თბილისი. 2 მაისს, ჩატარდა ეთნიკური უმცირესობების წარმომადგენელი ახალგაზრდებისათვის ხარისხიანი განათლების ხელმისაწვდომობის კუთხით არსებული საჭიროებების კვლევა. „დღეს ეთნიკური უმცირესობების წარმომადგენელი მოსწავლეები და მათი ქართულენოვანი თანატოლები არ სარგებლობენ ხარისხიან განათლებაზე თანაბარი ხელმისაწვდომობით. საქართველოს სტატისტიკის ეროვნული სამსახურის მონაცემებით, 2015-2016 სასწავლო წლის დასაწყისისათვის 12.441 მოსწავლემ მიატოვა სწავლა. განსაკუთრებით მაღალია სწავლის მიტოვების მაჩვენებელი უმცირესობებით კომპაქტურად დასახლებულ ქვემო ქართლსა და სამცხე ჯავახეთში. ხშირია სწავლის მიტოვება მუშაობის დაწყების მიზეზით. მაღალი კლასების მოსწავლე გოგონები სწავლას თავს ანებებენ გათხოვების შემდეგ. კვლევებით დასტურდება, რომ სკოლის მიტოვების პრობლემა შეიძლება თაობებზე ვრცელდებოდეს", ნათქვამია ორგანიზაციის ვებ-გვერდზე. კვლევაზე დაყრდნობით შემუშავდა პოლიტიკის დოკუმენტები ადგილობრივ და ცენტრალურ დონეზე ბავშვთა უფლებების დაცვის გაძლიერებისათვის. სრულად... წყარო: www.osgf.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს საკონსტიტუციო კომისიის მუშაობისა და კონსტიტუციური ცვლილებების პროექტის შეფასებას. „მიუხედავად იმისა, რომ მოქმედი რედაქციის ნორმების უმეტესობა ტექნიკურად თუ შინაარსობრივად გადაიხედა, შეიძლება ითქვას, რომ მმართველი პოლიტიკური გუნდისთვის პრიორიტეტულ მიმართულებას მაინც პრეზიდენტის არჩევის წესისა და მისი უფლებამოსილებების შემცირება წარმოადგენდა, რაც საკონსტიტუციო კომისიის თავმჯდომარისა და საპარლამენტო უმრავლესობის წევრების მხრიდან მმართველობის საპარლამენტო მოდელის დახვეწის მოტივით მართლდებოდა. რაც შეეხება ზოგადად პოლიტიკური ხელისუფლებისა და მმართველობის მოდელთან დაკავშირებულ საკითხებს, შეიძლება ითქვას, რომ ამ მიმართულებებით კომისიის მიერ მიღებული გადაწყვეტილებები ხელს არ უწყობს პლურალისტული პოლიტიკური გარემოს შექმნას და უფრო მეტად მორგებულია არჩევნებში გამარჯვებული პოლიტიკური ძალის ინტერესებსა და ძალაუფლების კონსოლიდაციაზე, მათ შორის, განსაკუთრებით ხაზგასასმელია საარჩევნო სისტემის ის მოდელი, რომელიც ვერ უზრუნველყოფს მანდატების სამართლიან განაწილებას", ნათქვამია ორგანიზაციის ვებ-გვერდზე. სრულად... წყარო: emc.org.ge

თბილისი. 2 მაისს, ომბუდსმენმა კონფერენცია გამართა თემაზე – ანტიდისკრიმინაციული კანონის მოქმედების 3 წელი: მიღწევები, გამოწვევები და სამომავლო პერსპექტივები. „კონფერენციის გახსნაზე საქართველოს სახალხო დამცველმა განაცხადა, რომ ანტიდისკრიმინაციული კანონმდებლობის მიღება საქართველოში ადამიანის უფლებების, კერძოდ კი თანასწორობის უფლების დაცვისთვის ქმედითი ნაბიჯი იყო. მისი თქმით, მნიშვნელოვანი მიღწევაა, რომ კანონი ვრცელდება როგორც საჯარო, ასევე კერძო პირებზე და კრძალვას ნებისმიერი დაცული საფუძვლით დისკრიმინაციას საზოგადოებრივი ცხოვრების ყველა სფეროში", ნატქვამია სახალხო დამცველის ვებ-გვერდზე. სრულად... წყარო: www.ombudsman.ge

თბილისი. ღია და გამჭვირვალე მმართველობის მუდმივმოქმედი საპარლამენტო საბჭოს და საბჭოსთან არსებული საკონსულტაციო ჯგუფის წევრებმა საქართველოს საპარლამენტო ღიაობის 2017-2018 წლების სამოქმედო გეგმა დაამტკიცეს. „გეგმა მომზადდა პროექტ „საპარლამენტო დემოკრატიის სისტემის გაძლიერება საქართველოში" ფარგლებში, რომელსაც ახორციელებს IDFI ევროკავშირისა (EU) და გაეროს განვითარების პროგრამის (UNDP) მხარდაჭერით. დოკუმენტის მიზანია პარლამენტის საქმიანობის გამჭვირვალობის გაზრდა და საკანონმდებლო პროცესებში მოსახლეობის მაქსიმალური ჩართულობა. გეგმა ღია მმართველობის პარტნიორობის ხუთი ძირითადი პრინციპის (მოქალაქეთა ჩართულობა, ინფორმაციის ხელმისაწვდომობის უზრუნველყოფა, პარლამენტის ანგარიშვალდებულება და საქმიანობის გამჭვირვალობა, ტექნოლოგიები და ინოვაციები) მიხედვით შექმნილ 28 ვალდებულებას მოიცავს, რაც საქართველოს პარლამენტმა 2018 წლის ბოლომდე უნდა შეასრულოს", ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ბლოგპოსტს: „რეგიონული განვითარებისა და ინფრასტრუქტურის სამინისტრომ გამჭვირვალობის და კეთილსინდისიერების ამაღლების სტრატეგია დაამტკიცა". „ეს პოლიტიკის დოკუმენტები USAID-ის დემოკრატიული მმართველობის ინიციატივის (Good Governance Initiative) მხარდაჭერილი პროექტის ფარგლებში, IDFI-ს და სამინისტროს მჭიდრო თანამშრომლობის შედეგად შემუშავდა. პროექტის მიზანი იყო მმართველობის სფეროში საქართველოს რეგიონული განვითარების და ინფრასტრუქტურის სამინისტროს ინსტიტუციური შესაძლებლობების განვითარება და გამჭვირვალობის, კეთილსინდისიერების და ანგარიშვალდებულების მექანიზმების გაუმჯობესება, როგორც სამინისტროში ისე მის დაქვემდებარებაში და მართვაში არსებულ სუბიექტებში", ნათქვამია ორგანიზაციის ვებ-გვერდზე. სრულად... წყარო: idfi.ge

თბილისი. აღმოსავლეთ-დასავლეთის მართვის ინსტიტუტის პროგრამის „კანონის უზენაესობის მხარდაჭერა საქართველოში" ფარგლებში აქვეყნებს ანგარიშს საქართველოს ადამიანის უფლებათა დაცვის 2014-2020წწ. ეროვნული სტრატეგიის პროგრესის შესახებ. ანგარიში მოიცავს რეკომენდაციებს სამომავლო მიდგომებზე. სრულად... წყარო: ორგანიზაციის ვებ-გვერდი სოციალურ ქსელში

თბილისი. „საერთაშორისო გამჭვირვალობა - საქართველო” აქვეყნებს სახელმწიფო საკონსტიტუციო კომისიის მუშაობის შეფასებას. „ვფიქრობთ, რომ საკონსტიტუციო პროექტში ყველაზე მნიშვნელოვანი სამსჯელო საკითხები პარლამენტის საარჩევნო სისტემა და პრეზიდენტის არჩევის წესი იყო", ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. საერთაშორისო გამჭვირვალობა - საქართველო აქვეყნებს ბლოგპოსტს: „სახელმწიფო ვალის აღრიცხვის მეთოდოლოგია საერთაშორისო სტანდარტებს არ შეესაბამება". „როგორც ამ საკითხების კვლევამ გვიჩვენა სახელმწიფო ვალის განმარტება არ შეესაბამება საერთაშორისო ფინანსური ინსტიტუტების მიერ სახელმწიფო ვალის განმარტებას... შედეგად, თუ სახელმწიფო ვალის განმარტებაში სახელმწიფო საწარმოების ვალებსაც გავითვალისწინებთ, მაშინ სახელმწიფო ვალის ინდიკატორები მნიშვნელოვნად გაიზრდება, ამან კი გარკვეულწილად შეიძლება შეამციროს კრედიტორების მიერ ქვეყნისთვის გამოყოფილი სესხების ოდენობა. ეს ფაქტორი კი შეიძლება მთავარ მიზეზად განვიხილოთ იმისა, თუ რატომაც არ სურს მთავრობას სახელმწიფო საწარმოების ვალების სახელმწიფო ვალში გათვალისწინება," ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. კოალიცია დამოუკიდებელი და გამჭვირვალე მართლმსაჯულებისთვის ეხმაურება „სასამართლოს ავტორიტეტის დაცვის მიზნით გამოხატვის თავისუფლების შეზღუდვის ინიციატივას". „თავიდანვე ხაზგასმით უნდა აღინიშნოს, რომ სასამართლო სისტემაში დღეს არსებული სისტემური პრობლემების გათვალისწინებით, განსაკუთრებული მნიშვნელობა აქვს საზოგადოებას ქონდეს თავისუფალი შესაძლებლობა საჯარო დისკუსიები წარმართოს მათ გამომწვევ მიზეზებსა და გადაჭრის გზებთან დაკავშირებით. ამ ფონზე, სასამართლოს დამოუკიდებლობის დაცვის სახელით წარმოდგენილი ინიციატივები, რომლებიც მიზნად ისახავს ამ შესაძლებლობის შეზღუდვას, ატარებს ხელშესახებ და რეალურ საფრთხეს იძულებით დუმილში ამყოფოს საზოგადოების კრიტიკული ნაწილი, რითაც არათუ გადაიჭრას, არამედ კიდევ უფრო გაღრმავდეს დღეს არსებული პრობლემები", ნათქვამია განცხადებაში. სრულად... წყარო: ორგანიზაციის ვებ-გვერდი სოციალურ ქსელში

თბილისი. საქართველოს სტრატეგიული კვლევებისა და განვითარების ცენტრმა ფონდ „ღია საზოგადოება საქართველოს" გრანტის ფარგლებში განახორციელა პროექტი „არჩევნები და საჯარო ფინანსების მართვა". პროექტის მიზანი იყო საჯარო ფინანსების მართვის სისტემისა და წინასაარჩევნო პერიოდში შეზღუდვების უზრუნველყოფის კვლევა იმ საჯარო სამართლის იურიდიულ პირებში, რომლებიც არ ფინანსდებიან სახელმწიფო, ავტონომიური ან მუნიციპალური ბიუჯეტებიდან. „არჩევნებისას საჯარო ფინანსების ჩვეულებრივზე უფრო მეტი მოცულობით პირდაპირი თუ ირიბი გამოყენებს წლების განმავლობაში დამკვიდრებულ მავნე პრაქტიკად ჩამოყალიბდა", ნათქვამია კვლევაში. სრულად... წყარო: ორგანიზაციის ვებ-გვერდი სოციალურ ქსელში

თბილისი. 22 აპრილს საკონსტიტუციო კომისიამ კენჭი უყარა და დაამტკიცა საკონსტიტუციო ცვლილებების პროექტი. IDFI მიიჩნევს, რომ მიღებული პროექტი გარკვეულ პოზიტიურ სიახლეებთან ერთად, ასევე შეიცავს რამდენიმე მნიშვნელოვან ხარვეზს. „პროექტით მარტივდება მთავრობისთვის უნდობლობის გამოცხადების პროცედურა, რაც საპარლამენტო რესპუბლიკისთვის ასევე მნიშვნელოვანია", ნათქვამია ორგანიზაციის ვებ-გვერდზე. იხ. სრულად... წყარო: idfi.ge

თბილისი. კოალიცია „თანასწორობისთვის" აქვეყნებს ანგარიშს: „დისკრიმინაციისგან დაცვის უფლების განხორციელება სხვადასხვა ჯგუფებისთვის საქართველოში". „დოკუმენტი სხვადასხვა დისკრიმინირებული, მარგინალიზებული და მოწყვლადი სოციალური ჯგუფის (მათ შორის, ქალების, ლგბტ თემის, არადომინანტი რელიგიური და ეთნიკური ჯგუფების, ბავშვების, შშმ პირების, უსახლკარო პირების, პოლიტიკური ოპოზიციის) უფლებრივ მდგომარეობას ცალ-ცალკე აღწერს და ამ კუთხით 2016 წელს სახელმწიფოს მიერ გატარებული პოლიტიკის ძირითად ტენდენციებსა და ნაკლოვანებებს აფასებს", ნათქვამია განცხადებაში. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაცია აფასებს საჯარო სამსახურის ბიუროს მიერ შესამოწმებელი ქონებრივი დეკლარაციების შერჩევის პროცესს. ორგანიზაცია აქვეყნებს იმ თანამდებობის პირთა სიას, რომელთა ქონებრივი დეკლარაციები 2017 წლის განმავლობაში შემოწმდება „საია მიიჩნევს, რომ „საჯარო სამსახურში ინტერესთა შეუთავსებლობისა და კორუფციის შესახებ" საქართველოს კანონით დადგენილი ქონებრივი დეკლარაციების მონიტორინგის ვალდებულება 2017 წელს ნაწილობრივ სრულდება. იმის გათვალისწინებით, რომ 2017 წელს არ მოხდა დამოუკიდებელი კომისიის შექმნა და მათ მიერ თანამდებობის პირების შესამოწმებელი დეკლარაციების 5%-ის შერჩევა, აღნიშნული დეკლარაციების მონიტორინგის შესაძლებლობა არ იყო გამოყენებული. აღნიშნულზე პასუხისმგებლობა ეკისრება საქართველოს მთავრობას, რომელმაც, მიუხედავად დადგენილების მიღებისათვის ხანგრძლივი დროის არსებობისა, ვერ უზრუნველყო ქონებრივი დეკლარაციის მონიტორინგის ინსტრუქციის დროულად დამტკიცება", ნათქვამია ორგანიზაციის ვებ-გვერდზე. სრულად... წყარო: gyla.ge

თბილისი. „საერთაშორისო გამჭვირვალობა - საქართველო" და „ადამიანის უფლებების სწავლებისა და მონიტორინგის ცენტრის (EMC)" ერთობლივ ანგარიშს აქვეყნებს - „შინაგან საქმეთა სამინისტროს გამჭვირვალობის ხარისხის შეფასება”. „ანგარიში მიზნად ისახავს 2015 წლის რეფორმის შემდგომ საქართველოს შინაგან საქმეთა სამინისტროს გამჭვირვალობის ხარისხის განსაზღვრას, გამჭვირვალობის შემაფერხებელი კონკრეტული მიზეზების აღწერას, საქართველოს საპოლიციო სისტემაში დაცულ ინფორმაციაზე ხელმისაწვდომობის გაზრდასა და შინაგან საქმეთა სამინისტროს სტრუქტურისა და სისტემის ანალიზს.", ნათვამია ორგანიზაციის ვებ-გვერდზე. სრულად... წყარო: www.transparency.ge

თბილისი. საქართველოს ახალგაზრდა იურისტთა ასოციაცია ავრცელებს ინფორმაციას, რომ მათი რეკომენდაციების დიდი ნაწილი 2017-2018 წლების განახლებული ანტიკორუფციული სტრატეგიისა და სამოქმედო გეგმის ბოლო ვერსიაში არ აისახა. „არაერთი სამუშაო შეხვედრის და შეთავაზებული საკითხების დეტალური განხილვის შემდეგ, 2017-2018 წლების ეროვნულ ანტიკორუფციულ სტრატეგიასა და სამოქმედო გეგმაში გათვალისწინებული იქნა პოლიტიკურ პარტიებთან და სასამართლო ხელისუფლებასთან დაკავშირებით საქართველოს ახალგაზრდა იურისტთა ასოციაციის მიერ წარდგენილი წინადადებები, რაც დადებით შეფასებას იმსახურებს. თუმცა, სტრატეგიის მიღმა დარჩა არაერთი მნიშვნელოვანი წინადადება", ნათქვამია ორგანიზაციის ვებ-გვერდზე. სრულად... წყარო: gyla.ge

თბილისი. ოთხი არასამთავრობო ორგანიზაცია კონსტიტუციის გადასინჯვის პროექტს აფასებს. „მიგვაჩნია, რომ კონსტიტუციის გადასინჯვის კანონპროექტით გათვალისწინებული მთელი რიგი საკითხები საჭიროებს გადამუშავებას და სამომავლო დახვეწას, რათა უზრუნველყოფილი იქნეს საერთაშორისო სტანდარტებსა და დემოკრატიის პრინციპებთან თანხვედრაში მყოფი კონსტიტუციის მიღება. ყველა პრობლემურ საკითხთან დაკავშირებით კომისიის სხდომაზე ჩვენ დავაყენებთ ალტერნატიულ წინადადებებს. იმედს ვიტოვებთ, რომ კომისიის შემაჯამებელ სხდომაზე და საპარლამენტო განხილვებისას შეიცვლება ზემოაღნიშნული მანკიერი დებულებები და შენარჩუნებული იქნება ყველა გაუმჯობესება, რომელიც დადებითად იქნა შეფასებული სამოქალაქო სექტორის მხრიდან", ნათქვამია ორგანიზაციის ვებ-გვერდზე. სრულად... წყარო: www.isfed.ge

თბილისი. საქართველოს ახალგაზრდა იურისტთა ასოციაცია (საია) აქვეყნებს ბლოგპოსტს: „ცესკო, უზრუნველყოფილი სიბერე". „ცენტრალური საარჩევნო კომისიის - ცესკოს წევრობა სხვა უამრავ მიზეზთან ერთად, ბევრისთვის ალბათ იმიტომაც არის სასურველი, რომ საჯარო სექტორში ერთ-ერთი ყველაზე მაღალი ანაზღაურებაა. 2015 წელს ცესკოს მიერ დამტკიცებული განკარგულების თანახმად, ცესკოს თავმჯდომარის ანაზღაურება თვეში 5,500 ლარს შეადგენს, მოადგილის 4,700 ლარს, ხოლო კომისიის მდივნის 4,600 ლარს... პარლამენტში ცესკოს საკანონმდებლო წინადადება დარეგისტრირდა, რომლის თანახმადაც, ცესკოს წევრი და აპარატის მოხელეები კომპენსაციის/სახელმწიფო აკადემიური სტიპენდიის მიღების უფლების მქონე სუბიექტების სტატუს მიიღებენ. „განმარტებითი ბარათის ყველაზე გამართული და დასაბუთებული ნაწილია პასუხი კითხვაზე, რომელიც კანონპროექტის მოსალოდნელ ფინანსურ შედეგებს ეხება იმ პირთათვის, ვისზეც ეს კანონპროექტი ვრცელდება. ბარათში სიტყვა სიტყვით წერია, - „კანონპროექტის მიღება არ გააუარესებს იმ პირთა ფინანსურ მდგომარეობას, რომელთა მიმართაც ვრცელდება მისი მოქმედება." დიახ, არ გააუარესებს და ძალიანაც რომ მოინდომოს რომელიმე მათგანმა ვერ გააუარესებს", ნათქვამია ორგანიზაციის ვებ-გვერდზე. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაცია ეხმაურება სახელმწიფო უსაფრთხოების სამსახურის ანგარიშის განხილვის სრულად დახურვას. „დასახელებული შემთხვევა, კიდევ ერთხელ ცხადყოფს უსაფრთხოების სამსახურის მიმართ ეფექტური საპარლამენტო კონტროლის მექანიზმების დანერგვის საჭიროებას, რომელიც არ შემოიფარგლება მხოლოდ საკომიტეტო/პლენარული მოსმენების რეჟიმით და მათ შორის გაითვალისწინებს როგორც ღია, ასევე დახურული ფორმატის შეხვედრებს სხვადასხვა კატეგორიის აუდიტორიისთვის. აღნიშნულის საჭიროება, არაერთხელ იქნა დაფიქსირებული სამოქალაქო სექტორის მხრიდან. იმედს ვიტოვებთ, რომ საქართველოს პარლამენტი დაინახავს აღნიშნულ საჭიროებას და იმუშავებს შესაბამის საკანონმდებლო ცვლილებებზე", ნათქვამია ორგანიზაციის განცხადებაში. სრულად... წყარო: gyla.ge

თბილისი. 18 აპრილს, ნატოსა და ევროკავშირის საინფორმაციო ცენტრში მედიის განვითარების ფონდმა ანგარიშის „ანტიდასავლური პროპაგანდა 2016" პრეზენტაცია გამართა. ანგარიში მომზადდა მედიის განვითარების ფონდის მიერ, „ტოლერანტობის, სამოქალაქო ცნობიერებისა და ინტეგრაციის მხარდაჭერის პროგრამის" ფარგლებში, რომელიც ხორციელდება საქართველოს გაეროს ასოციაციის მიერ, აშშ-ის საერთაშორისო განვითარების სააგენტოს ფინანსური მხარდაჭერით. სრულად... წყარო: mdfgeorgia.ge

თბილისი. „საერთაშორისო გამჭვირვალობა - საქართველო" პერიოდულად აქვეყნებს ინფორმაციას საჯარო დაწესებულებებში დასაქმებულთა შრომის ანაზღაურების მოცულობაზე, დანამატებისა და პრემიების გაცემის პერიოდულობასა და ზოგადად, ადმინისტრაციულ ხარჯებზე. „ამჯერად წარმოგიდგენთ აჭარის ავტონომიური რესპუბლიკის მთავრობაში 2016 წელს თანამშრომლებზე დარიცხულ შრომის ანაზღაურების სტატისტიკას, სამართლებრივ რეგულაციას და არსებული პრაქტიკის გასაუმჯობესებლად ორგანიზაციის მიერ დამუშავებულ რეკომენდაციებს. „საერთაშორისო გამჭირვალობა - საქართველოს" მიერ შესწავლილი პრაქტიკა აჩვენებს, რომ ზემოთ ნახსენებმა მთავრობის დადგენილებებმა ვერ უზრუნველყვეს პრობლემის მოგვარებას - ახალმა რეგულაციებმა პრემიების სახელფასო დანამატით ჩანაცვლება გამოიწვია. ამის ერთ-ერთი ძირითადი მიზეზი ისაა, რომ თავად აღნიშნული რეგულაციები არაერთ ხარვეზს შეიცავს, რასაც ორგანიზაციამ არაერთხელ გაუსვა ხაზი", ნათქვამია ორგანიზაციის ვებ-გვერდზე. სრულად... წყარო: www.transparency.ge

თბილისი. არასამთავრობო ორგანიზაციების ეხმაურებიან მოსაზრებებს ქორწინების საკონსტიტუციო ცვლილებებთან დაკავშირებით. „ხელმომწერი არასამთავრობო ორგანიზაციები უარყოფითად ვაფასებთ კონსტიტუციაში ქორწინების განსაზღვრის შესახებ საკონსტიტუციო კომისიაში წარმოდგენილ ინიციატივას. შემოთავაზებული ფორმულირებით საკონსტიტუციო ჩანაწერი ჰომოფობიურ კონოტაციას ატარებს და ხელს შეუწყობს ლგბტ პირების მიმართ ნეგატიური განწყობების გაძლიერებას. კონსტიტუციაში ამ ცვლილების შეტანას ექნება მსუსხავი ეფექტი ადამიანის უფლებების მდგომარეობაზე ქვეყანაში. აღნიშნული ცვლილების მიღების შემთხვევაში კი, მისი ნეგატიური ეფექტის დაბალანსების მიზნით, აუცილებელია პარალელურად დაიწყოს საკანონმდებლო ცვლილებების პროცესი სამოქალაქო პარტნიორობის, როგორც ერთი და იმავე სქესის წყვილების სამართლებრივი აღიარების ფორმის, დასაკანონებლად", ნათქვამია ერთობლივ განცხადებაში. სრულად... წყარო: www.isfed.ge

თბილისი. 6 აპრილს, საიამ პროექტის - „კორუფციასთან ბრძოლა საჯარო შესყიდვების გამჭვირვალობისა და ანგარიშვალდებულების ზრდის ხელშეწყობით" შემაჯამებელი ღონისძიება გამართა. „პროექტის განხორციელების დროს მომზადდა 10 კვლევა, 4 ბლოგი, 33 სარჩელი (ინფორმაციის თავისუფლების საკითხებთან დაკავშირებულ საკითხებზე), 8 რეკომენდაცია/დასკვნა, 1 პოლიტიკის დოკუმენტი, 181 განცხადება საჯარო ინფორმაციის გაცემის თაობაზე და სხვა", ნათქვამია ახალგაზრდა იურისტთა ასოციაციის ვებ-გვერდზე. სრულად... წყარო: gyla.ge