თბილისი. „საერთაშორისო გამჭვირვალობა - საქართველომ” შეისწავლა გარდაბნის მუნიციპალიტეტის სოფელ თელეთში მდებარე 13 850 კვადრატული მეტრი მიწის ნაკვეთების პრივატიზების პროცესი და მიიჩნევს, რომ ამ შემთხვევაში კორუფციის ნიშნები იკვეთება. ორგანიზაციის მიერ მომზადებულ შეჯამებაში ნათქვამია, რომ „სახელმწიფო ქონების ეროვნული სააგენტოსა და ადგილობრივი თვითმმართველობის ქმედებების შედეგად, სახელმწიფო ქონების განკარგვის პროცესში არათანაბარი გარემო შეიქმნა მისი შეძენით დაინტერესებული პირებისთვის. შესაბამისად, მოვუწოდებთ სამართალდამცავ ორგანოებს, დაინტერესდნენ აღნიშნული შემთხვევით და სრულად და ობიექტურად გამოიძიონ ის". სრულად წყარო: ორგანიზაციის ვებგვერდი

გურია. ჩოხატაურის ზრდასრულთა განათლების ცენტრში ვებ პორტალ www.guria.ge -ს პრეზენტაცია ჩატარდა. პორტალის მიზანი საჯარო ინფორმაციაზე ხელმისაწვდომობის გაზრდაა. ღონისძიების მონაწილეებმა გაიგეს ვებგვერდზე მუშაობის პრინციპები, გზები, რომლის საშუალებითაც შესაძლებელია მოსახლეობის ინფორმირება თვითმმართველობების საკითხების შესახებ. პროექტს - „თვითმმართველობის ეფექტურობის გაძლიერება მოსახლეობის ინფორმირების ახალი მეთოდების გამოყენებით", ოზურგეთის „ახალგაზრდა მეცნიერთა კლუბი" და გურიის ახალგაზრდული რესურსცენტრი, UNDP-ის ფინანსური მხარდაჭერით ახორციელებენ. სრულად წყარო: ორგანიზაციის ოფიციალური ფეისბუქგვერდი

თბილისი. კვლევის მიზანი იყო 2014, 2015 და 2016 წლებში სააგენტოში დასაქმებულთა ანაზღაურების, სხვადასხვა რელიგიური კონფესიის წარმომადგენლებთან სააგენტოს ურთიერთობების ხარისხის შესწავლა და სხვა საკითხები. კვლევის თანახმად, რელიგიის საკითხთა სახელმწიფო სააგენტო საქართველოს მთავრობისა და საქართველოს პრემიერ-მინისტრისათვის რელიგიის სფეროში საინფორმაციო, კვლევით, სამეცნიერო-საგანმანათლებლო და სარეკომენდაციო საქმიანობას ახორციელებს. სააგენტოს ჰყავს 24 თანამშრომელი. სააგენტო 2017 წელს სახელმწიფო ბიუჯეტიდან დაფინანსდა 5 330 000 ლარით, 2016 წელს - 5 600 000 ლარით, 2015 წელს - 4 200 000 ლარით, ხოლო 2014 წელს - 2 322 200 ლარით. სრულად წყარო: ორგანიზაციის ვებგვერდი

თბილისი. 15 ივნისს, ინფორმაციის თავისუფლების განვითარების ინსტიტუტის (IDFI) ორგანიზებით გაიმართა სამუშაო შეხვედრა ონლაინ კონტენტის დაბლოკვის, გაფილტვრისა და მოხსნის რეგულაციების შესახებ. „დისკუსიის მონაწილეებმა წარადგინეს რეკომენდაციები ისეთ საკითხებთან დაკავშირებით, როგორიცაა: პორნოგრაფიული, ძალადობის შემცველი და შეურაცხმყოფელი პროდუქციის რეგულირება, ასევე, კერძო სექტორის უფლებამოსილება დაუშვებელ პროდუქციასთან მიმართებაში", ნათქვამია ორგანიზაციის ვებ-გვერდზე. სრულად... წყარო: idfi.ge

თბილისი. ორგანიზაცია „ახალგაზრდა ადვოკატები" საქართველოს კომუნიკაციების ეროვნულ კომისიაში შრომითი ანაზღაურების საკითხთან დაკავშირებული კვლევის შედეგებს აქვეყნებს. კვლევის მიხედვით, მარეგულირებელი კომისია, საქართველოში კვლავ ყველაზე მდიდარი სახელმწიფო ორგანოა. 2017 წლის მდგომარეობით, კომუნიკაციების ეროვნული კომისაში, წინა წლებთან შედარებით, საგრძნობლად გაიზარდა შრომითი ანაზღაურების ოდენობა. ორგანიზაციამ ინფორმაცია დაამუშავა 2017 წლის აპრილის თვის მდგომარეობით, რომლის მიხედვითაც, კომისიის თავმჯდომარის ყოველთვიურ ხელფასს შეადგენს 16,640 ლარი, ხოლო კომისიის წევრების ყოველთვიური ანაზრაურებაა - 15,810 ლარი. 2014 წლის მდგომარეობით, კომისიის თავმჯდომარის ყოველთვიურ ანაზღაურებას წარმოადგენდა 13,312.00 ლარი, ხოლო კომისიის წევრების მიერ ყოველთვიური შრომითი ანაზღაურება გახლდათ 12.648.00 ლარი. სრულად წყარო: ორგანიზაციის ვებგვერდი

თბილისი. „საერთაშორისო გამჭვირვალობა - საქართველომ" შეისწავლა გარდაბნის მუნიციპალიტეტის სოფელ თელეთში მდებარე 13 850 კვ.მ მიწის ნაკვეთების პრივატიზების პროცესი და მიიჩნევს, რომ ამ შემთხვევაში კორუფციის ნიშნები იკვეთება. „კერძოდ, სახელმწიფო ქონების ეროვნული სააგენტოსა და ადგილობრივი თვითმმართველობის ქმედებების შედეგად, სახელმწიფო ქონების განკარგვის პროცესში არათანაბარი გარემო შეიქმნა მისი შეძენით დაინტერესებული პირებისთვის. შესაბამისად, მოვუწოდებთ სამართალდამცავ ორგანოებს, დაინტერესდნენ აღნიშნული შემთხვევით და სრულად და ობიექტურად გამოიძიონ ის", ნათქვამია ორგანიზაციის განცხადებაში. სრულად... წყარო: www.transparency.ge

თბილისი. მსოფლიო ბანკის მიხედვით, 2009-2015 წლებში საქართველოში მთლიანი შიდა პროდუქტი 4 მილიარდამდე გაიზარდა. თუმცა, აღნიშნული ზრდის მიუხედავად, კავკასიის კვლევითი რესურსების ცენტრის ბარომეტრის მონაცემების მიხედვით, მოსახლეობის ნაწილი, რომელთაც ყოველკვირეულად საკვების შესაძენად თანხა არ ჰყოფნის, 2011-დან 2015 წლამდე არ შემცირებულა. ბლოგი გვაჩვენებს მონაცემებს შორის განსხვავებებს დასახლების ტიპისა და შინამეურნეობის შემოსავლის მიხედვით. მონაცემები გვაჩვენებს, რომ საქართველოს მოსახლეობის დიდ ნაწილს უჭირს საკუთარი და ოჯახის პირველადი საჭიროებების დაკმაყოფილება და უმრავლესობას პერიოდულად საკვების საყიდლად საკმარისი თანხაც არ აქვს", ნათქვამია ორგანიზაციის ვებ-გვერდზე. სრულად... წყარო: crrc.ge

თბილისი. მედიის განვითარების ფონდი (MDF) კვლევა „კრემლის გავლენის ინდექსი-2017". „რუსული მედიის საზოგადოებრივ აზრზე გავლენას, ექსპერტთა უმრავლესობის აზრით, „ნაცნობი და შეჩვეული რეალიები" განაპირობებს. მომხმარებელი აცნობიერებს, რომ რუსული მედია შეიძლება სანდო არ იყოს, მაგრამ მის მიერ შემოთავაზებული ნარატივი, საზოგადოებისთვის ნაცნობი და პოპულარულია. ექსპერტთა აზრით, ამ მხრივ გაცილებით პრობლემატურია ქართულენოვანი მედია, განსაკუთრებით კი ტაბლოიდური გამოცემები. რომ არა ბაზარზე დეკლარირებულად პროდასავლური სატელევიზიო არხის, ყველაზე რეიტინგული რუსთავი 2-ის არსებობა, რომლის წინააღმდეგ საკუთრებასთან დაკავშირებით სასამართლო დავას ადგილობრივი და საერთაშორისო დამკვირვებლები პოლიტიკურად მოტივირებულად მიიჩნევენ, ვითარება გაცილებით მძიმე იქნებოდა", ნათქვამია ორგანიზაციის ვებ-გვერდზე. სრულად... წყარო: www.media.ge

იმერეთი. ახალგაზრდა იურისტთა ასოციაციის წევრებმა პროექტის - „კანონის უზენაესობის მხარდაჭერა საქართველოში" ფარგლებში, ხონში შეხვედრა გამართეს. საიას ქუთაისის ფილიალის პროექტების დირექტორი და ორგანიზაციის ადვოკატი მუნიციპალიტეტის გამგებელს, სამსახურების ხელმძღვანელებს შეხვდნენ და ხონში მცხოვრები ეკომიგრანტების პრობლემების შესახებ ისაუბრეს. წყარო: ორგანიზაციის ოფიციალური ფეისბუქგვერდი

თბილისი. პარლამენტის გენდერული თანასწორობის საბჭომ, 2017 წლის სამოქმედო გეგმა და საქმიანობის 6 თვის ანგარიში წარმოადგინა. „საბჭოს წევრებს, ისე როგორც დამსწრე საზოგადოებას, არასამთავრობო ორგანიზაციებს საბჭოს საქმიანობის 6 თვის ანგარიში წარმოვუდგინეთ. ჩვენ ამ პერიოდში გვქონდა რამდენიმე მნიშვნელოვანი საკანონმდებლო ცვლილება. მუშაობა დავიწყეთ ისეთი ახალი მიმართულებით, როგორიც არის ბიუჯეტის გენდერული ანალიზი და ამის შესახებ გენდერული თანასწორობის საბჭოს მივაწოდეთ ინფორმაცია. ასევე გვქონდა ძალიან საინტერესო მოხსენებები პროკურატურის და შინაგან საქმეთა სამინისტროს წარმომადგენლებისგან ოჯახში ძალადობის და ქალთა მიმართ ძალადობის, ასევე გენდერულად მოტივირებული მკვლელობების გამოძიების შესახებ", ნათქვამია ორგანიზაციის ვებ-გვერდზე. სრულად... წყარო: ginsc.net

თბილისი. „მმართველობითი სისტემების განვითარების ცენტრმა" კვლევა ჩაატარა - „მოქალაქეთა მონაწილეობა ადგილობრივი თვითმმართველობის განხორციელებაში - მონიტორინგი და რეკომენდაციები". „კვლევა მოიცავს ადგილობრივი თვითმმართველობის განხორციელებაში მოქალაქეთა მონაწილეობასთან დაკავშირებული მუნიციპალური აქტების, არსებული პრაქტიკის ანალიზსა და ადგილობრივი თვითმმართველობის კოდექსში განსახორციელებელი ცვლილებების პროექტს. ავტორები ამბობენ, რომ პრობლემები გამოვლინდა დასახლების საერთო კრებების ორგანიზებასა და მის მიერ გადაწყვეტილების მიღების პროცესში", ნათქვამია ფონდ „ღია საზოგადოება საქართველოს" ვებ-გვერდზე. სრულად... წყარო: www.osgf.ge

თბილისი. საქართველოს პარლამენტმა გადასახადების გაზრდის და ახლის შემოღების პროცესში მოსახლეობის ჩართულობაზე შესაძლოა უარი თქვას. „ვფიქრობთ, რომ გადასახადების გაზრდასთან დაკავშირებულ პროცესში მოსახლეობის ჩართულობა მთავრობის და პარლამენტის მხრიდან განსაკუთრებულ ანგარიშვალდებულებაზე მიუთითებს. მოქალაქეებს უნდა შეუნარჩუნდეთ არსებული უფლება - მიიღონ გადაწყვეტილება გადასახადის ახალი სახის შემოღებისა თუ ზედა ზღვრის გაზრდის შესახებ, და შესაბამისად უნდა გამოირიცხოს მთავრობის მიერ ამ საკითხზე გადაწყვეტილების ერთპიროვნულად მიღების შესაძლებლობა", ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. „ადამიანის უფლებების სწავლებისა და მონიტორინგის ცენტრმა" (EMC) 2017 წლის სამი გახმაურებული სისხლის სამართლის საქმის (შოთა პაკელიანის, დავით ხარშილაძის, მიხეილ თათარიშვილის საქმეები) სამართლებრივი ანალიზის შედეგები გამოაქვეყნა. სამივე საქმე ნარკოტიკული ნივთიერების უკანონოდ შეძენა-შენახვის ფაქტებზე დაწყებულ გამოძიებას შეეხება. კვლევის მიზანს ამ საქმეებში შესაძლო პროცესუალური დარღვევების გამოკვეთა და კანონმდებლობასა თუ პრაქტიკაში მათი მაპროვოცირებელი სისტემური მიზეზების აღმოჩენა წარმოადგენდა. სრულად... წყარო: emc.org.ge

თბილისი. 13 ივნისს, სასტუმროში „რუმს თბილისი", კვლევის „ქალები პოლიტიკურ პარტიებში: მითების დეკონსტრუქცია" ანგარიშის პრეზენტაცია გაიმართა. „კვლევის თანახმად, საქართველოში არსებულ პოლიტიკურ პარტიებში კაცების პრივილეგირებული მდგომარეობა ქალთა შედარებით დაბალი მონაწილეობის მთავარი მიზეზია. სოციალური მითები ქალების არასაკმარისი განათლების, კონფლიქტების შიშისა და დაბალი კომპეტენციის შესახებ ზღუდავს მათი დაწინაურების შესაძლებლობას შიდაპარტიულ იერარქიაში", ნათქვამია ორგანიზაციის ვებ-გვერდზე. სრულად... წყარო: sapari.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ინფოგრაფიკას საჯარო სამსახურში რეორგანიზაციის შედეგებზე. „ბოლო რამდენიმე თვის განმავლობაში სხვადასხვა საჯარო დაწესებულებაში აქტიურად მიმდინარეობდა სამსახურთა რეორგანიზაციის პროცესი, რომელსაც უმეტეს შემთხვევაში თან ახლდა შტატების შემცირება. ამ პროცესის შეფასების მიზნით, EMC-იმ გამოითხოვა ინფორმაცია 15 სამინისტროდან და მის დაქვემდებარებაში არსებული უწყებებიდან. აგრეთვე, საქართველოს პარლამენტის, მთავრობის ადმინისტრაციისა და პრეზიდენტის ადმინისტრაციიდან. თუმცა, საჯარო ინფორმაციის მიწოდების საკითხი რეაგირების გარეშე დატოვა საქართველოს იუსტიციის სამინისტრომ და არასრული ინფორმაცია გასცა შინაგან საქმეთა სამინისტრომ. კულტურისა და ძეგლთა დაცვის სამინისტროს მხრიდან მოწოდებული პასუხი კი არ მოიცავდა ინფორმაციას სამინისტროს სისტემაში შემავალი იურიდიული პირების თაობაზე", ნათქვამია ორგანიზაციის ვებ-გვერდზე. სრულად... წყარო: emc.org.ge

თბილისი. „კოალიცია დამოუკიდებელი და გამჭვირვალე მართლმსაჯულებისთვის" ეხმიანება საქართველოს პროკურატურაში გამოძიების დეპარტამენტის შექმნის შესახებ წარმოდგენილ კანონპროექტს. კოალიცია თვლის, რომ „იგი ვერ პასუხობს დამოუკიდებლობისა და გამჭვირვალობის მინიმალურ მოთხოვნებს, რაც ცალსახად მიანიშნებს ხელისუფლების პოლიტიკურ ნებაზე - არ განახორციელოს რეალური რეფორმა". სრულად... წყარო: gyla.ge

თბილისი. 8 ივნისს, სახალხო დამცველმა „კონფლიქტით დაზარალებული მოსახლეობის უფლებრივი მდგომარეობის შესახებ" სპეციალური ანგარიში წარადგინა. ომბუდსმენმა პრეზენტაციის გახსნაზე გამყოფი ხაზის სოფლებსა და ოკუპირებულ ტერიტორიებზე შექმნილი სოციალური მდგომარეობა და უსაფრთხოების საკითხები მიმოიხილა, ასევე წარმოადგინა კონფლიქტით დაზარალებული მოსახლეობის უფლებრივი მდგომაროების გაუმჯობესებისკენ მიმართული რეკომენდაციები. სრულად... წყარო: www.ombudsman.ge

თბილისი. ოთხმა არასამთავრობო ორგანიზაციამ ვენეციის კომისიისთვის სახელმწიფო საკონსტიტუციო კომისიის ერთობლივი შეფასება გამოაქვეყნა. „ერთობლივი შეფასების დოკუმენტის მიზანია, არასამთავრობოებმა ვენეციის კომისიას წარუდგინონ საკონსტიტუციო კომისიის სამუშაო პროცესისა და ფორმატის დეტალური ანალიზი. ასევე, დოკუმენტში გამოთქმულია მოსაზრებები კონსტიტუციის პროექტით გათვალისწინებულ რამდენიმე ყველაზე მნიშვნელოვან საკითხთან დაკავშირებით. ესენია საპარლამენტო საარჩევნო სისტემა, პრეზიდენტის არჩევის წესი და ქორწინების შესახებ ჩანაწერი. არასამთავრობო ორგანიზაციებისთვის განსაკუთრებით პრობლემურია საარჩევნო სისტემა, კონკრეტულად კი გაუნაწილებელი მანდატების განაწილების წესი. კონსტიტუციის პროექტი ითვალისწინებს არჩევნებში პირველ ადგილზე გასული პარტიისთვის ულიმიტო ბონუსის შემოღებას, რომლის მიხედვითაც ყველა გაუნაწილებელი მანდატი ერთ პარტიას ერგება. საარჩევნო სისტემის ეს ასპექტი უსამართლოა და მნიშვნელოვნად აკნინებს მაჟორიტარული სისტემის გაუქმებით მიღებულ პოზიტიურ შედეგს", ნათქვამია განცხადებაში. სრულად... წყარო: gyla.ge

თბილისი. საერთაშორისო გამჭვირვალობა - საქართველო აქვეყნებს კვლევის შედეგებს: „მუნიციპალური ფინანსები და ქონება საჩუქრად ეპარქიებს - 2013-2017 წლების მონაცემები იმერეთში". მოპოვებული ინფორმაციის თანახმად „იმერეთის თორმეტივე მუნიციპალიტეტმა ფინანსური დახმარება მხოლოდ საქართველოს მართლმადიდებელ ავტოკეფალურ ეკლესიას გაუწია". სრულად... წყარო: www.transparency.ge

თბილისი. საქართველოს ახალგაზრდა იურისტთა ასოციაცია სამოქალაქო საზოგადოების სხვა წარმომადგენლებთან ერთად, აქტიურად აკვირდებოდა „რუსთავი 2”-ის წილებზე სასამართლოში მიმდინარე დავას. „მოცემულ დავაში მოსარჩელე ითხოვდა წილების დაბრუნებას, რაც მოიაზრებს თავდაპირველი გარიგების ბათილად ცნობას. ასეთ შემთხვევაში, მტკიცების ტვირთი ეკისრება მოსარჩელეს, რადგან ზოგადად, მხარეთა მიერ ხელმოწერილი გარიგების არსებობისას მოქმედებს აღნიშნულ დოკუმენტში (ხელშეკრულებაში) მხარეთა მიერ გამოხატული ნების ნამდვილობის პრეზუმფცია. საწინააღმდეგოს დადასტურება კი, იმ მხარეს ეკისრება, რომელიც გარიგების ბათილობას ითხოვს. შესაბამისად, იმ შემთხვევაშიც, თუ ჩაითვლება, რომ მოპასუხემ არაკვალიფიციურად წარადგინა შესაგებელი ან საერთოდ არ წარადგინა, ეს იძულების გზით მოსარჩელის საკუთრების უფლების ხელყოფის დასადასტურებლად არ არის საკმარისი და მისი გაქარწყლების მტკიცების ტვირთიც ერთმნიშვნელოვნად მოპასუხე მხარეს არ შეიძლება დაეკისროს", ნათქვამია ორგანიზაციის ვებ-გვერდზე. სრულად... წყარო: gyla.ge

თბილისი. საერთაშორისო გამჭვირვალობა - საქართველო აქვეყნებს კვლევის შედეგებს აჭარის მუნიციპალიტეტში მოქალაქეთა ჩართულობის მექანიზმების ფუნქციონირებაზე. „წინამდებარე კვლევამ აჩვენა, რომ მიუხედავად მოქალაქეთა ჩართულობის მექანიზმების საკანონმდებლო დონეზე არსებობისა, მოქალაქეთა ჩართულობა აჭარის ადგილობრივი თვითმმართველობის საქმიანობაში არის არასაკმარისი. „საერთაშორისო გამჭვირვალობა-საქართველოს” პოზიციით, ადგილობრივი თვითმმართველობის ორგანოთა საქმიანობაში მოქალაქეთა ჩართულობის თვალსაზრისით ორი მნიშვნელოვანი პრობლემა დგას: მოქალაქეეებს, ხშირ შემთხვევაში, არ აქვთ საკმარისი ინფორმაცია ჩართულობის მექანიზმებსა და შესაძლებლობზე. გარდა ამისა, არსებული მექანიზმები არ იძლევიან ეფექტური ჩართულობისა თუ მოსახლეობის მიერ გამოვლენილი პრობლემის გადაწყვეტის გარანტიას”, ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. საერთაშორისო გამჭვირვალობა - საქართველო აქვეყნებს ვიდეო ბლოგს: „როგორ იმართება სასამართლო სისტემა?" „სასამართლო სისტემაში მთავარ პრობლემას კლანური მმართველობა და სისტემის ჩაკეტილობა წარმოადგენს. რეფორმის პროცესი ცხადყოფს, რომ ხელისუფლებამ უარი თქვა ძირეული ცვლილებების განხორციელებაზე და დღეს ის სისტემის სამართავად მოსამართლეთა გავლენიან ჯგუფებთან ერთად აქტიურად იყენებს სასამართლოს კონტროლის ბერკეტებს. ამის დასტურია ხარვეზიანი და გაჭიანურებული მართლმსაჯულების რეფორმები, რომლებსაც სასამართლო სისტემის გაჯანსაღება ვერ მოჰყვა და პირიქით, მოსამართლეთა დომინანტი ჯგუფის გაძლიერებით სასამრთლო სისტემის კიდევ უფრო ჩაკეტვა გამოიწვია", ნათქვამია ვლოგში. სრულად... წყარო: ორგანიზაციის ვებ-გვერდი სოციალურ ქსელში