საარჩევნო ბლოკის ინსტიტუტი უნდა შენარჩუნდეს. აქედან გამომდინარე,   მუშაობა დავიწყეთ პოლიტიკური პარტიების დაფინანსების კუთხით არსებული ძირითადი ხარვეზების აღმოსაფხვრელად. რეკომენდაციებზე მუშაობისას  მიზნად არ დაგვისახავს პარტიების დაფინანსების  ძირეული ცვლილება, არამედ მთავარი აქცენტი გავაკეთეთ არსებულ ბუნდოვანებათა აღმოფხვრასა და ყველაზე მწვავე  პრობლემების გადაჭრაზე. ვფიქრობთ, რომ მოცემული რეკომენდაციების გათვალისწინების შემთხვევაში საარჩევნო ბლოკების გაუქმების მიზეზი აღარ იარსებებს", ნათქვამია ერთობლივ განცხადებაში.  სრულად... წყარო: www.transparency.ge

თბილისი. „ახალგაზრდა ადვოკატები" ყურადღებით აკვირდება კონსტიტუციის გადასინჯვის პროცესს და სახელმწიფო საკონსტიტუციო კომისიას სარეკომენდაციო წინადადებათა პაკეტით მიმართავს.  „სახელმწიფო საკონსტიტუციო კომისიამ კონსტიტუციის გადასინჯვის პროცესში ყურადღება უნდა დაუთმოს საზოგადოებრივი ჩართულობას, რაც გულისხმობს ახალ დოკუმენტში საერთო, სახალხო ნების ასახვას. იმისათვის, რომ კონსტიტუციის ახალი პროექტი იყოს მაღალი ლეგიტიმაციის მქონე, საჭიროა ყველა საზოგადოებრივი ჯგუფის მოსაზრების გათვალისწინება, როგორებიც არიან: პოლიტიკური პარტიები, არასამთავრობო და საერთაშორისო ორგანიზაციები, უმცირესობები და საკითხზე მომუშავე ექსპერტები. ამასთან, გადაწყვეტილების მიღების პროცესში მნიშვნელოვანია გათვალისწინებული იყოს დასავლურ დემოკრატიებში არსებული პრაქტიკა და გამოცდილება", ნათქვამია ორგანიზაცის ვებ-გვერდზე.  სრულად... წყარო: barristers.ge

თბილისი. ომბუდსმენი აქვეყნებს ანგარიშს 2016 წელს ქვეყანაში ადამიანის უფლებათა და თავისუფლებათა დაცვის მდგომარეობის შესახებ. „ანგარიში მიმოიხილავს ადამიანის უფლებათა ფართო სპექტრს, განსაკუთრებულ ყურადღებას ამახვილებს საანგარიშო პერიოდში გამოვლენილ დადებით და უარყოფით ტენდენციებზე. ამასთან, თავს უყრის სახალხო დამცველის მიერ ხელისუფლების სხვადასხვა შტოს მისამართით შემუშავებულ ძირითად, უმნიშვნელოვანეს რეკომენდაციებს", ნათქვამია ომბუდსმენის ვებ-გვერდზე.  სრულად... წყარო: www.ombudsman.ge

თბილისი. მედიის და კომუნიკაციის საგანმანათლებლო და კვლევითი ცენტრი აქვეყნებს შრომის ბაზარზე ჟურნალისტების დასაქმების კვლევის შედეგებს.  „საქართველოში ჟურნალისტად დასაქმებისას ყველაზე მეტად მნიშვნელობას ანიჭებენ  „წერის უნარს". გამოკითხული დამსაქმებლების 88 % მიიჩნევს, რომ ეს უნარი მნიშვნელოვანი ან ძალიან მნიშვნელოვანია.  76 %  მიიჩნევს, რომ დედლაინზე მუშაობის უნარი არის მნიშვნელოვანი. იგივე პროცენტული რაოდენობა მნიშვნელოვნად  მიიჩნევს ახალ ტექნოლოგიებზე მუშაობის უნარს,  80 % მიიჩნევს, რომ ახალი ამბების/თემების მოძიების და დამუშავების უნარი არის მნიშვნელოვანი. დამსაქმებელთა 52 %-ისთვის მნიშვნელოვანია კონკრეტული სფეროს სიღრმისეული ცოდნა. კვლევამ არ გამოკვეთა რომელიმე უნივერსიტეტის კურსდამთავრებულის ჟურნალისტად დასაქმების უპირატესობა", ნათქვამია ორგანიზაციის ვებ-გვერდზე.  სრულად... წყარო: mcerc.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს კვლევას: „სახელმწიფო შესყიდვების შესახებ საქართველოს კანონმდებლობის აღსრულების შეფასება". „ამ კვლევის მიზანია საქართველოს სახელმწიფო შესყიდვების სისტემის ანალიზი, კანონმდებლობის აღსრულებასთან დაკავშირებული პრობლემების გამოვლენა, მისი ფუნქციონირების შეფასება, მისი სუსტი და ძლიერი მხარეების გამოვლენა და პრობლემების გადასაწყვეტად რეკომენდაციების წარდგენა. კვლევის შედეგების მიხედვით ირკვევა, რომ სახელმწიფო შესყიდვების შესახებ საქართველოს კანონი მეტწილად დამაკმაყოფილებელია და არ აქვს მნიშვნელოვანი პრობლემები. კანონმდებლობა უზრუნველყოფს შესყიდვების სისტემის ეფექტიანობასა და სამართლიანობას. ელექტრონული პლატფორმა აძლიერებს კანონმდებლობის არადისკრიმინაციულ ხასიათს და უზრუნველყოფს ზოგად გამჭვირვალობას", ნათქვამია ორგანიზაციის ვებ-გვერდზე. სრულად... წყარო: idfi.ge

თბილისი. როგორც საზოგადოებისთვის ცნობილია, 2017 წლის 11 მაისს, იუსტიციის უმაღლესმა საბჭომ თანამდებობაზე 64 მოსამართლე დანიშნა, მათგან 5 მოსამართლე (უზენაესი და საკონსტიტუციო სასამართლოების ყოფილი მოსამართლეები) დაინიშნა უვადოდ, გამოსაცდელი პერიოდის გარეშე. „კოალიციის შეფასებით, საბჭოს მიერ მოსამართლეთა დანიშვნის მანკიერი პრაქტიკა შედეგად იწვევს სასამართლო სისტემის „ჩაკეტვას" ხანგრძლივი ვადით, რაც გამორიცხავს სისტემის განახლებას. ეს მათ შორის განპირობებულია პოლიტიკური ხელისუფლების მხრიდან გაჭიანურებული და არასაკმარისი რეფორმების განხორციელებით, მიღებული კანონების აღსრულებაში არსებული ხარვეზებით, რაც შედეგად იწვევს სისტემის შიგნით გავლენიანი ჯგუფების კიდევ უფრო გაძლიერებას და სასამართლო სისტემის გაჯანსაღების მრავალი წლით გადავადებას", ნათქვამია ორგანიზაციის ვებ-გვერდზე. სრულად... წყარო: gyla.ge

თბილისი. ინფორმაციის თავისუფლების განვითარების ინსტიტუტი (IDFI) აფასებს 2015-2016 წლების ანტიკორუფციული გეგმის ღონისძიებების შესრულებას. „ანტიკორუფციული სამოქმედო გეგმის შეფასება ხდება მონიტორინგის ჩარჩოს შესაბამისად, სადაც გაწერილია თითოეული პასუხისმგებელი უწყების ღონისძიებები და ფასდება შემდეგი სამი სტატუსით: „სრულად შესრულდა", „უმეტესად შესრულდა", „ნაწილობრივ შესრულდა", „არ შესრულდა". IDFI-ის მიერ მონიტორინგის პროცესში გამოვლენილ ხარვეზებს შორისაა: პასუხისმგებელი უწყებების მიერ მონიტორინგის მიზნებისთვის მოწოდებული ინფორმაცია ხშირად ზოგადი იყო, არ ჩანდა ღონისძიებასა და პროგრესს შორის კავშირი, რაც ართულებდა მის შეფასებას; ღონისძიებებს თან არ ერთვოდა შეფასებისთვის საჭირო დოკუმენტაცია; შეუსრულებელ ღონისძიებებში არ იყო მითითებული მიზეზები და შესრულების სავარაუდო დრო; 2016 წლის მონიტორინგი განხორციელდა არა წელიწადში ორჯერ, როგორც მეთოდოლოგიითაა განსაზღვრული, არამედ ერთხელ მთელი წლისათვის. ეს პროცესი ახალი სამოქმედო გეგმის შემუშავებასთან ერთად მიმდინარეობდა, რამაც გაართულა პროცესი; ღონისძიებების შეფასებისას დარღვეული იყო ერთიანი სტანდარტი; ღონისძიებების შესრულების სტატუსი, რიგ შემთხვევებში არ შეესაბამებოდა პროგრესის აღწერას”, ნათქვამია ორგანიზაციის ვებ-გვერდზე. სრულად... წყარო: idfi.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ინფორმაციას ახალ ვებ-გვერდზე www.tpp-rating.org. მისი მიზანია აღმოსავლეთ პარტნიორობის ქვეყნებში სახელმწიფო შესყიდვების შესახებ კანონმდებლობის შეფასება და რეიტინგის წარმოდგენა. „ქვეყნების შესადარებლად ვებგვერდი იყენებს მარტივ, ინტერაქტიულ ვიზუალიზაციებს. თითოეული ქვეყნის შემთხვევაში ასევე შესაძლებელია შესყიდვების კანონმდებლობისა და მათი აღსრულების შესახებ ექსპერტული შეფასებისა და რეკომენდაციების გაცნობა" აცხადებს ლექსანდრე ქევხიშვილი/IDFI. სრულად... წყარო: ორგანიზაციის ვებ-გვერდი სოციალურ ქსელში

თბილისი. არასამთავრობო ორგანიზაციები განცხადებას ავრცელებენ ლაშა თორდიაზე თავდასხმასთან დაკავშირებით. „ხელმომწერი ორგანიზაციები აღშფოთებას გამოვხატავთ საქართველოს გენერალურ აუდიტორ ლაშა თორდიაზე მომხდარ თავდასხმასთან დაკავშირებით. იმის გათვალისწინებით, რომ საქმე ეხება კონსტიტუციური ორგანოს ხელმძღვანელზე თავდასხმას და მასში სავარაუდოდ ფიგურირებს ყოფილი მთავარი პროკურორი ოთარ ფიცხალაძე, რომლის არაფორმალურ გავლენებზეც სამართალდამცავ უწყებებში საზოგადოებაში არსებობს კითხვები, მნიშვნელოვანია, საქმის შესწავლა განახორციელოს საქართველოს პარლამენტის საგამოძიებო კომისიამ. სხვა შემთხვევაში მიმდინარე გამოძიებას არ ექნება სანდოობა საზოგადოების თვალში”, ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. ამერიკის ეროვნულ დემოკრატიული ინსტიტუტი საზოგადოების აზრის კვლევის უახლეს შედეგებს აქვეყნებს. კვლევა 2017 წლის აპრილში ჩატარდა. „2016 წლის ნოემბრის შემდგომ ევროკავშირის მხარდაჭერა 71%–დან 80%–მდე გაიზარდა", ნათქვამია ორგანიზაციის გვერდზე სოციალურ ქსელში. კვლევის შედეგების მიხედვით ევროკავშირის და ნატოს მხარდაჭერა შედარებით დაბალია უფროსი ასაკის ადამიანებში და ეთნიკური უმცირესობების დასახლებებში. კვლევა... წყარო: აშშ–ის ეროვნულ დემოკრატიული ინსტიტუტი

თბილისი. ოთხმა არასამთავრობო ორგანიზაციამ ვენეციის კომისიისთვის სახელმწიფო საკონსტიტუციო კომისიის ერთობლივი შეფასება გამოაქვეყნა. „ერთობლივი შეფასების დოკუმენტის მიზანია, არასამთავრობოებმა ვენეციის კომისიას წარუდგინონ საკონსტიტუციო კომისიის სამუშაო პროცესისა და ფორმატის დეტალური ანალიზი. ასევე, დოკუმენტში გამოთქმულია მოსაზრებები კონსტიტუციის პროექტით გათვალისწინებულ რამდენიმე ყველაზე მნიშვნელოვან საკითხთან დაკავშირებით. ესენია საპარლამენტო საარჩევნო სისტემა, პრეზიდენტის არჩევის წესი და ქორწინების შესახებ ჩანაწერი", ნათქვამია ერთობლივ განცხადებაში. სრულად... წყარო: www.isfed.ge

თბილისი. აღმოსავლეთ პარტნიორობის სამოქალაქო საზოგადოების ფორუმის საქართველოს ეროვნული პლატფორმის წევრი ორგანიზაციები საქართველოს პარლამენტს მიმართავენ. „წარმოდგენილი პროექტით უქმდება შერეული საარჩევნო სისტემა და პარლამენტი აირჩევა პროპორციული საარჩევნო სისტემის საფუძველზე, რაც ნამდვილად მისასალმებელი გადაწყვეტილებაა. თუმცა, მიუხედავად ამისა, სამწუხაროდ, საპარლამენტო მანდატების განაწილების ახალი წესი ვერ უზრუნველყოფს პარლამენტში პოლიტიკური პარტიების პროპორციულ წარმომადგენლობასა და მდგრადი მრავალპარტიული სისტემის დამკვიდრებას. უფრო მეტიც, მიგვაჩნია, რომ წარმოდგენილი წესით ირღვევა სამართლიანი არჩევნების ძირითადი - თანასწორობის პრინციპი. ყოველივე ზემოთ აღნიშნულიდან გამომდინარე, საქართველოს ეროვნული პლატფორმის წევრი ორგანიზაციები მოგმართავთ, რომ გაითვალისწინოთ შემდეგი წინადადებები: პარლამენტის მხოლოდ პროპორციული წესით დაკომპლექტების შენარჩუნების პირობით, მანდატების განაწილების წესი შესაბამისობაში იქნეს მოყვანილი სამართლიანი არჩევნების პრინციპებთან და გამოყენებული იქნეს გაუნაწილებელი მანდატების პროპორციული განაწილების წესი და საარჩევნო ზღურბლი შემცირდეს 3 პროცენტამდე”, ნათქვამია განცხადებაში. სრულად... წყარო: idfi.ge

თბილისი. ორგანიზაცია „ახალგაზრდა ადვოკატები" პროკურატურას ბიზნესმენ რამაზ ახვლედიანის ლისის ტბის დათმობის საქმეზე სწრაფი და ეფექტური საგამოძიებო მოქმედებების ჩატარებისთვის მიმართავს. არჩილ კაიკაციშვილის განცხადებით, რამაზ ახვლედიანმა იძულებით დაწერა განცხადება, ლისის ტბის სახელმწიფოსთვის დათმობის თაობაზე. „საქმის ფაქტობრივი და სამართლებრივი გარემოებებიდან გამომდინარე, გამოძიება უნდა დაჩქარდეს და რამაზ ახვლედიანი დაზარალებულად იქნეს ცნობილი. იმავდროულად, დადგეს კონკრეტული თანამდებობის პირთა სამართლებრივი პასუხისმგებლობის საკითხი, რომლებმაც მოახდინეს რამაზ ახვლედიანის იძულება ქონების დათმობის მიზნით", ნათქვამია ორგანიზაციის ვებ-გვერდზე. სრულად... წყარო: barristers.ge

იმერეთი. დღეს, ქუთაისში კონსტიტუციის საერთო სახალხო განხილვა დაიწყო. „საორგანიზაციო კომისია გასვლით სხდომებს 11 დღის განმავლობაში ამბროლაურში, ბათუმში, ოზურგეთში, ზუგდიდში, ახალციხეში, გორში, თელავში, მცხეთაში და რუსთავში გეგმავს. საკონსტიტუციო ცვლილებების საყოველთაო განხილვა 15 მაისს თბილისში დასრულდება. ნებისმიერ დაინტერესებულ მოქალაქეს, რომელსაც არ აქვს შესაძლებლობა დაესწროს კონსტიტუციის საერთო სახალხო განხილვას, შესაძლებლობა აქვს გამოხატოს თავისი პოზიცია თუ მოსაზრება საქართველოს პარლამენტის ვებგვერდზე განთავსებულ კონსტიტუციაში ცვლილების შეტანის კანონპროექტზე", ნათქვამია ინფორმაციის თავისუფლების განვითარების ინსტიტუტის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. ახალგაზრდა იურისტთა ასოციაცია (საია) აქვეყნებს იურისტ ირმა პავლიაშვილის ბლოგპოსტს: „გაუნაწილებელი მანდატები გამარჯვებულს ანუ სტაბილურობის სახელით..." „მართალია, პროპორციულ სისტემაზე გადასვლას წლებია ადვოკატირებას ვუწევთ, როგორც არასამთავრობო ორგანიზაციების წარმომადგენლები, ასევე ოპოზიციური პარტიები, თუმცა შემოთავაზებული ვერსია კრიტიკას ვერ უძლებს, კერძოდ: პარლამენტის წევრებს ავირჩევთ ერთიანი პროპორციული დახურული სიით, 5%-იანი ბარიერით, საარჩევნო ბლოკების შექმნის უფლების გარეშე და გაუნაწილებელი მანდატებით, რომელიც თქვენ სასურველ პარტიას მიეცით, მაგრამ მან ბარიერი ვერ გადალახა და უკლებლივ ყველა წილად პირველ ადგილზე გასულ პარტიას ხვდა. მაღალია ალბათობა იმისა, რომ 5%-იანი ბარიერისა და ბლოკების აკრძალვით, მივიღოთ ის რეალური მოცემულობა როდესაც პარტიები ვერ გადალახავენ ბარიერს და გაუნაწილებელი მანდატები ერთ პირველ ადგილეზე გასულ პარტიაზე გადანაწილდება. შესაბამისად, ჩვენს კითხვაზე, თუ რა იცვლება შემოთავაზებული ვარიანტით, პასუხი ერთმნიშვნელოვანია - არაფერი!", ნათქვამია ბლოგპოსტში. სრულად... წყარო: gyla.ge